1. Marhẹ wu ne ru bọn omamọ onyerẹnkugbe rhẹ ohworho?

UDJOGHWẸ ọrukaro ra na kpare ne ki vwo obọdẹn onyerẹnkugbe rhẹ ohworho ra vware ọke ukaro, yẹ ọrẹ ana ghwọghọ ọke rhẹ ọravwọ. Are arha ta kpahen iroro ọrhẹ oborẹ are i rhiẹromẹrẹn ne, ugbehian are nọ kpẹnkpẹnrhọ. Ọkezẹko, ọ vwọ phẹrẹ re ne rhiẹ ugbehian i Jesu-u. Mesoriẹ?

2. Me yẹ obẹnbẹn ọrukaro ra mẹrẹn?

² Obẹnbẹn ọrukaro yẹ, ọwan a ji mẹrẹn i Jesu dẹ-ẹ. Ilele Kristi buebun ri nyerẹnren uvuẹn ọke inyikọ na, i ji dẹrughwaroghwu aruẹ obẹnbẹn ọrana. Udabọ ọrana, ọnyikọ Peter nọ tare: “Dedevwo are a mẹriẹ-ẹn, ọrẹn are i vwo ẹguọlọ kpahiẹn. Dedevwo are i vwa mẹriẹn ọke ọnana-a, ọrẹn are e dje esegburhomẹmro kpahiẹn.” (1 Pet. 1:8) Omarana, ana sabu vwo obọdẹn onyerẹnkugbe rhẹ i Jesu dedevwo a ji mẹriẹ-ẹn.

3. Me yẹ obẹnbẹn ọreva ra dẹrughwaroghwẹ?

³ Obẹnbẹn ọreva yẹ, ọwan i vwa sabu leli Jesu tẹmro-o. Jehova ya nẹrhomo vwe. Itiọrurhomẹmro, ọwan a nẹrhomo nyoma odẹ i Jesu, ọrẹn a vwa vi tẹmro riẹ-ẹn. Jesu ọ guọlọ na nẹrhomo riẹ-ẹn. Mesoriẹ? Fọkime ẹrhomo aruẹ ogame ra haphia, habaye, Jehova ọvo yo fori na ha ẹga riẹn. (Matt. 4:10) Ọrẹn, ana sabu djephia taghene e vwo ẹguọlọ kpahen Jesu.

4. Me yẹ obẹnbẹn ọresa, me ye ne yono kpahen uvuẹn urhomu-ẹmro ọnana?

 ⁴ Obẹnbẹn ọresa yẹ, Jesu o rhirhiẹ obẹ odjuwu, omarana ọwan ọrhẹ ọye i sabu ghwọghọ ọke kugbe-e. Ọrẹn, o ji vwo ekwakwa buebun ra na sabu rhe kpahen Jesu dedevwo a ji mẹriẹn dẹ-ẹ. Ene yono kpahen ekwakwa ẹne ra na sabu ru, rọ nọ ha userhumu rẹn ọwan ruẹ onyerẹnkugbe ọwan rhẹ ọye gbanhon. Ọrukaro, jene yono kpahen oborẹ ọsoriẹ ọghanren ne vwo obọdẹn onyerẹnkugbe rhẹ i Kristi.

5. Mesoriẹ o fo ne rhiẹ ugbehian i Jesu? (Se ekpeti na “ Ugbehian Rhẹ i Jesu ọ Lẹrhẹ Ọwan Rhiẹ Ugbehian i Jehova” ọrhẹ “ Ha Ukẹro ro Serhọ ni Ẹrhẹ i Jesu.”)

⁵ Ene vi rhiẹ ugbehian i Jesu orhianẹ a guọlọ rhiẹ ugbehian i Jehova. Mesoriẹ? Jene yono kpahen iroro eva ọvo. Ọrukaro, Jesu ọ ta rẹn idibo yi: “Ọsẹ na harẹn omobọ ye o vwo ẹguọlọ okokodo kpahen are, fọkime are i vwo ẹguọlọ okokodo kpahen mẹ.” (John 16:27) Nọ ji ta: “O vwo ohworho owuorowu rọ nọ sabu bru Ọsẹ na rhe-e, jokpanẹ nyoma mẹ.” (John 14:6) Arha damoma re ne rhiẹ ugbehian i Jehova, ọrẹn ọwan rhẹ igbehian i Jesu-u, ọ họhọ ọke ra guọlọ ruẹ oghwa ọrẹn a nya ighwe na ruiẹ-ẹ. Jesu ọ ji ha udje rọ họhọ ọrana ruiruo, ọke ro dje omayen jerẹ “ighwe harẹn igegede na.” (John 10:7) Iroro ọreva yẹ, Jesu ọ dabu hẹrokele iruemru Ọsẹ ye gbagba. Nọ ta rẹn idibo yi: “Kohworho kohworho rọ mẹren mẹ ne, ọ ji mẹrẹn Ọsẹ na ne.” (John 14:9) Izede ọghoghanren owu re ne rhe i Jehova yẹ ọrẹ ene yono kpahen Jesu. Ọke erhe yono kpahen Jesu,  ẹguọlọ re vwo kpahiẹn ono rho kodorhọ. Ugbehian ọwan rhẹ i Jesu ọrhọ gbanhanrhọ, ẹguọlọ re vwo kpahen Ọsẹ na no no ji kodorhọ.

