1. Mati da ǀgū ǀhōsagusisa khoe-i ǀkha a omkhâi ǁkhā?

ǀHAO-Ū da ra khoe-i ǀkha ǃgâi ǀhōsagusisa kurus ǃaroma da ge ǁî-i ǀkha ǁaeba nî ūhâ. ǁGamǀhaode du ga ǂâi tsî du ra tsâ ǀgaub xa ūhâ o, o du ge ǀgū ǀhōsagusisa ra om. Xawe Jesub ǀkha ǃgâi ǀhōsagusisa oms dawa i ra ǀkhī o, o da ge ǃgomsina ra hōǃâ. Tae-i ǃaroma?

2. Mâba a ǂguro ǃgomsi hîna da ra hōǃâba?

² ǂGuro ǃgomsib ge Jesuba da ge aitsama mû tama hâ. Apostelgu ǁaeb ǃnâ ge ûi hâ i Xristeǁîn tsîn ge Jesuba ge mû tama hâ i. Xaweb ge apostel Petruba ge mî: “ǁÎba du mû tama xawe du ǀnam hâb; ǁîb ǃnâ du nēsis kōse du mû bi tama hâ xawe ǂgom hâse ra dâba.” (1Pet. 1:8) Nēs ǃaroma i ge a īǁkhā Jesub ǀkha da ǃgâi ǀhōsagusisa a om ǁkhā ǃgaisa mû bi tama da hâ xawe.

3. ǀGamǁî ǃgomsib hîna da ra hōǃâba a tae?

³ ǀGamǁî ǃgomsib ge, Jesub ǀkha da ge a ǃhoa ǁoa. ǀGore da ra ǁaeb ai da ge sida ǂâide Jehovaba ra mîba. Jesub ǀons ǃnâ da ra ǀgore xawe da ge ǁîb ǀkha ǃhoa tama hâ. Jesub ǂûb ge ǁîb ǃoa da nî ǀgoresa ǂgao tama hâ. Tae-i ǃaroma? ǀGores ǃnâ-ū da ge ra ǃoaba tsî Jehovab ǀguib ge ǃoabehesa anu hâ. (Mat. 4:10) ǁNāti i ga i xawe da ge Jesuba da ūba hâ ǀnamma a ǁgau ǁkhā.

4. ǃNonaǁî ǃgomsiba a tae, tsî tae-e da nē ǁkhāǁkhāǃâs ǃnâ nî ǃhoaǃgao?

 ⁴ ǃNonaǁî ǃgomsib ge Jesub ge ǀhommi ǃnâ ra hâ. ǁNā-amaga da ge ǁîb ǀkha a hâ ǁoa. Xawe da ge noxoba ǂgui xūna Jesub xa a ǁkhāǁkhāsen ǁkhā, ǁîb tawa da hâ tama hâ hîna. Haka xūn hîna ǁîb ǀkha da ūhâ ǀhōsagusisa nî ǀgaiǀgaina da ge nî ǃhoaǃgao. Xawe hā re i da ǂgurose kō Xristub ǀkha ǀhōsagusa oms tae-i ǃaroma a ǂhâǂhâsa ǃkhaisa.

5. Tae-i ǃaroma da Jesub ǀkha ǀhōsagusisa nî kuru? (“ Jesub ǀkha ǀhōsagus ge Jehovab ǀkha ǀhōsagusisa ǃoa ra ǁnū da” tsî “ ǀNōsa mûǂûib Jesub di ǃhāros xa” di hâ boksi ra mû re.)

⁵ Jesub ǀkha da ge ǀhōsagusisa nî ūhâ Jehovab ǀkha da ga ǀhōsagu ǂgao o. Tae-i ǃaromasa nēsa? ǀGam ǃaroma ra xa ǂâi re. ǂGurob ge Jesuba ǁîb ǁkhāǁkhāsabega ge mîba: “Abob kom aitsama sago ǀnam hâo, sago tita ǀnam hâ” amaga. (Jhn. 16:27) “Khoe-i xare-i ge Abob tawa a sī ǁoa, tita xu i ga sī tama io” tis tsînab ge ge mî. (Jhn. 14:6) Jehovab ǀkha ǀhōsagusa Jesub ose kuru ǂgaos ge oms ǃnâ dao-amsa sîsen-ū tamase ǂgās ǀkha a ǀgui. Jesub ge ǁkhā ǂkhōsa ge sîsen-ū ǁguiǃāb ge o “tita ge gūn di dao-amta.” (Jhn. 10:7) ǀGamǁî ǃaromas ge Jesub ge ǁîb ǁGûb di ǀgauga ǃgâise ra ǁgau. ǁÎb di ǁkhāǁkhāsabega ǃoab ge ge mî: “Tita ra mû-i kom ǁGûba ra mû-eo.” (Jhn. 14:9) ǂHâǂhâsa ǀgaub hîna da Jehovab xa a ǁkhāǁkhāsen ǁkhāb ge Jesub ûiba ôaǃnâs ǃnâ-ūsa. Jesub xa da ra ǃnāsa ǂansa ūǂgā khami da ge ǁîba ǀnamma nî omkhâiba. Tsî sada ǀhōsagusis Jesub  ǀkha ra kai khamib ge Jehovaba da ūba hâ ǀnamma nî ǀgai.

