1. Le i bika byokalonga pa kupwana na muntu?

DIVULE, kintu kibajinji kya kulonga pa kupwana bininge na muntu i kwikala nandi. Pomwisamba, mwishinta milangwe ne kwilombola myanda, mukapwana. Inoko pa kupwana na Yesu, twikondanga na bikoleja. Le i bikoleja’ka?

2. Le i kikoleja’ka kibajinji kyotwikonda nakyo?

² Kikoleja kibajinji i kubulwa kwimona na Yesu mpala na mpala. Bene Kidishitu bavule ba mu myaka katwa kabajinji nabo bādi bekonda na kino kikoleja. Nansha nankyo, mutumibwa Petelo wānenene amba: “Nansha byokemwamumwene kashā, banwe’ko mumusenswe. Nansha byokemumumwenepo pano, ino mulombolanga lwitabijo mudi aye.” (1 Pe. 1:8) Nanshi bibwanika kupwana bininge na Yesu pa kubulwa kumumona mpala na mpala.

3. Le i kikoleja’ka kya bubidi kyotwikonda nakyo?

³ Kikoleja kya bubidi i kubulwa kwisamba na Yesu. Potulombelanga, tulombolanga Yehova milangwe yetu. Shako, tulombelanga mu dijina dya Yesu, ino ke ayepo otwisambanga nandi. Bine, Yesu kasakengapo tulombele kwadi. Mwanda waka? Mwanda milombelo ibadilwa mu butōtyi, kadi i Yehova kete otufwaninwe kutōta. (Mat. 4:10) Ino nansha nankyo, tubwanya kulombola’mba tusenswe Yesu.

4. Le kikoleja kya busatu i kikoleja’ka, ne i bika byotusa kwisambila’po mu kino kishinte?

 ⁴ Kikoleja kya busatu i mwanda Yesu udi mūlu, o mwanda ketubwanyapo kwikala nandi pamo. Inoko tubwanya kuyuka myanda mivule ya Yesu kwampikwa kwikala nandi pamo. Tusa kwisambila pa bintu biná byotubwanya kulonga pa kuningija kipwano kyotupwene nandi. Dibajinji, twisambilei bidi pa kine kinenenwa’mba i biyampe tupwane bininge na Kidishitu.

5. Mwanda waka tufwaninwe kupwana na Yesu? (Tala ne kapango kanena’mba “ Kupwana na Yesu Kutwalanga ku Kupwana na Yehova,” ne kanena’mba “ Ikala na Mumweno Mujalale Padi Yesu.”)

⁵ Shi tusaka kwikala mu kipwano kiyampe na Yehova, tufwaninwe kupwana na Yesu. Mwanda waka? Twisambilei bidi pa bubinga bubidi. Bubajinji, Yesu wālombwele bandi bana ba bwanga’mba: “Tata mwine wimusenswe kisanso kikatampe, mwanda banwe mubaunsanswa kisanso kikatampe.” (Yoa. 16:27) Kadi wānena’mba: “I kutupu wiya kudi Tata poso upityila padi ami.” (Yoa. 14:6) Kukimba kupwana na Yehova pampikwa kupwana bidi na Yesu, kudi pamo bwa kukimba kutwela mu njibo pampikwa kutwelela pa kibelo. Yesu wāingidije kino kyelekejo kimo kyonka paētelele aye mwine bu “kibelo kya mikōko.” (Yoa. 10:7) Bubinga bwa bubidi i buno, Yesu wāmwekeje ngikadila ya Shandi mu muswelo mubwaninine. Wānenene bandi bana ba bwanga’mba: “Yewa ense umona ami wamone ne Tata mwine.” (Yoa. 14:9) Nanshi muswelo muyampe wa kuyuka Yehova i kwifunda bidi būmi bwa Yesu. Shi twifunda myanda ya Yesu, buswe botumusenswe nabo bukavudila’ko.  Kadi shi buswe botusenswe Yesu bwenda buvula, buswe botusenswe Shandi nabo bukelundila’ko.

6. Le i bubinga’ka bukwabo botufwaninwe kupwanina na Yesu? Shintulula.

⁶ Shi tusaka milombelo yetu ilondololwe, tufwaninwe kupwana na Yesu. Kino kilomba kulonga bivule kupita’ko kufudija milombelo yetu na binenwa bya kajilwilo bya amba, “mu dijina dya Yesu.” Tufwaninwe kuyuka muswelo obengidijanga Yesu kudi Yehova pa kulondolola milombelo yetu. Yesu wālombwele batumibwa’mba: “Kyonso kyomulomba mu dijina dyami, shi kika shi kika, nkalonga’kyo.” (Yoa. 14:13) Nansha Yehova byadi umo kete wivwananga ne kulondolola milombelo yetu, i mupe Yesu lupusa lwa kuvuija butyibi bwandi. (Mat. 28:18) Nanshi, kumeso kwa Leza kulondolola milombelo yetu, utalanga bidi shi twi bengidije madingi āletele Yesu. Kimfwa, Yesu wānenene amba: “Shi mulekela bantu bilubo byabo, Shenu wa mūlu nandi ukemulekela; ino shi kemulekelapo bantu bilubo byabo, ne Shenu nandi kakemulekelapo bilubo byenu.” (Mat. 6:14, 15) Nanshi, i biyampe tulongele bakwetu bintu mu muswelo witulongela’byo ba Yehova ne Yesu!

