1. Singabakha njani ubungani nomuntu?

KANENGI into yokuthoma ekufuze siyenze nasifuna ukwakha ubungani nomuntu kufuze sihlale naye besicoce naye isikhathi esithileko. Nawucocela abantu ngendlela ozizwa ngayo, ubatjela nangezinto ezenzeka epilwenakho, niyatjhidelana nabantwabo. Nasiza endabeni yokwakha ubungani noJesu, kuba nobudisi esihlangabezana nabo. Ngibuphi ubudisobo?

2. Ngibuphi ubudisi bokuthoma esihlangabezana nabo?

² Ubudisi bokuthoma, kukuthi akhenge khesihlangane noJesu ubuso nobuso. AmaKrestu amanengi wangeenkhathi zabapostoli aqalana nobudisi obufanako. Nanyana kunjalo, umpostoli uPitrosi wathi: “Nanyana ningakhenge nimbone, niyamthanda. Nanyana ningamboni nje, niyakholwa kuye.” (1 Pit. 1:8) Yeke singatjho ukuthi kuyakghonakala ukuba mngani kaJesu ngitjho nanyana ungakhenge uhlangane naye ubuso nobuso.

3. Ngibuphi ubudisi besibili esihlangabezana nabo?

³ Ubudisi besibili kukuthi asikghoni ukukhuluma noJesu umlomo nomlomo. Nasithandazako, sibikela uJehova ngendlela esizizwa nangezinto esizicabangako. Iye, khona kuliqiniso ukuthi sithandaza ebizweni lakaJesu kodwana asikhulumi naye bunqopha. Kuhlekuhle uJesu akafuni sithandaze kuye. Kubayini kunjalo? Kungombana nasithandazako sisuke silotjha uJehova begodu nguye yedwa ekufuze simlotjhe. (Mat. 4:10) Nanyana kunjalo, singayitjengisa indlela esimthanda ngayo uJesu.

4. Ngibuphi ubudisi besithathu begodu sizokucoca ngani esihlokwenesi?

 ⁴ Ubudisi besithathu esihlangabezana nabo kukuthi uJesu uhlala ezulwini, lokho kwenza kungakghonakali ukuba nesikhathi naye. Nanyana kunjalo, kunengi esingakufunda ngoJesu ngitjho nanyana singasihlanu kwakhe. Sizokufunda ngezinto ezine ezizosisiza sakhe ubungani obuqinileko naye. Kokuthoma, akhesibone ukuthi kubayini kuqakathekile ukwakha ubungani noKrestu.

5. Kubayini kufuze sibe bangani bakaJesu? (Qala ibhoksi elithi, “ Ukuba bangani bakaJesu kusenza sibe bangani bakaJehova” nelithi, “ Ukuqala Indima KaJesu Ngendlela Efaneleko.”)

⁵ Nasizokutjhidelana noJehova, kufuze sibe bangani bakaJesu. Kubayini kunjalo? Akhesicoce ngamabanga amabili. Lokuthoma, uJesu watjela abalandeli bakhe wathi, “UBaba ngokwakhe uyanithanda, ngombana ningithandile.” (Jwa. 16:27) Wabuye wathi: “Akakho oza kuBaba ngaphandle kokuthi eze ngami.” (Jwa. 14:6) Ukulinga ukuba mngani kaJehova ngaphandle kokuba mngani kaJesu, kufana nokungena ngendlini ngaphandle kokusebenzisa umnyango. UJesu wenza umfanekiso ofanako nakazakuthi “ngimnyango wezimvu.” (Jwa. 10:7) Lesibili, kukuthi uJesu walingisa ubuntu bakaYise ngendlela epheleleko. Wathi ebafundini bakhe: “Nanyana ngubani ongibonileko ubone noBaba.” (Jwa. 14:9) Yeke indlela ephuma phambili yokwazi uJehova kukuthi ufunde ngokuphila kwakaJesu. Njengombana siragela phambili sifunda ngoJesu, sizomthanda khulu. Ubungani  bethu noJesu nabuqinako, ithando lethu ngoBabethu lizokukhula.

6. Ngiliphi elinye ibanga esinalo lokuba nobuhlobo obuhle noJesu? Hlathulula.

⁶ Imithandazwethu nayizakuphendulwa, kufuze sibe nobuhlobo obuhle noJesu. Lokho kutjho okungaphezu kokumane sisebenzise amagama athi ‘ngebizo lakaJesu’ lokha nasithandazako. Kufuze sizwisise ukuthi uJehova umsebenzisa njani uJesu ukuphendula imithandazwethu. UJesu wathi ebapostolini bakhe: “Ngizakwenza koke enikubawako ngebizo lami.” (Jwa. 14:13) Nanyana kunguJehova olalela bekaphendule imithandazwethu, unikele uJesu ilungelo lokwenza intandwakhe. (Mat. 28:18) Ngaphambi kobana uJehova aphendule imithandazwethu, ufuna ukwazi bona siyasisebenzisa na iseluleko sakaJesu. Ngokwesibonelo, uJesu wathi: “Nanilibalela abantu abanitjhapheleko noYihlo osezulwini uzanilibalela. Kodwana naningalibaleli abantu abanitjhapheleko noYihlo angekhe anilibalela imitjhapho yenu.” (Mat. 6:14, 15) Yeke kuqakatheke khulu ukuphatha abanye kuhle njengoJehova noJesu.

