1. Munateli kwikala ñahi ibwambu damuntu?

KAKAVULU, neyi munakukeña kwikala ibwambu damuntu mwatela kwikala nampinji yakuhanjeka nindi. Chimunakuhanjeka naniwu muntu, nakudileja yitoñojoka niyuma yimunahitimu wubwambu wakolaña. Mpinji yikwawu, chapela wanyi kwikala amabwambu jaYesu. Muloñadi?

2. Chumanyi chatachi chatukañeshaña kwikala amabwambu jaYesu?

² Chatachi, kanda tumumoneñahu dehi Yesu namesu kapu. Akwakristu amavulu amumafuku awapostolu, niwena chadiña nakuyikalila. Hela chochu, kapostolu Petulu wahosheli nindi: “Hela chakwila himwamumwenihuku, mwamukeña. Hela chakwila hayinu mpinji himunakumumonaku, ilaña mwamukuhwelela.” (1 Pet. 1:8) Dichi, tunateli kwikala amabwambu jaYesu hela chakwila kanda tumumoneñahu dehi.

3. Chumanyi chamuchiyedi chatukañeshaña kwikala amabwambu jaYesu?

³ Chamuchiyedi, hitwahoshaña naYesuku. Neyi tunakulomba, twahoshaña naYehova. Hela chakwila twalombaña kuhitila mwiijina daYesu, ilaña hitwahoshaña nayenaku. Kafwampi Yesu wakeñaña wanyi kulomba kudi yena. Muloñadi? Muloña kulomba hinjila yimu yakudifukwilamu nawa twatela kudifukula hohu kudi Yehova. (Mat. 4:10) Hela chochu twatela kumukeña Yesu.

4. Chumanyi chamuchisatu chatukañeshaña kwikala amabwambu jaYesu, nawa tukuhanjekadi muchinu chibaaba?

⁴ Chamuchisatu, Yesu wudi mwiwulu, dichi hitunateli kwikala nampinji yakushakama nindi hamuku. Hela chochu, tunateli kwiluka yuma yayivulu hadi yena chakadi kushakama  nindi hamu. Tukuhanjeka hayuma yiwana yitwatela kwila hakwila tukoleshi wubwambu wetu nayena. Chatachi, tushinshikenu ntahi chichalemena kwikala amabwambu jaKristu.

5. Muloñadi chitwatela kwikalila amabwambu jaYesu? (Talenu cheñi chikasha chinakwila nawu “ Tunateli Kwikala Amabwambu jaYehova Neyi Twikala Amabwambu jaYesu” nichinakwila nawu “ Kwiluka Mudimu waYesu.”)

⁵ Twatela kwikala amabwambu jaYesu hakwila nawu twikali nawubwambu wakola naYehova. Muloñadi? Shinshikenu yikuma yiyedi. Chatachi Yesu wayilejeli atumbanji twindi nindi: “Tata yomwenindi wayikeña enu, muloña mwankeñeli.” (Yow. 16:27) Wahosheli cheñi nindi: “Kwosi muntu wunateli kwinza kudi Tata chakadi kuhitila mudi amiku.” (Yow. 14:6) Kukwata wubwambu naYehova chakadi kwikala amabwambu jaYesu chidi neyi kwiñila mwitala habula chiisu. Yesu wazatishili ichi chakutalilahu hadilumbulwileñayi nindi “yami chiisu heñililaña anyikoku.” (Yow. 10:7) Chamuchiyedi, Yesu wadiña nakwimbujola yilwilu yaTata yindi. Wayilejeli apostolu indi nindi: “Muntu wejima wunamoni ami, dikwila nawu namoni niTata.” (Yow. 14:9) Chitukudizaña hadi Yesu, tukumukeña chikupu. Nawa neyi wubwambu wetu naYesu wukola, tukumukeña Tata yindi chikupu.

6. Muloñanyi wukwawu wutwatela kwikalila amabwambu jaYesu? Lumbululenu.

⁶ Twatela kukwata wubwambu naYesu hakwila nawu kulomba kwetu akwakuli. Hitwatela kukumina dakuhosha netu “mwiijina daYesu” neyi tunakulombaku. Twatela kwiluka Yehova chamuzatishañayi Yesu hakwakula kulomba kwetu. Yesu  wayilejeli apostolu nindi: “Chuma chejima chimukulomba mwijina dami, nukuchikoña.” (Yow. 14:13) Hela chakwila Yehova diyi wakulaña kulomba kwetu, wamwinka Yesu wuswa wakwila munafuukuliyi Yehova. (Mat. 28:18) Henohu Nzambi kanda yakuuli kulomba kwetu, wamonaña neyi chakwila tunalondeli kufumba kwatulejeliyi Yesu. Chakutalilahu, Yesu wahosheli nindi: “Muloña neyi mukwanakena antu yuma yatama yelañawu, Tata yenu wekala mwiwulu niyena wukuyanakena; ilaña neyi mubula kwanakena antu yuma yatama yelañawu, Tata yenu niyena hakuyanakena nshidi jenuku.” (Mat. 6:14, 15) Dichi twatela kuyilaña akwetu neyi chatwilañawu kudi Yehova niYesu.

