1. Wa gu vbaha kharini wupari wa vbafuvbi ni muthu nyo khaguri?

GUTALA nya dzitepo, gilo nyo pheye hi girago gasi gu thanga wupari ni muthu nyo khaguri khu gu vbungadza naye. Tepo mu bhulago khesi mu si pimisago ni esi si gomogo myonyoni gwanu, mwa gu khala dzipari. Ganiolu gasi gu khala pari nya yikhongolo ya Jesu dzimbe dzitepo kha si vbevbugi. Khu ginani?

2. Khu gevbini gigaradzo nyo pheye hi emisanago nagyo?

² Gigaradzo nyo pheye khu gu kha ha muti Jesu khovbe ni khovbe. Makristo nyo khaguri ya lizana myaga nyo pheye ma emisanide ni gigaradzo nyo fane. Ambari ulolo, mupostoli Pedro a di khuye: “Enu mu ngu mu haladza, ambari mu ngamba mu wona; mu ngu khodwa gwaye, ambari mu si mu wonigo olu.” (1 Ped. 1:8) Khu kharato, si ngu kodzega gu manega ni wupari wa vbafuvbi ni Jesu ambari ha gu mba mu wona khovbe ni khovbe.

3. Khu gevbini gigaradzo nya wuvili hi emisanago nagyo?

³ Gigaradzo nya wuvili khu gu hi mwalo makodzelo nyo bhule ni Jesu. Tepo hi gombeyago, ha gu ganeya ni Jehovha abune. Lisine gu ha gu gombeya khu lina la Jesu ganiolu ho ganeya ni Jehovha. Khu lisine, Jesu kha vbweti gu khuye hi yisa milombelo yathu gwaye. Khu ginani? Kholu nombelo wo gira gipandre nya wukhozeyi wathu nigu khu Jehovha basi a yedego gu khozedwa. (Mat. 4:10) Ambari ulolo, hi nga yeyedza lihaladzo lathu khu Jesu.

4. Khu gevbini gigaradzo nya wuraru nigu ginani hi na bhulago khigyo avba nya ndrima yeyi?

 ⁴ Gigaradzo nya wuraru khu gu Jesu a gu vbanya ndzadzini, khu kharato kha hi si kodzi gu vbungadza naye. Ganiolu, hi nga si kodza guti nya singi khu Jesu ambari nya mba wonana naye khovbe ni khovbe. Hi na wona silo sina hi nga girago gasi hi tiyisa wupari wathu ni Jesu. Nyo pheye, hongoleni hi bhuleni khu lisima nya gu hi vbaha wupari wa vbafuvbi ni Kristo.

5. Khu ginani hi yedego gu khala dzipari dza Jesu? (Wona dzikwadru, “Wupari ni Jesu khuwo wu hi phasago gu khala dzipari dza Jehovha” ni “Ninganiseya lihaladzo lago khu Jehovha ni Jesu.”)

⁵ Gu vbwetega hi khala dzipari dza Jesu ha gu ba hi vbweta gu khala dzipari dza Jehovha. Khu ginani? Nga wona sighelo sivili. Nyo pheye, Jesu a di embeya vapizane vaye khuye: “Babe a ngu mi gola, kholu mu nyi godego.” (Joh. 16:27) A bwe khuye: “Mwalo a vbohago ga Babe nyamba yiswa kheni.” (Joh. 14:6) Gu zama gu khala pari ya Jehovha nya mba pheya khu gu khala pari ya Jesu so fana ni gu zama gu beya nyumbani nyamba thumisa mwanya. Jesu thumiside gipimaniso nyo fane tepo a nga dzi fananisa ni “mwanya dzi belago khavbo dzinvuta.” (Joh. 10:7) Gighelo nya wuvili khu gu Jesu pimedzede makhalelo ya Papayi waye khu gu vbeleya. A di embeya vapizane vaye khuye: “Uye a nyi wonago, a ngu wona Babe.” (Joh. 14:9) Khu kharato, gimwegyo nya silo nya lisima gi nga hi phasago gu khala dzipari dza Jehovha khu gu hevbula womi wa Jesu. Tepo hi hevbulago khu Jesu, lihaladzo lathu khuye li na engedzeya gu dandra. Nigu tepo wupari wathu ni Jesu wu dandrago, wupari wathu ni Papayi waye wu na engedzeya.

