KJOAʼMIYA XI CHOTʼAYA 17
Miyo xinno
“Miyona kixinno, nga̱ kʼoasʼin kixinyano ngayije kjoa xi kinrʼoele Nʼaina” (JUAN 15:15).
KJOAJNDA 13 Choa̱ xi tsakʼéjnaná Cristo
XI TÍNCHJA̱NI *
1. Jmé xi tjínnele sʼin je xi miyo mele kjao.
KʼIATSA mele miyo kjao je chjota tjínnele sikʼayale nichxin xínkjín, nga kjaoyani josʼin síkjaʼaitsjen kʼoa jotjío kon. Tonga kʼianga je Jesús mená si̱miyoaa tsakui nichxin kʼoasʼin nikjaʼaitsjeen nga ngisa ñʼai koa̱nná. Kataʼyala ánni.
2. Jñánile xi títjon koya anni nga kʼoasʼin si̱kjaʼaitsjenñá nga ñʼai koa̱nná nga miyole Jesús koaan.
2 Xi títjon, kuinga tsín ñaki kao xkoaan ʼyañá je Jesús. Kʼoati tjínkʼa je chjotale Cristo xi tsakatio nga siglo 1 xi tsín ñaki xko̱n tsabeni je Jesús. Ninga kʼoalani, je pastro Pedro i kitsole: “Alikui tsaʼyao Jesucristo, tonga tjaochanío. Makjainno xi tʼatsʼe nga je, nda tsa tsín tiʼyao ndʼaibi” (1 Ped. 1:8). Jebi kui xi bakóyaná nga tsín machjén nga ñaki xkoaan jchañá je Jesús nga miyole koaan.
3. Jñánile xi majaoni koya.
3 Xi majaoni, kuinga tsín ma chja̱kaonajmiá je Jesús. Kʼianga bʼetsʼoaa jé Jeobá chjakaonajmiá. Ningalani kui jaʼaínle Jesús nichjén nga bʼetsʼoaa, ali ñaki jesoa chjakaonajmiá. Je Jesús alikui mele nga je kʼoétsʼoalee, kʼianga bʼetsʼoaa kʼoasʼin ʼyaxkónñá je Jeobá kʼoa tojé xi bakinle nga kʼoétsʼoalee (Mat. 4:10). Ninga kʼoalani, koaan koakoá nga tsjoachaa je Jesús.
4. 1) Jñánile xi majanni koya. 2) Jmé xi kuitsoyaná kjoaʼmiya jebi.
4 Xi majanni, kuinga tsín koa̱n ya kuiyokoaa je Jesús nga̱ yaa ngʼajmi tíjna. Ningalani tsín ya tiyoaa jñani tíjna koaan jchaa xi tʼatsʼe. I̱ kjoaʼmiya jebi ño koya tjínni xi kuitsoyaná jmé xi tjínnená sʼiaan nga miyoná koa̱nni je Jesús. Tonga xi títjon jchaa kui ánni nga nʼio tjínnile kjoandosin nga nʼio nda miyo cho̱bá kao Jesús.
ÁNNI MACHJÉNSÍNI NGA MIYONÁ KATAMANI JE JESÚS
5. Ánni machjénsíni nga miyoná katamani je Jesús (kʼoati chótsenlai je recuadro “ Nga miyole Jesús maa kʼoati mamiyoaa je Jeobá” kao “ Jósʼin tjínnele jchatokoán je Jesús”).
5 Machjén nga miyoná katamani je Jesús nga nda kuiyoaa kao Jeobá. Jaola koya kataʼyaa ánni nga kʼoabixónsíñá. Xi títjon, je Jesús i kitsole chjotatjenngile: “Tijeni Nʼainá tsjoakeno nga̱ jekoantsjoachanáo” (Juan 16:27). Kʼoa i kitsosa: “Nitoʼyajin xi faʼaikonle Nʼainá, tsa tsian nga an” (Juan 14:6). Tsa mená nga miyole Jeobá koaan tonga tsa tsín miyole Jesús maa, yaa mangóson tsa jngo ndʼia mená kuitjásʼen tonga tsa tsín ya xo̱ntjoa kuitjásʼenñá. Je Jesús me kʼoati kui choa̱ kisichjén kʼianga kitso: “An nía xo̱ntjoale barré” (Juan 10:7). Xi majaoni koya kuinga ñaki ndasʼin tsakakó je Jesús jokjoan je Nʼaile. I kitsole je chjotatjenngile: “Je xi tsabena nga an, tsabe Nʼainá” (Juan 14:9). Jngo koya josʼin jchaa je Jeobá kʼiaa nga jchaa xi tʼatsʼe Jesús. Nga ngisasa koa̱nná xi tʼatsʼe, sa tsjoacha sa tsjoachaa koaan. Kʼoa kʼianga sa jcha sa jchasaa xi tʼatsʼe Jesús, ngisasa tsjoacha koaan je Nʼaile.