6. Me yẹ iroro ọrọrọ rọ nọ lẹrhẹ ọwan rhiẹ ugbehian i Jesu? Dje yi fiotọre.

⁶ Ene vi vwo onyerẹnkugbe rhẹ Jesu na ki sabu kpahenrhọ ẹrhomo ọwan. Ọnana ọ vrẹn ọrẹ ana ghwai ta, “nyoma odẹ i Jesu” uvuẹn obẹta ẹrhomo ọwan. Ene vi rhe oborẹ i Jehova ọ nyoma i Jesu kpahanrhọ ẹrhomo ọwan lele. Jesu nọ ta rẹn inyikọ ye: “Kemru kemru are i nekpẹn yen nyoma odẹ mẹ, mi ne ruie.” (John 14:13) Dedevwo, Jehova yo rhon ji kpahanrhọ ẹrhomo ọwan, ọ yẹ Jesu omẹgbanhon ro no ru orhienbro enẹyen phia. (Matt. 28:18) Bọmọke i Jehova ọnọ ki kpahenrhọ ẹrhomo ọwan, o kiki nie sua sẹ a nyalele urhebro i Jesu ne. Jerẹ udje, Jesu nọ tare: “Are i rha ha edandan awọrọ rhomu aye, Ọsẹ are rọ ha obẹ odjuwu ọnọ jeghwai harhomu are; ọrẹn, are arha ha edandan awọrọ rhomu aye-e, Ọsẹ are rọ ha obẹ odjuwu ọ jeghwai ha edandan are rhomu are-e.” (Matt. 6:14, 15) Ọ ghini ghanren omamọ ne ruẹ awọrọ lele oborẹ i Jehova ọrhẹ i Jesu e ruẹ ọwan!

7. Ayọmo ya mẹrẹn erere nẹ izobo otan i Jesu?

⁷ Igbehian i Jesu ọvo yi na mẹrẹn erere nẹ izobo otan na rhe. Marhẹ e ru rhe? Jesu ọ tare taghene ọye ọnọ “ha arhọ ye kpahontọre fọkiẹ igbehian yen.” (John 15:13) Idibo i Jehova ri nyerẹnren bọmọke i Jesu ọ ki rhiẹ akpọ na, ni ne yono kpahiẹn ji vwo ẹguọlọ kpahiẹn. Ana rhọmọ ihworho jerẹ Abraham, Sarah, Moses, ọrhẹ Rahab, ọrẹn idibo i Jehova enana ine rhiẹ igbehian i Jesu vwẹre nẹ aye i ki vwo arhọ i bẹmẹdẹ.—John 17:3; Acts 24:15; Heb. 11:8-12, 24-26, 31.

8-9. Jerẹ oborẹ e dje rhẹ John 15:4, 5, me yẹ onyerẹnkugbe ọwan rhẹ i Jesu ọ ha userhumu rẹn ọwan ruẹ, mesoriẹ ọ ghanren?

⁸ Ọwan a ghọghọ fọkime e vwo uphẹn re ne leli Jesu wian owian aghwoghwo na, ji yono ihworho iyẹnrẹn esiri Uvie na. Ọke i Jesu ọ ha otọrakpọ na, ọye oyono. Rọ ji ghwẹrioma riẹ odjuwu ne na, Jesu yọ ji yẹ ọwan ọkpọvi kpahen owian aghwoghwo ọrhẹ ọrẹ e yono ihworho, fọkime ọye yẹ urhomu ukoko na. O vwo ọdaremẹro okokodo kpahen omẹdamu wu ne yono ihworho buebun nẹ aye i rhe yi ọrhẹ Ọsẹ ye. Itiọrurhomẹmro, Jehova ọrhẹ Jesu ọvo yi na sabu ha userhumu rẹn ọwan wian owian ọnana rhẹ efikparobọ.—Se John 15:4, 5.

