СТАТИЈА ПРОУЧИБАСКЕ 17
„Тумен сиен мле амала“
Тумен сиен мле амала, соске вакерѓум туменге са со шунѓум таро мо Дад (ЈОВАН 15:15)
ГИЛИ 13 О Исус, амаро пример
БАШО СО КА КЕРА ЛАФИ *
1. Сар шај те ове паше амал некасаја?
ТЕ ШАЈ те ове паше амал некасаја, прво ваљани те накхаве време леа. Џикоте керена лафи башо адава со мислинена хем сар осетинена тумен, тумен овена амала. Ама, нане добором локхо те ова амала е Исусеа. Соске?
2. Кова тано о прво предизвик со иси амен?
2 Прво предизвик тано адава со никогаш на дикхлем амен е Исусеа. Буте христијанен ко прво веко сине лен о исто предизвик. Ама, о апостол Петар вакерѓа: „Иако никогаш на дикхлен ле, тумен мангена ле. Иако акана на дикхена ле, сепак верујнена ки лесте“ (1. Пет. 1:8). Спрема адава, шај те ова паше амала е Исусеа иако никогаш на дикхлем амен леа.
3. Кова јавер предизвик иси амен?
3 Дујто предизвик тано адава со нашти те кера лафи е Исусеа. Кеда молинаја амен, амен кераја лафи е Јеховаја. Иако молинаја амен ко е Исусескоро анав, на кераја лафи директно леа. Уствари, ов на мангела леске те молина амен. Соске? Адалеске со и молитва тани дело таро обожавибе, а амен ваљани те обожавина само е Јехова (Мат. 4:10). Ама, амен сепак шај те сикава кај мангаја е Исусе.
4. Кова тано о трито предизвик со иси амен, хем со ка дикха ки акаја статија?
4 Трито предизвик тано адава со о Исус живинела ко небо, хем адалеске нашти те накхава време леа. Сепак, шај те дознајна бут башо Исус иако на сием узи лесте. Ка дикха штар буќа со ваљани те кера те шај те овел амен позорало амалипе леа. Ама, најангле те дикха соске тано важно те ова паше амала е Христосеа.
СОСКЕ ВАЉАНИ ТЕ ОВА АМАЛА Е ИСУСЕА?
5. Соске мора те ова амала е Исусеа? (Дикх хем о рамке „ Ако сием амала е Исусеа, ка шај те ова амала е Јеховаја“ хем „ Исправно те дикха ки улога е Исусескири“.)
5 Мора те ова амала е Исусеа ако мангаја те ова паше е Јеховаја. Соске? Те дикха само дуј причине. Прво, о Исус вакерѓа пле учениконге: „Коркори о Дад мангела тумен соске тумен манглен ман“ (Јован 16:27). Исто аѓаар вакерѓа: „Никој нашти те авел џи ко Дад, освен преку манде“ (Јован 14:6). Нашти те ова амала е Јеховаја бизо те ова паше амала е Исусеа. Адава ка овел исто сар те пробина те кхува ко несаво кхер бизо те користина о удар. О Исус користинѓа јекх слично споредба кеда вакерѓа кај ов тано „о удар е бакхренге“ (Јован 10:7). Хем дујто, о Исус совршено сикавела сине о особине пле Дадескере. Ов вакерѓа пле учениконге: „Кој дикхља ма ман, дикхља ме Даде да“ (Јован 14:9). Адалеске, јекх важно начин сар шај те пенџара е Јехова тано аѓаар со ка дознајна нешто повише башо е Исусескоро живото. Кобор пошукар пенџараја е Исусе, добором повише ка бајрол амаро мангипе да спрема лесте. А аѓаар ка бајрол хем амаро мангипе спрема лескоро Дад.
6. Тари сави јавер причина мора те ова шукар амала е Исусеа? Објаснин.
6 Мора те ова шукар амала е Исусеа ако мангаја о Јехова те одговоринел ко амаре молитве. Акава значинела кај мора те кера нешто повише, а на само те вакера о лафија „ко анав е Исусескоро“ ко крајо тари секоја молитва. Мора те хаљова ко саво начин о Јехова одговоринела аменге ко молитве преку о Исус. О Исус вакерѓа е апостоленге: „Со хем те роден ко мло анав, адава ка керав“ (Јован 14:13). Иако о Јехова тано адава со шунела хем одговоринела ко амаре молитве, ов денѓа власт е Исусеске те исполнинел лескере одлуке (Мат. 28:18). Освен адава, англедер те одговоринел ко амаре молитве, о Јехова дикхела дали применинаја о советија со денѓа о Исус. На пример, о Исус вакерѓа: „Ако тумен простинена е манушенге ленгере грешке, тумаро Дад сој ко небо исто аѓаар ка простинел туменге. Ама, ако тумен на простинена е манушенге ленгере грешке, тегани ни тумаро Дад нане те простинел тумаре грешке“ (Мат. 6:14, 15). Акатар дикхаја кај, ако мангаја о Јехова те одговоринел ко амаре молитве, бут тано важно те понашина амен е јаверенцар ко исто начин сар со ов хем о Исус понашинена пе аменцар!