6. Ánsani nga machjénni nga miyoná katamani je Jesús.
6 Machjén nga miyole Jesús koaan ánni nga kuinóʼyanile je kjoabʼetsʼoaná. Kui xi tsonile nga tsín tsa tokui nga jenganá nga kui jaʼaínle Jesús si̱chjén nga kʼoétsʼoaa, nga i̱ kuixoán: “Kao jaʼaínle Jesús”. Tjínnele jchaa jósʼin síchjén Jeobá je Jesús nga nrʼoé je kjoabʼetsʼoaná. Je Jesús i kitsole je chjotatjenngile: “Tojmeni xi si̱jélao Nʼainá kao jaʼaínna, kʼoasʼin sʼian” (Juan 14:13). Jé Jeobá xi nrʼoéná kʼianga bʼetsʼoalee tonga jé ʼNdíle tsjoále xá nga bitjoson jme xi tjínndajinle (Mat. 28:18). Kʼianga kjesa síchatʼajin je jéená, kui kuenta sʼín tsa tinitjosoán je kjoafaʼaitsjen xi kitsjoa je Jesús, kʼianga kitso: “Kʼia tsa jon si̱chatʼalao jéele chjota, je Nʼaino xi tíjna ngʼajmi kʼoatisʼin sichatʼano. Tonga tsa tsín si̱chatʼalao chjota jéele, kʼoati je Nʼaino likui sichatʼano jéeno” (Mat. 6:14, 15). Nʼio tjínle kjoandosin nga kʼoati si̱koaa xi kjaʼaí josʼin bekonná je Jeobá kao Jesús.
7. Jmé xi sʼiaan nga tjoéná je kjoanda xi tjenkao je kjoabʼechjíntjaile Jesús.
7 Tojé xi miyole mani je Jesús xi kʼoaile je kjoanda xi tjenkao je kjoabʼechjíntjai. Jómani ʼyaa jebi. Kuinga kʼoakitso je Jesús nga “tsjoántjai kjoabijnachonle xi tʼatsʼe miyole” (Juan 15:13, TNM). Je choʼndale Niná xi kʼia tsakatio nga kjesa faʼaijin Jesús i̱ Sonʼnde tjínnele nga koa̱nle xi tʼatsʼe Jesús kʼoa nga tsjoake koa̱n. Jolani je Abrahán, Sara, Moisés kao Rahab kjoaʼáyanile, tonga kʼoati tjínnele nga miyole Jesús koa̱n ánni nga sʼe̱sínile je kjoabijnachon xi tsínkʼia fetʼa (Juan 17:3; Hech. 24:15; Heb. 11:8-12, 24-26, 31).
8, 9. Tojo tso Juan 15:4, 5, jméni xi koa̱n sʼiaan nga miyoná mani je Jesús, kʼoa ánni nga tosi tonda si̱miyoñá.
8 Tsee kjoanda tjínná nga tibʼainganʼiolee je Jesús nga tiʼmiyasoán kʼoa nga ʼmiyalee chjota je énnda xi tʼatsʼe Chjotaxále Niná. Kʼianga tsakʼejna i̱ Sonʼnde je Jesús kitsoya jokjoantjínni xi tʼatsʼe Niná, kʼoa kʼianga kichoni ya ngʼajmi jko̱ sʼin tíjnale je jtín, kʼoa tojo jé tíbándiaale xá xi kjima. Je Jesús kuenta sʼín kʼoa chjí be nga bʼenelee yaoná nga binyakoaa xi kjaʼaí jokji tjen kʼoamaná nga bakoyalee xi tʼatsʼe kao tʼatsʼe Nʼaile. Kʼoa kʼianga kuitjosonná xá jebi tokʼiaa nga je Jeobá kao Jesús kuinyakaoná (tʼexkiai Juan 15:4, 5). *
9 Je Biblia kʼoatso nga tjínnele tsjoacha koaan je Jesús kʼiatsa mená nda kuiyoaa ngixko̱n Jeobá. Ñola koya kataʼyaa jmeni xi machjén nga sʼiaan kʼianga miyole Jesús koaan.
