1. Ewi wãween am̦ ejaak juon jem̦jerã epaak ippãn juon armej?

BWE kwõn ejaak juon jem̦jerã epaak ippãn juon armej, m̦oktata ekkã am̦ aikuj jol̦o̦k iien ippãn. Ilo amiro bwebwenato ippãn doon im kwal̦o̦k l̦õmn̦ak ko amiro im kõn wãween ko rar wal̦o̦k ilo mour ko amiro, komiro ej jino m̦õttãik doon. Bõtab, ñe ej itok ñan ad ejaak juon jem̦jerã epaak ippãn Jesus, ewõr apañ ko jej jelm̦aiki. Ta jet iaaer?

2. Ta apañ eo kein kajuon jej jelm̦aiki?

² Apañ eo kein kajuon ej bwe jejjañin iioone Jesus. Elõñ Kũrjin ro ilo tõre ko an rijjilõk ro rar iioon ejja apañ in wõt. Meñe ãindein, rijjilõk Piter ear ba: “Meñe kom̦ar jab lo e, ak kom̦ij yokwe e. Meñe kom̦ij jab loe kiiõ ak kom̦ij kwal̦o̦k ami tõmak ilo e.” (1 Pit. 1:8) Kõn men in, jej lo bwe jemaroñ ejaak juon jem̦jerã epaak ippãn Jesus meñe jejjañin iioone.

3. Ta apañ eo kein karuo jej jelm̦aiki?

³ Apañ eo kein karuo ej bwe jejjab maroñ kõnono ippãn Jesus. Ñe jej jar, jej kwal̦o̦k l̦õmn̦ak ko ad ñan Jeova. Em̦ool bwe jej jar ilo etan Jesus, bõtab jejjab kajju kõnonol̦o̦k ñane. Ilo m̦ool, Jesus ejjab kõn̦aan bwe jen jar ñan e. Etke? Ej kõnke jar ej m̦õttan ad kabuñ, im jej aikuj kabuñ ñan Jeova wõt. (Matu 4:10) Ijoke, jemaroñ kwal̦o̦k wõt bwe jej yokwe Jesus.

4. Ta apañ eo kein kajilu, im ta ko jenaaj etali ilo katak in?

 ⁴ Apañ eo kein kajilu ej bwe Jesus ej jokwe ilañ, kõn men in jejjab maroñ jol̦o̦k iien ippãn. Meñe ãindein, ak elõñ men ko jemaroñ katak wõt kõn Jesus meñe jejjab pãd iturin. Jenaaj etale emãn men ko jemaroñ kõm̦m̦ani me renaaj kõkajoore jem̦jerã eo ad ippãn. Bõtab, m̦okta jen etale unin an lukkuun aorõk bwe jen ejaake juon jem̦jerã epaak ippãn Christ.

5. Etke jej aikuj jem̦jerãiki Jesus? (Bar lale bo̦o̦k ko “ Jem̦jerã Ippãn Jesus Ej Tõll̦o̦k ñan Juon Jem̦jerã Ippãn Jeova” im “ L̦õmn̦ak eo Ejim̦we kõn Jerbal eo an Jesus.”)

⁵ Jej aikuj jem̦jerãik Jesus el̦aññe jekõn̦aan bwe en wõr ad jem̦jerã epaak ippãn Jeova. Etke em̦ool men in? L̦õmn̦ak kõn ruo wõt iaan un ko. Un eo kein kajuon, Jesus ear ba ñan rijjilõk ro an im ba: “Jema make ej yokwe kom̦ kõn ami kar yokwe eõ.” (Jon 16:27) Ear bar ba: “Ejjel̦o̦k en̦ ej ilo̦k ñan ippãn Jema el̦aññe ejjab kõn ña.” (Jon 14:6) Ñe jej kajjioñ ejaak juon jem̦jerã ippãn Jeova bõtab jejjab ejaak juon jem̦jerã epaak ippãn Jesus, ej ãinwõt ñe jej kajjioñ del̦o̦ñ ilo juon em̦ ak jejjab kõjerbale kõjãm in del̦o̦ñ eo. Jesus ear kõjerbal juon waanjoñak ãinl̦o̦k wõt men in ke ear kwal̦o̦k kõn e make im ba bwe ej ãinwõt “kõjãm eo an jiip ko.” (Jon 10:7) Un eo kein karuo ej bwe ear jejjet im jim̦we wãween an kar Jesus anõke kadkad ko kadkadin Jemãn. Ear ba ñan ri-kal̦oor ro an im ba: “Jabdewõt eo em̦õj an lo ña, em̦õj an bar lo Jema.” (Jon 14:9) Innem, juon wãween eaorõk bwe jen maroñ jel̦ã kajjien Jeova ej ilo ad katak kõn mour eo an Jesus. Ilo ad katak kõn Jesus, yokwe eo ad ñan e  enaaj eddekl̦o̦k. Im ilo an epaakl̦o̦k jem̦jerã eo ad ippãn Jesus, enaaj l̦apl̦o̦k yokwe eo ad ñan Jemãn.

