1. Bwe lendi sila tindiku tia ngolo na muntu?

VULA vula, mpila ya ntete ya sa tindiku na muntu wu bwabane ni mu yôkesaka ntangu nandi. Bu kwe zonze nandi, mpe bu kwe mu zonzele mbanzulu zaku, mbo lukwizi bâ bandiku. Kâ, ntangu zakaka ka wubâka musamu wa fioti ko mu sa tindiku tia mbote na Yezu. Mu bungu dia nti?

2. Ngano musamu wa ntete wu tufweti telamana ni we?

² Musamu wa ntete wa mpasi ni ewu: Ka tamona Yezu ko. Bakristo ba mbandu ya ntete babingi batelamana musamu wo mpe. Ni bu sa ti ni buna weri, ntumwa Piere watâ ti: “Ni bu sa ti ka lwamumona ko, yandi luzoloko. Ni bu sa ti bwawu bu ka luta mu mona ko, timinu luta sarila mu yandi.” (1 Pi. 1:8, NWT) Wuzololo tâ ti, tulendi bâ ndiku za Yezu ni bu sa ti ka tamumona ko.

3. Ngano musamu wa nzole wa mpasi ni we?

³ Musamu wa nzole ni ewu: ka twena na lenda dia zonza na Yezu ko. Bu tusambilaka, kwe Yehova Yandi beni tutâka mabanza meto. Wa matieleka, mu nkumbu ya Yezu tusambirilaka, kâ ka tuzonzaka mbala mosi kwe yandi ko. Yezu ka zololo’â ko tamusambilaka. Mu bungu dia nti? Mu bungu ti lusambulu, nkundulu (adoration) yena, mpe Yehova Yandi kaka kwa bafweti kundaka. (Mat. 4:10) Ni bu sa ti misamu ni buna miena, tulendi songela luzolo lweto mu Yezu.

4. Ngano musamu wa tatu wa mpasi ni we, mpe nti tuzonzela mu timoko ti?

⁴ Musamu wa tatu: Yezu ku mazulu kabâka, buna ka tulendi’â  tayôkesa ntangu na yandi ko. Kâ, tulendi longoka misamu miamingi mitariri Yezu ni bu sa ti ka twena nandi huma hamosi ko. Mbo tuvutu taluzula bima biyà bi tulendi sa ngatu tabâ na tindiku tia ngolo na Yezu. Ntete, tataluzula mu bungu dia nti tufweti bâ na tindiku tia ngolo na Yezu.

5. Mu bungu dia nti tufweti sa tindiku na Yezu? (Tala kaku “  Tindiku na Yezu ku tindiku na Yehova tinataka” na “ Mabanza ma delakana mu dema dia Yezu.”)

⁵ Tufweti bâ ndiku za Yezu tala ti tuzololo tasa tindiku tia mbote na Yehova. Mu bungu dia nti? Tazonzela misamu miole. Musamu wa ntete, Yezu watâ kwe milongoki miandi ti: ‘Tata Yandi beni luzololo, mu bungu ti beno meno lwazololo.’ (Za 16:27) Watâ mpe ebu: ‘Ka kwena muntu ko wulendi kwenda kwe Tata, tala ti ka yôkele’â kwe meno ko.’ (Za 14:6) Tala ti tuyêlele mu sa tindiku na Yehova, kâ ka tuta toko sa tindiku tia ngolo na Yezu ko, mbo wubâ ntiana kwa beto tuta yêla mu kota mu nzo kâ ka tuta kotela ha mwelo ko. Yezu wasarila tifwani tia mpila yo bu katitâ nkumbu “mwelo wa bimeme.” (Za 10:7) Musamu wa nzole ni wena’eti, Yezu bifu bia Tata’andi kalandaka buna bufwanakane. Watâ kwe milongoki miandi ti: ‘Wô kumweni, mweni mpe Tata.’ (Za 14:9) Wuzololo tâ ti mpila ya yibote yi tulendi longokela mu zaba Tata, ni mu longoka luzingu lwa Yezu. Bu tukwe longoke mu zaba Yezu, luzolo lweto mu yandi mbo lukula. Mpe tindiku tieto na Yezu bu tikula, luzolo lweto mu Tata mbo lutomo vutu kula.

