ARTIKULO DIˈIB YAˈËXPËJKP 17
“Miitsëty ndijtë mëtnaymyaayëbëty”
“Miitsëty ndijtë mëtnaymyaayëbëty, mët ko të ndukˈixtë tëgekyë diˈibëts ja nDeety ëj të xytyukˈixy” (FWANK 15:15).
ËY 13 Nˈokpanëjkxëmë Kristë yˈijxpajtën
DIˈIB YAJNIMAYTYÄˈÄGÄÄMP *
1. ¿Ti tsojkëp xytyunët parë mnaymyaaybyëkëdët mët tuˈugë jäˈäy?
¿TI TSOJKËP xytyunët parë mnaymyaaybyëkëdët mët tuˈugë jäˈäy? Tsojkëp xyyajnaxtëdë tiempë, xynyigäjpx xynyimaytyäˈäktët ti mwinmääytyëp, wiˈix mnayjyawëdë ets wiˈix xyyajnaxtë mxëëw mdiempë. Per ko net nyaˈˈanmäˈäyëm parë nnaymyaˈayëm mëdë Jesus, mbäät nwinmäˈäyëm ko tsip duˈun nduˈunëm. Min nˈokˈijxëm tiko dyuˈunëty.
2. Oknimaytyäˈägë myëduˈuk pëkypyë tiko mbäät xytsyiptakxëm nnaymyaaybyëjkëm mëdë Jesus.
2 Tuk pëky, yëˈko kyaj nˈixyˈäjtëmë Jesus wingëjxm jëjpkëjxm. Mayë Dios mëduumbë diˈib mä primer siiglë nanduˈun wyinmääytyë, perë apostëlë Pedro yˈanmääyëdë: “Oy xykyaˈixtë ja Jesukristë, mtsojktëp miitsëty jaˈa; es oy yëˈë xykyaˈixtë, mmëbëjktëp miitsëty yëˈë” (1 Peed. 1:8). Extëm nˈijxëm, kyaj tyimjëjpˈamëty nˈixyˈäjtëmë Jesus wingëjxm jëjpkëjxm parë mëët nnaymyaˈayëm.
3. Oknimaytyäˈägë myëmajtsk pëkypyë tiko mbäät xytsyiptakxëm nnaymyaaybyëjkëm mëdë Jesus.
3 Myëmajtsk pëky, yëˈko kyaj mbäät mëdë Jesus ndimkäjpx ndimmaytyakëm. Pes ko nnuˈkxtakëm yëˈë nmëgäjpxëmë Jyobaa. Tëyˈäjtën ko nnuˈkxtakëm xyëëwgyëjxmë Jesus, per kyaj yëˈë nidëyë ndimmëgäjpxëm. Etsë Jesus kyaj ttsoky parë yëˈë nmënuˈkxtakëm. ¿Tiko? Yëˈko Jyobaa yëˈëyë diˈib mbäät nˈawdäjtëm, ets ko nnuˈkxtakëm, duˈunën ja tuk pëky nˈawdäjtëm (Mat. 4:10). Per mbäät nyajnigëxëˈkëm ko ntsojkëmë Jesus.
4. 1) Oknimaytyäˈägë myëdëgëk pëkypyë tiko mbäät xytsyiptakxëm nnaymyaaybyëjkëm mëdë Jesus. 2) ¿Ti nˈixäˈänëm mä tyäˈädë artikulo?
4 Myëdëgëk pëky, yëˈko kyaj mbäät mëdë Jesus nyajpatëm mët ko jam tsyëënë tsäjpotm. Perë oy mëët ngayajpatëm, mbäät mas niˈigyë nˈixyˈäjtëm. Mä tyäˈädë artikulo nˈixäˈänëm taxk pëky diˈib mbäät nduˈunëm parë nyajkëktëjkëmë naymyaayë mëdë Jesus. Per min jawyiin nˈokˈijxëm tiko jyëjpˈamëty jantsy oy nnaymyaˈayëm mëdë Jesus.
¿TIKO MBÄÄT NNAYMYAˈAYËM MËDË JESUS?
