1. Yisinke o rugana yipo o tulise po ukaume wounene nagumwe?

NSENE ono hara kutulisa po ukaume nagumwe, wa hepa kulitulira po siruwo sokukara kumwe nendi. Ngomu muna kuzogera kumwe nokulitantera omu muna kulizuvha, ayo ngayi mu ninkisa mu kare vakaume. Nye ayo kapisi ureru kutulisa po ukaume naJesus. Morwasinke?

2. Konda musinke zokuhova zeyi ayi tu karerere pamwe udigu kutulisa po ukaume naJesus?

² Konda zokuhova kuna kara asi morwa kapi twa mona Jesus. Vakriste wovanzi ava va parukire mosiruwo sovapositoli nawo kwa ligwanekerere noudigu owo. Nampili ngoso, mupositoli Peturusa kwa tente asi: “One kwa hara Karunga, nampili ngomu mwa dira kumumona. One kwa mu pura, nampili ngomu muna kudira kumumona ntaantani.” (1 Pet. 1:8) Eyi kulikida asi kuvhura tu tulise po ukaume naJesus nampili ngomu twa dira kumumona.

3. Konda musinke zauvali zeyi ayi tu karerere pamwe udigu kutulisa po ukaume naJesus?

³ Konda zauvali kuna kara asi morwa kapi atu uyunga naJesus. Apa atu kanderere, ose kuuyunga naJehova. Nampili ngomu atu kanderere kupitira mwaJesus, nye kapi atu uyunga nendi. Ntani Jesus kapi ana hara asi tu kanderere kwendi morwa ekanderero kuna kara ruha roukareli wetu ano Jehova yige gelike ga fira kumukarera. (Mat. 4:10) Nye nampili ngoso, ose kuvhura tu yi likide asi twa hara Jesus.

4. Konda musinke zautatu zeyi ayi tu karerere pamwe udigu kutulisa po ukaume naJesus?

 ⁴ Konda zautatu kuna kara asi morwa Jesus kwa kara meguru, yipo nye kapi tatu vhuru kukara nendi. Nye kuvhura simpe tu lironge yoyinzi kuhamena Jesus nampili ngomu atu dili kukara kumwe nage. Tatu ka zogera yininke yine eyi natu rugana yipo tu nkondopeke ukaume wetu naJesus. Nye pomuhowo, tu tareni eyi ya karera nomulyo tu tulise po ukaume wounene naKristusa.

5. Morwasinke natu tulisira po ukaume naJesus? (Tara kakende “ Ukaume naJesus kutwaredesa koukaume naJehova” ntani “ Tara Jesus monkedi zouhunga.”)

⁵ Twa hepa kutulisa po ukaume naJesus, nsene tuna hara kukara nelikwatakano lyewa naJehova. Morwasinke? Koneka nokonda mbali edi dina kukwama ko. Zokuhova, Jesus kwa tanterere varongwa vendi asi: “Tate mwene kwa mu hara, morwa one kwa hara nge.” (Joh. 16:27) Age kwa tente hena asi: “Nagumwe si a wiza kwaTate, age ga hana kupitira pwange.” (Joh. 14:6) Nsene tu hetekera ko kukara kaume kaJehova ose twa hana kutunga po ukaume wounene naJesus, ayo kwa fana ngwendi muntu ogu ana hara kuhwilira monzugo ga hana kupitira kevero. Jesus kwa ruganesere sifanekeso sokulifana apa ga tente asi age, “evero lyokononzwi.” (Joh. 10:7) Konda zauvali kuna kara asi Jesus kwa honenene yikara yoGuhwe. Age kwa tanterere varongwa vendi asi: “Ogu ga mona nge, ga mona hena Tate.” (Joh. 14:9) Yipo nye, nkedi zomulyo omu natu diva Jehova kuna kara pokulironga yoyinzi kuhamena Jesus. Nsene tu lironga kuhamena Jesus, ose ngatu mu  hara. Ano ngomu ngatu hara unene Jesus, ayo ngayi tu tumangeda hena tu hare unene oGuhwe.

