1. ¿Imatataj ruwanchej pillawanpis sumaj amigos kanapaj?

PILLAWANPIS sumaj amigos kanapajqa, paywan sumajta rejsinakunchej. Chaypajtaj tukuy imamanta parlarikunchej, imachus sonqonchejpi kasqantapis willanarikunchej. Ajinamanta sumaj amigosman tukunchej. Jinapis Jesuspa amigosnin kayqa mana atikullanchu. Qhepan parrafospitaj chaymanta parlarisun.

2. ¿Imaraykutaj mana Jesuspa amigosnin kayta atillanchejchu?

² Ñaupaj kaj, Jesusta mana rikunchejchu. Ichapis chayrayku yuyasunman, mana paypa amigosnin kayta atisqanchejta. Ñaupa tiempomanta ashkha cristianospis, Jesusta manallataj rikorqankuchu. Jinapis apóstol Pedro paykunaman nerqa: “Cristota mana jaykʼaj rikuspapis, payta munakunkichej. Kunan payta mana rikushankichejchu chaypis, paypi creenkichej”, nispa (1 Ped. 1:8). Apóstol Pedro nisqanman jinaqa, Jesusta mana rikuspapis, paypa amigosnin kayta atisunman.

3. ¿Imaraykutaj yuyasunman Jesuspa amigosnin mana kayta atisqanchejta?

³ Iskay kaj, Jesuswanqa mana uyapura parlayta atinchejchu. Ichapis chayrayku yuyasunman, mana paypa amigosnin kayta atisqanchejta. Jehová Diosmanta Jesuspa sutinpi mañakuspapis, orakuspaqa Jehová Dioswan parlanchej, manataj Jesuswanchu. Jesuspunitaj niwanchej Diosmanta mañakunanchejta, manataj paymantachu. Imaraykuchus mañakoyqa, Diosta yupaychaywan ninakun. Noqanchejtaj Jehová Diosllata yupaychananchej tiyan (Mat. 4:10). Jinapis Jesusta munakusqanchejta rikuchiyta atisunman.

4. ¿Imaraykutaj mana Jesuswan parlarikuyta atinchejchu?

⁴ Kinsa kaj, Jesusqa cielopi tiyakun. Chayrayku mana paywan  parlarikuyta, nitaj paywan khuska kayta atisunmanchu. Jinapis payta rejsiyta atisunman. Kay yachaqanaqa Jesuspa amigosnin kanapaj, tawa imasta yuyarichiwasun. Jinapis ñaupajtaqa, imaraykuchus sumaj amigosnin kananchej kasqanta yachakusun.

5. ¿Imaraykutaj Jesuspa amigosnin kananchej tiyan? (“ Jesuswan amigos kaspaqa Jehovawanpis amigos kasun”, chanta “ Jesusta munakuspapis Jehová Diosta astawan munakuna” nisqa recuadrosta leeriy).

⁵ Jehová Diospa sumaj amigosnin kayta munaspaqa, ñaupajta Jesuspa amigosninraj kananchej tiyan. ¿Imaraykutaj chayta ninchej? Ñaupaj kaj, Jesusllataj nerqa: “Tatayqa munakusunkichej noqata munakuwasqaykichejrayku”, nispa (Juan 16:27). Chantá nillarqataj: “Mana pipis Tatayman chayayta atinchu, mana noqanejtaqa”, nispa (Juan 14:6). Uj wasimanqa punkuntapuni yaykunchej. Jehová Diosqa wasi jina, Jesustaj punku jina. Chayrayku mana Jesuspa amigosnin kaspaqa, manallataj Jehová Diospa amigosnin kayta atisunmanchu. Jesusqa ujnin kikinchayninpi nerqa: “Noqaqa ovejas yaykunankupaj punku kani”, nispa (Juan 10:7). Iskay kaj, Jesusqa tukuy imapi Tatanman rijchʼakorqa. Chayrayku discipulosninman nerqa: “Noqata rikuwajqa Tataytapis rikullantaj”, nispa (Juan 14:9). Jesusta sumajta rejsispaqa, Jehová Diostapis sumajta rejsisun. Jesusmanta astawan yachakuspaqa, payta astawan munakusun. Payta astawan munakuspataj, Jehová Diostapis astawan munakusun.

