1. Luholo lutshi wajiya gukolesa ufuta nu muthu?

NDAGA ya thomo udi naye gutshita ha gukolesa ufuta nu muthu muko idi, gubalegesa n’enji tangua diavula. Guta nu muthu muene maga a ndaga muatagenele najio nu luholo mudi gudivua, mbagukolesa diago ufuta wenu. Uvi yakhalago ndaga yaleba ha gukolesa ufuta nu Yesu. Mukunda natshi?

2. Lamba ditshi dia thomo tuana tagana nadio?

² Lamba dia thomo didi egi esue khenji tuamonelego Yesu. Aklisto avula a mu siekle ya thomo ataganele nji nu lamba dia luholo elu. Uvi, mupostolo Phetelo wazuelele gamba: ‘Enue khenji muamumonelego, uvi muana gumuzumba. Khenji muamumonelego, uvi mudi muhaga gutshigina gudi muene.’ (1 Phet. 1:8) Ishigo ndaga yakola ha gukuata ufuta wakola nu Yesu nga khenji tuamumonelego.

3. Lamba dia mbadi tuana tagana nadio didi itshi?

³ Lamba dia mbadi didi egi, tushigo nu luholo lua guzuela nu Yesu. Tangua tuana kombelela, tuana guzuela phamba nu Yehowa. Idi yadiago egi tuana kombelela mu jina dia Yesu, uvi tuanago guzuela n’enji. Yesu nji ganago gutshigina egi tumukombelele. Mukunda natshi? Handaga gisambu gidi mukatshi dia ndaga tuana kalagala ha gukombelela, hene, phamba Yehowa tudi naye gukombelela. (Mat. 4:10) Uvi, tuajiya gumonesa egi tuana zumba Yesu.

4. Lamba dia thathu tuana gutagana nadio didi itshi? Ndaga jitshi tuza muzuelela mu longo edi?

 ⁴ Lamba dia thathu didi egi, Yesu wana gujinga mu dilu, tuajiyilego gubalegesa nenji tangua. Uvi tuajiya gujiya ndaga jiavula jiatadila Yesu nga tushigo hehi nenji. Mu longo edi, tuza muzuelela ndaga nguana jiajiya gutukuatesa ha gukolesa ufuta wetu nenji. Tutadile thomo, mukunda natshi idi nu ndando egi tukolese ufuta wetu nu Klisto.

5. Mukunda natshi tudi naye gukuata ufuta nu Yesu? (Tala guluanda “ Gukuata ufuta nu Yesu gudi gutuhana njila ya gukuata ufuta wakola nu Yehowa” nu galuanda, “ Haga Yesu ha fundo dienji.”)

⁵ Ha gubua mafuta a Yesu, tudi naye gukhala nu ufuta wabonga nu Yehowa. Mukunda natshi? Tutadile ndaga eji mbadi. Ya thomo, Yesu wawambelele alandudi enji gamba: ‘Tata hakhenji udi mu mizumba, handaga enue muanguzumba ame.’ (Yone 16:27) Wazuelele luko egi: “Gushigo muthu udi muheta gudi Tata gula gabalegelego gudi ame.” (Yone 14:6) Gula muthu udi mutshigina gukuata ufuta phamba nu Yehowa uvi nu Yesu ndo, udi gifua muthu udi mukamba gungina monzo uvi gashigo mubalegela ha mufulo. Yesu wahanele gifezegeselo gia luholo elu tangua gazuelele egi, “ngudi mufulo wa giphanga gia imeme.” (Yone 10:7) Ndaga ya mbadi idi egi, Yesu walandudile diago makalegelo a Sh’enji. Wawambelele alandudi enji egi: ‘Muthu wangumonyi ame, wamonyi nji Tata.’ (Yone 14:9) Hene, ha gujiya Yehowa muabonga, tudi naye gulonguga ndaga jia kalegele Yesu hakhalele muene ha mavu. Gula tualonguga ndaga jiatadila Yesu, mbatumuzumba muavula. Gula ufuta wetu nu Yesu wakola, guzumba guetu mukunda nu Sh’enji mbagukola nji.

6. Ndaga itshi iko idi gututuma ha gukuata ufuta nu Yesu? Kotelesa.

 ⁶ Tudi naye gukhala nu ufuta wabonga nu Yesu hagula Nzambi avue isambu yetu. Yakotelesa egi, tushigo naye gusugila phamba ha guzuela egi “mu jina dia Yesu” gu gisugishilo gia gisambu gietu, uvi tudi naye gutshita ndaga jiko. Tudi naye gukotelesa mu luholo lutshi Yehowa gana hana mvutu gu isambu yetu mu njila ya Yesu. Yesu wawambelele apostolo enji egi: ‘Gima giagasue mbamutoga mu jina diami, mbangugitshita.’ (Yone 14:13) Yehowa muene hakhenji wana guvua isambu yetu nu wana guhana kueteya, uvi wahanele Yesu ginemo gia gutagenesa ba desizio ana guzula muene. (Mat. 28:18) Hagula Nzambi ategelele isambu yetu, wana tala gula tuana gukalegela malongo atuhanele Yesu. Ha gufezegesa, Yesu wazuelele egi: ‘Gula muatotesela athu gubola guawo, Sh’enu udi mu dilu mbawumitotesela nji gubola guenu, uvi gula enue mushigo mutotesela athu ako gubola guawo, Sh’enu mbagamitoteselago gubola gumuatshitshile.’ (Mat. 6:14, 15) Idi diago nu ndando ha gukalegele athu ako ndaga luholo Yehowa nu Yesu ana gutukalegela esue!

