1. Ino nciinshi citaanguna kwaamba ayi mube abushicibusa amuntu umwi?

LIINJI cintu cakutaanguna kwaamba ayi tube abushicibusa amuntu umwi nkuba aciindi ca kubaakwe pomwi. Lyalo mulaba beshicibusa na kamubandika akusansulula mbomulinyumfwa. Nacibi boobo kuba bushicibusa a Yesu teshi cintu cuubu. Ino nceebonshi?

2. Ino nciinshi cakutaanguna cipa kwaamba ayi cibe ciyumu kuba abushicibusa buyumu a Yesu?

² Cakutaanguna cipa kwaamba ayi cibe ciyumu kuba abushicibusa buyumu a Yesu ncakwaamba ayi tatuna kumubonawo kale. Beneklistu baanji bamuciindi ca batumwi abalo tabakwe kumubonawo Yesu. Nacibi boobo, mutumwi Pita wakaamba ayi: “Nabi tamukwe kumubonawo kale, mulimusuni. Mulamushoma nakubi kwaamba ayi tamumubooni.” (1 Pita 1:8) Aboobo inga twacikonsha kuba abushicibusa buyumu a Yesu nabi kwaamba ayi tatuna kumubonawo kale.

3. Ino nciinshi cabili cipa kwaamba ayi cibe ciyumu kuba abushicibusa buyumu a Yesu?

³ Cabili ncakwaamba ayi tatukoonshi kubandika a Yesu. Nabi kwaamba ayi ncakwiila tulapaila kwiinda muliina lyakwe Yesu, tulalulamika mipailo yesu kuli Yehova. Alimwi Yesu taasuniiwo kwaamba ayi tunopaila kuli nguwe. Ino nceebonshi? Mupailo ndubasu lwakulambila, aboobo Yehova eenkabo ngoweelete kulambilwa.  (Mate. 4:10) Nacibi boobo inga twatondesha ayi Yesu tulimusuni.

4. Ino nciinshi catatu cipa kwaamba ayi cibe ciyumu kuba abushicibusa buyumu a Yesu, alimwi ino tutobandika nshi mumutwi uyu?

⁴ Catatu ncakwaamba ayi Yesu alekala kwiculu, aboobo inga tacikonsheki kubaakwe pomwi. Nacibi boobo inga twacikonsha kwiiya shiinji pali nguwe nabi kwaamba ayi alekala kulaale andiswe. Tutobandika shintu shone nsheenga twaciita kwaamba ayi tuyumye bushicibusa bwesu anguwe. Cakutaanguna amuleke tubandike ncociyandikila kuba abushicibusa buyumu a Klistu.

5. Ino nceebonshi tulyeelete kuba beshicibusa bakwe Yesu? (Amubone kabokosi kacite mutwi utokwaamba ayi: “ Bushicibusa a Yesu Inga Bwatupa Kuba Beshicibusa Bakwe Yehova” alimwi a “ Amulushibe Kabotu Lubasu Lwakwe Yesu.”)

⁵ Tulyeelete kuba beshicibusa bakwe Yesu na tulisuni kuba abushicibusa buyumu a Yehova. Ino nceebonshi? Atubandike sheebo shobilo. Cakutaanguna, Yesu wakalwiita bashikwiiya bakwe ayi: “BaTa beene balimusuni, ceebo mulinsuni.” (Joni 16:27) Alimwi wakaamba ayi: “Taaku muntu weenga washika kuli baTa, sombibo kwiinda muli ndime.” (Joni 14:6) Kusuna kuba abushicibusa a Yehova kwakubula kutaanguna kuba abushicibusa buyumu a Yesu, kuli anga nkusuna kunjila muŋanda kwakubula kunjilila kumulyaango. Yesu wakaamba cikoshanyo cili mbuli ceeci ndyaakaamba ayi: “Ndime mulyaango wa mbelele.” (Joni 10:7) Cabili ncakwaamba ayi Yesu wakalinga kukonkela mibo ya Baishi. Wakalwiita bashikwiiya bakwe ayi: “Uyo wabona ndime wabona abaTa.” (Joni 14:9) Aboobo nshila iyandika mbweenga tweeya pali Yehova nkwiinda mukwiiya pabuumi bwakwe Yesu. Kwiiya shiinji pali Yesu kulaakutupa kumusuna abuumbi. Alimwi kuya  panembo kwa bushicibusa bwesu a Yesu, kulaakupa kwaamba ayi lusuno lwesu pali Baishi alwalo lukomene.

