1. Ino ty mila ataonao laha maniry hinama marìny amin’olo raiky iha?

LAHA maniry hinama marìny amin’olo raiky vo nihitanao iha, le matetiky mila manoka fotoa hiaraha aminy tse. Lafa miresaky nareo, mifampizara ty am-ponareo noho an-tsainareo ao, le manjary mpinama. Fe misy raha sarotsy mety hatrehintsika laha maniry hinama marìny amy Jesosy tsika. Ino iaby ohatsy?

2. Ino ty raha sarotsy voalohany atrehintsika?

² Ty raha sarotsy voalohany le hoe tsy nahita maso ani-Jesosy tsika. Maro koa ty Kristiana nanahaky ani-zay tamy taonjato voalohany. Fe toy ty raha nihitani-apostoly Petera: “Ndre mbo tsy nahita azy mihintsy nareo, le tea azy. Ndre tsy mahita azy nareo henanizao, le mino azy.” (1 Pet. 1:8) Midika zay fa afaky mifandramby marìny amy Jesosy avao tsika ndre tsy nahita maso azy.

3. Ino ty raha sarotsy faharoe atrehintsika?

³ Ty raha sarotsy faharoe le hoe tsy afaky miresaky amy Jesosy tsika. Lafa tsika mivavaky, le miresaky ty eritseritsintsika amy Jehovah. Marina fa ataontsika amy anarani-Jesosy ty vavaky ataontsika, fe tsy afaky miresaky aminy mivanta tsika. Sady tsy teani-Jesosy hivavaky aminy koa tsika. Fa manino? Satria anatini-fanompoam-pivavaha ty vavaky, le Jehovah  raiky avao ro tokony hotompoentsika. (Mat. 4:10) Fe ndre zay, le afaky mampiseho fitiava ani-Jesosy tsika.

4. Ino ty raha sarotsy fahatelo, le ino ty hodinihintsika amy lahatsoratsy toy ato?

⁴ Ty raha sarotsy fahatelo le hoe mipetraky an-danitsy any Jesosy, ka tsy afaky manoka fotoa hiaraha aminy tsika. Fe mbo afaky mahay raha maro mikasiky ani-Jesosy tsika, ndre tsy marìny azy ty misy antsika. Hanenty raha efatsy azontsika atao tsika mba hanatanjaha ty fifandrambesantsika aminy. Ndao tse hodinihintsika hoe manino ro tena ilàntsika ty hoe mana fifandrambesa marìny amy Kristy.

5. Manino tsika ro tokony hinama amy Jesosy? (Henteo koa ty efajoro hoe “ Laha Minama amy Jesosy Tsika le Hanjary Namani-Jehovah” noho “ Akory ty Hahaizantsika Mandanjalanja Lafa Mieritseritsy ty Pilasini-Jesosy?”)

⁵ Tokony hinama amy Jesosy tsika laha ta hifandramby soa amy Jehovah. Ino ty antony? Retoa misy antony roe. Voalohany, nivola tamy mpianatsiny rey Jesosy hoe: “Baba mihintsy ro tea anareo, satria nareo fa nitea ahy.” (Jaona 16:27) Mbo nivola koa ie hoe: “Tsy misy olo mandeha amy Baba any laha tsy amy alalako.” (Jaona 14:6) Laha ty olo raiky miezaky hinama amy Jehovah kanefa tsy minama amy Jesosy, le mitovy amin’olo raiky miezaky militsy amy trano raiky fe tsy mampiasa varavara. Nampiasa fanohara mitovitovy amy zay Jesosy lafa niresaky hoe sahala amy “vavahadin’aondry” io ie. (Jaona 10:7) Faharoe, nanahaky tanteraky ty toetsini-Babany Jesosy. Hoy ty asany tamy mpianatsiny reo: “Ze nahita ahy, le nahita ani-Baba koa.” (Jaona 14:9) Ka ty fomba bevata hahaizantsika ani-Jehovah, le ty fianara mikasiky ty fiainani-Jesosy. Lafa mianatsy mikasiky  ani-Jesosy tsika, le hitombo ty fitiavantsika azy. Ka lafa mihamitombo ty fitiavantsika ani-Jesosy, le vomaiky tsika ho tea ani-Babany.

6. Manino koa tsika ro tokony hifandramby amy Jesosy? Hazavao.

⁶ Tsy maintsy mifandramby amy Jesosy tsika laha teantsika ho voavaly ty vavaky ataontsika. Dikani-zay, tokony hivola “amy anarani-Jesosy” tsika amy farani-vavaky ataontsika. Tokony ho haintsika ty fomba ampiasani-Jehovah ani-Jesosy mba hamalea ty vavaky ataontsika. Nivola tamy apostoliny rey Jesosy hoe: “Ze raha iaby angatahinareo amy anarako, le hataoko.” (Jaona 14:13) Jehovah raiky avao aloha ro mijanjy noho mamaly ty vavakintsika, fe nameany fahefà Jesosy mba hanatanteraky ty fanapahan-kevitsiny. (Mat. 28:18) Dikani-zay, alohani-hamalea-Ndranahary ty vavakintsika, le henteany laha nanoriky ty torohevitsy nameani-Jesosy tsika. Nivola, ohatsy, Jesosy hoe: “Laha manenga ty hadisoan’olo nareo, le hanenga ty hadisoanareo koa Babanareo an-danitsy any iny. Fa laha tsy manenga ty hadisoan’olo nareo, le tsy hanenga ty hadisoanareo koa Babanareo iny.” (Mat. 6:14, 15) Ka aleo manahaky ty fomba andaisani-Jehovah noho Jesosy antsika lafa mifandramby amin’olo!

