1. U xi endla njhani xinghana ni munhu un’wana?

 HI NTOLOVELO, goza ro sungula leri u ri tekaka loko u lava ku endla xinghana ni munhu un’wana, i ku heta nkarhi na yena. Loko mi ri karhi mi burisana, mi vonisana hi leti ni letiya, mi va vanghana. Hambiswiritano, hi langutana ni mitlhontlho loko hi lava ku endla xinghana na Yesu. Hi yihi yin’wana ya yona?

2. Hi wihi ntlhontlho wo sungula lowu hi langutanaka na wona?

² Ntlhontlho wo sungula hileswaku a hi si tshama hi vona Yesu. Vakreste vo tala va le nkarhini wa vaapostola na vona a va langutane ni ntlhontlho lowu fanaka. Nilokoswiritano, muapostola Petro u te: “Hambileswi mi nga si tshamaka mi n’wi vona, ma n’wi rhandza. Hambileswi mi nga langutangiki yena sweswi, kambe mi kombisa ripfumelo eka yena.” (1 Pet. 1:8) Swa koteka ku endla xinghana na Yesu hambiloko hi nga si tshama hi n’wi vona.

3. Hi wihi ntlhontlho wa vumbirhi lowu hi langutanaka na wona?

³ Ntlhontlho wa vumbirhi hileswaku a hi swi koti ku vulavula na Yesu. Loko hi khongela, hi va hi vulavula na Yehovha. I ntiyiso leswaku loko hi khongela hi tirhisa vito ra Yesu kambe hi va hi nga vulavuli na yena. Entiyisweni, Yesu a nga lavi hi khongela eka yena. Hikwalaho ka yini? Hikuva xikhongelo i xiphemu xa ku gandzela naswona i Yehovha ntsena loyi a faneleke a  gandzeriwa. (Mat. 4:10) Hambiswiritano, hi nga swi kota ku kombisa leswaku hi rhandza Yesu.

4. Hi wihi ntlhontlho wa vunharhu naswona hi ta bula hi yini eka nhlokomhaka leyi?

⁴ Ntlhontlho wa vunharhu hileswaku Yesu u le tilweni, a hi nge swi koti ku heta nkarhi na yena. Kambe hi nga swi kota ku tiva swo tala hi Yesu hambiloko hi nga tshami na yena. Hi ta bula hi swilo swa mune leswi hi nga swi endlaka leswaku hi tiyisa vunghana bya hina na Yesu. A hi sunguleni hi bula hi lexi endlaka swi va swa nkoka ku endla xinghana na Kreste.

5. Hikwalaho ka yini hi fanele hi va vanghana va Yesu? (Vona bokisi leri nge “ Ku Endla Xinghana Na Yesu Swi Hi Pfulela Ndlela Yo Va Vanghana Va Yehovha” ni leri nge “ Vana Ni Langutelo Lerinene Hi Yesu.”)

⁵ Hi fanele hi va vanghana va Yesu loko hi lava ku va ni vuxaka lebyinene na Yehovha. Hikwalaho ka yini? Xiya swivangelo swimbirhi. Xo sungula, Yesu u byele vadyondzisiwa vakwe a ku: “Tatana u ni xinakulobye eka n’wina, hikuva mi ve ni xinakulobye eka mina.” (Yoh. 16:27) U tlhele a ku: “A nga kona loyi a taka eka Tatana handle ko ta ha mina.” (Yoh. 14:6) Ku ringeta ku endla xinghana na Yehovha u nga rhanganga u va munghana wa Yesu, swi fana ni ku ringeta ku nghena endlwini u nga tirhisi nyangwa. Yesu u tirhise xifaniso lexi fanaka loko a vula leswaku hi yena “nyangwa ya tinyimpfu.” (Yoh. 10:7) Xivangelo xa vumbirhi, Yesu u tekelele Tata wakwe hi ku helela. U byele vadyondzisiwa vakwe a ku: “Loyi a ndzi voneke u vone na Tatana.” (Yoh. 14:9) Hikwalaho, leswaku hi tiva Yehovha hi fanele hi dyondza hi Yesu. Loko hi dyondza hi Yesu, swi ta endla leswaku hi n’wi rhandza swinene. Loko vunghana bya hina na Yesu byi ya byi  kula, ndlela leyi hi rhandzaka Tata wakwe ha yona yi ta kula.

