1. Ke mekerang e toketekii a kmes el deleuill er kau me a chad?

A LSOAD el mo ungil sechelei e ngkired el meleketek a kmes el deleuill er kid me a chad e mengoit a temed lobengkel. Me sel dechadecheduch, el kauchais a uldesued me aike el ngar a rengud, e ngokesengii a deleuill er kid. Engdi a lebebil er a taem e ngmo meringel er kid el mo sechelil a Jesus. E ngera uchul?

2. Ngerang a kot lomelsemai el dechelebangel er ngii?

² A kot el omelsemai, a kid el dirkak a ta el desang a Jesus. Me a rebetok el Kristiano el kiliei er a taem er a rechapostol a dirrek el dimlak a ta el lesa Jesus. Me nguaisei, engdi a apostol el Petrus a dilu el kmo: “Ng dirkak mesang e betik a rengmiu er ngii, e diak mesang er chelechang e oumerang er ngii.” (1 Pe. 1:8) Me ngkmal sebeched el mekurulii a kmes el deleuill er kid me a Jesus alta e ngdirkak a ta el desang.

3. Ngerang a ongeru lomelsemai el dechelebangel er ngii?

³ A ongerung el omelsemai a kid el diak el sebeched el mengedecheduch er a Jesus. Me sel doluluuch, e kede mengedecheduch er a Jehovah. Nguaisei, kede meluluuch lokiu a ngklel a Jesus, engdi a nglunguched a diak di lemelemalt el mora Jesus. E a mera er ngii, a Jesus a diak lsoal a doluluuch el mo er ngii. E ngera uchul? E le nglunguuch a ta er a rolel a omengull, e di ta el Jehovah a kired el mengull er ngii. (Mt. 4:10) Engdi ngdirrek el sebeched el ochotii el kmo ngbetik a rengud er a Jesus.

4. Ngerang a ongedei lomelsemai el dechelebangel er ngii?

 ⁴ A ongedei el omelsemai a Jesus a kiei er a eanged, me ngdiak lsebeched el mo obengkel. Engdi ngsebeched el mo medengei a betok el kirel alta e ngdiak lsebeched el mo obengkel. Kede mo mesaod a eua el tekoi el sebeched el meruul el lokesengii a deleuill er kid lobengkel. A kot, e bo dorriter er sel uchul me ngklou a ultutelel el dolekes er a delongeled lobengkel a Kristus.

5. Ngera uchul me ngkmal kired el mo sechelil a Jesus? (Momes er a baks el “ A Bo Desechelil a Jesus e Ngsebeched el Mo Sechelil a Jehovah” me a “ Tabesul el Uldesued el Bedul a Jesus.”)

⁵ Ngkmal kired el mo sechelil a Jesus a lsekum ngsoad a lebo er ngii a ungil deleuill er kid me a Jehovah. E ngera uchul? Me bo dosaod a eru el uchul. A kot, e a Jesus a dilu er a redisaiplo er ngii el kmo: “E le Chedam a betik a rengul er kemiu, e le kemiu el mle betik a rengmiu er ngak.” (Jn. 16:27, NW) Ngdirrek el dilu el kmo: “Ng diak a chad el mor a Chedam, a lak lokiu ngak.” (Jn. 14:6) A lsekum kede melasem el mo sechelil a Jehovah e diak dokurulii a deleuill er kid me a Jesus, e ngdi ua dolasem el mo soiseb er a blai el diak dokiu a chesimer. A Jesus a uluusbech er a osisiu lokesiu er sera lomekesiu er ngii el ua “tuangel el bo le siseb er ngii a sib.” (Jn. 10:7) A ongeru el uchul, a Jesus a mle cherrungel loukerebai a blekerdelel a Demal. Ngdilu er a redisaiplo er ngii el kmo: “Ngikel mla mesekak a mla mesa Chedam.” (Jn. 14:9) Me a klou a ultutelel el rolel e kede mo medengelii a Jehovah a okiu sel dosuub el kirel a klengar er a Jesus. A cherengel a taem el dosuub el kirel a Jesus, e a bltkil a rengud el mo er ngii a mukeroul. Me a cherengel a taem el lemukeroul a deleuill er  kid me a Jesus, e ngmengal mo soad el meruul a soal a Demal.