5. ¿Tiko mbäät nnaymyaˈayëm mëdë Jesus? (Ix nanduˈunë tyäˈädë majtskpë rekuäädrë, “ Ko nnaymyaaybyëjkëm mëdë Jesus, ta nanduˈun nnaymyayäˈänëm mëdë Jyobaa” ets “ Nˈokˈijxëmë Jesus extëm mbäät yaˈixy”).
5 Tsojkëp nnaymyaˈayëm mëdë Jesus parë oy nˈijtëm mëdë Jyobaa. ¿Tiko duˈun njënäˈänëm? Min nˈokˈijxëm majtsk pëky. Tuk pëky, yëˈë extëmë Jesus tˈanmääy ja yˈëxpëjkpëty: “Yëˈë Dios Teety mtsojkëdëp, mët kots ëj miits xytsyoktëts” (Fwank 16:27). Ta nanduˈun jyënany: “Nipën kyajäˈty mä Dios Teety pën kyajts ëj xymyëbeky” (Fwank 14:6). Kyaj mbäät nnaymyaˈayëm mëdë Jyobaa pën kyaj jawyiin nnaymyaaybyëjkëm mëdë Jesus, duˈun extëm ko ndëkëyäˈänëm mä tuˈugë tëjk, kuanë ko näjxëm mä ja tëjkˈääw. Jesus naa naduˈundëkë tpëjtaky tuˈugë ijxpajtën, ko jyënany ko yëˈë duˈun “extëm ja korral ää mä nyaxtë ja borreegë” (Fwank 10:7). Myëmajtsk pëky, yëˈë ko Jesus yajnigëxëˈk yajxon wiˈixë Tyeety jyaˈayˈaty. Duˈun tˈanmääy ja yˈëxpëjkpëty: “Diˈibëts ëj xyˈixyˈäjtp, yˈixyˈajtypy nandëˈën ja Dios Teety” (Fwank 14:9). Pääty, tuk pëky wiˈix mbäät nˈixyˈäjtëmë Jyobaa, yëˈë ko nˈixyˈäjtëmë Jesus. Ko mas niˈigyë nnijäˈäwëm tijaty mä Jesus, ta mas niˈigyë ntsokäˈänëm. Ets ko mas niˈigyë nmëwingoˈonëmë Jesus, ta mas niˈigyë ntsokäˈänëmë Tyeety.
6. Oknimaytyäˈäk ja tuk pëky tiko jyëjpˈamëty nnaymyaˈayëm mëdë Jesus.
6 Tsojkpë nmëtnaymyaayëbëˈäjtëmë Jesus parë yaˈˈatsoowëmbitët ja nnuˈkxtakën. Extëm nˈokpëjtakëm, ko nnuˈkxtaktäˈäyëm, ta njënäˈänëm “xyëëwgyëjxmë Jesus”, per kyaj jeˈeyë tsyokyëty duˈun njënäˈänëm wingëˈëy agëˈëy. Tsojkëbën njaygyujkëm wiˈixë Jyobaa dyajtunyë Jesus parë tˈatsoowëmbity ja nnuˈkxtakënˈäjtëm. Jesus duˈun tˈanmääy ja yˈapostëlëty: “Ëj ndunëpts diˈibëts miits xyˈamdoodëp mët ko xymyëbëktëts” (Fwank 14:13). Jyobaa yëˈë diˈib myëdoowˈijtypy ets yˈatsoowëmbijtypy ja nuˈkxtakën, per yëˈë të tkutujkënmyoˈoy ja yˈUˈunk parë ttuktuny ti yëˈë tyuknibëjtakëp (Mat. 28:18). Mä tkaˈˈatsoowëmbitynyëm ja nuˈkxtakën, jawyiin tˈixy pën të nbanëjkxëmë käjpxwijën diˈibë Jesus yäjk. Extëm nˈokpëjtakëm, Jesus jyënany: “Pën miits mmaˈxtëp ja diˈibaty mduunëdëp axëëk, yëˈë mDeetyë tsäjpotmëdë mmaˈxëdëp miitsëty nandëˈën. Per pën kyaj xymyaˈxtë diˈibë mduunëdëp axëëk, yëˈë mDeetyë tsäjpotmëdë nan kyaj mmaˈxëdët ja mbojpë” (Mat. 6:14, 15). ¿Këdii jëjpˈam ets nˈoyjyaˈaytyakëm mëdë nmëguˈukˈäjtëm duˈun extëmë Jyobaa mëdë Jesus yˈoyjyaˈaytyäˈäktë mët ëtsäjtëm?