7. Anyi ahetelaña mumulambu waYesu?

⁷ Amabwambu jaYesu hohu diwu anateli kuhetela mumulambu wefutu danyiloña dindi. Tuneluki ñahi? Yesu wahosheli nindi “[wakahana] wumi windi kukoola amabwambu jindi.” (Yow. 15:13) Antu ashinshika adiñaku henohu Yesu kanda yenzi hamaseki, akadiza hadi yena nikumukeña. Amayala niambanda adi neyi Abarahama, Sara, Mosi niRahaba akayisañula, ilaña ninawa ambuña aYehova aloña akakeñekaña kwikala amabwambu jaYesu hakwila akekali nawumi wahaya nyaaka.—Yow. 17:3; Yilw. 24:15; Heb. 11:8-12, 24-26, 31.

8-9. Kwesekeja naYowanu 15:4, 5, chumanyi chitukwilaña neyi twikala amabwambu jaYesu, nawa chalemenadi?

⁸ Twatiyaña kuwaha kuzatila hamu naYesu mumudimu wakushimwina nikutañisha antu nsañu yayiwahi yaWanta. Yesu wadiña ntañishi mpinji yadiñayi hamaseki. Kufuma tuhu mpinji yafuntiliyi mwiwulu, Yesu natwalekihu kulombola mudimu wakushimwina nikutañisha chineli diyi mutu wachipompelu. Wamonaña nawa wasakililaña chimwadikitaña kukwasha antu amavulu kulonda amwiluki yena niTata yindi. Dichi, hakwila nawu tuzati chiwahi iwu mudimu chiña Yehova niYesu atukwasha.—Tañenu Yowanu 15:4, 5.

⁹ Izu daNzambi datudizishaña nawu twatela kumukeña Yesu nikutwalekahu kumukeña hakwila nawu tumuzañaleshi Yehova. Dichi tushinshikenu yuma yiwana yitwatela kwila hakwila twikali amabwambu jaYesu.

10. Chumanyi chatachi chitwatela kwila hakwila nawu twikali amabwambu jaYesu?

¹⁰ (1) Mwilukenu Yesu. Tunateli kumwiluka neyi tutañaña nyikanda yamuBayibolu; Matewu, Maku, Luka niYowanu. Neyi tutoñojokaña nankashi haniyi nyikanda yamuBayibolu yahosha hachihandilu chaYesu, tukumukeña nikumulemesha Yesu muloña wanochu chahandiliyi nawantu. Chakutalilahu, hela chakwila wadiña Nkuluñaña wawu, hayikoñelihu atumbanji twindi neyi anduñuku. Ilaña wayilejeleña yuma yatoñojokeleñayi nichatiyileñayi. (Yow. 15:15) Yesu wadiña nakuneña neyi ananeñi nawa wadilileña hamu nawu. (Yow. 11:32-36) Niakwankunyi nindi elukili nawu wadiña ibwambu dawantu etejeleña mazu indi. (Mat. 11:19) Neyi tumwimbujola Yesu neyi chelileñayi nawatumbanji twindi, wubwambu wetu nawakwetu wukukola, tukuzañalala nawa tukumukeña nikumulemesha Kristu.

11. Chumanyi chamuchiyedi chitwatela kwila hakwila nawu twikali amabwambu jaYesu, nawa chumichi chalemenadi?

 ¹¹ (2) Toñojokenuña nikwila yuma neyi chelileñayi Yesu. Neyi twiluka nikwimbujola yitoñojoka yindi, wubwambu wetu nayena wukukola. (1 Kor. 2:16) Tunateli kumwimbujola ñahi Yesu? Talenu ichi chakutalilahu. Yesu washili muchima hakukwasha akwawu bayi kuditiyisha yomweni kuwahaku. (Mat. 20:28; Rom. 15:1-3) Chineli dichadiña nakutoñojokayi, wadiña nakudihana nikwanakena antu. Hela chakwila antu akuhosha yuma yatama hadi yena, hahilileñaku. (Yow. 1:46, 47) Hadiña nakuyitoñojokela antu mwatama kwesekeja nayiluwa yakoñeliwu kunyimaku. (1 Tim. 1:12-14) Yesu wahosheli nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) Dichi dihulenu nenu, “Komana inakuzata nañovu kumwimbujola Yesu kuhitila mukuleta kuwunda nawamanakwetu niahela?”

