1. ¿Keniuj mochiuaj tasojiknimej ome taltikpakneminij?

OME taltikpakneminij peua kuali mouikaj oso mochiuaj tasojiknimej keman miakpa senyetokej uan ika tajtouaj tein kinemiliaj, tein kimachiliaj uan tein kipanouanij. Sayoj ke, uelis tiknemiliskej ke ouij yeski timochiuaskej itasojikniuan Jesús. Maj tikitakan keyej.

2. ¿Toni yekinika taman uelis kichiuas maj tiknemilikan ke ouij yeski timochiuaskej itasojikniuan Jesús?

² Yekinika taman, porin amo keman tikitanij Jesús. Miakej tokniuan itech yekinika siglo no amo kiitakej. Maski ijkon, tatitanil Pedro kiniluij: “Nankitasojtatinemij Jesucristo maski ayamo keman nankitakke. Uan [...] maski axkan amo nankitstiyoue Cristo pero nantakuautamatij iuan” (1 Ped. 1:8). Nejin kinextia ke uelis timochiuaskej itasojikniuan Jesús maski amo tikitaj.

3. ¿Katiyejua ojpatika taman?

³ Ojpatika taman, porin amo ueli titajtouaj iuan Jesús. Keman tikchiuaj netataujtil, tiknojnotsaj Jiova. Melauj ke tikchiuaj itokaykopa Jesús, sayoj ke amo yejua tiknojnotsaj. Tein melauj, Jesús amo kineki maj yejua tiktataujtikan, porin ika netataujtil no tikueyichiuaj Jiova, uan sayoj yejuatsin moneki tikueyichiuaskej (Mat. 4:10). Maski ijkon, uelis tiknextiskej ke tiktasojtaj Jesús.

4. 1) ¿Katiyejua expatika taman? 2) ¿Toni tikitaskej itech nejin tamachtilis?

⁴ Expatika taman, porin amo ueli tiyetokej iuan Jesús porin  nemi iluikak. Sayoj ke uelis tikixmatiskej. Itech nejin tamachtilis, tikitaskej naui taman tein moneki tikchiuaskej uan ijkon uelis timochiuaskej itasojikniuan Jesús uan tiksentokaskej kuali timouikaskej iuan. Sayoj ke yekinika maj tikitakan keyej moneki maj kuali timouikakan iuan Cristo.

5. ¿Keyej moneki maj timochiuakan itasojikniuan Jesús? (No xikonita recuadros “ Komo kuali timouikaj iuan Jesús, kuali timouikaskej iuan Jiova” uan “ Maj tikitakan Jesús kemej moneki”.)

⁵ Komo tiknekij kuali timouikaskej iuan Jiova moneki kuali timouikaskej iuan Jesús. ¿Keyej? Maj tikitakan ome taman. Yekinika, Jesús kiniluij imomachtijkauan: “Notajtsin Dios namechyoltasojta [...] porin namejuan no nannechyoltasojtaj Nejuatsin” (Juan 16:27). Uan no kijtoj: “Amo aken uelis kajsis Notajtsin Dios komo amo Nejuatsin nikyekantiyas” (Juan 14:6). Komo tiknekij kuali timouikaskej iuan Jiova, sayoj ke amo kuali timouikaj iuan Jesús kemej yeskia tiknekiskiaj tikalakiskej itech se kali, sayoj ke amo kampa yetok puerta. Jesús kikuik se neskayot kemej nejin keman kijtoj ke katka “kalten kampa kalakij in ichkame” (Juan 10:7). Ojpatika taman yejua ke Jesús no kinextij netasojtalis, teiknelilis uan okseki taman kemej iTajtsin. Kiniluij imomachtijkauan: “Ijkon keme Nejuatsin tinechitstinemi, no ijkon Totajtsin Dios tikitstinemi” (Juan 14:9). Nejin kinextia ke moneki tikixmatiskej Jesús porin ijkon uelis tikixmatiskej Jiova. Keman okachi tikixmatiskej Jesús, okachi tiktasojtaskej. Uan keman okachi kuali timouikaskej iuan, okachi tiktasojtaskej iTajtsin.

6. ¿Keyej no moneki timochiuaskej itasojikniuan Jesús?

 ⁶ Komo tiknekij maj Dios kinankili tonetataujtiluan moneki timochiuaskej itasojikniuan Jesús. Nejin kijtosneki ke keman tiktamichiuaj se netataujtil amo sayoj moneki tikijtoskej “itokaykopa Jesús” porin ipa ijkon timomattokej. Moneki tikajsikamatiskej keniuj Jiova itechkopa Jesús kinankilia tonetataujtiluan. Jesús kiniluij itatitaniluan: “Nochi ten namejuan nankitajtaniliske Notajtsin Dios ika [...] notokaytsin, ijkuakon Nejuatsin nikchiuas” (Juan 14:13). Jiova yejua akin kikaki uan kinankilia tonetataujtiluan, sayoj ke kiixtalij iKonetsin maj kichiua tein kiixtalia (Mat. 28:18). Achto ke Jiova technankilis, kiita ox tiktakamatij tein tayolmajxitij Jesús. Kemej neskayot, Jesús kijtoj: “Komo namejuan nankintapojpoluiaj naken namechmouispoloaj, ijkon no Toueyitajtsin Dios ten yetika eluiyaktsinko namechtapojpoluis. Uan komo amo nankintapojpoluiaj ne naken namechmouispoloaj, no ijkon Namoueyitajtsin amo no namechtapojpoluis” (Mat. 6:14, 15). Yejua ika moneki maj tikiniknelikan oksekin kemej Jiova uan Jesús techikneliaj.

