1. Pipas amistadninchik kananpaqqa, ¿imatam ruwananchik?

PIPAS amistadninchik kananpaqqa puntatam allinta riqsinanchik. Chaypaqqa paywanmi parlarichwan imayna tarikusqanchikmanta utaq ima ruway munasqanchikmanta. Jesuswanmi ichaqa tukuy chaykuna ruwaytaqa mana atichwanchu. Chaymi sasa hina rikchakapuwanchik Jesusta riqsiyqa hinaspa paywan kuyachikuyqa. Qatiqninpim chaykunamanta rimachkasunchik.

2. ¿Imanasqataq Jesusta riqsiyqa utaq paywan kuyachikuyqa sasa hina rikchakapuwachwan?

² Jesusta riqsiyqa hinaspa paywan kuyachikuyqa sasa hinam rikchakapuwachwan kikin Jesusta mana haykapipas rikusqanchikrayku. Apostolkunapa tiemponpipas Jesustaqa manam wakin qatiqninkunaqa rikurqakuchu. Chaywanpas apostol Pedrom paykunata nirqa: “Jesucristotaqa mana rikuchkaspapas kuyankichikmi, kunan mana rikuchkaspapas paypiqa iñinkichikmi”, nispa (1 Ped. 1:8). Arí, manam kikin Jesustaraqchu rikunanchik payta riqsinapaqqa hinaspa paywan kuyachikunapaqqa.

3. ¿Imanasqaraqtaq sasa hina rikchakapuwachwan Jesusta riqsiyqa utaq paywan kuyachikuyqa?

³ Sasa hinataqmi rikchakapuwachwan kikin Jesuswan parlayta mana atisqanchikrayku. Paypa sutinpi Jehova Diosta mañakuspanchikpas manam paytachu mañakunchik. Kikin Jesusmi nirqa Jehova Diosllata yupaychananchikpaq hinaspa payllata mañakunanchikpaq (Mat. 4:10). Chaywanpas atichwanmi Jesus riqsiytaqa hinaspa paywan kuyachikuytaqa.

4. (1) ¿Imanasqaraqmi sasa hina rikchakapuwachwan Jesusta riqsiyqa hinaspa paywan kuyachikuyqa? (2) ¿Imamantam kay yachachikuypi yachasun?

 ⁴ Hanaq pachapiña Jesus kasqanraykum manaña paywanqa imatapas kuskaqa ruwayta atinchikchu. Chayraykum sasa hina rikchakapuwachwan Jesusta riqsiyqa hinaspa paywan kuyachikuyqa. Chaymi kay yachachikuypi yachasunchik Jesusta mana rikuspapas imakunata ruwaspanchik payta riqsinanchikpaq hinaspa paywan kuyachikunanchikpaq. Puntataraqyá yachaykusun imanasqa Jesusta riqsinapaq hinaspa paywan kuyachikunapaq kallpanchakunamanta.

5. ¿Imanasqataq kallpanchakunanchik Jesuswan kuyachikunapaq? (Qaway “ Jesuswan kuyachikunapaq kallpanchakuptinchikqa Jehova Diosmi kuyawasun” niqta, hinaspa “ Jehova Diostam Jesusmanta astawanqa kuyananchik” niqtapas).

⁵ Jesuswan kuyachikunapaq kallpanchakuptinchikqa Jehova Diosmi kuyawasun. Jesusmi qatiqninkunata nirqa: “Kikin taytaymi qamkunataqa kuyasunkichik ñuqata kuyawasqaykichikrayku”, nispa (Juan 16:27). Nirqaraqmi: “Ñuqantakamallam pipas taytaymanqa asuykun”, nispa (Juan 14:6). Kaypi yuyaymanasun. Wasinchikman yaykuyta munaspaqa punkuntam yaykunchik, yaqa chaynam Jehova Diosman asuykunapaqpas. Puntatam Jesuswan kuyachikunanchik. Kikin Jesuspas nirqam: ‘Ñuqam ovejakunapa yaykunan punku kani’, nispa (Juan 10:7). Chaymantapas Jesusqa taytan hina kuyakuqmi hinaspa llakipayakuqmi. Chaymi qatiqninkunatapas nirqa: “Ñuqata rikuwaqniyqa taytaytapas rikurunñam”, nispa (Juan 14:9). Jesus imayna kasqanmanta yachaspaqa Jehova Dios imayna kasqantapas riqsisunmi, hinaspam astawanraq paykunata kuyasun.

6. ¿Imanasqataq Jesuswan kuyachikunanchik?

