1. Zvicinyi zvinodikana kuti vandhu vaviri vave shamwari?

KUVA NO ushamwari wo phedo no mundhu ari wese, kazinji kunobatanija kuita zviri zvese. Ciro cokutanga catinodikana kuita ngo co kupeja nguva no mundhuwo. Munobhuya no mundhuwo, munotovhunjana zvamunorangarira, munoverengerana zvomakasongana nazvo mu upenyu. Ngo kuita zvese izvi, munonga maashamwari. Asi, kuva no ushamwari wo phedo na Jesu kunganesa maningi. Ngenyi?

2. Ngocapi cineso cokutanga catinaco?

² Cineso cokutanga ngo cokuti atizivi kuvona Jesu. Ici cakava cineso co Makristu mazinji o muzana ro kutanga ro makore. Pikija zvakadaro, mupostori Pedhru wakananga kudari: “Imwimwi amuzivi kumuvona, kaveta munomudisa; amuzivi kumuringisa kaveta munomutenda.” (1 Pedru 1:8) Izvi zvinovonesa kuti, pikija no kutama kwedu kuvona Jesu, tingava no ushamwari wo phedo naye.

3. Ngocapi cineso cocipiri catinaco?

³ Cineso co cipiri ngo cokuti atikwanisi kubhuya na Jesu. Patinoita mukumbiro tinonga tecibhuya na Jehovha kamare. Ngo zvokadi kuti tinoita mukumbiro ngo zina ra Jesu, asi atibhuyi na iyena kamare. Jesu na kamwe aadi kuti tiite mukumbiro kwaari. Ngenyi? Ngokuti mukumbiro i maitiro o kunamata zve mundhu umwe basi anodikana kunamatwa ndi Jehovha. (Mateu 4:10) Pikija zvakadaro, tingakhombija kuti tinoda Jesu.

4. Ngocapi cineso co citatu zve ngozvapi zvaticada kuvona pa jijo iyi?

 ⁴ Cineso co citatu ngo cokuti Jesu anogara kudenga, ngo kudaro, atingakwanisi kuva naye. Pikija atiripi phedo na Jesu, tingaziva zvizinji ngo pamusoro pake. Pa jijo iyi, tinozovona zviro zvirongomuna zvatingadikana kuita kuti tivangise ushamwari hwedu na Jesu. Pokutanga, ngativone kuti ngenyi zvinosisira ku umwe na umwe wedu kuti tive no ushamwari wo phedo na Kristu.

5. Ngenyi tinodikana kuva shamwari ja Jesu? (Vonanyi bhokiso rinoti: “ Kuva Shamwari ya Jesu Kunomuita Kuti Muve Shamwari ya Jehovha” no rimweni rinoti: “ Vonanyi Basa ra Jesu mu Njira Yakaezanana.”)

⁵ Tinodikana kuva shamwari ja Jesu kuti tikwanise kuva no ushamwari wakavanga na Jehovha. Ngenyi izvo zvinosisira? Ngativone mathangwe maviri. Rokutanga, Jesu wakati kuno vajiji vake: “Baba ambhwine vanomuda, ngo ndava yokuti imwimwi mandidavo.” (Johani 16:27) Iyena wakatizve: “Apana anokwanisa kuenda kuna Baba acikapindi ndini.” (Johani 14:6)Kueja kuva shamwari ya Jehovha ticito tava no shamwari na Jesu zvakadari inga kueja kungwina mu predhio ticikashandisi musuvo. Jesu wakashandisa muezaniso wakafanana paakananga kuti iyena ambwine i “musuvo wo mabvuta.” (Johani 10:7) Thangwe ro cipiri ngoro kuti Jesu wakanasa kutevejera mugariro ja Baba wake. Iyena wakavhunja vajiji vake kudari: “Ndiyani anondivona, anovonavo Baba.” (Johani 14:9) Njira inosisira maningi yo kuziva Jehovha, ngo yo kujija upenyu wa Jesu. Patinojija zvizinji ngo pamusoro pa Jesu, tinozonasa kumuziva. Patinodisisa Jesu, tinozodavo maningi Baba wake.

6. Ngorapi thangwe rimweni rinotiita kuti tive no ushamwari na Jesu? Sananguranyi.

 ⁶ Itusu tinodikana kuva no ushamwari na Jesu kuti mukumbiro jedu jidavihwe. Tinodikana kuita zvizinji kusiapo kupejisa mukumbiro jedu ngo kunanga basi kudari: “Ngo zina ra Jesu.” Tinodikanazve kuziva manera anoshandiswa Jesu ndi Jehovha kuti adavire mukumbiro jedu. Jesu wakati kuno vapostori: “Bzese bzo mungakumbira ngo zina rangu, ndinozobziita.” (Johani 14:13) Jehovha ndiyena anozwa no kudavira mukumbiro jedu. Asi Jehovha paanotema civaringo co kuda kudavira mukumbiro jedu, iyena wakapa Jesu simba ro kuita zviri zvese pa cinyau cake. (Mateu 28:18) Ngo kudaro, Mwari acito adavira mukumbiro jedu, iyena anoamba kuvona kuti dangani tiri kushandisa mbhangiro yotakapuwa ndi Jesu kana kuti haiwa. Inga muezaniso, Jesu wakati: “Mukakungurira vandhu bzixaixi bzavo, Baba wenyu vo mugore vanozomukunguriravo. Mukatama kukungurira vandhu, na ivonavo Baba wenyu avazomukunguririvo bzixaixi bzenyu.” (Mateu 6:14, 15) Ngo kudaro, zvinosisira maningi kutaja vamweni inga manera tinotajwa ndi Jehovha na Jesu!

