1. Akapeea koe me akatupu i tetai pirianga oa ki tetai tangata?

TE TAKAINGA mua kia riro ei oa no tetai tangata, ka aravei e ka tuatua koe kiaia. Ia koe e pukapuka ra kiaia, ka kite koe i tona manako, tana e reka ana, e aere ua rai ka riro korua ei nga oa. Me akatupu ra i te pirianga oa kia Iesu, kare teia i te mea māmā. Eaa te tumu?

2. Eaa te akaaoanga mua kia tatou?

² Te akaaoanga mua kare tatou i kite ana ia Iesu. Kare katoa te au Kerititiano o mua ana i aravei ana iaia. Noatu rai, kua akakite te apotetoro ko Petero e: “Ko ta kotou i anoano na, kore ua atu rai te kite iaia; ko ta kotou e rekareka ra i te rekareka e kore e tika kia tuatua ra, . . . i te akarongo anga atu.” (1 Pete. 1:8) No reira ka rauka rai ia tatou i te akatupu i tetai pirianga vaitata kia Iesu, noatu kare tatou i kite ana iaia.

3. Eaa te rua o te akaaoanga kia tatou?

³ Te rua o te akaaoanga kare e rauka ia tatou i te tuatua kiaia. Me pure tatou ka tuatua tatou i to tatou manako kia Iehova. E tika, ka pure tatou na roto i te ingoa o Iesu, kare ra tatou e tuatua ana kiaia. Kare a Iesu e inangaro e kia tuatua tatou kiaia. Eaa te tumu? No te mea e tuanga te pure no te akamorianga, ko Iehova  anake ta tatou e akamori. (Mata. 4:10) Inara ka rauka ia tatou i te akakite i to tatou inangaro kia Iesu.

4. Eaa te toru o te akaaoanga, e eaa ta tatou ka uriuri?

⁴ Te toru o te akaaoanga e noo ana a Iesu i te rangi, no reira kare tatou e kite iaia. Noatu te reira ka rauka rai ia tatou i te kite meitaki ia Iesu. Ka uriuri tatou e a tumu kia akamatutu i to tatou pirianga oa kiaia. Mea mua ka uriuri tatou i te tumu maata no te akatupu i tetai pirianga vaitata kia Iesu.

5. Eaa te au tumu kia riro tatou ei oa no Iesu? (Akara katoa i te pia “ Ei Oa no Iesu e Oa Katoa no Iehova” e te “ Akamanako Meitaki i ta Iesu Angaanga.”)

⁵ Ka anoanoia tatou kia riro ei oa no Iesu me inangaro tatou i te piri vaitata kia Iehova. No teaa ra? E rua tumu. Mea mua, akakite a Iesu ki tana au pipi: “Te anoano maira oki te Metua ia kotou, ko kotou i anoano mai iaku nei.” (Ioa. 16:27) Karanga aia e: “Kare ua e tangata e tae ki te Metua ra, mari ra ei iaku.” (Ioa. 14:6) Me anoano tatou ia Iehova ei oa e kare o tatou pirianga kia Iesu, tera te tu, te tomo ra tatou ki roto i tetai are, kare e ngutupa. Kapiki a Iesu iaia i roto i teia akatutuanga e ko te “ngutupa o te mamoe.” (Ioa. 10:​7) Te rua o te tumu kua akaari a Iesu i te tu o tona Metua. Karanga aia ki tana pipi: “Ko te akara mai iaku nei, kua akara ïa i te Metua.” (Ioa. 14:9) No reira ko tetai mataara puapinga kia kite meitaki ia Iehova, e apii i te oraanga o Iesu. Ia tatou e rave ra i teia, ka maata atu to tatou inangaro  iaia. Ka ketaketa to tatou pirianga kia Iesu, e ka maata to tatou inangaro i tona Metua.

6. Eaa tetai tumu kia piri vaitata tatou kia Iesu? Akamārama mai.

⁶ Ka anoanoia tatou kia piri vaitata kia Iesu kia akarongoia ta tatou pure. E maata ta tatou ka anoanoia kia kite i te taopenga i ta tatou pure na roto i te “ingoa o Iesu.” Kia mārama tatou i te tumu i taangaanga ai a Iehova ia Iesu me pau mai i ta tatou pure. Akakite a Iesu ki te au apotetoro: “Ko ta kotou e pati ma toku ingoa, naku ïa e rave.” (Ioa. 14:13) Noatu ka akarongo mai a Iehova e ka pau i ta tatou pure, kua oronga aia i te mana kia Iesu kia akatupu i Tona anoano. (Mata. 28:18) I mua ake ka pau mai ei te Atua i ta tatou pure, ka akara aia me kua taangaanga tatou i ta Iesu ako. Ei akaraanga, karanga a Iesu: “Kia akakore oki kotou i ta etai ke ra ara, e akakore katoa to kotou Metua i te ao ra i ta kotou; Kia kore ra kotou e akakore i ta etai ke ra ara, kare katoa oki to kotou Metua i te ao ra e akakore mai i ta kotou ara.” (Mata. 6:​14, 15) Mea puapinga i reira kia akono tatou i tetai mei ta Iehova e Iesu i rave!

