1. Unfa i ku wan sëmbë ta ko dë gaan mati?

DI FOSU soni di i ta du fii ku wan sëmbë ko dë gaan mati, hën da i ta dë makandi ku di sëmbë dë hii juu. Te i ku di sëmbë o ta fan, ta konda unfa un ta pakisei, ta da woto, nöö i ku di sëmbë ta ko dë mati. Ma te a nama ku di dë di u ku Jesosi musu ko dë mati, nöö a sa ta taanga da u so juu. Andi da wantu soni di sa mbei a ta taanga da u fuu ku Jesosi ko dë gaan mati?

2. Andi da di fosu soni di ta mbei a taanga da u fuu ku Jesosi ko dë gaan mati?

² Di fosu soni di ta mbei a ta taanga da u fuu ku Jesosi ko dë gaan mati, hën da wa miti Jesosi wan daka. Sömëni u dee fesiten Keesitu sëmbë seei an bi miti Jesosi wan daka. Ma tökuseei apösutu Petuisi bi taki taa: „Hii fa wan ta si ën fa u dë aki seei, ma un ta biibi nëën liba” (1 Pet. 1:8). Fëën mbei u sa taki taa u ku Jesosi sa ko dë gaan mati hii fa u ku ën an miti wan daka.

3. Andi da di u tu soni di ta mbei a ta taanga da u fuu ku Jesosi dë gaan mati?

³ Di u tu soni, hën da wa sa fan ku Jesosi. Te u ta begi, nöö u ta fan ku Jehovah. A dë sö tuu taa u ta begi a di në u Jesosi, ma wa ta fan ku Jesosi te u ta begi. Nöö Jesosi seei an kë fuu begi ën tu. Faandi mbei? Wë u di te wan sëmbë ta begi,  nöö a dë wan fasi fa a ta dini Gadu, nöö Jehovah wanwan fiti u sëmbë musu dini (Mat. 4:10). Ma tökuseei u sa lei taa u lobi Jesosi.

4. Andi da di u dii soni di ta mbei a ta taanga da u fuu ku Jesosi dë gaan mati, nöö andi woo luku a di woto aki?

⁴ Di u dii soni di ta mbei a ta taanga da u fuu ku Jesosi dë mati, hën da u di Jesosi ta libi a liba ala. Fëën mbei wa sa ta dë makandi ku ën. Ma tökuseei u sa ko sabi sömëni soni u Jesosi, hii fa wa dë makandi ku ën a liba ala. Woo luku fö soni di o heepi u fuu ku ën ko dë möön gaan mati. Ma woo luku fosu faandi mbei a dë fanöudu fuu ku Keesitu ko dë gaan mati.

5. Faandi mbei u ku Jesosi musu dë mati? (Luku di pisi „ Te u ku Jesosi dë mati, nöö u ku Jehovah o ko dë mati tu” ku di pisi „ I musu ta si Jesosi a di soifi fasi.”)

⁵ U ku Jesosi musu ko dë gaan mati ee u kë taa u ku Jehovah musu ko dë gaan mati. Faandi mbei u taki sö? Boo luku tu soni di mbei u taki sö. Di fosu soni, hën da Jesosi bi taki taa: „Mi Tata lobi unu, fu di un lobi mi” (Joh. 16:27). A bi taki tu taa: „Na wan sëmbë sa dou a mi Tata e, ee na mi tja i go nëën” (Joh. 14:6). Ee u ta suku u ko dë gaan mati ku Jehovah, söndö fuu ku Jesosi dë gaan mati, nöö a dë kuma u kë denda go a wan wosu söndö fuu pasa a di döö. Jesosi bi konda wan woto di bi ta lei taa hën da di „dööbuka, di fii waka go dou a dee oto sikapu” (Joh. 10:7). Di u tu soni, hën da Jesosi ta djeesi hën Tata a hii dee fasi dee a abi. Jesosi bi piki dee bakama fëën taa: „Di sëmbë di si mi, nöö mi Tata a si naandë kaa” (Joh. 14:9). Fëën mbei wan u dee fasi fa u sa ko sabi Jehovah möön bunu, hën da te u ta lei soni u di libi u Jesosi. Te u ta lei soni u di libi u Jesosi, nöö woo ta ko möön lobi ën. Nöö te u ta ko möön lobi  Jesosi, nöö woo sa ko möön lobi di Tata fëën.

