1. Panon mon nakaaro so sakey ya too?

PIAN nakaarom so sakey ya too, kaukolan ya walay panaon mo parad sikato. No manistoryaan kayo tan pantongtongan yo ray iisipen tan nagagawad bilay yo, magmaliw kayon sankaaro. Balet no nipaakar ed pikaaro ed si Jesus, aliwan ontan kainomay. Anto ray rason?

2. Antoy unonan rason ya aliwan onman kainomay so mikaaro ed si Jesus?

² Say unonan rason et agtayo personal ya akabat si Jesus. Ontan met so situasyon na dakel a Kristiano nen inmunan siglo. Balet oniay imbaga nen apostol Pedro: “Anggaman sikatoy agyon balot anengneng, sikatoy aaroen yo. Anggaman sikatoy agyo nanenengneng natan, ipapatnag yoy pananisia ed sikato.” (1 Ped. 1:8) Sarag tayo sirin so mikaaro ed si Jesus anggano agtayo personal ya akabat.

3. Anto so komaduan rason?

³ Say komaduan rason et agtayo nakakatongtong si Jesus. No manpipikasi tayo, si Jehova so katongtong tayo. Siempre, manpipikasi tayo diad ngaran nen Jesus, balet aliwan sikato so direktan katongtong tayo. Diad tua, agto labay ya sikato so pampikasian tayo. Akin? Ta say pikakasi et sakey a klase na panagdayew, tan si Jehova labat so nepeg ya dayewen. (Mat.  4:10) Balet sarag tayo nin siansia ya ipanengneng so panangaro tayod si Jesus.

4. Anto so komatlon rason, tan anto ray aralen tayo ed sayan artikulo?

⁴ Say komatlon rason et walad tawen si Jesus, kanian agtayo personal ya nakaiba. Anggaman ontan, sarag tayon kabaten a maong si Jesus. Aralen tayoy apatira ya nepeg tayon gawaen pian onelet so pikakaaro tayod sikato. Amtaen tayo ni balet no akin ya importantin mikaaro tayo ed si Jesu-Kristo.

5. Akin ya mikaaro tayo ed si Jesus? (Nengnengen met so kahon ya “ No Kaaro Tayoy Jesus, Nakaaro Tayoy Jehova” tan “ Say Dugan Pangipasen ed si Jesus.”)

⁵ Nepeg ya mikaaro tayod si Jesus pian magmaliw itayon kaaro nen Jehova. Akin et ontan so nibaga tayo? Pantongtongan tayoy duaran rason. Unona, oniay imbaga nen Jesus ed saray disipulo to: “Aaroen kayo na Ama, lapud inaro yo ak.” (Juan 16:27) Imbaga to met: “Anggapoy makasabi ed Ama no aliwan diad panamegley ko.” (Juan 14:6) No labay tayoy mikaaro ed si Jehova balet ta agtayo kaaro si Jesus, singa tayo sasalien so onloob ed abung ya aliwan diad puerta so dalanen tayo. Imbaga nen Jesus ya sikato so “puerta parad saray karnero.” (Juan 10:7) Say komaduan rason et lapud inalig nen Jesus so amin ya kualidad nen Ama to. Imbaga tod saray disipulo to: “Siopaman ya akanengneng ed siak et anengneng to met lay Ama.” (Juan 14:9) Kanian nakabat tayon maong si Jehova no aralen tayoy bilay nen Jesus. Legan ya ondadakel so amta tayo ed si Jesus, mas naaro tayo. Tan no lalon oneelet so panangaro tayod si Jesus, lalon onelet so panangaro tayod Ama to.

6. Anto ni sakey a rason no akin ya nepeg itayon mikaaro ed si Jesus? Ipaliwawa.

 ⁶ Nepeg ya mikaaro tayod si Jesus pian naebatan iray pikakasi tayo. Kulang so basta pangibaga labat na “diad ngaran nen Jesus” ed sampot na pikakasi. Nepeg tayon bidbiren ya si Jesus so uusaren nen Jehova pian ebatan iray pikakasi tayo. Imbaga nen Jesus ed saray apostol to: “Antokaman so kerewen yo diad ngaran ko, saya so gawaen ko.” (Juan 14:13) Tua ya si Jehova so ondedengel tan mangeebat ed saray pikakasi tayo, balet inikdan toy Jesus na autoridad pian gawaen iray desisyon To. (Mat. 28:18) Kanian antis ya ebatan nen Jehova so pikakasi tayo, seseguroen to ni no kasin iyaaplika tayo iray bilin nen Jesus. Singa bilang, imbaga nen Jesus: “No perdonaen yo iray totoo ed saray impakalingo ra, perdonaen kayo met na Ama yo ed tawen; balet no agyo perdonaen iray totoo ed saray impakalingo ra, agmet perdonaen na Ama yo iray impakalingo yo.” (Mat. 6:14, 15) Importante sirin ya say pantrato tayo ed arum et pareho ed maaron panagtrato nen Jehova tan Jesus ed sikatayo!

