1. Pa kukita bukibuza pamo ni muntu uli wakita siani?

LINGI, pa kukita bukibuza bwa peepi pamo ni muntu utuli twasaakaana nakue, nzila ya kuanza, ni kupisia musita pamo nakue. Lumuli mukuya mwalanziana, mwabuilana malanga ni vimuli mwaiunvua, muli kwaluka babibuza. Inzi, palua kukita bukibuza pamo ni Yesu, musita unge tuli twamona kyakolele kwaluka babibuza baweeme bakue Yesu. Ale, juu ya ki?

2. Ni buavia ki bwa kuanza butuli nabo?

² Buavia bwa kuanza ni bobu: Tetunamumonepo Yesu. Bakristu bengi ba mu miaka mia (100) ya ku ntendeko ni beene basaakeene ni bwenka bobo buavia. Anzia evio, mutumua Petro waalandile eevi: “Anzia kine te munamumonepo, mumutonene. Anzia kine te mumumwene leenu, mulangiliile kiketekelo muli weene.” (1 Pet. 1:8) Kansi, kunti kyakitika kukita bukibuza pamo ni Yesu anzia kine tetunamonane nakue.

3. Ni buavia ki bwa bubili butuli nabo?

³ Buavia bwa bubili ni bobu: Te tuli na buviinde bwa kulanda ni Yesu. Musita utuli twapepa, tuli twalanda ni Yehova. Kulanda kisinka, tuli twapepa kupitila mu liina lyakue Yesu, inzi tetwizi kumulanzia Yesu. Kakiine Yesu teezi kutona tuye twapepa kuli weene. Juu ya ki? Paantu lipepo ni lyene ni lupupo, kabili Yehova sie bunke i apalile kupupua. (Mat. 4:10) Anzia evio, kunti twalangilila nangue tumutonene Yesu.

4. Ni buavia ki bwa butatu butuli nabo, kabili tuli kwimbulula ki mu leeli lyasi?

⁴ Buavia bwa butatu ni bobu: Yesu ekeele ku muulu, pakaako tetuviinda kupisia musita twaikeele nakue. Inzi, kunti twasambilila bingi palwakue Yesu bila kuya twali pamo nakue. Tuli  kwimbulula bintu bina bitupalile kukita eevi tukosie bukibuza pamo nakue. Kya kuanza, tumonenke juu ya ki kiweeme saana kuli fwefue kukita bukibuza bwa peepi saana ni Kristu.

5. Juu ya ki tupalile kukita bukibuza pamo ni Yesu? (Mona kisanduku “ Bukibuza Pamo ni Yesu Buli Bwatwala ku Bukibuza Pamo ni Yehova,” ni kisanduku “ Malanga Aweeme Palua Kifulo Kyakue Yesu.”)

⁵ Kine tutonene kuya twali ni bukibuza bwaweeme pamo ni Yehova, tupalile kukitanke bukibuza pamo ni Yesu. Juu ya ki keekio ni kisinka? Mona nsaambu ibili. Ya kuanza, Yesu waabalandile eevi basambi bakue: ‘Baba mwine amitonene, paantu muntonene.’ (Yoane 16:27) Kabili waalandile eevi: “Tekuli muntu wakuya kuli Tawe [Baba] kine tapitiile muli nene.” (Yoane 14:6) Kutendekezia bukibuza pamo ni Yehova bila kukita bukibuza bwa peepi pamo ni Yesu, ili nga evelia kwezia kwingila mu nsesi bila kupitila ku muliango. Yesu wabombiizie mufuano nga ozo musita lwailondoluele ye muine kuya waali “muliango wa kipata kya mikooko.” (Yoane 10:7) Nsaambu ya bubili ni eezi: Yesu waalangiliile mu kupuililika mibeele yakue Baba wakue. Waabalandile eevi basambi bakue: “Olia wamona neene, wamumona ni Baba.” (Yoane 14:9) Kansi, kusambilila buikazi bwakue Yesu i nzila iweeme ya kufikiila kumumana Yehova. Vituli kuya twakila kusambilila palwakue Yesu, i vituli kuya twakila kumutona. Kabili vili kuya vyakila kukula bukibuza bwetu kuli Yesu, i vili kuya vyakila kutana ntono yeetu kuli Baba wakue.

