1. ¿Ndáaña xíniñúʼu keʼé u̱vi̱ na̱ yiví ña̱ va̱ʼa xa̱a̱na kutáʼan viína?

ÑA̱ VA̱ʼA xa̱a̱ u̱vi̱ na̱ yiví kutáʼan viína, xíniñúʼu ku̱a̱ʼá tiempo kutáʼanna, ka̱ʼa̱nna xa̱ʼa̱ ña̱ ndákanixi̱nína xíʼin xa̱ʼa̱ ña̱ ndóʼona. Soo tá ndákanixi̱níyó xa̱ʼa̱ ña̱ xa̱a̱yó kooyó migo ta̱ Jesús, túviyó ña̱ yo̱ʼvi̱ní keʼéyó ña̱yóʼo. Ná kotoyó nda̱chun kivi ixayo̱ʼvi̱ña xíʼinyó.

2. ¿Ndáaña kúú ña̱ nu̱ú kivi ixayo̱ʼvi̱ xíʼinyó ña̱ kooyó migo ta̱ Jesús?

² Ña̱ nu̱ú, va̱ása xíninu̱úyó ta̱ Jesús. Ta ña̱yóʼo kúú ña̱ ndo̱ʼo ku̱a̱ʼání na̱ cristiano na̱ ni̱xi̱yo tá siglo nu̱ú. Soo ni saá, ta̱ apóstol Pedro ni̱ka̱ʼa̱nra ña̱yóʼo xíʼinna: “Ni kǒo níxinindóra, soo kúʼvi̱va-inindó xínindóra. Ni kǒora xítondó vitin, soo kándíxavandóra” (1 Ped. 1:8). Ña̱kán, va̱ása xíniñúʼu kuninu̱úvíyó ta̱ Jesús ña̱ va̱ʼa kooyó migora.

3. ¿Ndáaña kúú ña̱ u̱vi̱ ña̱ kivi ixayo̱ʼvi̱ xíʼinyó?

³ Ña̱ u̱vi̱, va̱ása kívi ka̱ʼa̱nyó xíʼin ta̱ Jesús. Tá kéʼéyó oración xíʼin Jehová kúú ña̱ káʼa̱nyó. Ña̱ nda̱a̱ kúú ña̱ tá kéʼéyó oración xíniñúʼuyó ki̱vi̱ ta̱ Jesús, soo va̱ása káʼa̱nyó xíʼin miíra. Ta̱ Jesús va̱ása kúni̱ra ña̱ ná ka̱ʼa̱nyó xíʼin miíra, chi ña̱ oración iin kítáʼanña xíʼin ña̱ ndásakáʼnuyó Jehová, ta iinlá miíra xíniñúʼu ndasakáʼnuyó (Mat. 4:10). Soo ni saá, kiviva na̱ʼa̱yó ña̱ kúʼvi̱-iniyó xíniyó ta̱ Jesús.

4. a) ¿Ndáaña kúú ña̱ u̱ni̱ ña̱ kivi ixayo̱ʼvi̱ xíʼinyó? b) ¿Ndáaña ka̱ʼa̱nyó xa̱ʼa̱ nu̱ú artículo yóʼo?

 ⁴ Ña̱ u̱ni̱, va̱ása kívi kutáʼanyó xíʼin ta̱ Jesús saáchi íyora chí ndiví. Ni va̱ása yatin íyoyó xíʼin ta̱ Jesús, kiviva kunda̱a̱-iniyó ku̱a̱ʼání ña̱ʼa xa̱ʼa̱ra. Nu̱ú ña̱ artículo yóʼo, ka̱ʼa̱nyó xa̱ʼa̱ ku̱mí ña̱ʼa ña̱ xíniñúʼu keʼéyó ña̱ va̱ʼa kutáʼan viíyó xíʼinra. Soo siʼna ná kotoyó nda̱chun ndáyáʼviní kooyó migo ta̱ Cristo.

