1. Nawˬ chaw teˇ gʼaˇ htaꞈ awˬ chawˇ te gaˇ ve kʼo, hkʼaˬ hkʼe gʼa te ve le?

 Nawˬ chaw teˇ gʼaˇ htaꞈ mawˬ daꞈ leh awˬ chawˇ te gaˇ ve kʼo, awˬ yanˇ gʼa yehˇ ve yoˬ. Teˇ gʼaˇ leh teˇ gʼaˇ ve dawˇ hkʼaˇ kʼoˆ maˍ daꞈ htaˇ, awˬ chawˇ te daꞈ gʼa ve yoˬ. Yaꞈ hkʼaˇ, ngaˬ hui Yeˍsuˆ htaꞈ awˬ chawˇ te gʼa tuˬ maˇ sha. Aˬ htoꞈ ma te chi hkʼe hpehꞈ ve le?

2. Ngaˬ hui Yeˍsuˆ htaꞈ awˬ chawˇ te gʼa tuˬ maˇ sha ve teˇ hkʼaˇ lehˬ aˬ htoꞈ ma le?

² Ngaˬ hui Yeˍsuˆ htaꞈ awˬ chawˇ te gʼa tuˬ maˇ sha ve teˇ hkʼaˇ lehˬ yawˇ htaꞈ maˇ mawˬ jaw ve pa taw yoˬ. Awˉ lawˉ peuˇ ve Hkriꞈ yaˇ laiˉ gʼaˇ htawˇ, Yeˍsuˆ htaꞈ maˇ mawˬ jaw. Yaꞈ hkʼaˇ, tcuh yaˇ Peˍtruˆ kʼoˆ ve, “yawˇ htaꞈ nawˬ hui maˇ mawˬ jaw htawˇ, nawˬ hui yawˇ htaꞈ haꞈ chehˇ ve yoˬ. Chi beuꞈ yawˇ htaꞈ maˇ mawˬ htawˇ, nawˬ hui yawˇ htaꞈ yonˍ ve” yoˬ. (1 Peˍtruˆ 1:8) Chi htaꞈ pa taw, ngaˬ hui Yeˍsuˆ htaꞈ maˇ mawˬ jaw ve htawˇ, yawˇ htaꞈ awˬ chawˇ te gʼa ve yoˬ.

3. Ngaˬ hui Yeˍsuˆ htaꞈ awˬ chawˇ te gʼa tuˬ maˇ sha ve nyiˇ hkʼaˇ lehˬ aˬ htoꞈ ma le?

³ Ngaˬ hui Yeˍsuˆ htaꞈ awˬ chawˇ te gʼa tuˬ maˇ sha ve nyiˇ hkʼaˇ lehˬ yawˇ geh tawˇ yaw daꞈ maˇ gʼa. Ngaˬ hui Yaˬhoˉvaˬ geh ceh tiˉ bon lawˬ gʼa ve yoˬ. Ngaˬ hui Yeˍsuˆ ve awˬ meh hkʼaw bon lawˬ ve htawˇ, yawˇ geh yaw daꞈ ve maˇ heˆ. Awˬ tehˬ kʼo, Yeˍsuˆ ngaˬ hui yawˇ geh bon maˇ lawˬ tcuh gaˇ. Aˬ htoꞈ ma pa taw le? Bon lawˬ ve lehˬ oˉ kʼoˍ pui ve teˇ ceuˬ hpehꞈ ve pa taw, Yaˬhoˉvaˬ teˇ gʼaˇ htaꞈ ceh tiˉ ngaˬ hui oˉ kʼoˍ pui cawˇ ve yoˬ. (Maꞈhtehˍ 4:10) Yaꞈ hkʼaˇ, ngaˬ hui Yeˍsuˆ htaꞈ tawˇ yaw daꞈ maˇ gʼa ve htawˇ, yawˇ htaꞈ haꞈ gʼa ve yoˬ.

