1. Engtin nge tuemaw nêna ṭhian ṭhaa in insiam?

TUEMAW nêna ṭhian ṭha tak ni tûra i tih ngai hmasa ber chu amah nêna hun hman dun hi a ni a. Ngaih dânte leh thiltawnte in inhrilh tawn hnu chuan ṭhian in lo ni ta a ni. Mahse, Isua nêna ṭhian ṭha ni tûr chuan harsatnate a awm a ni. Chûng zînga ṭhenkhat chu eng nge ni?

2. Kan hmachhawn harsatna hmasa ber chu eng nge ni?

² Harsatna hmasa ber chu Isua chu mit ngeia kan hmu lo hi a ni. Kum zabi khatnaa Kristian tam tak pawhin Isua chu an hmu ngai bîk lo. Chuti chung pawhin, tirhkoh Petera chuan: “Amah chu hmu ngai lo pawhin in hmangaih a, amah chu tûnah hmu lo mah ula in ring a,” tiin a sawi. (1 Pet. 1:8) Chuvângin, Isua chu mit ngeiin hmu lo mah ila, amah nên inlaichînna ṭha kan nei thei a ni.

3. Kan hmachhawn harsatna pahnihna chu eng nge ni?

³ Harsatna pahnihna chu Isua kan be thei lo hi a ni. Kan ṭawngṭai hian kan ngaihtuahnate chu Jehova hnênah kan thlen a. Isua hmingin ṭawngṭai mah ila, amah kan bia tihna a ni lo. Dik tak chuan, Isua’n a hnêna ṭawngṭai tûrin min ti lo a ni. Engvângin nge? Ṭawngṭaina chu biakna chi khat a nih vâng leh Jehova chauh biak tûr a nih vâng a ni. (Mt. 4:10) Chutiang chu ni mah se, Isua kan hmangaih tih kan lantîr thei a ni.

4. Harsatna pathumna chu eng nge ni a, he thuziakah hian eng nge kan sawiho vang?

 ⁴ Harsatna pathumna chu Isua vâna a awm avânga a bula hun kan hmang thei lo hi a ni a. Isua bulah a takin awm thei lo mah ila, a chanchin tam tak kan hre thei a ni. Amah nêna kan inṭhian ṭhatna tinghet tûra kan tih theih thil pali kan sawi ho vang. Tûnah chuan, Krista nêna inṭhianna hnai tak neih a pawimawh chhan i lo en hmasa ang u.

5. Engvângin nge Isua ṭhiante kan nih ang? (“ Isua Nêna Inṭhianna Chuan Jehova Nêna Inṭhianna Min Neihtîr,” tih leh “ Isua Chanvo Chu Inbûk Tâwk Takin Thlîr Rawh,” tih bâwmte chu en bawk rawh.)

⁵ Jehova nêna inlaichînna ṭha neih kan duh chuan Isua nêna kan inṭhian a ngai a ni. Engvângin nge? A chhan pahnih hi han ngaihtuah teh. Pakhatna, Isua chuan a zirtîrte chu: ‘Pa ngeiin a hmangaih si che u a, nangnin kei mi hmangaih avângin,’ tiin a hrilh a. (Joh. 16:27) Chu bâkah: “Keimaha kal lo chu tu mah Pa hnênah an thleng ngai lo,” tiin a sawi bawk. (Joh. 14:6) Isua nêna inṭhianna siam lova Jehova ṭhian nih tum chu, kawngkhâr aṭang lova in chhûng luh tum ang a ni. Isua chuan “berâm kawngkhâr” nia a insawi khân, chutiang tehkhin thu chu a hmang a. (Joh. 10:7) A chhan pahnihna chu Isua’n a Pa miziate ṭha famkima a lantîr vâng a ni. A zirtîrte hnênah: “Tupawh mi hmu chu Pa hmu a ni,” tiin a hrilh a. (Joh. 14:9) Chuvângin, Jehova kan hriat theih dân pawimawh tak pakhat chu Isua nun kawng zîr hi a ni. Isua chungchâng kan zir chuan, amah kan hmangaihna a pung ang a. Chutianga kan inṭhian ṭhatna a ngheh zêl chuan, a Pa kan hmangaihna pawh a thûk lehzual ang.

