1. Mushindo kinyi watunyingishaa bu kuuku na muntu kampanda?

MISUUSA ibungi, kintu kya kumpala kyatukitaa bwa kunyingisha bu kuuku na muntu kampanda, nyi nkukisha naye nsaa. Nsaa yanwisamba na kwilungushena byanunangushena na kupusha, anwikala ba kuuku. Anka, nsaa yatukyebe kudya bu kuuku na Yesu, atupete nkalakashi. Nkalakashi kinyi?

2. Ndukalakashi kinyi lwa kumpala lwatukwete kupeta?

² Lukalakashi lwa kumpala ndwa’shi tatwamwene Yesu. Mu siekele a kumpala, bena Kidishitu babaadi bapete luno lukalakashi. Sunga mbyabya, Mpyeele mutumiibwa bakwile’shi: “Wiinyi anudi bafule kifulo, sunga tanwambandjile kumumona; na nukwete kukumiina mwadi, sunga binobino tanukwete kumumona.” (1 Mp. 1:8, Kilombeeno kipya 2014) Anka mbibofule bwatudya kudya na Yesu bu kuuku sunga byatushii ba mumone na meso etu.

3. Ndukalakashi kinyi lwa kabidi lwatukwete kupeta?

³ Lukalakashi lwa kabidi ndwa’shi tatwibalombene kwisamba na Yesu. Nsaa yatwele luteko, atwisambaa na Yehowa. Binyibinyi’shi atusambilaa mwishina dya Yesu, anka ta n’aye atwisamba nee. Na dingi, Yesu nabene t’akumiinaa’shi tumusambile. Bwakinyi? Mwanda luteko nyi ungi mushindo wa kulangwila,  akunamu nka penda Yehowa nyi atungu’shi tulangwile. (Mat. 4:10) Sunga byabya, twibalombene kulesha kifulo kyetu bwa Yesu.

4. Ndukalakashi kinyi lwa kasatu lwatukwete kupeta, na kinyi kya tutaluula mu uno mwisambo?

⁴ Lukalakashi lwa kasatu ndwa’shi Yesu e mwiyilu, byabya tatwibalombene kukisha n’aye nsaa ya. Kadi twibalombene kulonga myanda ibungi pabitale Yesu sunga byatushi n’aye peepi. Atutaluula myanda inanka ikwitukwasha bwa kunyingisha bu kuuku bwetu n’aye. Wa kumpala, tutaluuleyi bwakinyi abitungu tunyingishe bu kuuku bwetu na Kidishitu.

5. Bwakinyi abitungu twikale ba kuuku ba Yesu? (Tala dingi kashibo akamba’shi “ Kwikala mu bukuuku na Yesu akwitwikasha mu bu kuuku na Yehowa” na “ Ikala na nkatshinkatshi pabitale mudimo winao Yesu.”)

⁵ Su atukumiina kwikala mu kipwano kibuwa na Yehowa abitungu twikala mu bu kuuku na Yesu. Bwakinyi? Tubaande kutaluula penda tubingilo tubidi. Kakumpala, Yesu baadi mulungule balongi baye’shi: “Yehowa nabeene mmwinufule bwa panudi bamfule.” (Yo. 16:27) Bakwile dingi’shi: “Muntu su ngumune taakwenda kwi Yaaya, kushii kukiila kwandji.” (Yo. 14:6) Kukimba bya kwikala mu bu kuuku na Yehowa kushii kwikala mu bu kuuku na Yesu kwi nka bu kutompa kutwela mu nshibo ishii kiibi. Yesu baadi mufubishe kino kileshesho pa baadi eamba bu “kiibi kya mikooko.” (Yo. 10:7) Kakabidi, Yesu mmwambule ngikashi ya Nshaye. Balungwile balongi baye’shi: “Mummone mmumone Yaaya.” (Yo. 14:9) Mushindo upelepele watudya kuuka Yehowa, nyi pa kulonga nshalelo a Yesu. Nsaa yatulongo pabimutale, atunyisha kumufula ngofu. Nsaa yatunyisha kumufula, kifulo kyetu bwa Yehowa akinyisha kutama.

6. Kangi kabingilo kinyi aketutakula bwa kwikala mu bu kuuku na Yesu? Patuula.

 ⁶ Abitungu twikale ba kuuku ba Yesu bwa’shi tupete ngaluulo ku nteko yetu. Bino abilesha’shi abitungu tukite bibungi kukila penda kwakula’shi: “Mwishina dya Yesu” kunfudjilo kwa nteko yetu. Abitungu twiukye’shi Yehowa afubishaa Yesu bwa kwaluula nteko yetu. Yesu balungwile balongi baye’shi: “Kyooso kyaanutekye mwishina dyande, neenukitshina.” (Yo. 14:13) Yehowa nyi apushaa na kwaluula nteko yetu, anka, mmupe Yesu matalwa akukumbasha bitshibilo Byaye. (Mat. 28:18) Kumpala kwa’shi Efile Mukulu aluule nteko yetu, abaanda kutala su tukwete kutumikila elango dya Yesu. Bu kileshesho, Yesu bakwile’shi: “Su anulekyela bantu bito byaabo, nsheenu ee mwiyilu eenulekyela namu; anka su nwapela kulekyela bantu bito byaabo, Nsheenu naamu teenulekyela byeenu bito nya.” (Mat. 6:14, 15) Byabya, mushindo watukitshina bangi myanda wi na muulo, mwanda nyi mushindo wabetukitshina namu myanda kwi Yehowa na Yesu.

