Nkhani Yakupfunza 17
‘Inepano Ninkucemerani Axamwali’
‘Inepano ninkucemerani axamwali, thangwe ndidakuzimbulirani bzentse bzomwe ndidabva na Baba wangu.’—JUWAU 15:15.
NYIMBO 13 Kristu ni Ciratizo Cathu
BZOMWE TIN’PFUNZA *
1. Kodi n’ciyani comwe wanthu angacite kuti akhale pa uxamwali bwakuti ponda ndipondembo?
KAWIRI-KAWIRI, kuti mukhale pa uxamwali na munthu bwakuti ponda ndipondembo, mun’funika kukhala na nthawe yakumbaceza pabodzi. Pakucezapo mumbapasana nzeru, mumbafotokozerana bzomwe winango adagumana nabzo pa moyo wace, ndipo bzimwebzi bzimbacitisa kuti mukhale pa uxamwali. Nthawe zinango, bzingawoneke ninga kuti mpsakunesa kukhala xamwali wa Jezu. Thangwe ranyi?
2. Kodi ni bvuto liponi lakuyamba lomwe lingawoneke ninga kuti lingatitazise kukhala axamwali wa Jezu?
2 Bvuto lakuyamba ndakuti tiribe kumuwona Jezu maso na maso. Bzimwebzi bzidacitikambo na Akristau azinji wa m’magole dzana yakutoma. Napo bzikhali tenepo, mpostolo Pedru adawauza kuti: ‘Napo mulibe kumuwona, imwepo mumbamufuna. Napo tsapano mukumuwona lini, imwepo mumbamukhulupira.’ (1 Pedru 1:8) Bzimwebzi bzikulatiza kuti ifepano tingakhale pa uxamwali bwakulimba na Jezu, napo kuti tiribe kumuwona maso na maso.
3. Kodi ni bvuto liponi laciwiri lomwe lingawoneke ninga kuti lingatitazise kukhala axamwali wa Jezu?
3 Bvuto laciwiri ndakuti ifepano timbakwanisa lini kulewalewa na Jezu. Tikambapemba, timbaceza na Yahova basi. N’cadidi kuti pakupemba timbaphatisa basa dzina la Jezu, koma timbaceza lini naye. Ndipo Jezuyo ambafuna lini kuti timbapembe kwa iye. Thangwe ranyi? Thangwe mpembo ni njira ibodzi yakunamatira, ndipo omwe adathemera kunamatidwa ni Yahova yekha. (Mateu 4:10) Napo bziri tenepo, tingalatize lufoyi lomwe tinalo kuna Jezu.
4. Kodi bvuto lacitatu ndiponi, ndipo mu nkhani ino tin’cezerana bzinthu bziponi?
4 Bvuto lacitatu ndakuti Jezu ambakhala kudzulu, tenepo mpsakunesa kucita naye bzinthu bzomwe timbacita ntsiku na ntsiku. Koma napo timbakhala lini naye pafupi, ifepano tingadziwe bzinthu bzizinji bza iye. Mu nkhani ino tin’cezerana bzinthu bzinai bzomwe tingacite kuti tilimbise uxamwali bwathu na Jezu. Koma tikanati tawona bzinthubzo, cakuyamba mbatiwoneni thangwe lomwe tin’funikira kulimbisa uxamwali bwathu na Kristu.
THANGWE RANYI TIN’FUNIKA KUKHALA AXAMWALI WA JEZU?
5. Thangwe ranyi tin’funika kukhala axamwali wa Jezu? (Onanimbo makwadru aya: “ Kukhala pa Uxamwali na Jezu Kumbacitisa Munthu Kukhalambo pa Uxamwali na Yahova” na “ Kuwona Udindo bwa Jezu mu Njira Yakuthemera.”)
