ບົດຄວາມສຶກສາທີ 17
“ຂ້ອຍເອີ້ນພວກເຈົ້າວ່າໝູ່”
“ຂ້ອຍເອີ້ນພວກເຈົ້າວ່າໝູ່ ຍ້ອນຂ້ອຍບອກພວກເຈົ້າໃຫ້ຮູ້ທຸກເລື່ອງທີ່ຂ້ອຍໄດ້ຍິນຈາກພໍ່ຂອງຂ້ອຍ.”—ຢຮ. 15:15
ເພງ 13 ພະຄລິດເປັນແບບຢ່າງຂອງເຮົາ
ໃຈຄວາມສຳຄັນ *
1. ເຈົ້າຈະເປັນໝູ່ສະໜິດກັບໃຜຄົນໜຶ່ງໄດ້ແນວໃດ?
ຕາມປົກກະຕິແລ້ວເພື່ອຈະເປັນໝູ່ສະໜິດກັບໃຜຄົນໜຶ່ງ ທຳອິດເຈົ້າຕ້ອງໃຊ້ເວລາກັບຄົນນັ້ນ. ເມື່ອເຈົ້າລົມກັບຄົນນັ້ນຕະຫຼອດ ແລກປ່ຽນຄວາມຄິດເຫັນແລະປະສົບການໃຫ້ກັນຟັງ ເຈົ້າກໍຈະເປັນໝູ່ສະໜິດກັນ. ແຕ່ບາງເທື່ອກໍບໍ່ງ່າຍທີ່ຈະເປັນໝູ່ສະໜິດກັບພະເຢຊູ. ຍ້ອນຫຍັງ?
2. ເຫດຜົນທຳອິດທີ່ເຮັດໃຫ້ຍາກທີ່ຈະເປັນໝູ່ສະໜິດກັບພະເຢຊູແມ່ນຫຍັງ?
2 ເຫດຜົນທຳອິດທີ່ເຮັດໃຫ້ຍາກທີ່ຈະເປັນໝູ່ສະໜິດກັບພະເຢຊູຄື ເຮົາບໍ່ເຄີຍເຫັນພະເຢຊູ. ຄລິດສະຕຽນຫຼາຍຄົນໃນສະຕະວັດທຳອິດກໍບໍ່ເຄີຍເຫັນພະເຢຊູຄືກັນ. ແຕ່ອັກຄະສາວົກເປໂຕບອກວ່າ: “ເຖິງວ່າພວກເຈົ້າບໍ່ເຄີຍເຫັນພະຄລິດ ແຕ່ກໍຮັກເພິ່ນ ແລະເຖິງວ່າຕອນນີ້ພວກເຈົ້າຍັງບໍ່ເຫັນເພິ່ນແຕ່ກໍສະແດງຄວາມເຊື່ອໃນຕົວເພິ່ນ.” (1 ປຕ. 1:8) ດັ່ງນັ້ນ ເຮົາກໍສາມາດເປັນໝູ່ສະໜິດກັບພະເຢຊູໄດ້ໂດຍທີ່ບໍ່ເຄີຍເຫັນເພິ່ນ.
3. ເຫດຜົນທີສອງທີ່ເຮັດໃຫ້ຍາກທີ່ຈະເປັນໝູ່ສະໜິດກັບພະເຢຊູແມ່ນຫຍັງ?
3 ເຫດຜົນທີສອງຄື ເຮົາເວົ້າກັບພະເຢຊູໂດຍກົງບໍ່ໄດ້. ຕອນທີ່ເຮົາອະທິດຖານແມ່ນເຮົາລົມກັບພະເຢໂຫວາໂດຍກົງ. ກໍແມ່ນຢູ່ວ່າເຮົາອະທິດຖານໃນນາມຊື່ຂອງພະເຢຊູ ແຕ່ກໍບໍ່ໄດ້ລົມກັບພະເຢຊູໂດຍກົງ. ທີ່ຈິງ ພະເຢຊູບໍ່ໄດ້ຢາກໃຫ້ເຮົາອະທິດຖານເຖິງເພິ່ນ. ຍ້ອນຫຍັງ? ກໍຍ້ອນວ່າການອະທິດຖານເປັນຮູບແບບໜຶ່ງຂອງການນະມັດສະການ ແລະມີພຽງພະເຢໂຫວາຜູ້ດຽວເທົ່ານັ້ນທີ່ສົມຄວນໄດ້ຮັບການນະມັດສະການ. (ມທ. 4:10) ແນວໃດກໍຕາມ ເຖິງວ່າເຮົາເວົ້າກັບພະເຢຊູບໍ່ໄດ້ ແຕ່ເຮົາກໍຮັກເພິ່ນໄດ້.