6. Ino nceebonshi cimwi ncotuyandikila kuba abushicibusa a Yesu? Amusansulule.

⁶ Tulyeelete kuba abushicibusa a Yesu kwaamba ayi mipailo yesu ikumbulwe. Nkokwaamba ayi tatweelete kweelabo pakusebensesha maswi akwaamba ayi “muliina lyakwe Yesu” ndyetutopaila. Tulyeelete kushiba Yehova mbwaakumbula mipailo yesu kwiinda muli Yesu. Yesu wakalwiita batumwi bakwe ayi: “Cili coonse nceshi mukasenge muliina lyangu, ndaakucicita.” (Joni 14:13) Nabi kwaamba ayi Yehova ngookutika akukumbula mipailo yesu, alakumanisha kuyanda kwakwe kwiinda muli Yesu. (Mate. 28:18) Aboobo Lesa kaatana kukumbula mipailo yesu, alataanguna kubona na twakonkela kululika kwakwe Yesu. Kucakubonenaako, Yesu wakaamba ayi: “Na mwalekelela bamwi shibiibi shabo, alakwe Ishiwanu uli kwiculu ulaakumulekelela amwebo; sombi na mwebo tamulekeleli bantu shibiibi shabo, alakwe Ishiwanu teshi akamulekeleleewo shibiibi shanu.” (Mate. 6:14, 15) Aboobo cilayandika abuumbi kunyumfwila bamwi nkumbu bweenka mbuli Yehova a Yesu mbobatunyumfwila nkumbu!

7. Ino mbaani bafubilaamo mucilubula cakwe Yesu?

⁷ Abo bacite bushicibusa buyumu a Yesu beenkabo mbobafubilaamo mucilubula cakwe. Ino nciinshi ncetwaambila boobo? Yesu wakaamba ayi ‘alaakwaaba buumi bwakwe ceebo ca babye.’ (Joni 15:13) Bantu bashomeka bakalinga kusebensela Yehova, Yesu kaatana kusa pacishi capanshi balaakuyandika kwiiya pali Yesu akumusuna. Nabi kwaamba ayi basankwa abanakashi bashomeka bakale kale mbuli Abulaamu, Saala, Mose, alimwi a Laabu balaakubushikwa, abalo balaakuyandika kuba abushicibusa a Yesu kwaamba ayi bakabe abuumi butamaani.​—Joni 17:3; Milimo 24:15; Ebul. 11:8-12, 24-26, 31.

8-9. Kweelana a Joni 15:4, 5, ino nshiinshi nsheenga twacikonsha kucita ceebo cakuba abushicibusa a Yesu, alimwi ino nciinshi ncociyandikila?

⁸ Tulicite coolwe cakusebensa pomwi a Yesu muncito yakushimikila akwiisha makani abotu a Bwaami. Yesu wakalinga kwiisha bantu ndyaakalinga pacishi capanshi. Alimwi kuswabo ciindi ndyaakaboolela kwiculu, Yesu watolelela kutanjilila ncito yakushimikila akwiisha mbuli mutwi walibungano. Alabona akulumba mbomutokweelesha cankusu kucafwa bantu kwaamba ayi bashibe nguwe akushiba Baishi. Alimwi ncakwiila kwaamba ayi kwakubula lucafwo lwakwe Yehova a Yesu inga tatucikoonshi kukumanisha ncito iyi.​—Amubelenge Joni 15:4, 5.

⁹ Maswi akwe Lesa alatuyuminisha ayi tulyeelete kutolelela kusuna Yesu kwaamba ayi tusangalashe Yehova. Aboobo amuleke tubandike shintu shone nsheenga twaciita kwaamba ayi tube beshicibusa bakwe Yesu.