⁹ Baibol na ọ dabu yono taghene na sabu lẹrhẹ oma merhen i Jehova, ene vi vwo ẹguọlọ kpahen Jesu ji sẹrorẹ ẹguọlọ na. Jene yono kpahen ekwakwa ẹne re ne ruo ne ki rhiẹ igbehian i Jesu.

10. Me yẹ udjoghwẹ ọrukaro ra na kpare ne ki rhiẹ ugbehian i Jesu?

¹⁰ (1) Dabu rhe i Jesu. Ana sabu ru ọnana nyoma re ne se ọbe i Matthew, Mark, Luke, ọrhẹ John. Ọke erhe roro kodo kpahen iyẹnrẹn i Baibol ri sekpahen akpenyerẹn i Jesu, ne vwo ẹguọlọ kpahen Jesu, ji họghọ riẹn fọkiẹ oborẹ o lele ihworho ru lele. Jerẹ udje, dedevwo ọye yẹ Onini aye, o ruẹ idibo yi jerẹ evrẹ-ẹn. Ukpomaran, o dje oborẹ o roro phia rẹn aye. (John 15:15) Jesu o rhe kpahen omiamiamo aye, ji lele  aye viẹ. (John 11:32-36) Evwreghrẹn i Jesu i tobọ mẹrẹnvwrurhe taghene ọye ugbehian rẹn eri kerhọ ye. (Matt. 11:19) Arha hẹrokele oborẹ i Jesu o ruẹ idibo yi lele, onyerẹnkugbe ọwan ọrhẹ awọrọ ono rhomurhọ, ene vwo ẹhẹn otemẹ ọrhẹ omamerhomẹ, ẹguọlọ ọrhẹ ọdaremẹro re vwo kpahen Kristi no no kodorhọ.

11. Me yẹ udjoghwẹ ọreva ra na kpare na ki sabu rhiẹ ugbehian i Jesu, mesoriẹ ọnana ọ ghanren?

¹¹ (2) Hẹrokele iroro ọrhẹ irueruo i Jesu. Arha dabu hẹrokele oborẹ o ruẹ ekwakwa lele, onyerẹnkugbe ọwan rhẹ ọye nọ nọ kpẹnkpẹnrhọ. (1 Cor. 2:16) Marhẹ ene ru hẹrokele i Jesu? Roro kpahen udje owu. Ọgbọ buebun, Jesu o roro kpahen oborẹ ono ru ha userhumu rẹn awọrọ ukperẹ ono rhiẹ edamẹ omobọ ye. (Matt. 20:28; Rom. 15:1-3) Fọkime o vwo iroro ọnana, nọ homaze ji harhomu ihworho. Evwan o vwo rho kiki biomie kpahen oborẹ ihworho i ruru, ji ta kpahiẹ-ẹn. (John 1:46, 47) Ọ ha uphẹn rẹn orusọ ihworho i rurie nọ hobọte onyerẹnkugbe ro vwori rhẹ aye-e. (1 Tim. 1:12-14) Jesu nọ tare: “Ihworho ephian ine rhe taghene are idibo mẹ—are i rhe vwo ẹguọlọ kpahen omomare.” (John 13:35) Nọ oma, “Mia nyalele udje i Jesu nyoma mie ruẹ kemru kemru mi sabu sẹrorẹ ufuoma rhẹ imizu uvuẹn ukoko na?”

12. Me yẹ udjoghwẹ ọresa rọ nọ lẹrhẹ ọwan rhiẹ ugbehian i Jesu, marhẹ ene ruie lele?

¹² (3) Hobọtua imizu i Kristi. Arha hobọtua imizu i Kristi, Jesu o nie taghene ọye yẹ ọwan a ji hobọtua. (Matt. 25:34-40) Izede rọ mai ghanren rẹ ọwan a hobọtua imizu ra djẹha na yẹ, nyoma owian aghwoghwo Uvie na ọrhẹ ọrẹ e ruẹ idibo, jerẹ oborẹ i Jesu o jurhie rẹn ọwan. (Matt. 28:19, 20; Acts 10:42) Nyoma userhumu ‘igegede ereva’ na ọvo yẹ, era djẹha na a sabu wian owian aghwoghwo re ruẹ vwana. (John 10:16) Wu rha ha usuẹn igegede ereva na, we djephia taghene wu vwo ẹguọlọ kpahen era djẹha na ọrhẹ i Jesu nyoma wu ne vwobọrhọ owian Uvie na ọke ephian.

