1. Sar šaj te ove paše amal nekasaja?

TE ŠAJ te ove paše amal nekasaja, prvo valjani te nakhave vreme lea. Džikote kerena lafi bašo adava so mislinena hem sar osetinena tumen, tumen ovena amala. Ama, nane doborom lokho te ova amala e Isusea. Soske?

2. Kova tano o prvo predizvik so isi amen?

² Prvo predizvik tano adava so nikogaš na dikhlem amen e Isusea. Bute hristijanen ko prvo veko sine len o isto predizvik. Ama, o apostol Petar vakergja: „Iako nikogaš na dikhlen le, tumen mangena le. Iako akana na dikhena le, sepak verujnena ki leste“ (1. Pet. 1:8). Sprema adava, šaj te ova paše amala e Isusea iako nikogaš na dikhlem amen lea.

3. Kova javer predizvik isi amen?

³ Dujto predizvik tano adava so našti te kera lafi e Isusea. Keda molinaja amen, amen keraja lafi e Jehovaja. Iako molinaja amen ko e Isuseskoro anav, na keraja lafi direktno lea. Ustvari, ov na mangela leske te molina amen. Soske? Adaleske so i molitva tani delo taro obožavibe, a amen valjani te obožavina samo e Jehova (Mat. 4:10). Ama, amen sepak šaj te sikava kaj mangaja e Isuse.

4. Kova tano o trito predizvik so isi amen, hem so ka dikha ki akaja statija?

⁴ Trito predizvik tano adava so o Isus živinela ko nebo, hem adaleske našti te nakhava vreme lea. Sepak,  šaj te doznajna but bašo Isus iako na siem uzi leste. Ka dikha štar bukja so valjani te kera te šaj te ovel amen pozoralo amalipe lea. Ama, najangle te dikha soske tano važno te ova paše amala e Hristosea.

5. Soske mora te ova amala e Isusea? (Dikh hem o ramke „ Ako siem amala e Isusea, ka šaj te ova amala e Jehovaja“ hem „ Ispravno te dikha ki uloga e Isuseskiri“.)

⁵ Mora te ova amala e Isusea ako mangaja te ova paše e Jehovaja. Soske? Te dikha samo duj pričine. Prvo, o Isus vakergja ple učenikonge: „Korkori o Dad mangela tumen soske tumen manglen man“ (Jovan 16:27). Isto agjaar vakergja: „Nikoj našti te avel dži ko Dad, osven preku mande“ (Jovan 14:6). Našti te ova amala e Jehovaja bizo te ova paše amala e Isusea. Adava ka ovel isto sar te probina te khuva ko nesavo kher bizo te koristina o udar. O Isus koristingja jekh slično sporedba keda vakergja kaj ov tano „o udar e bakhrenge“ (Jovan 10:7). Hem dujto, o Isus sovršeno sikavela sine o osobine ple Dadeskere. Ov vakergja ple učenikonge: „Koj dikhlja ma man, dikhlja me Dade da“ (Jovan 14:9). Adaleske, jekh važno način sar šaj te pendžara e Jehova tano agjaar so ka doznajna nešto poviše bašo e Isuseskoro životo. Kobor pošukar pendžaraja e Isuse, doborom poviše ka bajrol amaro mangipe da sprema leste. A agjaar ka bajrol hem amaro mangipe sprema leskoro Dad.

6. Tari savi javer pričina mora te ova šukar amala e Isusea? Objasnin.

⁶ Mora te ova šukar amala e Isusea ako mangaja o Jehova te odgovorinel ko amare molitve. Akava značinela kaj mora te kera  nešto poviše, a na samo te vakera o lafija „ko anav e Isuseskoro“ ko krajo tari sekoja molitva. Mora te haljova ko savo način o Jehova odgovorinela amenge ko molitve preku o Isus. O Isus vakergja e apostolenge: „So hem te roden ko mlo anav, adava ka kerav“ (Jovan 14:13). Iako o Jehova tano adava so šunela hem odgovorinela ko amare molitve, ov dengja vlast e Isuseske te ispolninel leskere odluke (Mat. 28:18). Osven adava, angleder te odgovorinel ko amare molitve, o Jehova dikhela dali primeninaja o sovetija so dengja o Isus. Na primer, o Isus vakergja: „Ako tumen prostinena e manušenge lengere greške, tumaro Dad soj ko nebo isto agjaar ka prostinel tumenge. Ama, ako tumen na prostinena e manušenge lengere greške, tegani ni tumaro Dad nane te prostinel tumare greške“ (Mat. 6:14, 15). Akatar dikhaja kaj, ako mangaja o Jehova te odgovorinel ko amare molitve, but tano važno te ponašina amen e javerencar ko isto način sar so ov hem o Isus ponašinena pe amencar!

