1. Цӕмӕй дин еске хуарз ӕмбал исуа, уой туххӕй ци гъӕуй?

ЦӔМӔЙ дин еске хуарз ӕмбал исуа, уой туххӕй гъӕуама ӕ хӕццӕ рӕстӕг ӕрветай. Уӕ сагъӕстӕ кӕрӕдземӕн ку дзорайтӕ, уӕд балимӕн уодзиайтӕ. Фал Йесо Киристей ӕмбал исун ба зиндӕр ӕй. Цума цӕмӕн? Ӕркӕсӕн цалдӕр гъуддагемӕ.

2. Йесой ӕмбал исун ӕнцон ке туххӕй нӕй, еци гъуддӕгтӕй фиццаг цӕхуӕн ӕй?

² Фиццаг гъуддаг уой медӕг ӕй, ӕма мах Киристей некӕд фӕууидтан. Фиццаг ӕноси ка цардӕй, еци киристӕнттӕй дӕр ӕй беретӕ некӕд фӕууидтонцӕ. Фал апостол Петур загъта: «Сумах кӕд Киристей уингӕ дӕр некӕд фӕккодтайтӕ, уӕддӕр ӕй уарзетӕ. Ӕма ’й кӕд нуртӕккӕ дӕр нӕ уинетӕ, уӕддӕр ибӕл ӕууӕндетӕ» (1 Пет. 1:8). Мадта кӕд нӕ бон Йесой фӕууинун нӕй, уӕддӕр нӕ бон ӕй е ’мбӕлттӕ исун.

3. Йесой ӕмбал исун ӕнцон ке туххӕй нӕй, еци гъуддӕгтӕй дуккаг цӕхуӕн ӕй?

³ Дуккаг гъуддаг ба уой медӕг ӕй, ӕма нӕ бон нӕй Киристей хӕццӕ дзорун. Ковгӕ ку фӕккӕнӕн, уӕд Йегови хӕццӕ фӕдздзорӕн. Кӕд Киристей номӕй фӕкковӕн, уӕддӕр уой хӕццӕ нӕ фӕдздзорӕн. Удта Йесой ӕной дӕр нӕ фӕндуй, цӕмӕй уомӕ ковӕн. Цӕмӕннӕ? Уомӕн ӕма ковгӕ гъӕуама ӕрмӕстдӕр Хуцаумӕ кӕнӕн, нӕ Хуцау ба Йеговӕ ӕй (Матф. 4:10). Фал уӕддӕр нӕ бон ӕй ӕвдесун, Киристей ке уарзӕн, уой.

4. Йесой ӕмбал исун ӕнцон ке туххӕй нӕй, еци гъуддӕгтӕй ӕртиккаг цӕхуӕн ӕй? Аци статьяй цӕмӕ ӕркӕсдзиан?

 ⁴ Ӕртиккаг гъуддаг ба уой медӕг ӕй, ӕма Йесо уӕлӕрвти цӕруй, ӕма нӕ бон нӕй ӕ хӕццӕ рӕстӕг ӕрветун. Фал уотемӕй дӕр нӕ бон ӕй Йесой туххӕй берӕ цидӕртӕ базонун. Ӕркӕсӕн, цӕхуӕн цуппар унаффи нин банхус кӕндзӕнӕ, цӕмӕй Йесой хӕццӕ балимӕн уӕн ӕма алкӕддӕр е ’мбӕлттӕ уӕн. Фал бал фиццаг радзорӕн, е ’мбӕлттӕ исун ӕхсидзгӕ цӕмӕн ӕй, уобӕл.

5. Йесо Киристей ӕмбӕлттӕ исун цӕмӕн гъӕуй? (Кӕсӕ ма рамкитӕ « Йесой ӕмбӕлттӕ ку уӕн, уӕд Йегови ӕмбӕлттӕ дӕр уодзиан», удта « Йесомӕ раст цӕстӕй кӕсӕ».)

