1. Nyen la mo yeke sara ti lë kpengba songo ti kamarade na mbeni zo?

MINGI ni, kozo ye so mo yeke sara ti lë kpengba songo ti kamarade na mbeni zo so mo tingbi na lo ayeke ti mû ngoi ti duti na zo ni. Na ngoi so ala yeke sara lisoro na mba, ala fa na mba apensé ti ala nga na aye so asi na ala, ala yeke ga akamarade. Me tongana e ye ti lë kpengba songo ti kamarade na Jésus, e yeke wara akpale. Ambeni kpale ni ayeke so wa?

2. Kozo kpale ti lë kpengba songo ti kamarade na Jésus ayeke so wa?

² Kozo kpale ni ayeke so e wara terê na Jésus lâ oko ape. A yeke nga lani tongaso na aChrétien mingi so ayeke na fini na ngoi ti abazengele. Atâa so kue, bazengele Pierre atene: “Atâa so ala bâ lo lâ oko pëpe, ala ndoye lo. Atâa so ala yeke bâ lo fadeso pëpe, ala mä na bê na lo.” (1 Pi. 1:8). Tongaso, lege ayeke dä ti lë kpengba songo ti kamarade na Jésus sân ti wara terê na lo.

3. Use kpale ti lë kpengba songo ti kamarade na Jésus ayeke so wa?

³ Use kpale ni ayeke so e peut ti sara tënë na Jésus ape. Na ngoi so e yeke sambela, e yeke sara tënë na Jéhovah. Tâ tënë, e yeke sambela na iri ti Jésus me e yeke sara tënë droit na lo ape. Ti tâ tënë ni, Jésus aye pëpe ti tene e sambela lo. Ngbanga ti nyen? Ngbanga ti so sambela ayeke mbeni lege ti vorongo Nzapa, na e doit ti voro gï Jéhovah oko (Mat. 4: 10). Me atâa so kue, e lingbi ti fa so e ye Jésus.

4. Ota kpale ti lë kpengba songo ti kamarade na Jésus ayeke so wa? Nyen la e yeke bâ na yâ ti article so?

⁴ Ota kpale ni ayeke so Jésus ayeke na yayu, tongaso e lingbi pëpe ti mû ngoi ti duti na terê ti lo. Me e lingbi ti gi ti hinga ye mingi na ndö ti Jésus sân ti duti na terê ti lo. E yeke bâ aye osio so e lingbi ti sara ti kpengba songo ti kamarade ti e na lo. Me kozoni, zia e bâ ndani so a yeke kota ye ti lë kpengba songo ti kamarade na Christ.

5. Ngbanga ti nyen la a lingbi e duti akamarade ti Jésus? (Bâ nga a-encadré “ Dutingo kamarade ti Jésus ayeke gue na zo ti duti kamarade ti Jéhovah” nga na “ Nzoni bango ndo na ndö ti kua ti Jésus.”)

⁵ Tongana e ye ti duti na nzoni songo na Jéhovah, a lingbi e duti akamarade ti Jésus. Ngbanga ti nyen? Bâ gï araison use. Kozo ni, Jésus atene na adisciple ti lo, atene: “Babâ wani aye ala mingi ngbanga ti so ala ye mbi mingi.” (Jean 16:27). Lo tene nga lo tene: “Zo oko alingbi ti ga na Babâ na mbeni lege nde pëpe, gï na lege ti mbi.” (Jean 14:6). Ti gi ti duti kamarade ti Jéhovah sân ti lë kpengba songo ti kamarade na Jésus ayeke tongana gingo ti lï na yâ ti mbeni da sân ti lï na porte ti da ni. Jésus asara lani kua na mara ti toli so na ngoi so lo fa so lo yeke “yanga ti gbagba so ataba ni ayeke hon dä.” (Jean 10:7). Use raison ni ayeke so Jésus amû tâ gï tapande ti asarango ye ti Babâ ti lo. Lo tene na adisciple ti lo, lo tene: “Zo so abâ mbi abâ nga Babâ awe.” (Jean 14:9). Tongaso, mbeni kpengba lege ti hinga Jéhovah ayeke ti manda ye na ndö ti fini ti Jésus. Tongana e yeke manda ye na ndö ti Jésus, e yeke ye lo mingi. Nga, tongana songo ti e na Jésus ayeke kpengba, e yeke ye Babâ ti lo mingi.