5. ¿Nda̱chun xíniñúʼu kooyó migo ta̱ Jesús? (Koto recuadro “ Tá ná kooyó migo ta̱ Jesús xa̱a̱yó kooyó migo Jehová” ta saátu ña̱ “ Ná kiʼinyó kuenta xíʼin ña̱ kúʼvi̱-iniyó xíniyó ta̱ Jesús”).

⁵ Xíniñúʼu kooyó migo ta̱ Jesús ña̱ va̱ʼa kutáʼan viíyó xíʼin Jehová. ¿Nda̱chun káʼa̱nyó ña̱yóʼo? Ná kotoyó nda̱chun. Ña̱ nu̱ú, ta̱ Jesús ni̱ka̱ʼa̱nra ña̱yóʼo xíʼin na̱ discípulora: “Kúʼvi̱ní-ini ta̱ kúú yivá xínira ndóʼó, saáchi ni̱kuʼvi̱-inindó xi̱nindó yi̱ʼi̱” (Juan 16:27). Ta saátu ni̱ka̱ʼa̱nkara: “Nda̱a̱ ni iinna kǒo kivi xa̱a̱ nu̱ú yivái̱ tá kǒo ndíku̱nna yi̱ʼi̱” (Juan 14:6). Tá kúni̱yó kooyó migo Jehová soo va̱ása kúni̱yó kooyó migo ta̱ Jesús, nda̱a̱ táki̱ʼva íyo na̱ kúni̱ ki̱ʼvi ini iin veʼe soo va̱ása kúni̱na ya̱ʼana chí yéʼé saá íyoyó. Ta̱ Jesús xi̱niñúʼura táʼan ejemplo yóʼo tá ni̱ka̱ʼa̱nra ña̱ kúúra iin yéʼé nu̱ú kíʼvi tí ndikachi (Juan 10:7). Ta ña̱ u̱vi̱, ta̱ Jesús va̱ʼaní ni̱na̱ʼa̱ra ña̱ va̱ʼa ña̱ kúúmií yivára. Ni̱ka̱ʼa̱nra ña̱yóʼo xíʼin na̱ discípulora: “Na̱ xa̱a̱ xi̱ni yi̱ʼi̱ xa̱a̱ xi̱nituna yivái̱” (Juan 14:9). Ña̱kán ña̱ va̱ʼa kuxini̱yó Jehová xíniñúʼu kuxini̱yó ta̱ Jesús. Tá ku̱a̱ʼáka ña̱ʼa ná sakuaʼayó xa̱ʼa̱ ta̱ Jesús, kuʼvi̱ka-iniyó kuniyóra. Ta tá yatinka ná kooyó xíʼinra kuʼvi̱ka-iniyó kuniyó yivára.

6. ¿Ndáa inka xa̱ʼa̱ kúú ña̱ xíniñúʼu kooyó migo ta̱ Jesús?

⁶ Xíniñúʼu kooyó migo ta̱ Jesús ña̱ va̱ʼa ndakuiin Ndióxi̱ oración ña̱ kéʼéyó. Ña̱yóʼo  kúni̱ kachiña ña̱ va̱ása xíniñúʼu ka̱ʼa̱n kuitíyó “xa̱ʼa̱ ki̱vi̱ ta̱ Jesús” tá sándiʼiyó kéʼéyó oración. Chi xíniñúʼu kunda̱a̱-iniyó ndáa ki̱ʼva xíniñúʼu Jehová ta̱ Jesús ña̱ ndakuiinra oración ña̱ kéʼéyó. Ta̱ Jesús ni̱ka̱ʼa̱nra ña̱yóʼo xíʼin na̱ apóstolra: “Nda̱a̱ ndáaka ña̱ ná ndukúndó xa̱ʼa̱ ki̱víi̱, yi̱ʼi̱ keʼíi̱ña” (Juan 14:13). Jehová kúú ta̱ xíniso̱ʼo oración ña̱ kéʼéyó ta ndákuiinraña, soo ta̱xira chiñu ndaʼa̱ se̱ʼera ña̱ keʼéra ña̱ kúni̱ra (Mat. 28:18). Tá kúma̱níka ndakuiinra yuʼúyó, xítora á ndíku̱nyó consejo ta̱ Jesús. Tá kúú ña̱yóʼo: “Tá íxakáʼnu-inindó xa̱ʼa̱ inkana, saátu yivándó ta̱ íyo chí ndiví ixakáʼnu-inira xa̱ʼa̱ndó. Soo tá va̱ása íxakáʼnu-inindó xa̱ʼa̱ ña̱ kéʼé inkana xíʼinndó, saátu yivándó va̱ása ixakáʼnu-inira xa̱ʼa̱ ku̱a̱chindó” (Mat. 6:14, 15). ¿Á su̱ví ña̱ nda̱a̱ kúú ña̱ ndáyáʼviní na̱ʼa̱yó ña̱ va̱ʼa íyo iniyó nda̱a̱ táki̱ʼva kéʼé Jehová xíʼin ta̱ Jesús?