⁵ Цӕмӕй Йегови ӕмбӕлттӕ исуӕн, уой туххӕй Киристей ӕмбӕлттӕ дӕр гъӕуама уӕн. Цума уотӕ цӕмӕн ӕй? Ӕркӕсӕн дууӕ гъуддагемӕ. Фиццаг: Йесо ӕ ахуркӕнуйнӕгтӕн загъта: «Фидӕ уӕ ӕхӕуӕдӕг уарзуй, уомӕн ӕма сумах мӕн бауарзтайтӕ» (Иоан. 16:27). Удта ма загъта: «Мӕ Фидӕмӕ ӕрмӕстдӕр мӕн бӕлти ес ӕрбацӕуӕн, ӕндӕр некӕбӕлти» (Иоан. 14:6). Йесой ӕмбӕлттӕ ку нӕ уӕн, ӕма уотемӕй Йегови ӕмбӕлттӕ исунбӕл ку архайӕн, уӕд уотӕ уайдзӕй, цума хӕдзарӕмӕ дуарбӕл нӕ, фал ӕндӕр куддӕр бахезунмӕ гъавӕн. Йесо ӕхуӕдӕг дӕр ӕхе дуари хӕццӕ рабарста ӕма загъта: «Ӕз дӕн фустӕн дуар» (Иоан. 10:7). Дуккаг: Йесо ӕ Фиди менеугутӕ ӕнхӕстӕй ӕвдиста. Ӕ ахуркӕнуйнӕгтӕн загъта: «Мӕн ка фӕууидта, е фӕууидта Фиди дӕр» (Иоан. 14:9). Мадта цӕмӕй Йегови хуӕздӕр базонӕн, уой туххӕй гъӕуама Йесо Киристей царди туххӕй фулдӕр базонӕн. Йесой туххӕй куд фулдӕр зонӕн, уотӕ ’й фулдӕр уарздзиан. Ӕма Йесой куд  фулдӕр уарзӕн, уотӕ ба Йегови дӕр фулдӕр уарздзиан.

6. Йесой ӕмбӕлттӕ ма никкидӕр цӕмӕн гъӕуама уӕн? Ба ’й лӕдӕрун кӕнӕ.

⁶ Цӕмӕй нин Йеговӕ нӕ кувдтитӕбӕл дзуапп дӕтта, уой туххӕй гъӕуама Йесой ӕмбӕлттӕ исуӕн. Е уобӕл дзорӕг нӕй, ӕма кувди кӕрон уотӕ дзорун, «Йесо Киристей номӕй дӕмӕ ковӕн», зӕгъгӕ, фагӕ ӕй. Гъӕуама ’й лӕдӕрӕн, Йеговӕ нин Йесой фӕрци нӕ кувдтитӕбӕл дзуапп куд дӕттуй, уой. Йесо апостолтӕн загъта: «Мӕ номӕй цийфӕнди ма ракорайтӕ,– искӕндзӕн уин ӕй» (Иоан. 14:13). Нӕ кувдтитӕ нин ӕрмӕстдӕр Йеговӕ игъосуй ӕма сӕбӕл дзуапп дӕр е дӕттуй, фал Йесойӕн ба баихӕс кодта, цӕмӕй ин ӕ унаффитӕ ӕнхӕст кӕна (Матф. 28:18). Нӕ кувдбӕл дзуапп раттуни размӕ бал Йеговӕ фӕккӕсуй, Йесой фӕдзӕхститӕ куд ӕнхӕст кӕнӕн, уомӕ. Зӕгъӕн, Йесо загъта: «Адӕнӕн сӕ рӕдудтитӕ ку хатир кӕнайтӕ, уӕд уин уӕ уӕларвон Фидӕ дӕр хатир кӕндзӕй. Фал сумах адӕнӕн сӕ рӕдудтитӕ ку нӕ хатир кӕнайтӕ, уӕд уин уӕ Фидӕ дӕр нӕ ниххатир кӕндзӕй» (Матф. 6:14, 15). Аци дзурдтӕй бӕрӕг ӕй, Йеговӕ ӕма Йесо махмӕ цӕхуӕн зӕрдӕ дарунцӕ, мах дӕр иннетӕмӕ уӕхӕн зӕрдӕ ке гъӕуама дарӕн.

7. Йесой нивонд пайда кӕмӕн ӕрхӕсдзӕй?

⁷ Йесой нивонд пайда ӕрхӕсдзӕй ӕрмӕстдӕр е ’мбӕлттӕн. Кӕцӕй ӕй зонӕн? Йесо загъта, ӕ цард «е ’мбӕлтти сӕрбӕл» ке равардта (Иоан. 15:13). Зӕнхӕбӕл Йесойӕй раздӕр ка цардӕй, еци еузӕрдон адӕни дӕр гъӕудзӕй Йесой базонун ӕма ’й бауарзун. Зӕгъӕн, Авраам, Саррӕ, Моисей ӕма Раав ку райгас уонцӕ, уӕд уони дӕр гъӕудзӕй Йесой ӕмбӕлттӕ исун, цӕмӕй ӕносмӕ цӕронцӕ (Иоан. 17:3; Гъуд. 24:15; Дзиуит. 11:8–12, 24–26, 31).

