1. Ongiini to vulu okupanga uukuume wopothingo nagumwe?

OLUNDJI, opo omuntu a ninge kuume koye kopothingo, tango owa pumbwa okukala naye ethimbo. Sho tamu ende tamu lombwelathana iimoniwa yeni nonkene mu uvite, mokweendela ko kwethimbo ohamu panga uukuume. Ihe ngele tashi ya pokupanga uukuume wopothingo naJesus, haaluhe hashi kala oshipu. Omolwashike?

2. Eshongo lyotango lini tu na, ngele tashi ya pokupanga uukuume naJesus?

² Eshongo lyotango olyo kutya inatu tsakanena nale naJesus. Aakriste oyendji yomethelemimvo lyotango, oya li ya taalele eshongo lya faathana. Nonando ongawo, omuyapostoli Petrus okwa ti: “Oongoka mu mu hole, nando inamu mu mona; omwe mu itaala, nando kamu mu wete ngashingeyi.” (1 Pet. 1:8) Onkee ano, otatu vulu okupanga uukuume wopothingo naJesus, nonando inatu tsakanena naye nale.

3. Eshongo etiyali twa taalela olini?

³ Eshongo etiyali olyo kutya ihatu vulu okupopya naJesus. Uuna tatu galikana, ohatu lombwele Jehova nkene tu uvite. Odhoshili kutya ohatu galikana okupitila medhina lyaJesus, ihe haye hatu popi naye. Uushili owo kutya Jesus ina hala tu mu galikane. Omolwashike mbela? Omolwaashoka egalikano oli li omukalo gwokulongela Jehova, na Jehova oye awike e na okulongelwa. (Mat. 4:10) Nonando ongawo, otatu vulu okuulika kutya otu hole Jesus.

4. Eshongo etitatu lini twa taalela, noshike tatu ka kundathana moshitopolwa shika?

 ⁴ Eshongo etitatu olyo kutya Jesus oku li megulu, onkene ihatu vulu okukala naye. Ihe nonando katu li popepi naye, otatu vulu okutseya oshindji kombinga ye. Otatu ka kundathana iinima ine mbyoka tatu vulu okuninga, opo tu koleke uukuume wetu naye. Ihe tango, natu ka konakoneni kutya omolwashike sha simanenena okupanga uukuume wopothingo naKristus.

5. Omolwashike tu na okupanga uukuume naJesus? (Tala wo oshimpungu “ Okupanga uukuume naJesus otaku fala mokupanga uukuume naJehova” nosho wo “ Etaloko li li pandjele kombinga yonkandangala ndjoka Jesus ta dhana.”)

⁵ Otu na okukala ookuume kaJesus, ngele otwa hala okukala tu na ekwatathano ewanawa naJehova. Omolwashike? Natu taleni komatompelo gaali. Lyotango, Jesus okwa li a lombwele aalongwa ye, a ti: “Tate oku mu hole, molwaashoka ne omu hole ndje.” (Joh. 16:27) Okwa ti wo: “Kape na ngoka ta vulu okuya kuTate, okuninga ta pitile mungame.” (Joh. 14:6) Okukambadhala okuninga kuume kaJehova, ngoye inoo panga uukuume wopothingo naJesus, okwa faathana owala nokukambadhala okuya metungo itoo pitile pomweelo. Jesus okwa li a longitha eyele lya faathana, sho a li ta popi kombinga ye mwene e li “osheelo shoonzi.” (Joh. 10:7) Etompelo etiyali olyo kutya Jesus okwa li a ulike lela omaukwatya ga fa gaHe. Okwa li a lombwele aalongwa ye a ti: “Kehe ngoka a mono ndje, okwa mona wo Tate.” (Joh. 14:9) Onkee ano, omukalo gwa simana gwokutseya Jehova, okwiilonga kombinga yonkalamwenyo yaJesus. Ngele otwe shi ningi, otatu ka kala tu mu hole noonkondo. Sho uukuume wetu naJesus tawu ende tawu kolo, ohole yetu yokuhola He nayo otayi ka kola.