6. Konda musinke hena zimwe zeyi natu tulisira po ukaume naJesus? Faturura.

⁶ Twa hepa kutulisa po ukaume naJesus yipo makanderero getu va ga limburure. Eyi kulikida asi twa hepa kurugana ko yuma kupitakana tupu kuuyunga mekanderero lyetu asi “kuna kuyihundira kupitira mwaJesus.” Twa hepa kukwata egano monkedi omu Jehova a ruganesa Jesus yipo a limburure makanderero getu. Jesus kwa tanterere vapositoli vendi asi: “Nkenye eyi ngomu hundilira medina lyange, ngani yi rugana.” (Joh. 14:13) Nampili ngomu ya kara asi Jehova yige a zuvhu makanderero getu nokugalimburura, age kwa gava nonkondo kwaJesus yipo a sikise mo eyi a tokora Jehova. (Mat. 28:18) Yipo nye, komeho Karunga a limburure makanderero getu, age kutara nsene asi ose kuna kusikisa mo mapukururo aga ga geve Jesus. Pasihonena, Jesus kwa tente asi: “Nsenesi mu dongwenena po vantu maunzoni gawo, Guhyeni gemeguru ngano nage nga mu dongwenena po aga geni. Ano nsenesi mu dira kudongwenena po vantu maunzoni gawo, Guhyeni gemeguru nage ngano kapi nga mu dongwenena po maunzoni geni.” (Mat. 6:14, 15) Eyi yiyo ya karera nomulyo tu tekure wopeke ngwendi moomu tupu Jehova naJesus ava tekura vantu navenye!

7. Wolye ava gwanene mo uwa monzambo zaJesus zosizoweseso?

⁷ Vantu ava ava tulisa po ukaume wounene naJesus yiwo velike ngava gwanena mo uwa monzambo zendi zosizoweseso. Ngapi omu twa yi diva? Jesus kwa tente asi age nga ‘fira vakwawo’ ndi vakaume vendi. (Joh. 15:13) Vantu ava ngava karere Jehova komeho Jesus a wize pevhu, ngava ka lironga kuhamena Jesus nokumuhara. Pasihonena, Abirahamu, Sara, Mosesa ntani Rahabu ngava kava vhumbura, nye mokuninka asi va ka gwane mwenyo gwanarunye, awo va hepa kukalironga kuhamena Jesus.—Joh. 17:3; Yirug. 24:15; Heb. 11:8-12, 24-26, 31.

8-9. Ngomu va yi faturura mwaJohanesa 15:4, 5, mokumona asi ose vakaume vaJesus, yisinke twa hepa kurugana ntani morwasinke ya karera nomulyo?

⁸ Ayo kutuhafesa kweyi atu rugana kumwe naJesus mosirugana sokuzuvhisa nokuronga vantu mbudi zongwa zoUhompa waKarunga. Apa Jesus ga kere pevhu, age kwa kere murongi. Ntani kutunda tupu apa ga tengwire meguru, age kupitisira sirugana sokuzuvhisa nokuronga morwa yige mutwe gombungakriste. Age kukumona ntani kuyihafera apa o litura mo unene yipo o vatere vantu va mu dive ntani noGuhwe. Diworoka asi, ose kusikisa mo sirugana esi kupitira tupu mevatero lyaJehova naJesus.—Resa Johanesa 15:4, 5.

⁹ Nonkango daKarunga kututantera asi mokuninka asi tu hafese Jehova, twa hepa kuhara Jesus. Tu tareni yininke yine eyi twa hepa kurugana yipo tu kare vakaume vaJesus.

10. Sininke musinke sokuhova natu rugana yipo tu tulise po ukaume naJesus?

¹⁰ (1) Diva Jesus. Kuvhura tu dive Jesus nsene tu resa buke zaMateusa naMarukusa naRukasa ntani zaJohanesa. Nsene tu teda ko koyihorokwa yomoBibeli kuhamena omu Jesus ga tekwire vantu nonkenda, ayo ngayi tu vatera tu hare Jesus nokumufumadeka. Pasihonena, nampili ngomu Jesus ga kere Hekurwawo, age kapi ga  tekwire varongwa vendi ngwendi vakareli. Nye age ngava pwagesere malizuvho gendi neyi nga gazara. (Joh. 15:15) Apa varongwa vendi va guvire, Jesus nage kwa guvire. (Joh. 11:32-36) Vantu ava va rwanesere Jesus nawo va yi dimbwilire asi Jesus kwa tulisire po ukaume novantu ava va tambwire mbudi zendi. (Mat. 11:19) Nsene tu honena Jesus monkedi omu nga tekura varongwa vendi, ose ngatu tulisa po ukaume wouwa novakwetu. Ose hena ngatu hafa nokulizuvha asi ya tu gwanena po eyi twa kara nayo. Ayo ngayi tu vatera hena tu hare unene Jesus nokumufumadeka.

11. Sininke musinke sauvali natu rugana yipo tu tunge po ukaume naJesus ntani morwasinke sa karera nomulyo?

¹¹ (2) Gazara ntani rugana ngwendi Jesus. Nsene tu diva matedo gaKristusa nokumuhonena, ose ngatu tunga po ukaume wounene kumwe nage. (1 Kol. 2:16) Ngapi omu natu honena Jesus? Tu tareni sihonena simwe. Jesus nga gazara nkenye apa omu na vatera wopeke mevango lyokulipakera mwene mbili. (Mat. 20:28; Rom. 15:1-3) Eyi kwa mu ninkisire a lizambere nokugusira po vakwawo. Age kapi nga handuka usimbu kweyi ngava mu uyungire vantu. (Joh. 1:46, 47) Ntani kapi ga pulisilire epuko eli ga rugene gumwe nare li mu ninkise a tekure muntu ogo mwapeke. (1 Tim. 1:12-14) Jesus kwa tente asi: “Nsene mu lihara-hara, yipo ngava divira vantu asi one sili varongwa vange.” (Joh. 13:35) Lipura nyamoge asi: “Ame kuna kukwama sihonena saJesus pokutulisa po mbili novapuli vakwetu ndi?