5 Kuti tikhale pa mbverano wabwino na Yahova, ifepano tin’funika kukhala axamwali wa Jezu. Thangwe ranyi? Pana mathangwe mawiri. Thangwe lakuyamba ni lomwe Jezu adauza anyakupfunza wace kuti: ‘Baba caiyeyo ambakufunani, thangwe imwepo mumbandifunambo.’ (Juwau 16:27) Iye adalewa pomwe kuti: ‘Palibe omwe angafike kuna Baba, acisaya kupita mwa inepano.’ (Juwau 14:6) Kuyezera kukhala xamwali wa Yahova mwakusaya kukhala pa uxamwali bwamphanvu na Jezu, mpsibodzi-bodzi na kuyezera kupita m’nyumba mwakusaya kuphatisa basa msuwo. Jezu adaphatisa basa ciratizo cibodzi-bodzici pomwe adabzilewa kuti ni ‘msuwo wa mabira.’ (Juwau 10:7) Thangwe laciwiri ndakuti Jezu adatewezera ndendende makhalidwe ya Baba wace. Iye adauza anyakupfunza wace kuti: ‘Ule omwe an’ndiwona ine ambakhala akuwonambo Baba.’ (Juwau 14:9) Tenepo njira yabwino yomwe ingatithandize kumudziwa bwino Yahova, ni kupfunza bza moyo wa Jezu. Ndipo tikambapfunza bza Jezu, lufoyi lathu kwa iye limbathimizirika. Tenepo, tikambafuna kwene-kwene Jezu, lufoyi lomwe tinalo kwa Baba wathu limbakhala lamphanvu.
6. Kodi ndiponi thangwe linango lomwe lingaticitise kuti tikhale pa uxamwali na Jezu?
6 Tin’funika kukhala pa uxamwali na Jezu kuti mipembo yathu imbatawiridwe. Bzimwebzi bzikuthandauza kuti tin’funika kucita bzizinji sikuti kuphampha kwa mpembo kumbandolewa mafala yakuti ‘m’dzina la Jezu.’ Tin’funika kumbabvesesa momwe Yahova ambaphatisira basa Jezu pakutawira mipembo yathu. Jezu adauza anyakupfunza wace kuti: ‘Ciri-centse comwe mukumbire m’dzina langu nin’dzacicita.’ (Juwau 14:13) Napo kuti ni Yahova omwe ambabva na kutawira mipembo yathu, koma iye adapasa Jezu udindo bwakuti ambaphate basa na bzomwe Yahovayo ambasankhula kucita na mitawiroyo. (Mateu 28:18). Pomwe Mulungu akanati kutawira mipembo yathu, cakuyamba ambawona penu tikuphatisa basa malango yomwe Jezu adapereka. Mwa ciratizo Jezu adati: ‘Mukambalekerera wanthu bzakuphonya bzawo, baba wanu wa kudzulu an’dzakulekereranimbo bzakuphonya bzanu, tsono penu mun’lekerera lini bzakuphonya bza wanthu winango, baba wanu wa kudzulu cipo acidzakulekereranimbo bzakuphonya bzanu.’ (Mateu 6:14, 15) Bzimwebzi bzikulatiza kuti tin’funika kumbadekera mtima anzathu ninga momwe Yahova na Jezu ambaticitira!
7. Kodi ni mbani omwe an’dzagumana phindu na ntsembe ya Jezu?
7 Omwe an’dzagumana phindu na ntsembe ya Jezu ya cakulombolera, ni okhawo omwe ali pa uxamwali bwamphanvu na Jezuyo. Kodi tikudziwa tani bzimwebzi? Jezu adalewa kuti ‘[an’dzapereka] moyo wace thangwe ra axamwali wace.’ (Juwau 15:13) Wanthu omwe adatumikira Yahova acikhala na moyo pomwe Jezu akhanati kubwera pano pa dziko la pantsi, akadzalamusidwa an’dzakhala na mwayi wakupfunza bza Jezuyo na kukulisa lufoyi lawo kwa iye. Amuna na akazi ninga Abalahamu, Sara, Mozeji, na Rahabi an’dzalamusidwa, tsono kuti adzakhale na moyo wakusaya kumala, iwo an’dzafunika kukhala pa uxamwali bwakulimba na Jezu.—Juwau 17:3; Mabasa 24:15; Wahebereu 11:8-12, 24-26, 31.
8-9. Kodi kukhala pa uxamwali na Jezu kumbatithandiza kucita basa liponi, ndipo mwakubverana na Juwau 15:4, 5, thangwe ranyi basalo ndakufunika?