6. Hi xihi xivangelo xin’wana lexi endlaka hi fanele hi va ni vuxaka na Yesu? Hlamusela.

⁶ Hi fanele hi va ni vuxaka na Yesu leswaku swikhongelo swa hina swi ta hlamuriwa. Leswi swi katsa swo tala ku tlula ku tirhisa “vito ra Yesu” ntsena loko hi khongela. Hi fanele hi tiva ndlela leyi Yehovha a swi hlamulaka ha yona swikhongelo swa hina hi ku tirhisa Yesu. Yesu u byele vaapostola a ku: “Xin’wana ni xin’wana lexi mi xi kombelaka hi vito ra mina, ndzi ta xi endla.” (Yoh. 14:13) Hambileswi Yehovha ku nga yena a yingisaka a tlhela a hlamula swikhongelo swa hina kambe u nyike Yesu vulawuri bya ku hetisisa swiboho leswi a swi endleke. (Mat. 28:18) Loko Xikwembu xi nga si swi hlamula swikhongelo swa hina, xi rhanga xi vona loko hi xi yingisa xitsundzuxo lexi Yesu a hi nyikeke xona. Hi xikombiso, Yesu u te: “Loko mi rivalela vanhu swivi swa vona, Tata wa n’wina wa le tilweni na yena u ta mi rivalela, kasi loko mi nga va rivaleli vanhu swivi swa vona, na yena Tata wa n’wina a nge mi rivaleli swivi swa n’wina.” (Mat. 6:14, 15) Se hi nga swi vona leswaku hakunene i swa nkoka ku khoma van’wana hi ndlela leyi Yehovha na Yesu va hi khomaka ha yona!

7. I vamani lava vuyeriwaka eka gandzelo ra nkutsulo ra Yesu?

⁷ I vanghana va Yesu ntsena lava nga ta vuyeriwa eka gandzelo rakwe ra nkutsulo. Hi swi tiva njhani? Yesu u vule leswaku u ta “nyiketa moyaxiviri wakwe hikwalaho ka vanakulobye.” (Yoh. 15:13) Vanhu vo tshembeka lava hanyeke loko Yesu a nga si ta laha misaveni, va ta nyikiwa nkarhi wo dyondza hi yena va tlhela va n’wi rhandza. Malandza ya Yehovha yo tshembeka yo tanihi Abrahama, Sara, Muxe na Rahava ma ta pfuxiwa kambe na wona ma fanele ma endla xinghana na Yesu leswaku ma ta kuma vutomi lebyi nga heriki.—Yoh. 17:3; Mint. 24:15; Hev. 11:8-12, 24-26, 31.

8-9. Hi ku ya hi Yohane 15:4, 5, hi ta kota ku endla yini loko hi ri ni vuxaka na Yesu naswona hikwalaho ka yini sweswo swi ri swa nkoka?

⁸ Hi ta kota ku tirha swin’we na Yesu entirhweni wo chumayela ni wo dyondzisa mahungu lamanene ya Mfumo. Loko Yesu a ha ri laha misaveni, a a ri mudyondzisi. Leswi se a tlheleleke etilweni naswona a nga nhloko ya vandlha, u ya emahlweni a kongomisa ntirho wo chumayela ni wo dyondzisa. Wa ma tlangela matshalatshala lawa u ma endlaka yo pfuna vanhu leswaku va n’wi tiva swin’we ni Tata wakwe. Hi ta kota ku endla ntirho lowu ntsena loko hi pfuniwa hi Yehovha na Yesu.—Hlaya Yohane 15:4, 5.