10. Ino nciinshi cakutaanguna ncotweelete kucita kwaamba ayi tube beshicibusa bakwe Yesu?

¹⁰ (1) Amumushibe kabotu Yesu. Inga twamushiba kabotu Yesu na katubelenga mabuku amu Baibo mbuli Mateyo, Maako, Luka, alimwi a Joni. Kukutumana akuyeeya pamakani alembetwe mu Baibo aamba pa buumi bwakwe Yesu, inga kwatucafwa kusuna akulemeka Yesu ceebo ca mbwaakalinga kutondesha nkumbu kubantu. Kucakubonenaako, nabi kwaamba ayi Yesu wakalinga ngo Mwaami wabo, taakwe kubona bashikwiiya bakwe mbuli basha. Sombi wakabalwiita mbwaakalinga kubona shintu alimwi ambwaakalinga kulinyumfwa. (Joni 15:15) Na bashikwiiya bakwe balinyumfwa buumba, Yesu alakwe wakalinga kulinyumfwa buumba. (Joni 11:32-36) Alimwi nabi abo bakalinga kumupikisha, bakalinga kubona ayi Yesu wakalinga shicibusa wa baabo bakasumina makani  ngakalinga kwiisha. (Mate. 11:19) Kukonkela cakubonenaako cakwe Yesu mbwakalinga kutondesha bushicibusa kubashikwiiya bakwe kulatupa lusangalalo, kuba abushicibusa bubotu abamwi, alimwi akutucafwa kuyumya lusuno abulemu mbotucite pali Klistu.

11. Ino nciinshi cabili nceenga twaciita kwaamba ayi tube beshicibusa bakwe Yesu, alimwi ino nceebonshi ncociyandikila?

¹¹ (2) Amuyeeye akucita shintu bweenka mbuli Yesu. Kushiba kabotu akukonkela Yesu mbwaakalinga kubona shintu, kulaakuyumya bushicibusa bwesu anguwe. (1 Koli. 2:16) Ino cakubonenaako cakwe Yesu inga twacikonkela buyani? Atubandike cakubonenaako comwi. Yesu wakalinga kubikila maano abuumbi kukucafwa bamwi kuteshi kukulisangalasha. (Mate. 20:28; Loma. 15:1-3) Mukwiinga wakalinga kusuni bamwi, wakalinga kulyaaba akubalekelela. Taakalinga kufwambaana kukalala pamaswi bantu ngobakalinga kwaamba pali nguwe. (Joni 1:46, 47) Alimwi taakalinga kubona bantu kweelana ashilubo nshobakacitawo kale kale. (1 Timo. 1:12-14) Yesu wakaamba ayi: “Bantu boonse balaakwishiba ayi muli bashikwiiya bangu na kamusunene.” (Joni 13:35) Aboobo inga twaliipusha ayi, “Sa ntokonkela cakubonenaako cakwe Yesu kwiinda mukucita shoonse nsheenga ndacikonsha kwaamba ayi ntolelele kuba muluumuno abamakwesu abenankashi?”

12. Ino nciinshi catatu nceenga twaciita kwaamba ayi tube beshicibusa bakwe Yesu, alimwi ino inga twacita buyani kwaamba ayi tucafwe bamakwabo Klistu?

¹² (3) Amucafwe bamakwabo Klistu. Yesu alabona ayi tutoocafwa nguwe na katucafwa bamakwabo bananikitwe. (Mate. 25:34-40) Nshila iyandika abuumbi mbotucafwa bananikitwe nkwiinda mukwaabanamo lubasu muncito yakushimikila akwiisha bantu kuba bashikwiiya iyo Yesu njaakapa bashikwiiya bakwe. (Mate. 28:19, 20; Milimo 10:42) Bamakwabo Klistu inga bakumanishabo ncito inene iyi itoocitwa nsengwe yoonse kwiinda mukucafwikwa aba “mbelele shimwi.” (Joni 10:16) Na muli womwi wa mbelele shimwi, nkokwaamba ayi lyoonse ndyemutokwaabanamo lubasu muncito iyi mulatondesha ayi mulisuni bananikitwe alimwi a Yesu.

