1. ¿Tiʼ kbʼantel kyuʼn kabʼe xjal tuʼntzun tokxix kyamiwen kyibʼ?

CHʼIXME tkyaqil maj, mas in chʼiy kyamiwbʼil kabʼe xjal qa ma tzʼel kypaʼn ambʼil tuʼn kyten junx, tuʼn kyyolin tiʼjju in kubʼ kyximen, tiʼjju in kubʼ kynaʼn ex tiʼjju in nikʼ toj kyanqʼibʼil. Pero aj tkubʼ qximen tuʼn qok te tamiw Jesús, kwestlo jaku tzʼela toj qwitz. Qo xnaqʼtzan tiʼj tiquʼn.

2. ¿Alkye tnejel tiquʼn jaku kubʼ qximen qa kwest tuʼn qok te tamiw Jesús?

² Tnejel, mintiʼ o tzʼok qqʼoʼn qwitz tiʼj Jesús. Atzun jlu bʼaj kyiʼj nim okslal toj tnejel syent abʼqʼi. Maske ikju, xi tqʼamaʼn apóstol Pedro jlu kye: «Naʼnx kylonteye Jesucrist, pero at kykʼujlalile tiʼj. Maske mintiʼ ma kyile jaʼlo, pero ma che okslane tiʼj» (1 Ped. 1:8). Tuʼntzunju, nya il tiʼj tuʼn tok qkeʼyin Jesús tuʼntzun qok te tamiw.

3. ¿Alkye tkabʼin tiquʼn jaku kubʼ qximen qa kwest tuʼn qok te tamiw Jesús?

³ Tkabʼin, mlay bʼant tuʼn qyolin tukʼil Jesús. Aj qnaʼn Dios, atz in qo yolin tukʼil Jehová. Ax tok, in qo naʼn Dios toj tbʼi Jesús, pero nya tukʼil in qo yolin. Axpe ikx, nya taj Jesús tuʼn qnaʼn Dios te, tuʼnju at toklen jlu tukʼil qkʼulbʼil te Jehová ex oʼkx te tuʼn qkʼulin (Mat. 4:10). Maske ikju, jaku kubʼ qyekʼin qa kʼujlaʼn Jesús quʼn.

4. a) ¿Alkye toxin tiquʼn jaku kubʼ qximen qa kwest tuʼn qok te tamiw Jesús? b) ¿Tiʼ qo xnaqʼtzal tiʼj toj xnaqʼtzbʼil lu?

 ⁴ Toxin, mlay tzʼel qpaʼn ambʼil tuʼn qten tukʼil Jesús tuʼnju atz taʼ toj kyaʼj. Noqtzun tuʼnj, jaku tzʼok qojtzqiʼn nim tiʼchaq tiʼj Jesús maske atz in nanqʼin toj kyaʼj. Toj xnaqʼtzbʼil lu, qo yolil tiʼj kyaje tiʼ jaku bʼant quʼn tuʼntzun qok te tbʼanel tamiw Jesús. Pero tnejel qo xnaqʼtzan tiʼj tiquʼn nim toklen tuʼn qok te tbʼanel tamiw.

5. ¿Tiquʼn nim toklen tuʼn qok te tamiw Jesús? (Qʼonka twitza tiʼj recuadro « Qa ma qo ok te tamiw Jesús, kʼonil qiʼj tuʼn qok te tamiw Jehová» ex tiʼj recuadro « Tenx qximbʼetz toj tumel tiʼj Jesús»).