⁹ Rito ra Xikwembu ri swi veka erivaleni leswaku hi fanele hi rhandza Yesu, hi kona hi nga ta kota ku tsakisa Yehovha. A hi buleni hi swilo swa mune leswi hi nga swi endlaka leswaku hi kota ku va vanghana va Yesu.

10. Hi rihi goza ro sungula leri hi faneleke hi ri teka loko hi lava ku endla xinghana na Yesu?

¹⁰ (1) Tiva Yesu. Hi nga endla tano hi ku hlaya tibuku leti landzelaka ta Bibele: Matewu, Marka, Luka na Yohane. Loko hi anakanyisisa hi rungula ra le Bibeleni leri vulavulaka hi vutomi bya Yesu, hi ta n’wi rhandza hi tlhela hi n’wi xixima hikwalaho ka ndlela leyinene leyi a tirhisaneke ni vanhu ha yona. Hi xikombiso, hambileswi a ri N’wini wa vona kambe a nga va khomanga tanihi mahlonga vadyondzisiwa vakwe. Ematshan’weni ya sweswo, u va byele swilo hinkwaswo leswi a a swi tiva ni ndlela leyi a titwa ha yona. (Yoh. 15:15) Loko vadyondzisiwa vakwe va twa ku vava na yena a a twa ku vava a tlhela a rila na vona. (Yoh. 11:32-36) Hambi ku ri vakaneti vakwe va swi  xiyile leswaku a ri munghana wa vanhu lava amukelaka rungula rakwe. (Mat. 11:19) Loko hi tekelela ndlela leyi Yesu a va khoma ha yona vadyondzisiwa vakwe, hi ta va ni vuxaka lebyinene ni van’wana, hi ta eneriseka, hi ta tsaka naswona ndlela leyi hi rhandzaka Kreste ha yona yi ta kula.

11. Hi rihi goza ra vumbirhi leri hi faneleke hi ri teka loko hi lava ku endla xinghana na Yesu naswona hikwalaho ka yini ri ri ra nkoka?

¹¹ (2) Tekelela Yesu. Loko hi ya hi n’wi tiva ku antswa ni ku tekelela mahanyelo yakwe, vunghana bya hina na yena byi ta tiya. (1 Kor. 2:16) Hi nga n’wi tekelela njhani Yesu? Xiya xikombiso xin’wana. Yesu a rhangisa ku pfuna van’wana ematshan’weni yo titsakisa. (Mat. 20:28; Rhom. 15:1-3) Sweswo a swi endla a kota ku anakanyela van’wana ni ku va rivalela. A a nga ri na ximbilwambilwana. (Yoh. 1:46, 47) A a nga ri na xikhomela loko van’wana va n’wi endlele swihoxo. (1 Tim. 1:12-14) Yesu u te: “Hinkwavo va ta tiva leswaku mi vadyondzisiwa va mina, loko mi rhandzana.” (Yoh. 13:35) Tivutise, “Xana ndzi tekelela Yesu hi ku endla hinkwaswo leswi nga ematimbeni ya mina leswaku ndzi kondletela ku rhula ni vamakwerhu?”

12. Hi rihi goza ra vunharhu leri hi faneleke hi ri teka loko hi lava ku endla xinghana na Yesu naswona hi nga ri teka njhani?

¹² (3) Seketela vamakwavo va Kreste. Yesu u teka leswi hi swi endlelaka vamakwavo vakwe lava totiweke, tanihi loko hi swi endlela yena. (Mat. 25:34-40) Ndlela ya nkoka leyi hi seketelaka vatotiwa ha yona i ku katseka hi xitalo entirhweni wo chumayela rungula ra Mfumo ni ku endla vadyondzisiwa, ku nga ntirho lowu Yesu a leriseke valandzeri vakwe leswaku va wu endla. (Mat. 28:19, 20; Mint. 10:42) Vamakwavo va Kreste va ta kota ku hetisisa ntirho wo chumayela lowu endliwaka emisaveni hinkwayo hi ku pfuniwa hi lava “tinyimpfu tin’wana.” (Yoh. 10:16) Loko u ri wa tinyimpfu tin’wana, nkarhi ni nkarhi loko u hoxa xandla entirhweni wo chumayela, u kombisa leswaku u rhandza vatotiwa na Yesu.

