1. Zvini hi mahako loku hi lava ku wumba wunghana ni wokari?

A KUTALA ka zvikhati, a zambo go sangula kasi ku wumba wunghana ni wokari ku mbheta cikhati naye. A cikhati hi bhulako hi lezvi a mun’we ni mun’we wa hina a zvi pimisako ni lezvi a ti zwisako zvona, hi wumba wunghana. Kanilezvi ka zvikhati zvin’wani a zvi olovi a ku wumba wunghana ga gi nene na Jesu. Hikuyini?

2. Hi cihi a cikarato co sangula hi kumanako naco?

² Co sangula, hi ku a hi zvi koti a ku wona Jesu. A maKristu yo tala ya zana ga malembe go sangula wonawu ma kumene ni cikarato leci. Hambulezvo, mupostoli Pedro i wulile lezvi: “Hambu lezvi mu kalako mu nga se mu wona, ma mu randza. Hambu lezvi mu kalako mu nga mu woni zvezvi, ma kholwa kakwe.” (1 Ped. 1:8) Hikwalaho zva koteka a ku wumba wunghana ga hombe na Jesu hambu lezvi hi kalako hi nga mu woni.

3. Hi cihi a cikarato ca wumbiri hi kumanako naco?

³ A cikarato ca wumbiri hi ku a hi zvi koti a ku bhula na Jesu. A cikhati hi khongelako hi bhula na Jehovha. Lisine ku hi khongela hi vito ga Jesu, kanilezvi a hi bhuli naye. Yena a nga lavi lezvaku hi khongela kakwe. Hikuyini? Hakuva a mukhongelo cipandze ca wukhozeli ga hina, niku hi Jehovha yece a faneleko  ku khozelwa. (Mat. 4:10) Hambulezvo, hi nga kombisa lezvaku ha mu randza Jesu.

4. Hi cihi a cikarato ca wunharu niku hi ta bhula hi yini ka ndzima leyi?

⁴ A cikarato ca wunharu hi ku Jesu i tshama tilweni, hikwalaho a hi nge zvi koti a ku tshama naye. Kanilezvi hi nga tiva zvotala hi yena na hi nga zangi hi tshama naye hi laha kusuhani. Ka ndzima leyi, hi ta bhula hi mune wa zvilo hi nga mahako kasi hi tiyisa a wunghana ga hina na Jesu. Hambulezvo, a ku sangula a hi kambisiseni a ku hikuyini a ku wumba a wunghana ga hombe na Kristu zvi nga zva lisima.

5. Hikuyini hi faneleko kuva vanghana va Jesu? (Wona a kwadru “ A wunghana na Jesu gi hi maha hiva vanghana va Jehovha” ni legi gaku “ Vana ni mawonela ma nene xungetano hi Jesu.”)

⁵ Loku hi lava kuva ni wunghana ga gi nene na Jehovha, hi fanele kuva vanghana va Jesu. Hikuyini? Wona a zvigelo zvimbiri basi. Co sangula, Jesu i byelile a vapizani vakwe aku: “Papayi wa mu randza hi lezvi n’wina mu ndzi randzako.” (Joh. 16:27) A tlhela aku: “A ku na munhu a tako ka Papayi na a ngati hi laha ka mina.” (Joh. 14:6) A ku zama ku maha munghana wa Jehovha na hi nga hi na wunghana ga gi nene na Jesu zvi fana ni ku zama ku nghena lomu ndlwini na hi nga ngheni hi nyangwa. Jesu i tirisile a mufananiso wo fana ni lowu a cikhati a nga ti tlhamusela kota “nyangwa ya tiyivhu”. (Joh. 10:7) A cigelo ca wumbiri hi lezvaku Jesu i pimanyisile a matshamela ya Papayi wakwe hi kumbhelela. I byelile a vapizani vakwe aku: “Loyi a wonileko mina i wonile na Papayi.” (Joh. 14:9) Hikwalaho a ndlela ya yi nene hi nga mu tivako hi yona Jehovha ku gondza a matimu ya wutomi ga Jesu. Loku hi gondza xungetano hi Jesu, a lirandzo la hina hi yena li ta kula. Niku a cikhati leci a lirandzo la  hina hi Jesu li kulako hi ta tlhela hi mu randza nguvhu a Papayi wakwe.

6. Hi cihi cin’wani cigelo ci hi mahako hiva vanghana va Jesu? Tlhamusela.

⁶ Hi fanele kuva vanghana va Jesu kasi a mikhongelo ya hina yi hlamuliwa. Lezvo zvi wula ku hi fanele ku maha zvo hundza ku wula basi aku “hi vito ga Jesu” le magumo ka mikhongelo ya hina. Hi fanele ku zwisisa ku Jehovha i mu tirisisa kuyini Jesu kasi ku hlamula a mikhongelo ya hina. Jesu i byelile a vapostoli vakwe aku: “Ni cihi mu to ci kombela hi vito ga mina, ndzi ta ci maha.” (Joh. 14:13) Hambu lezvi ku nga Jehovha yece a ingiselako a tlhela a hlamula a mikhongelo ya hina, yena i nyikile Jesu a ntamu wa ku a tatisa a zviboho Zvakwe. (Mat. 28:18) Hikwalaho, na Nungungulu a nga se hlamula a mikhongelo ya hina, i hlola a wona lezvaku ha gi tirisa a wusungukati legi Jesu a nga hi nyika ke. Hi cikombiso, Jesu i te: “Loku mu tsetselela van’wani a minandzu yabye, a Papayi wa n’wina wa le tilweni i ta mu tsetselelawu; kanilezvi loku mu nga va tsetseleli a minandzu yabye, ni Papayi wa n’wina a nga ta mu tsetselela a minandzu ya n’wina.” (Mat. 6:14, 15) Hikwalaho zva lisima a ku hi khoma van’wani hi ndlela leyi Jehovha na Jesu va hi khomako hi yona.