6. Ta un eo juon unin an aikuj wõr ad jem̦jerã ippãn Jesus? Jouj im kõmel̦el̦e.

⁶ Ej aikuj wõr ad jem̦jerã ippãn Jesus bwe jen maroñ lo uwaakin jar ko ad. Mel̦el̦ein bwe ewõr men ko jej aikuj in bar kõm̦m̦ane ijello̦kun ad baj ba wõt naan kein “ilo etan Jesus” ãlikin ad jar ãinwõt juon imminene. Jej aikuj kile ewi wãween an Jeova kõjerbale Jesus ñan uwaaki jar ko ad. Jesus ear ba ñan rijjilõk ro im ba: “Jabdewõt men ko kom̦ij kajjitõk kaki ilo eta, inaaj kõm̦m̦ani.” (Jon 14:13) Meñe Jeova ej eo me ej roñjake im uwaaki jar ko ad, bõtab em̦õj an lel̦o̦k maroñ eo ñan Jesus bwe en kajejjeti pepe ko An. (Matu 28:18) Bõtab, m̦okta jãn an Anij uwaaki jar ko ad, ej lale el̦aññe em̦õj ad jerbale naanin jiroñ eo Jesus ear letok. Ñan waanjoñak, Jesus ear ba: “El̦aññe kom̦ij jol̦o̦k bõd ko an ro jet, Jememiwõj ilañ enaaj jol̦o̦k bõd ko ami. Bõtab ñe kom̦ij jab jol̦o̦k bõd ko an ro jet, Jememiwõj ilañ eban jol̦o̦k bõd ko ami.” (Matu 6:14, 15) Innem, jej lo joñan an aorõk bwe jen kõm̦m̦an ñan ro jet ãinwõt an Jeova im Jesus jouj ilo aer kõm̦m̦an ñan kõj!

7. Wõn ro rej bõk tokjãn jãn katok in mour eo an Jesus?

⁷ Ro wõt me epaak jem̦jerã eo aer ippãn Jesus renaaj bõk tokjãn jãn katok in mour eo an. Etke jejel̦ã men in? Jesus ear ba bwe enaaj “lel̦o̦k mour eo an kõn ro jeran.” (Jon 15:13) Armej ro retiljek me rar mour m̦okta jãn an kar Jesus itok ñan lal̦ in renaaj aikuj katak kõn e im renaaj aikuj bar yokwe e. Em̦m̦aan im kõrã ro ãinwõt Ebream, Sera, Moses, im Rehab renaaj jerkakpeje, bõtab meñe rej ri-karejar ro an Jeova rewãnõk ak renaaj aikuj ejaak juon jem̦jerã ippãn Jesus bwe ren maroñ bõk mour indeeo.​—Jon 17:3; Jrb. 24:15; Hib. 11:8-12, 24-26, 31.

8-9. Ta eo jemaroñ kõm̦m̦ane el̦aññe jej jem̦jerãiki Jesus, im etke eaorõk men in, ãinwõt an Jon 15:4, 5 kwal̦o̦k kake?

⁸ Ewõr ippãd jeraam̦m̦an eo ñan jerbal ippãn Jesus ilo ad kwal̦o̦k naan im katakin kõn ennaan eo em̦m̦an kõn Aelõñ eo. Ke Jesus ear pãd ioon lal̦, ear juon eo me ear katakin armej. Im jãn tõre eo ear jepl̦aak ñan lañ, Jesus, eo ej bõran eklejia eo, ej wõnm̦aanl̦o̦k wõt im tõl jerbalin kwal̦o̦k naan eo im ad katakin. Ej loe im ej kam̦m̦oolol eok kõn am̦ kate eok jipañ elõñ armej ro joñan wõt am̦ maroñ ñan jel̦ã kõn e im Jemãn. Ilo m̦ool, wãween eo wõt jemaroñ kajejjete jerbal in ej ikijjeen jipañ eo jãn Jeova im Jesus.​—Riit Jon 15:4, 5.

⁹ Naanin Anij ej kaalikkar ñan kõj bwe jej aikuj yokwe Jesus bwe jen maroñ kabuñbũruon Jeova im jej aikuj wõnm̦aanl̦o̦k wõt im dãpij wõt yokwe in. Kõn men in, jen etale emãn men ko jemaroñ kõm̦m̦ani bwe jen erom ro jeran Jesus.

