1. Aweyi olenda kitukila nkundi a muntu?

MUNA kituka nkundi a muntu, divavanga vo wavaulanga e ntangwa ya mokena yo muntu ndioyo. Ekolo numokenanga yo songaziana e ngindu, nukituka se akundi. Ezak’e ntangwa ke dikalanga diasazu ko mu kituka akundi ambote a Yesu. Ekuma?

2. Akieyi i kuma kiantete kikitulanga se diampasi mu kala nkundi a Yesu?

² E kuma kiantete i kia sia vo ke tulendi mona Yesu ko. Ayingi muna Akristu a tandu kiantete diambu diadi mpe bawanana diau. Petelo wa ntumwa wavova vo: “Kana una vo ke nuamona ko, nunzolele. Kana una vo yandi ke numoni owau, nukwikidi muna yandi.” (1 Pet. 1:8) Muna kuma kiaki, tulenda kweto kala akundi a Yesu lembi kumona.

3. Akieyi i kuma kiazole kikitulanga se diampasi mu kala nkundi a Yesu?

³ E kuma kiazole i kia sia vo ke tulendi mokena yo Yesu ko. Vava tusambanga, Yave tumokenanga yandi. Dialudi vo tusambanga muna nkumbu a Yesu, kansi ke tumokenanga yandi ko. Kieleka, Yesu kazolele ko vo twasambanga kwa yandi. Ekuma? Kadi e sambu i mpil’a nsambila ina ifwanukini kaka kwa Yave. (Mat. 4:10) Kana una vo i wau, tulenda songa o zola kweto muna Yesu.

4. Akieyi i kuma kiatatu kikitulanga se diampasi mu kala nkundi a Yesu? Adieyi tuvovela mu longi diadi?

 ⁴ E kuma kiatatu i kia sia vo Yesu ku zulu kezingilanga. Muna kuma kiaki, ke tulendi kala yandi vamosi ko. Kansi, tulenda longoka mayingi mu kuma kia Yesu lembi kala yandi vamosi. Mu longi diadi, tufimpulula mambu yá tulenda vanga muna kumika e kikundi kieto yo yandi. Entete, yambula twavovela e kuma dinina diamfunu mu kala akundi ambote a Kristu.

5. Ekuma tufwete kadila akundi a Yesu? (Tala e babu “ E Kikundi yo Yesu Kikutufila mu Kituka Akundi a Yave” ye “ Kalanga ye Ngindu Zasikila mu Kuma kia Yesu.”)

⁵ Tufwete kala akundi a Yesu avo tuzolele kala ye ngwizani ambote yo Yave. Ekuma? Yambula twabadika kuma yole. E kuma kiantete, Yesu wavovesa alongoki andi vo: “Yandi kibeni o Se unuzolele, kadi oyeno nunzolele.” (Yoa. 16:27) Wavova mpe vo: “Kavena ona okwiza kwa Se ko avo ke mu mono ko.” (Yoa. 14:6) O vava kala nkundi a Yave lembi kala nkundi a Yesu dilenda tezaneswa yo muntu ozolele kota mu nzo lembi sadila o mwelo. Yesu nona kiau kimosi kasadila vava kavova vo yandi i “mwelo a mameme.” (Yoa. 10:7) E kuma kiazole, Yesu otangininanga e fu ya Se diandi mu mpila yalunga. Yesu wavovesa alongoki andi vo: “Konso ona umbwene, omwene mpe o Se.” (Yoa. 14:9) Muna kuma kiaki, o longoka e zingu kia Yesu i mpila yambote tulenda zayila Yave. Avo tulongokele mayingi mu kuma kia Yesu, o zola kweto muna yandi kuwokela. Avo o zola kweto muna Yesu kuwokele, o zola kweto mpe muna Yave kuwokela.

6. Akieyi i kuma kiankaka kifwete kutufila mu kala akundi a Yesu? Sasila.

 ⁶ Tufwete kala ye ngwizani ambote yo Yesu kimana e sambu yeto yavaninua e mvutu. Ediadi disongele vo tufwete vanga mayingi ke yika kaka ko e nkumbu a Yesu kuna mfoko a sambu yeto. Tufwete bakula vo Yave osadilanga Yesu muna vana e mvutu za sambu yeto. Yesu wavovesa e ntumwa zandi vo: “Konso dina nulomba muna nkumbu ame, ivanga dio.” (Yoa. 14:13) Kana una vo Yave yandi kaka owanga e sambu yeto yo vanina yo e mvutu, kansi wavana e wisa kwa Yesu kia lungisa e nzengo za Nzambi. (Mat. 28:18) Vitila Yave kavana e mvutu za sambu yeto, omonanga kana vo tusadilanga o luludiku luna Yesu kavana. Kasikil’owu, Yesu wavova vo: “Avo nulolokele wantu o makuzuka mau, o Se dieno kuna zulu okunuloloka mpe; diau dimosi, avo ke nulolokele wantu makuzuka mau ko, o Se dieno mpe ke loloka makuzuka meno ko.” (Mat. 6:14, 15) Kieleka, diamfunu twakadilanga ye akaka wauna Yave yo Yesu bekadilanga yeto.