7. Mba nnanyi abakapetela myabi ya mulambu wa nkulo wa Yesu?

⁷ Nka penda baba be mu bu kuuku na Yesu, nyi balombene kupeta myabi ya mulambu wa nkulo. Atwibyuuku naminyi? Yesu bakwile’shi mmulombene ‘kupana muwa we pa mwanda wa bakuku bee.’ (Yo. 15:13, kilombeeno kipya 2014) Bantu abaadi bafubile Yehowa kumpala kwa’shi Yesu afikye pa nsenga, abakalongo pabimutale na abakamufulu. Baaba balume na bakashi bu Abrahame, Sara, Moyiise, na Rahabe abakebasangula, sunga mbyabya, abitungu bakadye bu kuuku na Yesu bwa kupeta muwa wa ikalayika.​—Yo. 17:3; Bik. 24:15; Eb. 11:8-12, 24-26, 31.

8-9. Nka bu abibilesha Yowano 15:4, 5, nkinyi kyatwikala atukitshi su twi ba kuuku ba Yesu, na bwa kinyi bi na muulo?

⁸ Twi na muloo wakufuba pamune na Yesu mu mudimo wa kulungula na kulongyesha mukandu wibuwa wa Bufumu. Pa baadi pa nsenga, Yesu baadi mulongyeshi. Kashaa aluka mwiyilu bu mutwe wa kakongye, Yesu kwete kutungunuka na kukunkusha mudimo wa kulungula na ku longyesha. Kwete kumona na kusankila byokwete kwitatshisha bwa kukwasha bantu bwabadya kumuuka na kuuka Nshaye. Byabya, nka penda kubukwashi bwa Yehowa na Yesu nyi kwatudi balombene kukubansha uno mudimo.​—Badika Yowano 15:4, 5.

⁹ Eyi dy’Efile Mukulu adilesha patooka’shi, abitungu tufule na kulama kifulo bwa Yesu bwa kusankisha Yehowa. Binobino, tutaluuleyi myanda ikata ayitukwasha bwa kwikala ba kuuku ba Yesu.

10. Mwanda kinyi wa kumpala autungu’shi tukite bwa kwikala ba kuuku ba Yesu?

¹⁰ (1) Uuka Yesu kalolo. Twi kumuuka kalolo pa kubadika mukanda wa Mateo, Maako, Luka na Yowano. Nsaa yatunangushena ku miisambo ya mu Bible pabitale nshalelo a Yesu, atumufulu na kumunemeka bwa kipaso kibaadi akitshina bantu myanda. Bu kileshesho, sunga bibaadi Nfumwabo, tabaadi amono balongi baye bu ba mpika nya. Anka baadi ebalungula bya nangushena na byapusha. (Yo. 15:15) Nsaa ibaabadi benyongole, Yesu baadi enyongola n’abo, nsaa ibaabadi abadidi baadi adidi n’abo. (Yo. 11:32-36) Sunga beshikwanyi baye, abaadi abamono’shi boso abakumiina mukandu waye abaadi abafiki ba kuuku baye. (Mat. 11:19) Su twambula  Yesu mu mushindo ubaadi na balongi baye, kipwano kyetu na bangi akilumbuluka, atwikala na muloo na atunyisha kwibafula na kwibanemeka ngofu.

11. Mwanda kinyi wa kabidi autungu’shi tukite bwa kwikala ba kuuku ba Yesu, na bwakinyi bi na muulo?

¹¹ (2) Ambula mushindo ubaadi aunangushena Yesu na ubaadi akitshi myanda. Nsaa y’atumuuku na kwambula mushindo waye wa kunangushena, atunyisha kunyingisha bu kuuku bwetu n’aye. (1 Kod. 2:16) Twi kwambula Yesu naminyi? Nangushena penda pa kino kileshesho kimune. Yesu baadi akumiina kukwasha bangi pe kwisankisha aye nabene. (Mat. 20:28; Lom. 15:1-3) Pa mwanda baadi anangushena mu kino kipaso, baadi esumina ingi miloo na kufwila bangi lusa. Tabaadi afitshi munda bwa bibabadi abamwamba kwi bantu nya. (Yo. 1:46, 47) Tabaadi atentekyesha myanda ibabaadi bamukitshine kala kwi bantu bwa kwalusha bubi ku bubi nya. (1 Tim. 1:12-14) Yesu bakwile’shi: “Abakatundula’shi nwi balondji bande anka ku kifulo kyaanwifuleena.” (Yo. 13:35) Bibuwa weyipushe’shi: “Nkwete kulonda kileshesho kya Yesu pa kukita mwande mooso bwa kulama butaale na bakwetu bena Kidishitu su?”