7. ¿Ti tsojkëp nduˈunëm parë ndukˈoyˈäjtëm ko Jesus ojts xykyuˈoˈkëm?
7 Yëˈëyë pënaty oy naymyaayëdëp mëdë Jesus tyukˈoyˈatandëp ko ojts xyjuuybyëtsëˈëmëm. ¿Wiˈix nnijäˈäwëm? Jaˈko Jesus jyënany ko “kyuˈoogëp ja myëtnaymyaayëbëty” (Fwank 15:13). Ja Dios mëduumbëty diˈib jukyˈäjttë mä kyaminynyëmë Jesus, nëjkxëp nanduˈun tˈixyˈattë ets ttsoktë. Abrahán, Sara, Moisés etsë Rahab diˈib jukyˈäjttë tëyˈäjtën myëët nëjkxëp jatëgok jyukypyëktë, per net nëjkx mbäät jyukyˈattë xëmëkyëjxm pën naymyaaybyëjkëdëp mëdë Jesus (Fwank 17:3; Apos. 24:15; Eb. 11:8-12, 24-26, 31).
8, 9. Extëm jyënaˈanyë Fwank 15:4, 5, ¿ti nëjkx nduˈunëm pën nnaymyaˈayëm mëdë Jesus, ets tiko jyëjpˈamëty ntsojkëm?
8 Agujk jotkujk nnayjyäˈäwëm ko nduˈunëm mëdë Jesus mä nˈëwäˈkx ngäjpxwäˈkxëm ets ndukniˈˈijxëmë jäˈäy ja Diosë yˈAnaˈam Kyutujkën. Ko Jesus jyukyˈajty yä Naxwiiny, tukniˈˈijxë ja tëyˈäjtën mä pënën Dios. Ets desde ko jyëmbijty tsäjpotm, tnigëbäjkˈatyë Diosë kyäjpn parë xynyëˈëmoˈoy xytyuˈumoˈoyëm mä nduˈunëmë tyäˈädë tuunk. Jesus yˈijxypy ets yajtsobatypy ja jot mëjääw diˈib nbëjtakëm parë nbudëjkëmë jäˈäy nuˈun ndimpatëm parë yˈixyˈatëdët ets nanduˈun yaˈixyˈatët ja Tyeety. Tyäˈädë tuunk net mbäät nduˈunëm pën xypyudëjkëmë Jyobaa mëdë Jesus (käjpxë Fwank 15:4, 5).
9 Biiblyë yajxon xytyukniˈˈijxëm ko jëjpˈam ntsojkëmë Jesus pën nyajjotkujkˈatäˈänëmë Jyobaa. Pääty, min nˈokˈijxëm taxk pëky wiˈix mbäät nmëtnaymyaayëbëˈäjtëmë Jesus.
¿WIˈIX MBÄÄT NMËTNAYMYAAYËBËˈÄJTËMË JESUS?
Mbäät nmëtnaymyaayëbëˈäjtëmë Jesus 1) ko yajxon nˈixyˈäjtëm, 2) ko nwinmäˈäyëm ets nduˈunëm tijaty extëm yëˈë, 3) ko nbudëjkëm ja myëgaˈaxëty ets 4) ko ngupëjkëm tijaty yajtukniwijtsëp mä Diosë kyäjpn. (Ixë parrafo 10 axtë 14) *.
10. ¿Ti tuk pëky mbäät nduˈunëm parë nmëtnaymyaayëbëˈäjtëmë Jesus?