7. ¿Ndáaña xíniñúʼu keʼéyó ña̱ va̱ʼa ndakiʼinyó ña̱ va̱ʼa xa̱ʼa̱ ña̱ ni̱xi̱ʼi̱ ta̱ Jesús?

⁷ Nda̱saa na̱ kúú migo ta̱ Jesús kivi ndakiʼin ña̱ va̱ʼa xa̱ʼa̱ ña̱ ni̱xi̱ʼi̱ra. ¿Nda̱chun va̱ʼa xíni̱yó ña̱yóʼo? Ta̱ Jesús ni̱ka̱ʼa̱nra ña̱ kuvira xa̱ʼa̱ na̱ migora (Juan 15:13). Na̱ nda̱sakáʼnu Ndióxi̱ tiempo xi̱naʼá, na̱ va̱ása níxini tá ki̱xi ta̱ Jesús nu̱ú ñuʼú yóʼo xíniñúʼu sakuaʼana xa̱ʼa̱ra ta kuʼvi̱-inina kuninara. Tá kúú ta̱ Abrahán, ñá Sara, ta̱ Moisés xíʼin ñá Rahab ndatakuna, ta xíniñúʼu xa̱a̱na koona migo ta̱ Jesús ña̱ va̱ʼa ndakiʼinna ña̱ kutakuna ndiʼi tiempo (Juan 17:3; Hech. 24:15; Heb. 11:8-12, 24-26, 31).

8, 9. Nda̱a̱ táki̱ʼva káchi Juan 15:4, 5, ¿ndáaña kivi keʼéyó tíxa̱ʼvi ña̱ kítáʼanyó xíʼin ta̱ Jesús, ta nda̱chun xíniñúʼu kutáʼanyó xíʼinra?

⁸ Kúsi̱íní-iniyó xa̱ʼa̱ ña̱ inkáchi káchíñuyó xíʼin ta̱ Jesús ña̱ nátúʼunyó xíʼin na̱ yiví ta sánáʼa̱yóna xa̱ʼa̱ Reino Ndióxi̱. Tá ni̱xi̱yora nu̱ú ñuʼú yóʼo sa̱náʼa̱ra ña̱ nda̱a̱ xa̱ʼa̱ Ndióxi̱. Ta tá nda̱ndikóra chí ndiví ndu̱ura ta̱ níʼi yichi̱ nu̱ú na̱ congregación, ta ndákundeékara chíndeétáʼanra xíʼinyó ña̱ natúʼunyó xíʼin na̱ yiví. Ta chíndayáʼviníra ña̱ chíka̱a̱níyó ndee̱ ña̱ chindeétáʼanyó xíʼin na̱ yiví ña̱ kunda̱a̱-inina xa̱ʼa̱ra xíʼin xa̱ʼa̱ yivára. Ta kivi keʼéyó ña̱ chiñu yóʼo tá chíndeé Jehová xíʼin ta̱ Jesús miíyó (kaʼvi Juan 15:4, 5). *

⁹ Ña̱ Biblia káxiní sánáʼa̱ña miíyó ña̱ xíniñúʼu kuʼvi̱-iniyó kuniyó ta̱ Jesús tá kúni̱yó sakusi̱íyó-ini Jehová. Ña̱kán, ná ka̱ʼa̱nyó xa̱ʼa̱ ku̱mí ña̱ xíniñúʼu keʼéyó ña̱ va̱ʼa kooyó migo ta̱ Jesús.