7. Kas ka ovel korist tari otkupno žrtva e Isuseskiri?

⁷ Samo okola soj tane paše amala e Isusea ka ovel len korist tari leskiri otkupno žrtva. Kotar džanaja akava? O Isus vakergja kaj ka „del plo životo ple amalenge“ (Jovan 15:13). O verna sluge e Devleskere kola so živingje angleder ov te avel ki Phuv ka valjani te sikljoven baši leste hem te zamangen le. Keda ka voskresninen, čak o pravedna sluge e Jehovaskere sar so sine o Avraam, i Sara, o Mojsej, i Raav hem javera, ka mora te oven amala e Isusea te šaj te dobinen večno životo (Jovan 17:3; Dela 24:15; Evr. 11:8-12, 24-26, 31).

8-9. Sprema Jovan 15:4, 5, so šaj te kera ako siem amala e Isusea, hem soske akava tano važno?

⁸ Amen siem bahtale so šaj te sorabotina e Isusea keda propovedinaja o šukar haberi bašo Carstvo hem keda sikavaja e manušen. Ov kerela sine adava džikote sine ki Phuv. A otkeda irangja pe ko nebo, sar poglavari e sobranieskoro, o Isus ponadari da vodinela o propovedibe hem o sikajbe. Ov dikhela hem ceninela tlo trudo so dea te šaj te pomožine kobor so šaj poviše manušenge te pendžaren le hem leskere Dade. Ustvari, bizi lengiri pomoš, amen našti te kera akaja aktivnost. (Čitin Jovan 15:4, 5.)

⁹ Taro e Devleskoro Lafi jasno dikhjola kaj mora te zamanga e Isuse hem te bajrara amaro mangipe sprema leste te šaj te kera e Jehova bahtalo. Te dikha štar bukja so ka pomožinen amenge te ova amala e Isusea.

10. Koja tani i prvo buti so valjani te kera te šaj te ova amala e Isusea?

¹⁰ 1) Pendžar e Isuse. Akava šaj te kera agjaar so ka čitina o bibliska lila Matej, Marko, Luka hem Jovan. Džikote razmislinaja bašo e Isuseskoro životo taro akala bibliska izveštaija, ki amende ka bajrol o mangipe hem o poštovanje sprema leste. Na primer, iako sine lengoro Gospodari, ov na ponašinela pe sine ple učenikoncar sar robija. Namesto adava, ov vakerela sine lenge so mislinela hem sar osetinela pe (Jovan 15:15). O Isus osetinela sine lengiri dukh hem rovela sine lencar (Jovan 11:32-36). Čak leskere protivnikija priznajngje kaj tano amal okolenge so prifatingje leskoro haberi (Mat. 11:19). Keda ponašinaja amen e javerencar sar o Isus so ponašingja pe ple učenikoncar, tegani isi amen pošukar amalipe lencar  hem siem pobahtale. Osven adava, amaro mangipe hem cenenje sprema leste bajrola panda poviše.

11. Koja tani i dujto buti so valjani te kera te šaj te ova amala e Isusea, hem soske adava tano važno?

¹¹ 2) Razmislin hem postapin sar o Isus. Kobor pošukar haljovaja sar razmislinela o Isus hem kobor poviše amen korkori razmislinaja sar leste, doborom popaše amala ka ova lea (1. Kor. 2:16). Na primer, sine leske považno te pomožinel e javerenge nego te ugodinel peske (Mat. 20:28; Rim. 15:1-3). Adaleske so sine le asavko stavi, ov sine samopožrtvuvano hem spremno prostinela sine. Na vredžinela pe sine sigate keda o manuša kerena sine lošno lafi baši leste (Jovan 1:46, 47). Hem na dozvolingja i greška nekaskiri so kergja la angleder te vlijajnel upro leskoro stavi sprema adava manuš (1. Tim. 1:12-14). O Isus vakergja: „Taro adava sarine ka džanen kaj sien mle učenikija, ako isi tumen mangipe maškar tumende“ (Jovan 13:35). Šukar tano te puče tut: „Dali džava palo primer e Isuseskoro agjaar so kerava sa so šaj te ovav šukar amal mle phralenge hem phenjenge?“