12. Chumanyi chamuchisatu chitwatela kwila hakwila nawu twikali amabwambu jaYesu, nawa tunateli kwila ñahi mwenimu?

¹² (3) Kwashenuña amanakwaKristu. Yesu wamonaña yuma yejima yitwayililaña amanakwindi awayishewa nindi tunakumukwasha yena. (Mat. 25:34-40) Njila yimu yalema mutwayikwashilaña awayishewa hikuzata mudimu wakushimwina Wanta niwakwilisha atumbanji wenkeliyi Yesu akwakumulondela. (Mat. 28:19, 20; Yilw. 10:42) Amanakwakristu hiyanateli kutwesha kuzata iwu mudimu walema wakushimwina mwahita kaayi kejima nkawawuku, chiña ayikwashaku kudi “anyikoku amakwawu.” (Yow. 10:16) Neyi mudi hakachi kawanyikoku amakwawu, mpinji yejima yimwashimwinaña mwamwekeshaña nenu mwayikeña awayishewa niYesu.

13. Tunateli kuzatisha ñahi kufumba kwaYesu kudi haLuka 16:9?

¹³ Twekalaña cheñi amabwambu jaYehova niYesu kuhitila mukuhanaku yawaana yakukwasha nachu mudimu wunakulombolawu. (Tañenu Luka 16:9.) Chakutalilahu, tunateli kuhanaku yawaana kumudimu wamukaayi kejima, munabombeli kushimwina nsañu yayiwahi mumaluña akwakulehi, kutuña nikuwahisha chiwahi maluña akudifukwila nikukwashaku amanakwetu kunamwekani wubanji hela anakaankili. Tunateli cheñi kukwashaku chipompelu chetu nikukwasha ejima ituneluki netu anakaankili. (Yish. 19:17) Iyi diyi njila mutunateli kukwashila amanakwaKristu.

14. Kwesekeja naAefwesesa 4:15, 16, chumanyi chamuchiwana chitwatela kwila hakwila twikali amabwambu jaYesu?

¹⁴ (4) Londelenuña ntanjikilu yakuloñesha kwaYehova. Twakoleshaña wubwambu wetu naYesu neyi twovwahilaña antu atondawu nawu atulomboleña. (Tañenu Aefwesesa 4:15, 16.) Chakutalilahu, tunakufwila netu Matala etu aWanta ejima azatikeña chikupu. Hakwila azatikeña chikupu, yipompelu yikwawu anayibombi hamu nawa maluña akushimwinamu anayihimpi. Muloña wachumichi, kuloñesha kunahembi yawaana yahanañawu mukuloñesha. Hampinji yoyimu, chakeñekeleña akwakushimwina amakwawu kulondela iyi ntanjikilu. Awa akwakushimwina ashinshika hadaha anashakami muyipompelu hadi yaaka yayivulu nawa hadaha anadikundi chikupu nawamanakwetu niahela  muniyi yipompelu. Ilaña chayinu mpinji anakuyileja kuya nakukalakela muchipompelu chacheñi. Yesu watiyaña kuwaha hakumona awa atumbanji ashinshika anakulondela iyi ntanjikilu.

15. Wubwambu wetu naYesu wakakola ñahi kumbidi?

¹⁵ Antu awayishawu naspiritu yajila akweti kuchiñeja kwakwikala naYesu haya nyaaka nikuyuula hamu nindi muWanta waNzambi. Akekalaña hamu naKristu, akamumonaña nikuhanjeka nindi. (Yow. 14:2, 3) Antu akweti kuchiñeja kwakushakama hamaseki niwena akatwalekahu kuyikeña kudi Yesu nikuyakamena. Hela chakwila akamumona Yesu wanyi, wubwambu wawu nayena wakakola chikadiluñishañawu yuma yayiwahi yakayililañawu kudi Yehova niYesu.—Isa. 9:6, 7.

16. Yumanyi yayiwahi yafumañamu neyi twikala amabwambu jaYesu?

¹⁶ Neyi twiteja mutambi waYesu wakwikala amabwambu jindi, tukatambwila yuma yayiwahi yayivulu. Chakutalilahu, chayinu mpinji tunakumona chatukeñayi nichinakutukwashayi. Tukweti kukooleka kwakushakama haya nyaaka. Nawa chuma chasweja kulema, neyi twikala amabwambu jaYesu, tukwikala cheñi amabwambu jaTata yindi, Yehova. Hikukooleka chikupu kututena nawu amabwambu jaYesu.