6. Isua nêna inlaichînna kan neih a ngaih chhan dang leh chu eng nge ni? Hrilhfiah rawh.

 ⁶ Kan ṭawngṭaina ngaihthlâk a nih theih nân Isua nêna inlaichînna kan neih a ngai a. Chutiang ni tûr chuan, kan ṭawngṭainaa “Isua hmingin kan dîl e,” tia sawi liam mai aia tam a tel a ni. Jehova’n kan ṭawngṭaina a chhânnaah Isua a hman dân chu kan hriatthiam a ngai a. Isua chuan tirhkohte chu: “Ka hmingin engpawh in dîl apiang chu ka ti zêl ang,” tiin a hrilh a. (Joh. 14:13) Jehova chu kan ṭawngṭaina ngaithlatu leh min chhângtu ni mah se, ani chuan a thu tlûkna siamte hlen tûrin Isua hnênah thuneihna a pe a ni. (Mt. 28:18) Chuvângin, Pathianin kan ṭawngṭana a chhân hmain, Isua fuihna pêk chu kan nunpui leh nunpui loh a en hmasa a. Entîr nân, Isua chuan: “Mi an bawhchhiatte in ngaihdam chuan, in Pa vâna miin a ngaidam ve ang che u. Nimahsela, mite in ngaihdam si loh chuan, in Pain in bawhchhiatte a ngaidam bîk lo vang,” tiin a sawi a ni. (Mt. 6:14, 15) Chuvângin, Jehova leh Isua’n min cheibâwl dân anga mi dangte cheibâwl chu a va pawimawh tak êm!

7. Tute’n nge Isua tlanna inthawina chu hlâwkpui ang?

⁷ Isua nêna inlaichînna ṭha neite chauhvin a tlanna inthawina an hlâwkpui thei ang. Chu chu engtin nge kan hriat? Isua chuan “a ṭhiante tâna a nun a hlan” tûr thu a sawi a. (Joh. 15:13, Baptis Mid-Missions’ Translation) Isua leia a lo kal hmaa rinawm taka Jehova rawngbâwltute chuan Isua chanchin an zir ang a, an hmangaih ang. Abrahama te, Sari te, Mosia te, leh Rahabi te chu an tho leh ang a; mahse, chûng Jehova chhiahhlawh fel takte pawhin chatuana nunna an neih theih nân Isua nêna inṭhianna an siam a ngai a ni.—Joh. 17:3; Tirh. 24:15; Heb. 11:8-12, 24-26, 31.

8-9. Johana 15:4, 5-a sawi angin, Isua nêna kan inlaichînna chuan eng ti thei tûrin nge min ṭanpui a, engvângin nge chu chu thil pawimawh tak a nih?

⁸ Ram chanchin ṭha hrilhnaah leh zirtîr siamnaah Isua nêna kan thawh dun avângin kan hlim hle a ni. Isua leia a awm lai chuan, ani chu zirtîrtu a ni a. Vâna a kîr leh aṭangin kohhran lû niin thu hrilhna leh zirtîr siamna chu a kaihruai zawm zêl a ni. Amah leh a Pa hre tûra mi a tam thei ang berte ṭanpuinaa kan thawhrimna chu a hmuin, a ngaihlu hle a. Dik tak chuan, Jehova leh Isua ṭanpuina avâng chauhvin he rawngbâwlna hi kan hlen thei a ni.—Johana 15:4, 5 chhiar rawh.

