1. Bu mɛ sīdee na o dap nyɔɔnɛ ziī nɛɛ yinia gbo a?

DOOKƐ̄ a wee le doo, tua nu o dasī doo lo eyii gbo ziī nɛɛ o zɔ̄ŋia tua sɔ̄ na lo esu pio sɔ̄ ye tɔ̄ma kpaɛ̄. Kuma sɔ̄ bui kɔnia ue, gbaa kɔnia bui ekɛɛrɛ, le kɛ̄ nu i tɔɔ̄loo doo, bui lu gbo. Mɛ pio sɔ̄ naa aadee waɛ eyii gbo Jizɔs, nyɔɔbee a ɛrɛ nu finiabah a le bu. Pio ɛɛ na e ni?

2. E na alu tuatua nu finiabah i kpesī a?

² Tua nu finiabah na bee i sii muɛ̄ Jizɔs lɔgɔ sɔ̄. Gbɛnɛ-edo pya Nɛɛ Kraist a bee le bu tua sɔ̄ o’oo tup zua a, bee kpe nage sī dua nu finiabah ama. Kerewo, nɛɛ lɛɛratam Pita bee kɔ: “Kere buii bee ye muɛ̄ bui wereaa ye loo, kere buii ye dap muɛ̄ anyaawo bui yiraa ye nɛ.” (1 Pit 1:8) Nyɔɔwo a waɛ eyii gbo Jizɔs kere o sii ye muɛ̄.

3. E na lo eree baɛ nu finiabah i kpesī a?

³ Eree baɛ nu finiabah na bee ii dap nyɔɔnɛ Jizɔs kɔnia ue. Sɔ̄ i yere kara, Jɛhova na i wee kɔ ue nɛ a. Bu kaka, i wee yere kara tɛ̄ma bu bee Jizɔs, mɛ a naale taɛ alɛ na i wee yere kara ma a. Kɛ̄adoo, Jizɔs naa gbī kɔ i yeree kara ye nɛ. E na anua ani? Nyɔnɛbee yere kara lu ziī sīdee taāŋabah, e aba Jɛhova na a bɔloo kɔ i taāŋabah a. (Mat 4:10) Kerewo, i dap tɔgɛ kɔ i wereeloo Jizɔs.

4. E na lo eree taa nu finiabah a, e e na i gaa le kɔ ue nyɔɔ bu lo ekobee ue ama a?

 ⁴ Eree taa nu finiabah na bee Jizɔs gaa tɔɔ̄ li bunyɔɔ, nyɔɔwo ii le edap ye tɔɔ̄ kpaɛ̄ sī le sī. Mɛ kere ii le kpaɛ̄ Jizɔs i dap suā gbɛnɛ-edo nu a ye kiiloo. I gaa le kɔ ue nyɔɔ nia nu i dap doo lo eyere mɛm loo gbanialoo i ye ɛrɛ kumaloo. Tuatua, i naa ɛp nu anua a kuī kɔ i yii gbo Jizɔs.

5. E na anua i yii gbo Jizɔs a? (Buū pya ekpo a kura “ Yii Gbo Jizɔs Edoo Nage Kɔ I Yii Gbo Jɛhova” le “ Ɛ’ɛp Jizɔs Bu Sīdee A Bɔloo”)

⁵ I ɛrɛ eyii gbo loo Jizɔs lo i gbī e’ɛrɛ le gbanialoo kumaloo Jɛhova. E na anua a le doo wo a? Naa kɛɛrɛbu baɛ nu anua ama. Tuatua, Jizɔs bee kɔ nɛ pya a wee ye nyɔɔnɛ dumɛ kɔ: “Tɛ a alɛɛ loo were i loo, nyɔnɛbee bui ewere mɛ loo.” (Jɔn 16:27) A bee kɔnage kɔ: “Lɔgɔ nɛɛ naale elu loo Tɛ a, lo a naale tɛ̄ma mɛ loo.” (Jɔn 14:6) Yii gbo Jɛhova sɔ̄ oo ɛrɛ kaāna gbanialoo kumaloo Jizɔs, bee sɔ̄ nɛɛ gaa gbī eyii tɔ sa a naa tɛɛ̄ nudee. Jizɔs bee su dua edoba ama kɔā ue sɔ̄ a bee kɔ nu akiiloo aba ɛɛ doodoo “nu dee naana pee.” (Jɔn 10:7) Eree baɛ nu anua na bee Jizɔs lu nɛɛ a nɔ elap dogo ye Tɛ bu mmɛɛ̄ sīdee. A bee kɔ nɛ pya a wee ye nyɔɔnɛ dumɛ kɔ: “Nɛɛ a emɔna mɛ emɔna Tɛ a.” (Jɔn 14:9) Nyɔɔwo ziī gbɛnɛ sīdee i dap suāloo Jɛhova na tɛ̄maloo enɔ nu akiiloo dum Jizɔs. Kuma sɔ̄ i gaa nɔ nu akiiloo Jizɔs, kɛ̄ wereloo i ye ɛrɛ loo enyim nage doo lo. E kuma sɔ̄ i gaa wereloo Jizɔs,  kɛ̄ wereloo i ɛrɛ loo ye Tɛ enyim nage doo lo.