4. Ngaˬ hui Yeˍsuˆ htaꞈ awˬ chawˇ te gʼa tuˬ maˇ sha ve shehˆ hkʼaˇ lehˬ aˬ htoꞈ ma le?

 ⁴ Ngaˬ hui Yeˍsuˆ htaꞈ awˬ chawˇ te gʼa tuˬ maˇ sha ve shehˆ hkʼaˇ lehˬ yawˇ mvuhˇ naw ma hkʼoˆ chehˇ ve pa taw, ngaˬ hui yawˇ geh awˬ chawˇ te maˇ gʼa. Yaꞈ hkʼaˇ, ngaˬ hui yawˇ geh maˇ chehˇ ve htawˇ, yawˇ htaꞈ shiˍ gʼa ve yoˬ. Ngaˬ hui Yeˍsuˆ htaꞈ meuˆ daꞈ gʼa tuˬ 4 hkʼaˇ htaꞈ teˇ geh nyi sheˍ. Awˉ lawˉ htaˇ aˬ htoꞈ ma te ngaˬ hui Yeˍsuˆ htaꞈ awˬ chawˇ te ve a yeˇ uiˍ jaˇ ve teˇ geh nyi sheˍ.

5. Aˬ htoꞈ ma te ngaˬ hui teˇ gʼaˇ le le Yeˍsuˆ htaꞈ awˬ chawˇ te cawˇ ve le? (Awˇ ceˍ awˇ fa “ Yeˍsuˆ htaꞈ awˬ chawˇ te ve kʼo, Yaˬhoˉvaˬ htaꞈ awˬ chawˇ te gʼa ve yoˬ.” Leh “ Yeˍsuˆ htaꞈ keunˍ lawꞈ cawˇ lawꞈ ve hkʼaw yawˆ yan ve”) htaꞈ nyi sheˍ.

⁵ Ngaˬ hui Yaˬhoˉvaˬ htaꞈ awˬ chawˇ te gaˇ ve kʼo, Yeˍsuˆ htaꞈ awˬ chawˇ gʼa te cawˇ ve yoˬ. Aˬ htoꞈ ma pa taw le? 2 hkʼaˇ htaꞈ teˇ geh nyi sheˍ. Awˉ lawˉ teˇ hkʼaˇ Yeˍsuˆ awˬ laꞈ gʼawˇ htaꞈ kʼoˆ piˇ ve, “nawˬ hui ngaˬ htaꞈ haꞈ leh, Awˬ pa geh lo ngaˬ laˬ ve yoˬ.” (Yoˇhanˬ 16:27) Yawˇ kʼawꞈ kʼoˆ ve, “ngaˬ htaꞈ maˇ cuˇ kʼo, chaw teˇ gʼaˇ kaꞈ Awˬ pa geh gaˬ maˇ hpehꞈ.” (Yoˇhanˬ 14:6) Ngaˬ hui Yaˬhoˉvaˬ htaꞈ awˬ chawˇ te ve htawˇ, Yeˍsuˆ htaꞈ awˬ chawˇ maˇ te ve kʼo, taꞈ yehˬ lonˉ hkʼaw loꞈ˗e htaˇ yehˬ miˉ htaꞈ maˇ loꞈ˗e ve hkʼe hpehꞈ ve yoˬ. Yeˍsuˆ tawˇ pa haˉ chi ve htaꞈ cuˇ leh “yawˬ teˇ hpaˍ loꞈ la tuˬ ve yehˬ miˉ hpeꞈ” yawˇ hpehꞈ ve yoˬ tehꞈ kʼoˆ piˇ ve yoˬ. (Yoˇhanˬ 10:7) Awˬ nu ve teˇ hkʼaˇ lehˬ Yeˍsuˆ Yaˬhoˉvaˬ ve te hkʼaˇ dawˇ hkʼaˇ htaꞈ hkʼa biˇ henˇ yuˬ gʼa ve yoˬ. Yawˇ awˬ laꞈ gʼawˇ htaꞈ kʼoˆ piˇ ve, “ngaˬ htaꞈ mawˬ ve chaw lehˬ, Awˬ pa htaꞈ mawˬ peuˬ.” (Yoˇhanˬ 14:9) Chi htaꞈ pa taw, ngaˬ hui Yaˬhoˉvaˬ htaꞈ shiˍ tuˬ a yeˇ uiˍ jaˇ ve lehˬ Yeˍsuˆ ve awˬ lawn gʼa henˇ ve yoˬ. Ngaˬ hui Yeˍsuˆ ve awˬ lawn htaꞈ gʼaˇ hteꞈ henˇ ve kʼo, Yeˍsuˆ htaꞈ haꞈ leh yawˇ ve Awˬ pa htaꞈ kaꞈ haꞈ jaˇ tuˬ yoˬ.