10 Myëduk pëky, ko nˈixyˈäjtëmë Jesus. Parë mbäät nˈixyˈäjtëm, tsojkëp ngäjpxëmë Matewʉ, Markʉs, Lukʉs etsë Fwank. Ko nbawinmäˈäyëm wiˈix jap yajmaytyaˈaky jyukyˈajtyë Jesus ets ko nˈijxëm wiˈix yˈoyjyaˈaytyaky mët ja jäˈäyëty, ta ntsokäˈänëm ets nwingutsëˈëgëyäˈänëm. Extëm nˈokpëjtakëm, Jesus kyaj tˈijxy ja yˈëxpëjkpëty extëmë tuumbë mosë, oyë nety yëˈë jyaWintsënˈatëdë. Duˈunën tˈijxy extëm ja myëtnaymyaayëbëty, tyuknijäˈäwëtyaay ti nety wyinmaapy ets yaˈˈawats ja jyot kyorasoon (Fwank 15:15). Jyäˈäwë nanduˈun ja jäj jëmuˈumën diˈib yajnäjxtë ets pyujëˈëy pyuyaxëdë (Fwank 11:32-36). Axtë ja myëtsip pyëjktë kuentë ko myëtnaymyaayëbëˈäjtypy pënaty kyupëjktëp ja Diosë yˈayuk (Mat. 11:19). Ko njäˈäyˈäjtëm extëmë Jesus jyaˈayˈajty mët ja yˈëxpëjkpëty, ta nëjkx oy nˈijtëm mëdë nmëguˈukˈäjtëm, mas agujk jotkujk nnayjyawëyäˈänëm, ntsokäˈänëmë Jesus ets mas niˈigyë nwingutsëˈëgëyäˈänëm.
11. ¿Ti myëmajtsk pëky mbäät nduˈunëm parë nmëtnaymyaayëbëˈäjtëmë Jesus, ets tiko jyëjpˈamëty?
11 Myëmajtsk pëky, nˈokwinmäˈäyëm ets nˈoktuˈunëm tijaty extëmë Jesus. Ko yajxon nˈixyˈäjtëm ets ko nanduˈun nwinmäˈäyëm extëm yëˈë, ta mas niˈigyë mëët nnaymyaaybyëkäˈänëm (1 Kor. 2:16). ¿Wiˈix mbäät njäˈäyˈäjtëm extëmë Jesus? Min nˈokˈijxëm tuˈugë ijxpajtën. Jesus yëˈëyë ojts tmëmay tmëdäjy wiˈix mbäät tˈokpudëkë wiink jäˈäy ets kyaj këˈëm nyaymyëmääy nyaymyëdäjë (Mat. 20:28; Rom. 15:1-3). Ets kom duˈun jyaˈayˈajty, pääty dyojxy ja jyot myëjääw parë tpudëjkë jäˈäy ets pyokymyaˈkx pënaty mëdëgooyëdë. Nan kyaj pojën dyajpojky oy wixatyë jäˈäy jyënandë (Fwank 1:46, 47). Ets nan kyaj pën ttukwinmëdooy ti nety të ttuundëgoytyë mä tkanijawëdënëm ja tëyˈäjtën (1 Tim. 1:12-14). Tsojkëp nbanëjkxëmë Jesus yˈijxpajtën, pes yëˈë jyënaˈany: “Pën mnaytsyojkëdëp miitsëty nixim niyam, net nidëgekyë ja jäˈäy tnijawëdët kots ëj miits nˈëxpëjkpëˈattë” (Fwank 13:35). Pääty, nˈoknayajtëˈëwëm: “¿Nduumbyëtsë mëjääw extëmë Jesus parëts oy nˈity mëdëtsë nmëguˈuktëjk?”.
12. ¿Ti myëdëgëk pëky mbäät nduˈunëm parë nmëtnaymyaayëbëˈäjtëmë Jesus, ets wiˈix mbäät nduˈunëm?