⁹ Jehova tilâwm tûr chuan Isua kan hmangaih a, chu hmangaihna chu kan vawn reng a ngai tih Pathian Thu chuan chiang takin min hrilh a ni. Chuvângin, Isua ṭhian ni tûra kan tih theih thil palite chu i lo ngaihtuah ang u.

10. Isua nêna inṭhianna kan siamnaa rahbi hmasa ber chu eng nge ni?

¹⁰ (1) Isua chu hre chiang rawh. Hei hi Bible-a Matthaia, Marka, Luka, leh Johana bute chhiarin kan ti thei a. Bible-a Isua nun kawng chanchin thuziakte kan chhût ngun chuan, mite a cheibâwl dân aṭangin Isua chu kan hmangaihin kan zah ngei ang. Entîr nân, ani chu an Hotu ni mah se, a zirtîrte chu chhiahhlawh angin a cheibâwl lo. Chu aiin, a ngaihtuahnate leh a rilru vei zâwngte chu an hnênah a hrilh a. (Joh. 15:15) An hrehawm tawrhte chu a tawrhpuiin, a ṭahpui a. (Joh. 11:32-36) Amah dodâltute meuh pawhin ani chu a thuchah ken ngaithlatute ṭhian a ni tih an pawm a ni. (Mt. 11:19) Keini pawhin, a zirtîrte a cheibâwl  dân kan entawn chuan, mi dangte nêna kan inlaichînna chu a ṭha lehzualin, lungawina leh hlimna kan nei lehzual ang a, Isua kan hmangaihna chu a nasa lehzual ang.

11. Isua ṭhian ni tûra kan tih ngai pahnihna chu eng nge ni a, engvângin nge chu chu thil pawimawh tak a nih?

¹¹ (2) Isua ngaihtuah dân leh thiltih dân chu entawn rawh. A ngaihtuah dân kan hriat tam lehzual a, kan entawn nasat poh leh kan inṭhian ṭhatna chu a nghet lehzual ang. (1 Kor. 2:16) A nih leh, engtin nge Isua chu kan entawn theih? Entîrna pakhat hi han ngaihtuah teh. Isua chuan mahni lâwmna aiin mi dangte ṭanpui chu a ngai pawimawh zâwk a. (Mt. 20:28; Rom 15:1-3) Chutiang rilru put hmang a neih avângin, ani chu mahni inpe tak leh ngaihdamna ngah tak a ni. Mite’n a chungchâng a chhe zâwnga an sawi hunah pawh a thinrim nghâl mai lo va. (Joh. 1:46, 47) Chu bâkah, mite chu tûn hmaa an thil sual tih tawhte a zirin a cheibâwl hek lo. (1 Tim. 1:12-14) Isua chuan: “In inhmangaih chuan mi zawng zawngin ka zirtîrte in ni tih chumiah chuan an hria ang,” tiin a sawi a ni. (Joh. 13:35) Heti hian inzâwt rawh, “Unaute nêna kan inkâra remna vawng reng tûra theih tâwp chhuahin Isua entawn tûr siam chu ka zui em?” tiin.

12. Isua ṭhian ni tûra kan tih ngai pathumna chu eng nge ni a, chu chu engtin nge kan tih theih?

¹² (3) Krista unaute chu thlâwp rawh. Isua chuan hriak thih a unaute chunga kan tih chu a chunga ti angah a ngai a. (Mt. 25:34-40) Hriak thihte kan thlâwp theih dân ṭha ber chu, Isua’n a hnungzuitute hnêna thawk tûra a pêk ram chanchin ṭha hrilh leh zirtîr siamnaa a kima telna hmangin a ni. (Mt. 28:19, 20; Tirh. 10:42) Krista unaute chuan “berâm dangte” ṭanpuina avâng chauhvin tûna thawh mêk khawvêl pum huap thu hrilhna hi an hlen thei a. (Joh. 10:16) Berâm dang zînga mi i nih chuan, he rawngbâwlnaa i tel apiangin hriak thih Kristiante chungah chauh ni lovin, Isua chungah pawh hmangaihna i lantîr tihna a ni.