JMÉ XI KOA̱N SʼIAAN NGA MIYONÁ KOA̱NNI JE JESÚS
Koaan miyole Jesús koaan kʼianga 1) ngisa nda jchaxkoaan, 2) kʼoasʼin si̱kjaʼaitsjeen kʼoa kʼoasʼiaan jokisʼin, 3) kʼoainganʼiolee je chjotale Cristo xi ya ngʼajmi tjínle kjoachoya kʼoa 4) kʼoainganʼiolee jme xi bʼéndajin je jtín (Chótsenlai párrafo 10-14) *
10. Jmé xi títjon sʼiaan nga miyoná koa̱nni je Jesús.
10 Xi títjon, kataʼyaxkoaan je Jesús. Kʼianga nda jchaxkoaan machjén nga kʼoéxkiaa je libro xi tsʼe Mateo, Marcos, Lucas kao Juan. Kʼianga si̱kjaʼaitsjenjiaan jmeni xi tso libro jebi jchañá josʼin tsakakóle kjoanda je chjotale Jesús, kʼoa ngisaa tsjoacha koaan kʼoa koakolee kjoaxkóntokon. Tobʼelañá, alikui jochoʼnda sʼin tsabekon je chjotatjenngile ningalani je kitsoyale. Miyo sʼin tsabekon kʼoa tsakʼéyanajmíle josʼin síkjaʼaitsjen kʼoa jotjín kon (Juan 15:15). Kʼianga ba kisatio kon je chjotale kʼoati ba koanle tsanda je kʼoa saʼnda kiskiʼndákao (Juan 11:32-36). Saʼnda je chjotakontrale Jesús koanjinle nga miyole koanni je chjota xi kinrʼoéle nga kitsoyason (Mat. 11:19). Kʼiatsa kʼoati si̱koaa je xi kjaʼaí josʼin tsabekon je chjotatjenngile Jesús, nda kjuinkoaa xíngiaa, tsjoa sa̱tío tokoán, kʼoa ngisaa tsjoacha koaan kʼoa koakolee kjoaxkóntokon je Jesús.
11. Jñánile xi majaoni koya xi sʼiaan nga miyoná koa̱nni je Jesús, kʼoa ánni nga nʼio tjínnile kjoandosin.
11 Xi majaoni, kʼoasʼin si̱kjaʼaitsjeen kʼoa kʼoasʼiaan jokisʼin je Jesús. Kʼianga ngisasa nda jchaxkoaan kʼoa nga chjénngilee josʼin síkjaʼaitsjen, sa miyo sa miyo koaan (1 Cor. 2:16). Jósʼin koa̱n chjénngilee je Jesús. Jngola choa̱ kataʼyaa. Je Jesús kui ngisa kitsjoale kjoandosin nga tsakasenkao xi kjaʼaí kʼoa tsín to yaole kini (Mat. 20:28; Rom. 15:1-3). Kʼianga kʼoakisʼin, tsakjaʼántjai kjoañʼai kʼoa kisichatʼale je xi ngikʼa. Alikui ndi̱to̱n kisijtile yaole ninga jotsakʼinle (Juan 1:46, 47). Kʼoa alikui kui ngotjo ngosa kisikjaʼaitsjennile je jée xi tsakajngi je chjota (1 Tim. 1:12-14). Nʼio tjínle kjoandosin nga chjénngiaa je choa̱le Jesús, nga̱ i kitso: “Kʼuisʼin skoe̱ ngatsʼi nga jon nío chjotana, tsa kʼoasʼin matsjoachao xíngio” (Juan 13:35). Kuinga ndatjínni nga si̱kjaʼaitsjenjiaan jebi: “Tojo kisʼin je Jesús, a bʼenele yaona nga ndasʼin fikoa je ndsʼee”.