7. Le i bāni bamwena mu kitapwa kya kinkūlwa kya Yesu?

⁷ I enka boba bapwene bininge na Yesu bakamwena mu kitapwa kya kinkūlwa kyandi. Le tubayuka kino namani? Yesu wānenene amba wāpene “būmi bwandi pa mwanda wa balunda nandi.” (Yoa. 15:13) Bantu ba kikōkeji bāikele’ko kumeso kwa Yesu kwiya pano pa ntanda, bakefunda myanda yandi ne kumusanswa. Bano bana-balume ne bana-bakaji pamo bwa Abalahama, Sala, Mosesa, ne Lebeka bakasangulwa, ino nansha ke bano bengidi ba Yehova ba kikōkeji bene bakasakilwa kupwana na Yesu pa kukamona būmi bwa nyeke.​—Yoa. 17:3; Bil. 24:15; Bah. 11:8-12, 24-26, 31.

8-9. Mungya Yoano 15:4, 5, le kipwano kyetu na Yesu kitukwashanga tulonge bika, ne mwanda waka kidi na mvubu?

⁸ Tudi na nsangaji ya kwingidila pamo na Yesu mwingilo wa kusapula ne kufundija myanda miyampe ya Bulopwe. Yesu paādi pano pa ntanda, wādi mufundiji. Kadi tamba ujokela momwa mūlu, Yesu, mutwe wa kipwilo, wendelelanga kuludika mwingilo wa kusapula ne kufundija. Aye umwene ne kusangela bukomo bonso bolonga bwa kukwasha bantu bavule bamuyuke aye ne Shandi. Na bubine, tubwanya kuvuija uno mwingilo enka na bukwashi bwa Yehova ne Yesu.​—Tanga Yoano 15:4, 5.

⁹ Kinenwa kya Leza kifundija patōkelela’mba, tufwaninwe kusanswa Yesu nyeke pa kusangaja Yehova. Shi ke pano, twisambilei’ko pa bintu biná byotubwanya kulonga pa kupwana na Yesu.

10. Le i kintu’ka kibajinji kyotufwaninwe kulonga pa kupwana na Yesu?

¹⁰ (1) Yuka Yesu. Tubwanya kumuyuka na kutanga mikanda ya mu Bible kimfwa, Mateo, Mako, Luka, ne Yoano. Potulangulukila pa nsekununi ya mu Bible ya būmi bwa Yesu, tukasanswa Yesu ne kumulēmeka pa mwanda wa muswelo muyampe waādi wikele na bantu. Kimfwa, nansha byaādi Mfumwabo, aye kādipo umona bandi bana ba bwanga bu bapika. Ino wādi wibalombola milangwe yandi ne mwawiivwanina. (Yoa. 15:15) Yesu wādi utengwa na masusu abo ne kudila nabo. (Yoa. 11:32-36) Nansha ke balwana  nandi bene bājingulwile amba upwananga na boba betabija musapu wandi. (Mat. 11:19) Shi twiule Yesu mu muswelo waādi wikele na bandi bana ba bwanga, nabya kipwano kyotupwene na bakwetu kikalumbuluka, tukekala na nsangaji bininge, ne kutamija mutyima wetu wa kufwija’ko Kidishitu.

11. Le i kintu’ka kya bubidi kyotufwaninwe kulonga pa kupwana na Yesu, ne mwanda waka kidi na mvubu?

¹¹ (2) Langa ne kulonga bintu na mwādi mulongela Yesu. Shi tubayuka mulangilo wandi senene ne kwiwiula, nabya tukapwana nandi bininge. (1 Ko. 2:16) Le tubwanya kwiula Yesu namani? Tulangulukilei bidi pa kimfwa kimo. Yesu wādi ulangulukila bininge pa mwa kukwashisha bakwabo pa kyaba kya kwisangaja aye mwine. (Mat. 20:28; Loma 15:1-3) Byaādi na uno mulangilo, wēpēne aye mwine ne kulekela bakwabo. Kādipo uloba bukidibukidi pa byādi bimunena bantu. (Yoa. 1:46, 47) Kadi kālongēlepo bantu bintu mungya bilubo byabo bya kala. (1 Tm. 1:12-14) Yesu wānenene amba: “Bonso bakayuka’mba mwi bami bana ba bwanga​—shi mudi na buswe umbukata mwenu.” (Yoa. 13:35) Ubulwepo kwiipangula’mba, “Le nondanga kimfwa kya Yesu na kulonga byonso byombwanya pa kwikala nyeke mu ndoe na batutu ne bakaka?