13. Luka 16:9-a chhinchhiah Isua fuihna chu engtin nge kan nunpui theih?

¹³ Jehova leh Isua kaihhruaina hnuaia thawh mêk hna chu sum leh pai hmanga kan thlâwpna hmangin anmahni nên ṭhianah kan insiam thei bawk. (Luka 16:9 chhiar rawh.) Entîr nân, khawvêl pum huap rawngbâwlna atân thawhlâwm kan thawh thei a, chutah chuan hmun hlaa ram chanchin ṭha hrilhna atân te, Kingdom Hall leh biakna dik atâna hman inte enkawlna atân te, leilung chhiatna a thlen huna ṭanpui ngai unaute tâna thawhlâwm thawhte a tel a ni. Kan kohhran tân leh mi mala kan hriat ṭanpui ngai unaute tân pawh thawhlâwm kan thawh thei bawk. (Thuf. 19:17) Chûngte chu Krista unaute kan ṭanpui theih dân kawngte a ni.   

14. Ephesi 4:15, 16-a sawi angin, Isua ṭhian ni tûra kan tih ngai palina chu eng nge ni?

¹⁴ (4) Kristian kohhran ruahmannate chu thlâwp rawh. Min ngaihsaktu tûra ruat unaute nêna kan thawhho hian, kohhran lû Isua nêna kan inṭhian ṭhatna kan tinghet a ni. (Ephesi 4:15, 16 chhiar rawh.) Entîr nân, Kingdom Hall zawng zawng chu a ṭha thei ang bera hman kan tum a. Chutiang ni tûr chuan, kohhran ṭhenkhat chu kohhran dang nên an infin a, rawngbâwlna bialte chu siamrem a ni bawk. Chutiang chuan, inawpna pâwl tâna an thawh sum tam tak chu engemaw chen khâwl theih a ni. Chutih rual chuan, thuchhuahtu ṭhenkhat chu dinhmun thar mila an insiamrem a ngai a. Chûng thuchhuahtu rinawmte chu kohhran  pakhatah kum tam tak chhûng rawngbâwlin, chuta unaute nên chuan an inṭhian ṭha hle a. Mahse, tûnah chuan kohhran danga tirh an ni. Chûng zirtîr rinawmte’n chu ruahmanna an thlâwp tih Isua’n a hmuh chuan a va lâwm dâwn tak êm!

15. Isua nêna kan inṭhian ṭhatna chu nakin hunah engtin nge a ngheh lehzual ang?

¹⁵ Thlarau thianghlima hriak thihte chuan Pathian Rama Isua rorêlpuite nia rawngbâwla, a hnêna chatuana awm beiseina an nei a. Anni chuan Isua chu a takin an hmu ang a, an bia ang a, amah nên hun an hmangho vang. (Joh. 14:2, 3) Leia chatuana nun beiseina neite pawhin Isua hmangaihna leh ngaihsakna an dawng ang. Anni chuan Isua chu hmu dâwn lo mah se, Jehova leh Isua avânga an neih nunna an chen laiin Isua nêna an inṭhian ṭhatna chu a nghet lehzual ang.—Is. 9:6, 7.

16. Isua nêna kan inṭhian ṭhatna aṭangin eng malsâwmnate nge kan hmuh?

¹⁶ A ṭhiante ni tûra Isua sâwmna kan pawm hian malsâwmna tam tak kan dawng a. Entîr nân, tûnah ngei pawh a hmangaihna leh ṭanpuina kan dawng a ni. Chu bâkah, chatuana nun theihna hun remchâng kan nei bawk. A pawimawh ber chu, Isua nêna kan inṭhian ṭhatna chuan ro hlu ber, Isua Pa Jehova nêna inlaichînna hnai tak min neihtîr hi a ni. Isua ṭhiante kan ni thei chu chanvo hlu a va ni tak êm!