7. Ndiani anozobesereka ngo makomborero o muripo wa Jesu?

⁷ Vandhu vano ushamwari wo phedo na Jesu ngaivona basi vanobesereka ngo muripo wake. Tinozvizivisa kudini? Jesu wakananga kuti ‘waizopa uhomi hwake ngo ndava yo xamwari’ jake. (Johani 15:13) Pikija vandhu vakagondeka vakapona Jesu acito aviya pasi pano, vanozodikanavo kujija ngo pamusoro pake no kukurisa rudo hwavo naye. Vandhu vakadari inga ndi Abhirahama, Sara, Mosi na Rahabhi vanozomuswa, asi vanodikana kuva shamwari ja Jesu kuti vave no uhomi ucikaperi.—Johani 17:3; Maitiro o Vapostori 24:15; Vaheberi 11:8-12, 24-26, 31.

8-9. Mukuzwirana na Johani 15:4, 5, ushamwari na Jesu unotibesera mu basa rapi zve ngenyi basa iri rinosisira?

⁸ Tinomudakaro wo kushanda pamwepo na Jesu mu basa ro kucumaera no ro kujijisa masoko akanaka o Umambo hwa Mwari. Jesu paainga pasi pano, wainga mujijisi. Paakahwirira kudenga, wakava musoro wo ungano zve acaenderera mberi ecitungamirira basa ro kucumaera no kujijisa. Iyena anokwanisa kuvona no kureremeja zvese zvamunoita kuti mubesere vandhu vazinji kuti vazive iyena na Babake. Ngo zvokadi kuti, tinokwanisa kuita basa iri, tecibesehwa ndi Jehovha na Jesu.—Verenganyi Johani 15:4, 5.

⁹ Bhaibheri rinonasa kujekesa kuti, kudari tinoda kudakajisa Jehovha tinodikana kuda Jesu no kuita kuti rudo hwondhohwo utame kutondhora. Ngo kudaro, ngativone zviro zvirongomuna zvatingaita kuti tive shamwari ja Jesu.

10. Ngowapi mudanyu wo kutanga watinodikana kuita kuti tive no ushamwari na Jesu?

¹⁰ (1) Zivanyi Jesu. Tingakwanisa kuziva Jesu ngo kujija mabhuku marongomuna o Bhaibheri, inga Mateu, Marko, Ruka na Johani. Patinorangarijisisa zvinonangwa ngo Bhaibheri ngo pamusoro po upenyu hwa Jesu, tinojijira kumuda no kumureremeja. Ngokuti iyena wainga wakanaka mwoyo paaitaja vandhu. Inga muezaniso, pikija Jesu wainga mujijisi wo vajiji vake, iyena aacaivataja inga varanda. Kusiyapo izvo, iyena waivasanangurira zvaairangarira no mazwiro ake. (Johani 15:15) Vajiji vake povainga vakasuruvara, iyena waisuruvaravo. (Johani 11:32-36) No vavengi va Jesu vaizivavo  kuti iyena wainga no ushamwari na vaya vaipurukira zvaicumaera. (Mateu 11:19) Tikatevejera matajiro akaita Jesu vajiji vake, ushamwari hwedu no vamweni unovanga. Tinozodakara maningi zve rudo hwedu kuna Jesu no kubongesera zvinoengejeka.

11. Ngowapi mudanyu wo cipiri unotiita kuti tive shamwari ja Jesu? Ngenyi mudanyu uu unosisira maningi?

¹¹ (2) Tevejeranyi Jesu ngo manera o kurangarira no kuita zviro. Patinoziva no kutevejera manera airangarira Jesu, ushamwari hwedu naye hunovanga. (1 VaKorinto 2:16) Tingatevejeresa kudini Jesu? Vonanyi muezaniso umwe. Jesu waibatikana maningi ngo kubesera vamweni kuciripi kujidakajisa pacake. (Mateu 20:28; VaRoma 15:1-3) Ngo kuva no murangariro wakadaro, iyena waijipira ku vamweni zve wairegerera. Jesu aacaikasika kucamwa ngo zviro zvaiverekethwa ngo vandhu ngo pamusoro pake. (Johani 1:46, 47) Iyena aacaitendera kuti cishaishi cakaita mundhu kareko cimuite kuti arangarire kuti mundhuwo aazocinji. (1 Timoti 1:12-14) Jesu wakati: “Vese vanozoziva kuti muri vajiji vangu: mukadisana ngo cenyu.” (Johani 13:35) Wari jivhunjisenyi kudari: “Ndiri kuteveja muezaniso wa Jesu ngo kuita zvese zvandinokwanisa kuti ndirambe ndino runyararo no hama no hambzaji here?

