1. I yini leswi u swi yentxaka akuva u yaka wunghanu ni mhunu wa kukazri?

HI NTOLOVELO, ntxhumu wa ku sungula lowu u wu yentxaka akuva u yaka wunghanu ni mhunu wa kukazri i ku heta nkama na yene. Loko mi bulisana, mi byelana leswi mi swi pimisaka ni leswi mi titwisaka xiswone, mi ndzruluka vanghanu. Kambe loko swi ya ka ku yaka wunghanu na Yesu, swi pfa swi nga hi nabyaleli. Ha yini?

2. Hi xini xikazratu xa ku sungula lexi hi nga naxu?

² Xikazratu xa ku sungula hi leswaku a hi ngi ngi vonana na Yesu hi ku kongoma. Ntalu wa vakriste lava hanyiki a masikwini ya vapostola na vone a va mu vonanga. Nambitanu, mupostola Petro a tsrale leswi ha vone: ‘Lwe n’wi mu zrandzraka nambi n’wi nga mu vonanga; n’wi pfumelaka ku yene, nambi n’wi nga mu voni swoswi.’ (1Pe 1:8, Testamente Ledrimpswha Ni Mapsalma) Xileswo, swa koteka ku va ni wunghanu lebyikulu na Yesu nambi leswi hi nga samangakiki hi mu vona hi ku kongoma.

3. Hi xini xikazratu xa wubidzri lexi hi nga naxu?

³ Xikazratu xa wubidzri hi leswaku a hi swi koti ku vulavula na Yesu. Loko hi khongota hi bulisana na Yehovha. I ntiyiso leswaku hi khongota hi vito dzra Yesu, kambe a hi khaneli na Yesu. Nakunene, Yesu a nga swi djuli leswaku hi khongota ka yene. Ha yini? Hikusa xikhongoto i xiyentxo xa wugandzreli, nakone ko va Yehovha ntsena lweyi a fanekeliwaka ku gandzreliwa.  (Mt 4:10) Nambitanu, hi nga komba Yesu lizrandzru dzrezru.

4. Hi xini xikazratu xa wuzrazru, nakone hi ta bula hi yini ka nhloko-mhaka leyi?

⁴ Xikazratu xa wuzrazru hi leswaku Yesu a tsrhama matilweni, xileswo a hi nge swi koti ku va na yene hi ku kongoma. Kambe hi nga swi kota ku tiva swinyingi ha Yesu na hi nga zanga hi va na yene hi ku kongoma. Hi ta pfuxeta mune wa mintxhumu leyi hi nga yi yentxaka akuva hi tiyisa wunghanu byezru na yene. Kambe a hi zrangeni hi kambisisa leswaku ha yini swi li swa lisima ku yaka wunghanu bya le kusuhi na Kriste.

5. Hi swini swin’we swa swivangelo swa lisima swa ku va hi va vanghanu va Yesu? (Vona ni bokisi ledzri liki “ Ku Va Vanghanu Va Yesu Swi Hi Yentxa Vanghanu Va Yehovha” xikan’we ni ledzri liki “ Vonela Ledzri Dzringaniseliwiki Mayelanu Ni Xiyimu Xa Yesu”.)

⁵ Loko hi djula ku va ni wuxaka lebyinene na Yehovha, hi fanela ku va vanghanu va Yesu. Ha yini? Vona swivangelo swibidzri. Xa ku sungula, Yesu a byele leswi vadondzrisiwa vakwe: ‘Tatana hi ntshima yakwe a n’wi zrandzra, hi leswi n’wine n’wi ndzri zrandzriki.’ (Yh 16:27) A tlhele a ku: ‘A ku na mhunu lwa taka ku Tatana loko ku nge ha mine.’ (Yh 14:6) Ku dzringisa ku va munghanu wa Yehovha na hi nga yakanga wunghanu na Yesu swi fana ni ku dzringisa ku nghena ndlwini na u nga tizrisi xipfalu. Yesu a tizrise xifananiso lexi fanaka loko a titlhamuxela swanga ‘nyangwa wa tihamba’. (Yh 10:7) Xivangelo xa wubidzri hi leswaku Yesu a yetisele hi ku helela wumhunu bya Tatana wakwe. A byele leswi vadondzrisiwa vakwe: ‘Lweyi a ndzri voniki, a voni Tatana.’ (Yh 14:9) Xileswo ndlela ya lisima leyi hi nga tivaka Yehovha ha yone i ku dondzra hi wutomi bya Yesu. Loko hi ya hi dondzra ha  Yesu, a lizrandzru dzrezru ha yene dzri ta ya dzri kula. Nakone nkama lowu lizrandzru dzrezru ha Yesu dzri yaka dzri kula, lizrandzru dzrezru hi Tatana wakwe dzri ta ya dzri kulisisa.