6. Khu gevbini gimbe gighelo gi hi kutsago gu manega ni wupari ni Jesu? Tshamuseya.

⁶ Gu vbwetega hi khala dzipari dza Jesu gasi yi  hlamudwa milombelo yathu. Isoso kha si thuli basi gu ganeya gu khethu, khu “lina la Jesu,” guhegisani nya milombelo yathu. Gu vbwetega hi pwisisa edzi Jehovha a thumisago khidzo Jesu gasi gu hlamula milombelo yathu. Jesu a di embeya vapostoli vaye khuye: “Ni gevbini mu na lombago khu lina langu, nyi na mi girelani.” (Joh. 14:13) Ambari olu Jehovha a gu uye basi a engiseyago ni gu hlamula milombelo yathu, ningide Jesu thumo nyo khathaleye esi A hungago gu gira. (Mat. 28:18) Na si gu hlamuli milombelo yathu, Nungungulu a gu pheya khu gu vbweta guti gu khuye ina hi ngu landreya wusingalagadzi wa Jesu gani. Khu giyeyedzo, Jesu a di khuye: “Kholu mwa gu divalela vathu sihoso sawe va nga mi hoseyago, Babe wanu a guromo Ndzadzini a na mi divalela nenu. Aholu mwa gumba divalela sihoso sa avo va mi hoselago, Babe wanu nuye kha na mi divalela nenu sihoso sanu.” (Mat. 6:14, 15) Khu lisine, si na ni lisima ngudzu gu hi phara vambe khu ndziya yayimweyo eyi Jehovha ni Jesu va hi pharago khiyo!

7. Khu vamani va phasegago khu muphaso nya dzegiso wa Jesu?

⁷ Vale va gu dzipari dza Jesu khavo basi va na phasegago khu muphaso waye nya dzegiso. Ha gu dziti kharini? Jesu a di khuye a di hadzi ‘ningela womi khu gufela dzipari dzaye.’ (Joh. 15:13) Vathu va thumedego Jehovha tepo Jesu a nga ba a nga si guti mafuni si na lomba gu va ta hevbula khu Jesu va bwe va mu haladza. Vathu vovo nyo tumbege, nya nga Abrahama, Sara, Mosi ni Rahabe va na wuswa ga tepo yitago. Ganiolu, ambari sithumi soso nyo lulame sa Jehovha gu na vbwetega gu si khala dzipari dza Jesu gasi si mana guvbanya nya gupindruge. — Joh. 17:3; Mith. 24:15; Hebh. 11:8-12, 24-26, 31.

8-9. Kha nga si tshamusedwego ga Johane 15:4, 5, wupari hi gu nawo ni Jesu wa gu hi tuleya ndziya nyo gire ginani nigu khu ginani si gu na ni lisima?

⁸ Hi ngu tsaka ngudzu khu gu thuma ni Jesu thumoni nyo tshumayele ni gu hevbudza mahungu nya yadi nya Mufumo. Tepo Jesu a nga ba ari mafuni, a diri muhevbudzi. Tepo a nga bweleya ndzadzini, kha nga hungo nya libandla, a diya simama gu thangeya thumo nyo tshumayele ni gu hevbudza. Jesu a ngu ninga lisima ni gu bonga khu mizamo yatshavbo u yi girago gasi gu phasa nya vangi gu muti ni guti Papayi waye gambe. Khu lisine, hi na si kodza basi gu gira gwadi thumo wowu khu gu phaswa khu Jehovha ni Jesu. — Leri Johane 15:4, 5.

⁹ Lito la Nungungulu la gu hi hevbudza gu khilo gu vbwetega hi simama gu haladza Jesu gasi hi si kodza gu tsakisa Jehovha. Khu kharato, hongoleni hi wonani sighelo sina si nga hi phasago gu khala dzipari dza Jesu.