6. Omolwetompelo lilwe lini, tu na okukala nekwatathano naJesus? Shi yelitha.

 ⁶ Otwa pumbwa okukala tu na ekwatathano naJesus, opo omagalikano getu ga yamukulwe. Shika otashi pula okuninga oshindji kaashi shi owala okupopya uutumbulilo “medhina lyaJesus,” pehulilo lyomagalikano getu. Otwa pumbwa okuuva ko kutya omomukalo guni Jehova ha longitha Jesus, sho ta yamukula omagalikano getu. Jesus okwa li a lombwele aayapostoli, a ti: “Shaa shoka tamu shi indile medhina lyandje, otandi shi ningi.” (Joh. 14:13) Nonando Jehova oye omuuvi gwomagalikano getu noye he ga yamukula, okwa pa Jesus oonkondopangelo dhokugwanitha po omatokolo Ge. (Mat. 28:18) Onkee ano, manga Kalunga inaa yamukula omagalikano getu, oha tala ngele ohatu tula miilonga omayele ngoka twa pewa kuJesus. Pashiholelwa, Jesus okwa ti: “Ngele hamu dhimine po aantu omayono gawo, nena Ho yeni yomegulu ote mu dhimine po wo omayono geni. Ihe ngele ihamu dhimine po aantu omayono gawo, nena Ho yeni yomegulu ite mu dhimine po omayono geni.” (Mat. 6:14, 15) Inashi simana tuu okuungaunga nayalwe momukalo gwombili moka Jehova naJesus haya ungaunga natse!

7. Oolye taya ka mona uuwanawa mekuliloyambo lyaJesus?

⁷ Mboka ye na uukuume wopothingo naJesus, oyo owala taya ka mona uuwanawa mekuliloyambo lye. Otu shi shi ngiini? Jesus okwa ti kutya ota ka ‘gandja omwenyo gwe molwawo.’ (Joh. 15:13) Aantu aadhiginini mboka ya li ko manga Jesus inee ya kombanda yevi, otaye ki ilonga kombinga ye nokukala ye mu hole. Aalumentu naakiintu mboka, ngaashi Abraham, Sara, Moses nosho wo Rahab, otaya ka yumudhwa, ihe aapiya mbaka aadhiginini yaJehova, nayo otaya ka kala ya pumbwa okupanga uukuume naJesus, opo ya vule okumona omwenyo gwaaluhe. — Joh. 17:3; Iil. 24:15; Heb. 11:8-12, 24-26, 31.

8-9. Ngaashi sha yelithwa muJohannes 15:4, 5, ekwatathano lyetu naJesus ohali tu kwathele tu ninge shike, nomolwashike sha simana?

⁸ Otwa nyanyukwa, sho hatu longo pamwe naJesus miilonga yokuuvitha noyokulonga aantu onkundana ombwanawa yUukwaniilwa. Sho Jesus a li kombanda yevi, okwa li ha longo aantu. Sho a shuna megulu, e li omutse gwegongalo okwa tsikile okuwilika iilonga yokuuvitha noyokulonga aantu. Oha kala e wete nokwa pandula oonkambadhala ndhoka to ningi wu kwathele aantu oyendji ngaashi tashi vulika, ye mu tseye noya tseye wo He. Odhoshili kutya otatu vulu owala okugwanitha po oshilonga shoka kekwatho lyaJehova naJesus. — Lesha Johannes 15:4, 5.

⁹ Oohapu dhaKalunga otadhi tu longo sha yela kutya otu na okukala tu hole Jesus nokutsikila oku shi ninga, opo tu kale twa hokiwa kuJehova. Onkee ano, natu taleni iinima ine mbyoka tatu vulu okuninga, opo tu ninge ookuume kaJesus.