⁵ Nim toklen tuʼn qok te tamiw Jesús tuʼntzun tten jun tbʼanel qamiwbʼil tukʼil Jehová. ¿Tiquʼn in xi qqʼamaʼn jlu? Qo xnaqʼtzan tiʼj kabʼe tiquʼn. Tnejel, tqʼama Jesús jlu kye t-xnaqʼtzbʼen: «At tkʼuʼj Nmane kyiʼje porke ma chin kʼujlanjtze kyuʼne» (Juan 16:27). Ax ikx tqʼama jlu: «Mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6). Qa ma kubʼ qximen qa nya il tiʼj tuʼn qok te tamiw Jesús tuʼntzun qok te tamiw Jehová, ik tten jlu ik tzeʼn qaj tuʼn qokx toj jun matij ja ex nya qaj tuʼn qokx toj pwert. Chʼixme ax techel lu ajbʼen tuʼn Jesús tej tqʼama qa a in nok te «ttzija janche okxa rit» (Juan 10:7, XT). Tkabʼ, kubʼ tyekʼin Jesús toj jun tten tzʼaqli qe tbʼanel tmod Ttat. Tuʼntzunju tqʼama jlu kye t-xnaqʼtzbʼen: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Kyjuʼtzun, oʼkx jaku tzʼok qojtzqiʼn Jehová qa ma tzʼok qojtzqiʼn Jesús. Qa mas ma tzʼok qojtzqiʼn  Jesús, mas kʼokel qkʼujlaʼn. Ex qa mas ma qo ok laqʼeʼ ttxlaj Jesús, mas kʼokel qkʼujlaʼn Jehová.

6. ¿Alkye juntl tiquʼn nim toklen tuʼn qok te tamiw Jesús?

⁶ Nim toklen tuʼn qok te tamiw Jesús tuʼntzun kytzaj tzaqʼweʼn qnaʼj Dios. A jlu in tzaj tyekʼin qe qa nya oʼkx tuʼn t-xi qqʼamaʼn qe yol lu aj tkubʼaj qnaʼj Dios: «toj tbʼi Jesús». Sino nim toklen tuʼn tel qnikʼ tiʼj alkye tten in najbʼen Jesús tuʼn Jehová tuʼntzun ttzaj ttzaqʼweʼn qe qnaʼj Dios. Xi tqʼamaʼn Jesús jlu kye t-xnaqʼtzbʼen: «Tkyaqilju kxel kyqanine te Nmane tuʼnju okslal qeye wiʼje, ok nbʼinchaʼye kyeye» (Juan 14:13). A Jehová in tzaj bʼinte qnaʼj Dios ex a in tzaj tzaqʼwente, pero o txi tqʼoʼn toklen Tkʼwal tuʼn tbʼant tajbʼil tuʼn (Mat. 28:18). Naʼmxtoq ttzaj ttzaqʼweʼn Jehová qnaʼj Dios, tnejel in nok tqʼoʼn twitz tiʼj qa in xi qbʼiʼn qe nabʼil tqʼama Jesús. Jun techel, tqʼama Jesús jlu: «Qa ma kubʼ kynajsaʼne aju mya bʼaʼn in kybʼinchaʼn xjal kyiʼje; ax ikx kbʼel najsaʼn kyile tuʼn Kymane aju at tuj kyaʼj. Pero qa mintiʼ xkubʼ kynajsaʼne aju mya bʼaʼn in kybʼinchaʼn xjal kyiʼje, ax ikx te Kymane mlay kubʼ najsaʼn kyile tuʼn» (Mat. 6:14, 15). Nim toklen tuʼn tkubʼ qyekʼin qʼaqʼbʼil qkʼuʼj kyiʼj txqantl ik tzeʼn in bʼant tuʼn Jehová ex tuʼn Jesús qiʼj.

7. ¿Tiʼ kbʼantel quʼn tuʼn tonin chojbʼil bʼant tuʼn Jesús qiʼj?