6. Dɔɔ̄na e na anua i ɛrɛ eyii gbo Jizɔs a? Naa baatɛ̄.

⁶ I ɛrɛ eyii gbo Jizɔs lo i gbī kɔ alu e’agara pya i kara. Nu lo ama kura na bee i ɛrɛ edoo emanyɔɔ aba ekɔ “bu bee Jizɔs” sɔ̄ i yere kara sah. I ɛrɛ edābeeloo kɛ̄ Jɛhova su Jizɔs aŋana pya i kara doo. Jizɔs bee kɔ nɛ pya nɛɛ lɛɛratam kɔ: “E ɛrɛgeba nu bui bara bu na bee, alɛ ama na m doo a.” (Jɔn 14:13) Kere Jɛhova na a dā sa agara dɛ̄dɛɛ̄ i kara a, enɛa ekpo Jizɔs kɔ a doo pya nu A biaɛfii. (Mat 28:18) Lɛɛ a gae agara pya i kara, a dasī ɛp lo i esuage zuurabahtɔ̄ Jizɔs bee nɛ daā nu naa e. Bu edoba, Jizɔs bee kɔ: “Nyɔnɛbee lo a le bui aaloo elɔ dee pya nɛɛ wa nɛ, bui Tɛ lo a le li bunyɔɔ e’aanage loo bui elɔ dee i nɛ; mɛ lo a le buii aaloo wa elɔ dee wa nɛ, bui Tɛ naale aanage loo bui elɔ dee i nɛ bɔɔlo.” (Mat 6:14, 15) Naa ɛp kɛ̄ a kuī doo kɔ i aara pya dɔɔ̄na bu fɛgɛ dookɛ̄ Jɛhova le Jizɔs i aara doo a!

7. Ba mɛɛ̄ na e’ɛrɛ biī aāloo waara zɔɔ a’agara Jizɔs a?

⁷ Aba pya nɛɛ a yii gbo Jizɔs na e’ɛrɛ biī aāloo ye waara zɔɔ a’agara a. I doodoo wa suā? Jizɔs bee kɔ a e “su ye dum sere kɛ̄ nyɔɔ pya ye gbo.” (Jɔn 15:13) Pya nɛɛ a bee taāŋabah Jɛhova lɛɛ Jizɔs gae lu a kɛnɛkɛ̄ esikɛ̄ nɔ nu a ye kiiloo sa ye wereloo. Pya nɛɛdam le nɛɛwa a le doodoo Abreham, Sera, Mozis, le Rehab elu elɛɛ kɛ̄ bu luh, mɛ kere pya nɛɛ a bee yira agɛrɛ nɛ Jɛhova ama e’ɛrɛ ebɛɛ̄ lo esikɛ̄ yii gbo Jizɔs lokwa ba dap ɛrɛ dum a naa tah.—Jɔn 17:3; Doonu pya Nɛɛ lɛɛratam 24:15; Hib 11:8-12, 24-26, 31.

8-9. Dookɛ̄ alu ebaatɛ̄ doo bu kpa Jɔn 15:4, 5, e na yii gbo Jizɔs eyerebah i nɛ kɔ i doo a, e e na anua lo ama lu ebɛɛ̄ a?

⁸ Bu i ɛɛ lo enyɔɔnɛ Jizɔs siniatam bu ezue le yereue sa tɔgɛ nu akiiloo Buɛ̄-mɛnɛ Bari. Sɔ̄ Jizɔs bee le a kɛnɛkɛ̄, a bee tɔgɛ nu pya nɛɛ. Doodoo ekobee loo bɔŋanaloo Kraist, sɔ̄ Jizɔs bee obia kii bunyɔɔ a kiisī lo ebaɛbee esiatam zue ue le tɔgɛ nu pya nɛɛ. A muɛ̄ sa tɔgɛ nia loo o epiaga lo eyerebah nɛ pya dɔɔ̄na kɔ ba a suāloo alɛ le ye Tɛ. Bu kaka, aba sīdee i dap si tam ama mmɛɛ̄ na tɛ̄maloo yerebah Jɛhova le Jizɔs.—Buū Jɔn 15:4, 5.

⁹ Muɛ̄ Ue Bari tɔgɛ kɔ lo i gbī edoo nu a nia Jɛhova, i ɛrɛ ewereloo Jizɔs. Nyɔɔwo, i kɔ ue nyɔɔ nia nu i dap doo lo elu gbo Jizɔs.