7. Koai ma ka puapingaia mei te atinga oko o Iesu?

⁷ Ko te aronga e pirianga vaitata to ratou kia Iesu ka puapingaia mei tona atinga oko. Akapeea tatou e kite ei? Karanga a Iesu e ka “oronga te tangata i tona uaorai ora no tona au taunga [me kore au oa].” (Ioa. 15:13) Te aronga tiratiratu tei ora ana i mua ake ka tae mai ei a Iesu ki te enua nei, ka anoanoia ratou kia apii no runga iaia e kia inangaro iaia. Ka akatuia a Aberahama, Sara, Mose, e Rahaba, ka anoanoia ratou kia akatupu i tetai pirianga vaitata kia Iehova e Iesu kia ora ratou e tuatau ua atu.​—Ioa. 17:3; Anga. 24:15; Ebe. 11:​8-​12, 24-​26, 31.

8-9. Ia Ioane 15:​4, 5, eaa te ka rauka ia tatou i te rave ei oa no Iesu, e eaa i puapinga ai?

⁸ Tei ia tatou te tikaanga manea no te angaanga kapiti kia Iesu i te tutu aere e te apiianga i te nuti meitaki o te Patireia. Iaia i te enua nei, e puapii katoa a Iesu. Tona oki anga ki te rangi te akaaere nei rai a Iesu, te upoko o te putuputuanga, i te angaanga tutu aere e te apiianga. Te kite ra aia e te akaperepere ra i taau e rave nei, i te tauturu i tetai ke kia kite meitaki iaia e tona Metua. Ka rauka ia tatou i te rave i teia angaanga ma te tauturu a Iehova e Iesu.​—E tatau ia Ioane 15:​4, 5.

⁹ Taka meitaki te apii ra te Tuatua a te Atua e kia inangaro ua atu tatou ia Iesu e mareka ai a Iehova. No reira ka uriuri tatou e a manako kia riro ei oa no Iesu.

10. Eaa te takainga mua ka rave tatou no te akatupu i tetai pirianga oa kia Iesu?

¹⁰ (1) E apii kia kite ia Iesu. Ka rave tatou i teia na te tatauanga i te au puka Pipiria o Mataio, Mareko, Luka, e Ioane. Ia tatou e akamanako ra i te oraanga o Iesu i roto i te Pipiria, ka akaperepere tatou e ka akangateitei ia Iesu no tona tu ki te tangata. Ei akaraanga, noatu koia te Pu, kare aia i akono ana i tana au pipi ei tavini. Mari ra, kua akakite aia i tona au manako kia ratou. (Ioa. 15:15) Kua mārama a Iesu i to ratou turanga e kua aue iora. (Ioa. 11:32-​36) Kua kite  katoa te aronga patoi e kua akariro aia i te aronga tei ariu mai kiaia ei au oa nona. (Mata. 11:19) Me aru tatou i to Iesu tu akono ki tana au pipi, ka meitaki atu to tatou pirianga ki tetai, ka mataora tatou, e ka maata atu to tatou inangaro ia Iesu.

11. Eaa te takainga rua kia riro ei oa no Iesu, eaa i puapinga ai?

¹¹ (2) Aru i to Iesu manako e tana e rave ra. Te meitaki ia tatou i te kite e te aru i tona aerenga manako, ka vaitata atu tatou kiaia. (1 Kori. 2:​16) Akapeea tatou me aru i to Iesu akaraanga? Akamanako ana i teia. Kua tauturu a Iesu i tetai, e kare i akarekareka iaia. (Mata. 20:28; Roma 15:​1-3) No tera tu, kua akaari ua rai aia i te tu akaatinga e te akakore i te ara. Kua akara aia i te meitaki o tetai tei akakino mai iaia. (Ioa. 1:46, 47) Kare aia i akamoupuku i te tarevake o tetai. (1 Timo. 1:12-14) Karanga a Iesu: “Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:35) E ui kia koe uaorai, “Te aru ra ainei au i to Iesu akaraanga i te akaau i toku au taeake e te au tuaine?”