12. Ngowapi mudanyu wo citatu unotiita kuti tive shamwari ja Jesu zve tingaitisa kudini kuti titore mudanyu uu?

¹² (3) Beseranyi Hama ja Kristu. Jesu anovona kuti zvese zvatinoitirari hama jake jo kuzojwa, zvakadari inga kuti, tiri kuitira iyena kamare. (Mateu 25:34-40) Jesu wakajijisa vokuzojwa kuti vacumaere ngo pamusoro po Umambo no kuita vajiji. Patinoita basa iri, tinokhombija kuti tiri kubesera hama ja Kristu. (Mateu 28:19, 20; Maitiro o Vapostori 10:42) Pacina besero ro ‘mabvuta amweni,’ vokuzojwa avacaizokwanisa kucumaera masoko akanaka mu nyika yese. (Johani 10:16) Kudari imwimwi muri vo mavhuta amweni, ceujanyi kuti, pamunoita basa iri, imwimwi amukhombiji basi kuti muno rudo no vo kuzojwa asi na Jesu.

13. Tingashandisa kudini mbhangiro ya Jesu inowanika pana Luka 16:9?

¹³ Kuno njira jimweni jatingabesera ndijona hama ja Kristu. Imwe yakona ngo yo kushandisa mare yedu kuitira kubesera basa riri kutungamirihwa ndi Jehovha na Jesu. (Verenganyi Luka 16:9.) Inga muezaniso, tingaita mupiro kuitira kubesera basa rinoizwa pasi pese. Mupiro iji, jinoshandiswa kuitira kubesera kucumaera masoko akanaka ku ndau jiri ndhambo, kuvakwa no kunasirira-nasirira ndau jo kunamatira no kubesera vanowihwa ngo ngozi jinoitika jega. Kusiyapo izvo, tingaita mupiro kuitira ungano yedu kana kubesera hama inoda besero. (Mazwi Akangwara 19:17) Kudari tikaita zviro izvi, tinovazve shamwari ja Jehovha na Jesu.

14. Mukuzwirana na VaEfeso 4:15, 16, ngowapi mudanyu wo cirongomuna unotiita kuti tive shamwari ya Jesu?

¹⁴ (4) Beseranyi urongwa wo Sangano ra Jehovha. Jesu i musoro wo ungano zve iyena wakagaja vandhu vanokwanirisa kuti vatingwarire. Patinoshanda navo, tinovangisa ushamwari hwedu na Jesu. (Verenganyi VaEfeso 4:15, 16.) Inga muezaniso, wari tiri kueja kuvona dangani Nyumba yo Umambo imwe nga imwe iri kunasa kushandiswa ushoni. Ngo ndava ya izvi, pakava no dikano yo kubatanija ungano jimweni no kurongazve nga papsa ndima jo kucumaera. Cinjo iji, jakaita kuti mare itame kumosheka maningi.  Pa mukuvo wondhowo, cinjo iji jakaita kuti vacumaeri vakwanise kurovejana najo. Vacumaeri ava vakagondeka, kangaije vainga vo ungano imwe ko nguva yakareba zve vainga no ushamwari no hama no hambzaji vo unganoyo. Asi wari vagajwa kuti vapinde ku ungano imbza. Jesu anodakara maningi kamare ngo kuvona vajiji vakagondeka vecibesera urongwa wo sangano.

15. Kuitisa kudini ushamwari hwedu na Jesu unozovanga maningi kumbejiyo?

¹⁵ Vokuzojwa ngo mujimu mucena vano vetero yo kugara na Jesu kwenda no kwenda no kutonga naye mu Umambo hwa Mwari. Izvokadi kuti ivona vanozogara na Kristu, vanozomuvona no kubhuya naye. (VaEfeso 4:15, 16) Jesu anozokhombija rudo no kungwarira vese vano vetero yo kurarama pasi pano. Ivona avazokwanisi kuvona Jesu. Asi mavhuta amweni anozovona kuti ushamwari hwavo na Jesu unozovanga maningi pavanonga vari muparadhiso vakadakara.—Isaia 9:5, 6.

16. Makomborero api atinowana ngo kuva shamwari ja Jesu?

¹⁶ Jesu anotikoka kuti tive shamwari jake. Patinotendera mukoka uwu, tinova no makomborero akawanda. Inga muezaniso, wari uno iyena anotikhombijira rudo no kutibesera, tinova no vetero yo kurarama kwenda no kwenda. Zve cinosisira maningi ngo cokuti, ushamwari hwedu na Jesu unotitora kuti tive no ushamwari wo phedo na Baba wake, Jehovha. Pacina kukanakana, tino cidakajiso co kudanijwa shamwari ja Jesu.