12. Jñánile xi majanni koya xi sʼiaan nga miyoná koa̱nni je Jesús, kʼoa jótjínnele sʼiaan.
12 Xi majanni, kuinyakoaa je ndsʼe̱ Cristo. Kʼianga binyakoaa je chjotale Cristo xi ya ngʼajmi tjínle kjoachoya jékjoanni Jesús xi tibinyakoaa (Mat. 25:34-40). Jngo koya josʼin kuisenkoaa kʼiaa nga si̱tjosoán je xá xi tsakánele je chjotatjenngile, nga kʼuínyasoán je énnda xi tʼatsʼe Chjotaxále Niná kʼoa nga chjotale Cristo si̱koaa je chjota (Mat. 28:19, 20; Hech. 10:42). Kʼianga tsjoánganʼio je “xi kjaʼaí barré” nʼio binyakao je ndsʼe̱ Cristo nga̱ kui xi mele nga kataʼmiyason je énnda xi tsʼe Chjotaxále Niná jngo tjíjtsa Sonʼnde (Juan 10:16). Tsa ya majngokoaa xi kjaʼaí barré, kʼianga ñandia ñandia ʼmiyasoán kʼoasʼin bakonilee kjoatsjoacha je Jesús kao chjotale xi ya tjínle kjoachoya ya ngʼajmi.
13. Jósʼin koa̱n kjuintjenngiaa je kjoafaʼaitsjen xi kitsjoa je Jesús tojosʼin faʼaitʼa ya Lucas 16:9.
13 Kʼoati miyole maa je Jeobá kao Jesús kʼianga kʼoasʼin nichjén je tao̱nná nga bʼainganʼioá xá xi je tjíobándiaale (tʼexkiai Lucas 16:9). * Tobʼelañá, koaan kʼoee tao̱n xi kʼoasʼin machjén nga tosi tonda kataʼmiyason je Énle Niná jngo tjíjtsa Sonʼnde. Tsa kʼoasʼiaan, kʼoainganʼioñá nga kataʼmiyason jñani kjintʼa, nga katasʼenda kʼoa katasʼendaya ndʼia xi machjén nga ʼyaxkón Niná, kʼoa kʼoainganʼiolee ya jña kjoaxkón bichó. Kʼoati koa̱n koatioá tao̱n ya jtín jña mangían kʼoa kuisenkoaa je ndsʼee xi ʼyaa nga nganʼio machjénle (Prov. 19:17). Nga kʼoanʼia, kʼoasʼin bʼainganʼionilee je ndsʼe̱ Cristo.
14. Tojo tso Efesios 4:15, 16, jñánile xi mañoni koya xi sʼiaan nga miyoná koa̱nni je Jesús.
14 Xi mañoni, kʼoainganʼiolee jme xi bʼéndajin je naxinandále Jeobá. Ngisaa mamiyosaa je Jesús, xi jko̱ sʼin tíjnale je jtín kʼianga bʼainganʼiolee ndsʼee xi kao kjoatsjoacha bándiaaná (tʼexkiai Efesios 4:15, 16). * Tobʼelañá, je naxinandále Jeobá kui xi mele nga ndasʼin ni̱chjén je Ndʼia jña chotʼayá. Kuinga tjín kʼani jtín xi kjimajngole xínkjín kʼoa sʼendajin chjotse ijngokʼa jñani bʼakaole tsoyason. Nga kʼoakjima, ngisaa nda kjimachjén je tao̱n xi tsjoá naxinandále Niná. Xi ijngosani, nga kʼoasʼin tísʼendajin tjínkʼa je ndsʼee xi xin jtín tjíotsjoánganʼio. Tsakui nichxin nkjín nó kitsjoanganʼio jngo jtín kʼoa jekitsjentʼale ndsʼee xi ya tjío, tonga ndʼaibi xin jtín tjíonikasén nga katatsjoánganʼio. Nʼiojin tsjoa sʼe kon je Jesús nga kʼoasʼin tsjoánganʼio je ndsʼee jmeni xi bʼéndajin naxinandále Niná.
