SAPOS yu laik kamap gutpela pren bilong wanpela man, yu mas lusim sampela haptaim long stap wantaim em. Taim yutupela i toktok long narapela narapela, autim ol tingting na filings, na stori long ol ekspiriens, yutupela bai kamap gutpela pren. Yumi laik kamap gutpela pren bilong Jisas, tasol i gat ol hatwok. Wanem sampela hatwok?

2. Wanem namba 1 hatwok bilong yumi?

² Namba 1: Yumi no bin bungim Jisas. Long taim bilong ol aposel, planti Kristen i no bin bungim Jisas. Tasol aposel Pita i tok: “Maski yupela i no bin lukim em, yupela i laikim em. Maski yupela i no lukim em long nau, yupela i bilip long em.” (1 Pita 1:8) Dispela i soim olsem maski yumi no bin bungim Jisas, yumi inap kamap pren bilong em.

3. Wanem namba 2 hatwok bilong yumi?

³ Namba 2: Yumi no gat rot long toktok wantaim Jisas. Taim yumi beten, yumi toktok stret long Jehova. Em tru olsem yumi save yusim nem bilong Jisas taim yumi beten, tasol yumi no save toktok stret long em. Jisas i no laik bai yumi beten long em. Wai? Beten i insait long wok lotu bilong yumi, na yumi mas lotuim Jehova wanpela tasol. (Mat. 4:10) Maski i olsem, yumi inap soim olsem yumi laikim Jisas.

4. (a) Wanem namba 3 hatwok bilong yumi? (b) Long dispela atikol, yumi bai stori long wanem samting?

 ⁴ Namba 3: Jisas i stap long heven, olsem na yumi no inap lusim sampela haptaim long stap wantaim em. Maski i olsem, yumi inap kisim planti save long em. Yumi bai stori long 4-pela samting yumi inap mekim bilong strongim pasin pren bilong yumi wantaim em. Pastaim, yumi bai stori long wai na yumi mas kamap gutpela pren bilong Krais.

5. Bilong wanem yumi mas kamap pren bilong Jisas? (Lukim tu ol blok “ Stap Pren Bilong Jisas—Kamap Pren Bilong Jehova” na “ Stretpela Tingting Long Wok Bilong Jisas.”)

⁵ Sapos yumi laik pas gut wantaim Jehova, orait yumi mas kamap pren bilong Jisas. Bilong wanem? Skelim 2-pela risen. Namba 1: Jisas i tokim ol disaipel: “Papa yet i laikim yupela tumas, long wanem, yupela i bin laikim mi tumas.” (Jon 16:27) Jisas i tok: “I no gat man inap kam long Papa long narapela rot, nogat, long rot bilong mi tasol.” (Jon 14:6) Sapos yumi laik kamap pren bilong Jehova, tasol yumi no pren bilong Jisas, dispela i olsem man i laik go insait long haus, tasol em i no yusim dua. Jisas i yusim wankain tok piksa taim em i tok em i stap olsem “dua bilong ol sipsip.” (Jon 10:7) Namba 2: Jisas i bihainim gut ol pasin bilong Papa. Em i tokim ol disaipel: “Man i lukim mi, em i lukim Papa tu.” (Jon 14:9) So wanpela spesel rot bilong save long Jehova em long kisim save long laip bilong Jisas. Taim yumi kisim save long Jisas, pasin bilong yumi long laikim em bai kamap strong moa. Na taim pasin pren bilong yumi wantaim Jisas i kamap strong, dispela bai strongim pasin laikim bilong yumi long Papa.

6. I gat wanem narapela risen na yumi mas kamap pren bilong Jisas? Eksplenim.

 ⁶ Yumi mas kamap pren bilong Jisas na bai rot i op long God i ken harim ol beten bilong yumi. Long pinis bilong olgeta beten, yumi save tok, “long nem bilong Jisas,” tasol yumi mas mekim sampela samting moa. Yumi mas luksave long olsem wanem Jehova i save yusim Jisas long kamapim ol samting yumi beten long en. Jisas i tokim ol aposel: “Olgeta samting yupela i askim long nem bilong mi, bai mi mekim.” (Jon 14:13) Jehova i save harim beten bilong yumi na kamapim samting yumi beten long en, tasol em i givim namba long Jisas long go pas long kamapim ol dispela samting. (Mat. 28:18) Olsem na paslain long God i kamapim samting yumi beten long en, em i save skelim sapos yumi bin bihainim tok bilong Jisas. Kain olsem, Jisas i tok: “Sapos yupela i fogivim ol rong ol man i mekim, orait Papa bilong yupela long heven bai fogivim yupela tu. Tasol sapos yupela i no fogivim ol rong ol man i mekim, orait Papa bilong yupela bai i no fogivim ol rong bilong yupela.” (Mat. 6:14, 15) Olsem na em i bikpela samting long yumi mas mekim gut long ol narapela long wankain wei olsem Jehova na Jisas i save mekim gut long yumi!