10. Khu gevbini gilo nyo pheye hi yedego gu gira gasi gu vbaha wupari ni Jesu?

¹⁰ 1) U yede gu muti gwadi Jesu. Hi nga gira isoso khu gu leri mabhuku nya Bhibhiliya nya nga Matewu, Marko, Luka ni Johane. Tepo hi dundrugeyago khu matimo ma gomogo omu nya Bhibhiliya ma ganeyago khu womi wa Jesu, lihaladzo lathu ni githawo gyathu khu Jesu sa gu engedzeya tepo hi wonago edzi a pharidego khidzo vathu khu wuwadi. Khu giyeyedzo, ambari olu a nga ba ari Mune wawe, uye kha phara vapizane vaye nga dzigumbi. Wulangani nya isoso, uye a di gu va embeya esi a nga ba a si pimisa ni esi si nga ba siri monyoni gwaye. (Joh. 15:15) Tepo va pwidego wuvi, Jesu nuye pwide wuvi; tepo va nga liya, Jesu nuye lide. (Joh. 11:32-36) Ambari vawugeyi vaye va di gu dziti gu khavo Jesu a diri pari ya vale va nga ba va hakha mahungu yaye. (Mat. 11:19) Tepo hi pimedzeyago ndziya eyi Jesu a pharidego khiyo vapizane vaye, wupari wathu ni vambe wu na engedzeya nigu hi na khala na hi tsakide hi bwe hi engedzeya lihaladzo ni githawo hi gu nagyo khu Kristo.

11. Khu gevbini gilo nya wuvili hi yedego gu gira ha gu ba hi vbweta gu khala dzipari dza Jesu nigu khu ginani gi gu na ni lisima?

 ¹¹ 2) Pimedzeya esi Jesu a giridego ni ndziya a nga ba a pimisa khiyo. Tepo hi yago hi muti gwadi ni gu pimedzeya edzi a nga ba a pimisa khidzo, wupari wathu naye wa gu dandra nuwo. (1 Kor. 2:16) Hi nga pimedzeya kharini Jesu? Nga wona giyeyedzo gimwegyo. Jesu a di gu pimisa ngudzu khedzi a nga phasago khidzo vambe wulangani nya edzi a nga dzi tsakisago khidzo. (Mat. 20:28; Rom. 15:1-3) Khu kotani nya olu a nga ba a pimisa khu ndziya yeyi, uye a di gu dzi hiya nya singi ni gu divaleya vambe. Kha nga ba a vbiredzeya gu goroga khu kotani nya esi vathu va nga ba va ganeya khuye. (Joh. 1:46, 47) Nigu uye kha nga ba a dzumeleya gu khuye gihoso gi giridwego khu muthu nyo khaguri gale yoyo gi mu gira a mu phara khu ndziya nyo vivbe. (1 Thim. 1:12-14) Jesu a di khuye: ‘Vathu va na dziti nya gu khavo mu vapizane vangu, mwa gu golanani khu gyanu.’ (Joh. 13:35) Si na ni lisima ngudzu gu dzi wudzisa esi: “Ina nyi ngu pimedzeya giyeyedzo gya Jesu khu gu gira satshavbo si gomogo tshivbani gwangu gasi gu gira gurula ni vandriyathu?”

12. Khu gevbini gilo nya wuraru hi yedego gu gira ha gu ba hi vbweta gu khala dzipari dza Jesu nigu hi nga gi gira kharini?

¹² 3) Phasedzeya vandriye va Kristo. Jesu a gu wona esi hi gireyago vandriyathu va todzidwego nga khatshi ha gu gireya uye. (Mat. 25:34-40) Ndziya nyo pheye hi va phasedzeyago khiyo khu gu patega ngudzu thumoni nyo tshumayele Mufumo ni thumoni nyo gire vapizane owu Jesu a leletedego valandreyi vaye gasi va wu gira. (Mat. 28:19, 20; Mith. 10:42) Vandriye va Kristo va nga si kodza basi gu gira thumo nya gutshumayele wu girwago matshiguni yathu khu gu phaswa khu “dzimbe dzinvuta.” (Joh. 10:16) Wo ba u gira gipandre nya dzimbe dzinvuta, tepo ni tepo u tshumayelago wa gu yeyedza gu khuwe u ngu haladza vandriyathu va todzidwego ni Jesu.