KOAAN MIYOLE JESÚS KOAAN NGANTSJAI NICHXIN
15. A tosi tonda miyoná koa̱n je Jesús nichxin xi nroaján.
15 Je chjotale Cristo xi kao nganʼiotsje kitjoejinni koyale nga ya koatiokao Jesús ngantsjai nichxin ya ngʼajmi kʼoa nga ya koatexomakao. Skoe̱ní, kjoakaonajmí je Jesús kʼoa sʼeele nichxin nga ñatjen koatio (Juan 14:2, 3). Kʼoa je xi i̱ Sonʼnde koyale koatio kʼoati koakole kjoatsjoacha je Jesús kʼoa kuenta sʼin. Ninga tsín ñaki xko̱n skoe̱ni, sa miyo sa miyo koa̱nle je Jesús kʼianga jekoatio ngantsjai nichxin, nga̱ jé Jeobá kao Jesús tsjoále kjoanda jebi (Is. 9:6, 7).
16. Jmé kjoanichikontʼain xi sʼe̱ná nga miyole Jesús maa.
16 Kʼianga miyoná mani je Jesús nʼio tse kjoanichikontʼain sokóná. Tobʼelañá, tíbakóná kjoatsjoachale kʼoa títsjoánganʼioná ndʼaibi. Xi ijngosani, koaan kuiyoaa ngantsjai nichxin. Kʼoa nga miyoná mani je Jesús kui kjoanda tjínná nga kʼoati miyoná koa̱nni je Jeobá. Nʼio tse kjoanda tjenkao nga miyoná mani je Jesús.
KJOAJNDA 17 “Mena”
^ párr. 5 Nga nkjín nó nga ya tsakatiokao Jesús je pastrole, kisʼele nichxin nga tsakjáonajmí kʼoa nga ñatjen kisixá, kʼoa nʼio nda miyo tsakjáo. Je Jesús kui xi mele nga kʼoati miyole koaan. Je pastro choa ñʼai koanle nga kisimiyo, tonga ñá ngisajin ñʼai koa̱nná nga si̱miyoaa je Jesús. Ánni. I̱ kjoaʼmiya jebi kui chótʼayajiaan jmé xi koa̱n sʼiaan nga miyoná koa̱nni je Jesús.
^ párr. 8 Juan 15:4, 5: “Tiyokaonáo, kʼoa an koatejnakaono. Joni tsa jngo yándsa̱ xi tsín tsa bale to nga toje, tsa tsín tíjnatʼanʼio yáje, kʼoatisʼin lijme xi koa̱n sʼiaon nga jon, tsa tsín kʼoasʼin kuiyokaonáo. 5 An nía yáje, kʼoa jon nío yándsa̱. Je xi an tíjnakaona, kʼoa an tijnakoa nga je, jebi xi kjaínga tonkjín to bale. Lijme xi ma nʼiao nga jon, tsa tiyotʼaxinnáo”.
^ párr. 13 Lucas 16:9: “An kʼoaxinno: Miyo tʼiaon xi tʼatsʼe kjoanyiná xi chʼao tjín. Kʼoasʼin tsjoáʼndeno ya jña si̱kjáyao ngantsjai nichxin kʼia nga cha̱ kjoanyináno”.
^ párr. 14 Efesios 4:15, 16: “Tosa kjuintjenngilee xi kjoakixi kao kjoatjaocha. Kʼoasʼin katamajchájinná ngayije kjoa xi tʼatsʼe nga je xi jkoaa ma, xi je Cristo. 16 Xi totʼatsʼe Cristo ngayije yaole kʼoasʼin mayʼai mangʼa kao kjoatjaocha, nga jenda tjíokjao ngakijnda jña nga xkóle. Kʼoasʼin tjínle nganʼio josʼin nga nda síxá jngójngó kʼa xi tsʼe yaole”.
^ párr. 58 XI TÍNCHJA̱NI SÉN XI FAʼAITʼA: 1) Kʼianga chotʼayajtían Énle Niná ya niʼyaná, kui chotʼayajiaan josʼin tsakakóya kʼoa jmeni xi kisʼin je Jesús. 2) Ya jinjtín, bʼenelee yaoná nga nda mangínkoaa je ndsʼee. 3) Kʼiatsa kjitʼa ʼmiyasoán kʼoasʼin bʼainganʼionilee je ndsʼe̱ Cristo. 4) Kʼianga majngole xínkjín je jtín, bʼainganʼioñá josʼin bʼéndajin je xi chjotajchínga sʼin tjío.