7. Husat lain i kisim helpim long ofa bilong Jisas?

⁷ Ol manmeri husat i kamap gutpela pren bilong Jisas, ol tasol bai kisim bikpela helpim tru long ofa bilong em. Hau na yumi save long dispela? Jisas i tok em bai “lusim laip bilong em bilong helpim ol pren bilong em.” (Jon 15:13) Ol bilip lain husat i bin stap paslain long Jisas i kam long graun, bihain ol tu i mas kisim save long Jisas na kisim pasin bilong laikim em. Ol bilip lain olsem Abraham, Sara, Moses, na Rahap bai kirap bek, tasol ol i mas kamap pren bilong Jisas na bai ol inap kisim laip oltaim.—Jon 17:3; Apo. 24:15; Hib. 11:8-12, 24-26, 31.

8-9. (a) Olsem Jon 15:4, 5 i kamapim, yumi inap mekim wanem taim yumi pas gut wantaim Jisas? (b) Wai na dispela em i bikpela samting?

⁸ Yumi amamas long stap olsem ol wanwok bilong Jisas long autim tok na skulim ol manmeri long gutnius bilong Kingdom. Taim Jisas i stap long graun, em i mekim wok tisa. Taim Jisas i go bek long heven, stat long dispela taim na i kam inap long nau em i stap olsem het bilong kongrigesen, na em i stiaim yet wok bilong autim tok na skulim ol manmeri. Em i lukim na pilim tru hatwok bilong yu long helpim planti manmeri moa long kisim save long em na Papa. Yumi mas kisim helpim i kam long Jehova na Jisas, na long dispela rot tasol yumi bai inapim wok bilong autim tok na skulim man.—Ritim Jon 15:4, 5.

⁹ Tok Bilong God i soim klia olsem yumi mas laikim Jisas na strongim dispela pasin laikim, na long dispela rot yumi bai amamasim Jehova. Olsem na yumi ken stori long 4-pela samting yumi inap mekim na bai yumi inap kamap pren bilong Jisas.

10. Wanem namba 1 samting yumi mas mekim bilong kamap pren bilong Jisas?

¹⁰ (1) Kisim save long Jisas. Yumi inap kisim save long Jisas taim yumi ritim Buk Matyu, Mak, Luk, na Jon. Taim yumi tingim tingim ol stori bilong Jisas olsem i stap long Baibel, yumi bai laikim na rispektim Jisas bikos em i bin mekim gut long ol manmeri. Maski em i Bosman bilong ol disaipel, em i no mekim hatpela pasin olsem ol bosman i save mekim long ol sleiv. Em i tokim ol long filings na tingting tru bilong em. (Jon 15:15) Taim ol i bel hevi, Jisas tu i bel hevi, na em i krai wantaim ol. (Jon 11:32-36) Ol birua bilong Jisas i  luksave olsem em i stap pren bilong ol man husat i harim gutnius na bihainim em. (Mat. 11:19) Taim yumi bihainim pasin bilong Jisas na mekim gut long ol narapela, yumi bai pas gut moa wantaim ol, amamas bilong yumi bai kamap bikpela moa, na dispela bai strongim moa yet pasin bilong yumi long laikim na rispektim Krais.

11. (a) Wanem namba 2 samting yumi mas mekim bilong kamap pren bilong Jisas? (b) Wai na dispela em i bikpela samting?

¹¹ (2) Bihainim tingting na pasin bilong Jisas. Taim yumi save gut long Jisas na bihainim wei bilong em long tingting, yumi bai pas gut moa wantaim em. (1 Kor. 2:16) Hau bai yumi inap bihainim pasin bilong Jisas? Tingim wanpela eksampel. Jisas i tingting moa long helpim ol narapela, na em i no tingting long amamasim em yet. (Mat. 20:28; Rom 15:1-3) Em i tingim ol narapela, olsem na em i daunim laik bilong em yet na fogivim ol. Em i no kros taim ol narapela i sutim kain kain tok long em. (Jon 1:46, 47) Na em i no tingim rong ol i mekim long pastaim na sutim tok yet long ol. (1 Tim. 1:12-14) Em i bikpela samting long bihainim pasin bilong Jisas, bikos em i tok: “Sapos pasin laikim i stap namel long yupela, orait olgeta bai save olsem yupela i disaipel bilong mi.” (Jon 13:35) Askim yu yet, “Mi bihainim eksampel bilong Jisas na mekim olgeta samting mi inap mekim bilong strongim pasin wanbel namel long mi na ol bratasista?”

