1. Hadia zinangea tafalua enaʼö tola fahuwu ita ba zi samösa niha?

SI TOʼÖLÖNIA, enaʼö tola fahuwu ita ba zi samösa niha, moguna fariawö ita ba niha daʼö. Me no aefa tadunö-dunö nösi dödöda hegöi si no irai alua khöda, awena tola fahuwu ita khönia. Hizaʼi, na omasi ita fahuwu khö Yesu, so ösa daha-taha nitaögöda. Hadia manö duma-dumania?

2. Hadia daha-taha si oföna nitaögöda?

² Daha-taha si oföna, lö irai falukha ita khö Yesu. Ato göi niha Keriso ba götö siföföna si lö irai falukha khö Yesu. Hewaʼae simanö, imane sinenge sotöi Fetero, ”Hewaʼae lö irai miʼila ia, hizaʼi miʼomasiʼö ia. Lö miʼila ia iadaʼa, ba tola mamati ami khönia si fao faʼowua-wua dödö ba faʼomuso dödö sebua si tebai mukhalaigö.” (1 Fet. 1:8) Börö daʼö, tola fahuwu ita khö Yesu hewaʼae na lö irai falukha ita khönia.

3. Hadia daha-taha si dua nitaögöda?

³ Daha-taha si dua, tebai fahuhuo ita khö Yesu. Na mangandrö ita, fahuhuo ita khö Yehowa. Sindruhu sa wa mangandrö ita ba döi Yesu, hizaʼi tenga khönia fahuhuo ita. Baero daʼö, lö omasi Yesu na khönia talau mangandrö. Hana? Börö me fangandrö andrö, tefarahu ia ba lala wamosumange, ba ha Yehowa zinangea tafosumange. (Mat. 4:10) Hewaʼae simanö, tola taforomaʼö wa taʼomasiʼö Yesu.

4. Hadia daha-taha si tölu, ba hadia nitutunöda ba artikel daʼa?

⁴ Daha-taha si tölu, ba zorugo auri Yesu, andrö wa tebai fariawö ita khönia. Hewaʼae simanö, oya zi tola taʼila sanandrösa khö Yesu. Datatutunö öfa ngawalö zinangea tafalua enaʼö itugu aro wahuwusada khö Yesu. Hizaʼi, si oföna, datatutunö hadia mbörö wa moguna fahuwu ita khö Keriso.

5. Hadia mbörö wa moguna fahuwu ita khö Yesu? (Faigi göi kotak ” Na Fahuwu Ita khö Yesu, Tola Fahuwu Ita khö Yehowa” hegöi ” Lala Wangera-ngera si Tefaudu Sanandrösa khö Yesu”.)

⁵ Moguna fahuwu ita khö Yesu enaʼö tobali ita si fahuwu khö Yehowa. Hadia mbörö? Nehegö zi dombua dane-dane andre. Si oföna, imane Yesu khö ndra nifahaʼönia, ”Iʼomasiʼö ami Ama, börö me no miʼomasiʼö ndraʼo.” (Yoh. 16:27) Imane nasa, ”Lö sondrugi Ama na lö itörö ndraʼo.” (Yoh. 14:6) Na omasi ita fahuwu khö Yehowa hizaʼi lö fahuwu ita khö Yesu, amaedolania hulö na möi ita bakha ba zi sambua tomosa hizaʼi lö tatörö mbawandruhönia. Iʼogunaʼö göi Yesu duma-duma si fagölö me ifotöi ia ’bawandruhö ba mbiri-biri’. (Yoh. 10:7) Dane-dane si dua, moʼahonoa Yesu ba woloʼö amuata Namania. Imane khö ndra nifahaʼönia, ”Dozi si no mangila yaʼo ba no göi iʼila Nama.” (Yoh. 14:9) Andrö, sambua lala enaʼö aboto ba dödöda Yehowa yaʼia daʼö na tafahaʼö ita sanandrösa ba waʼauri Yesu. Na lö mamalö tafahaʼö ita sanandrösa khö Yesu, itugu taʼomasiʼö ia. Ba na itugu aro wahuwusada khö Yesu, itugu taʼomasiʼö Namania.