7. Кас ка овел корист тари откупно жртва е Исусескири?
7 Само окола сој тане паше амала е Исусеа ка овел лен корист тари лескири откупно жртва. Котар џанаја акава? О Исус вакерѓа кај ка „дел пло живото пле амаленге“ (Јован 15:13). О верна слуге е Девлескере кола со живинѓе англедер ов те авел ки Пхув ка ваљани те сикљовен баши лесте хем те заманген ле. Кеда ка воскреснинен, чак о праведна слуге е Јеховаскере сар со сине о Авраам, и Сара, о Мојсеј, и Раав хем јавера, ка мора те овен амала е Исусеа те шај те добинен вечно живото (Јован 17:3; Дела 24:15; Евр. 11:8-12, 24-26, 31).
8-9. Спрема Јован 15:4, 5, со шај те кера ако сием амала е Исусеа, хем соске акава тано важно?
8 Амен сием бахтале со шај те соработина е Исусеа кеда проповединаја о шукар хабери башо Царство хем кеда сикаваја е манушен. Ов керела сине адава џикоте сине ки Пхув. А откеда иранѓа пе ко небо, сар поглавари е собраниескоро, о Исус понадари да водинела о проповедибе хем о сикајбе. Ов дикхела хем ценинела тло трудо со деа те шај те поможине кобор со шај повише манушенге те пенџарен ле хем лескере Даде. Уствари, бизи ленгири помош, амен нашти те кера акаја активност. (Читин Јован 15:4, 5.)
9 Таро е Девлескоро Лафи јасно дикхјола кај мора те заманга е Исусе хем те бајрара амаро мангипе спрема лесте те шај те кера е Јехова бахтало. Те дикха штар буќа со ка поможинен аменге те ова амала е Исусеа.
САР ТЕ ОВА ШУКАР АМАЛА Е ИСУСЕА
Шај те ове амал е Исусеа 1) ако пенџареа ле пошукар, 2) ако размислинеа хем постапинеа сар лесте, 3) ако поддржинеа лескере пхрален, хем 4) ако поддржинеа са адава со керела е Јеховаскири организација (Дикх о пасусија 10-14) *
10. Која тани и прво бути со ваљани те кера те шај те ова амала е Исусеа?
10 1) Пенџар е Исусе. Акава шај те кера аѓаар со ка читина о библиска лила Матеј, Марко, Лука хем Јован. Џикоте размислинаја башо е Исусескоро живото таро акала библиска извештаија, ки аменде ка бајрол о мангипе хем о поштовање спрема лесте. На пример, иако сине ленгоро Господари, ов на понашинела пе сине пле учениконцар сар робија. Наместо адава, ов вакерела сине ленге со мислинела хем сар осетинела пе (Јован 15:15). О Исус осетинела сине ленгири дукх хем ровела сине ленцар (Јован 11:32-36). Чак лескере противникија признајнѓе кај тано амал околенге со прифатинѓе лескоро хабери (Мат. 11:19). Кеда понашинаја амен е јаверенцар сар о Исус со понашинѓа пе пле учениконцар, тегани иси амен пошукар амалипе ленцар хем сием побахтале. Освен адава, амаро мангипе хем ценење спрема лесте бајрола панда повише.
11. Која тани и дујто бути со ваљани те кера те шај те ова амала е Исусеа, хем соске адава тано важно?
11 2) Размислин хем постапин сар о Исус. Кобор пошукар хаљоваја сар размислинела о Исус хем кобор повише амен коркори размислинаја сар лесте, добором попаше амала ка ова леа (1. Кор. 2:16). На пример, сине леске поважно те поможинел е јаверенге него те угодинел песке (Мат. 20:28; Рим. 15:1-3). Адалеске со сине ле асавко стави, ов сине самопожртвувано хем спремно простинела сине. На вреџинела пе сине сигате кеда о мануша керена сине лошно лафи баши лесте (Јован 1:46, 47). Хем на дозволинѓа и грешка некаскири со керѓа ла англедер те влијајнел упро лескоро стави спрема адава мануш (1. Тим. 1:12-14). О Исус вакерѓа: „Таро адава сарине ка џанен кај сиен мле ученикија, ако иси тумен мангипе машкар туменде“ (Јован 13:35). Шукар тано те пуче тут: „Дали џава пало пример е Исусескоро аѓаар со керава са со шај те овав шукар амал мле пхраленге хем пхењенге?“
12. Која тани и трито бути со ваљани те кера те шај те ова амала е Исусеа?