4. ເຫດຜົນທີສາມທີ່ເຮັດໃຫ້ຍາກທີ່ຈະເປັນໝູ່ສະໜິດກັບພະເຢຊູແມ່ນຫຍັງ ແລະເຮົາຈະມາເບິ່ງຫຍັງໃນບົດຄວາມນີ້?
4 ເຫດຜົນທີສາມຄືພະເຢຊູຢູ່ເທິງສະຫວັນ ດັ່ງນັ້ນ ເຮົາບໍ່ສາມາດໃຊ້ເວລາຢູ່ກັບພະເຢຊູໄດ້. ເຖິງວ່າເຮົາຈະບໍ່ໄດ້ຢູ່ກັບເພິ່ນ ແຕ່ເຮົາກໍສາມາດຮູ້ຈັກເພິ່ນຫຼາຍຂຶ້ນໄດ້. ໃຫ້ເຮົາມາເບິ່ງ 4 ຢ່າງທີ່ຈະຊ່ວຍໃຫ້ເຮົາເປັນໝູ່ສະໜິດກັບເພິ່ນ. ທຳອິດ ໃຫ້ເຮົາມາເບິ່ງວ່າ ເປັນຫຍັງຈຶ່ງສຳຄັນທີ່ເຮົາຕ້ອງເປັນໝູ່ກັບພະເຢຊູຄລິດ.
ເປັນຫຍັງເຮົາຕ້ອງເປັນໝູ່ກັບພະເຢຊູ?
5. ເປັນຫຍັງເຮົາຕ້ອງເປັນໝູ່ກັບພະເຢຊູ? (ເບິ່ງຂອບ “ ການເປັນໝູ່ກັບພະເຢຊູເຮັດໃຫ້ເປັນໝູ່ກັບພະເຢໂຫວາໄດ້” ແລະ “ ເບິ່ງບົດບາດຂອງພະເຢຊູຢ່າງຖືກຕ້ອງ.”)
5 ເຮົາຕ້ອງເປັນໝູ່ກັບພະເຢຊູຖ້າເຮົາຢາກເປັນໝູ່ສະໜິດກັບພະເຢໂຫວາ. ຍ້ອນຫຍັງ? ມີ 2 ເຫດຜົນ: ທຳອິດ ພະເຢຊູບອກລູກສິດຂອງເພິ່ນວ່າ: “ພະເຈົ້າຜູ້ເປັນພໍ່ຮັກພວກເຈົ້າ ຍ້ອນພວກເຈົ້າຮັກຂ້ອຍ.” (ຢຮ. 16:27) ເພິ່ນຍັງບອກວ່າ: “ບໍ່ມີຜູ້ໃດທີ່ຈະມາເຖິງພະເຈົ້າຜູ້ເປັນພໍ່ໄດ້ນອກຈາກມາທາງຂ້ອຍ.” (ຢຮ. 14:6) ການພະຍາຍາມເປັນໝູ່ກັບພະເຢໂຫວາໂດຍທີ່ບໍ່ໄດ້ເປັນໝູ່ກັບພະເຢຊູກໍຄືກັບການພະຍາຍາມເຂົ້າໄປໃນຕຶກໂດຍບໍ່ໃຊ້ປະຕູ. ພະເຢຊູກໍໃຊ້ຕົວຢ່າງທີ່ຄ້າຍຄືກັນນີ້ເມື່ອເພິ່ນບອກວ່າເພິ່ນເປັນ “ປະຕູສຳລັບແກະ.” (ຢຮ. 10:7) ສອງ ພະເຢຊູຮຽນແບບຄຸນລັກສະນະຂອງພະເຢໂຫວາໄດ້ຢ່າງສົມບູນແບບ. ເພິ່ນບອກພວກລູກສິດວ່າ: “ຜູ້ທີ່ໄດ້ເຫັນຂ້ອຍກໍໄດ້ເຫັນພະເຈົ້າຜູ້ເປັນພໍ່.” (ຢຮ. 14:9) ດັ່ງນັ້ນ ວິທີທີ່ສຳຄັນທີ່ເຮົາຈະຮູ້ຈັກພະເຢໂຫວາກໍໂດຍການຮຽນຮູ້ກ່ຽວກັບຊີວິດຂອງພະເຢຊູ. ເມື່ອເຮົາຮຽນເລື່ອງພະເຢຊູ ເຮົາກໍຈະຮັກເພິ່ນຫຼາຍຂຶ້ນ. ແລະແຮ່ງເຮົາຮັກພະເຢຊູຫຼາຍເທົ່າໃດ ເຮົາກໍແຮ່ງຮັກພະເຢໂຫວາພໍ່ຂອງເພິ່ນຫຼາຍເທົ່ານັ້ນ.