6. Ntia musamu wakaka wuta songela mu bungu dia nti tufweti sa tindiku na Yezu? Bangula.

⁶ Tufweti sa tindiku na Yezu ngatu tusambulu tweto bahanina to mvutu. Wuzololo tâ ti ka  wufweni’â ko mu tâka, “mu nkumbu ya Yezu” ku nsuka ya tusambulu tweto. Tufweti bakula ka bwe Yehova kasarilaka Yezu mu hana mvutu mu tusambulu tweto. Yezu watâ kwe bantumwa ti: ‘Miamiansoni mi lulomba mu nkumbu’ani, mia niyirika.’ (Za 14:13) Ni bu sa ti ni Yehova kwa Yandi kaka wâka tusambulu tweto mpe haninaka to mvutu, Yehova wahana lenda na nzila ya lungisaka nzengolo zandi kwe Yezu. (Mat. 28:18). Buna, ntete kahananina tusambululu tweto mvutu, mbo katoko talaka tala ti malongi ma hana Yezu, ma talendi. Mu tifwani, Yezu watâ ti: ‘Diangana, lwamana lemvokela bantu mu bubi bu balusiri, beno mpe Tata’eno we ku zulu mbo kaluyamburila [lemvokela] masumu meno. Tala ti ka lulemvokele’â bantu ko, beno mpe Tata’eno ka luyamburila masumu meno ko.’ (Mat. 6:14, 15) Nkatika mfunu wena mu bongelaka bampwana’eto ntiana kwa bu tubongelaka Yehova na Yezu!

7. Ngano nani baka ndandu ya nkululu ya Yezu?

⁷ Bantu bô kwa bê na tindiku na Yezu babakila nkululu’andi ndandu. Ngano bwe tuzabiri wo? Yezu watâ ti mbo kaketi ‘hana luzingu lwandi mu bungu dia ndiku zandi.’ (Za 15:13) Bantu ba kwikama beri ha mutoto ntete Yezu kizi ha mutoto, mbo bakwizi longoka misamu mitariri Yezu, mpe mbo bakwizi mu zolo. Babakala na bakento ntiana Abrahame, Sara, Mose, na Rabe mbo bavumbuka kwe bafwa, kâ kwe bawu mpe beri bisari bia sungama bia Yehova, mbo wufwanakana basa tindiku na Yezu ngatu babaka luzingu lwa mankululu.​—Za 17:3; Bisalu 24:15; Ebr. 11:8-12, 24-26, 31.

8-9. Ntiana bu banguri wo Za 15:4, 5, nti tulendi sa tala ti ndiku twena na Yezu, mpe mu bungu dia nti we mfunu?

⁸ Nsayi ye neto ya sala tintwari na Yezu mu tisalu tia samuna na tia longesa nsangu za mbote za Timfumu. Bu keri ha mutoto, Yezu mulongi weri. Mpe tuka ti kakarila ku mazulu, Yezu wayika Mfumu ya timvuka, mpe tatamane mu twarisa tisalu tia samuna. Ngolo zi sarilaka mu bakisa bantu babingi ngatu bamuzaba mpe bazaba Tata’andi, za kamonaka mpe za kayangalalaka. Dieka bo, lubakusu lwa Yehova na lwa Yezu kwa lulendi sa ti talenda mu sala tisalu tio.​—Tanga Za 15:4, 5.

⁹ Zu dia Nzambi ditomono longesa ti tufweti bâ na luzolo mu Yezu mpe tufweti lwa simbirila tala ti tuzololo tatâ Yehova nsayi. Buna tataluzula bima biyà bi tulendi sa mu kwizi bâ ndiku za Yezu.

