1. Chuma muka mwatela kulinga numba mutunge usepa namutu?

KAKAVULU nge muli nakusaka kutunga usepa namutu, mwatela kushimutwilanga nenyi. Omu namushimutwilanga nakulitachikiza kanawa, namupwa jino vasepa namutu. Oloze kutunga usepa naYesu kachapwa chachashiko. Uno chakaluhwila halihi?

2. Chuma muka chatete chinahase kutuhonesa kutunga usepa naYesu?

² Chatete, kanda tumonengaho lyehi Yesu. Ou ukiko ukalu vamwene navaka-Kulishitu vavavulu mulikulukaji lyamyaka lyakulivanga. Chipwe ngocho, kaposetolo Petulu ambile ngwenyi: “Numba tuhu kamwamumweneko, oloze munamuzange. Numba tuhu oholili kamweshi nakumumonako, oloze munamufwelela.” (Petu. 1, 1:8) Shikaho tunahase chikupu kutunga usepa naYesu numba tuhu kanda tumumonengaho lyehi.

3. Chuma muka chamuchivali chinahase kutuhonesa kutunga usepa naYesu?

³ Chamuchivali, katweshi kuhasa kuhanjika naYesuko. Numba tuhu tweji kulombanga kuhichila mulijina lyaYesu, oloze tweji kuhanjikanga naYehova keshi naikiyeko. Kaha nawa Yesu kasaka tulombenga kuli ikiyeko. Mwomwo ika? Mwomwo kulomba chapwa hijila yimwe yakulemeselamo Kalunga, kaha Yehova kaha ikiye twatela kulemesa. (Mateu 4:10) Chipwe ngocho, tunahase kuzanga Yesu.

4. Chuma muka chamuchitatu chize chinahase kutuhonesa kutunga usepa naYesu, kaha vyuma muka natushimutwila muchihande chino?

 ⁴ Chamuchitatu, Yesu atwama mwilu, ngocho katweshi kuhasa kupwa nenyi hamweko. Oloze tunahase kutachikiza vyavivulu hali Yesu numba tuhu katweshi nenyi hamweko. Shikaho, tutalenu havyuma viwana vize twatela kulinga mangana tuzamise usepa wetu naikiye. Oloze shimbu kanda tushimutwile havyuma kana, tuvangilenu kushimutwila ovyo chapwila chachilemu kutunga usepa wakukola naKulishitu.

5. Mwomwo ika twatela kutunga usepa naYesu? (Talenu nawa lipwata lyakwamba ngwavo, “ Kupwa Masepa jaYesu Nachitulingisa Tupwenga Masepa jaYehova” nalyakwamba ngwavo, “ Kutachikiza Kanawa Mulimo waYesu.”)

⁵ Hakusaka tutunge usepa wamwaza naYehova, twatela kuvangila kutunga usepa naYesu. Mwomwo ika? Achitalenu havyuma vino vivali. Chatete, Yesu alwezele tumbaji twenyi ngwenyi: “Ivene Tata amizanga, mwomwo munanguzangenga ami.” (Yowa. 16:27) Ambile nawa ngwenyi: “Mutu naumwe wauchi mweza kuli Tata kuvanga ahichile muli ami.” (Yowa. 14:6) Kutunga usepa naYehova chakuzeneka kutunga usepa naYesu, chinafwane nge kusaka kwingila muzuvo chakuzeneka kuhichila kuchikolo. Yesu azachishile chakutalilaho chakulifwanako, omu ambile ngwenyi ikiye “chikolo chamikoko.” (Yowa. 10:7) Chamuchivali, Yesu asolwele vilinga vize atwama navyo Ise. Alwezele tumbaji twenyi ngwenyi: “Weshowo nangumono ami namono naTata nawa.” (Yowa. 14:9) Shikaho, chuma chachilemu twatela kulinga mangana tutachikize kanawa Yehova shina kutachikiza chiyoyelo chaYesu. Omu natulinangula mijimbu yaYesu natuputuka kumuzanga chikuma. Kaha  kuzanga chikuma Yesu nachitulingisa tuzange nawa Yehova.

6. Chuma muka chikwavo chatela kutulingisa tutunge usepa naYesu? Lumbununenu.

⁶ Twatela kuvangila kutunga usepa naYesu numba Yehova akumbulule kulomba chetu. Echi chalumbununa nge twatela kukilikita chikuma tutunge usepa naYesu, keshi kuhanjikanga kaha ngwetu “mulijina lyaYesu” hakukumisa kulombako. Oloze twatela kwijiva omwo Yehova eji kuzachisanga Yesu hakukumbulula kulomba chetu. Yesu alwezele vaposetolo jenyi ngwenyi: “Cheshocho chuma namulomba mulijina lyami, nanguchilinga.” (Yowa. 14:13) Numba tuhu Yehova ikiye eji kwivwililanga kukulomba chetu, oloze ahana Yesu ngolo jakulinga vyuma mwajina Ikiye. (Mateu 28:18) Ngocho, shimbu kanda atukumbulule, eji kuvangilanga kutala amone numba nge tunakavangiza mazu ahanjikile Yesu. Chakutalilaho, Yesu ambile ngwenyi: “Kachi nge namukonekela vatu havilinga vyavo vyakuhenga, kaha Senu wamwilu mwamikonekela nayenu nawa. Oloze kachi nge kamweshi kukonekela vatu havilinga vyavo vyakuhengako, kaha naSenu keshi kumikonekela havilinga vyenu vyakuhengako.” (Mateu 6:14, 15) Shikaho chapwa chachilemu chikuma kukonekelanga vakwetu ngana muze Yehova naYesu veji kutukonekelanga nayetu nawa.