10. ¿Ndáaña kúú ña̱ nu̱ú xíniñúʼu keʼéyó ña̱ va̱ʼa kooyó migo ta̱ Jesús?

¹⁰ Ña̱ nu̱ú, ná kuxini̱yó ta̱ Jesús. Ta ña̱ va̱ʼa keʼéyó ña̱yóʼo ná kaʼviyó libro ña̱ va̱xi nu̱ú Biblia, ña̱ Mateo, Marcos, Lucas xíʼin Juan. Tá ná ndakanixi̱níyó xa̱ʼa̱ ña̱ káʼa̱n ña̱ relato yóʼo xa̱ʼa̱ ta̱ Jesús xíʼin xa̱ʼa̱ ña̱ va̱ʼaní ni̱xi̱yo inira xíʼin na̱ yiví, kuʼvi̱ka-iniyó kuniyóra ta ixato̱ʼóyóra. Tá kúú, ni xi̱kuura ta̱ xi̱niʼi yichi̱ nu̱ú na̱ discípulora va̱ása ní ixandi̱va̱ʼara xíʼinna, chi migora ni̱xi̱yona ta xi̱natúʼunra xíʼinna xa̱ʼa̱ ña̱ xi̱ndakanixi̱níra xíʼin ña̱ xi̱ndoʼora (Juan 15:15). Ta tá xi̱kusuchí-inina saátu xi̱kusuchí-inira xíʼinna ta xi̱xakura xíʼinna (Juan 11:32-36). Ta nda̱a̱ na̱ xi̱sa̱a̱-ini xi̱xini ta̱ Jesús, ki̱ʼinna kuenta ña̱ xi̱kuura migo na̱ xi̱xiniso̱ʼo ña̱ xi̱natúʼunra (Mat. 11:19). Tá vií ná keʼéyó xíʼin inkana nda̱a̱ táki̱ʼva ke̱ʼé ta̱ Jesús xíʼin na̱ discípulora,  va̱ʼaníka kutáʼanyó xíʼinna, ta kusi̱íníka-iniyó ta saátu kuʼvi̱ka-iniyó kuniyó ta̱ Cristo ta ixato̱ʼóyóra.

11. ¿Ndáaña kúú ña̱ u̱vi̱ xíniñúʼu keʼéyó ña̱ va̱ʼa kooyó migo ta̱ Jesús, ta nda̱chun ndáyáʼviní ña̱yóʼo?

¹¹ Ña̱ u̱vi̱, ná ndakanixi̱níyó nda̱a̱ táki̱ʼva ndákanixi̱ní ta̱ Jesús ta ná keʼéyó nda̱a̱ táki̱ʼva kéʼéra. Tá ná kuxini̱ va̱ʼayóra ta ndakanixi̱níyó nda̱a̱ táki̱ʼva ndákanixi̱níra, ndakúníka koo ña̱ kítáʼanyó xíʼinra (1 Cor. 2:16). ¿Ndáa ki̱ʼva kivi kundiku̱nyó yichi̱ra? Ná ka̱ʼa̱nyó xa̱ʼa̱ iin ejemplo. Ña̱ xi̱ndayáʼvika nu̱ú ta̱ Jesús xi̱kuu ña̱ chindeétáʼanra xíʼin inkana, ta su̱víka ña̱ sakusi̱íra-ini miíra (Mat. 20:28; Rom. 15:1-3). Xa̱ʼa̱ ña̱ xi̱ndakanixi̱níra saá, xi̱keʼéra ña̱ va̱ʼa xa̱ʼa̱na ta xi̱ ixakáʼnu-inira xa̱ʼa̱na. Ta va̱ása kama níxisa̱a̱ra tá xi̱ka̱ʼa̱nna iin ña̱ va̱ása va̱ʼa xa̱ʼa̱ra (Juan 1:46, 47). Ta va̱ása tuku ta tuku níndakanixi̱níra xa̱ʼa̱ ña̱ va̱ása va̱ʼa ña̱ ke̱ʼé na̱ yiví tá ya̱chi̱ (1 Tim. 1:12-14). Ndáyáʼviní kundiku̱nyó yichi̱ra, saáchi ni̱ka̱ʼa̱nra ña̱yóʼo: “Xíʼin ña̱yóʼo ndiʼina kunda̱a̱-ini ña̱ ndóʼó kúúndó discípuloi̱, tá kúʼvi̱-inindó xínitáʼanndó” (Juan 13:35). Xa̱ʼa̱ ña̱yóʼo, ná nda̱ka̱tu̱ʼun xíʼin miíyó: “Nda̱a̱ táki̱ʼva ke̱ʼé ta̱ Jesús, ¿á chíka̱i̱ ndee̱ ña̱ vií kutáʼi̱n xíʼin ndiʼi na̱ hermano?”.