10. Ta buñtõn ne eo m̦oktata jej aikuj kõm̦m̦ane bwe jen kalõk juon jem̦jerã ippãn Jesus?

¹⁰ (1) Kal̦apl̦o̦k am̦ jel̦ã kajjien Jesus. Jemaroñ kõm̦m̦ane men in ilo ad riiti bokin Matu, Mark, Luk, im Jon. Ilo ad kõl̦mãnl̦o̦kjen̦ kõn bwebwenato ko kõn mour eo an Jesus ilo Baibõl̦, jenaaj jino yokwe im kautiej Jesus kõn an kar jouj ilo wãween an kar kõm̦m̦an ñan armej ro. Ñan waanjoñak, meñe ear Irooj eo aer, ak ear jab kõm̦m̦an ñan er ãinwõt ñe rej an ri-kõm̦akoko. Ijello̦kun an kar ãindein, ear kwal̦o̦k bũruon im wãween an eñjake ñan er. (Jon 15:15) Jesus  ear bũrom̦õj ippãer im ear jañ ippãer. (Jon 11:32-36) Ri-jum̦ae ro rar bar kile bwe ear jerãik ro rar eo̦roñe ennaan eo an. (Matu 11:19) Ñe jej anõke Jesus ilo wãween an kar kõm̦m̦an ñan ri-kal̦oor ro an, enaaj em̦m̦anl̦o̦k kõtaan eo ad ippãn ro jet, enaaj l̦apl̦o̦k ad jokwane im m̦õn̦õn̦õ, im enaaj l̦apl̦o̦k ad yokwe im kautiej Christ.

11. Ta buñtõn ne eo kein karuo jej aikuj kõm̦m̦ane ñan erom jeran Jesus, im etke eaorõk buñtõn ne in?

¹¹ (2) Anõke wãween an Jesus l̦õmn̦ak im kõm̦m̦an. Ñe el̦apl̦o̦k ad jel̦ã im anõke wãween an l̦õmn̦ak, enaaj epaakl̦o̦k jem̦jerã eo ad ippãn. (1 Kor. 2:16) Ewi wãween ad maroñ anõke Jesus? L̦õmn̦ak kõn juon waanjoñak. El̦apl̦o̦k an kar Jesus l̦õmn̦ak ñan an jipañ ro jet jãn an kabuñbũruon e make. (Matu 20:28; Rom 15:1-3) Kõnke eñin wãween an kar l̦õmn̦ak, ear jel̦ã kaarmejjeteik e make im ear jel̦ã jeorl̦o̦k an ro jet bõd. Ear jab m̦õkaj im illu kõn men ko armej ro rar ba kõn e. (Jon 1:46, 47) Im ear jab kõtl̦o̦k bwe bõd eo an juon armej me ear kõm̦m̦ane jem̦aan, en jelõt wãween an watõk im kõm̦m̦an ñan armej eo. (1 Tim. 1:12-14) Jesus ear ba: “El̦aññe kom̦ij yokwe doon, innem aolep renaaj jel̦ã bwe kom̦ij ri-kal̦oora.” (Jon 13:35) Kwõn kajitũkini eok make, “Ij ke l̦oore joñak eo an Jesus ilo aõ kõmaat joñan aõ maroñ ñan kõm̦m̦an wõt aenõm̦m̦an ippãn ro jeiũ im jatũ?”

12. Ta buñtõn ne eo kein kajilu jej aikuj kõm̦m̦ane ñan erom jeran Jesus, im ewi wãween ad maroñ kõm̦m̦ane buñtõn ne in?

¹² (3) Rejetake ro jatin Christ. Jesus ej watõk men ko jej kõm̦m̦ani ñan rũkkapit ro jatin ãinwõt ñe jej kõm̦m̦ane ñan e. (Matu 25:34-40) Wãween eo el̦aptata jej rejetake rũkkapit ro ej ilo ad kõmaat joñan ad maroñ im bõk kun̦aad ilo ad kõm̦m̦ane jerbal eo Jesus ear jiroñ ri-kal̦oor ro an ñan kõm̦m̦ane, eñin ej jerbalin kwal̦o̦k naan im jerbalin kõm̦m̦an ri-kal̦oor. (Matu 28:19, 20; Jrb. 10:42) Ikijjeen wõt jipañ eo jãn jiip ro jet, rein jatin Christ remaroñ kajejjete jerbalin kwal̦o̦k naan eo me ej wal̦o̦k ipel̦aakin lal̦ in. (Jon 10:16) Ñe kwõj juon iaan jiip ro jet, kajjojo iien kwõj bõk kun̦aam ilo jerbal in, kwõjjab kwal̦o̦k wõt yokwe eo am̦ ñan rũkkapit ro ak kwõj bareinwõt kwal̦o̦k yokwe eo am̦ ñan Jesus.

