1. Mwasa kulikuta bati busamba na munu?

NGA mushaka kulikuta busamba na munu, munapande kuwana simbu ya kukala hamo nendi. Busamba bweni bukanyama omwo musimutwiya na kulileka byuma bimwazema, nebi bimwazinda, nebi bimunaliwana nabyo mu buyoye. Oloni kwasa kutukaluwila kulikuta busamba na Yesu. Bika bitwendekela ngoco?

2. Cuma muka ca kulibanga casa kutulingisa kutupwile kwakukalu kulikuta busamba na Yesu?

² Ca kulibanga, kanda tumoneho laja Yesu. Baka-Kilistu babangi ba mu simbu ya tupositolo nabo kubamwene Yesu. Nameme ngoco, kapositolo Petulu wendekele ngwendi: “Yeni mwamuzema nambe kumwamumwene, mwamukulahela, nambe ha simbu ino kumwamumwene.” (1 Petu 1:8) Ngeci, twasa kupwa babusamba ba Yesu nameme kanda tulimoneho laja nendi.

3. Cuma muka ca mu cibali cije casa kutulingisa kutukaluwile kulikuta busamba na Yesu?

³ Ca mu cibali, kutwasa kusimutwiya na Yesu. Mutukalombela, tukasimutwiya na Yehova. Tuzibuka ngwetu tukalombela mu lizina lya Yesu, oloni kutwesi kulomba kuli ikeye. Co Yesu nendi katondo ngwendi tulombe kuli ikeye. Mwafwa bika? Mwafwa kulombela kwapwa ngila imo itukalemeselamo  Yehova, co ikeye lika itunapande kulemesa. (Mateo 4:10) Nameme ngoco, twasa kuzema Yesu.

4. Cuma muka ca mu citatu cije citulingisa kutupwile kwakukalu kulikuta busamba na Yesu? Co bika bitusimutwiya muno mu cilongesa?

⁴ Ca mu citatu, Yesu wakala mwilu, co kutwasa kukala hamo nendi. Oloni twasa kumuzibuka mwamubwa nameme kutwatungile nendi. Tusimutwiya byuma biwana bitwasa kulinga mangana tukanyamese busamba bwetu nendi. Oloni tusimutwiyeni tahi bikwapwila kwa seho kukanyamesa busamba bwetu na Kilistu.

5. Mwafwa bika tunapande kulikuta busamba na Yesu? (Taleni lalo cipalo ca “ Kulikuta Busamba na Yesu, Kutulingisa Tulikute Busamba na Yehova.”)

⁵ Kulikuta busamba na Yesu kutulingisa tulikute busamba bwa kukanyama na Yehova. Bika bitwendekela ngoco? Tusimutwiyeniko ha byuma bibali. Ca kulibanga, Yesu walekele bandongesi bendi ngwendi: ‘Tate wamizema. Wamizema mwafwa mwazema yange.’ (Yowa 16:27) Wabalekele lalo ngwendi: ‘Naumo wahi aya kuli Tate kubanga etile muli yange.’ (Yowa 14:6) Munu uje alikuta busamba na Yehova simbu kanda alikute busamba na Yesu napu ngwe munu uje akobela mu njubo, oloni kakobelela ku cikolo. Yesu wapangesele cakumwenako cishaka kulifwa neci omwo walitumbwile ngwendi: “Yange cikolo ca bimanga.” (Yowa 10:7) Ca mu cibali, Yesu watembwininine mwamubwa bifwa bya Ishe. Walekele bandongesi bendi ngwendi: “Woshe uje nanjimono namono Tate.” (Yowa 14:9) Ngeci, twasa kuzibuka Yehova nga tulilongesa buyoye bwa Yesu. Omwo tulilongesa buyoye bwa Yesu,  co tumuzema manene. Nga tuzema manene Yesu, co tuzema manene Ishe.

6. Cuma muka cikwabo citulingisa tulikute busamba na Yesu? Lumbununeni.

⁶ Tunapande kulikuta busamba na Yesu mangana malombelo etu bawakumbulule. Oloni kuli byuma byabingi bitunapande kuzibuka keti kwendeka lika ngwetu, ‘mu lizina lya Yesu’ kumamaneselelo a lilombelo lyetu. Tunapande kuzibuka Yehova mwali na kupangesela Yesu mu kukumbulula malombelo etu. Yesu walekele tupositolo bendi ngwendi: “Njikalinga cuma coshe-coshe cije cimukalomba mu lizina lyange.” (Yowa 14:13) Yehova akatolilila ku malombelo etu na kuwakumbulula, oloni nzili ya kulinga bije byanangula kulinga nayana kuli Yesu. (Mateo 28:18) Ngeci, simbu kanda akumbulule malombelo etu, akabanga tahi kumona indi tunapangesa binangulo bya Yesu. Cakumwenako, Yesu wendekele ngwendi: “Nga musambesa bakweni ku milonga yabo, Ishweni ali mwilu akamisambesa neni lalo. Oloni nga kumusambesa bakweni ku milonga yabo, co Ishweni lalo kakamisambesa ku milonga yeni lalo.” (Mateo 6:14, 15) Ngeci, tunapande kulinga bakwetu ngwe mwali na kutulingila Yehova na Yesu.