13. Hi nga thumisa kharini wusingalagadzi wa Jesu wu gomogo omu ga Luka 16:9?

¹³ Ha gu gira gambe wupari ni Jehovha ni Jesu khu gu gira miningelo gasi gu phasedzeya thumo va wu gimbidzisago. (Leri Luka 16:9.) Khu giyeyedzo, hi nga ningeya gilogyo gasi gu phasedzeya thumo wu girwago mafuni gwatshavbo, wu patago thumo nya gutshumayele mahungu nya yadi malangani ya hwindzo, gu vbaha ni gu wusedza dziSalawu nya Mufumo ni dzimbe dzinyumba dzi thumiswago khu hengeledzano ni gu phasedzeya vale va thegedwego khu dzimhango nya tumbunugo. Hi nga gira miningelo nyo khaguri gasi gu phasedzeya gambe libandla lathu ni gu phasedzeya vandriyathu va vbwetago giphaso. (Mav. 19:17) Edzi khidzo dzindziya hi nga phasedzeyago khidzo vandriye va Kristo.

14. Kha nga hi si wonidego ga Vaefeso 4:15, 16, khu gevbini gilo nya wuna hi yedego gu gira gasi hi khala dzipari dza Jesu?

¹⁴ 4) Seketeya malulamiselo ma girwago khu hengeledzano ya Jehovha. Ha gu khala dzipari nya dzikhongolo dza Jesu, a gu uye hungo nya libandla, tepo hi seketeyago vale a va emisidego gasi gu hi khathaleya. (Leri Vaefeso 4:15, 16.) Khu giyeyedzo, hi yede gu thumisa gwadi dzatshavbo dziSalawu nya Mufumo. Gasi gu isoso si kodzega, mabandla nyo khaguri ma ngu patwa ni mambe nigu mivbingano nya sipandre nyo khaguri yi ngu vbindrugedzwa. Khu ndziya yeyi, hengeledzano yi ngu thumisa khu wugengeyi miningelo yi giredwego gu phasedzeya hengeledzano ya Jehovha. Nigu isoso sa gu lomba gu vambe vahuweleyi va dzi pwananisa ni giemo nya giphya. Si nga gira vahuweleyi vovo nyo tumbege na va thumede libandlani nyo khaguri khu myaga nya yingi va bwe va oloveyana ngudzu ni vandriyathu va libandlani lolo. Ganiolu, olu, va gu lombwa guya thumeya ga limbe libandla. Jesu a ngu tsaka ngudzu khu gu wona vapizane vovo nyo tumbege na va gu seketeya malulamiselo nya hengeledzano!

15. Wupari wathu ni Jesu wu na engedzeya kharini mindru wa tshigu?

¹⁵ Vale va todzwago khu liphuvbo nya guage va na ni gutumba nyo fume ni Jesu kala gupindruga Mufumoni wa Nungungulu. Avo va na mu wona Jesu, va na bhula naye va bwe va vbungadza naye. (Joh. 14:2, 3) Vale va gu na ni gutumba nyo vbanye mafuni anavo va na haladzwa ni gu khathaledwa khu Jesu. Ambari olu nya gu kha va na nga mu wona Jesu, lihaladzo lawe khuye li na tiya tepo va dzi buzago khu womi owu va ningidwego khu Jehovha ni Jesu. — Isa. 9:6, 7.

16. Makategwa muni hi ma manago khu gu khala dzipari dza Jesu?

¹⁶ Tepo hi dzumeyago gu khala dzipari dza Jesu, ha gu mana makategwa nya mangi. Khu giyeyedzo, hi ngu phasega khu lihaladzo laye ni giphaso gyaye olu. Hi na ni lithomo nyo vbanye kala gupindruga. Nigu nya lisima ngudzu, wupari ni Jesu wu na hi gira hi manega ni wupari nya lisima ngudzu ga watshavbo, gu gu wupari wa vbafuvbi ngudzu ni Papayi wa Jesu, Jehovha. Khu lisine, lithomo nya likhongolo gu ranwa dzipari dza Jesu!