6. Hadia dane-dane tanö böʼö wa moguna fahuwu ita khö Yesu? Tutunö.

⁶ Moguna fahuwu ita khö Yesu enaʼö tefondrondrongo wangandröda. Lö obönö na tawaʼö wa mangandrö ita ”ba döi Yesu”. Moguna aboto ba dödöda hewisa lala Yehowa ba wangogunaʼö Yesu ba wameʼe fanema li ba wangandröda. Imane Yesu khö ndra sinengenia, ”Fefu hadia niʼandrömi ba döigu hasambalö ufalua.” (Yoh. 14:13) Hewaʼae na Yehowa  zamondrondrongo hegöi sameʼe fanema li ba wangandröda, no ibeʼe khö Yesu halöwö ba wamalua angetulania. (Mat. 28:18) Andrö, fatua lö ibeʼe wanema li ba wangandröda Yehowa, ifaigi ua hadia no tafalua mene-mene nibeʼe Yesu. Duma-dumania, imane Yesu, ”Na miʼefaʼö zala niha böʼö, iʼefaʼö göi zalami andrö Amami si so ba zorugo. Ba na lö miʼefaʼö zala niha böʼö, ba lö göi iʼefaʼö zalami andrö Amami.” (Mat. 6:14, 15) Andrö, moguna taforomaʼö waʼasökhi dödö ba niha böʼö, simane nifalua Yehowa hegöi Yesu khöda!

7. Haniha manö zanema bua moroi ba höli nibeʼe Yesu?

⁷ Ha niha si fahuwu khö Yesu zi tola manema bua moroi ba höli si no ibeʼe. Hezo tola taʼila daʼö? Iwaʼö Yesu wa ’itehegö nosonia salahi zi fahuwu khönia’. (Yoh. 15:13) So nono mbanua Lowalangi sauri fatua lö si möi Yesu ba gulidanö. Moguna göi lafahaʼö ira sanandrösa khö Yesu ba laʼomasiʼö ia. Na no tesusugi niha samosumange Lowalangi, simane Aberahamo, Sara, Moze, hegöi Rakhaba, moguna tobali ira si fahuwu khö Yesu enaʼö tola laʼokhögö waʼauri si lö aetu.​—Yoh. 17:3; Hal. 24:15; Heb. 11:8-12, 24-26, 31.

8-9. Simane nitutunö ba Yohane 15:4, 5, hadia zi tola tafalua börö me fahuwu ita khö Yesu, ba hadia mbörö wa moguna sibai enaʼö lö mamalö fahuwu ita khö Yesu?

⁸ Omuso dödöda börö me tola falulu fohalöwö ita khö Yesu ba wanuriaigö turia somuso dödö, hegöi ba wamahaʼö niha böʼö sanandrösa ba Wamatörö Lowalangi. Me auri Yesu ba gulidanö, ifahaʼö niha böʼö. Me no möi ia ba zorugo ba tobali ia högö ba mbanua niha Keriso, lö mamalö ibeʼe Yesu wanuturu lala ba halöwö fanuriaigö hegöi ba wombaliʼö nifahaʼö. Ifaigi-faigi ba iʼameʼegö tödö wamorege si no tafalua ba wanolo niha ba wangokhögö faʼaboto ba dödö sanandrösa khönia hegöi khö Namania. Sindruhunia, tola tafalua halöwö daʼö börö wanolo moroi khö Yehowa hegöi Yesu.​—Baso Yohane 15:4, 5.

⁹ Ifahaʼö ita Taromali Lowalangi wa moguna taʼomasiʼö Yesu ba lö mamalö taʼomasiʼö ia enaʼö tola taʼomusoiʼö dödö Yehowa. Andrö iadaʼa, datatutunö zi öfa ngawalö zinangea tafalua enaʼö tola tobali ita si fahuwu khö Yesu.

