1. Kansi tingankhale tyani pa ushamwali na munthu muyakine?

COYAMBA, kuti tinkhale pa ushamwali na munthu muyakine tufunika kutandala naye. Ngati mulaŵizhyana zokhuza vinthu vamuganiza na mwaamumvwila niye pamungankhale pa ushamwali. Koma nthawi ziyakine cingankhale covuta kunkhala shamwali wa Yesu. Ndaŵa yanji?

2. Kansi ni vuto yoyamba yotyani ingacitishe kuti cinkhale covuta kunkhala pa ushamwali na Yesu?

² Vuto yoyamba ni yakuti Yesu tiliyomuonepo mwacindunji. Akhristu anyinji a m’vyaka 100 voyambilila nao aliyomuonepo Yesu. Nangu n’tetyo, mtumwi Petulo elaŵila kuti: “Nangu kuti muliyomuonepo mumukonda. Olo kuti mumuona lini pali lomba mukhulupilila muli yove.” (1 Pet. 1:8) Tetyo n’zokwanishika kunkhala pa ushamwali na Yesu nangu kuti tiliyomuonepo.

3. Ko ni vuto yaciŵili yotyani ingatikangishe kunkhala pa ushamwali na Yesu?

³ Vuto yaciŵili ni yakuti Yesu tingalaŵile lini naye. Ngati tupemphela, tulaŵila na Yehova. N’cendi kuti tupemphela kupitila m’zina ya Yesu, koma tulaŵila lini na yove. Yesu ofuna lini kuti tikopemphela kuli yove. Ndaŵa yanji? Cifukwa pemphelo ni mbali ya kulambila, ndipo ni Yehova tyala ofunika kulambiliwa. (Mat. 4:10) Nangu n’tetyo, tingaoneshe kuti tumukonda Yesu.

4. Kansi ni vuto yacitatu yotyani ingatikangishe kunkhala pa ushamwali na Yesu, nanga tilaŵizhyane cinji m’nkhani ino?

 ⁴ Vuto yacitatu ni yakuti Yesu onkhala kululu, tetyo tingankhale lini naye. Koma tingaziŵe zinyinji zokhuza Yesu nangu kuti tili lini naye pafupi. Tilaŵizhyane vinthu 4 vatingacite kuti titang’ishe ushamwali wasu na yove. Coyamba, tiyeni tione cifukwa cake n’cinthu cofunika kunkhala pa ushamwali na Khristu.

5. Ndaŵa yanji tufunika kunkhala pa ushamwali na Yesu? (Onani bokosi yakuti “ Kunkhala Pa Ushamwali na Yesu Kucitisha Kuti Tinkhale pa Ushamwali na Yehova” Koma Soti “ Kuuona Moyenelela Udindo wa Yesu.”)

⁵ Tufunika kunkhala pa ushamwali na Yesu kuti tinkhale pa ushamwali uweme na Yehova. Ndaŵa yanji? Ganizilani vifukwa viŵili ivi: Coyamba Yesu euzhya ophunzila ŵake kuti, “Pakuti Atata okukondani, cifukwa nane munikonda.” (Yoh. 16:27) Elaŵila soti kuti: “Paliye ofwika kwa Atata osapitila muli neo.” (Yoh. 14:6) Kuyesa kunkhala pa ushamwali na Yehova tikaliyokulisha ushamwali wotang’a na Yesu, kuli monga ni kuloŵa m’ng’anda cosapitila pa mlyango. Yesu eseŵenzesha fanizo yolinganako pecifotokoza kuti, “neo nine mlyango wa mbelele.” (Yoh. 10:7) Cifukwa caciŵili ni cakuti Yesu eonesha luweme minkhalidwe ya Ausuwake. Euzhya ophunzila ŵake kuti: “Waona neo waona soti Atata.” (Yoh. 14:9) Njila yofunika ngako yoziŵila Yehova ni mwa kuphunzila za umoyo wa Yesu. Patuphunzila za Yesu, cikondi casu pa yove cukula. Ngati tukonda ngako Yesu, ushamwali wasu na Yehova utang’e.

