Kanganaya emyatsi eyirimo

Kanganaya emyatsi eyirimo

OMWATSI W’ERIGHA 17

“Ngabahula mo bira”

“Ngabahula mo bira”

“Ngabahula mo bira, kusangwa nabiribaminyisya emyatsi yosi eyo ngowa uku Tata wage.”​—YOANE 15:15.

OLWIMBO 13 Kristo, eky’erileberyako kyetu

EBIKENDIKANIBWAKO *

1. Ni kyahi kyo wangakola wamanza eritsukisya obwira obuwene n’omundu mulebe?

OMUGHULU ukasonda eritsukisya obwira obuwene haghuma n’omundu mulebe, omwatsi w’erimbere owo wangakola ry’erilabya endambi haghuma naye. Omughulu mukakanaya, mukabwirana oko ebyo mukalengekanaya n’ebyo mwabirilabamo, mukabya bira. Aliwe twamabyanza eribya bira ba Yesu, hane emyatsi eyangaleka ikyatukalako. Emighuma y’oko myatsi eyo ni yahi?

2. Ni mwatsi wahi ow’erimbere owakaleka ikyatukalako eribya bira ba Yesu?

2 Omwatsi w’erimbere owakaleka ikyatukalako eribya bira ba Yesu ni busana situlitwatalangira Yesu burora-rora. Abakristo bangyi b’oko mughulu w’abakwenda nabo mubatalangira Yesu burora-rora. Aliwe, omukwenda Petero mwabugha ati: “Mukanza Yesu n’omo mutetamulolako, kandi mukamwikiriraya n’omo mutetamulangira lino.” (1 Pet. 1:8) Kwesi kinatokekene eritsukisya obwira obuwene haghuma na Yesu n’omo tutetwatamulangira burora-rora.

3. Ni mwatsi wahi ow’akabiri owakaleka ikyatukalako eribya bira ba Yesu?

3 Omwatsi w’akabiri ni busana sitwangatoka erikania na Yesu. Omughulu tukasaba, tukakanaya na Yehova. Kwenene, tukasaba erilabira erina lya Yesu, aliwe iye yo tutekanaya naye. Yesu syanzire itwabya tukamusaba. Busanaki? Kundi erisaba ni ramya, kandi Yehova iye musa yutolere eriramibwa. (Mat. 4:10) N’omo bine bitya, twanganakangania olwanzo lwetu oko Yesu.

4. Omwatsi w’akasatu owakaleka ikyatukalako eribya n’obwira obuwene haghuma na Yesu ni wahi, kandi tukendikania okuki omo mwatsi ono?

4 Omwatsi w’akasatu ni busana Yesu ikere omo lubula, neryo sitwangatoka erilabya endambi haghuma naye. Aliwe twanganaminya emyatsi mingyi oko Yesu n’omo tutetwangalabya endambi yo haghuma naye. Tukendilangira emyatsi ini eyangatuwatikya eriwatya obwira bwetu haghuma naye. Tukatsuka, tulangire busanaki ni ky’omughaso eribya n’obwira obuwene haghuma na Kristo.

BUSANAKI NI KY’OMUGHASO OKW’ITWE ERIBYA BIRA BA YESU?

5. Busanaki litolere itwabya bira ba Yesu? (Lebaya ehisanduku “ Obwira obuwene haghuma na Yesu bukaleka itwabya n’obwira obuwene haghuma na Yehova” na “ Ulangire omubírí wa Yesu omo lulengo olutolere.”)

5 Litolere itwabya bira ba Yesu twamanza eribya n’obwira obuwene haghuma na Yehova. Busanaki? Tulangire emyatsi ibiri eyikaleka. Ow’erimbere, Yesu mwabwira abigha biwe ati: “Tata abanzire kusangwa munianzire.” (Yoa. 16:27) Kandi mwabugha ati: “Sihali mundu ukahika uku Tata ate kwingye.” (Yoa. 14:6) Omundu amasonda eribya mwira wa Yehova isyawite obwira obuwene haghuma na Yesu kilingene n’erisonda eringira omo nyumba butsira erilaba omo lukyo. Yesu mwakolesya ekisosekanio ekiri ng’ekyo omughulu abugha ati iye yo “lukyo lw’esyombuli.” (Yoa. 10:7) Omwatsi w’akabiri Yesu mwakangania emibere ya Tata wiwe omo nzira eyihika-hikene. Mwabwira abigha biwe ati: “Oyo wamanyilangira iniabirilangira Tata.” (Yoa. 14:9) Kwesi enzira eyuwene eyikatuwatikaya eriminya Yehova ry’erigha emyatsi eyilebirye amaisa wa Yesu. Twamayikasa eriminya Yesu yo ndeke, tukamwanza kutsibu. Kandi olwanzo lwetu oko Yesu lwamabikula, olwanzo lwetu oko Tata wiwe nalo ilukendikula.