6. Ngaˬ hui Yeˍsuˆ htaꞈ awˬ chawˇ te tuˬ awˬ nu ve awˬ hkʼaˇ aˬ htoꞈ ma cawˬ sheˍ ve le? Kʼoˆ maˍ laˇ sheˍ.

⁶ Ngaˬ hui ve bon lawˬ hkawˇ hkʼawꞈ laˇ tuˬ,  Yeˍsuˆ htaꞈ awˬ chawˇ gʼa te cawˇ ve yoˬ. Awˬ leh meuˇ htaˇ “[Yeˍsuˆ] ve awˬ meh awˬ hkʼaw lo” bon lawˬ ve ceh kʼoˆ ve maˇ lawꞈ. Ngaˬ hui ve bon lawˬ hkawˇ htaꞈ hkʼawꞈ laˇ tuˬ, Yaˬhoˉvaˬ Yeˍsuˆ htaꞈ hkʼaˬ hkʼe yehˇ ve na gʼa cawˇ ve yoˬ. Yeˍsuˆ tcuh yaˇ htaꞈ kʼoˆ piˇ ve, “ngaˬ ve awˬ meh awˬ hkʼaw lo nawˬ hui hkʼa lawˬ ve teˇ hpaˍ htaꞈ ngaˬ te tuˬ yoˬ.” (Yoˇhanˬ 14:13) Yaˬhoˉvaˬ ngaˬ hui ve bon lawˬ hkawˇ na leh hkʼawꞈ laˇ shehˍ hpaˇ hpehꞈ ve htawˇ, yawˇ ve a loˍ biˇ la tuˬ Yeˍsuˆ htaꞈ kanˇ paˆ piˇ ve yoˬ. (Maꞈhtehˍ 28:18) Chi htaꞈ pa taw, Yaˬhoˉvaˬ ngaˬ hui ve bon lawˬ hkawˇ htaꞈ maˇ hkʼawꞈ laˇ sheˍ htaˇ, Yeˍsuˆ beˆ maˍ laˇ ve htaꞈ yuˬ yehˇ˗aw laˇ tehꞈ, yawˇ awˉ lawˉ nyi sheˍ ve yoˬ. Tawˇ pa haˉ te kʼo, Yeˍsuˆ kʼoˆ ve, “nawˬ hui shu ve yaꞈ kuiˬ jiˆ kuiˬ htaꞈ hpehˇ hkʼa kʼo, mvuhˇ naw ma hkʼoˆ chehˇ ve nawˬ hui ve Awˬ pa lehˬ, nawˬ hui ve yaꞈ kuiˬ jiˆ kuiˬ htaꞈ htawˇ hpehˇ hkʼa laˇ tuˬ yoˬ. Yaꞈ hkʼaˇ, nawˬ hui lehˬ shu ve yaꞈ kuiˬ jiˆ kuiˬ htaꞈ maˇ hpehˇ hkʼa kʼo, nawˬ hui ve Awˬ pa htawˇ, nawˬ hui ve yaꞈ kuiˬ jiˆ kuiˬ htaꞈ maˇ hpehˇ” laˇ taˬ. (Maꞈhtehˍ 6:14, 15) Yaˬhoˉvaˬ leh Yeˍsuˆ ngaˬ hui htaꞈ te laˇ ve hkʼe, ngaˬ hui shu htaꞈ te piˇ tuˬ a yeˇ uiˍ jaˇ.