7. Bobani abazuza emhlatjelweni wesihlengo sakaJesu?

⁷ Ngilabo abanobuhlobo obuhle noJesu kwaphela abazokuzuza emhlatjelweni wesihlengo. Sazi njani? UJesu wathi: ‘uzakudela ukuphila kwakhe ngebanga labangani bakhe.’ (Jwa. 15:13) Abantu ebebalotjha uJehova ngaphambi kwesikhathi sakaJesu kuzokufuze bafunde ukumthanda begodu bamazi. Amadoda nabafazi abafaka hlangana u-Abrahama, uSara, uMosi noRarhabu bazokuvuswa. Nanyana kunjalo, nabo kuzokufuze babe nobuhlobo obuhle noJesu nabazakufumana ukuphila okungapheliko.—Jwa. 17:3; IzE. 24:15; Heb. 11:8-12, 24-26, 31.

8-9. Njengombana kuhlathululwe kuJwanisi 15:4, 5, ubuhlobo bethu noJesu busivumela bona sikghone ukwenzani begodu kubayini lokho kuqakathekile?

⁸ Sithabela ukusebenza noJesu ekutjhumayeleni nekufundiseni abantu iindaba ezimnandi zomBuso. UJesu nakasephasini bekamfundisi. Kodwana njengombana sekasezulwini, uragela phambili nokuba yihloko yebandla begodu unqophisa umsebenzi wokutjhumayela newokufundisa. Uyayibona begodu uyayithabela imizamwakho yokusiza abantu abanengi bona bazi yena noYise. Ekhabolakhona, okukuphela kwendlela esingaphumelela ngayo emsebenzini lo, kukuthi sisizwe nguJehova noJesu.—Funda uJwanisi 15:4, 5.

⁹ Kuyakhanya-ke, ukuthi iliZwi lakaZimu lisifundisa ukuthi kufuze sithande uJesu nasizakuthabisa uJehova. Akhesicoce ngezinto ezine esingazenza bona sibe bangani bakaJesu.

10. Ngiliphi igadango lokuthoma ekufuze silithathe nasizakwakha ubuhlobo obuhle noJesu?

¹⁰ (1) Ziphe isikhathi sokwazi ngoJesu. Lokho singakwenza ngokufunda iincwadi zeBhayibheli njengoMatewu, uMarkosi, uLukasi noJwanisi. Njengombana sizindla ngokulandisa kweBhayibheli okumalungana nokuphila kwakaJesu, ukumthanda nokumhlonipha kwethu uJesu kuyakhula ngombana sikghona ukubona indlela enomusa aphatha ngayo abantu. Ngokwesibonelo, uJesu akhenge aphathe abafundi bakhe njengeengqila ngitjho nanyana bekayiKosabo.  Kunalokho, wabatjela lokho ebekakucabanga nendlela ebekazizwa ngayo. (Jwa. 15:15) Lokha nabadanileko, uJesu wadana begodu walila nabalilako. (Jwa. 11:32-36) Ngitjho namanabakhe bewabona ukuthi uJesu bekamngani walabo ebebamukela umlayezwakhe. (Mat. 11:19) Nasilingisa indlela uJesu enza ngayo nakasebenzelana nabafundi bakhe, ubuhlobo bethu nabanye buzokuthuthuka. Sizokuthaba begodu sizomthanda besimhloniphe khulu uKrestu.

11. Ngiliphi igadango lesibili ekufuze silithathe nasizakuba bangani bakaJesu begodu kubayini liqakathekile?

¹¹ (2) Lingisa indlela kaJesu yokucabanga neyokwenza izinto. Nasimazi kuhle uJesu begodu silingise indlelakhe yokucabanga sizokutjhidela khulu kuye. (1 Kor. 2:16) Singamlingisa njani uJesu? Cabanga ngesibonelo esilandelako. UJesu wafundisa khulu ngokusiza banye kunokuthi azithabise yena. (Mat. 20:28; Rom. 15:1-3) Indlelakhe yokucabanga, yamenza wazidela begodu walibalela abanye. Izinto abantu ebebazikhuluma ngaye akhenge zimdanise. (Jwa. 1:46, 47) Akhenge avumele ubutjhapho obenziwa babantu esikhathini esidlulileko bumenze abanine. (1 Thim. 1:12-14) UJesu wathi: “Boke abantu bazakwazi bona nibafundi bami, nanithandanako.” (Jwa. 13:35) Zibuze, “Inga-kghani ngilingisa uJesu ngokwenza koke okusemandlenami bona ngihlale nginokuthula nabafowethu nabodadwethu?”