10. Ngano tima tia ntete ti tufweti sa mu bâ na tindiku na Yezu ni tie?

¹⁰ (1) Longoka mu zaba Yezu. Ntangulu ya buku dia Matie, dia Like, dia Marke na dia Za yilendi ku bakisa. Bu tudimbitilaka mu binsamu bia luzingu lwa Yezu lwe mu Bibila, mbo tukwizi zoloko Yezu mpe mbo tukwizi mu zitisaka mu bungu dia mpila ya yibote yi keri bêlaka na bantu. Mu tifwani, ni bu sa ti ni yandi weri Mfumu, Yezu keri’â bongelaka milongoki miandi ntiana bangamba ko. Kâ, mbo keri ba zabikisaka misamu miandi na mbanzulu zandi. (Za 15:15) Mbo keri lwataka mpasi za milongoki miandi, mpe mbo keri dilaka nawu tintwari. (Za 11:32-36) Mbeni zandi mpe zazaba ti, Yezu yeri ndiku ya bantu bô beri tambulaka misamu mi keri tâka. (Mat. 11:19) Bu tulanda tifwani tia Yezu mu mpila yi keri bêlaka na milongoki miandi, tindiku tieto na bampwana’eto mbo titoma, mbo tukwizi bâ na nsayi yayingi, mpe buzitu bweto na luzolo lweto mu Kristo mbo lukula.

11. Ngano tima tia nzole ti tufweti sa mu bâ na tindiku na Yezu ni tie, mpe mu bungu dia nti tie mfunu?

 ¹¹ (2) Landa tifwani tia Yezu mu mpila ya banzila na ya diatila. Bu tukwe tomo zabi mbanzulu za Yezu mpe bu tukwe landi tifwani tiandi, tindiku tieto na yandi mbo tikwizi tomo bâ ngolo. (1Kor 2:16) Bwe tulendi landila tifwani tia Yezu? Tabonga tifwani. Yezu mbo keri vulu banzaka mu mpila yi kafweti bakisila bantu ntete kalungisa nsatu za yandi beni. (Mat. 20:28; Rom. 15:1-3) Mu bungu ti mabanza ni mo meri nandi, wayizi tihana mu mukayulu mu bungu dia mulemvo wa masumu meto. Keri’â vulu fwemaka ko mu bungu dia misamu mi beri mu tesaka. (Za 1:46, 47) Mpe ka bika misamu mia mbi ko mia yirika bantu mu ntama miasobesa mpila’andi yi kafweti ba bongela. (1Ti. 1:12-14) Yezu watâ ti: “Ni bo, bantu babansoni bazabila ti beno milongoki miani miena, tala ti lubele na luzolo beno na beno.” (Za 13:35, NWT) Bubote bu tiyuriri: “Ngano ngolo nisarilaka mu bâka mu tidzunu na mpangi zani ntiana Yezu?”

12. Ngano tima tia tatu ti tufweti sa mu bâ ndiku za Yezu ni tie, mpe bwe tulendi tia sila?

¹² (3) Yikaka mpangi za Kristo moko. Lubakusu lu tuhanaka kwe mpangi zandi za tumbu, Yezu mbo kamonaka ntiana kwa yandi tubakisaka. (Mat. 25:34-40) Mpila ya ntete yi tubakisila mpangi za tumbu, ni mu sarila ngolo zeto zazansoni mu sala tisalu tia samuna na tia kubika milongoki, tia tu lomba Yezu. (Mat. 28:19, 20; Bisalu 10:42) Na lubakusu lwa ‘Bimeme biakaka’ kwa mpangi za Kristo zilendi lendela mu sala tisalu tia tinene tia samuna tita salama mu ntangu yi. (Za 10:16) Tala ti mu mulonga wa bimeme biakaka wena, zaba ti ntangu yayansoni yi yôkesaka mu tisalu tio, luzolo lwaku songelaka kwe mpangi za tumbu na kwe Yezu.