6. Ni nsaambu ki inge ilangiliile nangue tupalile kukita bukibuza pamo ni Yesu? Londolola.

⁶ Tupalile kukita bukibuza pamo ni Yesu eevi mapepo etu aasukue. Keekio kiloombele  kukita bingi apanasie kupeleezia lipepo lyetu na milandu “kupitila mu liina lyakue Yesu.” Tupalile kwinika Yehova vyali wamubombia Yesu eevi aasuke mapepo etu. Yesu waabalandile eevi batumua: ‘Byonse bimwakaba mwaloomba mu liina lyane, nakaba namipeela.’ (Yoane 14:13) Anzia kine Yehova sie bunke i ali waunvua ni kwasuka mapepo, waamupeele Yesu nsaambu ya kufikilizia bupinguzi Bwakue. (Mat. 28:18) Inzi, ntaanzi Leeza aasuke mapepo etu, ali wamonanke kine twakibombia musoko wakue Yesu. Kwa mufuano, Yesu waalandile eevi: ‘Kine mwaeleela bantu bilubo byabo, Sinue [Baba wenu] wa mwiulu, ni ye ali kumyeleela. Inzi kine temwizi kweleela bantu bilubo byabo, ni Sinue takamyeleela bilubo byenu.’ (Mat. 6:14, 15) Kansi, ni kintu kya mana kakiine tubakitile bange nga evelia Yehova ni Yesu vibali batukitila!

7. Ni baani bali banoonkelamo mu kilubula mulandu kyakue Yesu?

⁷ Baalia bali bakita bukibuza pamo ni Yesu, beenesie bunke, i bakanoonkelamo mu kilubula mulandu kyakue. Twamana siani? Yesu waalandile nangue ‘wakafwila babibuza bakue.’ (Yoane 15:13) Baalia bantu ba kisinka baafuile ntaanzi Yesu tanaize panu pa kyalo, bakasambilila palwakue ni kumutona. Babo balalume ni banakazi babiikile mukati Abrahamu, Sara, Musa ni Rahabu bakafufulua. Inzi, pakunti babo babombi ba kisinka bakue Yehova bakapate bukose bwa loonse, ni beene, mpaka bakakitenke bukibuza pamo ni Yesu.​—Yoane 17:3; Miilo 24:15; Baeb. 11:8-12, 24-26, 31.

8-9. Nga vilandile lileembo lya Yoane 15:4, 5, kukita bukibuza pamo ni Yesu kuli kwatupeela maka a kukita ki, kabili juu ya ki ni kintu kya mana?

⁸ Tuli ni nsaansa ya kubomba pamo ni Yesu mu miilo ya kusimikila ni kusambilizia mpunda iweeme ya Bukolo. Musita Yesu lwaali pa kyalo, waali kasambilizia. Kabili ntangusie Yesu, mutue wa kilonghaano, lwabwela ku muulu, atwaliliile kutungulula miilo ya kusimikila ni kusambilizia. Ali wamona ni kutasia maka obe auli wakita eevi kukwasia bantu bengi kukoonkana ni buviinde bobe bamumane, weene, ni Baba wakue. Kakiine, nzila imosie ya kutukwasia kuviinda kufikilizia miilo ni kupitilasie kukwasiiwa na Yehova ni Yesu.​—Soma Yoane 15:4, 5.

⁹ Mulandu Wakue Leeza uli wasambilizia bila kufiika nangue tupalile kuya twali ni ntono kuli Yesu ni kusuunga ezio ntono eevi tumusaansamusie Yehova. Kansi, tulondolole bintu bina bitupalile kukita eevi twaluke babibuza bakue Yesu.