12. Ngiliphi igadango lesithathu ekufuze silithathe nasizakuba bangani bakaJesu begodu singalithatha njani?

¹² (3) Sekela abafowabo bakaKrestu. Lokho esikwenzela abafowabo bakaJesu abazesiweko, uJesu ukuqala ngasuthi sikwenzela yena. (Mat. 25:34-40) Umsebenzi oyihloko esisekela ngawo abazesiweko kutjhumayela ngomBuso nokuhlanganyela ekwenzeni abafundi njengombana uJesu atjho. (Mat. 28:19, 20; IzE. 10:42) Abafowabo bakaKrestu bangakghona ukufeza umsebenzi wokutjhumayela iindaba ezimnandi ephasini loke ngebanga lokusekelwa ‘ngezinye izimvu.’ (Jwa. 10:16) Nawulilunga lesiqubuthu esikhulu, isikhathi ngasinye nawutjhumayelako utjengisa ukuthi usekela abafowabo bakaJesu kunye naye.

13. Singasisebenzisa njani iseluleko sakaJesu esifumaneka kuLukasi 16:9?

¹³ Godu siba bangani bakaJehova noJesu ngokusekela ngeemali umsebenzi abawunqophisako. (Funda uLukasi 16:9.) Ngokwesibonelo, singanikelela umsebenzi wokutjhumayela. Iminikelo le isetjenziselwa ukutjhumayela eendaweni ezikude, ukwakhiwa nokunakelela imakhiwo yehlangano nokusiza abafowethu beendaweni ezehlakalelwe ziinhlekelele zemvelo. Godu singasekela ebandleni ngokweemali nangokusiza labo esazi ukuthi batlhoga ukusizwa. (IzA. 19:17) Lezi ziindlela esingasekela ngazo abafowabo bakaJesu.

14. Ngiliphi igadango lesine elivezwe emtlolweni webe-Efesu 4:15, 16 elisenza sibe bangani bakaJesu?

¹⁴ (4) Sekela amalungiselelo enziwa yihlangano kaJehova. Siqinisa ubungani bethu noJesu ngokuthi sibambisane nalabo abakhethwe bona basitlhogomele. (Funda kwebe-Efesu 4:15, 16.) Ngokwesibonelo, silinga ukusebenzisa amaWolo womBuso ngendlela esingakghona ngayo. Bona sikghone ukwenza  njalo, kuhlanganiswe amabandla begodu namasimu ekutjhunyayelwa kiwo ahlelwa kabutjha. Indlela le iyisize khulu ihlangano bona yonge imali yeminikelo. Ngebanga lamatjhuguluko la, abarhuweleli abanengi batjhugulule ubujamo babo bona bakhambisane nehlangano. Kungenzeka ukuthi abarhuweleli abathembekilekwaba besele banesikhathi eside bahlanganyela emabandlenabo begodu sebanabangani. Kodwana nje sebatjelwa ukuthi bathuthele kwamanye amabandla. Qala bona lokho kumthabisa kangangani uJesu ukubona abarhuweleli abathembekileko bawasekela ngokuzeleko amatjhuguluko la.

15. Ubungani bethu noJesu buzokuqina njani esikhathini esizako?

¹⁵ Labo abazeswe ngommoya ocwengileko banethemba lokuba noJesu ngokungapheliko, babuse naye emBusweni kaZimu. Bazokuba noJesu, bakhulume naye, bambone begodu babe nesikhathi naye. (Jwa. 14:2, 3) Labo abanethemba lokuphila ephasini nabo bazolizwa ithando lakaJesu. Ngitjho nanyana bangekhe bambone uJesu, bazokuba bangani naye ngombana bazokuthabela ukuphila okumnandi abakunikelwa nguJehova noJesu.—Isa. 9:6, 7.

16. Ngiziphi iimbusiso esizifumana ngokuba bangani bakaJesu?

¹⁶ Nasamukela isimemo sakaJesu sokuba bangani bakhe, sifumana iimbusiso ezinengi. Ngokwesibonelo, siyazuza nasisekelwa nguye begodu uyasithanda. Sithenjiswe ukuphila okungapheliko. Okuqakatheke khulu kukuthi ubungani bethu noJesu buzosenza sifumane isibusiso sokuba bangani bakaJehova. Qala bona kulilungelo elikhetheke kangangani ukuba bangani bakaJesu!