7. ¿Akonimej kiseliskej tatiochiualismej tein kiualkui inemilis Jesús tein kitemakak?

⁷ Sayoj akin kuali mouikaskej iuan Jesús senkis kiseliskej tatiochiualismej tein kiualkui inemilis tein kitemakak. ¿Keniuj tikmatij? Jesús kijtoj ke kitemakaskia “inemilis para ijkon kinpaleuis [...] itasojikniuan” (Juan 15:13). Itekitikauan Dios akin nenkej achto ke Jesús ualaskia nikan taltikpak monekis kiixmatiskej uan kitasojtaskej. Takamej uan siuamej akin kitakamatkej Dios, kemej Abrahán, Sara, Moisés oso Rahab oksepa nemiskej, sayoj ke no monekis mochiuaskej itasojikniuan Jesús uan ijkon uelis nemiskej nochipaya (Juan 17:3; Hech. 24:15; Heb. 11:8-12, 24-26, 31).

8, 9. Kemej kijtoua Juan 15:4, 5, ¿toni ueli tikchiuaj komo kuali timouikaj iuan Jesús, uan keyej moneki amo timouejkatiliskej iuan?

⁸ Tikpiaj tatiochiualis titekitiskej iuan Jesús keman titanojnotsaj uan titamachtiaj tein kichiuas iTekiuajyo Dios. Keman yetoya nikan taltikpak, kinpaleuij taltikpakneminij maj kiixmatikan Dios. Uan keman mokepak iluikak mochiuak Taixyekankej itech inechikol Dios, uan hasta axkan kisentoka kiixyekana tanojnotsalis uan tamachtilis. Kiita ke timochikauaj tikinpaleuiskej nochin akin tiueliskej maj kiixmatikan yejua uan iTajtsin uan semi kipatiuita nejon. Tein melauj, sayoj uelis tikchiuaskej nejin tekit komo Jiova uan Jesús techpaleuiaj (xikonixtajtolti Juan 15:4, 5).

⁹ Biblia senkis kijtoua ke komo tiknekij tikyolpaktiskej Jiova moneki tiktasojtaskej Jesús. Yejua ika, maj tikitakan naui taman tein moneki tikchiuaskej uan ijkon timochiuaskej itasojikniuan Jesús.

10. ¿Toni yekinika taman moneki tikchiuaskej uan ijkon uelis timochiuaskej itasojikniuan Jesús?

¹⁰ Yekinika, maj tikixmatikan Jesús. Yejua ika, moneki tikixtajtoltiskej amatajkuilolmej Mateo, Marcos, Lucas uan Juan, tein ika tajtouaj inemilis Jesús. Keman itech titanemiliskej uan tikitaskej ke Jesús kiniknelij taltikpakneminij, tiktasojtaskej uan tikpoujkaitaskej oso tikmouiskaitaskej. Kemej neskayot, maski katka ininTeko imomachtijkauan, amo kinitak kemej itakeualuan, ta kemej itasojikniuan uan kintapouij tein kinemiliaya uan kimachiliaya  (Juan 15:15). No motayokoltiaya keman imomachtijkauan tayokoxtoyaj uan iniuan chokaya (Juan 11:32-36). Hasta akin kitauelitayaj kiitakej ke kuali mouikaya iniuan akin kikakiaj (Mat. 11:19). Komo tikinitaj oksekin kemej Jesús kinitak imomachtijkauan, okachi kuali timouikaskej iniuan, okachi tiyolpakiskej uan okachi tiktasojtaskej uan tikpoujkaitaskej Cristo.

11. ¿Katiyejua ojpatika taman tein moneki tikchiuaskej uan ijkon uelis timochiuaskej itasojikniuan Jesús, uan keyej moneki?

¹¹ Ojpatika, maj titanemilikan uan maj tikchiuakan kemej Jesús. Komo tikmatij keniuj tanemiliaya uan titanemiliaj kemej yejua, okachi kuali timouikaskej iuan (1 Cor. 2:16). ¿Keniuj uelis tikchiuaskej kemej yejua? Maj tikitakan se neskayot. Yejua amo kitayekanaltiaya itanejnekilis, ta kiitaya ke okachi monekia kinpaleuis oksekin (Mat. 20:28; Rom. 15:1-3). Yejua ika, kitayekanaltiaya inintanejnekilis uan kintapojpoluiaya. Amo niman kualania keman kijtouiliayaj teisa (Juan 1:46, 47). Uan maski se taltikpaknenkej tajtakojka amo kielnamiktinemia tajtakolmej tein kichiujka (1 Tim. 1:12-14). Moneki maj tikchiuakan kemej yejua, porin kijtoj: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:35). Yejua ika, maj timotajtanikan: “Ijkon kemej Jesús, ¿nimochikaua kuali nimouikas iniuan tokniuan?”.