7. Yeˍsuˆ htaiˍ hkʼawꞈ laˇ ve awˬ hpfuhˇ a shu awˬ bon gʼa tuˬ le?

⁷ Yeˍsuˆ htaꞈ meuˆ daꞈ ve chaw ceh tiˉ htaiˍ hkʼawꞈ ve htaꞈ awˬ bon gʼa ve yoˬ. Awˬ lawn chi ngaˬ hui hkʼaˬ hkʼe te shiˍ gʼa ve le? Yeˍsuˆ kʼoˆ ve, “awˬ chawˇ awˬ pon a shu yawˇ ve a shaꞈ tanˇ piˇ” gʼa ve yoˬ. (Yoˇhanˬ 15:13) Yeˍsuˆ miˬ guiˬ hkʼoˆ maˇ laˬ sheˍ htaˇ, Gʼuiˬ sha htaꞈ oˉ kʼoˍ pui ve ka tiꞈ yeˬ ve chaw teˇ hpaˍ hpaˍ Yeˍsuˆ htaꞈ henˇ yuˬ leh gʼa haꞈ ve htaꞈ kʼoˆ gaˇ ve yoˬ. Chaw chi ve teˇ hpaˍ lehˬ Aˍbraˍhanˍ, Saˍraˇ, Moˉseˍ, leh Raˍhaˆ, yawˇ hui htawˇ kʼawꞈ teꞈ tu la tcuh tuˬ yoˬ. Yawˇ hui co co taiˍ taiˍ a shaꞈ gʼa tuˬ yawˇ hui kaꞈ oˇ ve teˇ yanˇ Yeˍsuˆ htaꞈ awˬ chawˇ gʼa te ve yoˬ.—Yoˇhanˬ 17:3; Tcuh yaˇ 24:15; Heˍbrehˇ 11:8-12, 24-26, 31.

8-9. Yoˇhanˬ liꞈ 15:4, 5 hkʼaw kʼoˆ taˍ ve hkʼe, ngaˬ hui Yeˍsuˆ htaꞈ awˬ chawˇ te leh meuˆ daꞈ ve kʼo, aˬ htoꞈ ma te gʼa tuˬ le? Aˬ htoꞈ ma te chi hkʼe te ve a yeˇ uiˍ ve le?

⁸ Hto toˇ ve leh ngaˬ hui Gʼuiˬ sha ve mvuhˇ miˬ awˬ lawn shu htaꞈ maˍ piˇ ve Yeˍsuˆ geh kanˉ teˇ geh gʼa te ve ha lehˬ jaˇ. Yeˍsuˆ miˬ guiˬ hkʼoˆ chehˇ htaˇ, Saˍ laꞈ hpehꞈ leh yawˇ mvuhˇ naw ma hkʼoˆ kʼawꞈ˗e˗oˬ htaˇ kaꞈ Hkriꞈ yaˇ awˬ moˍ, hto toˇ ve leh Liꞈ hpu maˍ ve htaꞈ beˆ maˍ piˇ chehˇ sheˍ. Yeˍsuˆ htaꞈ shiˍ daꞈ tuˬ nawˬ te gʼa ve hkʼe te ve htaꞈ yawˇ mawˬ leh, yawˇ leh Awˬ pa nawˬ coˇ caˇ leh te ve htaꞈ awˬ hpfuhˇ shiˍ ve yoˬ. Ngaˬ hui kanˉ chi ve te biˇ gʼa tuˬ Yaˬhoˉvaˬ leh Yeˍsuˆ ga laˇ ve awˬ hkʼaˇ ceh tiˉ cawˬ ve yoˬ.—Yoˇhanˬ 15:4, 5 gʼaw sheˍ.