6. ມີເຫດຜົນຫຍັງອີກທີ່ເຮົາຕ້ອງເປັນໝູ່ກັບພະເຢຊູ? ຂໍໃຫ້ອະທິບາຍ.
6 ເຮົາຕ້ອງເປັນໝູ່ກັບພະເຢຊູເພື່ອທີ່ຄຳອະທິດຖານຂອງເຮົາຈະໄດ້ຮັບຄຳຕອບ. ນີ້ໝາຍຄວາມວ່າ ເຮົາຕ້ອງບໍ່ພຽງແຕ່ເວົ້າໃນຕອນທ້າຍຂອງຄຳອະທິດຖານວ່າ “ໃນນາມຂອງພະເຢຊູ”. ເຮົາຕ້ອງເຂົ້າໃຈວ່າພະເຢໂຫວາໃຊ້ພະເຢຊູແນວໃດໃນການຕອບຄຳອະທິດຖານຂອງເຮົາ. ພະເຢຊູບອກພວກອັກຄະສາວົກວ່າ: “ບໍ່ວ່າພວກເຈົ້າຈະຂໍຫຍັງໃນນາມຂອງຂ້ອຍ ຂ້ອຍກໍຈະເຮັດສິ່ງນັ້ນໃຫ້.” (ຢຮ. 14:13) ເຖິງວ່າພະເຢໂຫວາຈະເປັນຜູ້ດຽວທີ່ຟັງແລະຕອບຄຳອະທິດຖານຂອງເຮົາ ແຕ່ພະອົງກໍມອບອຳນາດໃຫ້ພະເຢຊູເປັນຜູ້ຕັດສິນໃຈແທນພະອົງ. (ມທ. 28:18) ດັ່ງນັ້ນ ກ່ອນທີ່ພະອົງຈະຕອບຄຳອະທິດຖານຂອງເຮົາ ພະອົງຈະເບິ່ງກ່ອນວ່າເຮົາໄດ້ເຮັດຕາມຄຳແນະນຳຂອງພະເຢຊູຫຼືບໍ່. ພະເຢຊູບອກວ່າ: “ຖ້າເຈົ້າໃຫ້ອະໄພຄົນທີ່ເຮັດຜິດຕໍ່ເຈົ້າ ພະເຈົ້າຜູ້ເປັນພໍ່ທີ່ຢູ່ໃນສະຫວັນກໍຈະໃຫ້ອະໄພເຈົ້າຄືກັນ. ແຕ່ຖ້າເຈົ້າບໍ່ໃຫ້ອະໄພຄົນອື່ນ ພະອົງກໍຈະບໍ່ໃຫ້ອະໄພເຈົ້າຄືກັນ.” (ມທ. 6:14, 15) ເປັນເລື່ອງສຳຄັນຫຼາຍແທ້ໆທີ່ເຮົາຄວນປະຕິບັດກັບຄົນອື່ນໃນແບບດຽວກັບທີ່ພະເຢໂຫວາແລະພະເຢຊູປະຕິບັດກັບເຮົາ!
7. ໃຜທີ່ຈະໄດ້ຮັບປະໂຫຍດຈາກຄ່າໄຖ່ຂອງພະເຢຊູ?