10. Oshike tango tu na okuninga, opo tu kokeke uukuume wetu naJesus?

¹⁰ (1) Tseya Jesus. Shoka otatu vulu oku shi ninga, mokukala hatu lesha omamboMbiimbeli, ngaashi lyaMateus, Markus, Lukas nolyaJohannes. Sho tatu tedhatedha omahokololo gomOmbiimbeli kombinga yonkalamwenyo yaJesus, otashi tu kwathele tu kale tu hole Jesus nokukala twe mu simaneka, omolwomukalo omwaanawa moka a li a ungaunga naantu. Pashiholelwa, nonando oye a li Mwene gwawo, ka li a ungaunga naalongwa ye ya fa aapika. Pehala lyaashono, okwa li he ya lombwele omadhiladhilo ge gomuule nomaiyuvo ge. (Joh. 15:15) Jesus okwa li ha kala e  ya uvitile uukwawo wanankali nokulila pamwe nayo. (Joh. 11:32-36) Nokuli naapataneki ye oya li ye shi zimine kutya okwa li kuume kaamboka ya taamba ko etumwalaka lye. (Mat. 11:19) Uuna tatu holele omukalo moka Jesus a li a ungaunga naalongwa ye, otatu ka kala tu na ekwatathano ewanawa nayalwe, twa gwanenwa, twa nyanyukwa notatu ka kala tu hole notwa simaneka Kristus shi vulithe nale.

11. Oshinima oshitiyali shini tu na okuninga, opo tu kale ookuume kaJesus, nomolwashike sha simana?

¹¹ (2) Kala ho dhiladhila nokukatuka ngaashi Jesus. Ngele otwa kala tu shi omukalo gwe gwokudhiladhila noku gu holela, otatu ka vula okukala tu na uukuume wopothingo naye. (1 Kor. 2:16) Ongiini tatu vulu okuholela Jesus? Natu taleni koshiholelwa shimwe. Jesus okwa li ha gandja unene eitulomo kokukwathela yalwe, ihe hakokwiiyopalela ye mwene. (Mat. 20:28; Rom. 15:1-3) Molwaashoka osho a li ha dhiladhila ngawo, okwa li e na ombepo yokwiiyamba noyokudhimina po. Ka li ha uvithwa nayi mbala kwaashoka aantu ya li haya popi kombinga ye. (Joh. 1:46, 47) Ka li wo ha etha omapuko gayalwe gomonakuziwa ga nwethe mo etaloko lye kombinga yawo. (1 Tim. 1:12-14) Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Joh. 13:35) Oshi li pandunge okwiipula to ti: “Mbela ohandi landula ngaa oshiholelwa shaJesus mokuninga ngaashi tandi vulu, ndi kaleke po ombili pokati kandje nooitaali ooyakwetu?”

12. Oshinima oshititatu shini tu na okuninga, opo tu kale ookuume kaJesus, nongiini tatu vulu oku shi ninga?

¹² (3) Ambidhidha aamwahe yaKristus. Jesus okwa tala ko shoka hatu ningile aamwahe aagwayekwa, onga oye tatu shi ningile. (Mat. 25:34-40) Omukalo gwa simanenena moka hatu ambidhidha aagwayekwa, omokukutha ombinga ngaashi tatu vulu miilonga yokuuvitha kombinga yUukwaniilwa noyokuninga aantu aalongwa, mbyoka Jesus a lombwela aalanduli ye, ye yi longe. (Mat. 28:19, 20; Iil. 10:42) Aamwahe yaKristus otaya vulu owala okugwanitha po iilonga yokuuvitha mbyoka tayi longwa muuyuni awuhe kunena, kekwatho ‘lyoonzi dhilwe.’ (Joh. 10:16) Ngele ngoye owu li gumwe gwomoonzi dhilwe, oshikando kehe to kutha ombinga miilonga mbika, ito ulike owala kutya owu hole aagwayekwa, ihe naJesus wo.