7. Akuatshi mbaaheta gubonga gua mulambu wa Yesu?

⁷ Phamba athu anyi adi nu ufuta wakola nu Yesu, ene mbaaheta gubonga gua mulambu wenji. Tuayijiya gikuatshi? Yesu wazuelele egi, ‘mbawuhana monyo wenji mukunda nu mafuta enji.’ (Yone 15:13) Akombeledi a Yehowa anyi ajingile gutuama egi Yesu aze ha mavu, mbaalonguga ndaga jiatadila Yesu nu mbaamuzumba. Athu gifua Abalahama, Sara, Moize, nu Rahaba mbaafuzumuiwa, uvi akombeledi a Yehowa awa, mbaakuata ufuta nu Yesu gutuama egi ahete monyo wa ivo nu ivo.—Yone 17:3; Makal. 24:15; Heb. 11:8-12, 24-26, 31.

8-9. Yone 15:4, 5 idi mumonesa egi ufuta wetu nu Yesu wajiya gutukuatesa ha gutshita itshi? Mukunda natshi ndaga yene idi nu ndando?

⁸ Tudi nu gusuanguluga ha gukalagala hamoshi nu Yesu mudimo wa gulongesa nu gumuanga lukuma luabonga lua Ufumu. Tangua diakhalele Yesu ha mavu, wakhalele mulongeshi. Havutugile muene mu dilu, wabuile fumu wa hungu dia Uklisto, nu wana landula gutuameza mudimo wa gulongesa nu gumuanga lukuma luabonga. Yesu wana mona nu wana suanguluga nu luholo wana tshita ngolo ha gukuatesa athu avula ha gumujiya nu ha gujiya Sh’enji. Phamba Yehowa nu Yesu ajiya gutukuatesa ha gukalagala mudimo wene.—Tanga Yone 15:4, 5.

⁹ Mbimbi ya Nzambi yana gutulongesa egi, tudi naye guzumba Yesu tangua diagasue ha gusuanguluisa Yehowa. Henyaha, tutadilenu ndaga nguana tuajiya gutshita ha gukuata ufuta nu Yesu.

10. Ndaga ya thomo tuajiya gukalagala ha gukuata ufuta nu Yesu idi itshi?

¹⁰ (1) Kamba gujiya Yesu. Ha gujya Yesu, tudi naye gutanga (kubala) mukanda wa Matayo, wa Mako, wa Luka nu wa Yone. Tangua tudi mutangigiza ndaga jia lujingu lua Yesu jidi mu Biblia, mbayitutuma ha gumuzumba nu gumunemesa mukunda nu luholo gakhalele mukalegela athu ndaga. Wakhalele Fumu wa alandudi enji, uvi muene gakhalelego guakalegela ndaga gifua ahiga. Uvi, waamonesele matangi enji nu luholo gakhalele gudivua mukunda nu ene. (Yone 15:15) Tangua akhalele ene nu lamba, Yesu wakhalele nji muvua lamba nu wa khalele mudila nawo. (Yone 11:32-36) Mbalagaji jienji jiakhalele nji mujiya egi, Yesu wakhalele futa dia  athu anyi akhalele mutshigina lukuma luenji. (Mat. 11:19) Gula tuakalagala ndaga gifua luholo luakalegele Yesu gudi alandudi enji, mbatukhala nu ufuta wabonga nu athu ako, mbatukhala nu gusuanguluga, nu mbatuzumba nji Yesu muavula diago.

11. Ndaga ya mbadi tuajiya gukalagala ha gukuata ufuta nu Yesu idi itshi? Mukunda natshi idi nu ndando?

¹¹ (2) Khala mutangiza nu gutshita ndaga gifua Yesu. Ufuta wetu nu Yesu mbawukola gula tuakamba gumujiya nu tualandula gutangiza gifua muene. (1 Kol. 2:16) Luholo lutshi tuajiya guladandula gifezegeselo gia Yesu? Tufezegese gale. Yesu gakambelego phamba gubonga guenji, uvi wakambele nji ha gukuatesa athu ako. (Mat. 20:28; Lomo 15:1-3) Gutangiza ngenyi guamukuatesele ha gudihana ha gukuatesa athu ako nu ha guatotesela. Gakhalelego mulaba guvua khabu mukunda nu ndaga jiabola jiakhalele muzuela athu mukunda nu muene. (Yone 1:46, 47) Luko, gakhalelego mubamba khabu mu mutshima mukunda nu ndaga jiabola jiakalegele athu mualeha. (1 Tim. 1:12-14) Yesu wazuelele egi: “Gula muadizumba, athu agasue mbajiya egi mudi alandudi ami.” (Yone 13:35) Wajiya gudihula egi, “Ngana gutshita yagasue ha gulandula gifezegeselo gia Yesu ha gubamba guhuima nu aphangi ba?”