8 Ifepano timbakomedwa thangwe ra kuphata basa pabodzi na Jezu, lomwe ndakupalizira na kupfunzisa wanthu bzipsa bzabwino bza Umambo. Pomwe Jezu akhali pa dziko la pantsi, akhali mpfunzisi. Kucokera pomwe Jezu adabwerera kudzulu, iye adakhala msolo wa gwere ndipo akupitiriza kutsogolera basa lakupalizira na lakupfunzisa wanthu. Jezu ambawona ndipo ambatenda bzentse bzomwe mumbacita pa kuthandiza wanthu azinji kuti akwanise kudziwa iye na Baba wace. Kulewa cadidi, ifepano tikukwanisa kucita basa limweri thangwe tikuthandizidwa na Yahova na Jezu.—Werengani Juwau 15:4, 5. *
9 Bibliya limbalewa kuti tikondwese Yahova, tin’funika kumbafuna Jezu na kucita ciri-centse kuti lufoyiro lireke kumbombowa. Tsapano mbatiwoneni bzinthu bzinai bzomwe tingacite kuti tikhale axamwali wa Jezu.
BZOMWE TINGACITE KUTI TIKHALE AXAMWALI WA JEZU
Imwepo mungakhale xamwali wa Jezu mwa (1) kumudziwa bwino, (2) tewezerani makumbukidwe yace na momwe iye akhacitira bzinthu, (3) kuthandizira abale wace, na (4) kuthandizira makonzedwe ya gulu la Yahova (Onani ndime 10-14) *
10. Kodi n’ciponi cinthu cakuyamba comwe tingacite kuti tikhale axamwali wa Jezu?
10 (1) Kumudziwa bwino Jezu. Tingamudziwe mwa kuwerenga mabukhu ya m’Bibliya yomwe ni Mateu, Marko, Luka, na Juwau. Tikambakumbukira bzomwe Bibliya limbalewa pa nkhani ya moyo wa Jezu m’mabukhuya, timbapfunza bzomwe tingacite kuti tifune na kulemekeza Jezu, thangwe iye akhadekera mtima wanthu. Mwa ciratizo, napo kuti iye akhali Mbuya kwa anyakupfunza wace, Jezu akhawawona lini ninga akapolo. M’mbuto mwace, akhawafotokozera makumbukidwe yace ndipo akhawabisira lini cinthu. (Juwau 15:15) Ndipo anyakupfunza wace akasunama iye akhasunamambo, akalira iye akhalirambo. (Juwau 11:32-36) Napo anyamadulanthaka wa Jezu akhawona kuti iye akhali xamwali wa wentse omwe akhatetekera mafala yace. (Mateu 11:19) Tikambatewezera momwe Jezu akhacitira bzinthu na anyakupfunza wace, timbakhala pa mbverano wabwino na wanthu winango, timbakhala wakukondwa, ndipo lufoyi na kutenda kwathu Jezu bzimbathimizirika.
11. Kodi n’ciponi cinthu caciwiri comwe tingacite kuti tikhale axamwali wa Jezu, ndipo thangwe ranyi kucita bzimwebzi n’kwakufunika?
11 (2) Tewezerani makumbukidwe ya Jezu na momwe iye akhacitira bzinthu. Ifepano tingakhale pa uxamwali bwamphanvu na Jezu, tikamudziwa na kutewezera makumbukidwe yace. (1 Wakolinto 2:16) Kodi tingamutewezere tani? Onani ciratizo cibodzi. Jezu akhacita thupo kwene-kwene na kuthandiza winango, sikuti kucita bzinthu kuti abzikondwese iye yekha. (Mateu 20:28; Waroma 15:1-3) Thangwe ra makumbukidwe yamweya, iye akhacita ciri-centse kuti athandize winango ndipo akhawalekerera bzakuphonya bzawo. Ndipo wanthu akamulewa kuipa, iye akhathamangira lini kukalipa. (Juwau 1:46, 47) Iye akhabvuma lini kuti bzomwe munthu adaphonya kale-kale, bzimucitise kuwona munthuyo kuti an’cinja lini. (1 Timotio 1:12-14) Jezu adalewa kuti: ‘Wentse an’dzadziwa kuti ndimwe anyakupfunza wangu, mukambafunana.’ (Juwau 13:35) Bzibvunzeni kuti: “Kodi ndikutewezera Jezu mwa kucita ciri-centse comwe ningakwanise, kuti ndikhale pa mtendere na abale na mpfumakazi zangu?”