10. Hadia lala si oföna sinangea tafalua enaʼö tola tobali ita si fahuwu khö Yesu?

¹⁰ (1) Okhögö waʼaboto ba dödö sanandrösa khö Yesu. Tola tafalua daʼa na tabaso Zura Niʼamoniʼö ba mbuku Mataiʼo, Mareko, Luka ba Yohane. Na taʼangerönusi ayati Zura Niʼamoniʼö sanutunö waö-waö waʼauri Yesu, tola taʼomasiʼö ba taʼameʼegö tödö Yesu börö me no taʼila gamuatania ba niha. Duma-dumania, hewaʼae na yaʼia Zamahaʼö yaʼira, lö iʼosawuyu ndra nifahaʼönia. Hizaʼi, itutunö khöra lala wangera-ngerania hegöi nirasoinia. (Yoh. 15:15) Fao khöra Yesu ba waʼabu dödö ba fao göi ia khöra ba wege-ege. (Yoh. 11:32-36) Lafaduhuʼö göi ira niha si faʼudu khönia wa fahuwu ia ba niha sanemaʼö turia nifaʼemania. (Mat. 11:19) Na taʼoʼö gamuata Yesu khö ndra nifahaʼönia, tola itugu sökhi gamakhaitada ba niha böʼö, itugu tarasoi waʼomuso dödö, ba itugu taʼomasiʼö ba tafosumange Keriso.

11. Hadia lala si dua sinangea tafalua enaʼö tola tobali ita si fahuwu khö Yesu, ba hadia mbörö wa moguna sibai daʼö?

 ¹¹ (2) Oʼö lala wangera-ngera Yesu hegöi amuatania. Na itugu tedou waʼaboto ba dödöda ba taʼoʼö lala wangera-ngerania, tola itugu aro wahuwusada khönia. (1 Kor. 2:16) Hewisa lalada ba woloʼö duma-duma Yesu? Angeragö sambua duma-duma. Abölö iʼangeragö Yesu sanandrösa ba wanolo niha böʼö moroi ba wangomusoiʼö tödönia samösa. (Mat. 20:28; Rom. 15:1-3) Börö lala wangera-ngerania andrö, tola iforomaʼö waʼaoha gölö hegöi fangefa sala. Lö alio tetutu dödönia börö wehede niha böʼö sanandrösa khönia. (Yoh. 1:46, 47) Lö itehegö tobali daha-taha irege tebai fahuwu ia ba zi samösa niha ha börö me no ifalua zala ba zilalö. (1 Tim. 1:12-14) Imane Yesu, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yoh. 13:35) Moguna ösofu khöu samösa, ”Hadia no uʼoʼö duma-duma Yesu ba uforege sibai enaʼö atulö ndraʼo khö ndra talifusögu?”

12. Hadia lala si tölu sinangea tafalua enaʼö tola tobali ita si fahuwu khö Yesu, ba hewisa lalada ba wamalua daʼö?

¹² (3) Tuhini ndra talifusö Keriso. Gofu hadia ia nifaluada ba wotuhini ndra talifusö Yesu si no tebayoini, ba wamaigi Yesu no khönia tafalua daʼö. (Mat. 25:34-40) Lala sabölö tohude ba wotuhini niha nibayoini, yaʼia daʼö na fao ita khöra ba wamalua oroisa Yesu ba wanuriaigö turia somuso dödö, hegöi ba wombaliʼö nifahaʼö. (Mat. 28:19, 20; Hal. 10:42) Ha börö wanolo moroi khö ndra ’biri-biri tanö böʼö’ wa tola tefalua halöwö fanuriaigö ba zi sagörö ulidanö. (Yoh. 10:16) Na farahu ndraʼugö ba mbiri-biri tanö böʼö, no öforomaʼö waʼomasimö khö dalifusö Keriso hegöi khö Yesu, na fao ndraʼugö ba wamalua halöwö daʼa.