13. Marhẹ ene ru sabu nyalele urhebro i Jesu rọ ha uvuẹn Luke 16:9?

¹³ Ọwan a ji ha i Jehova ọrhẹ Jesu mwu igbehian, ọke erhe toro igho hobọtua owian Uvie na. (Se Luke 16:9.) Jerẹ udje, ana sabu toro itetoro rẹn owian akpọ ephian, toro igho ra na hobọtua owian aghwoghwo na uvuẹn ekete re vwe kiki ghwoghwo te, ọrẹ ana bọn ji hẹrote ekete re ruẹ ogame, ọrhẹ ọrẹ ana ha userhumu rẹn imizu ri rhiẹromẹrẹn oghwọghọ kpregede. Ana sabu toro igho hobọtua ukoko ra havwọ, ji ha userhumu rẹn imizu ri vwo ọdamẹ. (Prov. 19:17) O vwo izede buebun ene ru hobọtua imizu i Jesu.

14. Jerẹ oborẹ Ephesians 4:15, 16 o djephia, me yẹ udjoghwẹ ọrẹ ẹne ra na kpare ne ki rhiẹ ugbehian i Jesu?

¹⁴ (4) Hobọtua ẹkwaphiẹrhotọre re ruẹ uvuẹn ukoko i Jehova. E ruẹ onyerẹnkugbe ọwan rhẹ i Jesu ro rhiẹ urhomu harẹn ukoko na gbanhan, ọke ra nyalele ọkpọvi ekpako ukoko na. (Se Ephesians 4:15, 16.) Jerẹ udje, a damoma ha ọsoso Aghwẹlẹ Uvie ra bọn e ruiruo vuọnvuọn. Fọkiẹ ọnana, na ha ikoko ezẹko ba erọrọ, jeghwai kwaphiẹ okegbe aghwoghwo aye rhọ. Ẹkwaphiẹrhotọre ọnana, ọ ha userhumu rẹn ukoko na sabu sẹrorẹ igho re toro ne. Ọrẹn fọkiẹ ọnana, ighwoghwẹmro ezẹko na damoma rienrioma  rhẹ erhirhiẹ ọkpokpọ na. Ọnọ sabu họhọ taghene imizu eghoghanren enana, i ha ukoko owu omẹ ẹgbukpe buebun ne, ji vwo obọdẹn igbehian ri kpẹnkpẹnren avwaye ne. Ọrẹn vwana, na ta rẹn aye nẹ aye i riẹ ukoko ọrọrọ. Oma ọ merhen i Jesu ọke rọ mẹrẹn imizu enana, ri vwo atamwu ra nyalele ẹkwaphiẹrhotọre ọnana!

15. Marhẹ ugbehian ọwan rhẹ i Jesu ono ru rhomurhọ obaro na?

¹⁵ Ihworho ra ha ẹhẹn ọfuanfon djẹha i vwo ẹruefirhọ aye ine leli Jesu sun obẹ odjuwu uvuẹn otọre usun ọrẹ Uvie Osolobrugwẹ. Aye ine leli Jesu rhirhiẹ, nọyẹ aye ina mẹriẹn, lelie tẹmro ji lelie ghwọghọ ọke kugbe. (John 14:2, 3) Ihworho ri na ha otọrakpọ na riuku, ine ji rhiẹromẹrẹn ẹguọlọ ọrhẹ ẹruete i Jesu. Dedevwo aye i mẹrẹn i Jesu-u, ọrẹn onyerẹnkugbe aye rhẹ i Jesu ọnọ rhọ gbanhanrhọ ọke aye a riamerhen akpọ i Jehova ọrhẹ Jesu i kwaphiẹrhọ rẹn aye.—Isa. 9:6, 7.

16. Ebrurhọ ego yẹ ọwan a mẹrẹn fọkimẹ ọwan igbehian i Jesu?

¹⁶ Erhe rhiabọ dede use re ne rhiẹ igbehian i Jesu, na mẹrẹn erere buebun. Jerẹ udje, ọye o dje ẹguọlọ rẹn ọwan vwana. E vwo uphẹn re ne nyerẹn bẹmẹdẹ. Ọrọ mai ghanren, onyerẹnkugbe rhẹ i Jesu ọnọ lẹrhẹ ọwan vwo onyerẹnkugbe rọ mai ghanren kparobọ, nọyẹ ugbehian kpẹnkpẹnkpẹn rhẹ i Jehova. Ghini uphẹn ọduado re ne se ọwan ugbehian i Jesu!