12. ¿Ndáaña kúú ña̱ u̱ni̱ xíniñúʼu keʼéyó ña̱ va̱ʼa kooyó migo ta̱ Jesús, ta ndáa ki̱ʼva kéʼéyóña?

¹² Ña̱ u̱ni̱, ná chindeétáʼanyó xíʼin na̱ ñani ta̱ Cristo. Ta̱ Jesús káʼa̱nra ña̱ tá chíndeétáʼanyó xíʼin na̱ ñanira na̱ ku̱ʼu̱n chí ndiví, nda̱a̱ táki̱ʼva íyo na̱ chíndeétáʼan xíʼin miíra saá íyoyó (Mat. 25:34-40). Iin ki̱ʼva ña̱ chindeétáʼanyó xíʼinna kúú ña̱ keʼéyó chiñu ña̱ ta̱xira ndaʼa̱yó, ña̱ ku̱ʼu̱nyó natúʼunyó xíʼin na̱ yiví xa̱ʼa̱ Reino Ndióxi̱ ta xa̱a̱na koona discípulora (Mat. 28:19, 20; Hech. 10:42). Ndáyáʼviní ña̱ chindeétáʼan na̱ inka ndikachi xíʼin na̱ ñani ta̱ Cristo ña̱ va̱ʼa saxínuna chiñuna, ña̱ natúʼunna xíʼin ndiʼi na̱ yiví na̱ íyo iníísaá ñuyǐví (Juan 10:16). Tá chíka̱a̱yó ndee̱ ña̱ keeyó natúʼunyó, náʼa̱yó ña̱ kúʼvi̱-iniyó xíniyó na̱ ku̱ʼu̱n chí ndiví ta saátu ta̱ Jesús.

13. ¿Ndáa ki̱ʼva kivi kundiku̱nyó consejo ta̱ Jesús ña̱ va̱xi nu̱ú Lucas 16:9?

¹³ Ta saátu kivi kooyó migo Jehová xíʼin ta̱ Jesús, tá xíniñúʼuyó xu̱ʼúnyó ña̱ chindeétáʼanyó xíʼin chiñu ña̱ kíʼinna kuenta xíʼin (kaʼvi Lucas 16:9). * Tá kúú, kivi taxiyó xu̱ʼúnyó ña̱ va̱ʼa kuniñúʼu na̱ ñuu Ndióxi̱ ña̱yóʼo, ña̱ natúʼunna xa̱ʼa̱ Jehová xíʼin na̱ yiví na̱ ndóo lugar ña̱ xíkaní, ña̱ va̱ʼa kuva̱ʼa veʼe nu̱ú ndasakáʼnuyóra ta kundaanaña, ta saátu ña̱ va̱ʼa chindeétáʼanna xíʼin na̱ ndóo nu̱ú kúu iin tu̱ndóʼo. Ta saátu kivi taxiyó xu̱ʼún ti̱xin congregación, ta chindeétáʼanyó xíʼin na̱ hermano na̱ kúnda̱a̱-iniyó kúma̱ní sava ña̱ʼa nu̱ú (Prov. 19:17). Tá kéʼéyó ña̱yóʼo, chíndeétáʼanyó xíʼin na̱ ñani ta̱ Cristo.