12. Wanem namba 3 samting yumi mas mekim bilong kamap pren bilong Jisas, na hau bai yumi inap mekim olsem?

¹² (3) Helpim ol brata bilong Krais. Taim yumi mekim wok bilong helpim ol Kristen God i anointim, Jisas i pilim olsem yumi helpim em. (Mat. 25:34-40) Nambawan rot bilong helpim ol em long givim bel olgeta long autim gutnius bilong Kingdom na kamapim ol disaipel, em wok Jisas i bin tokim ol disaipel long mekim. (Mat. 28:19, 20; Apo. 10:42) “Ol arapela sipsip” i gat rot long helpim tru ol brata bilong Krais long inapim wok bilong autim tok long olgeta hap bilong graun. (Jon 10:16) Sapos yu wanpela bilong ol arapela sipsip na yu autim tok, yu soim olsem yu laikim tru Jisas na ol brata bilong em.

13. Hau bai yumi inap bihainim tok bilong Jisas long Luk 16:9?

¹³ Yumi kamap pren bilong Jehova na Jisas taim yumi yusim mani kago bilong yumi long helpim wok autim tok. (Ritim Luk 16:9.) Yumi inap givim donesen bilong helpim wok bilong Kingdom long olgeta hap bilong graun; donesen bilong yumi inap helpim wok autim tok long ol longwe ples, helpim wok bilong sanapim na stretim ol bilding bilong yusim long mekim lotu i tru, na givim klos, kaikai, na haus long ol lain i bungim hevi long taim bilong disasta. Na tu, yumi inap givim donesen bilong helpim kongrigesen bilong yumi yet, na helpim ol narapela husat i sot long sampela samting. (Prov. 19:17) Dispela em ol samting yumi inap mekim bilong helpim ol brata bilong Krais.

14. Olsem Efesus 4:15, 16 i kamapim, wanem namba 4 samting yumi mas mekim bilong kamap pren bilong Jisas?

¹⁴ (4) Sapotim wok bilong kongrigesen. Yumi strongim pasin pren bilong yumi wantaim Jisas, em het bilong kongrigesen, taim yumi wok gut wantaim ol brata em Jisas i makim ol long lukautim yumi. (Ritim Efesus 4:15, 16.) Eksampel: Long nau yumi laik yusim gut ol Haus Kingdom. Olsem na sampela kongrigesen i joinim ol narapela kongrigesen, na tu, sampela senis i kamap long ol teritori. Dispela i helpim oganaisesen long seivim bikpela mani i kam long rot bilong ol kontribiusen. Ol senis i kamap na sampela pablisa i mas lain  long bihainim ol senis. Ating ol dispela pablisa i stap long wanpela kongrigesen inap planti yia na ol i pas gut wantaim ol bratasista long dispela kongrigesen. Tasol senis i kamap na ol i mas go long narapela kongrigesen. Yumi bilip olsem Jisas i amamas tru taim em i lukim ol disaipel bilong em i bihainim ol dispela senis!

15. Hau bai yumi inap pas gut tru wantaim Jisas long bihain?

¹⁵ Ol Kristen em God i anointim ol long holi spirit, ol i bilip na wet long stap wantaim Jisas inap oltaim oltaim na ol bai mekim wok king na wok pris long Kingdom Bilong God. Ol bai stap wantaim Krais—ol bai lukim em, toktok wantaim em, na stap wantaim em. (Jon 14:2, 3) Jisas bai tingim tu ol Kristen husat i bilip na wet long kisim laip long graun na em bai soim pasin laikim long ol. Maski ol i no inap lukim Jisas, ol bai pas gut tru wantaim em taim ol i kisim laip em Jehova na Jisas i stretim rot long ol inap kisim.—Ais. 9:6, 7.

16. Yumi kisim wanem ol blesing taim yumi kamap pren bilong Jisas?

¹⁶ Taim yumi bihainim singaut bilong Jisas long kamap pren bilong em, yumi kisim planti blesing. Long nau Jisas i laikim tru yumi na em i sambai long yumi. Yumi gat rot long kisim laip oltaim. Bikpela samting moa, taim yumi kamap pren bilong Jisas, rot i op long yumi inap kisim wanpela presen i dia tumas—yumi inap pas gut tru wantaim Jehova, em Papa bilong Jisas. Em gutpela blesing tru long yumi inap stap olsem pren bilong Jisas!