6. Mâna a ǀnî ǃaroma hîna da Jesub ǀkha ǀhōsagusisa nî ūhâbasa? ǁGuiǃā re.

⁶ Jesub ǀkha da ge ǀhōsagusisa nî ūhâ Jehovaba ǃoa ǀgores ǃaroma. Nēs ge “Jesub ǀons ǃnâ” di ǀgui sada ǀgoredi ǀams ai mîs xa ǃnāsa-e ǃkhōǂgā hâ. Mûǂan da ge nî Jehovab mati Jesuba ra sîsen-ūsa ǀgorede ǃereams ǃnâ. Jesub ge apostelga ge mîba: “Ti ǀons ǃnâ go ga ǂgan xū-i hoa-i, ǁî-e ta nî dī.” (Jhn. 14:13) Jehovab sada ǀgorede ǁnâu-am tsî ra ǃeream xaweb ge Jesuba sîsenna ra taniǂui. (Mat. 28:18) ǁNā-amagab ge Eloba sida ǀgoredeb nî ǁnâu-am aiǃgâ ra kō Jesub daoǁgausa da ra sao ǃkhaisa. Aiǁgause, Jesub ge ge mî: “Khoena du ga ǁîn di dāsāde ǀûbao, ob ge sadu ǀhomsi Îba sadu dide ǁkhāti nî ǀûba du. Tsî khoena du ga ǁîn di dāsāde ǀûba tama io, ob ge sadu Îba sadu dāsāde ǁkhāti ǀûba du tide.” (Mat. 6:14, 15) Khoena da ge Jehovab tsî Jesub tsîkha ra hâ-ū da ǀgaub ǃnâ nî hâ-ū. Nēs ge kaise a ǂhâǂhâsa.

7. Hamna Jesub xoremarib ǁguibasa xu nî ǀama?

⁷ ǁNān hîna Jesub ǀkha ǀgū ǀhōsagusisa ūhân ǀguin ge xoremariba xū nî ǀama. Nēsa da mati a ǂan? Jesub ge ge mî “khoe-i nî ǁî-i khoen [ǀhōsan] ǃaroma ǁî-i ûiba mā, ti.” (Jhn. 15:13) ǂGomǂgomsa khoen hîna ge Jesub ǃhūbaib ai nî hās aiǃâ hâ în ge ǁîb xa ǁkhāǁkhāsen tsî ǀnamma nî omkhâiba bi. Aiǁgausen ge Abrahammi, Saras, Moseb tsî Raxa hâna khâisa nî hō. Xawe nē ǂgomǂgomsa ǃoaba-aon Jehovab din tsîn ge Jesub ǀkha ǀhōsagusisa nî kuru ǀamo ûiba xu ǀamas ǃaroma.​—Jhn. 17:3; ǃNǃkh. 24:15; Heb. 11:8-12, 24-26, 31.

8-9. Johaneb 15:4, 5 ǃnâ i ra ǁgauhe khamis sada ǀhōsagusis hîna da Jesub ǀkha ūhâsa tae-e dīs ǀkha ra hui da tsî nēsa tae-i ǃaroma a ǂhâǂhâsa?

⁸ ǀO-aisa aiǂanub Jesub ǀkha sîsens diba da ge ūhâ Gaosib ǃgâi ǂhôasa da ra aoǁnâ o. Jesub ge ǃhūbaib aib ge hâ i o, o khoena gere ǁkhāǁkhā. ǀHomma ǃoab ge oas khaoǃgâs tsînab ge ǀhaohâb di danab ase aoǁnâ sîsen-e ra mûǂam. Sadu ǁguiǂgâsens ǂgui khoena ǁîb tsî ǁîb ǁGûb xa ǁkhāǁkhās diba mû tsîb ge ra ǃgôaǃgâ. Nē sîsen-e da ge Jehovab tsî Jesub huib ǀkha ǀgui a dī ǁkhā.​—Khomai re Johaneb 15:4, 5.

⁹ Elobmîs ge ǃgāsase ra ǁkhāǁkhā Jesuba da ǀnamma omkhâiba tsî nî ūhâ ǀgaraba ǃkhaisa Jehovaba ǂkhîǂkhîs ǃaroma. Hā re i da haka xūna ǃhoaǃgao hîna nî hui da na Jesub ǀhō kais ǃnâ.