8, 9. Иоанни 15:4, 5 куд финст ӕй, уомӕ гӕсгӕ Йесой ӕмбӕлттӕ ке ан, уой фӕрци нӕ бон цӕхуӕн гъуддаги ӕй архайун ӕма е ӕхсидзгӕ цӕмӕн ӕй?

⁸ Мах хъӕбӕр цийнӕ кӕнӕн, уомӕн ӕма Йесой хӕццӕ ӕмгуст кӕнӕн Паддзахади туххӕй хуарз хабар игъосун кӕнуни ӕма ахуркӕнуйнӕгтӕ цӕттӕ кӕнуни гъуддаги. Йесо зӕнхӕбӕл ку адтӕй, уӕд адӕни ахур кодта. Ӕма уӕлӕрвтӕмӕ ку раздахтӕй, уӕд иссӕй ӕмбурди сӕргълӕууӕг ӕма идарддӕр дӕр разамунд дӕттуй игъосун кӕнуни ӕма ахуркӕнуйнӕгтӕ цӕттӕ кӕнуни гъуддагӕн. Йесо ӕй уинуй, дӕ бон цидӕриддӕр ӕй, уой ке кӕнис, цӕмӕй фулдӕр адӕн уой дӕр ӕма Йегови дӕр базононцӕ ӕма ди хъӕбӕр боз ӕй. Аци гъуддаг ӕнхӕст кӕнун нин ӕрмӕстдӕр Йеговӕ ӕма Йесой фӕрци ӕнтӕсуй. (Бакӕсӕ Иоанни 15:4, 5.)

⁹ Мадта Хуцауи Дзурдӕй бӕрӕг ӕй: цӕмӕй Йегови зӕрдӕ рохс кӕнӕн, уой туххӕй Йесой ӕгас зӕрдӕй уарзун гъӕуй. Гъӕйдӕ мадта ӕркӕсӕн, Йесой ӕмбӕлттӕ исунмӕ нин ка банхус кӕндзӕй, цуппар уӕхӕн гъуддагемӕ.

10. Цӕмӕй Йесой ӕмбӕлттӕ исуӕн, уой туххӕй нӕ фиццаг ци гъӕуй бакӕнун?

¹⁰ 1. Йесой хуӕздӕр базонӕ. Еци гъуддаги дин банхус кӕндзӕнцӕ Матфеййи, Марки, Лукай ӕма Иоанни Евангелитӕ. Киристе адӕнмӕ цӕхуӕн зӕрдӕ дардта, уой туххӕй аци киунугути ци финст ес, уобӕл ку сагъӕс кӕнӕн, уӕд ӕй никки фулдӕр уарздзиан ӕма ’й нимайдзиан. Зӕгъӕн, кӕд ӕ ахуркӕнуйнӕгтӕн Хецау адтӕй, уӕддӕр сӕ ӕ цагъартӕбӕл нӕ нимадта. Е ма син ӕ сагъӕстӕ ӕма, цӕбӕл тухстӕй, уой дӕр радзоридӕ (Иоан. 15:15). Естӕбӕл ку маст кӕниуонцӕ, уӕд Йесойӕн дӕр зин уидӕ, ӕ цӕстисугтӕ дӕр ма ӕруайиуонцӕ (Иоан. 11:32–36). Е знӕгтӕ дӕр ӕй уидтонцӕ,  ци хабар хаста, уомӕ ка байгъосидӕ, етӕ е ’мбӕлттӕ ке исуиуонцӕ (Матф. 11:19). Мах дӕр адӕнӕн, Йесо ӕ ахуркӕнуйнӕгтӕн куд адтӕй, уотӕ ку уӕн, уӕд сӕ хӕццӕ хуӕздӕр цӕрдзиан. Уотемӕй нин нӕ цард фулдӕр цийнӕдзийнадӕ хӕсдзӕй, удта Йесомӕ дӕр хӕстӕгдӕр кӕндзиан.

11. Йесой ӕмбӕлттӕ исунмӕ нин ка банхус кӕндзӕй, еци къахдзӕфтӕй дуккаг цӕхуӕн ӕй ӕма е ӕхсидзгӕ къахдзӕф цӕмӕн ӕй?

