1. Ia duwen omw kak kakairada nanpwungmwahu keren rehn emen?

KEIEUN kahk ong kakairada nanpwungmwahu keren rehn emen iei en kihong omw ahnsou ong aramaso. Ni amwa kin koasoiapene duwen amwa madamadau oh pepehm kan, kumwa kin kompoakepahnkihla emenemen. Ahpw, ekei pak e sohte mengei en wiahla kompoakepahn Sises. Dahme kahrehda?

2. Ia keieun kahpwal me kitail kin lelohng?

² Keieun kahpwal iei me kitail saikinte tuhwong Sises. Kristian tohto ni mwehin wahnpoaron ko pil ahneki soangen kahpwal ohte. Ahpw wahnpoaron Piter nda: “Mendahki kumwail sohte mwahn kilang ih, ahpw kumwail kin poakohng ih. Mendahki kumwail sohte kin kilang ih ahnsou wet, ahpw kumwail kin kasalehda amwail pwoson ih.” (1 Pit. 1:8) Kitail kak wiahla kompoakepah mwahu kei en Sises mehnda ma kitail saikinte tuhwong ih.

3. Ia keriaun kahpwal me kitail kin lelohng?

³ Keriaun kahpwal iei me kitail sohte kak koasoiong Sises. Ni atail kin kapakap, kitail kin patohong Siohwa. Mehlel, kitail kin kapakap ni mwaren Sises, ahpw kitail sohte kin koasoiong ih. Ni mehlel, Sises sohte kupwurki kitail en kapakap ong ih. Dahme kahrehda? Pwehki kapakap iei ehu wiepen kaudok, oh Siohwa kelehpw me kitail en kaudokiong. (Mad. 4:10) Mendahki met, kitail kak kasalehda me kitail poakohng Sises.

4. Ia kesiluhn kahpwal, oh dahme kitail pahn koasoiapene nan iren onop wet?

⁴ Kesiluhn kahpwal iei me Sises ketiket nanleng, kahrehda kitail sohte kak mihmiseli reh. Ahpw kitail kak pil esehla soahng tohto duwen Sises mehnda ma kitail sohte mihmi reh. Kitail pahn kousapahlih soahng pahieu me kitail kak  wia me pahn kakehlakahda atail nanpwungmwahu reh. Ahpw keieu, kitail pahn tehkpene dahme kahrehda e kesempwal ong kitail en kakairada nanpwungmwahu keren rehn Krais.

5. Dahme kahrehda kitail anahne kompoakepahnkihla Sises? (Pil kilang koakon kan “ Kompoakepahnkihla Sises Kahrehiong Kitail en Kompoakepahnkihla Siohwa” oh “ Ahneki Madamadau Toupahrek Duwen Sises.”)

⁵ Kitail anahne wiahla kompoakepahn Sises ma kitail men ahneki nanpwungmwahu rehn Siohwa. Dahme kahrehda? Tehk kahrepe riaute. Keieu, Sises mahsanihong sapwellime tohnpadahk ko: “Pein Sahmo ketin loalloale kumwail pwehki amwail poakepoake ie.” (Sohn 16:27) E pil mahsanih: “Sohte me kak kohla rehn Sahmo ma sohte ngehi.” (Sohn 14:6) Songosong en wiahla kompoakepahn Siohwa ni omw sohte wiahda nanpwungmwahu keren rehn Sises kin duwehte omw songosong en pedolong nan ihmw ehu ni omw sohte doadoahngki wenihmw. Sises ketin doadoahngki karasaras ehu me duwehte met ni eh ketin kawehwehda ih nin duwen “wenihmw ong sihpw kan.” (Sohn 10:7) Kahrepe keriau iei me Sises kin kahlemengih ni unsek irair kaselel kan me Semeo ketin sapwellimanki. E mahsanihong sapwellime tohnpadahk ko: “Mehmen me kilangieier pil kilangehr Sahmo.” (Sohn 14:9) Eri ehu kahrepe kesempwal me kitail en esehla Siohwa iei sang ni atail onopki duwen mouren Sises. Ni atail sukuhlki duwen Sises, atail limpoak ong ih pahn laudla. Oh ni atail kompoakepahnki Sises eh kekeirda, atail limpoak ong Semeo pahn laudla.