12 Myëdëgëk pëky, nˈokpudëjkëm ja Kristë myëgaˈaxëty. Ko nbudëjkëm ja myëgaˈaxëty diˈib nëjkxandëp tsäjpotm duˈun tjawë extëmxyëp yëˈë nbudëjkëm (Mat. 25:34-40). Tuk pëky wiˈix mbäät nbudëjkëm, yëˈë ko njotmoˈoyëm ja tuunk diˈibë Jesus tyuknipëjk ja yˈëxpëjkpëty: tˈëwäˈkx tkäjpxwäˈkxtët ja Diosë yˈAnaˈam Kyutujkën ets dyaˈëxpëktëdë jäˈäy (Mat. 28:19, 20; Apos. 10:42). Ninuˈun njukyˈatäˈänëm yä Naxwiiny, jëjpˈam ets nbudëjkëm ja Kristë myëgaˈaxëty parë mbäät dyaˈˈabëtsëmdë mä yaˈëwaˈkxy yajkäjpxwaˈkxy ja Diosë yˈayuk (Fwank 10:16). Ets tëgok tëgok nëjkxëm ëwäˈkx käjpxwäˈkxpë ets nyaˈëxpëjkëmë jäˈäy, ja mä nyajnigëxëˈkëm ko ntsojkëmë Jesus ets ja myëguˈuktëjk diˈib jukyˈatandëp tsäjpotm.
13. ¿Wiˈix mbäät nguytyuˈunëmë käjpxwijën diˈibë Jesus yäjk mä Lucas 16:9?
13 Nan mbäät nnaymyaaybyëjkëm mëdë Jyobaa etsë Jesus ko nyajtuˈunëm ja meeny sentääbë mä tyam dyajnëˈëyoˈoy dyajtuˈuyoˈoytyë ja tuunk (käjpxë Lucas 16:9, TNM). * Extëm nˈokpëjtakëm, mbäät nyäjkëmë meeny sentääbë parë yajtunëdë Diosë tyuunk abëtsemy nyaxwinyëdë, duˈun mä yaˈëwaˈkxy yajkäjpxwaˈkxy ja oybyë ayuk mä it lugäärë nidëkëbë, mä yajkojy o mä yˈaˈoyë jëën tëjk mä mbäät nˈawdäjtëmë Dios ets nanduˈun parë nbudëjkëm ja nmëguˈukˈäjtëm mä tijaty të yˈayoˈonbëjtaˈaky. Nan mbäät nnayäjkëmë meeny sentääbë mä nduˈukmujkëm ets nbudëjkëm ja nmëguˈukˈäjtëm diˈib yajtëgoyˈäjttëbë naybyudëkë (Prov. 19:17). Ko wiˈixëm nyäjkëmë naybyudëkë, nan yëˈë nety nbudëjkëm ja Kristë myëgaˈaxëty.
14. Extëm jyënaˈanyë Éfesʉ 4:15, 16, ¿ti myëmäjtaxk pëky mbäät nduˈunëm parë nmëtnaymyaayëbëˈäjtëmë Jesus?
14 Myëmäjtaxk pëky, nˈokkupëjkëm tijaty yajtukniwijtsëp mä Diosë kyäjpn. Mas niˈigyë nnaymyaaybyëkäˈänëm mëdë Jesus, diˈib nyigëbäjkˈäjtypyë tuˈukmujkën, ko nmëmëdoˈowëm pënaty të yajtuknipëktë xyˈijxˈijt xykyuentˈäjtëm tsuj yajxon (käjpxë Éfesʉ 4:15, 16). Extëm nˈokpëjtakëm, Diosë kyäjpn tsyojkypy ets yajxon tyuunkpäädët ja tëjk mäjaty nˈëxpëjkëm. Pääty të yaˈˈawijtsmuky näägë tuˈukmujkën ets të yajtukniwitsë mäjaty yˈëwäˈkx kyäjpxwäˈkxtët. Duˈuntsoo, të nyitsoˈoky mayë meeny sentääbë diˈib të yajˈyaky parë Diosë kyäjpn. Per kuanë ko net näägë nmëguˈukˈäjtëm të tˈijxwëˈëmdë ko duˈun të yajtuny, pes waˈanë nety nääk japyëm yoˈoynyëdë atsux kanäk jëmëjt ets të tmëyujnëdë ja myëguˈuktëjk. Per ta net të yaˈˈanëëmëdë parë yoˈoytyët mä wiinkpë tuˈukmujkën. Mëjwiin kajaa xyondaˈagyë Jesus ko tyäˈädë nmëguˈukˈäjtëm yˈëygyupëk kyajpxykyupëktë.