⁹ Yaˬhoˉvaˬ nyi hkʼaˇ suh tuˬ ngaˬ hui Yeˍsuˆ htaꞈ haꞈ leh chi hkʼe te kʼai tuˬ Liꞈ hpu hkʼaw hkʼa tawˍ lehˆ kʼoˆ laˇ ve yoˬ. Ngaˬ hui Yeˍsuˆ htaꞈ awˬ chawˇ te gʼa tuˬ chi teˇ hkui 4 hkʼaˇ htaꞈ teˇ geh henˇ tuˬ yoˬ.

10. Ngaˬ hui Yeˍsuˆ htaꞈ awˬ chawˇ te gʼa tuˬ awˉ lawˉ teˇ hkʼaˇ aˬ htoꞈ ma gʼa te cawˇ ve le?

¹⁰ (1) Yeˍsuˆ htaꞈ hkʼa dehꞈ shiˍ daꞈ sheˍ. Ngaˬ hui chi hkʼe te gʼa tuˬ Maꞈhtehˍ, Maˍkuˆ, Luˉkaꞈ, leh Yoˇhanˬ ve Liꞈ hpu awˬ tawn htaꞈ gʼa gʼaw ve yoˬ. Yeˍsuˆ ve a shaꞈ teꞈ hkʼaˇ htaꞈ ngaˬ hui hkʼa dehꞈ dawˇ nyi htaˇ, yawˇ shu htaꞈ nyi ma nuˇ nehˬ ve hkʼaw te piˇ ve htaꞈ ngaˬ hui mawˬ ve pa taw, Yeˍsuˆ htaꞈ haꞈ leh yawˆ yan tuˬ yoˬ. Yeˍsuˆ awˬ shehˍ hpaˇ hpehꞈ ve htawˇ, yawˇ awˬ laꞈ gʼawˇ htaꞈ awˬ ceˬ hkʼe leˇ maˇ te piˇ. Yawˇ hkʼaˬ hkʼe dawˇ ve yawˇ hui htaꞈ kʼoˆ maˍ piˇ ve yoˬ. (Yoˇhanˬ 15:15) Awˬ laꞈ gʼawˇ nyi ma luˬ ve kʼo, yawˇ kaꞈ nyi ma luˬ ve yoˬ. Yawˇ hui hawˬ ve kʼo, yawˇ kaꞈ hawˬ ve yoˬ. (Yoˇhanˬ 11:32-36) Yeˍsuˆ htaꞈ tawˍ piˇ ve chaw htawˇ, yawˇ maˍ piˇ ve chaw htaꞈ awˬ chawˇ hpehꞈ ve tehꞈ yawˇ hui gʼa mawˬ ve yoˬ. (Maꞈhtehˍ 11:19) Yeˍsuˆ awˬ laꞈ gʼawˇ htaꞈ te piˇ ve ngaˬ hui henˇ yuˬ htaˇ, ngaˬ hui  kaꞈ shu geh meuˆ daꞈ gʼa ve yoˬ. Ngaˬ hui Yeˍsuˆ htaꞈ haꞈ leh yawˆ yan ve kʼo, ha lehˬ tuˬ yoˬ.

11. Ngaˬ hui Yeˍsuˆ htaꞈ awˬ chawˇ te gʼa tuˬ te cawˇ ve nyiˇ hkʼaˇ aˬ htoꞈ ma le? Aˬ htoꞈ ma te chi hkʼe te ve a yeˇ uiˍ jaˇ ve le?