6. Ngera ta er a uchul me ngkirel mo er ngii a kmes el deleuill er kid me a Jesus? Mosaod.

⁶ Ngkmal kirel mo er ngii a kmes el deleuill er kid me a Jesus me bo lsebechel monger a nglunguched. Tia belkul a kmo ngar ngii a dirk kired el meruul el diak di sel dedu el kmo “lokiu a ngklel a Jesus” er a ulebengelel a nglunguched e lemerekong. Ngkired el mo medengelii a rolel e a Jehovah a ousbech er a Jesus el onger a nglunguched. A Jesus a dilu er a rechapostol er ngii el kmo: “Ak mo remuul a ngii di le ngerang el molengit el oba ngklek.” (Jn. 14:13) Me alta e a Jehovah a orrenges e onger a nglunguched, engdi ngmla msa Jesus a klisichel a dereder el mo meruul a soal a Demal. (Mt. 28:18) Me a Dios a kirel mesekid loltaut a ulekrael er a Jesus er a uchei er a longer a nglunguched. El ua tiang, a Jesus a dilu el kmo: “A lsekum kom ousubes a kngterir a re chad el ekor kemiu, e a Demmiu el ngar a eanged me ng dirrek el mo ousubes a kngtmiu. E ngdi lsekum ng diak mousubes, e a Demmiu a diak bo lousubes a kngtmiu.” (Mt. 6:14, 15) Ngkol uangera el klou a ultutelel el kirel mo ungil a omerelled el bedul a rebebil el ua omerellel a Jehovah me a Jesus el bedulkid!

7. Te rua techa mo ngmai a klungiolir er a olubet el tengetengel a Jesus?

⁷ Ngdi tirke el kmes a deleuill lobengkel a Jesus a mo ngmai a klungiolir er a olubet el tengetengel. Kede mekerang e medengei? A Jesus a dilu el kmo, ngmo ‘bengkengkii a klengar er ngii . . . el bedul ar sechelil.’ (Jn. 15:13, BT) A reblak a rengrir el chad el kiliei er a uchei er a lemei er a chutem a Jesus, a dirrek el mo mesuub el kirel e mo omekeroul er a bltkil a rengrir el bedulngii. Te sechal me a redil el ua Abraham, Sara, Moses, me a Rahab el tir a mo mekiis, tirka melemalt el chad, engdi ngdirrek el kirir el mo omekeroul er a kmes el deleuill er tir me a Jesus me bo lsebechir el mo nguu a diak a ulebengelel klengar.​—Jn. 17:3; Rel. 24:15; Heb. 11:8-12, 24-26, 31.

8-9. Ngera sebeched el remuul a lsekum kede sechelil a Jesus? E ngera uchul me tiang a klou a ultutelel, el ua losaod a Johanes 15:4, 5?

⁸ Ngdmeu a rengud loureor lobengkel a Jesus el omerk e olisechakl er a ungil chais el kirel a Renged. Sel taem el Jesus a mla er tia el chutem, e ngullisechakl. E sera lluut el mora eanged, e ngii el Jesus el bdelul a ongdibel, a dirk melemolem lomekrael er a ureor er a berkel a klumech me a osisechakl. Ngomes e dirrek el oba omereng el saul el kirel a blakerreng er kid el olengeseu er a rebetok el chad el mo medengelii ngii me a Demal. E a di ta el rolel e ngsebeched el churrengelii tia el ureor, e okiu a ngelsuil a Jehovah me a Jesus.​—Monguiu er a Johanes 15:4, 5.