12. Ndaga ya thathu tuajiya gukalagala ha gukuata ufuta nu Yesu idi itshi? Luholo lutshi tuajiya guyitshita?

¹² (3) Kuatesa aphangi a Klisto. Ndaga jiagasue tuana gukadigila Aklisto ambiwe maji mu nyuma, Yesu wana gujimona gifua tuana gumukadigila muene. (Mat. 25:34-40) Luholo lua thomo lua gukuatesa Aklisto ambiwe maji mu nyuma ludi, gukalagala mudimo watuhanele Yesu, wa gulongesa lukuma luabonga nu gubuisa athu alandudi enji. (Mat. 28:19, 20; Makal.10:42) Mu njila ya ukuateshi wa “imeme iko”, aphangi a Klisto adi mukalagala mudimo wa gulongesa ha mavu agasue. (Yone 10:16) Gula udi mukatshi dia imeme iko, tangua diagasue wana gukalagala mudimo owu, wana gumonesa guzumba guaye gudi Yesu nu gudi aphangi enji.

13. Luholo lutshi tuajiya gukalegela longo dia Yesu didi mu Luka 16:9?

¹³ Luholo luko lua gukuata ufuta nu Yehowa nu Yesu ludi guhana musomonyi ha gukuatesa mudimo udi ene mutuameza. (Tanga Luka 16:9.) Ha gufezegesa, tuajiya guhana musomonyi mukunda nu mudimo wa ha mavu agasue. Misomonyi yene yana kuatesa ha gukalagala mudimo wa gulongesa mu terituare jia gudikhadila, ha gutunga nu gulondega mafundo tuana gudibungishila, nga ha gukuatesa aphangi adi mu lamba. Tuajiya nji gukuatesa hungu dietu nu makuta, ha gukuatesa aphangi a mu hungu adi mulamba. (Ish. 19:17) Gutshita ngenyi gudi mumonesa egi tudi mukuatesa aphangi a Klisto.

14. Luholo Efeso 4:15, 16 idi guyimonesa, ndaga ya nguana tuajiya gutshita ha gubua mafuta a Yesu idi itshi?

¹⁴ (4) Tumagela utuameji udi muhana hungu dia Uklisto. Tuana gukolesa ufuta wetu nu Yesu fumu wa hungu dia Uklisto, tangua tuana tumagela athu atombewe ha gututuameza. (Tanga Efeso 4:15, 16.) Mangino, tuana kamba gukalegela muabonga jinzo jietu jia Ufumu. Ha gujikalegela muabonga, tuabungishile mahungu ako hamoshi, tualondegele luko muabonga mididilo ya ba terituare ako. Gutshita ngenyi, guatukuatesele ha gubamba makuta avula. Hene, yakhalele mutoga egi alongeshi ako ajidile nu ndaga jihe-jihe akhalele mutagana najio. Yajiya gukhala egi alongeshi ene akalegele ivo  yavula mu hungu diayo, nu ajidile muabonga nu aphangi a mala nu a akhetu. Uvi henyaha akhalele mutogewa ha guya mu mahungu ako. Yesu wana suanguluga muavula ha gumona luholo alandudi enji adi gudivua muabonga nu ulondegi owu.

15. Luholo lutshi ufuta wetu nu Yesu mbawukola mu masugu adi muza?

¹⁵ Aklisto ambiwe maji mu nyuma adi nu felela dia gujinga nu Yesu mayilago, nu mbaahinyina nenji mu Ufumu wa Nzambi. Ene mbaakhala nenji, mbaamumona, mbaazuela nenji, nu mbaabalegesa tangua hamoshi nenji. (Yone 14:2, 3) Uvi, Aklisto adi nu felela dia gujinga ha mavu, mbaazumbiwa muavula gudi Yesu. Ikhale ene mbashigo mumona Yesu, uvi mbakolesa ufuta wawo nenji nu mbaasuanguluga nu monyo wa ivo nu ivo Yehowa nu Yesu mbaahana.—Yesh. 9:6, 7.

16. Gubonga gutshi tuana guheta luholo tudi nu ufuta wabonga nu Yesu?

¹⁶ Tangua tuana kuata ufuta nu Yesu, tuana heta ishimbigo yavula lume. Ha gufezegesa, mangino tuana heta guzumba nu ukuateshi wenji. Tudi nu luendu lua guheta monyo wa mayilago. Ndaga ya gubalega ndando idi egi, gukuata ufuta nu Yesu mbagutuhana njila ya gukuata ufuta wakola nu Yehowa. Tudi diago nu luendu lua gutamegewa egi mafuta a Yesu!