1. Oinsá mak Ita bele sai belun diʼak ho ema ida?

ATU sai belun diʼak ho ema ida, ita presiza uza tempu hamutuk ho nia. Bainhira ita koʼalia ba malu hodi fahe hanoin no esperiénsia, ita sei sai belun diʼak. Maibé la fasil atu sai belun diʼak ho Jesus. Tanbasá?

2. Saida mak susar primeiru neʼebé ita hasoru?

² Susar primeiru mak ita rasik nunka hasoru Jesus. Ema Kristaun barak iha apóstolu sira-nia tempu mós hasoru susar neʼebé hanesan. Maibé, apóstolu Pedro hatete: “Maski imi la haree Kristu, maibé imi hadomi nia. Maski agora imi la haree nia, maibé imi hatudu fiar ba nia.” (1 Ped 1:8) Tan neʼe, ita bele duni habelun ho Jesus maski ita nunka hasoru nia.

3. Saida mak susar segundu neʼebé ita hasoru?

³ Susar segundu neʼebé ita hasoru mak ita labele koʼalia ba Jesus. Bainhira ita halo orasaun, ita koʼalia ba Jeová. Maski ita halo orasaun liuhusi Jesus nia naran, maibé ita koʼalia deʼit ba Jeová. Tuir loloos, Jesus lakohi ita atu halo orasaun ba nia. Tanbasá? Tanba orasaun mak parte ba adorasaun, no ita tenke adora deʼit Jeová. (Mt 4:10) Maski nuneʼe, ita bele nafatin hatudu katak ita hadomi Jesus.

4. Saida mak susar terseiru neʼebé ita hasoru? Iha lisaun neʼe, ita sei aprende kona-ba saida?

⁴ Susar terseiru neʼebé ita hasoru mak Jesus hela iha lalehan, tan neʼe ita labele ransu ho nia. Maski nuneʼe, ita bele koñese liután nia. Ita sei aprende buat haat neʼebé ita bele halo atu hametin ita-nia relasaun belun ho Jesus. Maibé ulukliu mai ita aprende tanbasá importante atu habelun ho Jesus.

5. Tanbasá ita presiza habelun ho Jesus? (Haree mós kaixa “ Habelun ho Jesus sei ajuda ita atu habelun ho Jeová” no “ Iha hanoin neʼebé loos kona-ba Jesus nia knaar”.)

⁵ Ita presiza habelun ho Jesus se ita hakarak atu iha relasaun diʼak ho Jeová. Tanbasá? Hanoin toʼok razaun rua. Primeiru, Jesus hatete ba ninia dixípulu sira: “Aman rasik hadomi imi, tanba imi hadomi ona haʼu.” (João 16:27) Jesus mós dehan: “Ema ida labele hakbesik ba Aman se la liu husi haʼu.” (João 14:6) Se ita koko atu habelun ho Jeová maibé la habelun ho Jesus, neʼe hanesan ita koko tama ba uma ida maibé la liu husi odamatan. Jesus uza ai-knanoik neʼebé hanesan bainhira koʼalia kona-ba ninia an nuʼudar “odamatan ba bibi-malae sira”. (João 10:7) Razaun segundu mak Jesus haleno ninia Aman nia hahalok ho perfeitu. Jesus hatete ba ninia dixípulu sira: “Ema neʼebé haree ona haʼu, haree ona mós Aman.” (João 14:9) Tan neʼe dalan importante atu koñese Jeová mak liuhusi estuda kona-ba Jesus nia moris. Bainhira ita aprende kona-ba Jesus, ita-nia domin ba nia mós sei aumenta liután. No bainhira ita-nia relasaun belun ho Jesus sai metin liután, ita-nia domin ba ninia Aman mós sai boot liután.

6. Razaun saida tan mak hatudu katak ita presiza habelun ho Jesus? Esplika toʼok.

⁶ Ita presiza iha relasaun diʼak ho Jesus atu Maromak rona ita-nia orasaun. Neʼe laʼós deʼit katak ita uza Jesus nia naran bainhira remata ita-nia orasaun. Maibé ita tenke rekoñese dalan neʼebé Jeová uza Jesus atu hatán ba  ita-nia orasaun. Jesus hatete ba apóstolu sira: “Buat naran deʼit neʼebé imi husu hodi haʼu-nia naran, haʼu sei kumpre.” (João 14:13) Maski Jeová mak rona no hatán ba ita-nia orasaun, maibé nia fó ona podér ba Jesus atu kumpre Ninia desizaun. (Mt 28:18) Nuneʼe, antes Maromak hatán ba ita-nia orasaun, nia sei haree uluk se ita aplika ona Jesus nia konsellu. Porezemplu, Jesus hatete: “Se imi fó perdua ba ema neʼebé halo sala hasoru imi, imi-nia Aman iha lalehan mós sei fó perdua ba imi. Maibé se imi la fó perdua ba ema neʼebé halo sala hasoru imi, imi-nia Aman mós sei la fó perdua ba imi-nia sala.” (Mt 6:14, 15) Tan neʼe, importante tebes atu haree malu hanesan Jeová no Jesus haree ita.