6. Andi da wan woto soni di mbei u musu dë gaan mati ku Jesosi?

⁶ U ku Jesosi musu dë gaan mati ee u kë u Jehovah haika dee begi fuu. Di soni aki kë taki taa na taki nöö u musu ta taki taa „a di në u Jesosi” a kaba u di begi fuu. Ma u musu ko fusutan unfa Jehovah ta wooko ku Jesosi u piki dee begi fuu. Jesosi bi piki dee apösutu fëën taa: „Hiniwan soni di un ta hakisi mi Tata a mi në, nöö mi o ta du ën” (Joh. 14:13). Hii fa Jehovah hën da di sëmbë di ta haika dee begi fuu, söseei di ta piki dee begi fuu, tökuseei a da Jesosi di faantiwöutu u du dee soni dee a taki (Mat. 28:18). Ufö Gadu piki dee begi fuu, nöö a ta luku ee u ta wooko ku di soni di Jesosi bi taki te a nama ku di da di u musu ta da wotowan paadon. Jesosi bi taki taa: „Ee un ta hoi sëmbë a bëë u dee hogi de ta du unu, nöö unu Tata a liba ala o hoi unu a bëë tu e, u dee hogi dee un ta du. Ma ee un puu di otowan fuunu a bëë, nöö unu Tata a liba ala o puu unu a bëë tu” (Mat. 6:14, 15). Fëën mbei a dë fanöudu seei taa u ta libi ku wotowan a di fasi fa useei kë u Jehovah ku Jesosi libi ku u tu!

7. Ambë ku ambë ta feni wini u di lusupaima u Jesosi?

⁷ Dee sëmbë dee dë gaan mati u Jesosi nöö o sa feni wini u di lusupaima di a paka da u. Unfa u du sabi di soni aki? Jesosi bi taki taa a bi o „lasi ën libi fëën mati hedi” (Joh. 15:13). Sëmbë di bi ta dini Jehovah ufö Jesosi ko a goonliba aki, musu ko sabi ën, söseei de musu ko lobi ën tu. Sëmbë kuma Abahamu, Sala, Mosesi, ku Lakabu, o weki ko a libi baka. Ma hii fa dee sëmbë aki bi ta dini Gadu fajafaja, tökuseei de musu ko dë gaan mati u Jesosi u de sa feni di libi u teego.​—Joh. 17:3; Tjab. 24:15; Heb. 11:8-12, 24-26, 31.

8-9. Andi di dë di u ku Jesosi dë mati ta da u pasi fuu du, nöö faandi mbei di soni aki dë fanöudu te u luku Johanisi 15:4, 5?

⁸ U ta piizii seei u wooko makandi ku Jesosi a di peleikiwooko, söseei u lei sëmbë soni u di bunu buka u di Könuköndë u Gadu. Di Jesosi bi dë a goonliba aki, a bi dë wan leima. Nöö sensi di a toona go a liba ala, a bi ko dë di hedima u di kemeente u Keesitu sëmbë, nöö a ta tii di peleikiwooko go dou, ku di lei di u ta lei sëmbë soni u Bëibel. Jesosi ta si di möiti di i ta mbei u heepi sömëni sëmbë u de ko sabi hën ku hën Tata, nöö a ta tei ën u bigi tu. Di wan kodo fasi fa u sa kaba di wooko aki, hën da te Jehovah ku Jesosi ta heepi u.​—Lesi Johanisi 15:4, 5.