10. Zimbula nzila ya kuanza ya kutukwasia kukita bukibuza pamo ni Yesu.

¹⁰ (1) Mumane Yesu. Kunti twakita evio kupitila kusoma bitabu bya Bibilia bya Mateo, Marko, Luka ni Yoane. Musita utuli kuya twatontonkania palua ezio mpunda ili mu Bibilia palua buikazi bwakue Yesu, tuli kufikiila kumutona ni kumukindika Yesu kukoonkana ni vyabanga wabakitila bantu. Kwa mufuano, anzia kine waali Selenzi ao Mukulu wabo, taali wabakitila basambi bakue nga bazia. Inzi, waalangiliile malanga akue a mukati ni vyabanga waiunvua palwabo. (Yoane 15:15) Musita ubaali ni bulanda, ni weene waalukile ni bulanda, kabili waalilile pamo nabo. (Yoane 11:32-36) Atasie baluani bakue baali bamanine nangue waali kibuza wa baalia baali batuilizia mpunda yakue. (Mat. 11:19) Musita utuli twaakoonka mufuano wakue, nga vyabanga wabakitila basambi bakue, bukibuza bwetu pamo ni balupua buli bwakosa, tuli twaunvua  makola ni nsaansa, kabili tuli twakila kumutona Kristu.

11. Ni nzila ki ya bubili ya kutukwasia kukita bukibuza pamo ni Yesu, kabili juu ya ki ezio nzila ni ya mana?

¹¹ (2) Pala nzila yakue Yesu ya kutontonkania ni ya kukita bintu. Vituli kuya twakila kumana buino ni kupala nzila yakue ya kutontonkania, i vili kuya vyakila kukosa bukibuza bwetu pamo nakue. (1 Bakor. 2:16) Kunti twamupala siani Yesu? Mona ozu mufuano. Yesu waali watontonkania saana kubakwasia bange apana kwisaansamusia ye muine. (Mat. 20:28; Bar. 15:1-3) Paantu waali ni malanga azo, waalangiliile mutima wa kwipeela ni kweleela. Taali waleenga kufiitua na beelia byali byalanda bantu palwakue. (Yoane 1:46, 47) Kabili taali walekelela kilubo kyakitile muntu lwa kale, kimulengie amumone ovio ozo muntu. (1 Tim. 1:12-14) Yesu waalandile eevi: “Kine mwatonana, bantu bonse balikumana nangue muli basambi bane.” (Yoane 13:35) Kili buino wiipuzie eevi: “Eba, nkoonkele mufuano wakue Yesu kupitila kukita maka aane onse eevi kusuunga mutende pamo ni balupua ni bankazi?”

12. Ni nzila ki ya butatu ya kukita eevi kwaluka kibuza wakue Yesu, kabili kunti twakita ki eevi kulangilila nangue tuli mukubakwasia balupua bakue Kristu?

¹² (3) Kwasia balupua bakue Kristu. Yesu ali wamona nangue beelia bituli twabakitila balupua bakue babiikilue mafuta, ili nga evelia tuli twamukitila wenka weene. (Mat. 25:34-40) Kintu kya mana saana kituli twakita eevi kulangilila nangue tuli mukuya twabakwasia balupua babiikilue mafuta ni keeki: kusimikila saana Bukolo ni kukita basambi, miilo yalandile Yesu basambi bakue bakite. (Mat. 28:19, 20; Miilo 10:42) Kupitilasie kukwasiiwa na “mikooko inge,” balupua bakue Kristu kunti bafikilizia miilo ikata ya kusimikila kyalo kyonse ili mukukitua leenu. (Yoane 10:16) Kine uli umo wa mikooko inge, musita onse luuli wabomba eezi miilo, uli walangilila ntono ilamatiliile apanasie ku balupua babiikilue mafuta, inzi ni kuli Yesu.