7. Sé mak bele hetan benefísiu husi Jesus nia sakrifísiu?

⁷ Só deʼit ema sira neʼebé habelun ho Jesus mak bele hetan benefísiu husi ninia sakrifísiu. Tanbasá ita hatete nuneʼe? Jesus hatete katak nia ‘entrega ninia moris tanba ninia belun sira’. (João 15:13) Ema sira neʼebé serbí Jeová no moris antes Jesus mai iha rai, presiza aprende kona-ba Jesus no hadomi nia. Fiar-naʼin sira hanesan Abraão, Sara, Moisés no Raab sei hetan moris-hiʼas. No maski sira mak Jeová nia atan neʼebé laran-loos, maibé sira mós presiza habelun ho Jesus atu bele moris ba nafatin.—João 17:3; Após 24:15; Ebr 11:8-12, 24-26, 31.

8-9. Tuir João 15:4, 5, habelun ho Jesus loke dalan ba ita atu halo saida? Tanbasá importante atu habelun ho Jesus?

⁸ Ita sente orgullu atu serbisu hamutuk ho Jesus hodi haklaken no hanorin ema kona-ba Maromak nia Ukun. Bainhira Jesus iha rai, nia mak mestre ida. Bainhira Jesus fila fali ba lalehan, nia sai ulun ba kongregasaun, no kontinua dirije serbisu haklaken no hanorin. Nia haree no hafolin Ita-nia hakaʼas an atu ajuda ema barak liután koñese nia no ninia Aman. Tuir loloos, só deʼit ho Jeová no Jesus nia ajuda mak ita bele kumpre serbisu neʼe.—Lee João 15:4, 5.

⁹ Maromak nia Liafuan hanorin ita katak ita tenke haburas no hametin ita-nia domin ba Jesus atu bele halo Jeová kontente. Tan neʼe mai ita aprende buat haat neʼebé ita bele halo atu sai Jesus nia belun.

10. Saida mak hakat primeiru atu haburas relasaun belun ho Jesus?

¹⁰ (1) Koñese Jesus liután. Ita bele halo nuneʼe liuhusi lee evanjellu Mateus, Marcos, Lucas no João. Bainhira ita medita Bíblia nia istória sira kona-ba Jesus nia moris, ita sei hadomi no respeitu liután Jesus tanba nia hatudu laran-diʼak ba ema seluk. Porezemplu, maski nia mak Naʼi, maibé nia la halo ninia dixípulu sira hanesan atan. Jesus fó sai ninia hanoin no sentimentu ba sira. (João 15:15) Bainhira sira triste Jesus mós triste no tanis hamutuk ho sira. (João 11:32-36) Inimigu sira mós bele haree katak Jesus habelun ho ema neʼebé simu ninia mensajen. (Mt 11:19) Bainhira ita banati-tuir Jesus nia dalan atu hatudu laran-diʼak ba ninia dixípulu sira, ita-nia relasaun ho ema seluk sei sai diʼak liu no ita sei sente kontente liu, no mós ita sei hadomi no respeitu nia liután.

11. Saida mak hakat segundu atu haburas relasaun belun ho Jesus? Tanbasá hakat neʼe importante?

 ¹¹ (2) Banati-tuir Jesus nia hanoin no hahalok. Bainhira ita koñese liután Jesus no banati-tuir ninia hanoin, ita-nia relasaun belun ho nia sei sai metin liután. (1 Kor 2:16) Oinsá mak ita bele banati-tuir Jesus? Hanoin toʼok ezemplu ida. Jesus hanoin liu kona-ba ajuda ema seluk duké buka ksolok ba ninia an rasik. (Mt 20:28; Rom 15:1-3) Tanba nia iha hanoin hanesan neʼe, nia la hanoin an deʼit no prontu atu fó perdua. Nia la sai laran-kanek lalais ho ema nia liafuan. (João 1:46, 47) Jesus la tesi-lia ba ema tuir deʼit sala neʼebé sira halo iha tempu uluk. (1 Tim 1:12-14) Importante atu banati-tuir Jesus nia hanoin kona-ba ema seluk tanba Jesus hatete: “Se imi hadomi malu, ema hotu sei hatene katak imi mak haʼu-nia dixípulu.” (João 13:35) Tan neʼe husu ba Ita-nia an: “Haʼu halo tuir Jesus nia ezemplu hodi hakaʼas an haburas dame ho irmaun-irmán sira ka lae?”