6. Mbeni raison nde so ndali ni a lingbi e duti na songo na Jésus ayeke so wa? Fa ndani so mo tene tongaso.

 ⁶ A lingbi e duti na songo na Jésus tongaso si Jéhovah akiri tënë na asambela ti e. Ye so aye ti tene so a lingbi e sara aye mingi ahon gï ti tene “na iri ti Jésus” na hunzingo ti asambela ti e. A lingbi e hinga tongana nyen la Jéhovah ayeke sara kua na Jésus ti kiri tënë na asambela ti e. Jésus atene na abazengele ti lo, atene: “Aye kue so ala hunda na iri ti mbi, mbi yeke sara ni.” (Jean 14:13). Atâa so Jéhovah la ayeke lo so ayeke mä asambela ti e nga lo yeke kiri tënë na ni, lo mû komandema na Jésus ti sara ye alingbi na adesizion ti lo (Mat. 28:18). Tongaso, kozo ti tene Nzapa akiri tënë na asambela ti e, lo yeke bâ wala e sara ye alingbi na wango so Jésus amû. Na tapande, Jésus atene: “Tongana ala pardonné afaute ti azo, Babâ ti ala so ayeke na yayu ayeke pardonné ala nga. Me tongana ala pardonné afaute ti azo pëpe, Babâ ti ala ayeke pardonné ande afaute ti ala nga pëpe.” (Mat. 6:14, 15). Tongaso, a yeke kota ye mingi ti tene e sara ye na mbage ti amba ti e na nzoni bê tongana ti so Jéhovah na Jésus ayeke sara ye na mbage ti e.

7. Azo wa la ayeke bâ nzoni na lege ti ye so a futa ti zi azo?

⁷ Gï azo so ayeke na kpengba songo ti kamarade na Jésus la ayeke bâ nzoni na lege ti ye so a futa ti zi azo. E hinga ni tongana nyen? Jésus atene so lo yeke ‘kä fini ti lo na kuâ ndali ti akamarade ti lo’. (Jean 15:13). Azo so ayeke lani be-ta-zo na Jéhovah na so ayeke lani na fini kozo si Jésus aga na sese adoit ande ti manda ye na ndö ti Jésus nga ti ye lo. Azo so, na tapande Abraham, Sara, Moïse nga na Rahab, ayeke zingo ande na kuâ, me même awakua ti Jéhovah so ayeke ande na bezoin ti lë kpengba songo ti kamarade na Jésus tongaso si ala wara fini ti lakue lakue.—Jean 17:3; Kus. 24:15; aHéb. 11:8-12, 24-26, 31.

8-9. Tongana ti so a fa na Jean 15:4, 5, songo ti e na Jésus amû lege na e ti sara nyen? Ngbanga ti nyen la a yeke kota ye ti ngbâ ti duti beoko na Jésus?

⁸ E yeke na ngia ti sara kua maboko na maboko na Jésus ti sara kua ti fango tënë nga ti fango ye na azo na ndö ti nzoni tënë ti Royaume. Na ngoi so Jésus ayeke lani na sese, lo yeke lani wafango ye. Ngbene ye na ngoi so Jésus, so ayeke mokonzi ti congrégation, akiri na yayu, lo ngbâ ti mû li ni na kua ti fango tënë nga na ti fango ye. Lo bâ angangu so mo sara ti mû maboko na azo mingi ti hinga lo nga na Babâ ti lo nga lo bâ ni na nene ni. Biani, a yeke gï na lege ti mungo maboko ti Jéhovah na Jésus la e lingbi ti sara kua so.—Diko Jean 15:4, 5.