⁹ A Tekingel a Dios a bleketakl el osisecheklid el kmo ngkmal kired el melemolem er a bltkil a rengud el mora Jesus a lsoad loldeu er a rengul a Jehovah. Mada me bo dosaod a eua el tekoi el sebeched el meruul me bo desechelil a Jesus.

10. Ngera kot el tekoi el kired el rullii me bo desechelil a Jesus?

¹⁰ (1) Mo medengelii a Jesus. Ngsebeched el meruul er tiang lokiu sel donguiu a babier er a Mateus, Markus, Lukas me a Johanes. Sel dolebedebek aika el cheldecheduch er a Biblia el kirel a klengar er a Jesus, e ngmukeroul a bltkil a rengud me a omengull er kid el mora Jesus el kirel a ungil blekerdelel el mora rechad. El ua tiang, alta e ngmle Mastang er tir, engdi ngdimlak loruul a tekoi el mora redisaiplo er ngii el ua remesiou. Ngbai uluuchais a uldesuel me aike el ngar a rengul el mo er tir.  (Jn. 15:15) A Jesus a mlo mekngit a rengul e dirrek el lilangel el obengterir. (Jn. 11:32-36) Tirke el cherrouel a Jesus me te milsang el kmo tirke el kongei er a klemechel a dirrek el mo sechelil. (Mt. 11:19) Me sel doukerebai a omerellel a Jesus, el ua omerellel el mora redisaiplo er ngii, e ngmeleketek a deleuill er kid me a rebebil, e mengal mo dmeu a rengud, e mengal mukeroul a omereng el saul er kid el mora Kristus.

11. Ngera ongeru el tekoi el kired el rullii me bo desechelil a Jesus, e ngera uchul me tiang a klou a ultutelel?

¹¹ (2) Omdasu e meruul a tekoi el ua Jesus. Sel bo dungil medengei e doukerebai er a rolel a lomdasu, e nglmuut el mo kmes a deleuill er kid lobengkel. (1 Ko. 2:16) Ngmekera doukerebai er a Jesus? Ka molatk er tiang. A Jesus a mle blechoel melatk a rolel e ngolengeseu er a rechad er a bai di loldeu er a rengul. (Mt. 20:28; Rom 15:1-3) Tiaikid el uldesuel me a blekerdelel a uchul me ngmle blechoel el melatk er a rebebil e uluusubes er tir. Ngdimlak lebeot er ngii el mesibas er a tekingir a rechad. (Jn. 1:46, 47) Ngdirrek el dimlak lebechei a cheleuid er a chad er a ngar a mong me letemellii a uldesuel el bedultir. (1 Ti. 1:12-14) A Jesus a dilu el kmo: “A rokui el chad a mo medengei el kmo kom obengkek.” (Jn. 13:35) Me ngungil doker el kmo, “Ngak, ak kuukerebai er a Jesus el mora tkurrebab el sebechek el meruul a budech lobengterir a rudam me a rudos er ngak?”

12. Ngera ongedei el tekoi el kired el rullii me bo desechelil a Jesus, e mekerang a doruul er ngii?

¹² (3) Dolengeseu er a rudam er a Kristus. A Jesus a omes a tekoi el doruul el olengeseu er a rengellitel el rudam er ngii, el ua doruul el mo er ngii. (Mt. 25:34-40) A kot el ngarbab el rolel e kede olengeseu er a rengellitel a sel deteloi er a ureor er a berkel a klumech er a Renged e doruul er a remo disaiplo el ua ledilu Jesus. (Mt. 28:19, 20; Rel. 10:42) Ngokiu a ngelsurir a ‘rekuk bebil el sib’ e ngmo sebechir a rudam er a Kristus el churrengelii tia el klou lureor er a berkel a klumech el meketmeklang er chelechang. (Jn. 10:16) Me a lsekum e ke teloi er tirke el kuk bebil el sib, e a bek el taem el mteloi er tia el lureor, e ke ochotii a bltkil a rengum el mora rengellitel me a dirrek el Jesus.