6. Jehová Dios mañakuyninchejta uyarinawanchejpaj, ¿imatá ruwananchej tiyan?

⁶ Jehová Dios mañakuyninchejta uyarinawanchejpajqa, Jesuswan amigos kananchej tiyan. Chaypajtaj mana oracionninchejta “Jesuspa sutinpi” nispallachu tukuchananchej  tiyan. Jehová Dios uyarinawanchejpajqa, entiendenanchej tiyan mañakuyninchejman Jesusnejta kutichiwasqanchejta. Jesús nerqa: “Sutiypi imallatapis mañakojtiykichejqa, chayta qosqaykichej”, nispa (Juan 14:13). Jehová Diospuni mañakuyninchejta uyariwajtinchejpis, payqa Jesusman atiyninta qon imastachus ruwayta munasqanta juntʼananpaj (Mat. 28:18). Chayrayku Jehová Diosqa mañakusqanchejman kutichinawanchejpaj, Jesuspa nisqanta kasukusqanchejtachus manachus qhawarin. Jesús imatachus perdonaymanta nisqanpi piensarina. Pay nerqa: “Sichus contraykichejta juchallikojkunata perdonankichej chayqa, cielopi kaj Tataykichejpis perdonallasonqachejtaj. Manachus contraykichejta juchallikojkunata perdonankichej chayqa, manallataj Tataykichejpis juchasniykichejta perdonanqachu”, nispa (Mat. 6:14, 15). Chayrayku imaynatachus Jehovawan Jesuswan khuyakuwanchej, ajinallatataj noqanchejpis wajkunata khuyakunanchej tiyan.

7. ¿Pikunataj Jesuspa wañuyninnejta bendicionesta japʼenqanku?

⁷ Jesuspa sumaj amigosnin kajkunalla, paypa wañuyninnejta bendicionesta japʼenqanku. ¿Imaraykutaj chayta ninchej? Jesusqa ‘amigosninrayku wañusqanta’ nerqa (Juan 15:13). Ñaupa tiempomanta Jehová Diospa kamachisninpis, kausarimuytawan Jesusmanta yachakunanku kanqa, munakunankutaj kanqa. Imaraykuchus paykunaqa, niraj Jesús kay jallpʼaman jamushajtin wañuporqanku. Paykunamanta wakenqa kanku: Abrahán, Sara, Moisés, Rahab ima. Paykunapis kausarimuytawan Jesuspa amigosnin kananku kanqa. Ajinallamanta wiñay kausayta japʼenqanku (Juan 17:3; Hech. 24:15; Heb. 11:8-12, 24-26, 31).

8, 9. 1) Juan 15:4, 5 nisqanman jina, ¿imatataj ruwayta atinchej Jesuspa amigosnin kasqanchejrayku? 2) ¿Imaraykutaj Jesuswan ujchasqallapuni kananchej tiyan?

⁸ Diospa Gobiernonmanta sumaj willaykunata willaspa, yachachispa ima, Jesuswan khuska trabajashanchej. Chayta ruwaspataj mayta kusikunchej. Jesusqa kay jallpʼapi kashaspa runasta yachacherqa. Kunantaj payqa cielopi kashan. Congregacionpa uman kasqanraykutaj, Diospa Gobiernonmanta willayta ñaupajman apashallanpuni. Jesusqa paymanta, Tatanmantawan runasman yachachisqanchejta jatunpaj qhawan. Manachus Jehovawan Jesuswan yanapawasunman chayqa, mana Diospa Gobiernonmanta willamuyta atisunmanchu (Juan 15:4, 5 leey).

