1. Wa’ faso nge lenda tunga kindiku ya ngolo na muntu?

KIMA ya ntete ya kusala na kutunga kindiku ya ngolo na muntu, ni kuvanda na kifu ya kulutisá ntangu mingi na yandi. Beno ke kuma bandiku, ntangu beno ke solola mingi na mambu yina me tadila luzingu ya beno. Kasi bantangu ya nkaka, ya ke vandá mpasi na kukuma ndiku ya Yesu. Samu na yinki?

2. Na kukuma ndiku ya Yesu, wapi mambu ya ntete ya mpasi beto ke kutaná na yawu?

² Mambu ya ntete ya mpasi ke: Beto talá ve Yesu. Bakristo mingi mpe na ntangu ya ba-apotre talá ve yandi. Kasi apotre Piere zonzá: “Beno ke zolak’ yandi ata ti beno ke talá ve yandi. Beno ke kwikilá na yandi ata ti beno talá ve yandi.” (1 Pi. 1:8) Kasi beto lenda sala kindiku ya ngolo na Yesu, ata beto talá ve yandi.

3. Na kukuma ndiku ya Yesu, wapi mambu ya zole ya mpasi beto ke kutaná na yawu?

³ Mambu ya zole ya mpasi ke: Beto lenda solola ve na Yesu. Ni na Yehova beto ke zonzá ntangu beto ke sambilaka. Ya tsyeleka, beto ke sambilá na nkumbu ya Yesu, kasi ni yandi ve beto ke sambilaka. Yesu zola mpe ve ti beto sambila yandi. Samu na yinki? Samu ti lusambu ke mosi ya bafaso ya kupesa nkembo na Yehova, mpe kaka ni yandi beto me bonga kusambila.  (Mat. 4:10) Ata faso yina, beto lenda lakisa luzolo ya beto na Yesu.

4. Na kukuma ndiku ya Yesu, wapi mambu ya tatu ya mpasi beto ke kutaná na yawu?

⁴ Mambu ya mpasi ya tatu ke: Yesu ke vandá na zulu. Beto lenda lutisa ve ntangu kisika mosi na yandi. Kasi, beto lenda longoka mingi na luzingu ya Yesu ata beto ke ve kisika mosi na yandi. Beto ke longoka bima yiya yina beto lenda sala samu kindiku ya beto na yandi kuma ngolo. Na kubanda, beto tala samu na yinki ya ke mfunu na beto na kutunga kindiku ya ngolo na Yesu.

5. Samu na yinki beto me bonga kuvanda na bundiku na Yesu? (Tala mpe batablo “ Bundiku na Yesu ke natá na bundiku na Yehova” mpe “ Tadila Yesu na faso ya mbote.”)

⁵ Beto ke vanda na bundiku ya mbote na Yehova, kaka si beto vanda bandiku ya Yesu. Samu na yinki? Beto tala barezon zole. Ya ntete, Yesu zonzá na bilandi ya yandi ti: “Tata yandi mosi ke zolá beno, samu beno ke zolá munu.” (Yoa. 16:27) Yandi zonzá dyaka: “[Ata muntu] lenda [kwenda] na sika ya Tata, si yandi lutila ve na munu.” (Yoa. 14:6) Kusosa kuvanda ndiku ya Yehova si beto ke ve na kindiku ya ngolo na Yesu, ke faso kumanga kusadila porte samu na kukota na yinzo. Yesu sadilá mpe kifwani yina, ntangu yandi zonzá ti yandi mosi ke mutindu “porte ya mameme.” (Yoa. 10:7) Rezon ya zole, Yesu landá mbote-mbote kifwani ya Tata ya yandi. Yandi zonzá na bilandi ya yandi: “Muntu yina me tala munu, me tala mpe Tata ya munu.” (Yoa. 14:9) Kasi, faso ya mbote ya kuzaba Yehova, ni ya kulongoka na kuzaba luzingu ya Yesu. Ntangu beto ke longoka na kuzaba Yesu, luzolo ya beto samu na yandi ke kula. Mpe ntangu bundiku ya  beto na Yesu ke kula, luzolo ya beto samu na Tata ya yandi mpe ke kuma ngolo.

6. Wapi rezon ya nkaka ke sala ti beto vanda na kindiku na Yesu? Zonzila yawu.

⁶ Beto me bonga kuvanda na bundiku na Yesu samu Yehova kuwa balusambu ya beto. Ya zola zonza ti, beto zolá suka ve kaka na kuzonzá “na nkumbu ya Yesu” na nsuka ya balusambu ya beto. Beto me bonga kuzaba samu na yinki Yehova ke sadilá Yesu samu na kupesa bamvutu na balusambu ya beto. Yesu zonzá na ba-apotre: “Nyonso yina beno ke lomba na nkumbu ya munu, Mu ke sala yawu.” (Yoa. 14:13) Kasi, kaka ni Yehova muntu ke kuwá mpe ke pesá bamvutu na balusambu ya beto. Yandi pesá Yesu lutumu (pouvoir) ya kulungisa badesizion ya yandi. (Mat. 28:18) Avant yandi pesa bamvutu na balusambu ya beto, yandi ke talá ntete si beto ke sadilá malongi yina Yesu pesaka. Na kifwani, Yesu zonzá: “Si beno lemvokila bampangi ya beno yimbi yina ba ke salá beno, Tata ya beno yina ke na mazulu ke lemvokila beno mpe.” (Mat. 6:14, 15) Ya ke mfunu mingi na kubakilá bampangi faso Yehova ke bakilá bawu!