7 ສະເພາະຄົນທີ່ເປັນໝູ່ສະໜິດກັບພະເຢຊູເທົ່ານັ້ນຈຶ່ງຈະໄດ້ຮັບປະໂຫຍດຈາກຄ່າໄຖ່. ເຮົາຮູ້ໄດ້ແນວໃດ? ພະເຢຊູບອກວ່າເພິ່ນ ‘ຍອມສະລະຊີວິດຂອງຕົວເອງເພື່ອໝູ່ຂອງເພິ່ນ.’ (ຢຮ. 15:13) ຜູ້ຮັບໃຊ້ທີ່ສັດຊື່ຂອງພະເຢໂຫວາທີ່ມີຊີວິດກ່ອນພະເຢຊູມາເກີດເທິງໂລກກໍຕ້ອງຮຽນຮູ້ກ່ຽວກັບເພິ່ນແລະຮັກເພິ່ນ. ຕົວຢ່າງເຊັ່ນ: ອັບຣາຮາມ ຊາຣາ ໂມເຊ ແລະຣາຮາບຈະຖືກປຸກໃຫ້ຄືນມາຈາກຕາຍ ແຕ່ພວກເຂົາກໍຕ້ອງມາເປັນໝູ່ກັບພະເຢຊູເພື່ອຈະໄດ້ຮັບຊີວິດຕະຫຼອດໄປ.—ຢຮ. 17:3; ກຈກ. 24:15; ຮຣ. 11:8-12, 24-26, 31
8-9. ຕາມໂຢຮັນ 15:4, 5 ເຮົາຕ້ອງເຮັດຫຍັງເພື່ອຈະເປັນໝູ່ກັບພະເຢຊູ ແລະເປັນຫຍັງຈຶ່ງສຳຄັນ?
8 ເຮົາມີຄວາມສຸກທີ່ໄດ້ເຮັດວຽກຮ່ວມກັບພະເຢຊູໃນການປະກາດແລະສອນຂ່າວດີເລື່ອງການປົກຄອງຂອງພະເຈົ້າ. ຕອນທີ່ພະເຢຊູຢູ່ເທິງໂລກ ເພິ່ນກໍເປັນຄູສອນ. ແລະຕັ້ງແຕ່ພະເຢຊູກັບໄປສະຫວັນ ເພິ່ນໄດ້ເປັນຜູ້ນຳຂອງປະຊາຄົມແລະເພິ່ນຍັງໄດ້ຊີ້ນຳວຽກປະກາດແລະວຽກສອນ. ເພິ່ນຮູ້ແລະເຫັນຄ່າຄວາມພະຍາຍາມຂອງເຈົ້າທີ່ຊ່ວຍຫຼາຍຄົນໃຫ້ມາຮູ້ຈັກເພິ່ນແລະພະເຢໂຫວາພໍ່ຂອງເພິ່ນ. ທີ່ຈິງ ມີວິທີດຽວທີ່ເຮົາຈະເຮັດວຽກນີ້ໃຫ້ສຳເລັດໄດ້ກໍຄື ພະເຢໂຫວາແລະພະເຢຊູຊ່ວຍເຮົາ.—ອ່ານໂຢຮັນ 15:4, 5
9 ຄຳພີໄບເບິນສອນເຮົາຢ່າງຈະແຈ້ງວ່າ ເຮົາຕ້ອງຮັກພະເຢຊູແລະເປັນໝູ່ກັບເພິ່ນເພື່ອຈະເຮັດໃຫ້ພະເຢໂຫວາພໍໃຈ. ດັ່ງນັ້ນ ໃຫ້ເຮົາມາເບິ່ງ 4 ຢ່າງທີ່ຈະຊ່ວຍເຮົາໃຫ້ເປັນໝູ່ກັບພະເຢຊູໄດ້.
ເຮົາຈະເປັນໝູ່ກັບພະເຢຊູໄດ້ແນວໃດ?