¹¹ 2. Йесой хузӕн сагъӕс дӕр кӕнӕ ӕма архайгӕ дӕр. Йесо куд сагъӕс кодта, уой хуӕздӕр балӕдӕрунбӕл ку архайӕн ӕма ’й ку фӕнзӕн, уӕд нӕ лимӕндзийнадӕ федардӕр кӕндзӕй (1 Кор. 2:16). Нӕ бон куд ӕй Йесой фӕнзун? Расагъӕс кӕнӕн еу гъуддагбӕл. Йесо фулдӕр сагъӕс кодта, иннетӕн куд банхус кодтайдӕ, уобӕл, ӕхебӕл нӕ, фал (Матф. 20:28; Ром. 15:1–3). Уой фӕрци цӕттӕ адтӕй ӕхе цӕмӕйдӕрти фӕццох кӕнунмӕ ӕма иннетӕн хатир кӕнунмӕ. Еске ӕхсилкъӕ дзубандитӕбӕл ӕ зӕрдӕ нӕ худтӕй (Иоан. 1:46, 47). Удта адӕймагмӕ ӕ раздӕриккон рӕдудтити туххӕй лӕгъуз цӕстӕй некӕд кастӕй (1 Тим. 1:12–14). Йесо загъта: «Мӕ ахуркӕнуйнӕгтӕ ке айтӕ, уой еугур адӕн дӕр базондзӕнцӕ, уӕ кӕрӕдзей ку уарзайтӕ, уӕд» (Иоан. 13:35). Мадта хуарз уайдӕ нӕхемӕ уӕхӕн фарста раттун: «Ӕз ба Киристей фӕнзун ӕма, мӕ бон ци ӕй, уой кӕнун, цӕмӕй хуӕртӕ ӕма ӕнсувӕрти хӕццӕ лимӕнӕй цӕрон?»

12. Йесой ӕмбӕлттӕ исунмӕ нин ка банхус кӕндзӕй, еци къахдзӕфтӕй ӕртиккаг цӕхуӕн ӕй ӕма ’й нӕ бон куд ӕй искӕнун?

¹² 3. Киристей ӕнсувӕртӕн ӕнхус кӕнӕ. Йесой исӕрст ӕнсувӕртӕн ку фенхус кӕнӕн, уӕд Йесо уомӕ уӕхӕн цӕстӕй фӕккӕсуй, цума ин ӕхецӕн ӕнхус кӕнӕн (Матф. 25:34–40). Цума нӕ бон куд ӕй Йесой ӕнсувӕртӕн ӕнхус кӕнун? Фиццагидӕр гъӕуй зингзӕрдӕй архайун, Йесо ӕ фӕдбӕлдзӕугутӕн ке баихӕс кодта, еци гъуддаги – Паддзахади хабар игъосун кӕнуни ӕма ахуркӕнуйнӕгтӕ цӕттӕ кӕнуни гъуддаги (Матф. 28:19, 20; Гъуд. 10:42). Киристей ӕнсувӕртӕн ӕгас зӕнхӕбӕл дӕр еци куст искӕнун бантӕсдзӕй ӕрмӕстдӕр «ӕндӕр фусти» ӕнхуси фӕрци (Иоан. 10:16). Кӕд ду дӕр ӕндӕр фустӕмӕ хауис, уӕд ӕй зонӕ: алли хатт дӕр игъосун кӕнунмӕ ку рацӕуис, уӕд уомӕй бавдесис, айдагъ исӕрст киристӕнтти нӕ, фал ма Йесой дӕр ке уарзис.

13. Киристе Лукай 16:9 ци унаффӕ равардта, уомӕ гӕсгӕ архайун нӕ бон куд ӕй?

¹³ Йегови ӕма Йесой ӕмбӕлттӕ ма исуодзиан, разамунд ци гъуддагӕн дӕттунцӕ, еци гъуддагӕн нисайнӕгтӕй ку ӕнхус кӕнӕн, уӕд. (Бакӕсӕ Лукай 16:9.) Зӕгъӕн, нӕ бон ӕй нисайнаг дӕттун ӕгасдуйнеуон гъуддагӕн. Еци нисайнӕгти фӕрци хуарз хабар игъустгонд цӕуй идард рауӕнти дӕр, Паддзахади залтӕ ӕма ӕндӕр уӕхӕн бунӕттӕ конд цӕунцӕ, удта ма уони фӕрци, ӕрдзон бӕллӕх зиан кӕмӕн ӕрхаста кенӕ ӕндӕр зин уавӕри ка бахаудтӕй, еци хуӕртӕ ӕма ӕнсувӕртӕн дӕр ӕнхус кӕнӕн. Нӕ бон ма ӕй нисайнӕгтӕ дӕттун ӕмбурди хӕрзтӕн, удта ӕнхусгъӕуагӕ ка ӕй, уонӕмӕ дӕр фӕккӕсун (Ӕмб. 19:17). Уотемӕй ӕнхус кӕнӕн Киристей ӕнсувӕртӕн.