12. Kodi n’ciponi cinthu cacitatu comwe tingacite kuti tikhale axamwali wa Jezu, ndipo tingacite tani?
12 (3) Kuthandiza abale wa Kristu. Jezu ambawona bzentse bzomwe timbacitira Akristau wakudzozedwa ninga kuti tikucitira iye. (Mateu 25:34-40) Jezu adauza Akristau wakudzozedwa kuti apalizire na kupfunzisa wanthu bza Umambo. Tenepo, ifepano tikambacitambo basa limweri, timbakhala tikuthandizira abale wa Kristu. (Mateu 28:19, 20; Mabasa 10:42) Bzingadakhala kuti Akristau wakudzozedwa akuthandizidwa lini na ‘mabira yanango,’ iwo angadakwanisa lini kupalizira bzipsa bzabwino pa dziko lentse la pantsi. (Juwau 10:16) Penu imwepo ndimwe m’bodzi wa mabira yanango, dziwani kuti pa nthawe iri-yentse pomwe mukucita basali, mumbalatiza lini kokha kuti mumbafuna anyakudzozedwawo, koma mumbafunambo Jezu.
13. Kodi tingaphatise tani basa malango ya Jezu yomwe yali pa Luka 16:9?
13 Pana njira zinango za momwe tingathandizire abale wa Kristu. Ibodzi mwa njirazo ni kupereka kobiri zomwe tingakhale nazo kuti zithandizire basa lomwe likutsogoleredwa na Yahova na Jezu. (Werengani Luka 16:9. *) Mwa ciratizo, tingacite bzakupereka kuti bzithandizire basa la pa dziko lentse. Bzakuperekabzo bzimbathandizira basa lakupalizira bzipsa bzabwino ku madera yakutali, kumanga na kukonza-konza nyumba zakunamatira na kuthandiza abale omwe agwedwa na malengwa ya pantsi. Ndipo tingaperekembo kobiri ninga cakupereka kuti zithandizire bzakusaya bza gwere lathu, ayai tingathandizembo abale omwe akufunikira thandizo. (Mimwani 19:17) Zimwezi ni njira zomwe tingathandizire abale wa Kristu.
14. Mwakubverana na Wayefezo 4:15, 16, kodi n’ciponi cinthu cacinai comwe tingacite kuti tikhale axamwali wa Jezu?
14 (4) Kuthandizira makonzedwe ya gulu la Yahova. Jezu ni msolo wa gwere, ndipo iye adasankhula wanthu wakuthemera kuti atitsogolere. Tenepo, tikambabvera bzomwe iwo ambatiuza, timbakhala pa uxamwali bwamphanvu na Jezuyo. (Werengani Wayefezo 4:15, 16. *) Mwa ciratizo, tsapano tikuyezera kuwonesesa kuti Nyumba zathu za Umambo ziphatisidwe basa mu njira yakuthemera. Ndipopa magwere yanango yagawidwa ndipo magawo ya upalizi yakonzedwa papsa. Makonzedweya yacitisa kuti gulu lireke kudzonga kobiri zizinji zomwe abale ambapereka. Thangwe ra bzimwebzi, apalizi winango akhafunika kuzolowerana na kucinjako. Pinango abalewo akhatsonkhana mu gwere libodzi kwa nthawe itali ndipo akhadazolowerana kwene-kwene na abale na mpfumakazi za m’gweremo. Ndipo tsapano iwo amwazidwa ndipo akutsonkhana magwere yakusiyana. Jezu ambakomedwa kwene-kwene akawona abale wakukhulupirikawa akuthandizira makonzedwe ya guluya.