⁹ Diospa Palabranqa yachachiwanchej, Jesusta munakuspalla Jehová Diosta kusichiyta atisqanchejta. Chayrayku qhepan parrafospi qhawarisun, imastachus ruwananchej kasqanta Jesuspa amigosnin kanapaj.

10. ¿Imatataj ñaupajta ruwananchej kasqa Jesuspa amigosnin kanapaj?

¹⁰ Ñaupajtaqa Jesusta rejsina. Paytaqa rejsisunman Mateo, Marcos, Lucas, Juan librosta leespa. Chay librosqa Jesuspa kausayninmanta parlan. Chay librosta leesqanchejpi tʼukurispaqa, Jesús runaswan kʼacha kasqanta reparasunchej. Chaytaj payta munakunapaj, respetanapaj ima yanapawasun. Jesusqa Yachachej kaspapis, discipulosninta amigosninta jina qhawarqa, manataj esclavosninta jinachu. Chayrayku imatachus yuyasqanta, imachus sonqonpi kasqantapis paykunaman willarerqa (Juan 15:15). Chantapis yachachisqasnin llakisqa kajtinku, paypis llakikullarqataj (Juan 11:32-36). Enemigosninpis yacharqanku, willasqanta uyarejkuna amigosninman  tukusqankuta (Mat. 11:19). Noqanchejpis wajkunata Jesús jina qhawasun chayqa, paykunawan aswan allinta kausakusun, astawan kusisqa kasun, Jesustapis astawan munakusun.

11. 1) ¿Imatawan ruwananchej kasqa Jesuspa amigosnin kanapaj? 2) ¿Imaraykutaj wajkunata Jesús jina qhawanapaj kallpachakunanchej tiyan?

¹¹ Iskay kaj, Jesús jina yuyana, ruwana ima. Jesuspa yuyayninta rejsejtinchej, pay jinataj ruwajtinchej, paywan aswan sumaj amigos kasun (1 Cor. 2:16). ¿Imaynatataj Jesús jina ruwasunman? Jesusqa paypa allinninta maskʼananmantaqa, wajkunaj allinninkuta maskʼaj (Mat. 20:28; Rom. 15:1-3). Chayrayku wajkunata tukuy atisqanta yanapaj, perdonajtaj. Wajkuna imata nejtinkupis, mana usqhayllata phiñakojchu (Juan 1:46, 47). Uj runa mayta pantajtinpis, Jesusqa mana chay runata chay ñawillawanpunichu qhawaj (1 Tim. 1:12-14). Noqanchejpis wajkunata Jesús jina qhawanapaj kallpachakunanchej tiyan. Imaraykuchus pay nerqa: “Qankunachus purajmanta munanakunkichej chayqa, tukuy yachanqanku yachachisqasniy kasqaykichejta”, nispa (Juan 13:35). Chayrayku allin kanman kay tapuypi piensarinanchej: “¿Jesús jinachu tukuy atisqanchejta ruwashanchej hermanosninchejwan allinta kausakunapaj?”.

12. 1) Jesuspa amigosnin kanapaj, ¿imatawan ruwananchej kasqa? 2) ¿Imata ruwaspataj Jesuspa hermanosninta yanapasunman?

¹² Kinsa kaj, Cristoj hermanosninta yanapana. Jesusqa hermanosninta yanapasqanchejta, paytapis yanapashasunman jinata qhawan (Mat. 25:34-40). Jesusqa discipulosninman kamacherqa, Diospa Gobiernonmanta willamunankuta, runastataj yachachisqasninman tukuchimunankuta. Chay llankʼaypi yanapakuspaqa, Jesuspa hermanosninta yanapakushanchej (Mat. 28:19, 20; Hech. 10:42). Cristoj hermanosnenqa llankʼayninkuta juntʼanankupaj, ‘waj ovejasmanta’ kajkunaj yanapayninkuta necesitanku. Waj ovejasmanta kajkunataj chaytapuni ruwashanku. Chayrayku Diospa Gobiernonmanta jallpʼantinpi willakushan (Juan 10:16). Waj ovejasmanta kanchej chayqa, chay llankʼaypi yanapakunallapuni. Chayta ruwaspaqa ajllasqa cristianosta, Jesusta ima munakusqanchejta rikuchishanchej.