13. Hi nga xi tirhisa njhani xitsundzuxo xa Yesu lexi nga eka Luka 16:9?

¹³ Hi endla xinghana na Yehovha na Yesu loko hi tirhisa rifuwo ra hina leswaku hi seketela ntirho lowu va wu kongomisaka. (Hlaya Luka 16:9.) Hi xikombiso, hi nga nyikela eka ntirho wa misava hinkwayo, lowu katsaka ku seketela ntirho wo chumayela mahungu lamanene etindhawini ta le kule swinene, ku akiwa ni ku khathaleriwa ka miako ya vugandzeri ni ku phalala lava hlaseriweke hi timhangu. Hi nga tlhela hi nyikela emavandlheni ya ka hina ni ku pfuna lava lavaka ku pfuniwa. (Swiv. 19:17) Leti i tindlela leti hi nga va seketelaka ha tona vamakwavo va Kreste.

14. Hi ku ya hi Vaefesa 4:15, 16, hi rihi goza ra vumune leri hi faneleke hi ri teka loko hi lava ku endla xinghana na Yesu?

¹⁴ (4) Seketela swiboho leswi tekiwaka hi nhlangano wa Yehovha. Leswi Yesu a nga nhloko ya vandlha, vunghana bya hina na yena bya tiya loko hi tirhisana ni vamakwerhu lava hlawuriweke leswaku va hi kongomisa. (Hlaya Vaefesa 4:15, 16.) Hi xikombiso, sweswi hi le ku endleni ka matshalatshala ya leswaku Tiholo ta hina ta vugandzeri ti tirhisiwa hi ndlela leyinene. Hi yona mhaka leyi mavandlha man’wana ma hlanganisiweke ni nsimu leyi a ma yi tirha yi aviweke hi vuntshwa. Leswi swi endle leswaku ku hlayisiwa mali yo tala leyi nyikeriwaka. Hambiswiritano, vamakwerhu van’wana va boheke ku tiyisela ku cinca loku ka swiyimo. Vamakwerhu volavo vo tshembeka, swi nga endleka va hete malembe yo tala va ri karhi va hlanganyela evandlheni ro karhi naswona se a va va tolovele ngopfu  vamakwerhu va kwalaho. Kambe sweswi va komberiwa ku cinca vandlha. Yesu wa tsaka swinene loko a vona vadyondzisiwa lava vo tshembeka va fambisana ni ku cinca loku!

15. Vunghana bya hina na Yesu byi ta kula njhani enkarhini lowu taka?

¹⁵ Vatotiwa va ni ntshembo wo ya va na Yesu hilaha ku nga heriki naswona va ta fuma swin’we na yena eMfun’weni wa Xikwembu. Va ta tshama na Kreste, va vulavula na yena ni ku heta nkarhi va tiphina na yena. (Yoh 14:2, 3) Lava nga ni ntshembo wo hanya laha misaveni, na vona va ta vuyeriwa eka rirhandzu ra Yesu. Hambileswi va nga taka va nga n’wi voni Yesu kambe vunghana bya vona na yena byi ta kula swinene loko va ri karhi va tiphina hi vutomi lebyi Yehovha na Yesu va endleke leswaku va byi kuma.—Esa. 9:6, 7.

16. Ku va vanghana va Yesu swi hi vuyerisa hi yini?

¹⁶ Loko hi amukela xirhambo xa Yesu xo va vanghana vakwe, hi kuma mikateko yo tala. Hi xikombiso, ha vuyeriwa eka ndlela leyi a hi rhandzaka ni ku hi seketela ha yona sweswi. Hi ni ntshembo wo hanya hilaha ku nga heriki. Xa nkoka swinene, vunghana bya hina na Yesu byi ta endla hi kuma nkateko wo va ni vuxaka lebyinene ni Tata wakwe, ku nga Yehovha. Mayana nkateko wonghasi wo vitaniwa vanghana va Yesu!