6. Hi xini xivangelo xin’wana xa ku va hi va vanghanu va Yesu? Tlhamuxela.

⁶ Hi fanela ku va vanghanu va Yesu akuva swikhongoto swezru swi hlamuliwa. Leswo swi tlhamuxela leswaku hi fanela ku yentxa swa ku tlula ku hlaya ntsena leswaku “hi vito dzra Yesu” a swikhongotweni swezru. Hi fanela ku twisisa leswaku Yehovha a mu tizrisa hi ndlela yini Yesu akuva a hlamula swikhongoto swezru. Yesu a byele vapostola vakwe a ku: ‘Nambi n’wi ta kombela yini na yini hi vito dzranga, ndzri ta swi yentxa.’ (Yh 14:13) Nambi leswi Yehovha a nga yene ntsena muyingeli wa swikhongoto, a nyike Yesu wutihlamuleli bya ku hetisisa swiboho Swakwe. (Mt 28:18) Xiya leswi yentxekaka loko hi khongota ka Yehovha hi kombela ku dzrivaleliwa swidoho swezru. Na a nga si na hi dzrivalela, a zranga a xiya leswaku ha xi yingiseta kumbe im-him xilayu lexi Yesu a hi nyikiki xone mayelanu ni ku dzrivalela van’wana. Yesu a te: ‘Loko n’wi dzrivalela vhanu a swidoho swavu, Tatana wenu wa le tilweni a ta n’wi dzrivalela na n’wine; kambe loko n’wi nga dzrivaleli vhanu a swidoho swavu, Tatana wenu a nga ka a nga n’wi dzrivaleli swidoho swenu.’ (Mt 6:14, 15) Ha swi vona ke, leswaku i swa lisima swinene ku va hi khoma van’wana hi ndlela leyi Yehovha na Yesu va hi khomaka ha yone!

7. I vamani lava taka pfuneka hi xitlhavelo xa xitizrulo xa Yesu?

⁷ Ko va ntsena lava nga ni wunghanu lebyikulu na Yesu va taka pfuneka hi xitlhavelo xa xitizrulo. Hi swi tivisa kuyini? Yesu a hlaye leswaku a a ta ‘nyikela wutomi byakwe hi kola ka vanakulozri’. (Yh 15:13, TLM) Swi ta djula leswaku vhanu va ku dumbeka lava hanyiki na Yesu a nga si ta lani misaveni va dondzra ha yene ni ku tlhela va mu zrandzra. Vavanuna ni vavasati va ku fana na Abrahamu na Sara, Moxe na Rahabe va ta pfuxiwa, kambe swi ta djula leswaku na wone malandzra lawo ya ku dumbeka ya Yehovha ma yaka wunghanu na Yesu akuva ma ta kuma wutomi lebyi nga helikiki.​—Yh 17:3; Min 24:15; Hb 11:8-12, 24-26, 31.

8-9. Hi lani swi tlhamuxeliwiki ha kone ka Yohan 15:4, 5, i yini leswi hi nga kotaka ku swi yentxa loko hi li vanghanu va Yesu, nakone ha yini swi li swa lisima?

⁸ Hi ni ku nyonxa lokukulu hi ku tizrisana na Yesu ka ku zrezra ni ku dondzrisa madzrungula lamanene ya Mfumu. Loko Yesu a ha li lani misaveni, a a li mudondzrisi. Nakone nkama a nga tlhelela matilweni, Yesu, swanga nhloko ya bandla, a ye mahlweni a kongomisa ntizro wa ku zrezra ni wa ku dondzrisa. Yene awa yi vona ni ku tlhela a yi nyika lisima minzamu yaku ya ku pfuna vhanu va ku tala hi lani u nga kotaka ha kone akuva va tiva yene ni Tatana wakwe. Nakunene, ntizro lowu hi nga kota ku wu hetisisa ntsena hi ku pfuniwa hi Yehovha na Yesu.​—Dondzra Yohan 15:4, 5.

⁹ Zritu dzra Xikwembu Nkulukumba dzri swi dondzrisa hi ku khanya leswaku hi fanela ku va ni lizrandzru ha Yesu hi tlhela hi dzri hlayisa akuva hi nyonxisa Yehovha. A hi voneni mune wa mintxhumu leyi hi nga yi yentxaka akuva hi va vanghanu va Yesu.