12. Saida mak hakat terseiru atu haburas relasaun belun ho Jesus? Oinsá mak ita bele halo ida-neʼe?

¹² (3) Apoia Kristu nia alin sira. Jesus dehan katak buat neʼebé ita halo ba ninia alin sira mak hanesan ita halo ba nia. (Mt 25:34-40) Dalan primeiru atu apoia Kristu nia alin sira mak halo tuir Jesus nia mandamentu hodi laran-manas atu haklaken kona-ba Maromak nia Ukun no hanorin ema sai dixípulu. (Mt 28:19, 20; Após 10:42) Ho ajuda husi “bibi-malae seluk” mak Kristu nia alin sira bele kumpre serbisu haklaken neʼebé halaʼo iha mundu tomak. (João 10:16) Se Ita mak bibi-malae seluk, tempu ida-idak neʼebé Ita haklaken, Ita hatudu sai Ita-nia domin ba Kristu nia alin sira no mós ba Jesus.

13. Oinsá mak ita bele aplika Jesus nia konsellu iha Lucas 16:9?

¹³ Ita mós habelun ho Jeová no Jesus liuhusi fó kontribuisaun atu apoia serbisu neʼebé sira mak dirije. (Lee Lucas 16:9.) Porezemplu, ita bele fó kontribuisaun atu apoia serbisu iha mundu tomak, no kontribuisaun neʼe sei uza atu habelar liafuan diʼak iha fatin izoladu, harii no tau matan ba Reuniaun-Fatin no fatin sira seluk, no mós ajuda irmaun-irmán sira neʼebé kona dezastre. Ita mós bele fó kontribuisaun ba ita-nia kongregasaun, no mós apoia ba irmaun-irmán neʼebé presiza ajuda. (Prov 19:17) Neʼe mak dalan oioin atu apoia Kristu nia alin sira.

14. Tuir Éfeso 4:15, 16, saida mak hakat haat atu haburas relasaun belun ho Jesus?

¹⁴ (4) Apoia arranju sira husi Jeová nia organizasaun. Ita bele habelun ho Jesus, kongregasaun nia ulun, hodi apoia ema sira neʼebé simu knaar atu tau matan ba ita. (Lee Éfeso 4:15, 16.) Porezemplu, ita hakaʼas an atu uza didiʼak Reuniaun-Fatin hotu. Tan neʼe mak agora kongregasaun balu sai ida deʼit no iha mós mudansa ba sira-nia haklaken-fatin. Hodi halo nuneʼe, organizasaun bele poupa osan kontribuisaun. Maibé tanba mudansa neʼe, haklaken-naʼin balu presiza hakaʼas an atu sai toman ho situasaun foun. Irmaun-irmán laran-metin sira-neʼe karik tuir ona kongregasaun ida ba tinan barak no karik sai belun ho irmaun-irmán seluk ba tempu kleur. Maibé agora, sira simu knaar atu serbí iha kongregasaun seluk.  Jesus sente kontente tebes bainhira haree dixípulu laran-metin sira-neʼe apoia arranju neʼe.

15. Oinsá mak ita-nia relasaun belun ho Jesus sei sai diʼak liután iha futuru?

¹⁵ Ema sira neʼebé Maromak hili liuhusi espíritu santu iha esperansa atu hamutuk ho Jesus ba nafatin iha lalehan, no serbí nuʼudar ukun-naʼin hamutuk ho Jesus iha Maromak nia Ukun. Sira sei haree Jesus, koʼalia no uza tempu hamutuk ho Jesus. (João 14:2, 3) Ema sira neʼebé iha esperansa atu moris iha rai mós sei hetan Jesus nia domin no atensaun. Maski sira labele haree Jesus, maibé sira-nia relasaun nuʼudar belun sei sai metin liután bainhira sira goza moris neʼebé Jeová no Jesus fó ba sira.—Isa 9:6, 7.

16. Ita hetan bensaun saida deʼit hodi habelun ho Jesus?

¹⁶ Ita hetan bensaun barak bainhira ita simu Jesus nia konvite atu sai ninia belun. Porezemplu, agora ita hetan benefísiu husi ninia domin no apoia. Ita iha oportunidade atu moris ba nafatin. No importante liu mak ita-nia relasaun belun ho Jesus sei ajuda ita atu iha relasaun diʼak ho ninia Aman Jeová. Ita sente orgullu tebes tanba bele habelun ho Jesus.