7. Ndando ya kupatula ikwasa beya?

⁷ Ndando ya kupatula ikwasa baje balikuta busamba na Yesu. Bika bitwendekela ngoco? Yesu wendekele ngwendi ana mwonyo wendi mwafwa ya babusamba bendi. (Yowa 15:13) Banu ba kulongwa baje bayoyele simbu kanda Yesu aije hano hasi, nabo bakalilongesa byendi na kumuzema. Banu ba kufwa ngwe Abilahama, Sala, Mosesa, Lahabe na bakwabo, bakasanguka. Oloni banapande kukalikuta busamba na Yesu mangana bakawane mwonyo wa myaka yoshe.—Yowa 17:3; Vili 24:15; Heve 11:8-12, 24-26, 31.

8-9. Kwesekesa na Yowano 15:4, 5, kulikuta busamba na Yesu kutukwasa tulinge bika, co bika bikwapwila kwa seho?

⁸ Twabwahelela kupangela hamo na Yesu mu cipangi ca kwambulula na kulongesa banu muzimbu waubwa wa Bumwene bwa Njambi. Yesu mwakele hano hasi, wakele na kulongesa banu. Ha kupwa mutwe wa cikungulukilo, Yesu natwalelelaho kutwamenena cipangi ca kwambulula na kulongesa kushwa lika haililile mwilu. Co ali na kukandelela ku cipangi cimuli na kupanga ca kukwasa banu babangi bamuzibuke na kuzibuka Ishe. Yehova na Yesu bakebo bali na kutukwasa tupange eci cipangi.—Tandeni Yowano 15:4, 5.

⁹ Mbimbiliya inatumwesa ngwayo tunapande kutwalelelaho kuzema Yesu mangana tuzibise Yehova kubwaha. Tusimutwiyeni byuma biwana bitunapande kulinga bije bitukwasa tulikute busamba na Yesu.

10. Cuma muka ca kulibanga citunapande kulinga mangana tulikute busamba na Yesu?

¹⁰ (1) Tunapande kuzibuka Yesu. Twasa kulinga ngoco nga tutanda mukanda wa Mateo, Mako, Luka na Yowano. Kusinganyekesesa ha buyoye bwa Yesu buje bubanasoneka oku ku mikanda, kutukwasa tuzeme Yesu na kumusingimika, mwafwa kutukwasa tuzibuke mwayoyelele mwamubwa na banu. Cakumwenako, Yesu wapwa Mwene, oloni kamwene bandongesi bendi ngwe bindungo. Co wabalekele biyongola byendi nomu mwakele na kulizibila. (Yowa 15:15) Mubalizibile busiwa, nendi walizibile busiwa, co walilile nabo. (Yowa 11:32-36) Yesu wapwile kabusamba  ka baje batambwile muzimbu wendi, co bitozi bendi nabo bazibukile ngoco. (Mateo 11:19) Nga tutembwinina Yesu mwayoyelele na bandongesi bendi, co busamba bwetu na bakwetu bukanyama, co lalo tupwa ba kubwahelela. Kutundaho, busamba bwetu na Kilistu nabwo bukanyama.

11. Cuma muka ca mu cibali citunapande kulinga mangana tulikute busamba na Yesu, co mwafwa bika kunapu kwa seho kulinga ngoco?

¹¹ (2) Tembwinineni Yesu mu byuma bimusinganyeka nebi bimulinga. Nga tulinga mwoshe mutwasela kumona byuma ngwe mwabimwena Yesu, co busamba bwetu nendi bukanyama. (1 Koli 2:16) Twasa kutembwinina bati Yesu? Cakumwenako, Yesu wakele manene mbunge ku kukwasa bakwabo keti ku kulizibisa lika kubwaha ikeye babenya. (Mateo 20:28; Loma 15:1-3) Biyongola bya cifwa eci, byakwasele Yesu alyane kupangela bakwabo na kubasambesa. Kakele na kulubala bwasi omwo banu bakele na kumwendeka mwamubi. (Yowa 1:46, 47) Kayengwile banu mwafwa ya byuma byabibi bibalingile kunima embwe. (1 Tima 1:12-14) Yesu wendekele ngwendi: “Nga mulizema umo na mukwabo, asinoni boshe bakazibuka ngeci mu bandongesi bange.” (Yowa 13:35) Lihuleni ngweni, “Kuma njili na kulinga mwoshe munjasela kutembwinina Yesu mangana njiyoye mu kwoloka na bandolome na bandokazi bange ndi?”