10. Hi wini ntxhumu wa ku sungula lowu hi fanelaka ku wu yentxa akuva hi yaka wunghanu na Yesu?

¹⁰ 1) Dondzra ha Yesu. Leswo hi nga swi yentxa hi ku dondzra mabuku ya Bibele ya Mattheo, Marka, Luka na Yohan. Loko hi yanakanyisisa hi wudzrunguli lebyi nga ka mabuku  lawo, hi ta mu zrandzra hi tlhela hi mu hlonipha hi ku vona ndlela leyi a a va khoma ha yone vhanu. Hi xikombiso, nambi leswi a a li N’winyi wavu, a nga khomanga vadondzrisiwa vakwe swanga swikazrawa. A matsrhan’wini ya leswo, a va paluxele leswi a a swi pimisa ni leswi a a titwisa xiswone. (Yh 15:15) Loko va li ku dzrileni, Yesu a a dzrila navu. (Yh 11:32-36) Nambi vakaneti vakwe a va swi tiva leswaku yene a a li munghanu wa lava a va yingiseta dzrungula dzrakwe. (Mt 11:19) Loko hi yetisela ndlela leyi Yesu a a va khoma ha yone vadondzrisiwa vakwe, hi kota ku yampswisa wuxaka byezru ni vhanu van’wana, hi titwa na hi nyonxile swinene, nakone lizrandzru ni xihlonipho lexi hi nga na xone hi Yesu swi ya swi kula swinene.

11. Hi wini ntxhumu wa wubidzri lowu hi fanelaka ku wu yentxa akuva hi yaka wunghanu na Yesu, nakone ha yini wu li wa lisima?

¹¹ (2) Yetisela mapimisela ni swiyentxo swa Yesu. Loko hi ya hi ma tiva ku yampswa mapimisela yakwe hi tlhela hi ma yetisela, a wunghanu byezru na yene byi ta ya byi kula. (1Ko 2:16) Xana hi nga mu yetisela hi ndlela yini Yesu? Vona xikombiso xin’we. Yesu a a zron’weka ngopfu hi ku pfuna van’wana a matsrhan’wini ya ku va lweyi a titsrhavisaka. (Mt 20:28; Ro 15:1-3) Leswi a a pimisa hi ndlela leyi, a a tikazrata hi nkonta ya van’wana nakone a a va dzrivalela. A a nga hatli a hlundzrukisiwa hi leswi vhanu a va swi hlaya mayelanu na yene. (Yh 1:46, 47) Nakone a a nga pfumeleli swihoxo leswi vhanu va samiki va swi yentxa swi kutxetela ndlela leyi a a va vona ha yone. (1Tm 1:12-14) Yesu a te: ‘Hinkwavu va ta tiva leswaku n’wi vadondzrisiwa vanga, loko n’wi zrandzrana.’ (Yh 13:35) I swinene ku tivutisa leswi: ‘Xana na xi yetisela xikombiso xa Yesu hi ku yentxa hinkwaswu leswi ni nga swi kotaka akuva ni hlayisa ku zrula ni vamakwezru?’

12. Hi wini ntxhumu wa wuzrazru lowu hi fanelaka ku wu yentxa akuva hi va vanghanu va Yesu, nakone hi nga wu yentxisa kuyini?

¹² (3) Seketela vamakwavu va Kriste. Yesu a vona leswi hi swi yentxelaka vamakwavu lava totiwiki swanga hi loko hi swi yentxela yene hi ku kongoma. (Mt 25:34-40) Ndlela ya lisima swinene leyi hi seketelaka vatotiwa ha yone i ku yentxa hinkwaswu leswi hi nga swi kotaka akuva hi zrezrela van’wana ni ku va dondzrisa, hi lani Yesu a hi byeliki ha kone. (Mt 28:19, 20; Min 10:42) Ko va ntsena hi ku pfuniwa hi lava ‘tihamba tin’wanyana’, lani vamakwavu va Kriste va nga kotaka ku hetisisa ntizro lowukulu swinene wa ku zrezra lowu yentxiwaka swoswi a misaveni hinkwayu. (Yh 10:16) Loko u li mun’we wa lava tihamba tin’wanyana, nkama wun’wana ni wun’wana lowu u hlengelaka a ntizrweni lowu, u kombisa lizrandzru dzraku hi vamakwavu va Kriste ni le ka Yesu hi ku kongoma.