7. Siopa ray nabendisyonan ed dondon bagat nen Jesus?

⁷ Saray kaaro labat nen Jesus so nabendisyonan ed dondon bagat to. Akin? Imbaga nen Jesus ya “iter toy bilay to parad kakaaro to.” (Juan 15:13) Saray matoor ya lingkor na Dios ya nambilay antis ya linmad dalin si Jesus et kaukolan dan kabaten tan aroen si Jesus sano paolien la ra. Kaibad saratan si Abraham, Sara, Moises, tan Rahab. Anggan sarayan lingkor nen Jehova et kaukolan day mikaaro ed si Jesus pian nawalaan iray andi-anggaan ya bilay.​—Juan 17:3; Gawa 24:15; Heb. 11:8-12, 24-26, 31.

8-9. Base ed Juan 15:4, 5, antoy nagagawaan tayo lapud kaaro tayoy Jesus, tan akin ya importante itan?

⁸ Malikeliket tayon mikikimeyan ed si Jesus diad panagpulong tan panagbangat na maong a balita na Panarian. Nambangat si Jesus nen wadiad dalin. Tan manlapu la nen pinmawil ed tawen, sikato so ulo na amin a kongregasyon tan idadaulo to so kimey ya panagpulong tan panagbangat. Nanenengneng tan papablien toy pansasagpot mo ya tulongan so dakel a totoo anggad posible pian sikato tan say Ama to et nakabat da. Tan diad tua, nagagawaan tayo iyan kimey lapud tulong nen Jehova tan Jesus.​—Basaen so Juan 15:4, 5.

⁹ Malinew ya ibabangat na Salita na Dios ya nepeg itayon mikaaro ed si Jesus pian napaliket tayoy Jehova. Amtaen tayo sirin so apatira ya nepeg tayon gawaen pian nakaaro tayoy Jesus.

10. Antoy unonan gawaen tayo pian nakaaro tayoy Jesus?

¹⁰ (1) Kabaten a maong si Jesus. Nagawaan tayo itan no basaen tayo ray libro na Biblia ya Mateo, Marcos, Lucas, tan Juan. No dalepdepen tayo iray nababasa tayo nipaakar ed bilay nen Jesus, onaralem so panangaro tan respeto tayod sikato ta maomaong so impantrato tod saray totoo. Singa bilang, aliwan aripen so trato tod saray disipulo to anggano sikato so Katawan. Imbes, impasen to ran kaaro, tan imbaga to ni ingen ed sikara iray nononoten tan nalilikna to. (Juan 15:15) No maermen ira, maermen met si Jesus tan akiakis ni ingen ed sikara. (Juan 11:32-36) Anggan saray onkokontra ed sikato et  anengneng da ya talagan kaaro so turing to ed saramay angawat ed mensahe to. (Mat. 11:19) No aligen tayoy impantrato nen Jesus ed saray disipulo to, onelet so pikakaaro tayo ed arum, magmaliw tayon mas maliket tan kontento ed bilay tayo, tan mas onaralem so panangaro tan respeto tayod si Jesu-Kristo.

11. Antoy komadua ya nepeg tayon gawaen pian nakaaro tayoy Jesus, tan akin ya importante itan?

¹¹ (2) Aligen so panagnonot nen Jesus. No amtaen tayoy paraan na panagnonot nen Jesus tan aligen tayo, onelet so pikakaaro tayo ed sikato. (1 Cor. 2:16) Panon tayon naalig si Jesus? Niay sakey ya alimbawa: Sankanonot nen Jesus no panon ton natulongan so arum tan agto inyuna so sarili to. (Mat. 20:28; Roma 15:1-3) Lapud satan so sankanonot to, mabulos ya mansakripisyo tan mamerdona. Agmet mainomay ya nasakitan ed negatibon ibabaga na arum ed sikato. (Juan 1:46, 47) Tan agto inisip ya say sakey a too et agla manguman no akagawa na kasalanan. (1 Tim. 1:12-14) Importante ya aligen tayo itan ya panagnonot nen Jesus ta oniay imbaga to: “Naamtaan na amin a sikayo iray disipulok​—no manaaroan kayo.” (Juan 13:35) Kanian maabig no tepetan moy sarilim, “Kasin gagawaen koy anggaay nayarian ko ya mikareenan ed saray agagi pian naalig koy Jesus?”