13. Ongiini tatu vulu okutula miilonga omayele gaJesus ngoka ge li muLukas 16:9?

¹³ Otatu vulu wo okuninga ookuume kaJehova naJesus, mokwaambidhidha pashimaliwa iilonga mbyoka taya wilike. (Lesha Lukas 16:9.) Pashiholelwa, otatu vulu okwaambidhidha pashimaliwa iilonga yetu yomuuyuni awuhe, nomayambidhidho ngoka ohaga kwathele miilonga yoku ka uvitha onkundana ombwanawa komahala gokokule, mokutunga, mokukaleka omatungo moka hatu longelele mo Jehova monkalo ombwanawa nomokukwathela mboka ya dhengwa kiiponga yopaunshitwe. Otatu vulu wo okwaambidhidha egongalo lyetu pashimaliwa nosho wo mboka tu shi kutya oye li mompumbwe. (Omayel. 19:17) Ndhika odho omikalo moka tatu vulu okwaambidhidha aamwahe yaKristus.

14. Ngaashi sha popiwa mAaefeso 4:15, 16, oshinima oshitine shini tu na okuninga, opo tu kale ookuume kaJesus?

¹⁴ (4) Kala ho ambidhidha omalongekidho gegongalo lyopaKriste. Otatu ka koleka uukuume wetu naJesus ngoka e li omutse gwegongalo, uuna tatu vulika kwaamboka ya langekwa po ye tu tonatele. (Lesha Aaefeso 4:15, 16.) Pashiholelwa, ngashingeyi ohatu kambadhala okushilipaleka kutya Iinyanga yUukwaniilwa ayihe, otayi longithwa ngaashi tashi vulika. Shika osha ningitha omagongalo gamwe ga tulwe mumwe nosho wo iitopolwa  moka haga uvithile yi tendululwe. Elongekidho ndika olya kwathele ehangano kaali longithe oshimaliwa oshindji. Shika osha ningitha wo aauvithi yamwe ya lundululilwe komahala galwe. Aauvithi aadhiginini mboka otashi vulika megongalo lyontumba ya kala mo omimvo odhindji, notashi vulika yi igilila aamwatate naamwameme yamo. Ihe ngashingeyi oya pulwa ya tembukile kegongalo lilwe. Jesus iha kala tuu a nyanyukwa, sho e wete aalongwa ye mboka aadhiginini taya tsu kumwe nelongekidho ndyoka!

15. Uukuume wetu naJesus otawu ka hwepopala ngiini monakuyiwa?

¹⁵ Mboka ya gwayekwa nombepo ondjapuki, oye na etegameno lyoku ka pangela pamwe naJesus sigo aluhe mUukwaniilwa waKalunga. Odhoshili kutya otaya ka kala naJesus, ye mu wete nokupopya naye. (Joh. 14:2, 3) Mboka ye na etegameno lyoku ka kala kombanda yevi, nayo Jesus ote ke ya ulukila ohole nota ka kala e na ko nasha nayo. Nonando itaye ke mu mona, ekwatathano lyawo naye otali ka kola shi vulithe nale, sho taya nyanyukilwa onkalamwenyo ndjoka Jehova naJesus ye ya longekidhila. — Jes. 9:6, 7.

16. Omayambeko geni tatu ka mona, uuna tu li ookuume kaJesus?

¹⁶ Uuna twa taamba ko ehiyo lyaJesus tu kale ookuume ke, ohashi tu etele omayambeko ogendji. Pashiholelwa, ohatu mono uuwanawa mohole ye nomeyambidhidho lye ngashingeyi. Otwa pewa ompito yoku ka kala nomwenyo sigo aluhe. Shoka sha simanenena, uukuume wetu naJesus otawu ke tu kwathela tu kale tu na ekwatathano lyopothingo naHe, Jehova. Oshi li lela uuthembahenda okwiithanwa ookuume kaJesus!