12. Mwanda kinyi wa kasatu autungu’shi tukite bwa kwikala ba kuuku ba Yesu, na twikwibikita naminyi?

¹² (3) Kwatshisheena bakwabo na Yesu. Yesu amonaa byabya byatukishina bakwabo bedibwe mwimu bu’ye atukitshina. (Mat. 25:34-40) Mushindo wi na muulo watukwatshishena bedibwe mwimu, pa kulungula mukandu wa Bufumu na kwikasha bantu bu balongi bu bibaadi bitulungule Yesu. (Mat. 28:19, 20; Bik. 10:42) Ku bukwashi bwa “ingi mikooko,” bakwabo na Yesu mbalombene kulombasha mudimo wa bulungudi ukwete kukitshika lelo uno. (Yo. 10:16) Su we ungi mukooko, nsaa yoso yodi mu bulungudi, olesha kifulo kyobe bwa bakwabo na Yesu mpaa n’aye nabene.

13. Twi kutumikila elango di mu Luka 16:9 naminyi?

¹³ Atwikala dingi ba kuuku ba Yehowa na Yesu pa kutusha makuta etu bwa kukwatshishena mudimo wabakunkusha. (Badika Luka 16:9.) Bu kileshesho, twi kutusha bya buntu bwa kukwatshishena mudimo wa nsenga ishima, na bino bya buntu abebifubisha bwa kukwatshishena mudimo wa bulungudi mu ma mbalo ashadile, kwibaka na kulumbuula mashibo aakwatshishena lulangwilo lwa binyibinyi, na kukwasha baba abapete masaku aatukila ku bintu bipangibwe. Twibalombene dingi kutusha makuta bwa kupudisha nkalo ya kakongye na kukwasha yawa oso atuuku’shi e mu lukalo. (Nki. 19:17) Ino nyi mishindo yatudi balombene kukwatshishena bakwabo na Kidishitu.

14. Muyile Beena-Efeso 4:15, 16, mwanda kinyi wa kananka autungu’shi tukite bwa kwikala ba kuuku ba Yesu?

¹⁴ (4) Kwatshishena mpàngo ya kakongye ka bena Kidishitu. Atunyisha kunyingisha bu kuuku bwetu na Yesu mwikale mutwe wa kakongye, nsaa yatwipusheena na baadi mutule bwa’shi betupasukile. (Badika Beena-Efeso 4:15, 16.) Bu kileshesho, abitungu twikale atufibisha kalolo Nshibo ya bufumu. Nyi bwakinyi tungi tukongye tubaadi tusangibwe na angi ma teritware abaadi beakituule. Bino mbikwashe ndubulwilo bwa kulama bya buntu kalolo. Anka mu aa mafuku, bibaadi abitungu’shi bangi balungudi bashintule kakongye. Bano balungudi ba sha lulamato mbafube munda mwa bipwa bi bungi mu kakongye mutababaadi beubidishene na bakwabo balume na bakashi. Anka abekalanga bebatume mu kangi kakongye. Bino abisankisha Yesu ngofu nsaa y’amono bano bena Kidishitu ba sha lulamato kwabakwatshishena ino mpàngo!

15. Bu kuuku bwetu na Yesu abukanyisha kunyinga naminyi mu mafuku aafiki?

¹⁵ Baba boso bedibwe mwimu ku bukwashi bwa kikudi ki selele, be na lukulupilo lwa kwikala na Yesu bwa looso, na kumunana naye bu ba mpyanyi mu Bufumu bw’Efile Mukulu. Binobino abekala na Kidishitu​—bamumone, besambe n’aye na bakishe n’aye nsaa pamune. (Yo. 14:2, 3) Baba boso be na lukulupilo lwa kushala pa nsenga, Yesu akebalesha kifulo na kwibapasukila. Sunga tabakamumono, bu kuuku bw’abo abukanyisha kunyinga nsaa y’abakekala na shalelo ebuwa abakekasha kwi Yehowa na Yesu.​—Yesh. 9:6, 7.

16. Myabi kinyi yatupete pa kwikala ba kuuku ba Yesu?

¹⁶ Nsaa yatukumiina lwitamino lwa Yesu lwa kwikala bu ba kuuku baye, atupete myabi ibungi. Bu kileshesho, etufulu na kwitukwatshishena kubanga binobino. Twi na lukupilo lwa kwikala na muwa bwa loso. Na mwanda wi na muulo, bu kuuku na Yesu abutwala kwi kuuku mukile boso​—bu kuuku na Nshaye na Yesu, Yehowa. Nyi kineemo kikata kyatudi nakyo kya kwitaminyibwa bu ba kuuku ba Yesu!