KUKHALA AXAMWALI WA JEZU MPAKA KALE-KALE
15. Kodi uxamwali bomwe tinabo na Jezu bun’dzakhala tani bwakulimba kutsogolo?
15 Akristau wakudzozedwa na mzimu wakucena ana cidikhiro cakudzakhala kudzulu na Jezu mpaka kale-kale. Ndipo an’dzatonga naye pabodzi mu Umambo bwa Mulungu. Iwo an’dzamuwona, an’dzalewalewa naye, ndipo an’dzakhala naye pabodzi. (Juwau 14:2, 3) Ndipo Jezu an’dzalatizambo lufoyi kuna wale omwe ana cidikhiro cakudzakhala na moyo pano pa dziko la pantsi. Napo kuti iwo an’dzamuwona lini, koma an’dzakhala naye pa uxamwali bwakulimba akadzakhala na moyo wakukondwa omwe Yahova na Jezu an’dzawapasa m’paraizo.—Zaiya 9:6, 7.
16. Fotokozani bzisimbo bzomwe tinabzo thangwe ra kukhala axamwali wa Jezu.
16 Jezu akufuna kuti tikhale axamwali wace. Tenepo tikabvuma kukhala axamwali wace, tin’dzatambira bzisimbo bzakuti bwerani mudzawone. Mwa ciratizo, ntsiku zino ifepano timbagumana phindu na thandizo la Jezu pabodzi na lufoyi lace. Ndipo tina mwayi wakudzakhala na moyo wakusaya kumala. Ndipo kuposa bzentse, uxamwali bomwe tinabo na Jezu bun’ticitisa kugumana mphaso yakufunika kwene-kwene kuposa zentse, yomwe ni kukhala pa uxamwali bwamphanvu na Baba wace, Yahova. Kulewa mwakusaya kupenukira, kudziwika ninga axamwali wa Jezu ni mwayi ukulu kwene-kwene!
NYIMBO 17 ‘Ndin’funa’
^ ndi. 5 Apostolo adamala magole akuceza na kuphata basa pabodzi na Jezu, ndipopa adakhala axamwali wabwino wa Jezuyo. Jezu akufuna kuti ifepano tikhalembo axamwali wace, koma tikugumana na mabvuto yomwe apostolo alibe kugumana nayo. Nkhani ino, in’fotokoza yanango mwa mabvutoyo na bzomwe tingacite kuti tipitirize kukhala pa uxamwali bwakulimba na Jezu.
^ ndi. 8 Juwau 15:4 Pitirizani kukhala wakuphatana nane, ndipo inepano nin’dzakhalambo wakuphatana namwe. Imwepo mungabale lini cisapo pokha-pokha mukapitiriza kukhala wakuphatana nane, ninga momwe mthambi ingabalembo lini cisapo mwa iyo yokha ikasaya kupitiriza kukhala yakuphatirira mpesayo. 5 Ine ndine mpesa; imwepo ndimwe mthambi zace. Omwe an’pitiriza kukhala wakuphatana nane, ndipo inembo ndicipitiriza kuphatana naye, munthu umweyo an’dzabala bzisapo bzizinji, pakuti mukalekana nane palibe comwe mungacite.
^ ndi. 13 Luka 16:9 “Ndikukuuzanimbo kuti: Khalani na axamwali mwa kuphatisa basa cuma cakusaya kulungamaco, kuti cumaco cikadzamala, iwo adzakutambireni m’mbuto zamuyaya.”
^ ndi. 14 Wayefezo 4:15 Koma kulewa cadidi, mbatikuleni m’bzinthu bzentse, mwa lufoyi pakutsogoleredwa na Kristu omwe ni msolo. 16 Mwa iye, thupi lentse ndakuphatana na lakulumikidzidwa bwino ndipo limbabveranisa nfundo zentse zomwe zimbapereka bzinthu bzakufunikira. Pomwe ciwalo ciri-centse cikuphata bwino basa, cimbathandizira kuti thupi likule bwino licilimba mu lufoyi.
^ ndi. 58 BZOMWE BZINKUCITIKA PA CITHUNZI-THUNZI: (1) Pakunamata ninga banja, tingapfunze bza moyo na utumiki bwa Jezu. (2) M’gwere, tin’funika kucita nyongo kuti tikhale pa mtendere na abale wathu. (3) Tikacita ciri-centse mu utumiki bwa kumunda, timbakhala tikuthandizira abale wa Kristu. (4) Magwere yakagawidwa, tin’funika kumbabvera makonzedwe ya akulu wa gwere.