7. Veya navakanganyala kundando yakusokola yaYesu?

⁷ Vatu vaze vatunga usepa naYesu vakiko kaha navakanganyala kundando yakusokola. Mwomwo ika tunahanjikila ngocho? Mwomwo Yesu ambile ngwenyi, mwecha “mwono wenyi hali masepa jenyi.” (Yowa. 15:13) Vangamba jaYehova vakushishika vavavulu vaze vapwileko shimbu kanda Yesu ezenga hano hamavu, vatela kukatachikiza Yesu nakumuzanga. Vatu vakufwana nge Apalahama, naSala, naMose naLahave navakasanguka. Shikaho navakiko vatela kukatunga usepa naYesu numba vakayoye haya myaka yosena.—Yowa. 17:3; Vili. 24:15; Hepe. 11:8-12, 24-26, 31.

8-9. Kweseka naYowano 15:4, 5, vyuma muka natulinga kachi nge natutunga usepa naYesu, kaha mwomwo ika chapwila chachilemu?

⁸ Tweji kulivwisanga kuwaha kuzachila hamwe naYesu mumulimo wakwambulula nakunangula vatu mujimbu wamwaza waWangana. Yesu apwilenga muka-kunangula omu apwilenga hano hamavu. Kaha kufuma halwola luze akindulukile mwilu, natwalengaho lika kutetekela mulimo wakwambulula nakunangula, hakuwana nge ikiye mutwe wachikungulwilo. Ijivenu ngwenu eji kumonanga kukilikita chenu hakukafwa vatu vavavulu vamutachikize nakutachikiza Ise. Ngocho eji kumisakwililanga hakukilikita chenu. Kaha nawa katweshi kuhasa kufukila mumulimo kana chakuzeneka kutukafwa kuli Yehova naYesuko.—Tangenu Yowano 15:4, 5.

⁹ Mazu aKalunga atulweza ngwawo, hakusaka twivwise Yehova kuwaha twatela kuzanga Yesu. Shikaho tushimutwilenu havyuma viwana vize twatela kulinga mangana tupwenga masepa jaYesu.

10. Chuma muka chatete twatela kulinga numba tutunge usepa naYesu?

¹⁰ (1) Tachikizenu Yesu. Tunahase kutachikiza Yesu hakutanganga mukanda waMateu, naMako, naLuka naYowano. Omu natushinganyekanga hamijimbu yaYesu vasoneka muMbimbiliya, natumuzanga chikuma nakumuvumbika hakumona omu azakaminyinengamo vatu. Chakutalilaho, kamwenenga tumbaji twenyi kupwa nge vandungoko numba tuhu ikiye apwile Mwata wavo. Oloze  ashimutwililenga navo nakuvalweza vyuma ashinganyekelenga. (Yowa. 15:15) Omu valyonyingilenga, naikiye alyonyingilenga nakulila navo. (Yowa. 11:32-36) Kaha navaka-kole jenyi vatachikijile ngwavo alikachilenga navatu vaze vakwilenga kanawa kumujimbu ambulwilenga. (Mateu 11:19) Shikaho, nge natulondezeza Yesu uze azakaminenga tumbaji twenyi, kaha natutunga usepa wakukola navakwetu, nakupwa vakuwahilila nakuzanga chikuma Kulishitu.

11. Chuma muka chamuchivali twatela kulinga numba tutunge usepa naYesu, kaha mwomwo ika chapwila chachilemu?

¹¹ (2) Shinganyekenunga nakulinga vyuma ngana muze alingile Yesu. Kachi nge natutachikiza vishinganyeka vyaYesu nakumulondezeza, kaha natupwa nausepa wakukola naikiye. (Koli. 1, 2:16) Uno tunahase kulondezeza ngachilihi Yesu? Achitalenu hachakutalilaho chino. Yesu afwilililenga kukafwa vakwavo kuhambakana kulivwisa kuwaha yavene. (Mateu 20:28; Loma 15:1-3) Hakuwana nge ashinganyekelenga mujila kaneyi, ngocho chamulingishile apwenga wakulisuula kukafwa vakwavo nakuvakonekelanga. Kapihilililenga washi havyuma vamwambilenga vatuko. (Yowa. 1:46, 47) Kaha nawa kamwenenga vatu mujila yayipi mwomwo yamilonga vavulumwine kunyimako. (Chimo. 1, 1:12-14) Ambile ngwenyi: “Vatu vosena navakatachikiza ngwavo enu mwapwa mutumbaji twami kachi nge namulizanganga mwenumwenu.” (Yowa. 13:35) Shikaho, lihulisenu ngwenu, “Kutala nguli nakulondezeza Yesu hakukilikita mangana ngutwame mukuunda navandumbwami tahi?”