⁹ Di Wöutu u Gadu ta lei gbelingbelin taa ee u kë lei taa u ta du soni di ta kai ku Jehovah, nöö u musu ko lobi Jesosi, söseei u musu mbei möiti fuu ta lobi ën go dou. Boo luku fö soni di u sa du fuu sa ko dë mati u Jesosi.

10. Andi da di fosu soni di u musu du fuu ku Jesosi sa dë mati?

¹⁰ (1) Mbei möiti fii ko sabi Jesosi. U sa du di soni aki te u ta lesi dee Bëibel buku Mateosi, Maikusi, Lukasi, ku Johanisi. Te u ta pakisei fundu u dee soni dee sikifi a dee fö buku dee ta taki soni u di libi u Jesosi a goonliba aki, nöö woo ko ta möön lobi Jesosi, söseei woo ko ta möön lesipeki ën tu, u di Jesosi bi ta libi bunu ku sëmbë. Hii fa Jesosi bi dë di Masa u dee bakama fëën, tökuseei an bi ta libi ku de kuma de da saafu. Ma a bi ta piki de unfa a ta pakisei, ku unfa a ta fii (Joh. 15:15). Te de bi ta tjali, nöö Jesosi bi ta tjali ku de tu, söseei te de bi ta këë, Jesosi bi ta këë ku de tu (Joh. 11:32-36). Dee felantima u Jesosi seei bi ta si taa Jesosi ku dee sëmbë dee bi ta haika di bosikopu di a bi ta tja, bi ta ko dë  mati ku deseei (Mat. 11:19). Te u ta djeesi Jesosi a di fasi fa a bi ta libi ku dee bakama fëën, nöö woo ko ta möön libi bunu ku wotowan, woo ko ta möön dë waiwai, söseei woo ko ta möön lobi Keesitu.

11. Andi da di u tu soni di u musu du fuu ku Jesosi sa dë mati, nöö faandi mbei di soni aki dë fanöudu?

¹¹ (2) Djeesi Jesosi a di fasi fa a bi ta pakisei ku di fasi fa a bi ta du soni. Möön u ta ko sabi di fasi fa Jesosi ta si soni, söseei möön u ko ta djeesi ën a di fasi dë, möönmöön u ku ën o ko dë gaan mati (1 Kol. 2:16). Unfa u sa djeesi Jesosi? Buta pakisei a di woto aki. Jesosi bi ta möön buta pakisei a di fasi fa a bi sa heepi wotowan, möön fa a bi ta pakisei u du soni da hënseei (Mat. 20:28; Lom. 15:1-3). U di a bi ta pakisei a di lö fasi aki, mbei a bi sa möön buta pakisei a wotowan, söseei hën mbei a bi sa ta da de paadon. Hati fëën an bi ta boonu hesi, aluwasi andi wotowan bi ta taki fëën (Joh. 1:46, 47). Söseei Jesosi an bi ta si wotowan wan fasi u di de bi mbei föutu a di ten di pasa (1 Tim. 1:12-14). Jesosi bi taki taa: „Te un ta lobi sö kaa, nöö hii sëmbë o si taa bakama u mi gbelin un dë e” (Joh. 13:35). Hakisi iseei di soni aki: „Mi ta mbei hii möiti u djeesi Jesosi sö taa mi sa ta libi fiifii ku dee baaa ku dee sisa u mi ö?

12. Andi da di u dii soni di sa mbei u ku Jesosi ko mati, nöö unfa u sa du di soni aki?

¹² (3) Heepi dee baaa u Keesitu. Jesosi ta si di heepi di u ta heepi dee salufu baaa fëën, kuma hën u ta heepi a soni (Mat. 25:34-40). Di fosu soni di u sa du u heepi dee salufu baaa u Keesitu, hën da te u ta dë fajafaja a di peleikiwooko, söseei te u ta mbei möiti u heepi sëmbë u de ko dë bakama u Jesosi kumafa a manda u fuu du (Mat. 28:19, 20; Tjab. 10:42). Dee woto sikapu wanwan nöö sa heepi dee salufu baaa u Keesitu u du di peleikiwooko (Joh. 10:16). Ee i da wan sëmbë di dë u dee „oto sikafu”, nöö hoi a pakisei taa hiniwan pasi di i nango a di peleikiwooko, i ta lei taa i ta hoi iseei a dee baaa u Keesitu, ku Jesosi tuu.