13. Kunti twabombia siani musoko wakue Yesu uli mu lileembo lya Luka 16:9?

¹³ Kabili tuli twakita bukibuza pamo ni Yehova ni Yesu kipitila kubombia nfalanga yeetu eevi kukwasia miilo ibali mukutungulula. (Soma Luka 16:9.) Kwa mufuano, kunti twalongia bulongio palua miilo ya kyalo kyonse. Ezio miilo ibiikile mukati kulongia eevi kukwasia miilo ya kusimikila mpunda iweeme mu tuzonga twa kule, kukuula ni kusuunga Masesi a Bukolo ni bingeko bikuulua; ni kupata bintu bya kukwasia baalia bakinoonekelua na bintu. Kabili kunti twakwasia kilonghaano kyetu kupitila nfalanga, ni kukwasia baalia batumanine nangue bakabiile kukwasiiwa. (Tus Maf. 19:17) Ezio ni nzila ya kubakwasia balupua bakue Kristu.

14. Nga vilandile Baefeso 4:15, 16, ni nzila ki ya buna ya kukita bukibuza pamo ni Yesu?

¹⁴ (4) Kwasia mipaango ya mu kilonghaano kya Kikristu. Tuli twakila kukosia bukibuza bwetu pano ni Yesu, mutue wa kilonghaano, musita utuli twabomba buino pamo ni baalia basaakuilue eevi batusuunge. (Soma Baefeso 4:15, 16.) Kwa mufuano, leenu tuli mukukita maka eevi kusininkizia nangue Masesi a Bukolo ali mukubombiiwa mu nzila ipalile. Eevi kukita evio, bilonghaano binge byakibiikua pamo ni binge ni mipaka ya tuzonga yakipilibulua. Ezio mipaango yakisuunga nfalanga ingi yakilongiiwa mu kuteania kwakue Yehova. Inzi, mu ozo wenka musita, bakasimika bange bapalile kwipatanisia ni aali ya leenu. Babo bakasimika bakisinka kunti baya basyabombele miaka ingi mu kilonghaano kampanda, kabili, kunti baya bakitile saana bukibuza pamo ni balupua ni bankazi mu keekio  kilonghaano. Inzi loonu balandua babombele mu kilonghaano kinge. Yesu ali waunvua saana nsaansa musita lwali wamona babo basambi ba kisinka lubali bakoonka ezio mipaango!

15. Musita uli waiza, bukibuza bwetu pamo ni Yesu bwakakosa siani?

¹⁵ Baalia babiikilue mafuta na mupasi utakatiifu bali ni kiswapilo kya kuya baali pamo ni Yesu loonse, bali mukuteeka pamo nakue mu Bukolo Bwakue Leeza. Kakiine bakaba pamo ni Kristu​—bakaba bamumwene, balanda nakue, ni kupisia musita pamo nakue. (Yoane 14:2, 3) Kabili baalia bali ni kiswapilo kya kwikala pa kyalo, Yesu wakaba wabatonene ni kubapoozako maano. Anzia kine te bakamumona Yesu, bukibuza bwabo pamo nakue bwakakila kukosa paantu bakaba basekelela bukose bwakaletua kuli Yehova ni Yesu.​—Is. 9:6, 7.

16. Tuli twapata mpaalo ki mu kukita bukibuza pamo ni Yesu?

¹⁶ Musita utuli twaitabila mukupo wakue Yesu wa kwaluka babibuza bakue, tuli twapata mpaalo ingi. Kwa mufuano, atasie leenu tuli mukunoonkelamo mu ntono yakue ni kukwasiiwa na weene. Tuli ni lisyuko lya kwikala loonse. Kabili kintu kya mana saana, bukibuza bwetu pamo ni Yesu bwakaba kututungulula mpaka kufika ku bunoonsi bukilile kuwaama​—bukibuza bwa peepi saana bwa kila muntu pamo ni Yehova, Baba wakue kwa Yesu. Tuli ni lisyuko kakiine lya kukuutua babibuza bakue Yesu!