ARTÍCULO NEMA NATALIKGALHTAWAKGA 17
«Kiʼamigos kkalimapakuwinitan»
«Kiʼamigos kkalimapakuwinitan, xlakata kkamasiyaninitan putum tuku kinTlat lichuwinanit» (JUAN 15:15).
TAKILHTLIN 13 Cristo, kili’akxilhtitkan
TUKU NATALICHUWINAN *
1. ¿Tuku tlan natlawakgo chatiy latamanin xlakata tlan amigos nawanaw?
XLAKATA chatiy latamanin tlan amigos nalitaxtukgo, talakaskin nalimaxtukgo kilhtamaku xlakata akxtum natawilakgo, nalichuwinankgo tuku lakpuwankgo, tuku makgkatsikgo chu tuku tlawakgonit. Pero akxni lilakpuwanaw xlakata xʼamigos Jesús nawanaw, max tuwa namakgkatsiyaw. Kaʼakxilhwi tuku xlakata.
2. ¿Tuku xlipulana max natlawa pi tuwa namakgkatsiyaw xʼamigos Jesús nawanaw?
2 Pulana wa pi akinin ni akxilhnitaw Jesús. Lhuwa kstalaninanin Cristo kxapulana siglo nachuna titaxtukgolh. Maski chuna, apóstol Pedro kawanilh: «Wanti ni a ukxilhatit paxkiyatit; chu wa nti maski ni ukxilhpatit [...] kanajlaniyatit» (1 Ped. 1:8). Chuna, ni talakaskin naʼakxilhaw Jesús xlakata xʼamigos nawanaw.
3. ¿Tuku xlipulaktiy tuwa namakgkatsiyaw xʼamigos Jesús nawanaw?
3 Xlipulaktiy wa pi nila tachuwinanaw Jesús. Akxni tlawayaw oración, wa tachuwinanaw Jehová. Xlikana pi akxni tlawayaw oración, maklakaskinaw xtukuwani Jesús, pero ni wa tachuwinanaw. Asta Jesús ni lakaskin pi wa natlawaniyaw oración, xlakata oración wa tuku limastayaw kakni chu kajwatiya nakakninaniyaw Jehová (Mat. 4:10). Maski chuna, tlan nalimasiyayaw pi paxkiyaw Jesús.
4. 1) ¿Tuku xlipulaktutu tuwa namakgkatsiyaw xʼamigos Jesús nawanaw? 2) ¿Tuku naʼakxilhaw kʼuma artículo?
4 Xlipulaktutu wa pi nila akxtum tatawilayaw Jesús xlakata xla wilacha kʼakgapun. Pero maski ni akxtum tawilaw Jesús, lhuwa tuku tlan nakatsiniyaw xpalakata. Kʼuma artículo naʼakxilhaw pulaktati tuku natlawayaw xlakata tlan xʼamigo nawanaw. Pero pulana kaʼakxilhwi tuku xlakata xlakaskinka tlan xʼamigos nawanaw.
¿TUKU XLAKATA XʼAMIGOS JESÚS NAWANAW?
5. ¿Tuku xlakata xʼamigos Jesús nawanaw? (Na kaʼakxilhti recuadro « Xʼamigos Jesús nalitaxtuyaw tlawa pi xʼamigos Jehová nawanaw» chu « Kaʼakxilhwi Jesús chuna la xlilat»).
5 Talakaskin pi xʼamigos Jesús nawanaw xlakata tlan natalalinaw Jehová. ¿Tuku xlakata chuna wanaw? Kaʼakxilhwi pulaktiy. Pulana, Jesús kawanilh kstalaninanin: «XaTlat nti nkapaxkiyan, xpalakata mpi kimpaxkinitantit wixin» (Juan 16:27). Chu wampa: «Nitila lakgmin xaTlat para ni kimpalakata» (Juan 14:6). Komo ni xʼamigos Jesús akinin nila xʼamigos Jehová katilitaxtuw, xtachuna la komo xtanuputuw kʼakgtum chiki chu ni xlaktanuputuw kmalakcha. Jesús maklakaskilh atanu liʼakxilhtit akxni wa pi xtachuna «malakcha antani nalaktanukgoy borrego» (Juan 10:7). Xlipulaktiy wa pi Jesús liwana masiyalh xtayat xTlat. Kawanilh kstalaninanin: «Wa nti nkiʼukxilhnita, ukxilhnita xaTlat» (Juan 14:9). Xlakata liwana nalakgapasaw Jehová talakaskin nalakgapasaw Jesús. Akxni tlakg nakatsiyaw xpalakata, tlakg napaxkiyaw. Chu akxni tlakg nalakgtalakatsuwiyaw Jesús, tlakg napaxkiyaw xTlat.