14. Ефесӕгтӕмӕ 4:15, 16 куд финст ӕй, уомӕ гӕсгӕ, Йесой ӕмбӕлттӕ исунмӕ нин ка банхус кӕндзӕй, еци къахдзӕфтӕй цуппӕрӕймаг цӕхуӕн ӕй?

¹⁴ 4. Йегови организаци ци унаффитӕ рахӕссуй, уонӕмӕ гӕсгӕ архайӕ. Ӕмбурди хестӕр Йесой хӕццӕ ма никки хъӕбӕрдӕр балимӕн уодзиан, ке бӕрагӕ нӕ бакодта, еци ӕнсувӕрти хӕццӕ ӕмгуст ку кӕнӕн, уӕд. (Бакӕсӕ Ефесӕгтӕмӕ 4:15, 16.) Зӕгъӕн, нур мах архайӕн, цӕмӕй нӕ залтӕй куд хуӕздӕр ӕй, уотӕ пайда кӕнӕн. Уомӕ  гӕсгӕ еуей-еу ӕмбурдтӕ байеу кодтонцӕ, удта син сӕ территоритӕ дӕр раййивтонцӕ. Уой фӕрци нисайнӕгтӕ цӕхуӕндӕр гъуддӕгтӕбӕл харз кӕнун нӕбал гъӕуй. Еци ӕййивддзийнӕдти туххӕй еуӕй-еу игъосунгӕнгути нӕуӕг уавӕртӕбӕл ахур кӕнун багъудӕй. Кадӕртӕ си берӕ ӕнзти дӕргъи еци-еу ӕмбурди лӕггадӕ кодтонцӕ ӕма си хуӕртӕ ӕма ӕнсувӕртӕбӕл хъӕбӕр исахур ӕнцӕ. Фал сӕ нур ба багъудӕй ӕндӕр ӕмбурдмӕ рахезун. Расагъӕс кӕнӕ, Йесойӕн куд ӕхцӕуӕн ӕй, ӕ еузӕрдон лӕггадгӕнгутӕ Йегови организаций хӕццӕ ӕмгуст куд кӕнунцӕ, уой уинун!

15. Федӕни Киристей хӕццӕ нӕ лимӕндзийнадӕ никки федардӕр цӕмӕн исуодзӕй?

¹⁵ Сугъдӕг хъаурӕй исӕрст ка ’нцӕ, еци киристӕнттӕ Йесой хӕццӕ уодзӕнцӕ паддзӕхтӕ Хуцауи Паддзахади. Сӕ бон уодзӕй Киристей уинун, ӕ хӕццӕ дзорун ӕма ӕ хӕццӕ рӕстӕг ӕрветун (Иоан. 14:2, 3). Зӕнхӕбӕл ка цӕра, етӕ дӕр Киристей уарзт сӕхебӕл лӕдӕрдзӕнцӕ. Кӕд ӕй сӕ бон уинун нӕ уодзӕй, уӕддӕр имӕ бонӕй-бонмӕ хӕстӕгдӕр кӕндзӕнцӕ. Ӕма уӕд цийнӕ кӕндзӕнцӕ, Йесо ӕма син Йеговӕ ци цард искодтонцӕ, уобӕл (Ис. 9:6, 7).

16. Йесой ӕмбӕлттӕ ке ан, уой фӕрци цӕхуӕн арфӕдзийнӕдтӕй хайгин ан?

¹⁶ Йесой фӕндуй, цӕмӕй е ’мбӕлттӕ исуӕн. Е ’мбӕлттӕ ба берӕ арфӕдзийнӕдтӕй хайгин ӕнцӕ. Зӕгъӕн, Йесо сӕ уарзуй ӕма син ӕнхус кӕнуй, удта ма син ӕносон цардмӕ над райгон кодта. Фал тӕккӕ устурдӕр арфӕдзийнадӕ ба ӕй, Йегови ӕмбӕлттӕ дӕр ке иссӕнцӕ, е. Уомӕй хуӕздӕр ба неци ес! Мадта дӕ Йесо е ’мбалбӕл ку нимайа, уӕд е ӕцӕгӕйдӕр устур кадӕ ӕй!