ເຈົ້າສາມາດເປັນໝູ່ກັບພະເຢຊູໄດ້ໂດຍ (1) ຮູ້ຈັກເພິ່ນໃຫ້ຫຼາຍຂຶ້ນ (2) ພະຍາຍາມຄິດແລະເຮັດຄືກັບພະເຢຊູ (3) ສະໜັບສະໜູນພີ່ນ້ອງຂອງພະຄລິດ (4) ຮ່ວມມືກັບອົງການຂອງພະເຢໂຫວາ (ເບິ່ງຂໍ້ 10-14) *
10. ສິ່ງທຳອິດທີ່ເຮົາຕ້ອງເຮັດເພື່ອຈະເປັນໝູ່ກັບພະເຢຊູແມ່ນຫຍັງ?
10 (1) ຮູ້ຈັກພະເຢຊູ. ເຮົາສາມາດຮູ້ຈັກພະເຢຊູໄດ້ໂດຍອ່ານປຶ້ມມັດທາຍ ມາຣະໂກ ລູກາ ແລະໂຢຮັນ. ເມື່ອເຮົາຄິດຕຶກຕອງກ່ຽວກັບຊີວິດຂອງພະເຢຊູທີ່ຂຽນໄວ້ໃນປຶ້ມເຫຼົ່ານີ້ ເຮົາກໍຈະຮັກແລະນັບຖືພະເຢຊູຍ້ອນວິທີທີ່ເພິ່ນປະຕິບັດຕໍ່ຜູ້ຄົນ. ຕົວຢ່າງ: ເຖິງວ່າພະເຢຊູຈະເປັນນາຍຂອງພວກອັກຄະສາວົກ ແຕ່ເພິ່ນກໍບໍ່ເຄີຍປະຕິບັດກັບພວກເຂົາແບບທາດ. ແທນທີ່ຈະເຮັດແບບນັ້ນ ເພິ່ນພັດບອກຄວາມຄິດແລະຄວາມຮູ້ສຶກຂອງເພິ່ນໃຫ້ພວກເຂົາຮູ້. (ຢຮ. 15:15) ຕອນທີ່ພວກເຂົາໂສກເສົ້າ ພະເຢຊູກໍຮູ້ສຶກໂສກເສົ້າແລະຮ້ອງໄຫ້ຄືກັນ. (ຢຮ. 11:32-36) ແມ່ນແຕ່ສັດຕູຂອງພະເຢຊູກໍຮູ້ວ່າ ເພິ່ນເປັນໝູ່ກັບຄົນທີ່ຕອບຮັບຂ່າວສານຂອງເພິ່ນ. (ມທ. 11:19) ເມື່ອເຮົາຮຽນແບບວິທີທີ່ພະເຢຊູປະຕິບັດກັບພວກລູກສິດ ເຮົາກໍຈະເຂົ້າກັບຄົນອື່ນໄດ້ດີ ມີຄວາມສຸກຫຼາຍຂຶ້ນ ແລະເຮົາກໍຈະຮູ້ສຶກຮັກແລະນັບຖືພະເຢຊູຫຼາຍຂຶ້ນ.
11. ສິ່ງທີສອງທີ່ເຮົາຕ້ອງເຮັດເພື່ອຈະເປັນໝູ່ກັບພະເຢຊູແມ່ນຫຍັງ ແລະເປັນຫຍັງການເຮັດແບບນັ້ນຈຶ່ງສຳຄັນ?