13. Ewi wãween ad maroñ jerbale naanin jiroñ eo an Jesus ilo Luk 16:9?

¹³ Jej bareinwõt kõm̦m̦an bwe jen maroñ jem̦jerãik Jeova im Jesus ilo ad jabawõt ñan rejetake jerbal eo rej tõle. (Riit Luk 16:9.) Ñan waanjoñak, jemaroñ jabawõt ñan jerbal ko an doulul in ilo pel̦aakin lal̦ in, jerbal kein rej kitibuj jerbalin kwal̦o̦k naan ilo jikin ko rettol̦o̦k, jerbalin ekkal im aer kõm̦m̦ani jerbal ko ñan kõjparok jikin ko jej kõjerbali ñan rejetake kabuñ eo em̦ool, im ñan bar jipañ ro rej jokwe ilo jikin ko ear wõr juon l̦añ el̦ap ak juon jorrããn el̦ap ie. Jemaroñ bar jabawõt ñan rejetake eklejia eo ad make im jipañ ro jejel̦ã kajjier me rej pãd ilo aikuj. (JK. 19:17) Erkein wãween ko jemaroñ rejetake ro jatin Christ.

14. Ãinwõt an kwal̦o̦k ilo Epesõs 4:15, 16, ta buñtõn ne eo kein keemãn jej aikuj kõm̦m̦ane ñan ad maroñ erom jeran Jesus?

¹⁴ (4) Rejetake karõk ko an doulul in an Jeova. Jej kõkajoore kõtaan eo ad ippãn Jesus eo ej bõran eklejia eo, ñe jej jerbal ippãn ro em̦õj jitõñ er ñan lale kõj. (Riit Epesõs 4:15, 16.) Ñan waanjoñak, jej kiiõ kõm̦m̦an bwe jen lukkuun kortokjãn wãween ad kõjerbali aolep Im̦õn Kweilo̦k ko. Eñin unin kar karõk bwe jet eklejia ren kobal̦o̦k ippãn eklejia ko jet im rar kõm̦m̦an oktak  ikijjeen wãween aer naaj jerbali teretore ko. Karõk in el̦ap an kar jipañ kõjparok jããn ko rej itok jãn jabawõt ko. Ijoke, kõn karõk in ekããl, ear wõr jet ri-kwal̦o̦k naan ro rar aikuj kõm̦m̦an ukoktak. Ri-kwal̦o̦k naan rein retiljek remaroñ kar pãd ilo juon eklejia ium̦win elõñ iiõ im remaroñ kar lukkuun epaake ro jeid im jatid ilo eklejia eo. Bõtab, kiiõ em̦õj kajjitõk ippãer bwe ren jerbal ilo juon bar eklejia. Ejjel̦o̦k pere ebuñbũruon Jesus ilo an loe an ri-kal̦oor rein retiljek l̦oore karõk in!

15. Ewi wãween an naaj em̦m̦anl̦o̦k jem̦jerã eo ad ippãn Jesus ilju im jekl̦aj?

¹⁵ Ro em̦õj kapit er kõn jetõb kwõjarjar ewõr aer kõjatdikdik ñan pãd ippãn Jesus ñan indeeo, renaaj tõl ippãn ilo Aelõñ eo an Anij. Renaaj lukkuun pãd ippãn Christ, mel̦el̦ein bwe renaaj loe, kõnnaan ippãn, im renaaj pãd iturin. (Jon 14:2, 3) Jesus enaaj bareinwõt kwal̦o̦k an yokwe im kea kake ro ewõr aer kõjatdikdik ñan mour indeeo ioon lal̦. Meñe rejjab maroñ loe Jesus, bõtab kõtaan eo aer ippãn enaaj kajoorl̦o̦k ilo aer m̦õn̦õn̦õ kõn mour eo Jeova im Jesus rar lel̦o̦k ñan er.​—Ais. 9:6, 7.

16. Ta jeraam̦m̦an ko jej bũki jãn jem̦jerã eo ad ippãn Jesus?

¹⁶ Ñe jej em̦m̦akũt ñan kũr eo an Jesus bwe jen erom ro jeran, elõñ jeraam̦m̦an ko jenaaj bũki. Ñan waanjoñak, jej bõk tokjãn jãn yokwe eo an im jipañ eo an kiiõ. Ewõr ippãd maroñ eo ñan mour ñan indeeo. Im men eo eaorõktata, jem̦jerã eo ad ippãn Jesus enaaj tõll̦o̦k kõj ñan juon jeraam̦m̦an em̦m̦antata, eñin ej juon jem̦jerã epaak ippãn Jemãn Jesus, Jeova. Aet, ej juon jeraam̦m̦an el̦ap ñan an Jesus ãñinñini kõj ro jeran!