6. N’cifukwa ciyakine cotyani catufunika kunkhalila pa ushamwali na Yesu? Fotokozani.

 ⁶ Tufunika kunkhala pa ushamwali na Yesu kuti mapemphelo yasu yakoyankhiwa. Izi zuonesha kuti tufunika kucita zinyinji kuyangizhyila pakulaŵila tyala kuti “m’zina ya Yesu” kosilizhyila kwa pemphelo. Tufunika kuzindikila mwamene Yehova oseŵenzeshela Yesu poyankha mapemphelo yasu. Yesu euzhya atumwi ŵake kuti: “Ciliconse camungasenge m’zina yangu, neo nikacite.” (Yoh. 14:13) Nangu kuti Yehova niye okumvwa noyankha mapemphelo yasu, yove epasa Yesu mphamvu zokwanilisha cifunilo cake. (Mat. 28:18) Yehova akaliyoyankha mapemphelo ŵasu, oona ngati tuseŵenzesha uphungu wecitipasa Yesu. Mwacisanzo, Yesu elaŵila kuti: “Ngati mukhululukila ayakine macimo yao, namwe Ausuwanu akululu akakukhululukileni. Koma ngati mukhululukila lini ayakine, namwe Ausuwanu akakukhululukileni lini.” (Mat. 6:14, 15) Kansi mwaona kufunika kokhululukila ayakine? Tetyo, mwatucitila vinthu na ayakine niye soti mwamene Yehova na Yesu ocitila nase vinthu.

7. Kansi ni ŵani opindula na nsembe ya Yesu?

⁷ Ŵanthu amene ali pa ushamwali na Yesu niye tyala ati akapindule na nsembe ya dipo. Kansi tuziŵa tyani? Yesu elaŵila kuti, “Otwala moyo wake cifukwa ca ashamwali ŵake.” (Yoh. 15:13) Atumiki okhulupilika enkhalako Yesu akaliyowela pacalo, akafunike kuphunzila zokhuza yove kuti akayambe kumukonda. Analume na anakazi amene aŵa monga Abulahamu, Sara, Mose, na Rahabi akaukishiwe. Atumiki olungama a Yehova amene aŵa akafunike kunkhala pa ushamwali na Yesu kuti akalondele moyo wosasila.​—Yoh. 17:3; Mac. 24:15; Aheb. 11:8-12, 24-26, 31.

8-9. Kulingana na mwayafotokozela Yohane 15:4, 5, kansi ushamwali wasu na Yesu utilimbikisha kucita cinji, ndipo ndaŵa yanji n’cofunika?

⁸ Tusangalala kuseŵenza pamozi na Yesu pa nchito yolalikila nophunzisa uthenga uweme wa Ufumu. Yesu peenze pacalo enze mphunzisi. Nangu kuti ewelela kululu, Yesu ni mutu wampingo, ndipo akalusogolela pa nchito yolalikila nophunzisa. Oona noyamikila kuyesayesa kwamucita poyavya ayakine kuti amuziŵe yove, noziŵa soti Ausuwake. Kulaŵila cendi, tingakwanishe kukata nchito iyi moyavyiwa na Yehova na Yesu.​—Ŵelengani Yohane 15:4, 5.

⁹ Mau a Mulungu otiphunzisa kuti tufunika kupitilizhya kunkhala pa ushamwali na Yesu kuti tikondweleshe Yehova. Lomba, tilaŵizhyane vinthu 4 vatingacite kuti tinkhale pa ushamwali na Yesu.

10. Kansi cinthu coyamba catingacite kuti tinkhale ashamwali a Yesu n’cinji?

¹⁰ (1) Muziŵeni Luweme Yesu. Tingamuziŵe luweme mwa kuŵelenga mabuku a m’Baibo monga Mateyu, Maliko, Luka na Yohane. Ngati tusinkhasinkha nkhani za m’Baibo zokhuza umoyo wa Yesu, tifwike pom’konda nom’lemekeza ngako Yesu. Mwacisanzo, olo kuti enze Asikulu ŵao, enzoŵaona lini monga akapolo. M’malo mwake, enzoŵauzhya maganizo yake na mweenzomvwila. (Yoh. 15:15) Ngati ophunzila ŵake ovutika, naye enzovutika. (Yoh. 11:32-36) Nangu adani a Yesu enzoziŵa kuti ŵala enzomvwishila uthenga wake  enze ayake. (Mat. 11:19) Ngati tutolela cisanzo ca Yesu cokhuza mweenzocitila zinthu na ophunzila ŵake, ushamwali ŵasu na ayakine ukule. Tikonkhala okhutila koma soti osangalala ndipo tikom’konda ngako nom’lemekeza.

11. Kansi n’cinthu caciŵili cotyani catingacite kuti tinkhale ashamwali a Yesu, ndipo ndaŵa yanji n’cofunika?

¹¹ (2) Tolelani kaganizidwe na kacitidwe ka Yesu. Tikamuziwa luweme Yesu notolela kaganizidwe kake, ushamwali wasu na yove upitilizhye kunkhala wotang’a. (1 Akor. 2:16) Kansi tingatolele tyani cisanzo ca Yesu? Ganizilani cisanzo ici, Yesu enzoganizila ngako mwangayavyile ayakine osati kuzikondwelesha yeka. (Mat. 20:28; Aro. 15:1-3) Cifukwa coganiza mwa njila yamene iyi, enze wozitwala nokhululukila. Aliyolole zolaŵila za ayakine kuti zisokoneze maganizo ŵake. (Yoh. 1:46, 47) Aliyolole volakwa vecicita ayakine kuvuli kuti visokoneze maganizo ŵake kuti akoŵaona molakwika. (1 Tim. 1:12-14) Yesu elaŵila kuti: “Onse akaziŵe kuti nimwe ophunzila ŵangu ngati mukondana.” (Yoh. 13:35) Tingacite luweme kuzikonsha kuti, “Kansi nutolela cisanzo ca Yesu mwa kucita zilizonse zaningakwanishe kuti ninkhale pamtendele na akwasu na azilongosi?”