12. Koja tani i trito buti so valjani te kera te šaj te ova amala e Isusea?

¹² 3)Poddržin e Hristoseskere phralen. Keda keraja nešto leskere phralenge, o Isus ko adava dikhela sar ka phene adava kergjem le lično leske (Mat. 25:34-40). O glavno način sar poddržinaja e pomazanikon tano agjaar so daja sa amendar te šaj te propovedina hem te sikava e javeren bašo Carstvo, sprema i zapoved so dengja o Isus (Mat. 28:19, 20; Dela 10:42). Samo adaleske so pomožinena len o „javera bakhre“, e Hristoseskere phralja šaj te keren akaja aktivnost koja so avdive sa poviše bajrola ko celo sveto (Jovan 10:16). Ako tu da sian ki akaja grupa, sekogaš keda sian ki služba sikavea tlo mangipe na samo sprema o pomazime hristijanja nego hem sprema o Isus.

13. Sar šaj te primenina e Isuseskoro sovet soj pišimo ko Luka 16:9?

¹³ Šaj te kera amenge amalipe e Jehovaja hem e Isusea agjaar so ka koristina amare materijalna sredstvija te šaj te poddržina i aktivnost koja so ola vodinena la avdive. (Čitin Luka 16:9.) Na primer, šaj te da dobrovolna prilogija baši aktivnost so kerela pe ko celo sveto. Ola koristinena pe te finansirinel pe o propovedibe bašo šukar haberi ko dur thana, te keren pe hem te održinen pe o teokratska objektija hem te del pe materijalno pomoš e phralenge soj pogodime taro prirodna katastrofe ili taro javera katastrofe. Šaj te da prilogija te učharen pe o trošakija ko amaro sobranie, a isto agjaar šaj lično te da okolenge kaske so džanaja kaj valjani materijalno pomoš (Izr. 19:17). Ko akala načinija, ustvari poddržinaja e Hristoseskere phralen.

14. Sprema Efešanite 4:15, 16, koja tani i štarto buti so valjani te kera te šaj te ova amala e Isusea?

¹⁴ 4) Poddržin sa adava so kerela e Jehovaskiri organizacija. Ovaja popaše e Isusea sar poglavari e sobranieskoro keda sorabotinaja okolencar so čhivgja len te grižinen pe amenge. (Čitin Efešanite 4:15, 16.) Na primer, akana trudinaja amen sa amare dvorane te koristinen pe najšukar so šaj. Adaleske, nesave sobranija sine spojme javerencar, hem sine kerde soodvetna promene ko sobraniska podračja propovedibaske. Agjaar, i organizacija uspejngja te štedinel but taro dobrovolna prilogija.  Ama, akava značinela sine kaj nesave phralja hem phenja ka valjani te prilagodinen pe ko neve okolnostija. Adala objavitelija beršencar verno služingje ko jekh isto sobranie hem ule but paše e phralencar hem e phenjencar taro adava sobranie. Ama akana tane zamolime te služinen ko javer sobranie. O Isus sigurno tano but bahtalo keda dikhela sar adala verna sluge spremno poddržinena akaja odluka!

15. Savo ka ovel amaro amalipe e Isusea ki idnina, hem soske?

¹⁵ Okola soj pomazime e sveti duhoja isi len nadež kaj ka oven e Isusea zasekogaš, hem kaj ka vladinen zaedno lea ko e Devleskoro Carstvo. Ola čače ka oven e Hristosea — ka dikhen le, ka keren lea lafi hem ka nakhaven zaedno vreme lea (Jovan 14:2, 3). Ama, ov ka sikavel mangipe hem griža okolenge da so isi len nadež te živinen večno ki Phuv. Iako nane te dikhen e Isuse, ola ka oven sa popaše amala lea džikote uživinena ko čačutno životo kova so ov hem o Jehova ka del len (Isa. 9:6, 7).

16. Kola bereketija isi amen adaleske so siem amala e Isusea?

¹⁶ Keda prifatinaja e Isuseskiri pokana te ova leskere amala, amen dobinaja but bereketija. Panda akana osetinaja leskoro mangipe hem leskiri pomoš. Osven adava, isi amen prilika te živina večno. Hem najvažno taro sa, ako siem amala e Isusea, ka ovel amen o najbaro barvalipe so šaj — paše amalipe leskere Dadea, e Jehovaja. Čače tani bari čest te ova e Isuseskere amala!