 ⁶ Jesuswan kuyachikuptinchikqa Jehova Diosmi mañakusqanchikta uyariykuwasun hinaspam mañakusqanchikman hina yanapaykuwasun. Chaymi Diosta mañakuspanchikqa Jesuspa sutintaqa mana yanqapas-yanqaqa rimanachu. Aswanmi sumaqta yachananchik imanasqa mañakuyta tukuspa Jesuspa sutinpi tukusqanchikmanta. Jesuspas qatiqninkunatam nirqa: “Ñuqapa sutiypi imatapas mañakuptikichikqa ruwasaqmi”, nispa (Juan 14:13). Arí, Jehova Diosqa mañakusqanchikta uyariykuspanmi yanapaykuwasun. Chaypaqmi churin Jesusta mañakusqanchikman hina yanapawananchikpaq churarun (Mat. 28:18). Chaymantapas Jehova Diosqa mañakusqanchiktaqa uyariykuwasun churinpa nisqanta kasukuptillanchikmi. Paymi nirqa: “Runakunapa mana allin ruwasusqaykichikta pampachaptikichikqa, qamkunatapas hanaq pachapi kaq taytaykichikmi pampachasunkichik, mana allin ruwasusqaykichikta mana pampachaptikichikmi ichaqa, qamkunapa pantasqaykichiktapas taytaykichikqa mana pampachasunkichikchu”, nispa (Mat. 6:14, 15). Kayqa anchatam kallpanchawanchik llakipayakuq hinaspa pampachakuq kanapaq.

7. ¿Imatam ruwananchik wiña-wiñaypaq kawsakunanchikpaq?

⁷ Jesuswan kuyachikuspallanchiktaqmi wiña-wiñaypaq kawsakuytapas atisun. Kikin Jesusmi nirqa kuyasqan runankunarayku vidanta qusqanmanta (Juan 15:13). Chaymi llapallanchik kallpanchakunanchik Jesusta allinta riqsispa paywan kuyachikunapaq. Chaytaqa ruwanankum kanqa ñawpaq tiempopi Jesusmanta mana yachaq Diospa yupaychaqninkunapas. Paykunamanta wakinkum karqaku Abrahan, Sara, Moises hinaspa Rahab. Paykunapas kawsarichisqa kaspankum kallpanchakunanku kanqa Jesusta allinta riqsinankupaq hinaspa paywan kuyachikunankupaq, chaynapi wiñaypaqña kawsakunankupaq.

8, 9. Juan 15:4, 5 nisqanman hinaqa, ¿ima ruwanapaqmi Jesus yanapawanchik, hinaspa imanasqataq hinalla Jesuswan kuyachikunapaq kallpanchakunanchik?

⁸ Jesusqa kay allpa pachapi kaspanmi runakunaman taytanmanta imam kaqta yachachirqa. Qatiqninkunatapas kamachirqam chayta ruwanankupaq. Chaymi kunankama Jehova Diosmanta hinaspa hamuq punchawkunapi ima ruwananmanta runakunaman yachachichkanchik. Chay ruwayqa anchatam kusichiwanchik. Jesusqa hanaq pachapi kaspanpas hinallam yanapawachkanchik taytanmanta willakunanchikpaq. Payqa anchatam kusikun chaypaq kallpanchakuptinchikqa. Arí, Jehova Dioswan Jesus yanapawaptillanchikmi kunankamapas hinalla Diosmanta willakuyta atichkanchik (qaway Juan 15:4, 5).

⁹ Bibliapas niwanchikmi Jehova Dios kuyawananchikpaqqa, puntata Jesuswan kuyachikunanchikmanta. Chaynaqa, ¿imaynatam Jesuswan kuyachikuchwan? Qatiqninpim chaymanta yachasunchik.

10. Jesuswan kuyachikunapaqqa, ¿imatam ruwananchik?

¹⁰ Jesuswan kuyachikunapaqqa puntatam paymanta allinta yachananchik. Chaypaqqa bibliapim ñawinchananchik Mateo, Marcos, Lucas hinaspa Juan qillqakunata. Chay qillqakunata ñawinchaspanchikqa yachasunmi Jesus imayna kasqanta, hinaspam qatipakuyta munasun. Jesusqa Diospa churin hinaspa allin yachachiq kachkaspanpas qatiqninkunatam kuyakuywan rimapayaq. Imayna tarikusqanmantapas  paykunamanmi willakuq (Juan 15:15). Payqa waqaqkunawanmi kuska waqaq (Juan 11:32-36). Chiqniqninkunapas chayta qawaspankum riqsikurqaku llapallan qatiqninkunata Jesus kuyasqanmanta (Mat. 11:19). Ñuqanchikpas Jesus hina llakipayakuq kaspanchikqa huk sunqullam iñiqmasinchikkunawan kawsakusun hinaspapas Jesuswanmi kuyachikusun.

11. Jesuswan kuyachikunapaqqa, ¿imatawanraqmi ruwananchik, hinaspa imanasqam chayqa allin?

¹¹ Jesuswan kuyachikunapaqqa imayna kasqantam qatipakunanchik. Chaypaq kallpanchakuspaqqa astawanmi Jesusta kuyasun (1 Cor. 2:16). Chaynaqa, ¿imata ruwaspam Jesusta qatipakuchwan? Pay hina hukkunata yanapaspanchikmi. Jesusqa kikillanpa munasqanta ruwananmantaqa hukkunatam sunqumanta yanaparqa (Mat. 20:28; Rom. 15:1-3). Runakuna paymanta yanqakunata rimaptinkupas manam haykaqpas piñapakurqachu, aswanmi paykunataqa pampachaykurqa (Juan 1:46, 47). Manataqmi qatiqninkunapa pantasqankutapas yuyarayaqchu (1 Tim. 1:12-14). Chaymi Jesusta qatipakunapaq kallpanchakuptinchikqa ‘llapallan runakuna yachanqaku [paypa] qatiqninkuna kasqanchikta’ (Juan 13:35). Chaymi sunqunchikpi kaynata tapurikunanchik: “¿Kallpanchakuchkanichu Jesusta qatipakunaypaq, chaynapi hawkalla iñiqmasiykunawan kanaypaq?”, nispa.