12. Antoy komatlo ya nepeg tayon gawaen pian nakaaro tayoy Jesus, tan panon tayon nagawaan itan?

¹² (3) Suportaan iray agagi nen Kristo. Imbaga nen Jesus ya saray gagawaen tayo parad saray alanaan ya agagi to et ipapasen to ya gagawaen tayo parad sikato. (Mat. 25:34-40) Say manunan paraan pian nasuportaan tayo ray alanaan et diad makulin pampulong tan pangibangat tayo ed Panarian ta ingganggan itan nen Jesus. (Mat. 28:19, 20; Gawa 10:42) Nagagawaan na saray agagi nen Kristo so panagpulong ed interon mundo lapud tulong na ‘arum a karnero.’ (Juan 10:16) No kabiangan ka na arum a karnero, tandaan mo ya kada no manpulong tan mangiyaral ka et ipapanengneng mo ya inar-arom iray alanaan tan si Jesus.

13. Panon tayon niyaplika so bilin nen Jesus ya walad Lucas 16:9?

¹³ Nakaaro tayo met si Jehova tan si Jesus no usaren tayoy kuarta tayo pian suportaan so kimey ya idadaulo da. (Basaen so Lucas 16:9.) Singa bilang, sarag tayoy mandonasyon parad sankamundoan a kimey pian nipulong so maong a balita diad nisulinek iran lugar, nipaalagey tan namintina iray Kingdom Hall tan arum nin bilding ya uusaren ed panagdayew, tan natulongan iray biktima na saray kalamidad tan trahedya. Mandodonasyon tayo met parad saray gastos na kongregasyon tayo, tan tutulongan tayo ray agagi ya amta tayon mankaukolan. (Pro. 19:17) No gagawaen tayo iratan, susuportaan tayo iray agagi nen Kristo.

14. Base ed Efeso 4:15, 16, antoy komapat ya nepeg tayon gawaen pian nakaaro tayoy Jesus?

¹⁴ (4) Suportaan iray uksoyan ed organisasyon nen Jehova. Onelet so pikakaaro tayod si Jesus, say ulo na amin a kongregasyon, no mitulongan tayo ed saray brother ya tinuro ton mangasikaso ed sikatayo. (Basaen so Efeso 4:15, 16.) Singa bilang, seseguroen na organisasyon ya talagan nauusar a maong iray Kingdom Hall. Kanian say arum ya kongregasyon et pinan-iba tan wala ray pananguman ed teritorya. Lapud sayan uksoyan,  baleg so natitipid na organisasyon tayo. Balet siempre, kaukolan ya man-adjust so arum ya agagi ed saray pananguman. Ompan say arum ed sarayan matoor ya agagi et abayag lan manlilingkor ed sakey a kongregasyon tan maapit lay liknaan da ed saray kakongregasyon da, balet natan et iyalis da ra ed arum ya kongregasyon. Seguradon malikeliket si Jesus no nanenengneng to ya mitutulongan irayan matoor ya agagi ed sayan uksoyan!

15. Akin ya lalon onelet so pikakaaro tayod si Jesus diad arapen?

¹⁵ Saray alanaan na masanton espiritu et nakaiba day Jesus ya andi-anggaan ta kaiba to ran manuley ed Panarian na Dios. Personal dan nakaiba, nanengneng, tan nakatongtong si Jesus. (Juan 14:2, 3) Saray maniilalon manbilay na andi-anggaan diad dalin et aroen tan asikasoen met nen Jesus. Anggano agda nanengneng si Jesus, lalon onelet so pikakaaro da ed sikato legan dan panliliketan so bilay ya inter ed sikara nen Jehova tan Jesus.​—Isa. 9:6, 7.

16. Anto ran bendisyon so awaten tayo no kaaro tayoy Jesus?

¹⁶ No kaaro tayoy Jesus, dakel so bendisyon ya awaten tayo. Singa bilang, nalikna tayoy panangaro tan panangasikaso to. Walay ilalo tayon manbilay ya andi-anggaan. Tan say sankaimportantian, nakaaro tayo met so sankaabigan ya kaaro, si Aman Jehova. Baleg sirin a pribilehyo ya natawag itayon kakaaro nen Jesus!