⁷ Oʼkx qeju in che ok te tbʼanel tamiw Jesús tzul kykʼamoʼn tkyaqil kʼiwlabʼil tuʼn chojbʼil bʼant tuʼn. ¿Tzeʼn in nel qnikʼ tiʼj jlu? In nel qnikʼ tiʼj tuʼnju tqʼama Jesús qa xi «tqʼon tibʼ tuʼn tkyim tuʼn kyklet qe tamiw» (Juan 15:13). Ateʼ junjun tmajen Jehová e kyim tej naʼmxtoq tul Jesús tzalu twitz Txʼotxʼ ik tzeʼn Abrahán, Sara, Moisés, Rahab ex junjuntl. Aj kyjaw anqʼin, kʼokel tilil kyuʼn tuʼn tok kyojtzqiʼn Jesús ex tuʼn tok kykʼujlaʼn. Tuʼnju oʼkx tzul qʼoʼn kyanqʼibʼil te jumajx qa ma che ok te tamiw Jesús (Juan 17:3; Hech. 24:15; Heb. 11:8-12, 24-26, 31).

8, 9. Ik tzeʼn in tzaj tyekʼin Juan 15:4 ex 5, ¿tiʼ jaku bʼant quʼn noq tuʼnju at qamiwbʼil tukʼil Jesús, ex tiquʼn nim toklen jlu?

⁸ O tzaj qʼoʼn qoklen tuʼn qonin tiʼj Jesús tuʼn qpakbʼan ex tuʼn t-xi qyekʼin tbʼanel tqanil tiʼj Tkawbʼil Dios. Tej tten tzalu twitz Txʼotxʼ, xi tyekʼin axix tok tiʼj Dios. Ex tej tmeltzʼaj toj kyaʼj, ok te Wibʼaj tibʼaj kʼloj okslal ex o tzʼonin qiʼj tuʼn qpakbʼan ex tuʼn qqʼoʼn xnaqʼtzbʼil. Tuʼntzunju, in nok tqʼoʼn toklen aqʼuntl in bʼant quʼn tuʼn qonin kyiʼj xjal tuʼn tel kynikʼ tiʼj ex tiʼj Ttat. Oʼkx tuʼn tonbʼil Jehová ex Jesús jaku qo pakbʼan (kjawil uʼjit Juan 15:4, 5).

⁹ In tzaj t-xnaqʼtzaʼn Xjan Uʼj qa nim toklen tuʼn tok qkʼujlaʼn Jesús qa qaj tuʼn ttzalaj Jehová qiʼj. Tuʼntzunju, qo xnaqʼtzan tiʼj kyaje tiʼ jaku bʼant quʼn tuʼntzun qok te tbʼanel tamiw Jesús.

10. ¿Alkye tnejel tiʼ kbʼantel quʼn tuʼntzun qok te tamiw Jesús?

¹⁰ Tnejel, bʼaʼn tuʼn tok qojtzqiʼn Jesús. Tuʼn tel qnikʼ tiʼj Jesús, tbʼanel tuʼn tjaw quʼjin uʼj te Mateo, Marcos, Lucas ex Juan. Aj qximen kyiʼj txʼolbʼabʼil in che yolin tiʼj tanqʼibʼil Jesús ex aj tel qnikʼ tiʼj qa kubʼ tyekʼin qʼaqʼbʼil tkʼuʼj kyiʼj xjal, kʼonil qiʼj tuʼn tok qkʼujlaʼn ex tuʼn tok qqʼoʼn toklen. Jun techel, mintiʼ e ok tqʼoʼn qe t-xnaqʼtzbʼen te tmajen maske ok te aj Xnaqʼtzal kye. Sino ok tamiwen tibʼ kyukʼil  ex xi tqʼamaʼn kye tiʼ kubʼ t-ximen ex tiʼ kubʼ tnaʼn (Juan 15:15). El tnikʼ tiʼj kybʼis ex jaw oqʼ kyukʼil (Juan 11:32-36). Axpe ikx, el kynikʼ aj qʼoj tiʼj qa ok tamiwen tibʼ kyukʼil qeju ok kybʼiʼn tbʼanel tqanil (Mat. 11:19). Qa ma ten qmod kyukʼil txqantl ik tzeʼn tmod Jesús ten kyukʼil t-xnaqʼtzbʼen, kʼokel qamiwen qibʼ kyukʼil ex mas qo tzalajel. Tuʼn jlu mas kʼokel qkʼujlaʼn Jesús ex kʼokel qqʼoʼn toklen.