11 (2) ພະຍາຍາມຄິດແລະເຮັດຄືກັບພະເຢຊູ. ແຮ່ງເຮົາຮູ້ຈັກແລະຮຽນແບບວິທີຄິດຂອງພະເຢຊູໄດ້ດີເທົ່າໃດ ເຮົາກໍແຮ່ງຈະສະໜິດກັບເພິ່ນຫຼາຍຂຶ້ນ. (1 ກຣ. 2:16) ເຮົາຈະຮຽນແບບພະເຢຊູໄດ້ແນວໃດ? ຂໍໃຫ້ຄິດເຖິງຕົວຢ່າງນີ້. ພະເຢຊູຄິດກ່ຽວກັບການຊ່ວຍເຫຼືອຄົນອື່ນຫຼາຍກວ່າການເຮັດຕາມໃຈຕົວເອງ. (ມທ. 20:28; ຣມ. 15:1-3) ຍ້ອນພະເຢຊູຄິດແນວນີ້ ເພິ່ນຈຶ່ງເສຍສະລະຕົວເອງແລະໃຫ້ອະໄພຄົນອື່ນ. ເພິ່ນບໍ່ໄດ້ຄຽດງ່າຍໆໃຫ້ຄົນທີ່ເວົ້າໃຫ້ເພິ່ນ. (ຢຮ. 1:46, 47) ແລະເພິ່ນບໍ່ຕັດສິນຜູ້ຄົນຈາກສິ່ງທີ່ບໍ່ດີທີ່ພວກເຂົາເຄີຍເຮັດໃນອະດີດ. (1 ຕມ. 1:12-14) ພະເຢຊູບອກວ່າ: “ທຸກຄົນຈະຮູ້ວ່າພວກເຈົ້າເປັນລູກສິດຂອງຂ້ອຍ ເມື່ອພວກເຈົ້າຮັກກັນ.” (ຢຮ. 13:35) ຂໍໃຫ້ຖາມຕົວເອງວ່າ: “ຂ້ອຍກຳລັງເຮັດຕາມຕົວຢ່າງຂອງພະເຢຊູໂດຍເຮັດທຸກສິ່ງທີ່ຂ້ອຍເຮັດໄດ້ເພື່ອຈະສ້າງສັນຕິສຸກກັບພີ່ນ້ອງບໍ?”
12. ສິ່ງທີສາມທີ່ເຮົາຕ້ອງເຮັດເພື່ອຈະເປັນໝູ່ກັບພະເຢຊູແມ່ນຫຍັງ ແລະເຮົາຈະເຮັດແບບນັ້ນໄດ້ແນວໃດ?
12 (3) ສະໜັບສະໜູນພີ່ນ້ອງຂອງພະຄລິດ. ພະເຢຊູຖືວ່າສິ່ງທີ່ເຮົາເຮັດເພື່ອຜູ້ຖືກເຈີມທີ່ເປັນພີ່ນ້ອງຂອງເພິ່ນ ກໍສ່ຳກັບວ່າເຮົາກຳລັງເຮັດໃຫ້ເພິ່ນ. (ມທ. 25:34-40) ວິທີຫຼັກທີ່ເຮົາສະໜັບສະໜູນຜູ້ຖືກເຈີມກໍຄື ປະກາດຂ່າວດີເລື່ອງການປົກຄອງຂອງພະເຈົ້າຢ່າງສຸດຄວາມສາມາດແລະສອນຄົນໃຫ້ເປັນລູກສິດຕາມທີ່ພະເຢຊູໄດ້ບອກໃຫ້ເຮົາເຮັດ. (ມທ. 28:19, 20; ກຈກ. 10:42) ຍ້ອນພີ່ນ້ອງຂອງພະຄລິດໄດ້ຮັບຄວາມຊ່ວຍເຫຼືອຈາກ “ແກະອື່ນ” ພວກເຂົາຈຶ່ງເຮັດວຽກປະກາດທົ່ວໂລກສຳເລັດ. (ຢຮ. 10:16) ຖ້າເຈົ້າເປັນແກະອື່ນ ທຸກຄັ້ງທີ່ເຈົ້າໄປປະກາດເຈົ້າກໍສະແດງໃຫ້ເຫັນວ່າເຈົ້າຮັກຜູ້ຖືກເຈີມແລະພະເຢຊູ.
13. ເຮົາຈະໃຊ້ຄຳແນະນຳຂອງພະເຢຊູໃນລູກາ 16:9 ໄດ້ແນວໃດ?
13 ເຮົາຍັງເປັນໝູ່ກັບພະເຢໂຫວາແລະພະເຢຊູຖ້າເຮົາບໍລິຈາກເງິນເພື່ອຊ່ວຍວຽກທີ່ພວກເພິ່ນກຳລັງຊີ້ນຳ. (ອ່ານລູກາ 16:9) ຕົວຢ່າງ: ເຮົາສາມາດບໍລິຈາກເງິນສຳລັບທົ່ວໂລກ ເຊິ່ງການບໍລິຈາກນີ້ໃຊ້ເພື່ອວຽກປະກາດຂ່າວດີທີ່ຢູ່ຫ່າງໄກ ສ້າງແລະສ້ອມແປງຫໍປະຊຸມ ແລະຊ່ວຍເຫຼືອພີ່ນ້ອງທີ່ປະສົບໄພທຳມະຊາດ. ນອກຈາກນັ້ນ ເຮົາຍັງສາມາດບໍລິຈາກເງິນສຳລັບຄ່າໃຊ້ຈ່າຍໃນປະຊາຄົມ ແລະຊ່ວຍເຫຼືອພີ່ນ້ອງທີ່ມີຄວາມຈຳເປັນ. (ສຸພາ. 19:17) ນີ້ເປັນວິທີທີ່ເຮົາສາມາດຊ່ວຍເຫຼືອພີ່ນ້ອງຂອງພະຄລິດ.