7. Ia ty handramby soa baka amy soro nataoni-Jesosy?

⁷ Ze olo mifandramby marìny amy Jesosy avao ro handramby soa baka amy sorom-panavota nataony. Akory ty ahaizantsika ani-zay? Nivola Jesosy fa ‘hahafoy ty ainy ho ahi-ty namany’ ie. (Jaona 15:13) Nisy mpanomponi-Jehovah nivelo talohani-niaviani-Jesosy tan-tany tetoy. Tsy maintsy hianatsy mikasiky ani-Jesosy rozy ka ho tea azy. Hovelomy ndraiky lahilahy noho ampela rey, anatini-zay ry Abrahama noho Saraha, Mosesy, noho Rahaba. Fe ndre tsy nivaliky rozy, le mila minama amy Jesosy mba ho velo tsy misy farany.—Jaona 17:3; Asa. 24:15; Heb. 11:8-12, 24-26, 31.

8-9. Laha hentea ty raha volanini-Jaona 15:4, 5, manampy antsika hanao ino ty fifandrambesantsika amy Jesosy, le manino raha zay ro tena ilà?

⁸ Falifaly tsika fa miaraky miasa amy Jesosy amy fitoria noho fampianara ty vaovao soani-Fanjakà iny. Nimpampianatsy Jesosy tamin’ie tan-tany etoy. Mbo nanohy nitariky ty asa fitoria noho fampianara avao Jesosy liany nimpoliany tan-danitsy any, satria ie ro lohani-fiangona. Hitany sady ankasitrahany ty ezaky ataonao mba hanampea olo maro araky ze azonao atao mba hahay an-drozy amy Babany. Laha ty marina aza, le tsy hahavita ani-asa io tsika laha tsy eo ty fanampeani-Jehovah noho Jesosy.—Vakio Jaona 15:4, 5.

⁹ Ampianarini-Baiboly mazava soa fa tsy maintsy tea ani-Jesosy tsika laha ta hampifalifaly ani-Jehovah. Ka ndao tsika handiniky raha efatsy azontsika atao mba hahavy antsika ho namani-Jesosy.

10. Ino ty raha voalohany mila atao laha teantsika ty ho namani-Jesosy?

¹⁰ 1) Miezaha hahay ani-Jesosy. Afaky manao ani-zay iha lafa mamaky Baiboly amy bokini-Matio, Marka, Lioka noho Jaona. Hahavy antsika ho tea ani-Jesosy noho hanaja azy ty famakia ani-tantara amy Baiboly ao reo, satria ho haintsika ty fomba nandaisany olo. Ndre Tompo, ohatsy, ie le tsy nataony manahaky andevo io ty mpianatsiny. Nambarany an-drozy mihintsy aza ty eritseritsiny noho ty fihetseham-pony. (Jaona 15:15) Nitsapani-Jesosy ty raha maharary an-drozy, sady nitany niaraky amin-drozy ie. (Jaona 11:32-36) Ndre mpanohitsy azy rey aza nieky hoe nanjary namany ze olo nijanjy azy. (Mat. 11:19) Laha  tsika manahaky ty fomba nandaisani-Jesosy ty mpianatsiny, le hihasoa ty fifandrambesantsika amin’olo, sady ho falifaly noho ho afa-po tsika, le vomaiky hanaja ani-Kristy.

11. Ino ty raha faharoe mila atao laha teantsika ty ho namani-Jesosy, le manino raha zay ro tena ilà?

¹¹ 2) Tahafo Jesosy, amy ze raha eritseretinao noho ataonao. Lafa mihamahay ty fomba fihevitsiny noho manahaky azy tsika, le vomaiky ho namany marìny. (1 Kor. 2:16) Akory ty azontsika anahafa ani-Jesosy? Toy misy ohatsy raiky. Ty fomba hanampea ty hafa ro tena nieritseretini-Jesosy fa tsy ze hahafalifaly ty vatany. (Mat. 20:28; Rom. 15:1-3) Toe-tsainy zay ro nahavy azy hana fahafoizam-bata noho hanenga hadisoa. Tsy nampeloky azy ze raha nivolanin’olo mikasiky azy. (Jaona 1:46, 47) Tsy nengany hisy vokany amy ty fifandrambesany amin’olo raiky ty fahadisoa nataon’olo iny taloha tany. (1 Tim. 1:12-14) Hoy Jesosy: “Laha mifankatea nareo, le zay ro hahaizan’olo iaby fa mpianatsiko nareo.” (Jaona 13:35) Soa ty mieritseritsy hoe: “Manaraky ty modelini-Jesosy va aho, ka manao ze fara heriko mba hilongoa avao amy rahalahy noho anabaviko reo?”