6. Oghundi mwatsi owakaleka ikyabya ky’omughaso okwitwe eribya n’obwira obuwene haghuma na Yesu ni wahi? Kanaya.

6 Litolere itwabya n’obwira obuwene haghuma na Yesu oMungu atoke erisubirya oko misabe yetu. Ekyo kikasaba erikola bingyi kulenga eribya tukabugha lisa tuti “erilabira omo rina lya Yesu” oko mwiso w’omusabe. Litolere itwaminya Yehova ng’akakolesaya Yesu y’ati omughulu akasubiraya oko misabe yetu. Yesu mwabwira abakwenda ati: “Emyatsi yosi mukabulaya omo lina lyage nasyakolayo.” (Yoa. 14:13) N’omo Yehova yukahulikirira n’erisubirya oko misabe yetu, abiriha Yesu y’ehamuli y’eriberererya ebyo akayisogha erikola. (Mat. 28:18) Busana n’ekyo, embere sy’erisubirya oko misabe yetu, akatsuka erilangira nga tukanaghanyira abandi ngoko Yesu atuhana. Eky’erileberyako, Yesu mwabugha ati: ‘Mwamabuyira abandu amalolo awo babiribakolera, Tata wenyu w’elubula asyababuyira nibya. Nikwa mwamatendibuyira abandi b’amalolo bakabakolera, Tata wenyu syendisyababuyira amalolo awo mwabirikola’ (Mat. 6:14, 15) Neryo, ni ky’omughaso okw’itwe erikolera abandi ngoko Yehova na Yesu bakatukolera.

7. Ni bahi bo bakabana endundi eyikasira omo mbanulo eyo Yesu aliha?

7 Abawite obwira obuwene haghuma na Yesu basa bo bakasyabana endundi eyikasira omo mbanulo eyaliha. Tukaminya ekyo kyo tuti? Yesu mwabugha ati angaherere “engebe yiwe busana n’abira biwe.” (Yoa. 15:13) Abataleghula ababya oko kihugho embere Yesu ase bakendisyigha oko Yesu n’erimwanza. Abalume n’abakali nga Abrahamu, Sara, Musa, na Rahabu bakendisyalubukibwa; aliwe kikendisyatolera abaghombe abatunganene ba Yehova abo nabo ibabya n’obwira obuwene haghuma na Yesu imo batoka eribana engebe y’erikota.​—Yoa. 17:3; Emib. 24:15; Ebr. 11:8-12, 24-26, 31.

8-9. Ngoko kiri omo Yoane 15:4, 5, obwira obuwene haghuma na Yesu bukatuwatikaya erikolaki, n’ekyo ni ky’omughaso busanaki?

8 Tutsemire kutsibu erikola haghuma na Yesu omo mubírí w’eritulira n’erikangirirya engulu mbuya y’oBwami. Omughulu Yesu abya oko kihugho, abya mukangirirya. N’eritsuka ekiro asuba elubula, Yesu, omutwe w’endeko, anemulola embere erisondola omubírí w’eritulira n’ow’erikangirirya. Akatsema akalangira ukayikasa ngoko wangatoka eriwatikya abandu bangyi batoke erimuminya iye haghuma na Tata wiwe. Oko kwenene, ekyangatuwatikya eriberererya omubírí oyu, b’obuwatikya bwa Yehova na Yesu.​—Soma Yoane 15:4, 5.

9 Ekinywa ky’oMungu kikatubwira burora-rora kiti twamanza eritsemesya Yehova litolere itwanza Yesu n’erilola embere erimwanza. Tukanaye oko myatsi ini eyangatuwatikya eribya bira ba Yesu.