12. Le i kintu’ka kya busatu kyotufwaninwe kulonga pa kupwana na Yesu, ne tubwanya kwikilonga namani?

¹² (3) Kwasha’ko banababo na Kidishitu. Yesu umonanga byobya byotulongela banababo bashingwe māni wa batwe bamulongela’byo. (Mat. 25:34-40) Muswelo muyampe otukwasha’ko bashingwe māni i kwingila bininge mwingilo wa kusapula Bulopwe ne kulonga bana babwanga, mwine wāsoñenye Yesu balondi bandi kwingila. (Mat. 28:19, 20; Bil. 10:42) Banababo na Kidishitu bavuijanga uno mwingilo mukatampe wa kusapula ntanda yonso dyalelo na bukwashi bwa “mikōko mikwabo.” (Yoa. 10:16) Shi udi mu mikōko mikwabo, kitatyi kyonso kyoingila uno mwingilo, ulombolanga’mba ulamete na buswe ku bashingwe māni ne kudi Yesu.

13. Le tubwanya kwingidija namani madingi a Yesu adi mu Luka 16:9?

¹³ Kadi tupwananga na Yehova ne Yesu shi twingidija lupeto lwetu mwanda wa kukwatakanya mwingilo obaludika. (Tanga Luka 16:9.) Kimfwa, tubwanya kuleta byabuntu bya mwingilo wa ntanda yonso, mwine mubadilwa ne lupeto lwingidijibwa pa kukwatakanya mwingilo wa busapudi bwa myanda miyampe wingilwa mu bifuko bya kulampe, kūbaka ne kulama mobo akwatakanya mutōtelo wa bine, ne kukwasha boba bajimija bintu byabo mu bimpengele. Kadi tubwanya kukwatakanya kipwilo kyetu na lupeto ne kukwasha boba botumona’mba basakilwa bukwashi. (Nki. 19:17) I mu ino miswelo motubwanya kukwasha’ko banababo na Kidishitu.

14. Mungya Bene Efisesa 4:15, 16, le i kintu’ka kya buná kyotufwaninwe kulonga pa kupwana na Yesu?

¹⁴ (4) Kwatakanya mpangiko ya kipwilo kya bwine Kidishitu. Tuningijanga kipwano kyotupwene na Yesu mutwe wa kipwilo, shi twingidila pamo na boba batongelwe mwanda wa kwitutangidila. (Tanga Bene Efisesa 4:15, 16.) Kimfwa, pano tuloñanga bukomo bwa kwingidija Mobo a Bulopwe onso biyampe. Pa kino, bipwilo bimo byatyangilwe na bikwabo kadi mikalo ya myaba imo nayo yajadikilwe. Ino mpangiko i mikwashe ku kulea’ko byabuntu. Kadi byalombele basapudi bebidile  kuno kushinta. Padi bano basapudi ba kikōkeji badi ke bengile mu kipwilo kampanda myaka mivule, ne kadi padi badi ke bapwane’mo bininge na batutu ne bakaka. Ino abebanena pano kwenda ku kipwilo kikwabo. Bine, Yesu usangalanga’po kashā pa kumona bano bana ba bwanga ba kikōkeji balonda ino mpangiko!

15. Le kipwano kyetu na Yesu kikalumbuluka namani mu mafuku a kumeso?

¹⁵ Boba bashingilwe māni a mushipiditu ujila badi na lukulupilo lwa kwikala na Yesu nyeke, bengila nandi bu bampyana ba Bulopwe bwa Leza. Bine, bakekala na Kidishitu pamo—bemwene nandi, besamba nandi, ne kushikata nandi. (Yoa. 14:2, 3) Boba badi na lukulupilo lwa kukekala pano pa ntanda, Yesu ukebasanswa ne kwibata mutyima. Nansha byokebakamonepo Yesu, kipwano kyobapwene nandi kikaningila’ko pobakaloelelwa mu būmi bukebapa ba Yehova ne Yesu.—Isa. 9:6, 7.

16. Le i madyese’ka otumwena mu kupwana na Yesu?

¹⁶ Shi twitabije lwito lwa Yesu lwa kwikala balunda nandi, tukeselwa madyese mavule. Kimfwa, tumwenanga mu buswe bwaetusenswe ne kwitukwatakanya kwaetukwatakenye tamba’nka pano. Tudi na dyese dya kwikala’ko nyeke ne nyeke. Kadi kya mvubu kutabuka i kino, kipwano kyetu na Yesu kiketuletela kyabulēme kikatampe mpata​—kupwana bininge na Yehova, Shandya Yesu. Bine, tudi na dyese dya kwitwa bu balunda na Yesu!