¹¹ (2) Yeˍsuˆ ve te hkʼaˇ dawˇ hkʼaˇ htaꞈ henˇ yuˬ sheˍ. Yeˍsuˆ aˬ htoꞈ ma dawˇ ve ngaˬ hui shiˍ htaˇ, ngaˬ hui kaꞈ yawˇ geh meuˆ daꞈ tuˬ yoˬ. (1 Kawˇrenˍhtuˆ 2:16) Yaꞈ hkʼaˇ, ngaˬ hui hkʼaˬ hkʼe te yawˇ htaꞈ henˇ yuˬ gʼa tuˬ le? Teˇ lawn htaꞈ teˇ geh nyi sheˍ. Yeˍsuˆ yawˇ ve a loˍ htaꞈ te ve aꞈ kehˉ shu htaꞈ ga piˇ tuˬ dawˇ nyi ve yoˬ. (Maꞈhtehˍ 20:28; Roˉmaꞈ 15:1-3) Chi htaꞈ pa taw, yawˇ chi hkʼe dawˇ htaˇ, yawˇ awˬ to yuˬ tanˇ leh shu htaꞈ venˇ baˆ hpehˇ piˇ gʼa ve yoˬ. Yawˇ htaꞈ caˉ daꞈ ve maˇ daꞈ ve awˬ lawn shu kʼoˆ htaˇ, yawˇ nyi ma haˆ haˆ maˇ zuhˆ puiˉ. (Yoˇhanˬ 1:46, 47) Shu te yaꞈ jaw ve htaꞈ yawˇ maˇ dawˇ cheˆ piˇ. (1 Tiˆmoˉseˍ 1:12-14) Yeˍsuˆ kʼoˆ ve, “nawˬ hui teˇ gʼaˇ leh teˇ gʼaˇ haꞈ daꞈ ve kʼo, haꞈ daꞈ ve oˇ ve htaꞈ pa taw nawˬ hui ngaˬ ve awˬ laꞈ gʼawˇ hpehꞈ ve htaꞈ chaw hkʼa peu˗eˬ gʼa shiˍ tuˬ yoˬ.” (Yoˇhanˬ 13:35) A shu yawˇ awˬ to htaꞈ na nyi cawˇ ve, “ngaˬ Yeˍsuˆ htaꞈ henˇ yuˬ leh te gʼa ve hkʼe teˇ ceuˬ le le te leh awˬ viˉ awˬ nyi geh cawˇ daꞈ hui daꞈ tuˬ te˗aw laˇ?”

12. Ngaˬ hui Yeˍsuˆ htaꞈ awˬ chawˇ te gʼa tuˬ shehˆ hkʼaˇ teˇ hkʼaˇ aˬ htoꞈ ma le? Chi ngaˬ hui hkʼaˬ hkʼe te gʼa tuˬ le?

¹² (3) Yeˍsuˆ ve awˬ viˉ awˬ nyi hpawˇ chehˇ sheˍ. Yeˍsuˆ ve awˬ viˉ awˬ nyi leuˆ yuˬ taˍ ve chaw htaꞈ ngaˬ hui gʼa ga piˇ htaˇ, Yeˍsuˆ htaꞈ te piˇ ve hkʼa shuˍ hpehꞈ ve yoˬ. (Maꞈhtehˍ 25:34-40) Leuˆ yuˬ taˍ ve chaw htaꞈ ga piˇ ve awˬ hkʼaˇ lehˬ hto toˇ ve, shu awˬ laꞈ gʼawˇ hpehꞈ la tuˬ ngaˬ hui te gʼa ve hkʼe te ve, chi lehˬ Yeˍsuˆ awˬ laꞈ gʼawˇ htaꞈ te kʼoˆ piˇ ve awˬ vuiˬ hkʼe hpehꞈ ve yoˬ. (Maꞈhtehˍ 28:19, 20; Tcuh yaˇ 10:42) Yeˍsuˆ ve awˬ viˉ awˬ nyi htaꞈ “awˬ kaˍ awˬ nu yawˬ teˇ hpaˍ” ga piˇ ve pa taw, yawˇ hui miˬ guiˬ hkʼoˆ hkʼa zuhˇ hto toˇ gʼa ve yoˬ. (Yoˇhanˬ 10:16) Nawˬ awˬ kaˍ awˬ nu yawˬ hpehꞈ ve kʼo, nawˬ hto toˇ ve leh maˍ ve teˇ pawˆ le le Yeˍsuˆ ve awˬ viˉ awˬ nyi htaꞈ haꞈ ve ceh hpeuꞈ maw piˇ ve maˇ heˆ. Nawˬ Yeˍsuˆ htaꞈ haꞈ ve kaꞈ hpeuꞈ maw piˇ ve yoˬ.