12. Chuma muka chamuchitatu twatela kulinga numba tutunge usepa naYesu, kaha tunahase kulinga ngachilihi ngocho?

¹² (3) Kundwizenunga vandumbu jaKulishitu. Yesu eji kumonanga mulimo uze tweji kuzatanga hakukundwiza vandumbwenyi vawavisa kwijiva nge tuli nakumuzachilawo ikiye. (Mateu 25:34-40) Jila yayilemu tweji kukundwijilangamo vawavisa shina, hakuzata mulimo wakwambulula mujimbu waWangana nakunangula vatu vapwenga tumbaji, uze Yesu alwezele vaka-kumukavangiza vazatenga. (Mateu 28:19, 20; Vili. 10:42) Vandumbu jaKulishitu vali nakutesamo mulimo wakwambulula mukaye kosena hakuvakafwa kuli “mikoko veka.” (Yowa. 10:16) Shikaho, nge mwatwama halizavu lyamikoko veka, kaha tachikizenu ngwenu kala lwola namwazana mumulimo wakwambulula muli nakusolola ngwenu mwazanga Yesu navandumbwenyi vawavisa.

13. Uno tunahase kukavangiza ngachilihi mazu atwama hali Luka 16:9?

¹³ Tweji kutunganga nawa usepa wakukola naYehova naYesu hakuhana mawana akukundwiza mulimo vali nakuzata. (Tangenu Luka 16:9.) Chakutalilaho, tunahase kuhana wana wakukundwiza mulimo wamukaye kosena. Kaha mawana kana veji kuwazachisanga hakukundwiza mulimo wakwambulula mujimbu wamwaza kuvihela vyakwakusuku, nakutunga jizuvo jakulemeselamo Kalunga nakujiwahisa, nakuzakama vaze vali muukalu wakulijila. Tunahase nawa kuhana wana wakukundwiza milimo yachikungulwilo chetu nakukafwa vaze vanakalikiza. (Vishi. 19:17) Evi hivyuma vimwe tunahase kulinga mangana tukundwize vandumbu jaKulishitu.

14. Kweseka namazu atwama hali Wavaka-Efwesu 4:15, 16, chuma muka chamuchiwana twatela kulinga numba tutunge usepa naYesu?

¹⁴ (4) Lingenunga vyuma linakase liuka lyaYehova. Tweji kupandamanga chikuma kuli Yesu uze apwa mutwe wachikungulwilo hakuzachila hamwe namalunga vaze vatongola vatuzakame. (Tangenu Wavaka-Efwesu 4:15, 16.) Chakutalilaho, makumbi ano tuli  nakufwila kumona ngwetu jiZuvo jaWangana vali nakujizachisa kuvikungulwilo vyavivulu. Ngocho vikungulwilo vimwe vanavifutakana navikwavo, kaha jingalila jakwambulwilamo nawa vanajalumuna. Echi chinakafwe liuka lyaYehova lilame jimbongo jajivulu jize veji kukundwizanga vatu. Chipwe ngocho, kwalumuka kana chinalingisa vaka-kwambulula vamwe valumuneko vyuma vimwe. Ava vandumbwetu pamo vanazachilanga muvikungulwilo kana hamyaka yayivulu, kaha vanalijilila chikuma navandumbwavo. Oloze liuka linavalweze kuya kuvikungulwilo vyeka. Yesu eji kuwahililanga chikuma hakumona ava vandumbwetu navakavangiza vyuma linakase liuka.

15. Usepa wetu naYesu naukazaminako ngachilihi kulutwe?

¹⁵ Vaze vawavisa nashipilitu yajila vatalilila kukayula naYesu muWangana waKalunga nakukapwa nenyi haya myaka yosena. Navakamumona, nakuhanjika nenyi nakupwanga nenyi hamwe. (Yowa. 14:2, 3) Kaha nawa vaze vatalilila kukayoyela hano hamavu navakavazanga kuli Yesu nakuvazakama. Numba tuhu kaveshi kukamumonako, oloze navakapandama chikuma kuli ikiye omu navakalivwisa kuwaha kuyoya chize mwakavahana ikiye naIse Yehova.—Isa. 9:6, 7.

16. Vyuma muka natulivwisa kuwaha hakupwa masepa jaYesu?

¹⁶ Nge natwitavila Yesu kupwa sepa lyetu, kaha natulivwisa kuwaha vyuma vyavivulu. Chakutalilaho, tunanganyala mwomwo yakutusolwela zangi yenyi nakutuzakama. Kaha twatalilila kukayoya haya myaka yosena. Chachinenenyi, kutunga usepa naYesu nachitulingisa tutunge usepa wakukola naIse Yehova. Ocho kutokwa kana enu vayaya hakupwa tumasepa jaYesu!