6. ¿Tuku atanu xlakata xlakaskinka xʼamigos Jesús nawanaw?
6 Talakaskin xʼamigos Jesús nalitaxtuyaw xlakata tlan nakgalhtikan kioracioneskan. Uma kilhchanima pi ni kajwatiya nalismaniyaw nawanaw “kxtukuwani Jesús” akxni masputuyaw kioracionkan. Talakaskin naʼakgatekgsaw la maklakaskin Jehová xKgawasa xlakata nakgalhti kioracioneskan. Jesús kawanilh kstalaninanin: «Putum tuku naskinatit kkintukuwani, akit naktlawa» (Juan 14:13). Jehová wa tiku kgaxmata chu kgalhti kioracioneskan, pero maxkinit limapakgsin Jesús xlakata wa natlawa tuku Jehová laksaka (Mat. 28:18). Kalilakpuwaw tuku la akxni skiniyaw Jehová pi kakinkatapatin kintalakgalhinkan. Akxni nina kinkakgalhtiyan, pulana akxilha komo makgantaxtimaw xtastakyaw Jesús. Akgtum liʼakxilhtit, xla wa: «Komo nakatapatiyatit amakgapitsin tuku nitlan katlawanikgoyan, minTlatkan xalak akgapun na nakatapatiyan. Pero komo ni nakatapatiyatit amakgapitsin tuku nitlan katlawanikgoyan, minTlatkan xalak akgapun na ni katikatapatin» (Mat. 6:14, 15). ¿Nixlikana pi xlakaskinka nakalimasiyaniyaw talakgalhaman amakgapitsin chuna la Jehová chu Jesús kinkalimasiyanikgoyan?
7. ¿Tuku kilitlawatkan xlakata tlan nalitamakgtayayaw tamakamastan nema tlawalh Jesús?
7 Kajwatiya tiku tlan talalinkgo Jesús nalitamakgtayakgo tamakamastan nema xla tlawalh. ¿Tuku likatsiyaw? Jesús wa pi xʼama masta «xlatamat xpalakata xʼamigos» (Juan 15:13). Xlakskujnin Dios tiku latamakgolh akxni Jesús nina xmin kKatiyatni talakaskin nalakgapaskgo chu napaxkikgo. Lakchixkuwin chu lakpuskatin tiku xaʼakgstitum latamakgolh la komo Abrahán, Sara, Moisés chu Rahab nalatamaparakgo, pero nachuna xlakan talakaskin xʼamigos Jesús nalitaxtukgo xlakata tlan namakglhtinankgo latamat nema ni kgalhi xlisputni (Juan 17:3; Hech. 24:15; Heb. 11:8-12, 24-26, 31).
8, 9. Chuna la wan Juan 15:4, 5, ¿tuku tlan natlawayaw xlakata xʼamigos Jesús litaxtuyaw, chu tuku xlakata tlan akxtum natatawilayaw?
8 Kgalhiyaw talakgalhaman nataskujaw Jesús akxni lichuwinanaw chu masiyayaw xalakwan tamakatsinin xla Tamapakgsin. Akxni xla xlama kKatiyatni, masiyalh tuku xaxlikana xlakata Dios. Chu alistalh taspitpa kʼakgapun, la komo xʼakgxakga congregación, chu chuntiya pulalima uma taskujut. Lhuwa xtapalh liʼakxilha taskujut nema tlawayaw xlakata nakamasiyaniyaw latamanin xpalakata chu xpalakata xTlat. Nachuna, tlan tlawayaw uma taskujut xlakata kinkamakgtayakgoyan Jehová chu Jesús (kalikgalhtawakga Juan 15:4, 5).
9 Biblia liwana kinkamasiyaniyan pi talakaskin napaxkiyaw Jesús komo makgapaxuwaputunaw Jehová. Wa xlakata kaʼakxilhwi pulaktati tuku talakaskin natlawayaw xlakata tlan xʼamigos Jesús nawanaw.
LA TLAN XʼAMIGOS JESÚS NAWANAW
Tlan x’amigos Jesús nawanaw 1) komo tlakg liwana nalakgapasaw, 2) nalakpuwanaw chu nalikatsiyaw chuna la xla, 3) nakamakgtayayaw xnatalan Cristo chu 4) nakakgalhakgaxmataw tuku laksakkgo lakgkgolotsin (Kaʼakxilhti párrafos 10 asta 14). *
10. ¿Tuku pulana kilitlawatkan xlakata tlan xʼamigos Jesús nawanaw?