7. Nani ovua e nluta mia kimenga kia lukûlu kia Yesu?

⁷ Awana kaka bena ye kikundi yo Yesu bevua e nluta mia kimenga kiandi kia lukûlu. Aweyi tuzayidi wo? Yesu wavova vo, ‘oyekola o moyo andi muna wete dia akundi andi.’ (Yoa. 15:13) Akwa kwikizi ana bazingila vitila Yesu keza ova ntoto, belongoka mu kuma kiandi yo kunzola. Akaka muna yau nze Abarayama, Sara, Mose yo Rakabi besinga fuluka. Kansi, kana nkutu selo yayi yakwikizi, bafwete vanga kikundi yo Yesu muna vua moyo a mvu ya mvu.—Yoa. 17:3; Mav. 24:15; Ayib. 11:8-12, 24-26, 31.

8-9. Nze una usonganga e sono kia Yoane 15:4, 5, e kikundi kieto yo Yesu adieyi kilenda kutufila mu vanga? Ekuma dinina diamfunu?

⁸ Tuna ye kiese kiasala kumosi yo Yesu muna salu kia samuna e nsangu zambote za Kintinu yo longa wantu. Vava Yesu kakala ova ntoto, nlongi kakala. Tuka kavutukila kuna zulu, nze ntu a nkutakani, okwamanananga fila e salu kia samuna e nsangu zambote yo longa. Yesu omonanga yo yangalela e ngolo tuvanganga muna sadisa wantu ayingi kimana banzaya yo zaya mpe o Se diandi. Kieleka, tulenda lungisa kaka e salu kiaki muna lusadisu lwa Yave yo Yesu.—Tanga Yoane 15:4, 5.

⁹ E Diambu dia Nzambi ditoma longanga vo muna yangidika Yave tufwete kala yo zola muna Yesu yo siamisa o zola kwaku. Muna kuma kiaki, yambula twafimpa mambu yá tulenda vanga muna kituka akundi a Yesu.

10. Nkia diambu diantete tufwete vanga muna kituka akundi a Yesu?

¹⁰ (1) Toma zaya Yesu. Tulenda wo vanga muna tanganga lusansu lwandi lwasonama muna nkand’a Matai, Maku, Luka ye Yoane. Avo tubadikidi o lusansu lwa zingu kia Yesu luna muna Bibila, tuyantika kunzola yo kunzitisa mu kuma kia mpila ina kakadilanga yo wantu. Kasikil’owu, kana una vo Yesu mfumu kakala, kansi kabadikila alongoki andi ko nze ntaudi zandi. Kadi wabasengomwena e ntokani ye ngindu zandi. (Yoa. 15:15) Vava alongoki andi bakendalalanga, Yesu mpe wakendalalanga yo dila yau kumosi. (Yoa. 11:32-36) Kana nkutu mbeni za  Yesu, bazayanga wo vo wakala nkundi awana batambulwilanga e nsangu zandi. (Mat. 11:19) Avo tutanginini Yesu muna mpila kakadilanga ye alongoki andi, tukala ye ngwizani ambote ye akaka, e kiese kieto kiwokela, o luyangalalu lweto mpe muna Kristu luwokela.

11. Nkia diambu diazole tufwete vanga muna kituka akundi a Yesu? Ekuma dinina diamfunu?

¹¹ (2) Yindulanga yo vangila e mambu nze Yesu. Avo tutomene zaya Yesu yo tanginina e mpila keyindulwilanga, e kikundi kieto yo yandi kikumama. (1 Kor. 2:16) Aweyi tulenda tanginina Yesu? Yindula e nona eki: Vana fulu kia kukiyangidika, Yesu wayindulanga una kalenda sadisila akaka. (Mat. 20:28; Roma 15:1-3) Muna kuma kiaki, Yesu wakivananga kuna mvevo yo loloka akaka. Kafunganga makasi mu nzaki ko mu kuma kia mana wantu bavovanga mu kuma kiandi. (Yoa. 1:46, 47) Kalundilanga muntu makasi ko mu kuma kia vilwa kavanga o muntu ndioyo se vioka mvu miayingi. (1 Tim. 1:12-14) Yesu wavova vo: “Muna wau i bezayila o wantu awonso vo nu alongoki ame—avo nzolani nuna yau.” (Yoa. 13:35) Muna kuma kiaki, diambote wakiyuvula: “Nga itangininanga mbandu a Yesu muna vanganga mawonso muna tatidila luvuvamu ye mpangi zame?”