12. Jesuswan kuyachikunapaqqa, ¿pikunatam yanapaykunanchik, hinaspa imaynatam chaytaqa ruwanchik?

¹² Chaymantapas, Jesuswan kuyachikunapaqqa wawqinkunatam utaq hanaq pachapaq akllasqakunatam yanapananchik. Chaywanmi Jesusqa anchata kusikun (Mat. 25:34-40). Chaynaqa, ¿imakunapim hanaq pachapaq akllasqakunata yanapachwan? Yanapachwanmi Jehova Diosmanta hinaspa munaychakuyninmanta runamasinchikkunaman sapa kuti willakuspanchik, chaynapi paykunapas Jesuspa qatiqninña kanankupaq (Mat. 28:19, 20; Hech. 10:42). Hanaq pachapaq akllasqakunaqa asllam kanku, chayraykum mana haypakunkuchu enteron allpa pachapi Diosmanta willakunankupaqqa. Chaymi llapallanchik yanapakuchkanchik Diosmanta willakunapaq (Juan 10:16). Arí, chaytaqa ruwachkanchik Jesusta hinaspa wawqinkunata kuyasqanchikraykum.

13. Lucas 16:9 nisqanpiqa, ¿ima ruwanapaqmi Jesusqa kallpanchawanchik?

¹³ Jesuspa wawqinkunata utaq hanaq pachapaq akllasqakunataqa yanapachwantaqmi qullqichanchikwanpas (qaway Lucas 16:9). Qullqichanchikwanqa yanapakuchwantaqmi enteron allpa pachapi hinalla Diosmanta willakunapaq, huñunakuna wasikunata ruwanapaq utaq allichanapaqpas. Chaymantapas quchwantaqmi pacha kuyuwan, nisyu parawan utaq lluqllawan ñakariq iñiqmasinchikkunata yanapaykunanchikpaqpas. Huñunakusqanchik wasipaqpas chaynataq ñuqanchikwan huñunakuq wakcha iñiqmasinchikkunatapas qullqichanchikwanmi yanapakuyta atichwan (Prov. 19:17).

14. Efesios 4:15, 16 nisqanman hinaqa, ¿pikunatam kasukunanchik Jesuswan kuyachikunapaq?

¹⁴ Jesuswan kuyachikunapaqqa Jesuspa akllasqan runakunatam kasukunanchik. Jesusqariki iñiqkunapa umanmi. Chaymi payqa iñiyninkupi suni takyaq qarikunata akllarun kuyakuywan tukuypi yanapaykuwananchikpaq (qaway Efesios 4:15, 16). Paykunam qayninpakunalla tantiarurqaku huk huñunakuna wasipi wakin punchawkunapi huñunakuq iñiqmasinchikkuna llapankuña hukllawakunankupaq. Diosmanta willakunankupaqpas  chaynallataqmi karqa. Chayraykum manaña llumpaytañachu qullqitapas usuchinchik. Wakin iñiqmasinchikkunatañataqmi nirqaku huk lawpiña huñunakunankupaq chaynataq Diosmanta willakunankupaqpas. Chaykunawanqa qallariypiqa paykunaqa llakisqachá tarikurqaku, ichaqa Jesuswan kuyachikuyta munasqankuraykum kasukurqaku. Chaywanqa mayna-maynatachá Jesusqa kusikun.

15. Hanaq pachapi kawsakuspapas utaq kay pachapi kawsakuspapas, ¿imaynam Jesuswan kasun?

¹⁵ Hanaq pachapaq akllasqa iñiqmasinchikkunaqa kikin Jesuswan kuskam hanaq pachapi wiñaypaq kusisqa kawsakunqaku. Jesuswan kuskataqmi paykunaqa kamachimuwasunpas. Chayqa mayna kusikunapaqchá kanqa (Juan 14:2, 3). Kay allpa pachanchik sumaq huertaña kaptin chaypi wiñaypaq kawsakuqkunapas Jesuspa waqaychasqanmi kasunchik, kikin Jesuswan mana kuska kaspapas. Jesustaqa watakuna pasasqanman hinataqmi astawanraq kuyasun. Chaypas mayna kusikunapaqchá kanqa (Is. 9:6, 7).

16. ¿Imanasqataq Jesuswan kuyachikuyqa allinninchikpaq?

¹⁶ Jesuswan kuyachikuyqa allinninchikpaqmi. Chayraykum paypa waqaychasqan kanchik. Paywan kuyachikusqanchikraykum hamuq punchawpipas wiñaypaq kusisqa kawsakusun. Taytanchik Jehova Diospas anchatam kuyawasunchik. Chayqa imamantapas anchatam kusichiwanchik, ¿aw?