13. Ino nshiinshi nsheenga twaciita kwaamba ayi tukonkele shakaamba Yesu pa Luka 16:9?

¹³ Cimwi nceenga twaciita kwaamba ayi tube beshicibusa bakwe Yehova a Yesu, nkupa shabupe shakucafwilisha ncito njobatanjilila. (Amubelenge Luka 16:9.) Kucakubonenaako, inga twapa maali akucafwilisha incito icitwa nsengwe yoonse, ayo asebenseshekwa mukucafwilisha ncito yakushimikila makani abotu kumisena yakulaale, kuyaka akubamba Maanda aBwaami, amisena imwi isebenseshekwa mulibunga lyakwe Yehova, alimwi akucafwilisha baabo bakumwa amapensho alicitikila. Alimwi inga twapa maali akucafwilisha ncito mulibungano akupako lucafwo bamwi mulibungano mbotwabona ayi babulisha shiyandika. (Tus. 19:17) Ubu mbweenga twacafwa bamakwabo Klistu.

14. Kweelana a Bene Efeso 4:15, 16, ino nciinshi cane nceenga twaciita kwaamba ayi tube beshicibusa bakwe Yesu?

¹⁴ (4) Amucafwilishe libunga lyakwe Yehova. Inga twayumya bushicibusa bwesu a Yesu mbuli mutwi walibungano na katunyumfwila baabo bakasalwa ayi banootutanjilila. (Amubelenge Bene Efeso 4:15, 16.) Kucakubonenaako, tulisuni kunoosebensesha kabotu Maanda a Bwaami. Aboobo ici capa kwaamba ayi mabungano amwi apankane pomwi akuceesha na kukomenya misena yakushimikilaako. Kucita boobo kwapa kwaamba ayi maali akapekwa kucafwilisha ncito ya libunga lyakwe Yehova, asebenseshekwe kabotu. Nacibi boobo kwaaluka uku kwapa kwaamba ayi beshikushimikila bamwi baalule buumi bwabo ceebo ca bukaalo  bupya. Mpashi bakalinga mulibungano lyomwi kwa myaaka iinji aboobo bakalinga kucite beshicibusa baanji mulibungano ilyo. Ano shintu shakaaluka ceebo ca kutumwa kulibungano limwi. Yesu alasangalala abuumbi na wabona bashikwiiya bakwe bashomeka mbobatokonkela bubaambo bwakwe!

15. Ino bushicibusa bwesu a Yesu bulaakuba buyani kunembo?

¹⁵ Beneklistu bananikitwe balicite bulindilishi bwakuba pomwi a Yesu kwamuyayaya, balaakunokweendelesha anguwe mu Bwaami bwakwe Lesa. Balaakunoobonana a Yesu, kubandikaakwe, alimwi akuba pomwi anguwe. (Joni 14:2, 3) Yesu alibasuni abaabo bacite bulindilishi bwakuba abuumi pacishi capanshi alimwi alababikilako maano. Nabi kwaamba ayi teshi banoobonana anguwe, bushicibusa bwabo bulaakuyuminaako alimwi balaakuba alusangalalo mukwiinga balakutambula shoolwe kuswa kuli Yehova a Yesu.​—Isa. 9:6, 7.

16. Ino nshoolwe nshi nshotucana ceebo cakuba beshicibusa bakwe Yesu?

¹⁶ Tulaakucana shoolwe shiinji na tukasumine kuba beshicibusa bakwe Yesu. Kucakubonenaako, pacecino ciindi tulaba alusangalalo mukwiinga Yesu alatutondesha lusuno akututanjilila. Tulicite coolwe cakuba abuumi butamaani kunembo. Alimwi ciyandika abuumbi, kuba abushicibusa buyumu a Yesu kulaakutucafwa kuba beshicibusa bakwe Ishiwesu wakwiculu, Yehova. Ncoolwe cinene abuumbi kwiitwa ayi beshicibusa bakwe Yesu!