MBÄÄT NMËTNAYMYAAYËBËˈÄJTËMË JESUS WINË XËËW WINË TIEMPË
15. ¿Wiˈix nnaymyayäˈänëm mëdë Jesus mä tiempë myiny kyëdaˈaky?
15 Pënaty të yajwinˈixtë mëdë espiritë santë, jam tsäjpotm tyunäˈändë rey mëdë Jesus mä ja Diosë yˈAnaˈam Kyutujkën. Yëˈëjëty, yˈixandëbë Jesus, käjpxan maytyäˈägandëp mëët ets yajnaxandëp mëdë tiempë (Fwank 14:2, 3). Ets pënaty jukyˈatandëp yä Naxwiiny, nan tsokanëdëbë Jesus ets ijxˈitan kuentˈatanëdëp. Ets oy tkaˈixäˈändë, niˈigyë mëët nyaymyaaybyëkäˈänëdë ko nety ttukxondäˈäktë ja jukyˈäjtën diˈibë Jyobaa mëdë Jesus të myoˈoyëdë (Is. 9:6, 7).
16. ¿Tijaty kunuˈkxën nˈaxäjëm ko nmëtnaymyaayëbëˈäjtëmë Jesus?
16 Mëjwiin kajaa nˈaxäjëyäˈänëmë kunuˈkxën ko ngupëjkëmë Jesus extëmë mëtnaymyaayëbë. Extëm nˈokpëjtakëm, xytsyojkëm ets xypyudëjkëm tyam. Nan nˈawijx njëjpˈijxëm njukyˈatäˈänëm winë xëëw winë tiempë. Per diˈib mëjwiin kajaa nganaratäˈänëm ko nnaymyaˈayëm mëdë Jesus, yëˈë ko nanduˈun nnaymyayäˈänëm mëdë Teety, Jyobaa. Extëm nˈijxëm, ¡nitii duˈun kyaˈoyëty extëm ko nmëtnaymyaayëbëˈäjtëmë Jesus!
ËY 17 Jesus tsyojkë jäˈäy
^ parr. 5 Ja apostëlëtëjk yajnäjxtë xyëëw tiempë majtsk jëmëjt tëgëk jëmëjt mëdë Jesus, käjpx maytyaktë mëët, tyuundë tijaty, ets nnaymyaaybyëjkëdë mëët jantsy oy. Per ëtsäjtëm mbäät xytsyiptakxëm nnaymyaˈayëm mëdë Jesus, per yëˈë tsyojkypy ets nanduˈun mëët nnaymyaˈayëm. Mä tyäˈädë artikulo nˈixäˈänëm tiko mbäät xytsyiptakxëm, ets yajtukˈawanëyäˈänëm wiˈix mbäät mëët nnaymyaˈayëm ets duˈunyëm mët oy nˈijtëm.
^ parr. 13 Lucas 16:9, TNM: “Nan nˈanmääytyëp miitsëty: Päättë mëtnaymyaayëbëty mët yëˈëgyëjxm ja mëkjäˈäyˈäjtën diˈib yä naxwiiny, net ko kyëx nyaxët, yëˈëjëty mbäät mgupëkëdë mä tsënääytyaknë winë xëëbë”.
^ parr. 56 YAJNIMAYTYAˈAGYË DIBUJË: 1) Ko nDiosˈawdäjtëm tuk familyë, mbäät nˈëxpëjkëm wiˈixë Jesus jyukyˈajty ets wiˈix Dios mëduuny. 2) Ets mä nduˈukmujkëm, mbäät nduˈunëmë mëjääw parë oy nˈijtëm mëdë nmëguˈukˈäjtëm. 3) Ko njotmoˈoyëm mä nˈëwäˈkx ngäjpxwäˈkxëm, duˈunë nety nbudëjkëm ja Jesusë myëgaˈaxëty. 4) Ets ko ja tuˈukmujkën yaˈˈawijtsmuky, ta nˈëygyupëjk ngajpxykyupëjkëm ja mëjjäˈäytyëjk.