12. ¿Katiyejua expatika taman tein moneki tikchiuaskej uan ijkon uelis timochiuaskej itasojikniuan Jesús, uan keniuj tikchiuaj?

¹² Expatika, maj tikinpaleuikan iikniuan Cristo. Keman tikinpaleuiaj tokniuan taixpejpenalmej, Jesús kiita ke yejua tikpaleuiaj (Mat. 25:34-40). Okachi tikinpaleuiaj keman tikteixmatiltiaj iTekiuajyo Dios uan tikinpaleuiaj oksekin maj mochiuakan itatojtokakauan Cristo, kemej yejua tanauatij (Mat. 28:19, 20; Hech. 10:42). Iikniuan Cristo moneki kiseliskej ininnepaleuil ‘okseki ichkamej’ uan ijkon uelis tanojnotsaskej itech nochi taltikpak (Juan 10:16). Komo timoajsij iniuan okseki ichkamej, nochipa keman titanojnotsaj tiknextiaj ke tikintasojtaj taixpejpenalmej uan Jesús.

13. ¿Keniuj uelis tikchiuaskej tein tayolmajxitij Jesús itech Lucas 16:9?

¹³ No timochiuaj itasojikniuan Jiova uan Jesús keman ika totomin titapaleuiaj maj mochiua tekit tein yejuan kiixyekanaj (xikonixtajtolti Lucas 16:9). Kemej neskayot, uelis titemakaskej tomin tein ika titapaleuiskej maj mochiua itekiyo Dios itech nochi taltikpak. Ika nejin tomin ueli motanojnotsa kampa uejuejka, mochijchiuaj uan moyektaliaj kalmej kampa titaueyichiuaj uan ika motapaleuia kampa mochiua se tetsauit. No uelis titapaleuiskej ika tomin itech tonechikol uan tikinpaleuiskej tokniuan akin kipanouaj tatasojtilis (Prov. 19:17). Ijkon tikinpaleuiaj iikniuan Cristo.

14. Ika tein kijtoua Efesios 4:15, 16, ¿katiyejua naujpatika taman tein moneki tikchiuaskej uan ijkon uelis timochiuaskej itasojikniuan Jesús?

¹⁴ Naujpatika, maj tiktakamatikan tein moixtalia itech inechikol Dios. Okachi kuali timouikaj iuan Jesús, akin taixyekana itech inechikol Dios, keman tikintakamatij tokniuan akin kinixtalijtokej maj techixyekanakan ika netasojtalis (xikonixtajtolti Efesios 4:15, 16). Kemej neskayot, inechikol Dios kitemoua maj kuali motekitiltikan Kalmej kampa tiMosentiliaj. Yejua ika, seki nechikolmej kinsentilianij iniuan oksekin uan moyektaliani kampa tanojnotsaj. Nejin tapaleuiani maj  amo motekitiltiok miak tomin tein motemaka itech inechikol Dios. Sayoj ke nejin kichiuani maj seki tokniuan peua tapaleuikan itech okse nechikol, maski xa miak xiujmejya mosentiliayaj itech ininnechikol uan semi kintasojtayaj tokniuan. Axkan yejuan moneki momatiskej ika nejin yankuik taman. Jesús semi yolpaki keman kiita ke nejin tokniuan kitakamatij tein moixtalia itech inechikol Dios.

15. ¿Keniuj timouikaskej iuan Jesús satepan, uan keyej?

¹⁵ Tokniuan taixpejpenalmej kichiaj yetoskej iuan Jesús uan taixyekanaskej iuan itech iTekiuajyo Dios. Kiitaskej, iuan tajtoskej uan yetoskej iuan nochipaya (Juan 14:2, 3). Jesús no kintasojtas uan kinyekpias akin nemiskej nikan taltikpak. Keman kiseliskejya tatiochiualismej tein Jiova uan Jesús kijtojkaj kinmakaskej, okachi kuali mouikaskej iuan Jesús maski amo kiitaskej (Is. 9:6, 7).

16. ¿Toni tatiochiualismej tikseliaj komo kuali timouikaj iuan Jesús?

¹⁶ Keman timochiuaj itasojikniuan Jesús kemej techyoleuak, tikseliaj miak tatiochiualismej. Kemej neskayot, axkan techtasojta uan techpaleuia. Uan no, uelis tinemiskej nochipaya. Uan tein okachi moneki, komo kuali timouikaj iuan Jesús no kuali timouikaskej iuan iTajtsin, Jiova, tein okachi kipia ipatiuj. Se ueyi tatiochiualis maj kuali timouikakan iuan Jesús.