10. Mâ-e a ǂguro xu hîna da nî dī-e Jesub ǀkha da ga ǀhōsagusisa a om ǂgao o?

¹⁰ (1) Jesub ǀkha ǂangusa kuru re. Nēsa da ge Markub, Lukab, tsî Johaneb tsîgu di ǂkhanide Elobmîs ǃnâ khomais ǃnâ-ū a dī ǁkhā. Jesub di ûiǀgauba ra ǁgauda Elobmîs ǃnâdi xa da ga ǂâiǃgâ o, o da ge ǀnammi tsî ǃgôasib tsîna nî omkhâiba bi khoen ǀkhab gere hâ ǀgaub ǃaroma. ǁÎb ge ǁîn di dana i xaweb ge Jesuba ǁîb ǁkhāǁkhāsabena ǃgān ase ge hâ-ū tama hâ i. Xaweb ge ǁîb ǂâidi tsî tsâsigu tsîna ǁîn ǀkhā gere ǀgoragu. (Jhn. 15:15) Jesub ge ǁîn tsûba ǁnâuǃā tsî ǁîn ǀkha gere ā. (Jhn. 11:32-36) ǁÎb mâǃoa-aon tsîn ge ge mî ǁîb  ǁnān hîna ǁîb haisi amsa ǃoara ǃgân di ǀhō di. (Mat. 11:19) Jesuba da ga ǁîb ǁkhāǁkhāsaben ǀkhab gere hâ ǀgaub ǃnâ a ǁgae o, os ge ǁîb ǀkha da ūhâ ǀhōsagusisa nî ǀgai. Tsî da ge ǂkhîba nî hōǃâ tsîb ge sada ǀnammi tsî ǃgôasib tsîna Xristub ǃoa-ai nî kai.

11. Mâba a ǀgamǁî ǀgau hîna da Jesub ǀhō kai ǁkhāba tsî nēsa tae-i amsi a ǂhâǂhâsa?

¹¹ (2) Jesub ǂâiǀgaub tsî tanisen ǀgaub tsîna ǁgae re. Jesub di ǂâiǀgaub tsî tanisen ǀgaub tsîna da ga ǂan o, o da ge ǃgâi ǀhōsagusisa ǁîb ǀkha nî ūhâ. (1Kor. 2:16) Mati da Jesuba a ǁgae ǁkhā? ǀGui aiǁgausa ǃoa kō re. Jesub ge nau khoena huisa ǃoa ǃnāsa ǁaeba gere mûǂui aitsama ǂkhîǂkhîsens xa. (Mat. 20:28; Rom. 15:1-3) Nē tanisen ǀgaubab ge ūhâ i amagab ge hoaǁae ge huiǀnamxa i tsî gere ǀûba. ǁÎb ge supuse khoen gere mî xūn xa ge ǁaixa kaihe tama hâ i. (Jhn. 1:46, 47) Tsîb ge khoen ge ǃkharu ge ǁae dī xūn ǁîn ǃoa-aib ūhâ tansen ǀgauba nî ǀkharaǀkhara ǃkhaisa ge mâ-am tama hâ i. (1Tim. 1:12-14) Jesub ge ge mî: “Nēs tawan ge hoana nî mûǂan, ti ǁkhāǁkhāsabe go asa, ǀnamguba go ga sago ǃnâ ūhâo.” (Jhn. 13:35) Tae-i amsi du dîsen tama hâ, “Jesub aiǁgausa ta ra ǁgae hoa xūna ti ǀgaib ǃnâ dīsa i ta ǂkhîba ti ǃgâsan ǁaegu ūhâ?”

12. Mâba a ǃnonaǁî ǀgau hîna da Jesub ǀhō kai ǁkhāba tsî nēsa da mati a dī ǁkhā?

¹² (3) Jesub ǃgâsaga ǂkhâǃnâ re. Jesub ge ǁîb ǃgâsaga da ra mā huiba ǁîba da ra dība xū-i ase ra mû. (Mat. 25:34-40) ǂHâǂhâsa ǀgaub hîna da nē ǂkhauhesa ǃgâsaga ra huib ge Gaosib aoǁnâ sîsenni ǃnâ hoase ǁhaosa tsî Jesub ge mîmā da khami ǁkhāǁkhāsabe dīsa. (Mat. 28:19, 20; ǃNǃkh. 10:42) Nau “gūn” di huib ǀkha ǀguigu ge Xristub di ǃgâsaga nē ǃhūbaib ǂhawase ra dîhe aoǁnâ sîsenna a dī ǁkhā. (Jhn. 10:16) Nau gūn di ǀgui da ga o, o da ge mâǁaeb hoab hîna da aoǁnâ sîsenni ǃnâ ra ǁhaob ai ǀnamma ǂkhauhesa ǃgâsagu tsî Jesub tsîna ra ǁgau.