13. Lucas 16:9 yuyaychawasqanchejman jina, ¿imatataj ruwasunman?

¹³ Jehová Dioswan Jesuswanqa, jallpʼantinpi willayta ñaupajman apashanku. Chaypaj qolqesitunchejwan yanapakuspaqa, paykunaj amigosnin kasunman (Lucas 16:9 leey). Diospa Gobiernonmanta jallpʼantinpi willakunanpaj, qolqesitunchejmanta churasunman. Ajinamanta yanapakusunman: karu lugarespi willakunanpaj, Diosta yupaychana wasis ruwakunanpaj chayri allinchakunanpaj, jatun llakiypi tarikoj hermanosta yanapanapaj ima. Chantapis qolqesitunchejmanta churarisunman congregacionninchejpa gastosninpaj. Chayrí pisichikoj hermanosninchejta kapuyninchejwan yanaparisunman (Pro. 19:17). Chay tukuy imasta ruwaspaqa, Cristoj hermanosninta yanapashanchej.

14. Efesios 4:15, 16 nisqanman jina, ¿imatawan ruwananchej tiyan Jesuspa amigosnin kanapaj?

¹⁴ Tawa kaj, Diospa llajtan imatachus kamachiwasqanchejta kasukuna. Jesusqa congregacionpa uman. Chayrayku cuidanawanchejpaj churan chay hermanosta kasukuspa, paypa sumaj amigosnin kasunman (Efesios 4:15, 16 leey). ¿Imaynatá Diospa llajtanta kasukusunman? Diospa llajtanqa Tantakuna Wasis necesitakusqanman jinalla ruwakunanpaj, wakin congregacionesta ujllaman tukuchin, predicanku chay territoriostapis waj jinamanta tʼaqan. Ajinamantataj churasqanchej  qolqeta mana qhasita gastakushanchu. Chayta ruwakusqanrayku, ashkha hermanosqa waj congregacionman rinanku karqa. Ichapis paykunaqa congregacionninkupi unaytaña karqanku, chaypi kaj hermanoswanpis sumaj amigos karqanku. Jinapis paykunaqa Diospa llajtanta kasukunku, mayqen congregacionmanchus kachasqa kanku, chaymantaj rinku. Jesusqa chayta rikuspa, maytachá kusikun.

15. ¿Imatataj ajllasqa cristianos, kay jallpʼapi kausakuyta suyakojkunapis ruwayta atenqanku?

¹⁵ Diospa atiyninwan ajllasqa cristianosqa, paypa Gobiernonpi Jesuswan khuska cielomanta kamachimonqanku. Paykunaqa Jesusta rikonqanku, paywan uyapura parlanqanku, paywan khuskataj wiñaypaj kanqanku (Juan 14:2, 3). Kay jallpʼapi tiyakuyta suyakojkunarí, Jesuspa munakuyninta, yanapaynintawan rikusunchej. Jesuswan mana uyapura parlaspapis, paywan aswan sumaj amigos kasunchej. Chantapis Jehová Dioswan Jesuswan allin kausayta qowasun. Chaypitaj kusisqa kausakusun (Isa. 9:6, 7).

16. Jesuspa amigosnin kaspa, ¿ima bendicionestataj japʼinchej?

¹⁶ Jesusqa amigosnin kananchejpaj wajyariwanchej. Amigosnin kaspataj ashkha bendicionesta japʼinchej. Jesusqa amigosnin kasqanchejrayku munakuwanchej, yanapawanchejtaj. Chantapis wiñay kausayta suyakushanchej. Astawanpis Jesuspa amigosnin kaspaqa, Jehová Dioswanpis amigosllataj kasun. Chayrayku Jesuspa amigosnin kayqa, ¡may sumajpuni!