10. E na tuatua nu i doo lo eyii gbo Jizɔs a?

¹⁰ (1) Suāloo Jizɔs. I dap doo lo ama tɛ̄maloo ebuū kpa Matiu, Maak, Luk, le Jɔn. Kuma sɔ̄ i gaa ɛrɛ ekɛɛrɛ nyɔɔ nu Baibol kɔ akiiloo dum Jizɔs, i gaa le were ye loo sa ye nwadɛɛ̄ nyɔɔ kɛ̄ a bee nyɔɔnɛ pya nɛɛ dania nu doo. Bu edoba, kere adoo alɛ na a bee lu wa Tɛtɔ a, a naa bee aara pya a wee ye nyɔɔnɛ dumɛ bee pya zooro. Taāwo, a wee kɔ taɛ kɛ̄ nu ye tɔɔ̄loo doo wa nɛ. (Jɔn 15:15) A wee wa nyɔɔnɛ ɛrɛ ekiɛ̄nu sa wa nyɔɔnɛ to. (Jɔn 11:32-36) Kere pya a ye gbanasī wee muɛ̄ nage kɔ a yii gbo pya a ye gbaɛ̄tɔ̄loo. (Mat 11:19) Sɔ̄ i nɔ sīdee Jizɔs bee nyɔɔnɛ  pya a wee ye nyɔɔnɛ dumɛ danianu, i gbanialoo kiikɛ̄ pya dɔɔ̄na le enyim, loo i esukɛ̄ sa bu i ɛɛ, e i sinagekɛ̄ wereloo Jizɔs kaāna.

11. E na lo eree baɛ nu i doo lo eyii gbo Jizɔs a, e e na anua a kuī a?

¹¹ (2) Nɔ kɛ̄ Jizɔs bee ɛrɛ ekɛɛrɛ sa doo nu doo. Kɛ̄ i kiisī lo esuāloo Jizɔs sa ye nɔ doo, kɛ̄ gbanialoo i ye ɛrɛ kumaloo e’aga nage tɛ̄ doo lo. (1 Kɔr 2:16) Bu mɛ sīdee na i dap nɔ Jizɔs a? Naa kɛɛrɛbu ziī edoba ama. Jizɔs wee kɛɛrɛbu eyerebah nɛ pya dɔɔ̄na eenyɔɔ doo nu a nia aba ɛɛ. (Mat 20:28; Rom 15:1-3) Nyɔɔ elap a ɛrɛ ama, a wee su loo nɛ sa aaloo nɛ pya dɔɔ̄na. Naa wee nwaabah ɛrɛ saŋ loo ue pya nɛɛ ye kɔ kumaloo. (Jɔn 1:46, 47) E a naa wee ɔbɛ eyiiloo pya nɛɛ nyɔɔ ekwɔ ba bee tɛɛ̄ sɔ̄ akii adumɛ ale su wa daā dogo loo. (1 Tim 1:12-14) Jizɔs bee kɔ: “Tɛ̄maloo lo ba ama na dɛ̄dɛɛ̄ nɛɛ esuā kɔ mɛ bui lu pya a wee mɛ nyɔɔnɛ dumɛ, lo a le bui ɛrɛ wereloo loo ɛnia bui.” (Jɔn 13:35) E na anua oo bip aba ɔɔ kɔ, “Ekɔ m gaa nɔge edoba Jizɔs tɛ̄maloo edoo ɛrɛgeba nu m dap doo lo enyɔɔnɛ pya wuga nɛɛdam le nɛɛwa tɔɔ̄ bu efɛɛloo ni?”

12. E na lo eree taa nu i doo lo eyii gbo Jizɔs a, e bu mɛ sīdee na i dap doo wo a?

¹² (3) Yerekpotɛ̄ pya wuga Kraist. Jizɔs ɛp pya nu i doo lo eyerebah nɛ pya ye wuga alu etɔ̄ nɔɔ̄ bee doodoo bee i doo nɛ alɛ. (Mat 25:34-40) Ziī sīdee i yerekpotɛ̄ pya alu etɔ̄ nɔɔ̄ bee na sɔ̄ i ɛrɛ epoo bu tam zue ue sa gbī pya enyɔɔnɛ dumɛ Jizɔs dookɛ̄ a bee kɔ pya a wee ye nyɔɔnɛ dumɛ a doo. (Mat 28:19, 20; Doonu pya Nɛɛ lɛɛratam 10:42) Aba tɛ̄maloo yerebah a aabah pya lo “dɔɔ̄na eku naana pee” na pya wuga Kraist dap doo gbɔmɛɛ̄ gbɛnɛ tam zue ue a gaa su dɔ anii’ee ama a. (Jɔn 10:16) Lo o le yɛɛ pya lo dɔɔ̄na eku naana pee, ziī ziī sɔ̄ o si uwe zue ue, o tɔgɛ kɔ o wereeloo Jizɔs le pya alu etɔ̄ nɔɔ̄ bee.