14. ຕາມເອເຟໂຊ 4:15, 16 ສິ່ງທີສີ່ທີ່ເຮົາຕ້ອງເຮັດເພື່ອຈະເປັນໝູ່ກັບພະເຢຊູແມ່ນຫຍັງ?
14 (4) ຮ່ວມມືກັບອົງການຂອງພະເຢໂຫວາ. ເຮົາຈະສະໜິດກັບພະເຢຊູຜູ້ນຳຂອງປະຊາຄົມຫຼາຍຂຶ້ນ ຖ້າເຮົາຮ່ວມມືກັບຜູ້ທີ່ເພິ່ນແຕ່ງຕັ້ງໃຫ້ເບິ່ງແຍງເຮົາ. (ອ່ານເອເຟໂຊ 4:15, 16) ຕົວຢ່າງ: ຕອນນີ້ເຮົາພະຍາຍາມໃຊ້ຫໍປະຊຸມລາຊະອານາຈັກໃຫ້ຄຸ້ມຄ່າແລະເປັນປະໂຫຍດຫຼາຍທີ່ສຸດ. ເພື່ອຈະເຮັດແບບນັ້ນ ບາງປະຊາຄົມກໍຖືກລວມເຂົ້າກັນແລະມີການປັບເຂດປະກາດໃໝ່. ການຈັດກຽມແບບນີ້ໄດ້ຊ່ວຍໃຫ້ອົງການປະຢັດຄ່າໃຊ້ຈ່າຍຫຼາຍຂຶ້ນ. ແຕ່ໃນຂະນະດຽວກັນກໍໄດ້ເຮັດໃຫ້ຜູ້ປະກາດບາງຄົນຕ້ອງປັບປ່ຽນສະພາບການ. ຜູ້ປະກາດທີ່ສັດຊື່ເຫຼົ່ານີ້ຕ້ອງຍ້າຍອອກຈາກປະຊາຄົມທີ່ລາວເຄີຍຢູ່ມາຫຼາຍປີແລະຕ້ອງຈາກພີ່ນ້ອງທີ່ລາວສະໜິດ. ພະເຢຊູຕ້ອງມີຄວາມສຸກຫຼາຍແທ້ໆທີ່ເຫັນພວກລູກສິດທີ່ສັດຊື່ເຫຼົ່ານີ້ໃຫ້ຄວາມຮ່ວມມືກັບອົງການ!
ເປັນໝູ່ກັບພະເຢຊູຕະຫຼອດໄປ
15. ໃນອະນາຄົດເຮົາຈະສະໜິດກັບພະເຢຊູຫຼາຍຂຶ້ນໄດ້ແນວໃດ?
15 ຜູ້ຖືກເຈີມມີຄວາມຫວັງຈະໄດ້ຢູ່ກັບພະເຢຊູຕະຫຼອດໄປ ພວກເຂົາຈະໄດ້ຮ່ວມປົກຄອງກັບເພິ່ນເທິງສະຫວັນ. ພວກເຂົາຈະໄດ້ຢູ່ກັບພະເຢຊູແທ້ໆ ໄດ້ເຫັນເພິ່ນ ເວົ້າກັບເພິ່ນ ແລະໃຊ້ເວລາຮ່ວມກັບເພິ່ນ. (ຢຮ. 14:2, 3) ຜູ້ທີ່ມີຄວາມຫວັງຢູ່ແຜ່ນດິນໂລກຈະໄດ້ຮັບຄວາມຮັກແລະການເອົາໃຈໃສ່ຈາກພະເຢຊູຄືກັນ. ເຖິງວ່າພວກເຂົາຈະບໍ່ເຫັນພະເຢຊູ ແຕ່ພວກເຂົາກໍຈະສະໜິດກັບເພິ່ນຫຼາຍຂຶ້ນເມື່ອພວກເຂົາໄດ້ຊີວິດຕະຫຼອດໄປທີ່ພະເຢໂຫວາແລະພະເຢຊູໃຫ້.—ເອຊາ. 9:6, 7
16. ເຮົາໄດ້ຮັບພອນຫຍັງແດ່ຈາກການເປັນໝູ່ກັບພະເຢຊູ?