14. Nda̱a̱ táki̱ʼva káchi Efesios 4:15, 16, ¿ndáaña kúú ña̱ ku̱mí xíniñúʼu keʼéyó ña̱ va̱ʼa kooyó migo ta̱ Jesús?

¹⁴ Ña̱ ku̱mí, ná kundiku̱nyó ña̱ ndáka̱xin na̱ congregación keʼéna. Ña̱ kítáʼanyó xíʼin ta̱ Jesús ta̱ níʼi yichi̱ nu̱ú na̱ congregación, ndúndakúkaña tá chíndeétáʼanyó xíʼin na̱ hermano na̱ nda̱kaxinra ña̱ kundaana miíyó (kaʼvi Efesios 4:15, 16). * Tá kúú, na̱ ñuu Ndióxi̱ kúni̱na ña̱ viíní ná kuniñúʼuyó veʼe nu̱ú ndátakayó. Ña̱kán, nda̱kutáʼan sava congregación ta na̱sama sava territorio ña̱ kúúmiína. Xa̱ʼa̱ ña̱yóʼo, loʼo xu̱ʼún xíniñúʼu na̱ ñuu Ndióxi̱. Xa̱ʼa̱ ña̱ na̱sama ndiʼi ña̱yóʼo, sava na̱ publicador  xi̱niñúʼu kandíxana keʼéna ña̱yóʼo. Sana na̱ hermano yóʼo ku̱a̱ʼání ku̱i̱ya̱ xi̱ñuʼuna ti̱xin iin congregación ta va̱ʼaní xi̱kitáʼanna xíʼin ndiʼi na̱ hermano. Soo, ni̱ka̱ʼa̱nna xíʼinna ña̱ ná ku̱ʼu̱nna inka congregación. Kúsi̱íní-ini ta̱ Jesús tá xítora ña̱ va̱ʼaní ndíku̱n na̱ hermano yóʼo ña̱ ndáka̱xin na̱ congregación keʼéna.

15. ¿Ndáa ki̱ʼva koo ña̱ kítáʼanyó xíʼin ta̱ Jesús chí nu̱únínu?

¹⁵ Na̱ hermano na̱ nda̱kaxin espíritu santo, ndátuna koona ndiʼi tiempo xíʼin ta̱ Jesús ta kaʼndachíñuna xíʼinra ti̱xin Reino Ndióxi̱. Kuninu̱únara, ka̱ʼa̱nna xíʼinra ta ku̱a̱ʼá tiempo kutáʼanna xíʼinra (Juan 14:2, 3). Ta na̱ ndátu kundoo nu̱ú ñuʼú yóʼo, ndakiʼinna ña̱ va̱ʼa xa̱ʼa̱ ña̱ kuʼvi̱-ini ta̱ Jesús kunirana ta kundaarana. Ni va̱ása kuninu̱únara, soo ña̱ kítáʼanna xíʼinra ndundakúkaña xa̱ʼa̱ ña̱ kúsi̱í-inina ña̱ ta̱xi Jehová xíʼin ta̱ Jesús ña̱ koona nu̱ú ñuʼú yóʼo (Is. 9:6, 7).

16. ¿Ndáaña va̱ʼa ndákiʼinyó xa̱ʼa̱ ña̱ kúúyó migo ta̱ Jesús?

¹⁶ Ki̱vi̱ kándíxayó kooyó migo ta̱ Jesús ku̱a̱ʼání bendición ndákiʼinyó. Tá kúú, kúʼvi̱ní-inira xínira miíyó vitin ta chíndeétáʼanra xíʼinyó. Ta saátu kivi ndakiʼinyó ña̱ kutakuyó ndiʼi tiempo. Tá kítáʼan viíyó xíʼin ta̱ Jesús ndakiʼinyó iin ña̱ ndáyáʼviní, ña̱ kutáʼan viíyó xíʼin yivára Jehová. Iin ña̱ va̱ʼaní kúú ña̱ kooyó migo ta̱ Jesús.