7. Nani ke kuzwa bambote yina mukayulu ya Yesu ke nata?

⁷ Kaka ba yina ke na kindiku ya ngolo na Yesu ke kuzwa bambote yina mukayulu ya yandi ke nata. Wa’ faso beto me zaba yawu? Yesu zonzá ti yandi ke “pesa luzingu ya yandi samu na bandiku ya yandi.” (Yoa. 15:13) Bisadi ya Yehova yina zingá avant Yesu kwiza awa na ntoto, ke longoka na kuzaba yandi mpe na kuzola yandi. Babakala na bakento faso Abraham, Sara, Moyize mpe Rahab ke vutuka na luzingu. Kasi bawu mpe ke vanda na nsatu ya kusala kindiku na Yesu samu na kuzwa luzingu ya ntangu nyonso.—Yoa. 17:3; Bis. 24:15; Ebr. 11:8-12, 24-26, 31.

8-9. Faso ke na zonzá Yoane 15:4, 5, yinki beto lenda sala si beto ke bandiku ya Yesu, mpe samu na yinki ya ke mfunu?

⁸ Beto ke na kilengi ya kusala kintwadi na Yesu na kisalu ya predikasion. Ntangu Yesu vandá awa na ntoto, yandi vandá mulongi. Ntangu yandi vutuká na zulu, Yesu, yintu ya kimvuka ya bakristo, ke kaka na twadisá kisalu ya kusamuna na ya kulonga nsangu ya mbote. Yandi ke talá, mpe ke sepelá na bangolo yina beto ke salá samu na kusadisa bantu mingi na kuzaba yandi na Tata ya yandi. Na yawu, beto lenda lungisa kisalu yayi kaka si Yehova na Yesu me sadisa beto.—Tanga Yoane 15:4, 5.

⁹ Biblia ke longá pwelele ti, beto me bonga kuvanda mpe kubumba luzolo na Yesu, samu na kusepelisa Yehova. Beto tala bima yiya yina beto lenda sala, samu na kukuma bandiku ya Yesu.

10. Wapi kima ya ntete beto zolá sala samu na kutunga kindiku ya mbote na Yesu?

¹⁰ 1) Longoka na kuzaba Yesu. Beto lenda sala yawu si beto tanga buku ya Matayi, ya Marke, ya Luke, mpe ya Yoane. Si beto baka ntangu ya kukanisa na masolo ya Biblia yina ke zonzilá Yesu, beto ke banda kuzola mpe kuzitisa Yesu, samu na faso ya mbote yina yandi vandá bakilá bantu. Na kifwani, ata yandi vandá ntwadisi ya bilandi ya yandi, yandi vandá bakilá ve bawu mutindu bangaamba. Kasi, yandi vandá zonzilá bawu makanisi ya yandi. (Yoa. 15:15) Ntangu ba vandá na basusi, Yesu mpe vandá na basusi mpe vandá dilá na bawu. (Yoa. 11:32-36) Ba-enemi ya Yesu zabá ti ba yina kuwá malongi ya Yesu yayi, kumá bandiku ya yandi. (Mat. 11:19) Ntangu beto ke landá kifwani ya Yesu na faso  yina yandi vandá bakilá bilandi ya yandi, bundiku ya beto na bampangi ke kula, beto ke vanda na kilengi, mpe luzolo ya beto samu na Kristo ke kula.

11. Wapi kima ya zole beto zolá sala samu na kuvanda bandiku ya Yesu, mpe samu na yinki ya ke mfunu?

¹¹ 2) Landa kifwani ya Yesu na makanisi mpe na ndyatulu ya nge. Ntangu beto ke zaba mpe ke landa faso ya Yesu ya kukanisa, bundiku ya beto na yandi ke kuma dyaka ngolo. (1 Ko. 2:16) Wa’ faso beto lenda landa kifwani ya Yesu? Kanisa na kifwani yayi. Yesu vandá kanisá mingi na faso ya kusadisa bampangi, kasi na bansatu ya yandi mosi ve. (Mat. 20:28; Rom. 15:1-3) Samu yandi vandá kanisá faso yina, yandi vandá sadisá bampangi, mpe vandá lemvokilá yimbi yina ba vandá salak’ yandi. Yandi vandá dasuká ve na mbangu na yina bantu vandá zonzá samu na yandi. (Yoa. 1:46, 47) Mpe yandi biká ve nzila na disumu yina muntu salá ntama, soba faso ya yandi ya kutadila muntu yina. (1 Tim. 1:12-14) Yesu zonzá: “Bantu ke zaba ti beno ke bilandi ya munu, si beno zolasana beno na beno.” (Yoa. 13:35) Ya ke mbote na kuyufula kyuvu yayi: “Mu ke na landá kwandi kifwani ya Yesu, mpe ke na salá nyonso yina mu lenda sala samu na kuvanda na kindiku na bampangi ya munu?”