6. Ia pil ehu kahrepe me kitail anahne ahneki nanpwungmwahu rehn Sises? Menlau kawehwehda.

⁶ Kitail anahne ahneki nanpwungmwahu rehn Sises pwe atail kapakap kan en pasapengla. Met wehwehki me kitail anahne  wia laudsang en ndahte “ni mwaren Sises” ni kaimwiseklahn atail kapakap kan. Kitail anahne pohnese ia duwen Siohwa eh ketin doadoahngki Sises pwehn sapengala atail kapakap kan. Sises mahsanihong wahnpoaron ko: “Sohte lipilipil dahme kumwail peki ni edei, I pahn wiahda.” (Sohn 14:13) Mendahki Siohwa me kin ketin karonge oh sapengala atail kapakap kan, e ketikihong Sises manaman en kapwaiada Sapwellime pilipil kan. (Mad. 28:18) Eri, mwohn Koht eh pahn ketin sapengala atail kapakap kan, e kin ketin tehk mwahu ma kitail kapwaiada kaweid me Sises ketikihda. Karasepe, Sises mahsanih: “Ma kumwail pahn kin mahkikihong aramas arail sapwung kan, Samamwail nanleng pil pahn ketin mahkohng kumwail; ahpw ma kumwail sohte pahn kin mahkikihong aramas akan arail sapwung, Samamwailo pil sohte pahn ketin mahkohng amwail sapwung kan.” (Mad. 6:14, 15) Eri ia uwen met eh kesempwal me atail wiewia kan ong meteikan en wiawi ni ahl kadekohte me Siohwa oh Sises ketin wia ong kitail!

7. Ihs me paiekihda sapwellimen Sises meirong en pweinen pweipwei sapahlo?

⁷ Irail kante me ahneki nanpwungmwahu keren rehn Sises pahn paiekihda sapwellime meirong en pweinen pweipwei sapahlo. Ia duwen atail ese met? Sises mahsanih me e pahn “tounmeteikihla eh mour pwehki kompoakepah kan.” (Sohn 15:13) Aramas akan me kin papah Siohwa oh momour mwohn Sises eh ketido sampah pahn anahne sukuhlki duwen ih oh poakohng ih. Ohl oh lih akan me duwehte Eipraam, Sara, Moses, oh Reap pahn iasada, ahpw irail sapwellimen Siohwa ladu pwukat pil pahn anahne wiahda nanpwungmwahu rehn Sises pwehn alehdi mour soutuk.​—Sohn 17:3; Wiewia 24:15; Ipru 11:8-12, 24-26, 31.

8-9. Nin duwen me Sohn 15:4, 5 mahsanih, dahme kitail kak wia ma kitail kompoakepahnki Sises, oh dahme kahrehda met kesempwal?

⁸ Kitail kin perenki iangih Sises nan doadoahk en kalohk oh padahngki rongamwahu en Wehio. Ni Sises eh ketiket nin sampah, e ketin wia sounpadahk men. Oh pwehki e ketiketier nanleng, Sises, me wia tapwin mwomwohdiso kin ketin pousehlahte kaweid doadoahk en kalohk oh padahk. E ketin tehk oh kesempwalki omw nanti koaros pwehn sewese me tohto ni uwen omw kak pwehn esehla ih oh Semeo. Ni mehlel, ihte ahl me kitail kak kapwaiada doadoahk wet iei sang sapwellimen Siohwa oh Sises sawas.​—Wadek Sohn 15:4, 5.