12. Ino ty raha fahatelo mila atao laha teantsika ty ho namani-Jesosy, le akory ty hanaovantsika ani-zay?

¹² 3) Tohano ty rahalahini-Kristy. Amy Jesosy, le manao raha ho azy tsika lafa manao raha ho ani-rahalahiny voahosotsy reo. (Mat. 25:34-40) Naniraky ty mpanori-dia azy hitory mikasiky Fanjakà iny noho hanao mpianatsy Jesosy, ka lafa manao ze farani-vitantsika amy asa io tsika, le zay ro fomba bevata marè anohanantsika ani-voahosotsy reo. (Mat. 28:19, 20; Asa. 10:42) Atao amy tany toy iaby henanizao ty asa fitoria. Tsy ho nivitani-rahalahini-Kristy reo raha zay, laha tsy nanampy an-drozy ty “aondry hafa.” (Jaona 10:16) Laha anatini-aondry hafa iha, le azo antoky fa mandramby anjara amy asa io. Saky manao ani-zay iha, le asehonao fa tea ani-rahalahini-Kristy reo sady tea ani-Jesosy koa.

13. Akory ty hanorihantsika ani-torohevitsini-Jesosy amy Lioka 16:9 ao iny?

¹³ Minama amy Jehovah noho Jesosy koa tsika lafa mampiasa ty dralantsika mba hanohana ty asa ampanaovin-drozy. (Vakio Lioka 16:9.) Azontsika atao, ohatsy, ty manao fanomeza ho ani-asa amy tany toy iaby, tafilitsy amy zay ty asa fitoria ty vaovao soa amy faritsy mitoka any, ty fanamboara noho fikojakojà Efitrano Fanjakà na trano hafa natao hanohana ty fivavaha marina, le ty fanomeza fanampea ho ani-ze tra-boina vokatsini-loza. Afaky manao fanomeza koa tsika mba hanohana ty fiangona misy antsika noho hanampea ani-ze mila fanampea. (Ohab. 19:17) Manoha ani-rahalahini-Kristy rey tsika lafa manao ani-reo.

14. Laha hentea ty Efesianina 4:15, 16, ino ty raha fahaefatsy mila atao laha teantsika ty ho namani-Jesosy?

¹⁴ 4) Tohano ty fandahara ataoni-fiangona kristiana. Vomaiky hinama soa amy Jesosy, azy lohani-fiangona iny tsika lafa miaraky miasa amy rahalahy voatendry hikarakara antsika reo. (Vakio Efesianina 4:15, 16.) Miezaky, ohatsy, tsika henanizao mba hampiasa soa ty Efitrano Fanjakà. Mba hahatanteraky ani-zay, le nila natambatsy ty fiangona sisany sady namboary ty faritany iasan-drozy. Tena nanampy antsika hitsitsy drala be fandahara io. Fe tsy maintsy nanao fanovà koa ty mpitory sisany. Mety fa nifankazatsy marè tamy rahalahy noho anabavy amy fiangona nisy azy tao, ohatsy, rozy satria fa niaraky tanatini-tao maro. Fe bakeo nafindra amy fiangona hafa rozy. Azo antoky fa falifaly Jesosy lafa mahita hoe manoha ani-fandahara io mpianatsiny reo!

15. Manino ro hihasoa ty finamantsika amy Jesosy amy hoavy?

¹⁵ Mitamà hiaraky amy Jesosy zisiky farany azy voahosotsini-fanahy masy reo, satria hiaraky manjaka aminy amy Fanjakà-Ndranahary ao. Hiaraky amy Kristy ara-bakiteny rozy, zany hoe hahita azy noho hiresaky aminy. (Jaona 14:2, 3) Mbo ho tea noho hikarakara ani-azy mitamà hiay an-tany etoy rey koa Jesosy. Ndre tsy hahita ani-Jesosy mivanta aza rozy, le hihamatanjaky avao ty finaman-drozy aminy, ka hahafalifaly an-drozy ty fiaina ameani-Jehovah noho Jesosy an-drozy.—Isa. 9:6, 7.

16. Ino iaby ty fitahia ho azontsika lafa tsika minama amy Jesosy?

¹⁶ Mahazo fitahia maro tsika lafa maneky ty fanasani-Jesosy mba ho namany. Tea noho manoha antsika, ohatsy, ie henanizao. Mana tombontsoa ho velo zisiky farany koa tsika. Fa ty vatan-draha marè, lafa minama amy Jesosy tsika le hahazo raha farani-ze lafovily, tsy ino zay fa ty finamà marìny amy Jehovah, Babani-Jesosy. Voninahitsy bevata vatany ty kaihy hoe namani-Jesosy!