13. Luˉkaꞈ liꞈ 16:9 hkʼaw Yeˍsuˆ beˆ maˍ laˇ ve htaꞈ ngaˬ hui hkʼaˬ hkʼe gʼaꞈ te gʼa tuˬ le?

¹³ Yaˬhoˉvaˬ leh Yeˍsuˆ htaꞈ ngaˬ hui awˬ chawˇ te gʼa tuˬ ve awˬ nu ve awˬ hkʼaˇ teˇ hkʼaˇ lehˬ, yawˇ huiˉ maˬ beˆ maˍ laˇ chehˇ ve hpawˇ hpu tanˇ tanˇ piˇ ve yoˬ. (Luˉkaꞈ 16:9 gʼaw sheˍ.) Miˬ guiˬ hkʼoˆ teˇ kaˬ le le te ve kanˉ htaꞈ yehˇ tuˬ ngaˬ hui hpu tanˇ tanˇ piˇ gʼa ve yoˬ. Hpu chi ve lehˬ vuiˇ jaˇ kuiˬ lo hto toˇ ve kanˉ htaꞈ yehˇ tuˬ ga piˇ ve, awˬ tehˬ ve oˉ kʼoˍ pui kuiˬ te leh nyi haꞈ shaˉ ve htaꞈ ga piˇ ve, awˬ viˉ awˬ nyi mvuhˇ yeˬ mvuhˇ haw hpawˇ gʼa hpuˇ ve chaw htaꞈ kaꞈ ga piˇ ve yoˬ. Chi hkʼoˆ kaꞈ, Hkriꞈ yaˇ awˬ moˍ hkʼaw awˬ kaˍ awˬ nu ve yehˇ tuˬ kaꞈ ga piˇ leh awˬ viˉ awˬ nyi ga laˇ tuˬ loˍ ve htaꞈ kaꞈ ga piˇ ve yoˬ. (Tawˇ naˉ ve 19:17) Chi ve teˇ hpaˍ ngaˬ hui Yeˍsuˆ ve awˬ viˉ awˬ nyi htaꞈ ga piˇ ve awˬ hkʼaˇ hpehꞈ ve yoˬ.

14. Eˇfeˇsuꞈ liꞈ 4:15, 16 hkʼaw kʼoˆ taˍ ve hkʼe, ngaˬ hui Yeˍsuˆ htaꞈ awˬ chawˇ te gʼa tuˬ, gʼa te cawˇ ve awˇ hkʼaˇ teˇ hkʼaˇ aˬ htoꞈ ma le?

¹⁴ (4) Yaˬhoˉvaˬ ve kanˉ hkʼaˇ hpawˇ chehˇ sheˍ. Ngaˬ hui htaꞈ nyi haꞈ shaˉ laˇ tuˬ leuˆ teh taˍ ve htaꞈ ga piˇ htaˇ, Hkriꞈ yaˇ awˬ moˍ hkʼoˆ nyi haꞈ shaˉ paˍ Yeˍsuˆ htaꞈ meuˆ daꞈ gʼa tuˬ yoˬ. (Eˇfeˇsuꞈ 4:15, 16 gʼaw sheˍ.) Tawˇ pa haˉ te kʼo, chi teˇ hkui ngaˬ hui ve hpawnˬ daꞈ kuiˬ yehˬ htaꞈ awˬ bon cawˬ tuˬ hkʼa dehꞈ yehˇ ve yoˬ. Chi hkʼe te gʼa tuˬ hto toˇ kuiˬ awˬ hkʼaˇ awˬ suhˉ pa tuˬ awˬ nu ve Hkriꞈ yaˇ awˬ moˍ htaꞈ gʼa pawnˇ daꞈ ve yoˬ. Awˬ hkʼaˇ chi hkʼe pa ve lehˬ Gʼuiˬ sha ve kanˉ hkʼaˇ hpu hkʼe taw maˇ gʼa peuˬ tuˬ ga piˇ ve yoˬ. Chi hkʼe te htaˇ, hto toˇ ve chaw teˇ hpaˍ hpaˍ kaꞈ gʼa pa cawˇ ve yoˬ. Hto toˇ ve ka tiꞈ yeˬ ve chaw chi teˇ hpaˍ yawˇ hui chehˇ maw jaˇ˗oˬ ve Hkriꞈ yaˇ awˬ moˍ leh awˬ viˉ awˬ nyi meuˆ daꞈ ve geh kaꞈ maˇ gʼa chehˇ. Ka tiꞈ yeˬ ve awˬ  laꞈ gʼawˇ chi ve teˇ hpaˍ Gʼuiˬ sha ve kanˉ hkʼaˇ hpawˇ hkʼa dehꞈ chehˇ ve htaꞈ Yeˍsuˆ gʼa mawˬ htaˇ, ha lehˬ jaˇ!