12 3)Поддржин е Христосескере пхрален. Кеда кераја нешто лескере пхраленге, о Исус ко адава дикхела сар ка пхене адава керѓем ле лично леске (Мат. 25:34-40). О главно начин сар поддржинаја е помазаникон тано аѓаар со даја са амендар те шај те проповедина хем те сикава е јаверен башо Царство, спрема и заповед со денѓа о Исус (Мат. 28:19, 20; Дела 10:42). Само адалеске со поможинена лен о „јавера бакхре“, е Христосескере пхраља шај те керен акаја активност која со авдиве са повише бајрола ко цело свето (Јован 10:16). Ако ту да сиан ки акаја група, секогаш кеда сиан ки служба сикавеа тло мангипе на само спрема о помазиме христијања него хем спрема о Исус.
13. Сар шај те применина е Исусескоро совет сој пишимо ко Лука 16:9?
13 Шај те кера аменге амалипе е Јеховаја хем е Исусеа аѓаар со ка користина амаре материјална средствија те шај те поддржина и активност која со ола водинена ла авдиве. (Читин Лука 16:9.) На пример, шај те да доброволна прилогија баши активност со керела пе ко цело свето. Ола користинена пе те финансиринел пе о проповедибе башо шукар хабери ко дур тхана, те керен пе хем те одржинен пе о теократска објектија хем те дел пе материјално помош е пхраленге сој погодиме таро природна катастрофе или таро јавера катастрофе. Шај те да прилогија те учхарен пе о трошакија ко амаро собрание, а исто аѓаар шај лично те да околенге каске со џанаја кај ваљани материјално помош (Изр. 19:17). Ко акала начинија, уствари поддржинаја е Христосескере пхрален.
14. Спрема Ефешаните 4:15, 16, која тани и штарто бути со ваљани те кера те шај те ова амала е Исусеа?
14 4) Поддржин са адава со керела е Јеховаскири организација. Оваја попаше е Исусеа сар поглавари е собраниескоро кеда соработинаја околенцар со чхивѓа лен те грижинен пе аменге. (Читин Ефешаните 4:15, 16.) На пример, акана трудинаја амен са амаре дворане те користинен пе најшукар со шај. Адалеске, несаве собранија сине спојме јаверенцар, хем сине керде соодветна промене ко собраниска подрачја проповедибаске. Аѓаар, и организација успејнѓа те штединел бут таро доброволна прилогија. Ама, акава значинела сине кај несаве пхраља хем пхења ка ваљани те прилагодинен пе ко неве околностија. Адала објавителија бершенцар верно служинѓе ко јекх исто собрание хем уле бут паше е пхраленцар хем е пхењенцар таро адава собрание. Ама акана тане замолиме те служинен ко јавер собрание. О Исус сигурно тано бут бахтало кеда дикхела сар адала верна слуге спремно поддржинена акаја одлука!
ТЕ АЧХОВА АМАЛА Е ИСУСЕА ЗАСЕКОГАШ
15. Саво ка овел амаро амалипе е Исусеа ки иднина, хем соске?
15 Окола сој помазиме е свети духоја иси лен надеж кај ка овен е Исусеа засекогаш, хем кај ка владинен заедно леа ко е Девлескоро Царство. Ола чаче ка овен е Христосеа — ка дикхен ле, ка керен леа лафи хем ка накхавен заедно време леа (Јован 14:2, 3). Ама, ов ка сикавел мангипе хем грижа околенге да со иси лен надеж те живинен вечно ки Пхув. Иако нане те дикхен е Исусе, ола ка овен са попаше амала леа џикоте уживинена ко чачутно живото кова со ов хем о Јехова ка дел лен (Иса. 9:6, 7).
16. Кола берекетија иси амен адалеске со сием амала е Исусеа?
16 Кеда прифатинаја е Исусескири покана те ова лескере амала, амен добинаја бут берекетија. Панда акана осетинаја лескоро мангипе хем лескири помош. Освен адава, иси амен прилика те живина вечно. Хем најважно таро са, ако сием амала е Исусеа, ка овел амен о најбаро барвалипе со шај — паше амалипе лескере Дадеа, е Јеховаја. Чаче тани бари чест те ова е Исусескере амала!
ГИЛИ 17 „Мангава“
^ пас. 5 О апостолија накхавѓе некобор берша заедно е Исусеа хем уле шукар амала. Ов мангела амен да те ова лескере амала. Ама, аменге авдиве нане добором локхо те ова амала е Исусеа сар со сине е апостоленге. Ки акаја статија ка дикха некобор предизвикија со керена те овел аменге пхаро те ова амала е Исусеа хем некобор предлогија со шај те поможинен аменге те ова хем те ачхова паше амала е Исусеа.
^ пас. 55 ОБЈАСНИМЕ СЛИКЕ: 1) Ки Фамилијарно рат, шај те проучина башо е Исусескоро живото хем служба. 2) Ко собрание ваљани те трудина амен те ова ко мир амаре пхраленцар. 3) Шај те поддржина е Христосескере пхрален аѓаар со ка да са амендар ки служба. 4) Ако иси несави промена е собраниеа, ваљани те поддржина е старешиненгири одлука.