12. Cuma muka ca mu citatu citunapande kulinga mangana tulikute busamba na Yesu, co twasa kucilinga bati?

¹² (3) Kwaseni bandolome ba Kilistu. Omwo tuli na kukwasa bakubwabesa, Yesu ali na kuliziba ngwe tuli na kukwasa ikeye. (Mateo 25:34-40) Ngila yakama itwasa kukwaselemo bakubwabesa inapu kupanga na nzili mu cipangi ca kwambulula na kupwisa banu bapwe bandongesi ngwe mwashikile Yesu. (Mateo 28:19, 20; Vili 10:42) “Bimanga beka” bali na kukwasa bandolome ba Kilistu mangana base kwambulwila mu kaye koshe. (Yowa 10:16) Nga mu bimanga beka, co zibukeni ngweni omwo mwambulula, mumwesa ngweni mwazema bakubwabesa hamolika na Yesu.

13. Twasa kupangesa bati cinangulo ca Yesu cije cili ku Luka 16:9?

¹³ Twasa kulikuta lalo busamba na Yehova na Yesu nga twana milambu mangana tukundwiye cipangi cabo. (Tandeni Luka 16:9.) Cakumwenako, twasa kwana milambu ya kukwasa mu cipangi ca mu kaye koshe. Eyi milambu ili na kukwasa mu cipangi ca kwambulula mangana muzimbu waubwa wete ku mitambela ya kulako. Co lalo ili na kukwasa mu cipangi ca kutunga na kubwahesa mitambela ya kulemesela na kukwasa baje banaliwana na bukalu bwa kulizila. Twasa kwana milambu mangana ikwase cikungulukilo cetu na kukwasa baje batumona ngwetu bali mu bujene. (Visi 19:17) Nga tulinga ngoco, co tukwasa bandolome ba Kilistu.

14. Kwesekesa na Efeso 4:15, 16, cuma muka ca mu ciwana citunapande kulinga mangana tulikute busamba na Yesu?

¹⁴ (4) Likwatasaneni na munga ya Yehova. Nga tulikwatasana na baje bali na kututwamenena mu cikungulukilo, co tukanyamesa busamba bwetu na Yesu uje wapwa mutwe wa cikungulukilo. (Tandeni Efeso 4:15, 16.) Cakumwenako, ano matangwa tushaka ngwetu banu babangi bapangese Binjubo bya Bumwene. Ngeci, bikungulukilo bimo banabipandakana, co lalo binginga bya bitingitingi bya kwambulwila banabitengulula. Oku kunalingisa munga itulike bimbongo  byabingi. Ngeci, baka-kwambulula bamo banatengulula biyongola byabo mangana bendelele noku kutenguluka. Bamo banakala mu cingulukilo cimo ha simbu yailaha, co lalo banalizilila na bandolome na bandokazi bomwo mu cikungulukilo. Oloni banabaleke ngwabo bajalukile ku cikungulukilo ceka. Yesu nabwahelela manene kumona aba bandolome na bandokazi bendelela noku kutenguluka.

15. Busamba bwetu na Yesu bukakanyama bati kulutwe?

¹⁵ Baje babanabwabesa na sipilitu ya kujela, bali na lilabelelo lya kukayula hamo na Yesu mu Bumwene bwa Njambi ku myaka yoshe. Bakakala hamo na Kilistu, bakamumona na kusimutwiya nendi. (Yowa 14:2, 3) Yesu akatwalelelaho kuzema baje bali na lilabelelo lya kuyoya hano hasi na kubaka mbunge. Nameme kubakamono Yesu, oloni busamba bwabo nendi bukakanyama omwo bakalikuwa mwonyo wa myaka yoshe uje wakabana Yehova na Yesu.—Isaya 9:6, 7.

16. Bibezikiso muka bituwana nga tulikuta busamba na Yesu?

¹⁶ Nga tulikuta busamba na Yesu, co tuwana bibezikiso byabingi. Cakumwenako, nameme ha simbu ino, Yesu atuzema na kutukwasa. Co lalo tukala na lilabelelo lya kukayoya myaka yoshe. Kutundaho, kulikuta busamba na Yesu kutulingisa tubezike manene, mwafwa tulikuta busamba bwa kukanyama na Ishe, Yehova. Twabezika manene kutusana babusamba ba Yesu.