13. Bwe tulendi sarila malongi ma Yezu me mu Like 16:9?

¹³ Mbo tusaka tindiku na Yehova mpe na Yezu bu tuhanaka makabu ma mbongo ngatu mabakisa mu tisalu ti batwarisaka. (Tanga Like 16:9.) Mu tifwani, tulendi hana makabu ma mbongo mu bungu dia tisalu tita salama mu nza yayansoni, mpe makabu mango mbo basarilaka mo ngatu tisalu tia samuna tiasalama mu mbuka ze mala zilembolo na bisamuni, mbo mabakisaka mpe mu bungu dia ntungulu ya Nzo za Nsambululu na biakaka, mpe mu bakisa bantu bô bê na nsatu lubakusu ha manima ma makuba ma nza (catastrophes naturelles) peleko mu misamu miakaka. Tulendi yikaka mpe timvuka tieto moko mu makabu ma mbongo, mpe tulendi bakisa bantu bô bê na nsatu lubakusu. (Bin. 19:17) Zo ni mpila zi tulendi bakisila mpangi za Kristo.

14. Ntiana bu ta wa songela Bisi-Efeze 4:15, 16, tima tia biyà ti tufweti sa mu bâ ndiku za Yezu ni tie?

¹⁴ (4) Yikaka organizasio ya Yehova moko. Mbo tukwizi bâ nkatika ndiku za Yezu we mfumu ya timvuka bu tuwisanaka na bantu bô Yezu ba kasola mu tu twarisaka. (Tanga Bisi-Efeze 4:15, 16.) Mu tifwani, mbo tusarilaka ngolo mu sarila Nzo za Nsambululu zazansoni mu mpila ya yibote. Ntiangu bayizi vukasa bimvuka biakaka, mpe teritware zawu bayizi za kaba. Nsalulu yo mbo yisaka ti organizasio ya Yehova yalundaka mbongo zazingi zi bahanaka mu makabu. Kâ, mu bungu ti ni buna wena, bisamuni biakaka bifweti yukunu mu nsalulu za môna. Kampe bisamuni biango bia kwikama mvula zazingi biatoko yôkesa mu bimvuka biakaka mpe batomo kangama kwe mpangi zi beri mu timvuka timosi. Kâ bwawu bu, babalombele mu sarila mu bimvuka bia swaswana. Yezu, diangana nsayi yayingi yi bâka nandi bu kamonaka milongoki  mio mia kwikama mpe mia nsungu bata sala tinwari na ndombolo yo!

15. Bwe tindiku tieto na Yezu titomena mu bilumbu bita kwiza?

¹⁵ Bô bê ba tumbu mu mpeve santu, vuvu tie nawu tia bâ tintwari na Yezu ntangu zazansoni, mpe mbo bayâla nandi mu Timfumu tia Nzambi. Buna mbo bamumona, mbo bazonza nandi, mpe mbo babatika mu yôkesaka ntangu nandi. (Za 14:2, 3) Bô bê na vuvu tia bâ ha mutoto, bawu mpe mbo bamona luzolo lwa Yezu. Ni bu sa ti ka bamona Yezu ko, mbo batomo kwizi bâ nkatika bandiku na yandi bu bakwe mone nsayi ya luzingu lu babahana kwe Yehova na Yezu.​—Iza. 9:6, 7.

16. Ntia tusakumunu tubakaka mu bungu dia tindiku tieto na Yezu?

¹⁶ Bu tutambulaka ndombolo yi tu siriri Yezu ya bâ ndiku zandi, mbo tubakaka tusakumunu twatwingi. Mu tifwani, mbo tubakaka luzolo na lubakusu lwandi tuka lumbu ti. Bweso bwe neto bwa baka luzingu lwa mankululu. Mpe musamu wuyôkele mfunu, tindiku tieto na Yezu mbo tituhana tima tiyôkele ntalu: muna muntu mbo kabâ na tindiku tia yandi beni na Yehova we Tata dia Yezu. Bweso bwa bunene bwena tala ti bakutêle nkumbu, ndiku ya Yezu!