13. Hi nga xi tizrisisa kuyini xilayu xa Yesu lexi kumekaka ka Luka 16:9?

¹³ Hi nga tlhela hi yentxa wunghanu na Yehovha na Yesu hi ku tizrisa a timali tezru akuva hi seketela ntizro lowu va wu kongomisaka. (Dondzra Luka 16:9.) Hi xikombiso, hi nga yentxa minyikelo akuva hi seketela ntizro wa misava hinkwayu, minyikelo yoleyo yi tizriseliwa ku pfunisa ntizro wa ku zrezra madzrungula lamanene a mimbangwini ya le kule, ku yaka ni ku pfuxeta tiyindlu ta wugandzreli bya ntiyiso, ni ku kuma mintxhumu ya ku pfuna lava weliwiki hi timhangu ta ntumbuluku. Hi nga ha tlhela hi seketela bandla dzrezru hi timali ni ku pfuna lava hi xiyaka leswaku va vilela ku pfuniwa. (Pr 19:17) Leti hi tone tindlela leti hi nga seketelaka vamakwavu va Kriste ha tone.

14. Hi lani swi kombisiwiki ha kone ka Ba-le-Efesa 4:15, 16, hi wini ntxhumu wa wumune lowu hi fanelaka ku wu yentxa akuva hi va vanghanu va Yesu?

 ¹⁴ (4) Seketela malulamiselo ya bandla dzra wukriste. Hi kulisa wunghanu byezru na Yesu, lweyi a nga nhloko ya bandla, loko hi tizrisana ni lava a va bekiki akuva va hi kongomisa. (Dondzra Ba-le-Efesa 4:15, 16.) Hi xikombiso, swoswi hi lwela ku tiyiseka leswaku ha ti tizrisa ha hombe Tiyindlu ta Mfumu. Akuva hi kota leswo, mabandla man’wana ma tlhanganisiwile nakone mindzrilakana ya nsimu leyi hi tizrelaka ka yone yi txintxiwile. Malulamiselo lawo ma yentxe leswaku nhlengeletanu yi kota ku popara mali yinyingi leyi nyikeliwaka a nhlengeletanwini ya Yehovha. Kambe leswo, hi nkama wun’we, swi djule leswaku vazrezri van’wana va titwananisa ni swiyimu leswimpswha. Vazrezri volavo va ku dumbeka va nga ha va va tizrele a bandleni dzra kukazri hi malembe ya ku tala nakone swi nga yentxeka va kulele kusuhi ni vamakwezru va bandla dzroledzro. Kambe swoswi va kombeliwa ku ya tizrela a bandleni dzrin’wana. Yesu a nyonxa swinene loko a vona vadondzrisiwa volavo va ku dumbeka na va seketela malulamiselo lawo!

15. Xana wunghanu byezru na Yesu byi ta ya byi kula hi ndlela yini a nkameni lowu taka?

¹⁵ Lava totiwiki hi moya wa ku xwenga va ni dumbo dzra ku ya va na Yesu hi la ku nga helikiki, va fuma na yene a Mfun’wini wa Xikwembu Nkulukumba. Va ta va na yene hi le kusuhi​—va mu vona, va bula na yene ni ku tlhela va heta nkama na yene. (Yh 14:2, 3) Na vone lava nga ni dumbo dzra ku hanya lani misaveni, Yesu a ta va komba lizrandzru a tlhela a va londzrisa. Nambi leswi va kalaka va nga ti mu vona Yesu, wunghanu byavu na yene byi ta ya byi tiya na va li kazri va tikholisa hi wutomi lebyi Yehovha na Yesu va va nyikiki byone.​—Eza 9:6, 7.

16. Hi wani matovoko lawa hi ma kumaka hi ku va vanghanu va Yesu?

¹⁶ Loko hi yamukela xizrambu xa Yesu xa ku va vanghanu vakwe, hi kuma matovoko manyingi. Hi xikombiso, hi kota ku zrandzriwa ni ku seketeliwa ha yene swoswi. Hi nyikiwa mukhandlu wa ku hanya hi la ku nga helikiki. Nakone xa lisima swinene, wunghanu byezru na Yesu byi hi pfuna ku kuma ntxhumu wa lisima swinene ku tlula hinkwayu​—ku nga wunghanu bya le kusuhi swinene ni Tatana wa Yesu, Yehovha. I ndjombo yikulu ku vitaniwa vanghanu va Yesu!