13. Hewisa wamaluada mene-mene Yesu nisura ba Luka 16:9?

¹³ Tola fahuwu ita khö Yehowa hegöi khö Yesu, na taʼogunaʼö gokhötada ba wotuhini halöwö nidöniaʼöra. (Baso Luka 16:9.) Duma-dumania, tola tabeʼe dolo-tolo ba wotuhini halöwö ba zi sagörö ulidanö. Muʼogunaʼö dolo-tolo andre ba wamalua halöwö fanuriaigö ba nahia saröu, ba wamazökhi hegöi ba wondrorogö tomosa niʼogunaʼö ba wotuhini famosumange sindruhu, hegöi ba wameʼe fanolo ba waʼaniha ba zi göna abula dödö. Tola göi tabeʼe dolo-tolo ba mbanua niha Keriso si farahu yaʼita ba tatolo ndra talifusöda sinangea mutolo. (Gamd. 19:17) Fefu daʼa, no sambua lala si tola tafalua ba wotuhini ndra talifusö Keriso.

14. Simane nitutunö ba Efeso 4:15, 16, hadia lala si öfa sinangea tafalua enaʼö tola tobali ita si fahuwu khö Yesu?

¹⁴ (4) Tuhini gangetula si no mutatugöi ba mbanua niha Keriso. Enaʼö itugu aro wahuwusada khö Yesu si tobali högö ba mbanua niha Keriso, moguna falulu fohalöwö ita ba niha nituyunia tobali sondrorogö yaʼita. (Baso Efeso 4:15, 16.) Duma-dumania, taforege iadaʼa ba wangogunaʼö Balai Mbanua Lowalangi ba lala sabölö tefaudu. Börö daʼö, so ösa mbanua niha Keriso si no muʼosambuaʼö, ba so ösa nola-ola nahia wanuriaigö si no mubulöʼö. Börö zi no mutatugöi andre, oya sibai gefe si tola muʼöna-önaiʼö. Hizaʼi börö gangetula daʼa, so ösa ndra sanuriaigö si tebulö lala waʼauri. Ira sanuriaigö  si lö faröi andre, te no farahu ira ba zi sambua mbanua niha Keriso ba zi hauga fakhe faʼara, ba no laʼokhögö wahuwusa saro khö ndra talifusö si so ba daʼö. Hizaʼi iadaʼa, muʼandrö khöra enaʼö findra ba mbanua niha Keriso tanö böʼö. Tatu omuso dödö Yesu na laʼoʼö gangetula si no mutatugöi andre ira nifahaʼönia si lö faröi!

15. Hewisa wa tola itugu fahuwu ita khö Yesu ba zi so miföna?

¹⁵ Niha si no tebayoini eheha niʼamoniʼö, laʼokhögö dötönafö enaʼö fao ira khö Yesu irugi zi lö aetu, ba latema gondröita ba Wamatörö Lowalangi. Tola laʼila Keriso, fahuhuo ira khönia, ba fariawö ira. (Yoh. 14:2, 3) Niha sangokhögö dötönafö ba gulidanö, tola göi larasoi wa iʼomasiʼö ba iʼameʼegö tödö ira Yesu. Hewaʼae na lö irai laʼila Yesu, tola itugu aro wahuwusara khö Yesu börö me no larasoi waʼomuso dödö ba waʼauri nibeʼe Yehowa hegöi Yesu khöra.​—Yes. 9:6, 7.

16. Hadia manö howu-howu nitemada na no tobali ita si fahuwu khö Yesu?

¹⁶ Na tatema wogaoni moroi khö Yesu enaʼö tobali ita si fahuwu khönia, oya howu-howu nitemada. Duma-dumania, tola tatema mbua moroi ba waʼomasinia hegöi fanolonia yaʼita. Ibeʼe khöda ginötö ba wangokhögö faʼauri si lö aetu. Sabölö moguna, na fahuwu ita khö Yesu, tola tatema mbua sabölö tohude, yaʼia daʼö ba wangokhögö fahuwusa saro khö Namania Yehowa. Tatu no töi sebua khöda wa lafotöi ita si fahuwu khö Yesu!