16 ເມື່ອເຮົາຕອບຮັບຄຳເຊີນຂອງພະເຢຊູທີ່ໃຫ້ມາເປັນໝູ່ກັບເພິ່ນ ເຮົາກໍຈະໄດ້ຮັບພອນຫຼາຍແທ້ໆ ເຊັ່ນ: ໃນຕອນນີ້ເຮົາໄດ້ຮັບປະໂຫຍດຈາກຄວາມຮັກແລະຄວາມຊ່ວຍເຫຼືອຈາກເພິ່ນ. ເຮົາມີໂອກາດທີ່ຈະໄດ້ຮັບຊີວິດຕະຫຼອດໄປ. ແລະທີ່ສຳຄັນທີ່ສຸດຄື ການເປັນໝູ່ກັບພະເຢຊູຈະຊ່ວຍເຮົາໃຫ້ໄດ້ເປັນໝູ່ສະໜິດກັບພະເຢໂຫວາພໍ່ຂອງເພິ່ນເຊິ່ງເປັນສາຍສຳພັນທີ່ມີຄ່າທີ່ສຸດ. ການທີ່ເຮົາຖືກເອີ້ນວ່າເປັນໝູ່ຂອງພະເຢຊູຖືວ່າເປັນສິດທິພິເສດຫຼາຍແທ້ໆ!
ເພງ 17 “ເຮົາຢາກຊ່ວຍ”
^ ຂໍ້ 5 ເນື່ອງຈາກພວກອັກຄະສາວົກມີໂອກາດໄດ້ລົມແລະເຮັດວຽກກັບພະເຢຊູຫຼາຍປີ ພວກເຂົາກໍເລີຍໄດ້ເປັນໝູ່ສະໜິດຂອງເພິ່ນ. ພະເຢຊູຢາກໃຫ້ເຮົາເປັນໝູ່ກັບເພິ່ນຄືກັນ ແຕ່ພວກອັກຄະສາວົກເປັນໝູ່ກັບພະເຢຊູໄດ້ງ່າຍກວ່າເຮົາໃນທຸກມື້ນີ້. ໃນບົດຄວາມນີ້ເຮົາຈະມາເບິ່ງວ່າເປັນຫຍັງຈຶ່ງບໍ່ງ່າຍທີ່ເຮົາຈະເປັນໝູ່ສະໜິດກັບພະເຢຊູ ແລະເຮົາຍັງຈະມາເບິ່ງວິທີທີ່ເຮົາຈະເປັນໝູ່ກັບເພິ່ນແລະສະໜິດກັບເພິ່ນຕໍ່ໆໄປ.
^ ຂໍ້ 55 ຄຳອະທິບາຍຮູບພາບ: (1) ຕອນທີ່ນະມັດສະການປະຈຳຄອບຄົວ ເຮົາສາມາດສຶກສາກ່ຽວກັບຊີວິດແລະວຽກຮັບໃຊ້ຂອງພະເຢຊູ. (2) ໃນປະຊາຄົມ ເຮົາຕ້ອງພະຍາຍາຍາມຮັກສາສັນຕິສຸກກັບພີ່ນ້ອງ. (3) ເຮົາສະໜັບສະໜູນພີ່ນ້ອງຂອງພະຄລິດໂດຍເຮັດວຽກປະກາດຢ່າງດຸໝັ່ນຫ້າວຫັນ. (4) ຕອນທີ່ປະຊາຄົມຖືກລວມເຂົ້າກັນ ໃຫ້ເຮົາຮ່ວມມືກັບການຕັດສິນໃຈຂອງຜູ້ດູແລ.