11. ¿Alkye tkabʼin tiʼ kbʼantel quʼn tuʼntzun qok te tamiw Jesús ex tiquʼn nim toklen?

¹¹ Tkabʼin, tenx qximbʼetz ex qbʼincham qe tiʼchaq ik tzeʼn te Jesús. Qa mas ma tzʼok qojtzqiʼn Jesús ex qa mas ma ten qximbʼetz ik tzeʼn te, mas kchʼiyel qamiwbʼil tukʼil (1 Cor. 2:16). ¿Alkye tten jaku tzʼel qkanoʼn tiʼj? Qo yolin tiʼj jun techel. Tajtoq Jesús tuʼn tonin kyiʼj txqantl ex nya tuʼn tkubʼ tbʼinchaʼn tex tajbʼil (Mat. 20:28; Rom. 15:1-3). Tuʼnju ten t-ximbʼetz ik tzeʼn jlu, bʼant junjun tiʼchaq tuʼn kyiʼj ex kubʼ tnajsaʼn kyil. Mintiʼ tzaj tqʼoj tej kyok ten txqantl yolil tiʼj (Juan 1:46, 47). Ex tej kyel txalpaj junjun xjal, mintiʼ ximen tiʼj jlu ex ya mintiʼ tzaj tnaʼn (1 Tim. 1:12-14). Nim toklen tuʼn qok lepeʼ tiʼj techel kyaj tqʼoʼn tuʼnju tqʼama jlu: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:35). Tuʼntzunju, bʼaʼn tuʼn tkubʼ qxjelin jlu: «¿In nokpe tilil wuʼne tuʼn tten mujbʼabʼil qxole kyukʼil erman ik tzeʼn bʼant tuʼn Jesús?».

12. ¿Alkye toxin tiʼ kbʼantel quʼn tuʼntzun qok te tamiw Jesús ex tzeʼn jaku bʼant quʼn?

¹² Toxin, qo onin kyiʼj terman Cristo. Aj qonin kyiʼj okslal skʼoʼn maj, in nok tqʼoʼn Jesús jlu ik tzeʼn in qo onin tiʼj (Mat. 25:34-40). Aj t-xi qbʼiʼn kawbʼil kyaj tqʼamaʼn Jesús tuʼn qpakbʼan ex tuʼn kyok xjal te t-xnaqʼtzbʼen quʼn, atzun jlu mas tbʼanel jaku bʼant quʼn tuʼn qonin kyiʼj skʼoʼn maj (Mat. 28:19, 20; Hech. 10:42). Nim toklen onbʼil in xi qqʼoʼn kye okslal skʼoʼn maj tuʼntzun t-xi pakbʼet tbʼanel tqanil twitz tkyaqil Txʼotxʼ toj ambʼil jaʼlo (Juan 10:16). Qa atz atoʼ kyxol txqantl ẍneʼl, in kubʼ qyekʼin qa kʼujlaʼn qe skʼoʼn maj quʼn ex Jesús aj qex pakbʼal.

13. ¿Alkye tten jaku txi qbʼiʼn nabʼil kyaj tqʼamaʼn Jesús toj Lucas 16:9?

¹³ Ax ikx in qo ok te tamiw Jehová ex Jesús aj tajbʼen qpwaq tuʼn qonin tiʼj aqʼuntl in bʼant twitz tkyaqil Txʼotxʼ (kjawil uʼjit Lucas 16:9). Jun techel, jaku txi qqʼoʼn pwaq tuʼntzun qonin tiʼj pakbʼabʼil kyoj lugar najchaq, tuʼn kyjaw bʼinchet ja, tuʼn kyok xqʼuqit ex tuʼn t-xi qʼet onbʼil aj ttzaj jun xitbʼil. Ax ikx, jaku kux qqʼoʼn oyaj jatumel in nok qchmon qibʼ ex aj qonin kyiʼj erman kyaj onbʼil (Prov. 19:17). Aj tbʼant jlu quʼn, in qo onin kyiʼj terman Cristo.