⁹ Mahsen en Koht padahkihong kitail ni sansal me kitail anahne ahneki oh kolokolete atail limpoak ong Sises pwehn kaperenda Siohwa. Eri kitail tehkpene soahng pahieu me kitail kak wia pwehn wiahla kompoakepahn Sises.

10. Ia keieun kahk ong kakairada atail nanpwungmwahu rehn Sises?

¹⁰ (1) Esehla Sises. Kitail kak wia met ni atail wadek pwuhken Madiu, Mark, Luk, oh Sohn. Ni atail doudouloale sapwellimen Sises mour me kileldi nan Paipel, kitail kin poakohngala oh waunekihla Sises pwehki kadek me e kin ketin kasalehiong aramas akan. Karasepe, mendahki e ketin wia arail Soumas, e sohte ketin wiahki sapwellime tohnpadahk ko lidu kei. Ahpw, e kin ketin kasalehiong irail sapwellime madamadau oh pepehm. (Sohn 15:15) Ni arail kin nsensuwed, Sises pil kin ketin iangete irail nsensuwed. (Sohn 11:32-36) Pil irail kan me kin uhwong ih pohnese me e kin ketin wia kompoakepahn irail kan me kin rong  sapwellime padahk kan. (Mad. 11:19) Ni atail kin kahlemengih mwomwen sapwellimen Sises wiewia ong sapwellime tohnpadahk kan, atail nanpwungmwahu rehn meteikan pahn mwahula, atail peren kin laudla, oh atail poakohng oh wauneki ih pahn pil laudla.

11. Ia keriaun kahk ong wiahla kompoakepahn Sises, oh dahme kahrehda kahk wet kesempwal?

¹¹ (2) Alasang sapwellimen Sises madamadau oh wiewia. Uwen laud en atail esehla oh alasang sapwellime madamadau, atail nanpwungmwahu reh pahn pil laudla. (1 Kor. 2:16) Ia duwen atail kak alasang Sises? Medewehla karasaras ehu. Sises kin ketin medemedewe duwen en sewese meteikan laudsang en kaperenda pein ih. (Mad. 20:28; Rom 15:1-3) Pwehki e sapwellimanki soangen madamadau wet, e kin ketin kasalehda tounmetei oh mahk. E sohte kin mwadang engiengda pwehki dahme aramas kin ndahki ih. (Sohn 1:46, 47) Oh e sohte kin ketin mweidohng sapwung ehu me aramas men wiahda mahso en kamwakid sapwellime wiewia ong irail. (1 Tim. 1:12-14) Sises mahsanih: “Koaros pahn esehki me kumwail nei tohnpadahk kan​—ma kumwail kin limpoakpene nanpwungamwail.” (Sohn 13:35) E pahn mwahu en pein idek rehtail, “I kin idawehn sapwellimen Sises mehn kahlemeng sang ni ei wia soahng koaros me I kak pwehn kolokol popohl rehn riei Kristian kan?”

12. Ia kesiluhn kahk ong wiahla kompoakepahn Sises, oh ia duwen atail kak wia met?

¹² (3) Utung rien Krais kan. Ong Sises, dahme kitail wia ong rie me keidi kan kin duwehte atail wiahiong ih. (Mad. 25:34-40) Ahl me keieu kesempwal en utung me keidi kan iei sang ni atail iang wia doadoahk en kalohki Wehio oh katohnpadahk me Sises ketin kehkehlingkihong sapwellime tohnpadahk kan en kapwaiada. (Mad. 28:19, 20; Wiewia 10:42) Rien Krais kan kak kapwaiada doadoahk en kalohk me wiewiawi sampah pwon ahnsou wet ihte sang ni sawas en “sihpw teikan.” (Sohn 10:16) Ma ke wia kisehn sihpw teikan, ehuehu ahnsou me ke kin iang doadoahk wet, ke kin kasalehda omw limpoak ong rien Krais kan oh pil Sises.