15. Awˬ gʼuˇ suhˍ hpawˇ ngaˬ hui hkʼaˬ hkʼe te Yeˍsuˆ htaꞈ meuˆ daꞈ gʼa tuˬ le?

¹⁵ Leuˆ yuˬ taˍ ve chaw Yeˍsuˆ geh co co taiˍ taiˍ gʼa chehˇ tuˬ, yawˇ hui Gʼuiˬ sha ve mvuhˇ miˬ hkʼaw Yeˍsuˆ geh teˇ geh uˉ peunˍ tuˬ, yawˇ hui awˬ tehˬ awˬ na Yeˍsuˆ geh chehˇ tuˬ, yawˇ htaꞈ mawˬ tuˬ, yawˇ geh gʼa yaw daꞈ tuˬ, leh yawˇ hui teˇ geh awˬ chawˇ te gʼa tuˬ dawˇ law taˍ ve yoˬ. (Yoˇhanˬ 14:2, 3) Miˬ guiˬ hkʼoˆ lo chehˇ ve chaw kaꞈ, Yeˍsuˆ haꞈ leh nyi haꞈ shaˉ laˇ tuˬ ve htaꞈ dawˇ law taˍ ve yoˬ. Yawˇ hui Yeˍsuˆ htaꞈ maˇ mawˬ ve htawˇ, yawˇ hui htaꞈ Yaˬhoˉvaˬ leh Yeˍsuˆ piˇ ve co co taiˍ taiˍ ve a shaꞈ htaꞈ gʼa htaˇ, yawˇ hui Yeˍsuˆ geh meuˆ daꞈ tuˬ yoˬ.—Iˉsaˍyaˆ 9:6, 7.

16. Yeˍsuˆ ve awˬ chawˇ hpehꞈ htaˇ, ngaˬ hui aˬ htoꞈ ma awˬ bon gʼa tuˬ le?

¹⁶ Yeˍsuˆ yawˇ htaꞈ awˬ chawˇ te la tuˬ kuˬ laˇ ve htaꞈ ngaˬ hui haꞈ yuˬ htaˇ, awˬ bon maˇ maˇ gʼa tuˬ yoˬ. Yeˍsuˆ haꞈ leh ga laˇ ve htaꞈ ngaˬ hui gʼa ve, co co taiˍ taiˍ a shaꞈ gʼa tuˬ ve awˬ hkʼaˇ cawˬ ve yoˬ. Yeˍsuˆ geh awˬ chawˇ te ve a yeˇ uiˍ jaˇ ve lehˬ, yawˇ ve Awˬ pa geh awˬ chawˇ te gʼa tuˬ awˬ hkʼaˇ hpaw laˇ ve, chi hkʼe taw taw daꞈ ve teˇ ceuˬ kaꞈ maˇ cawˬ. Chi lehˬ Yeˍsuˆ ve awˬ chawˇ tehꞈ kuˬ ve daꞈ jaˇ!