12. Nkia diambu diatatu tufwete vanga muna kituka akundi a Yesu? Aweyi tulenda wo vangila?

¹² (3) Yikamanga mpangi za Kristu. Vava tuyikamanga mpangi zandi zakuswa, Yesu obadikilanga dio nze yandi tuyikamanga. (Mat. 25:34-40) E mpila isundidi tulenda sadisila akuswa, i kuyivananga muna salu kia samuna e nsangu zambote za Kintinu yo kitula wantu se alongoki, kadi i diau Yesu kakanikina alandi andi vo bavanga. (Mat. 28:19, 20; Mav. 10:42) Muna lusadisu lwa “mameme mankaka” mpangi za Kristu belendanga lungisa e salu kia samuna e nsangu zambote kisalwanga omu nz’amvimba. (Yoa. 10:16) Avo u mosi muna mameme mankaka, konso ntangwa ovaikanga muna salu kia umbangi, kusonganga kaka o zola kwa Akristu akuswa ko kansi kwa Yesu mpe.

13. Aweyi tulenda lemvokela luludiku lwa Yesu lwasonama muna Luka 16:9?

¹³ Tulenda mpe kituka akundi a Yave yo Yesu muna vananga tukau kimana twayikama e salu befilanga. (Tanga Luka 16:9.) Kasikil’owu, tulenda yikama e salu kisalwanga mu nz’amvimba, muna vananga tukau mu kuma kia salu kia samuna e nsangu zambote muna zunga yandá, muna tunga yo lunga-lunga Maseka ma Kintinu ye fulu yankaka tusadilanga muna sambila Yave ye muna sadisa ampangi bebwilwanga e sumbula. Tulenda mpe vana tukau mu kuma kia nkutakani eto yo sadisa ampangi bavuidi lusadisu o mfunu. (Nga. 19:17) Ezazi i mpila tulenda sadisila mpangi za Kristu.

14. Nze una usonganga e sono kia Efeso 4:15, 16, nkia diambu diayá tufwete vanga muna kituka akundi a Yesu?

¹⁴ (4) Yikamanga e nkubika za nkutakani. Tukumikanga kikundi kieto yo Yesu una vo i ntu a nkutakani vava tulemvokelanga awana kasola muna kutulunga-lunga. (Tanga Efeso 4:15, 16.) Kasikil’owu, owau tuzolele toma sadila e Maseka meto ma Kintinu. Muna kuma kiaki, e nkutakani zankaka zibundakeso mu Seka dimosi dia Kintinu yo singika e mingilu mia zunga yau. E nkubika yayi, isadisanga mu lembi fwasa nzimbu zayingi. Muna kuma kiaki, divavanga vo ateleki akaka bavang’e nsobani  muna yikama e nkubika yayi. Nanga ateleki awaya akwa kwikizi mu mvu miayingi basadila muna nkutakani zozo yo kulukilwa ampangi. Kansi owau, befilwanga muna nkutakani zankaka. Yesu otoma yangalalanga vava kemonanga una alongoki awaya akwikizi beyikamenanga e nkubika yayi.

15. Aweyi e kikundi kieto yo Yesu kikumamena kuna sentu?

¹⁵ Awana bakuswa muna mwand’avelela bena ye vuvu kia zinga yakwele mvu kumosi yo Yesu ekolo beyala kumosi muna Kintinu kia Nzambi. Bekala kumosi yo Kristu, i sia vo, bekumona, bemokena yandi yo viokesa yandi e ntangwa. (Yoa. 14:2, 3) Yesu mpe osonga o zola kwa awana bena ye vuvu kia zingila ova ntoto. Kana una vo ke bemona Yesu ko, e kikundi kiau kikumama ekolo beyangalela e zingu kina bavewa kwa Yave yo Yesu.—Yes. 9:6, 7.

16. Nkia nsambu tuvuanga muna kala akundi a Yesu?

¹⁶ Vava tutambulwilanga mbok’a Yesu ya kituka akundi andi, nsambu zayingi tutambulanga. Kasikil’owu, tumonanga o zola ye lusadisu lwandi owau. Tuna ye lau dia zinga yakwele mvu. Edi disundidi o mfunu, e kikundi kieto yo Yesu kikutufilanga mu kituka akundi a muntu osundidi o mfunu, i sia vo, Yave wa Se diandi. Ekwe lau diampwena tuna diau dia yikilwa akundi a Yesu!