13. Ngmekera doltaut er a ulekrael er a Jesus el ngar a Lukas 16:9?

¹³ Kede dirrek el mo sechelil a Jehovah me a Jesus sel dolenget a ududed el olengeseu er a ureor el tir a omekrael er ngii. (Monguiu er a Lukas 16:9.) El ua tiang, kede melenget el kirel urered el meliuekl er a beluulechad, el uldimukl er a ureor er a berkel a ungil chais el mo lmuut er aike el cheroid el beluu el meringel er a rechad el mo er ngii, me a okedecherul me a ukbechesul a Blil a Ongdibel me a lmuut el bebil, me a ngeso el mo er tirke el miltemall a belurir. Ngdirrek el sebeched el melenget lolengeseu er a ongdibel er kid me tirke el dodengei el kmo te ousbech a ngeso. (Osi. 19:17) Aikaikid a rolel e ngsebeched lolengeseu er a rudam er a Kristus.

14. Ngera ongeua el tekoi el kired el rullii me bo desechelil a Jesus, el ua losaod a Efesus 4:15, 16?

¹⁴ (4) Olengeseu aike el tekoi el bla leketmokl ongdibel er a Rekristiano. Nglmuut el mo kmes a deleuill er kid me a Jesus el bdelul a ongdibel, sel dolengesenges er tirke el mla mukngerachel el mo omekerreu er kid. (Monguiu er a Efesus 4:15, 16.) El ua tiang, e kede melasem el mo ungil lousbech a rokui el Blil a Ongdibel er kid. Tiaikid a uchul me a bebil ongdibel a mla mo dmak me a basio el doldingel er ngii a kuk mla mengodech. Tia el blekeradel a dirrek el mla rullii a omengitel a udoud el mo kekerei. E a osisiu el taem, e a rebebil publisher a milengodech a rolel a omesiungir.  Tirka el blak a rengrir el publisher a locha milsiou er a ta el ongdibel el betok el rak, me te locha kmal mlo kmes a deleuill er tir me a rudam me a rudos er tir er aike el beluu. Engdi chelechang e te olengit er tir el mo mesiou er a kuk ta er a ongdibel. Ngulterekokl el kmal dmeu a rengul a Jesus el mesterir tirka el blak a rengrir el disaiplo er ngii el kongei lolengesenges er tia el ulekrael!

15. Ngmekera e lmuut el mo kmes a deleuill er kid me a Jesus er a ngar medad?

¹⁵ Tirke el ngellitel lokiu a chedaol reng a oba omelatk el mo obengkel a Jesus el mengedereder er a Rengedel a Dios el mo cherechar. Te mo obengkel a Kristus el omes er ngii, e mengedecheduch er ngii e dirrek el mengoit a temir lobengkel. (Jn. 14:2, 3) Tirke el oba omelatk el mo kiei er a chutem a dirrek el nguu a bltkil a rengul me a ulekerreuil a Jesus. Alta e ngdiak bo lomes er a Jesus, engdi te mo kmeed el sechelil, e mo dmeu a rengrir er a klengar el Jehovah me a Jesus a kutmeklii el kirir.​—Isa. 9:6, 7.

16. Ngera el klengeltengat a dengai e le kid el sechelil a Jesus?

¹⁶ Sel dekengei er a okedongel a Jesus el mo sechelil, e kede mo ngmai a betok el klengeltengat. El ua tiang, kede ngmai a betok el klungioled er a bltkil a rengul me a ngelsuil er chelechang. Ngdirrek el mo er ngii a techelled el mo kiei el mo cherechar. E a ngarbab er ngii el rokui, a kmes el deleuill er kid me a Jesus a mekrolid el mora kot el mekreos el tekoi el ngii a kmes el deleuill er kid lobengkel a Demal a Jesus el Jehovah. Ngkmal ileakl a techall el dobang el mo okedongall el sechelil a Jesus!