13. Mâti da Jesub mîdi hîna Lukab 16:9 ǃnâ hâ de a sîsenǂui ǁkhā?

¹³ Jehovab tsî Jesub tsîkha ǀkhas tsîna da ge ǀhōsagusisa ra kuru sada māsenxa mādi ǃnâ-ū nē sîsenna ǂkhâǃnâs ǃaroma. (Khomai re Lukab 16:9.) Aiǁgause da ge ǃhūbaib ǂhawase ra dīhe sîsenna a ǂkhâǃnâ ǁkhā. Nēs ge ǃgâiǂhôas aoǁnâ sîsenni ǃnū ǃhūgu ǃnâ hâga a ǃkhōǂgā ǁkhā, om tsî ǃoabas ǃkhaiga kōǃgâs tsî ǁnān hîna tsūgeǃgâgu ǃnâ hana huis tsîna. Sada di ǀhaohâgu tsîna da ge a ǂkhâǃnâ ǁkhā. (ǂKhm. 19:17) Nē ǀgaugu ǃnâ da ge Xristub di ǃgâsaga a hui ǁkhā.

14. Efeseǁîn 4:15, 16 ǃoagub mâba a hakaǁî ǀgau hîna da Jesub ǀkha ǀhōsagusisa a kuru ǁkhāba?

¹⁴ (4) Jehovab ǀapeǂhomis di daoǁgausa sao re. Jesub ǀkha da ge ǀgaisa ǀhōsagusisa ra omkhâi ǀhaohâb danab aseb mâihâ aogu daoǁgaude da ga sao o. (Khomai re Efeseǁîn 4:15, 16.) Aiǁgause da ge sada Gaosib ǀHû-omga ǃgâiǀgaub ǃnâ ra sîsen-ū ǂgao. Nēs ǃaroma gu ge ǀnî ǀhaohâga ge ǀhaoǀhaohe tsî aoǁnâ ǂharide ge dī-unuhe. ǀApeǂhomis ge nē ǀgaub ǃnâ ǂgui māsenxa mādi di mari-e ge sâu. Xawe nēs xa ǃaroma-e hâsen ge ǀnî aoǁnâ-aona ǀasa xūna nî ūǃoa ge is ge. Nē ǃgâsan ge ǁîn ǀhaohâgu  ǃnâ ǀnîsi kaise gaxuse ge hâ i tsî ǃgâi ǀhōsana ge ūhâ i. ǁÎn ge nēsi ra ǂgan-e în ǀasa ǀhaohâba ǃoa doe. Jesub ge kaise a ǂkhî mûsa nē ǂgomǂgomsa ǃgâsan nē mîǁguiba ra ǁnâu-am ǃkhaisa.

15. Jesub ǀkha da ūhâ ǀhōsagusa sida ûiba hānîǁaeb ǃnâ mati nî ǃgâiǃgâi?

¹⁵ ǂKhauhesan ge Jesub ǀkha ǂgaeǂguis tsî ǁîb ǀkha ǀamose ûis aiǂhanuba ūhâ. ǁÎn ge Xristub ǀkha nî hâ, ǁîba mû, ǁîb ǀkha ǃhoa tsî ǁaeba ǁîb ǀkha nî ūhâ. (Jhn. 14:2, 3) ǁNān hîna ǃhūbaib ǃâubasensa ūhân tsîn ge Jesub ǀnammi tsî tsâbaǁhaoxasib tsîna nî hōǃâ. Jesuban mû tide xawes ge ǁîb ǀkhan ūhâ ǀhōsagusisa nî ǀgai Jehovab tsî Jesub tsîn ge īǁkhā kai ûib ǃnân ra ǃgâiǃgâibasensa hō hîna.—Jes. 9:6, 7.

16. Jesub ǀkha da ūhâ ǀhōsagusisa mâ ǀkhaega ra hauba da?

¹⁶ Jesub ǀkha ǀhōsagus di ǁkhauǂguisa da ga ūǃoa o da ge ǂgui ǀkhaega ra hō. Aiǁgause da ge nēsi ǁîb xa ǀnam-e tsî ra ǂkhâǃnâhe. ǀAmose ûis di ǃâubasensa da ge māhe hâ. Nēn hoan ǂamais ge Jesub ǀkha da ūhâ ǀhōsagusa ǂoaǂamsa ǀkhaeba ra hauba da—ǁîb ǁGûb, Jehovab ǀkha da ūhâ ǀgū ǀhōsagusa. Kaise kai aiǂanub ge Jesub di ǀhō-i ase ǂanhesa.