⁹ Bible afa na e polele so a lingbi e ye Jésus nga a lingbi e ngbâ ti ye lo tongaso si e zia ngia na bê ti Jéhovah. Tongaso, zia e bâ aye osio so e lingbi ti sara ti ga akamarade ti Jésus.

10. Kozo ye so a lingbi e sara ti lë songo ti kamarade na Jésus ayeke so wa?

¹⁰ (1) Gi ti hinga Jésus. E lingbi ti hinga Jésus na lege so e diko mbeti ti Matthieu, ti Marc, ti Luc nga na ti Jean. Tongana e gbu li na ndö ti ambaï ti Bible na ndö ti fini ti Jésus, e yeke ye lo nga e yeke ne lo ndali ti so lo sara ye lani na azo na nzoni bê. Na tapande, atâa so lo yeke lani Maître ti adisciple ti lo, lo sara ye na ala pëpe tongana angbâa. Me lo fa na ala apensé ti lo nga na atënë ti bê ti lo (Jean 15:15). Na ngoi so ala yeke na vundu, Jésus kue ayeke na vundu nga lo toto legeoko na ala (Jean 11:32-36). Même awato ti lo ahinga so lo yeke kamarade ti azo so ayeda na tënë so lo fa (Mat. 11:19). Tongana e mû  tapande ti fason so Jésus asara na ye na mbage ti adisciple ti lo, songo ti e na amba ti e ayeke ga nzoni ahon ti kozo, e yeke duti na ngia mingi nga e yeke kiri singila mingi na Christ.

11. Use ye so a lingbi e sara ti lë songo ti kamarade na Jésus ayeke so wa? Ngbanga ti nyen la a yeke kota ye?

¹¹ (2) Pensé tongana Jésus nga sara ye tongana lo. Tongana e hinga nzoni fason so Jésus ayeke pensé na ni nga e pensé tongana lo, songo ti kamarade ti e na lo ayeke kpengba mingi (1 aCor. 2:16). Tongana nyen la e lingbi ti sara ye tongana Jésus? Bâ gï mbeni tapande oko. Jésus apensé lani mingi na ndö ti mungo maboko na azo ahon gingo ti nzere na lo wani (Mat. 20:28; aRom. 15:1-3). Ndali ti so lo yeke pensé lani tongaso, lo gi gï nzoni ti lo wani ape nga lo yeke pardonné zo. Lo yeke sara lani ngonzo hio ape ndali ti atënë so azo atene na terê ti lo (Jean 1:46, 47). Nga lo zia lani pëpe si afaute so azo asara ândö asara ngangu na ndö ti bango ndo ti lo na ndö ti ala (1 Tim. 1:12-14). Jésus atene: “Azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:35). A yeke nzoni mo hunda terê ti mo: “Eskê mbi sara ye tongana Jésus na lege so mbi sara kue ti ngbâ ti duti na siriri na aita?”

12. Ota ye so a lingbi e sara ti lë songo ti kamarade na Jésus ayeke so wa? E lingbi ti sara ni tongana nyen?

¹² (3) Mû maboko na aita ti Christ. Jésus abâ aye so e sara ndali ti aita ti lo so a soro ala ti gue na yayu tongana aye so e sara na lo (Mat. 25:34-40). Kota ye so e yeke sara ti mû maboko na ala ayeke ti tene na ngangu ti e kue e sara kua ti fango tënë ti Royaume nga ti sarango adisciple so Jésus amû yanga na adisciple ti lo ti sara (Mat. 28:19, 20; Kus. 10:42). A yeke gï na mungo maboko ti “ambeni taba” la aita ti Christ ayeke sara laso kota kua ti fango tënë na yâ ti dunia kue (Jean 10:16). Tongana mo yeke oko ti ambeni taba, na ngoi kue so mo yeke fa tënë, mo yeke fa so mo ye aita so a soro ala ti gue na yayu nga na Jésus.