10 Pulana, kalakgapaswi Jesús. Xlakata nalakgapasaw talakaskin nalikgalhtawakgayaw libros xla Mateo, Marcos, Lucas chu Juan. Akxni nalilakpuwanaw xlatamat Jesús chu naʼakxilhaw la kalimasiyanilh talakgalhaman latamanin, tlakg napaxkiyaw chu namaxkiyaw kakni. Akgtum liʼakxilhtit, ni kalikatsinilh kstalaninanin la komo lakskujnin, maski xla xMalanakan xwanit. Wata la komo xʼamigos kalikatsinilh chu kawanilh tuku xmakgkatsi chu tuku xlakpuwan (Juan 15:15). Xmakgkatsi tuku nitlan xtitaxtukgo chu xkatatasa (Juan 11:32-36). Asta xtalamakgasitsin akxilhkgolh pi tiku makgamakglhtinankgolh xtamakatsinin, xʼamigos litaxtukgolh (Mat. 11:19). Komo nachuna nakalikatsiniyaw amakgapitsin chuna la xla kalikatsinilh kstalaninanin, tlakg tlan nakatalalinaw, tlakg napaxuwayaw, napaxkiyaw chu chuna tlakg namaxkiyaw kakni Cristo.
11. ¿Tuku xlipulaktiy kilitlawatkan xlakata tlan xʼamigos Jesús nawanaw, chu tuku xlakata lu xlakaskinka?
11 Xlipulaktiy, kalakpuwaw chu katlawaw chuna la Jesús. Akxni tlakg nalakgapasaw chu nachuna nalakpuwanaw chuna la xla, tlakg natatliwakglha la talalinaw (1 Cor. 2:16). ¿La tlan nastalaniyaw xliʼakxilhtit? Kaʼakxilhwi akgtum liʼakxilhtit. Xla tlakg xlakaskinka xʼakxilha nakamakgtaya amakgapitsin nixawa xʼakstu nalilakgaputsakan (Mat. 20:28; Rom. 15:1-3). Xlakata xla chuna xlakpuwan, pulana xkalilakgaputsa amakgapitsin chu nachuna xkatapati. Ni lakapala ksitsi xlakata tuku xwankgo kxpalakata (Juan 1:46, 47). Chu ni xkamalakapastaka latamanin tuku nitlan xtlawakgonit o xwankgonit (1 Tim. 1:12-14). Lu xlakaskinka nastalaniyaw xliʼakxilhtit, xlakata lichuwinalh: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat lapi xlakgalhinitit ntapaxkit nchatunu chatunu» (Juan 13:35). Wa xlakata, kalilakpuwaw: «Chuna la Jesús, ¿lu kliskuja xlakata tlan nakkatalalin kinatalan?».
12. ¿Tuku xlipulaktutu kilitlawatkan xlakata tlan xʼamigos Jesús nawanaw, chu la natlawayaw?
12 Xlipulaktutu, kakamakgtayaw xnatalan Cristo. Jesús wan pi akxni kamakgtayayaw xnatalan tiku xatalaksakni xtachuna la komo wa makgtayayaw (Mat. 25:34-40). Niku tlakg tlan nakamakgtayayaw wa akxni anaw lichuwinanaw Dios nema kalimapakgsilh kstalaninanin: nalichuwinanaw Tamapakgsin chu kstalaninanin nakatlawayaw latamanin (Mat. 28:19, 20; Hech. 10:42). Xtamakgtaykan «amakgapitsi borregos» xlakaskinka, xlakata xnatalan Cristo tlan namakgantaxtikgo taskujut xlakata tlan natalichuwinan Dios la uku xlikalanka kakilhtamaku (Juan 10:16). Komo akinin litaxtuyaw amakgapitsi borregos, akxni lichuwinanaw Dios limasiyayaw pi kapaxkiyaw tiku xatalaksakni chu nachuna Jesús.
13. ¿La tlan namakgantaxtiyaw tastakyaw nema lichuwinalh Jesús kLucas 16:9?
13 Na xʼamigos Jehová chu Jesús litaxtuyaw akxni maklakaskinaw kintuminkan xlakata nalimakgtayananaw tlan natatlawa taskujut nema xlakan pulalinkgo (kalikgalhtawakga Lucas 16:9). Akgtum liʼakxilhtit, tlan xatapaxuwan namastayaw kintuminkan xlakata nalimakgtayananaw tlakg tlan nalichuwinankan Dios niku lakgamakgat, niku tlawamaka Pukgalhtawakga chu niku kaxtlawakan kimPukgalhtawakgakan, chu akxni titaxtu tuku masputunan. Nachuna tlan xatapaxuwan namastayaw kintuminkan kkincongregacionkan chu nakamakgtayayaw natalan tiku ni kgalhikgo tuku maklakaskinkgo (Prov. 19:17). Chuna la uma tlan nakamakgtayayaw xnatalan Cristo.