13. Unfa u sa du di soni di Jesosi taki a Lukasi 16:9?

¹³ U ku Jehovah ku Jesosi sa ko dë mati tu te u ta tei di möni fuu u heepi taa dee baaa u Keesitu tii di wooko. (Lesi Lukasi 16:9.) Wë u sa da möni u heepi du di diniwooko a hii së u goonliba. Hën da u sa heepi paka dee kösutu u di peleiki di u ta peleiki a longi kamian, u heepi mbei dee kamian ka u ta ko makandi u dini Gadu, söseei u seeka de. Söseei u heepi dee baaa ku dee sisa fuu dee ta libi a kamian ka gaan wata nasö gaan ventu ko booko soni u de. U sa heepi baaa ku sisa a di kemeente ka u dë tu di dë ku möni fuka, nasö dee abi woto pei fuka (Nöng. 19:17). A dee lö fasi aki u sa lei taa u ta heepi dee baaa u Keesitu.

14. Andi da di u fö soni di wan sëmbë musu du, fëën ku Jesosi sa ko dë mati, te u luku Efeise 4:15, 16?

¹⁴ (4) Wooko ku dee soni di di ölganisaasi u Jehovah seti. U ku Jesosi ta ko dë möön gaan mati te u ta wooko makandi ku dee sëmbë dee abi di faantiwöutu u luku u. (Lesi Efeise 4:15, 16.) Nöunöu di ölganisaasi fuu ta mbei möiti u de sa ta wooko ku dee Könuköndë zali a di möön bunu fasi. Di soni aki mbei de mbei so kemeente hai ko nama ku woto kemeente, söseei de ta tooka soni te a nama ku di pisiwata ka wan kemeente sa go peleiki. Di soni aki mbei taa di ölganisaasi an bi abi fu puu sö hia möni möön. So peleikima bi musu ko guwenti di njunjun seti aki. Kandë dee peleikima aki bi dini Jehovah sömëni jaa longi ku di kemeente ka de bi dë, nöö kandë de ku dee baaa ku sisa ko dë gaan mati seei. Ma nöunöu de hakisi de u de go dini Jehovah a wan woto kemeente. Wë Jesosi musu u ta wai te a ta si  unfa dee bakama fëën ta wooko ku di seti aki! 

15. Unfa u ku Jesosi o ko dë mati tjika a di ten di ta ko?

¹⁵ Dee sëmbë dee Gadu salufu ku santa jeje, abi di biibi u de go libi ku Jesosi a liba ala u teego, nöö de ku Jesosi o tii di Könuköndë u Gadu. De o dë makandi ku Jesosi, de o ta si ën, de o ta fan ku ën, söseei de o ta du soni makandi ku ën (Joh. 14:2, 3). Dee sëmbë dee abi di biibi u libi a goonliba aki, seei o fii taa Jesosi lobi de, nöö a o buta pakisei a de tu. Hii fa dee sëmbë dë an o si Jesosi, tökuseei de ku ën o ko dë möön gaan mati, nöö de o piizii ku di libi di Jehovah ku Jesosi mbei taa de sa feni.​—Jes. 9:6, 7.

16. Un gaan bunu u sa feni te u ku Jesosi dë mati?

¹⁶ Te u ta mbei möiti fuu ku Jesosi ko dë gaan mati, nöö u ta feni sömëni gaan bunu. U ta feni wini u di lei di a ta lei taa a lobi u, söseei u di heepi di a ta heepi u nöunöu kaa. U abi di gaandi fuu sa libi u teego. Ma di möön fanöudu soni, hën da di dë di u ku Jesosi dë mati, o mbei u ku hën Tata ko dë gaan mati tu. A dë wan gaandi seei taa u ku Jesosi sa dë mati!