13. Bu mɛ sīdee na i dap su zuurabahtɔ̄ Jizɔs a le bu kpa Luk 16:9 daānu a?

¹³ I yii nage gbo Jɛhova le Jizɔs tɛ̄maloo esu kpugi yeākpotɛ̄ tam ba gaa baɛbee. (Buū Luk 16:9.) Bu edoba, i dap lɛra kpugi yeākpotɛ̄ tam zue ue bu dɛ̄dɛɛ̄ nyɔuwe, e alu esu pya kpugi ama yeākpotɛ̄ zue ue bie pya kɛ̄ a binia, wuwu le sere pya i kɛ̄ etɔɔ̄ taāŋabah leere, le dɔɔ̄nu nɛ pya bugia siranu sira loo. I dap nage su kpugi yeākpotɛ̄ pya i bɔŋanaloo le pya i suā kɔ ba le bu ebɛɛ̄. (Kam 19:17) Pya sīdee ama na i dap yerekpotɛ̄ pya wuga Kraist a.

14. Dookɛ̄ Pya Ɛfɛsɔs 4:15, 16 tɔgɛ doo, e na lo eree nia nu i doo lo elu gbo Jizɔs a?

¹⁴ (4) Yerekpotɛ̄ nɔɔ̄nɔɔ̄nu bɔŋanaloo pya Nɛɛ Kraist. Sɔ̄ i gbabeebah pya alu etubobaloo bu bɔŋanaloo, i agɛrɛtɛ̄ i gbanialoo kumaloo Jizɔs doodoo nɛɛ a gaa baɛbee bɔŋanaloo. (Buū Pya Ɛfɛsɔs 4:15, 16.) Bu edoba, nyaawo i gaa piiga lo esu i Tɔ Nɔnu Buɛ̄-mɛnɛ daānu leere. Lo edoo wo, pio bɔŋanaloo elua esu gbaloo ziī sa pya kɛ̄ zue ue elua ekwabaloo. Pya lo nɔɔ̄nɔɔ̄nu eyerebah kɔ a dap lu ekpooge pio kpugi bɔŋanaloo. Alu nage ebɛɛ̄ kɔ pio pya zue ue a kwabaloo nu sueloo aā kɛ̄tɔɔ̄ ama. Pya zue ue a yira agɛrɛ ama esia tam bu pio bɔŋanaloo loo  pio zua lo, sa tɔɔ̄ waɛloo pya wuga nɛɛdam le nɛɛwa a le lo kɛ̄. Mɛ nyaawo lu ekɔ ba a kii dɔɔ̄na bɔŋanaloo. Naa ɛp kɛ̄ enia Jizɔs doo sɔ̄ a muɛ̄ kɔ ba nyɔɔnɛ lo nɔɔ̄nu ama a!

15. I yinia gbo loo Jizɔs enyim doodoo wa li deesī ni?

¹⁵ Pya alu esu kaɛ edɔɔ̄ tɔā nɔɔ̄ bee ɛrɛ bɛābu lo ele kpaɛ̄ Jizɔs sa ye nyɔɔnɛ bɛɛ bu Buɛ̄-mɛnɛ Bari mmɛ deedee. Ba gaa le muɛ̄ Kraist, ye nyɔɔnɛ kɔnia ue sa ye le kpaɛ̄ dɛ̄dɛɛ̄ sɔ̄. (Jɔn 14:2, 3) Jizɔs ewere nage loo sa kuūdɛɛ̄loo pya ba ɛrɛ bɛābu lo etɔɔ̄ a kɛnɛkɛ̄. Kere ba naale emuɛ̄ Jizɔs, ba elu nage ye kaāna gbo kuma sɔ̄ ba gaa ɛrɛ ekpeloo loo dum Jɛhova le Jizɔs enɛa wa a.—Ais 9:6, 7.

16. Pya amunu leelee na i ɛrɛ aāloo elu gbo Jizɔs a?

¹⁶ Sɔ̄ i yiga lo eyii gbo Jizɔs, i ɛrɛ gbɛnɛ-edo leelee. Bu edoba, i ɛrɛ biī aāloo ye wereloo le yerekpotɛ̄ anyaawo. A nɛ i dee lo etɔɔ̄ dum ina deedee. E lo a kuī eera, yii gbo loo Jizɔs edoo kɔ i ɛrɛ nu a lee eera, lo a le kaāna gbanialoo kumaloo ye Tɛ Jɛhova. Naa ɛp dua dee a i kpaā nɛ lo elu gbo Jizɔs a!