12. Kansi n’cinthu cacitatu cotyani catingacite kuti tinkhale ashamwali a Yesu, ndipo tingacite tyani zamene izi?

¹² (3) Cilikizani Akwake a Khristu. Yesu oona kuti zatucita poyavya ozozewa, tucitila yove. (Mat. 25:34-40) Njila ikulu yatucilikizila akwake ni mwa kutolamo mbali m’nchito yolalikila nopanga ophunzila, yecilamula okonkha ŵake kuti akocita. (Mat. 28:19, 20; Mac. 10:42) Moyavyiwa na ‘ambelele ziyakine,’ akwake a Yesu okwanisha kucita nchito yolalikila yamene yucitika pali lomba. (Yoh. 10:16) Ngati muli m’gulu ya mbelele ziyakine, nthawi zonse pamutolamo mbali m’nchito iyi muonesha kuti mukonda ozozewa koma soti Yesu.

13. Kansi tingaseŵenzeshe tyani malangizo opezeka pa Luka 16:9?

¹³ Tingankhale pa ushamwali na Yehova na Yesu mwa kutwala ndalama kuti zicilikize pa nchito ya pacalo conse. (Ŵelengani Luka 16:9.) Mwacisanzo, tingatwale ndalama kuti zicilikize nchito ya pacalo conse yamene yuyangizhyilapo nchito yolalikila uthenga uweme ku madela akutali, kumanga nokonza malo olambilila na kutwala thandizo pakacitika masoka acilengedwe ku ŵanthu amene akhuziwa. Tingayavye mpingo wasu mwa kutwala ndalama koma soti tingayavye ayakine ofunikila thandizo. (Miy. 19:17) Izi niye njila zatingacilikizile akwake a Khristu.

14. Molingana na Aefeso 4:15, 16, kansi n’cinthu ca namba 4 cotyani catingacite kuti tinkhale ashamwali a Yesu?

¹⁴ (4) Cilikizani makonzedwe a gulu ya Yehova. Tunkhala pa ushamwali uweme na Yesu, wamene ni mutu wa mpingo ngati tukatizhyana na akulu amene asankhiwa kuti atisogolele mumpingo. (Ŵelengani Aefeso 4:15, 16.) Mwacisanzo, tuyesayesa kuseŵenzesha mokwanila Mang’anda a Ufumu. Kuti ticite izi, mipingo iyakine yamene yali m’dela imozi ingosonkhana pa Ng’anda ya Ufumu imozi. Makonzedwe amene aya yacitisha kuti gulu isaononge ndalama zinyinji. Cifukwa ca zamene izi, ofalisa ofunika kugonjela makonzedwe aya. Ofalisa  ayakine amene angankhale kuti atumikila na mpingo kwa vyaka vinyinji, angankhale na ashamwali anyinji mumpingo wamene uyo. Angauzhyiwe kuti alute kumpingo uyakine. Yesu osangalala ngako akaona atumiki amene aŵa ogonjela makonzedwe amene aŵa.

15. Kansi ushamwali wasu na Yesu ukakule tyani msogolo?

¹⁵ Akhristu ozozewa na mzimu utuŵa ali na ciyembekezo cakuyonkhala na Yesu mpaka kale-kale monga ansembe ndipo akalamulile naye pamozi mu ufumu wa Mulungu. Akankhale na Khristu, akomuona, akolaŵila naye koma soti kunkhala naye. (Yoh. 14:2, 3) Onse amene ali na ciyembekezo cakuyonkhala pacalo, akaone cikondi ca Yesu na cisamalilo cake. Nangu kuti akamuone lini Yesu, ushamwali wao ukapitilizhye kukula pati akosangalala na moyo uweme wamene Yehova na Yesu akatwale.​—Yes. 9:6, 7.

16. Kansi tupindula tyani cifukwa conkhala pa ushamwali na Yesu?

¹⁶ Ngati talondela ciitano ca Yesu cakuti tinkhale ashamwali ŵake, tulondela madaliso anyinji ngako. Mwacisanzo, pali lomba tupindula na cikondi koma soti thandizo yake. Tili soti na mwai wakuyonkhala na moyo wosasila. Kupambana zonse, ushamwali wasu na Yesu uticitisha kunkhala pa ushamwali uweme na Yehova. Ni mwai ukulu ngako kunkhala ashamwali a Yesu.