NGOKO TWANGABYA BIRA BA YESU

Wanganabya mwira wa Yesu (1) wamabimuminya ndeke, (2) wamabya ukalengekania n’erikola nga ye, (3) wamabiwatikya abaghala babo Kristo, kandi (4) wamabiligha erikwama esyondegheka sy’endeko (Lebaya enungu 10-14) *

10. Twamanza eribya bira ba Yesu, eky’erimbere ekyo twangakola ni kyahi?

10 (1Uminye Yesu yo ndeke. Twanganakola ekyo omwisoma ebitabu by’eBiblia bino: Matayo, Mariko, Luka, na Yoane. Omughulu tukalengekanaya buli oko myatsi eyiri omo Biblia eyikakanaya oko maisa wa Yesu, tukanza Yesu n’erimusikya busana abya akakolera abandu n’olukogho. Eky’erileberyako, n’omo Yesu yo wabya Mukama w’abigha biwe, mwatakolerabo nga bakobe. Omo mwanya w’ekyo, iniakababwira ebyo akalengekanaya kandi ngoko akayowa. (Yoa. 15:15) Omughulu babya omo bulighe, Yesu naye iniakabya omo bulighe haghuma nabo. (Yoa. 11:32-36) Nibya n’esyonzighu siwe musyalangira ngoko abya mwira w’abandu abikiriraya amakangirirya wiwe. (Mat. 11:19) Omughulu tukakolera abandi ngoko Yesu abya akakolera abigha biwe, tukabya omo bughuma n’abandi, tukabya n’obutseme, kandi tukanza Yesu n’erimusikya kutsibu.

11. Twamanza eribya bira ba Yesu, eky’akabiri ekyo twangakola ni kyahi, n’erikola tutya ni ky’omughaso busanaki?

11 (2Ubye ukalengekania n’erikola nga Yesu. Tukabya twaminya Yesu yo ndeke n’eribya n’amalengekania awali nga wiwe, obwira bwetu naye bukawata kutsibu. (1 Kor. 2:16) Twangigha Yesu yo tuti? Langira eky’erileberyako kighuma. Yesu syabya akalengekania ngoko angayitsemesya iyuwene, aliwe abya iniakalengekanaya kutsibu ngoko angawatikya abandi. (Mat. 20:28; Rom. 15:1-3) Eribya n’amalengekania ng’ayo mukyamukuna eribya akaghanyira abandi n’eribakolera. Isyalihitana luba-luba busana n’ebyo abandu babya bakamubughako. (Yoa. 1:46, 47) Kandi isyalibya n’amalengekania awatuwene oko bandu busana n’amalolo owo bakola kera. (1 Tim. 1:12-14) Yesu mwabugha ati: “Mwamabya n’olwanzo, omughuma busana n’oghundi, abandu bosi basyaminya ko muli biga bage.” (Yoa. 13:35) Kyowene eriyibulya uti, “Nganigha Yesu omwiyikasa erikola ekyosi ekyo nangatoka nitoke eribya omo bughuma n’abaghala n’abali betu?”

12. Twamanza eribya bira ba Yesu, eky’akasatu ekyo twangakola ni kyahi, kandi twangakolakyo tuti?

12 (3Uwatikaye abaghala babo Kristo. Ebyo tukakolera abaghala babo Kristo abahirirwe kw’amaghuta, Yesu akalangira iye nga yo tukabikolera. (Mat. 25:34-40) Enzira ngulu kutsibu eyo tukawatikirayamo abahirirwe kw’amaghuta ry’erikola kutsibu omo mubírí w’eritulira n’eriyira abigha, omubírí owo Yesu abwira abigha biwe ati bakole. (Mat. 28:19, 20; Emib. 10:42) Abaghala babo Kristo sibangatoka erikola omubírí munene owakakolawa lino omo kihugho kyosi butsira obuwatikya ‘bw’esindi mbuli.’ (Yoa. 10:16) Wamabya ighuli w’oko sindi mbuli, uminye ngoko obuli ndambi ukakola oko mubírí w’eritulira, ukanganaya ngoko wanzire abahirirwe kw’amaghuta na Yesu kutya.

13. Twangakolesya tuti erihano lya Yesu eriri omo Luka 16:9?

13 Kandi tukabya bira ba Yehova na Yesu omughulu tukawatikaya omo syofranga syetu omubírí owo bakasondola. (Somo Luka 16:9.) Eky’erileberyako, twanganateka ebihembo oko mubírí w’omo kihugho kyosi, n’ebihembo ebyo byanganakolesibwa eriwatikya omubírí w’eritula engulu mbuya omo biharo by’ehali, erihimba n’erikokotya Ebisenge by’oBwami n’eyindi myanya y’eriramiryamo, n’eriwatikya abalyahikirawa n’obuhanya bulebe. Twanganateka n’ebihembo eriwatikya endeko eyo tulimo n’eriwatikya abo twasi ngoko balaghire oko buwatikya. (Emis. 19:17) Esyo ni nzira twangawatikiryamo abaghala babo Kristo.