12. Sininke musinke sautatu natu rugana yipo tu tunge po ukaume naJesus?

¹² (3) Kwatesa ko vamumbya vaKristusa. Jesus kutara yininke eyi atu ruganene vagwaveka asi yige tuna kuyiruganena. (Mat. 25:34-40) Nkedi zonene po omu atu kwatesa ko vagwaveka kuna kara pokulitura mo unene mosirugana sokuzuvhisa nokutulisa po varongwa ngwendi moomu tupu ga yi tu rekerere Jesus. (Mat. 28:19, 20; Yirug. 10:42) Nevatero ‘lyononzwi dapeke,’ vamumbya vaKristusa kuna kusikisa mo sirugana sawo sokuzuvhisa mouzuni mudima. (Joh. 10:16) Nsene ove kwa hamena kononzwi dapeke, diva asi nkenye apa o li hameke mosirugana esi, ove ngoso kuna kulikida eharo kwaJesus ntani kovamumbya vendi.

13. Ngapi omu natu tura pasirugana epukururo lyaJesus eli lyakara mwaRukasa 16:9?

¹³ Kuvhura tu tulise po ukaume naJehova ntani naJesus, pokugava yimaliwa yipo yi vatere mosirugana esi ava pitisire. (Resa Rukasa 16:9.) Pasihonena, kuvhura tu gave yigava koyirugana youzuni mudima, ano yigava eyi kuyiruganesa yipo mbudi zongwa zi ka sike komavango gokoure ndi mokutunga mavango getu goukareli nokugawapukurura ntani nokuvatera moyimpagwa. Kuvhura hena tu gave yigava yipo va yi ruganese koyihepwa yomombungakriste zetu ndi kuvhura tu gave kovakwetu ava vana hepa evatero. (Yis. 19:17) Edi kuna kara nonkedi dimwe omu natu kwatesa ko vamumbya vaKristusa.

14. Kuliza noVaefeso 4:15, 16, sininke musinke saune natu rugana yipo tu tunge po ukaume naJesus?

¹⁴ (4) Kwatesa ko mbunga zaJehova. Apa atu kwatesa ko ava va horowora va tu pitisire, ose kukara vakaume wovanene vaJesus morwa yige mutwe gombungakriste. (Resa Vaefeso 4:15, 16.) Pasihonena, ose ngesi kuna kuhetekera ko kuruganesa Yinyanga yoUhompa monaruwa. Eyi kwa ninkisa nombungakrise dimwe va di pakerere kumwe ntani nokutjindja nomukunda  edi ava zuvhisire. Monkedi zangesi, mbunga zaJehova kwa pungura yimaliwa eyi ava gava vanavazinyetu. Nye eyi kwa ninkisa vazuvhisi vamwe yi va karere udigu kutambura ukaro woupe. Vanavazinyetu owo, nampo awo kwa kere mombungakriste zapeke nomvhura dononzi nokutulisa po ukaume wounene novanavazinyetu. Nye ngesi awo kuna kuvapura va dirukire kombungakriste zapeke. Yosili, Jesus kumuhafesa apa a mono varongwa vangoso kuna kukwatesa ko ewapaiko eli.

15. Ngapi omu ukaume wetu naJesus ngau ka fana komeho?

¹⁵ Vantu ava va gwaveka nompepo zokupongoka, va kara nehuguvaro lyokukapangera naJesus narunye meguru moUhompa waKarunga. Awo ngava ka kara naKristusa nokukamumona noku ka uyunga nendi. (Joh. 14:2, 3) Jesus nga ka likida hena eharo nokukapakera mbili ava va kara nehuguvaro lyokukaparukira pevhu. Nampili ngomu ngava dira kukamumona, awo ngava ka tunga po ukaume wounene kumwe nendi ngomu ngava ka hafera eparu eli nga ka va pa Jehova naJesus.—Jes. 9:6, 7.

16. Mauwa musinke ngatu gwanena mo nsene tu tulisa po ukaume naJesus?

¹⁶ Nsene tu tulisa po ukaume naJesus, ose ngatu gwanena mo mauwa. Pasihonena, nampili naina ose kulimonena omu ga tu hara Jesus ntani nomu atu kwatesa ko. Ose twa kara nehuguvaro lyokukaparuka narunye. Ntani unene po, nsene tu tulisa po ukaume naJesus ose ngatu tulisa po ukaume naJehova. Azo kuna kara mfumwa mokututumbura asi ose vakaume vaJesus.