13. Tongana nyen la e lingbi ti sara ye alingbi na wango ti Jésus so ayeke na Luc 16:9?

¹³ E yeke ga nga akamarade ti Jéhovah na ti Jésus tongana e yeke mû nginza ti mû maboko na kua so ala yeke mû li ni dä. (Diko Luc 16:9.) Na tapande, e lingbi ti mû nginza ndali ti kua ti fango tënë na yâ ti dunia kue. A yeke sara kua na nginza so ti mû maboko na kua ti fango tënë na ando so ayo mingi, ti leke ada so a yeke sara kua ti Jéhovah dä nga ti bâ lege ni nga ti mû maboko na azo so aperdre aye ti ala ndali ti akpale tongana ngu so asuku amû ndo. E lingbi nga ti mû nginza ti mû maboko na congrégation ti e nga ti mû maboko na azo so e wani e hinga so ala yeke na bezoin ti mungo maboko (aProv. 19:17). So ayeke ambeni lege so e lingbi ti mû maboko na aita ti Christ la.

14. Tongana ti so aÉphésien 4:15, 16 afa, osio ye so a lingbi e sara ti lë songo ti kamarade na Jésus ayeke so wa?

¹⁴ (4) Sara ye alingbi na aye so a leke na yâ ti bungbi ti Jéhovah. Songo ti e na Jésus, mokonzi ti congrégation, ayeke kpengba mingi tongana e sara kua maboko na maboko na aita so a zia ala ti bâ lege ti e. (Diko aÉphésien 4:15, 16.) Na tapande, e yeke gi ti tene wungo ti azo so ayeke sara bungbi na yâ ti aDa ti Royaume kue alingbi na wungo so a leke ni ndali ni. Ti sara ni, a bungbi ambeni congrégation aga oko nga a changé alimite ti ambeni territoire. Lekengo ye so asara si bungbi ti Jéhovah abata mingi ti nginza so azo amû na offrande. Me na oko ngoi ni, a hunda ti tene ambeni wafango tënë asara achangement ti lingbi na afini ye so a leke so. Peut-être awafango tënë so ayeke be-ta-zo so ayeke na yâ ti mbeni congrégation angu mingi  awe nga peut-être ala yeke na kpengba songo na aita ni. Me fadeso, a hunda na ala ti gue na mbeni congrégation nde. A nzere na Jésus mingi ti bâ adisciple be-ta-zo so asara ye alingbi na aye so a leke so.

15. Tongana nyen la songo ti kamarade ti e na Jésus ayeke kpengba mingi na yâ ti angoi so ayeke ga?

¹⁵ Ala so a soro ala na lege ti yingo vulu ti gue na yayu ayeke na beku ti duti na terê ti Jésus teti lakue lakue, ala yeke komande legeoko na lo na yâ ti Royaume ti Nzapa. Ala yeke duti ande biani na terê ti Christ. Ala yeke bâ lo, ala yeke sara lisoro na lo nga ala yeke mû ngoi ti duti na terê ti lo (Jean 14:2, 3). Azo so ayeke wara fini ande na ndö ti sese nga Jésus ayeke ye ala nga lo yeke bâ lege ti ala. Atâa so ala yeke bâ Jésus ape, songo ti ala na lo ayeke kpengba ahon ti kozo na ngoi so gigi so Jéhovah na Jésus amû na ala ayeke nzere na ala.—És. 9:6, 7.

16. Aye ti nzoni wa la e wara na lege ti songo ti kamarade ti e na Jésus?

¹⁶ Tongana e yeda na tisango ndo ti Jésus ti ga akamarade ti lo, e yeke wara aye ti nzoni mingi. Na tapande, laso lo ye e nga lo yeke mû maboko na e. E yeke na pasa ti wara fini ti lakue lakue. Nga, ye so ayeke kota mingi ayeke so songo ti e na Jésus ayeke gue na e ti lë kpengba songo ti kamarade na Jéhovah, Babâ ti Jésus. So ayeke mbeni songo ti kamarade so ayeke nzoni mingi ahon atanga ni kue. A yeke biani mbeni pasa ti tene Jésus airi e akamarade ti lo!