14. Ngoko kikanganibwe omo Abanya Efeso 4:15, 16, ni kyahi eky’akani ekyo twangakola twamanza eribya bira ba Yesu?

14 (4Ukwame esyondegheka sy’endondeko ya Yehova. Tukawataya obwira bwetu haghuma na Yesu omutwe w’endeko, omughulu tukakola omo bughuma n’abalikyetu abakatuteghaya. (Soma Abanya Efeso 4:15, 16.) Eky’erileberyako, tunemuyikasa obuli Kisenge ky’oBwami kikolesibawe ndeke. Busana n’ekyo, esyondeko silebe syabirihirwa haghuma, n’ebiharo bilebe byabirisubwamo buhya-buhya. Busana n’endegheka eyi endondeko ya Yehova yabiribika esyofranga nyingyi esyo abandu babiriteka eriwatikya endondeko ya Yehova. Aliwe, busana n’endegheka eyo, abatuliri balebe mubasabwa eriyibegherya oko mibere mihya-mihya. Alinga abatuliri bataleghula abo, babya ibabirikolera omo ndeko nyilebe omo myaka mingyi, neryo ibabiribya n’obwira obunokire haghuma n’abaghala n’abali babo b’omo ndeko eyo. Aliwe ibasabwa eriyakolera omo yindi ndeko. Yesu akatsema kutsibu akalangira aBakristo bataleghula abo bakaligha erikwama endegheka ng’eyo.

ABIRA BA YESU KERA NA KERA

15. Obwira bwetu haghuma na Yesu bukendisyuwana buti omo biro ebikasa?

15 Abahirirwe kw’amaghuta bawite amaha w’erisyikala haghuma na Yesu kera na kera, n’eritabala omo Bwami b’oMungu haghuma na Yesu. Bakendisyabya naye kwenene-kwenene​—bakendisyamulangira, bakendisyakania naye, n’erilabya endambi yo haghuma naye. (Yoa. 14:2, 3) Abawite amaha w’erisyikala oko kihugho nabo, Yesu akendisyabanza n’eribatsomana. N’omo batendisyalola oko Yesu, bakendisyabya n’obwira obuwatire haghuma na Yesu, ibatsemera engebe eyo balyabana erilabira Yehova na Yesu.​—Isa. 9:6, 7.

16. Obwira bwetu haghuma na Yesu bukatuletera emiyisa yahi?

16 Omughulu tukaligha erikokibwa lya Yesu ery’eribya bira biwe, tukabana emiyisa mingyi. Eky’erileberyako, tukayilangirira olwanzo n’obuwatikya bwiwe erilua lino. Tukahabawa akanya k’eribyaho kera na kera. N’eky’omughaso munene kutsibu, obwira bwetu haghuma na Yesu bukendisyatukolya oko bwira obuwene kalengyo, ni bughambu, eribya bira ba Tata wa Yesu, Yehova. Ka ni muyisa eribirikirwamo bira ba Yesu!

OLWIMBO 17 ‘Nyinanzire’

^ par. 5 Abakwenda mubalabya emyaka milebe bakakania na Yesu n’erikola haghuma naye, neryo mubabya bira kutsibu. Netu kutya Yesu anzire itwabya bira biwe, aliwe okw’itwe sikyolo eribya bira ba Yesu ngoko kyabya kyolobire oko bakwenda. Omo mwatsi ono tukendikania oko myatsi milebe eyikaleka ikyatukalako eribya bira ba Yesu, kandi tukendilangira ebyo twangakola tutoke eritsuka obwira obuwene haghuma na Yesu n’erisighala bira biwe.

^ par. 55 ERIKANIA OKO SYOPITSA: (1) Omughulu tukakola eriramya ry’obunyumba, twanganigha oko maisa wa Yesu n’omubírí wiwe. (2) Omo ndeko, twanganayikasa kutsibu eribya omo buholo n’abalikyetu. (3) Omwikola bingyi omo mubírí w’eritulira, tukawatikaya abaghala babo Kristo. (4) Omughulu esyondeko syamahirwa haghuma, tulighe erikwama obusondoli bw’abasyakulu.