12. Wapi kima ya tatu beto zolá sala samu na kuvanda bandiku ya Yesu, mpe wa’ faso beto lenda sala yawu?

¹² 3) Sadisa bampangi ya Yesu. Nyonso beto ke salá samu na kusadisa bampangi ya Yesu, na meso ya yandi, ya ke ni na yandi beto ke salak’ yawu. (Mat. 25:34-40) Faso ya kulutila mfunu ya kusadisa bakristo yina Yehova solá, ke ni kusadila bangolo ya beto na kisalu ya predikasion faso Yesu lombá beto yawu. (Mat. 28:19, 20; Bis. 10:42) Bampangi ya Yesu lenda lungisa bisalu ya predikasion yina ke na salamá bubu yayi na yinza nyonso, kaka si “mameme ya nkaka” sadisa bawu. (Yoa. 10:16) Si nge ke mosi ya mameme ya nkaka, ntangu nyonso yina nge ke lutisá na kisalu yayi, ke lakisá luzolo ya nge samu na ba yina Yehova solá, mpe samu na Yesu yandi mosi.

13. Wa’ faso beto lenda sadila malongi ya Yesu yina ke na Luke 16:9?

¹³ Beto ke salá mpe bundiku na Yehova na Yesu, ntangu beto ke sadilá mbongo ya beto samu ba lungisa kisalu yina ba ke twadisaka. (Tanga Luke 16:9.) Na kifwani, beto lenda pesa dikabu yina ba ke sadila samu na kulungisa kisalu ya predikasion na bateritware ya ntama, samu na kutunga mpe kubumba ba-salle du Royaume mpe bayinzo ya nkaka ya kimvuka, mpe samu na kusadisa bampangi yina mipepe na bamvula ya ngolo, to bima ya nkaka me natina bampasi. Beto lenda tula mpe makabu samu na kulungisa bansatu ya kimvuka ya beto, mpe na kusadisa bampangi yina ke na nsatu ba sadisa bawu. (Bin. [Prov.] 19:17) Ni na bafaso yayi beto lenda sadisa bampangi ya Kristo.

14. Faso ke zonzá Baefeze 4:15, 16, wapi kima ya yiya beto lenda sala samu na kuvanda ndiku ya Yesu?

¹⁴ 4) Ndima mpe zitisa badesizion ya kimvuka. Bundiku ya beto na Yesu ke kuma ngolo si beto vanda na kifu ya kuzitisá badesizion ya ba yina yandi tulá na kimvuka samu na kukipe beto. (Tanga Baefeze 4:15, 16.) Na kifwani, beto ke na salá nyonso samu ti bimvuka yina ke sadila salle du Royaume mosi vanda mingi. Na yawu, ya ke na bimvuka ke vukaná na salle du Royaume mosi mpe ba ya nkaka ba me vukisa bawu samu ba kuma kimvuka mosi, mpe ba ke kabula teritware mosi. Faso ya kusala yayi, ke salá ti kimvuka ya Yehova kuzwa mbongo yina yandi ke sadila na mambu ya nkaka. Samu na yawu, baproklamatere ya nkaka me  yidika programe ya bawu samu na kutumama na badesizion yina. Baproklamatere yango salá bamvula mingi na kimvuka ya bawu, mpe kuna ba lutisá bantangu mingi na bampangi ya kento na ya bakala. Kasi awa, ba me lomba na bawu na kubika kimvuka ya bawu. Yesu ke vandá na kilengi mingi ntangu yandi ke talá faso bampangi yayi ke zitisá badesizion yayi.

15. Wa’ faso bundiku ya beto na Yesu ke kula na bilumbu ke kwiza?

¹⁵ Ba yina ba solá na mpeve ya santu ke na kivuvu ya kuzinga ntangu nyonso na Yesu, mpe ya kuyala kintwadi na yandi na kimfumu ya Nzambi. Ba ke tala Yesu, ke solola na yandi, mpe ke lutisa ntangu kintwadi na yandi. (Yoa. 14:2, 3) Ba yina ke na kivuvu ya kuzinga awa na ntoto, ke tala mpe luzolo ya Yesu. Ata ba ke tala ve Yesu, bundiku ya bawu na yandi ke kuma dyaka ngolo ntangu ba ke sepela na luzingu yina Yehova na Yesu me pesa bawu.—Iza. 9:6, 7.

16. Wapi bambote kindiku ya beto na Yesu ke pesa beto?

¹⁶ Beto ke kuzwa bambote mingi, ntangu beto ke ndima kukuma bandiku ya Yesu. Na kifwani, bubu yayi beto ke sepelá na luzolo ya yandi, mpe na faso yina yandi ke sadisá beto. Beto ke na bweso ya kuzinga ntangu nyonso. Mpe ya kulutila mfunu, kindiku ya beto na Yesu ke pesa beto bweso ya kukuma na kindiku ya kulutila ngolo na Tata ya yandi, Yehova. Ya ke bweso ya nene kuvanda ndiku ya Yesu!