14. Chuna la wan Efesios 4:15, 16, ¿tuku xlipulaktati kilitlawatkan xlakata tlan xʼamigos Jesús nawanaw?
14 Xlipulaktati, katatayaw tuku laksaka xkachikin Jehová. Chuna la talalinaw Jesús, tiku x’akgxakga congregación, tatliwakglha akxni akxtum kataskujaw natalan tiku kalaksakkanit xlakata nakinkakuentajtlawakgoyan (kalikgalhtawakga Efesios 4:15, 16). Akgtum li’akxilhtit, xkachikin Jehová liwana lakkaxwilima xlakata tlakg liwana namaklakaskinaw kimpukgalhtawakgakan. Wa xlakata makgapitsi congregaciones lakxtum katlawaka chu nachuna lakkaxtlawaka niku lichuwinanaw Dios. Chu lu tlan kitaxtunit, xlakata nialh lhuwa tumin laktlawakanit. Nachuna uma tlawanit pi makgapitsi tiku lichuwinankgo Dios lismanikgonit xlakata talakgpalinit tsinu xlatamatkan. Max makgapitsi natalan akglhuwata kata xwilakgolh k’akgtum congregación chu lu kapaxkikgo natalan. Pero la uku kawanikanit pi na’ankgo kʼatanu congregación. Max lu lipaxuwa Jesús akxni akxilha pi kstalaninanin makgtayanankgo akxni tlawakan akgtum talakgpalit kxkachikin.
TLAN X’AMIGOS JESÚS NAWANAW PUTUM KILHTAMAKU
15. ¿Chuntiya x’amigos Jesús nawanaw kkilhtamaku nema aku mima?
15 Kstalaninanin Cristo tiku kalilaksakkanit espíritu santo kgalhkgalhimakgo akxtum natatawilakgo Jesús putum kilhtamaku chu natamapakgsinankgo kxTamapakgsin Dios. Na’akxilhkgo, natachuwinankgo chu akxtum natatawilakgo (Juan 14:2, 3). Tiku kgalhkgalhimakgo nalatamakgo unu kKatiyatni nachuna nalipaxuwakgo xtapaxkit chu la nakakuentajtlawa Jesús. Maski ni na’akxilhkgo, tlakg tlan natalalinkgo chu nalipaxuwakgo xatlan latamat nema Jehová chu Jesús nakamaxki (Is. 9:6, 7).
16. ¿Tuku tasikulunalin namakglhtinanaw xlakata x’amigos Jesús litaxtuyaw?
16 Akxni x’amigos Jesús litaxtuyaw, makglhtinanaw lhuwa tasikulunalin. Akgtum li’akxilhtit, kgalhiyaw xtapaxkit chu xtamakgtay la uku. Nachuna kgalhiyaw talakaskin nalatamayaw putum kilhtamaku. Chu tuku tlakg xlakaskinka, xlakata talalinaw Jesús natlawa pi tlan natalalinaw tiku tlakg xlakaskinka: xTlat, Jehová. Akgtum lanka talakgalhaman pi x’amigos Jesús nalitaxtuyaw.
TAKILHTLIN 17 «Klakaskin»
^ párr. 5 Kmakgapitsi kata, apóstoles kgalhikgolh talakgalhaman natachuwinankgo chu nataskujkgo Jesús, chu lu tlan amigos litaxtukgolh. Jesús nachuna lakaskin pi xʼamigos kalitaxtuw, pero akinin max tsinu tuwa makgkatsiyaw, nixawa apóstoles. ¿Tuku xlakata? Kʼuma artículo nalichuwinanaw makgapitsi tuku tlan natlawayaw xlakata tlan natalalinaw Jesús.
^ párr. 55 TUKU TASIYA KDIBUJO: 1) Akxni kakninanikan Dios kfamilia, likgalhtawakgayaw xlakata xlatamat chu xtaskujut Jesús. 2) Anta kcongregación liskujaw xlakata tlan nakatalalinaw kinatalankan. 3) Komo lu namakgtayananaw xlakata nalichuwinanaw Dios, kamakgtayayaw xnatalan Cristo. 4) Akxni congregaciones lakxtum katlawakan, kamakgtayayaw tuku laksakkgo lakgkgolotsin.