14. Ik tzeʼn in tzaj tqʼamaʼn Efesios 4:15 ex 16, ¿alkye tkyajin tiʼ kbʼantel quʼn tuʼntzun qok te tamiw Jesús?

¹⁴ Tkyajin, qo onin kyiʼj chʼixpubʼil in bʼant tuʼn ttnam Jehová. Aj qonin kyiʼj erman in che xqʼuqin qiʼj tukʼil kʼujlabʼil, in chʼiy qamiwbʼil tukʼil Jesús, tuʼnju a Wibʼaj tibʼaj kʼloj okslal (kjawil uʼjit Efesios 4:15, 16). Jun techel, in nok tilil tuʼn ttnam Jehová tuʼn kyajbʼen Ja te Chmabʼil toj tumel. Tuʼn jlu, o che ok mojbʼaʼn junjun kʼloj okslal ex o txi qʼoʼn junjuntl tembʼil te pakbʼabʼil kye. Aju o tzaj tuʼn jlu, mintiʼxix o bʼaj najset nim pwaq in najbʼen tiʼj Tkawbʼil Dios. Noqtzun tuʼnj, ateʼ junjun erman o tzʼok tilil kyuʼn tuʼn kynaqʼet kyiʼj chʼixpubʼil lu. Olo che naqʼet  erman lu tuʼn kyten toj ax kʼloj okslal ex tuʼn jlu kwest tuʼn tel kypan kyibʼ kyiʼj erman. Atzun jaʼlo o txi qʼamaʼn kye tuʼn kyxiʼ toj juntl kʼloj okslal. Nim in tzalaj Jesús aj tok tqʼoʼn twitz tiʼj qa in che onin erman lu tuʼn tkyaqil kykʼuʼj kyiʼj chʼixpubʼil in che bʼant.

15. ¿Tiʼ kbʼajel tiʼj qamiwbʼil tukʼil Jesús toj ambʼil tzul?

¹⁵ In che ayon okslal skʼoʼn maj tuʼn kyten tukʼil Jesús te jumajx ex tuʼn kykawin junx tukʼil toj Tkawbʼil Dios. Kʼokel kyqʼoʼn kywitz tiʼj Jesús, che yolil tukʼil ex che tel junx (Juan 14:2, 3). Ax ikx qeju che anqʼil tzalu twitz Txʼotxʼ, che tzalajel tiʼj tkʼujlabʼil Jesús aj kyok xqʼuqin tuʼn. Maske mlay tzʼok kyqʼoʼn kywitz tiʼj, mas kchʼiyel kyamiwbʼil tukʼil Jesús akux in che tzalaj tiʼj tbʼanel kyanqʼibʼil tzul tqʼoʼn Jehová ex Jesús (Is. 9:6, 7).

16. ¿Alkyeqe kʼiwlabʼil in tzaj qkʼamoʼn aj qok te tamiw Jesús?

¹⁶ Aj ttzaj qkʼamoʼn txokbʼil in tzaj tqʼoʼn Jesús qiʼj tuʼn qok te tamiw, in tzaj qkʼamoʼn nim kʼiwlabʼil. Jun techel, in qo ok tkʼujlaʼn ex in nonin qiʼj toj ambʼil jaʼlo. Ax ikx, at qʼuqbʼil qkʼuʼj tuʼn qanqʼin te jumajx. Aj tok qamiwen qibʼ tukʼil Jesús, in tzaj tqʼoʼn jlu ambʼil qe tuʼn tok qamiwen qibʼ tukʼil Jehová, aju xjal mas nim toklen. Jun tbʼanelxix qoklen aj qok te tamiw Jesús.