13. Ia duwen atail kak kapwaiada sapwellimen Sises kaweido me kileldi nan Luk 16:9?

¹³ Kitail pil kin kompoakepahnkihla Siohwa oh Sises sang ni atail kin kihda sawas en mwohni pwehn utung doadoahk me ira kin kaukaweid. (Wadek Luk 16:9.) Karasepe, kitail kak toukihda sawas ong doadoahk en sampah pwon, me iangahki kihda sawas en mwohni ong kalohki rongamwahwo wasa doh kan, kauwada oh kamwahwihala Wasahn Kaudok kan de ihmw teikan ong kaudok mehlel, oh kihda sawas ong irail kan me lelohng kahpwal sang melimel de rerrer en sahpw ape. Kitail pil kak kihda sawas en mwohni pwehn pwainla anahn akan en atail mwomwohdiso oh sewese irail kan me kitail ese me anahne sawas. (Lep. Pad. 19:17) Ahl pwukat iei me kitail kak wia pwehn utung rien Krais kan.

14. Nin duwen me Episos 4:15, 16 mahsanih, ia kapahieu en kahk ong wiahla kompoakepahn Sises?

¹⁴ (4) Utung koasoandi kan en mwomwohdisohn Kristian. Kitail kin kakehlakahla atail kompoakepahnki Sises, me wia tapwin mwomwohdiso, ni atail kin utung irail kan me idihdida pwehn apwalih kitail. (Wadek Episos 4:15, 16.) Karasepe, ahnsou wet kitail kin song tehk mwahu me Wasahn Kaudok kan koaros kin kadoadoahk ni ahl me keieu mwahu. Ihme kahrehda ekei mwomwohdiso kan kin patpene wiahla ehu oh wasahn kalohk kan wekidekla. Ni ahl wet, sapwellimen Siohwa pwihn sohte kin doadoahngkihla mwohni laud me meteikan kin toukihda. Ahpw ni ahnsowohte, ekei sounkalohk  anahne wiahda wekidekla kan ong irair kapw kan. Sounkalohk lelepek pwukat ele kin papah nan mwomwohdiso ehu erein sounpar tohto oh ele kin karanihala riarail Kristian kan wasao. Ahpw met re anahne kohla papah nan ehu mwomwohdiso tohrohr. Ia uwen Sises eh kin kupwurperenkihda ni eh mahsanih duwen tohnpadahk loalopwoat pwukat ar kin utung koasoandi wet!

15. Ia duwen atail nanpwungmwahu rehn Sises eh pahn kehlailla ni ahnsou kohkohdo?

¹⁵ Irail kan me keikihdi sapwellimen Koht manaman ahneki koapworopwor en ieiang Sises kohkohlahte, oh iang ih ketin kakaun Wehin Koht. Irail pahn uhdahn mi rehn Krais, me wehwehki re pahn kilang ih, koasoiong ih, oh mihmi reh. (Sohn 14:2, 3) Irail me ahneki koapworopwor en mour nin sampah pahn pil paiekihda sapwellimen Sises limpoak oh epwel mwahu. Mendahki re sohte pahn kilang Sises, arail nanpwungmwahu reh pahn kehlailla ni arail nsenamwahuki mour me Siohwa oh Sises ketin wiadahr ong irail.​—Ais. 9:6, 7.

16. Kapai dah kan me kitail alehdi sang atail kin kompoakepahnki Sises?

¹⁶ Ni atail alehdi sapwellimen Sises luhk en wiahla kompoakepah, kitail kin ale kapai tohto. Karasepe, kitail kin paiekihda sapwellime limpoak oh sawas ahnsou wet. Mie atail koapworopwor en mour kohkohlahte. Oh me keieu kesempwal, atail kompoakepahnki Sises pahn kahrehiong kitail en ahneki nanpwungmwahu me keieu kesempwal, me iei rehn Semeo, Siohwa. Ia uwen eh wia pai kaselel ehu en adaneki kompoakepahn Sises!