12. Eaa te takainga toru kia riro ei oa no Iesu, akapeea tatou me rave i teia?

¹² (3) E turu i te ai taeake o Iesu. Manako a Iesu i ta tatou e rave ra i te turu i tona ai taeake e kua raveia kiaia. (Mata. 25:34-40) Te mataara puapinga e turu ra tatou i te aronga akatainuia, na te tutu aere anga i te Patireia e te akariro anga i te tangata ei pipi, ta Iesu i akaue i tana pipi kia rave. (Mata. 28:19, 20; Anga. 10:42) Mari ua ake te tauturu a te “mamoe ke atu” kua rave te ai taeake o Iesu i teia angaanga tutu aere i te ao katoa. (Ioa. 10:16) Me ko koe tetai o te mamoe ke atu e rave ra i teia angaanga, te akaari ra koe i toou inangaro ia Iesu e tona ai taeake.

13. Akapeea tatou me aru i ta Iesu ako ia Luka 16:9?

¹³ Ka akariro katoa tatou ia Iehova e Iesu ei oa, na te oronga anga i te moni tauturu ki ta raua angaanga e akaaere ra. (E tatau ia Luka 16:9.) Ei akaraanga, ka oronga tatou i te moni tauturu no te angaanga i teianei ao, te ka tauturu i te angaanga tutu aere i te au ngai mamao, patu e te akonokono i te au ngai akamorianga, e te oronga i te au apinga ei tauturu i te au taeake tei rokoia e te tumatetenga. Ka oronga moni tauturu tatou ki te putuputuanga e te au taeake te anoano maata ra i te tauturu. (Mase. 19:17) Ko teia tetai mataara ka turuturu tatou i to Iesu ai taeake.

14. Ia Ephesia 4:15, 16, eaa te a o te takainga kia riro ei oa no Iesu?

¹⁴ (4) Turu i te angaanga a te putuputuanga Kerititiano. Ka matutu to tatou pirianga kia Iesu te upoko o te putuputuanga, me turuturu tatou i te angaanga a te aronga tei ikiia kia akono ia tatou. (E tatau ia Ephesia 4:15, 16.) Ei akaraanga, te akarakara nei matou i te au Are Uipaanga Patireia kia taangaanga maataia e te putuputuanga. No te reira, kua kapitiia tetai putuputuanga ki tetai, e kua taui ta ratou ngai ka tutu aere. Na roto i teia mataara kua akapou meitakiia te moni oronga ua a te au taeake. I te reira taime kua akatanotano te au taeake ki teia turanga ou. Penei kua roa rai te tuatau no tetai au taeake  tiratiratu i te angaanga kapiti i roto i te putuputuanga e kua piri vaitata ki tetai e tetai. I teianei te patiia nei ratou kia angaanga ki tetai putuputuanga ou. Mataora a Iesu i te akara mai e te aru nei teia au pipi tiratiratu i teia aratakianga ou!

15. Akapeea to tatou pirianga oa kia Iesu e matutu ua atu ei a te tuatau ki mua?

¹⁵ Te aronga tei akatainuia ki te vaerua tapu ka noo ratou i te pae ia Iesu e tuatau ua atu, i te tutara kapiti anga i te Patireia o te Atua. Tei ia Karaiti ratou—ka kite iaia, ka tuatua kiaia, e ka oaoa kiaia. (Ioa. 14:2, 3) Te aronga ra ka noo i te enua nei ka kite katoa ratou i to Iesu inangaro. Noatu kare ratou e kite ia Iesu, ka ketaketa rai to ratou pirianga kiaia, ia ratou e akaperepere ra i to ratou oraanga mutu kore i te enua nei, mei ia Iehova e Iesu.—Isa. 9:5, 6.

16. Eaa ta tatou akameitakianga me riro ei oa no Iesu?

¹⁶ Me āriki tatou i ta Iesu patianga kia riro ei oa nona, e maata ta tatou au akameitakianga. Ei akaraanga, te puapingaia nei tatou mei tona inangaro e tana tauturu i teianei. Tei ia tatou te akameitakianga kia ora e tuatau atu. Te mea puapinga, ka akatupu to tatou pirianga oa kia Iesu te akameitakianga manea—kia riro ei oa ki to Iesu Metua, ko Iehova. E tikaanga manea no tatou kia kapikiia e oa no Iesu!