7. Hi vamani va vhunekako hi hakhelo ya ku tlhatlhisa?

⁷ Ntsena lava va nga ni wunghana na Jesu hi vona va to vhuneka hi hakhelo ya ku tlhatlhisa. Hi zvi tivisa kuyini? Hakuva Jesu i wulile lezvaku i wa ta “nyikela wutomi gakwe hi kota ya vanghana vakwe”. (Joh. 15:13) A vanhu vo tsumbeka lava va hanyileko Jesu na a nga seta misaveni zvi ta lava ku va gondza hi yena va tlhela va mu randza. A vavanuna lavo ni vavasati vo kota Abrahama na Sara, na Mosi, na Rahabi va ta vhuxiwa kanilezvi hambu hi malandza lawo yo tsumbeka ya Jehovha zvi ta lava ku ma wumba wunghana na Jesu kasi ma kuma a wutomi ga pindzukelwa. — Joh. 17:3; Miti. 24:15; Mah. 11:8-12, 24-26, 31.

8-9. Kota lezvi zvi tlhamuselweko ka Johani 15:4, 5, zvini hi nga mahako loku hi hi vanghana va Jesu niku hikuyini lezvo zvi nga zva lisima?

⁸ Ha tsaka hi ku tira zvin’we na Jesu ntirweni wa kuchumayela ni ku gondzisa mahungu ya ma nene ya Mufumo. A cikhati a nga hi laha misaveni, Jesu i wa hi mugondzisi. Niku kusukela loku a tlhelile tilweni, Jesu kota hloko ya bandla wa ha simama ku rangela a ntiro wa kuchumayela ni ku gondzisa. Jesu wa ku wona a tlhela a ku nyika lisima a kutikarata loku u ku mahako kasi u vhuna vanhu vo tala hi laha u zvi kotako hi kona lezvaku va mu tiva va tlhela va tiva ni Papayi wakwe. Hi lisine, a hi nge zvi koti a ku maha a ntiro lowo na hi nga vhuniwi hi Jehovha na Jesu. — Lera Johani 15:4, 5.

⁹ A Mhaka ya Nungungulu yi gondzisa lezvaku kasi hi tsakisa Jehovha hi fanele kuva ni lirandzo hi Jesu hi tlhela hi li hlayisa. Hikwalaho a hi bhuleni hi mune wa zvilo hi nga mahako kasi hiva vanghana va Jesu.

10. Hi wihi a nchumu wo sangula hi faneleko ku maha kasi hi wumba wunghana na Jesu?

¹⁰ 1) Tiva Jesu. Hi nga maha lezvo hi ku gondza mabhuku ya Bhibhiliya ya Matewu, Marku, Luka na Johani. A cikhati hi ehleketako hi matimu ya Bhibhiliya xungetano hi wutomi ga Jesu hi ta mu randza hi tlhela hi mu komba cichavo hi kota ya ndlela ya yi nene leyi a nga tirisana hi yona ni van’wani. Hi cikombiso, hambu lezvi a nga hi Hosi a nga khomangi a vapizani vakwe kota tikhumbi. Wutshan’wini ga lezvo, i wa va byela lezvi a nga ti zwisa zvona ni lezvi a nga zvi pimisa. (Joh. 15:15) A cikhati va nga karateka i wa karateka zvin’we navo a tlhela a rila navo. (Joh. 11:32-36) Hambu hi valala vakwe va wa zvi tiva lezvaku i wa  hi munghana wa lava va nga tsakela a mahungu yakwe. (Mat. 11:19) Loku hi pimanyisa a ndlela leyi Jesu a nga va khoma hi yona a vapizani vakwe, a wunghana ga hina ni van’wani ga tiya, hi xalala hi tlhela hi tsaka niku a lirandzo la hina ni cichavo hi Jesu zvi engetela.

11. Hi wihi a nchumu wa wumbiri hi faneleko ku maha kasi hi wumba wunghana na Jesu, niku hikuyini wu nga wa lisima?

¹¹ 2) Pimanyisa a ndlela leyi Jesu nga ehleketa ni ku maha zvilo hi yona. A wunghana ga hina na Jesu gi tiya a cikhati hi yi tivako khwatsi a ndlela leyi a nga ehleketa hi yona hi tlhela hi yi pimanyisa. (1 Kor. 2:16) Hi nga mu pimanyisisa kuyini Jesu? Wona a cikombiso cin’we basi. Jesu i wa ehleketa nguvhu hi lezvi a nga va vhunisako zvona van’wani na ku nga hi ku ti tsakisa yena n’winyi. (Mat. 20:28; Rom. 15:1-3) Kota lezvi a nga hi ni mawonela lawo i wa hi munhu wa ku ti karata ni wa ku tsetselela. I wa nga hatlisele ku swireka hi kota ya zvilo zva hava lezvi a van’wani va nga zvi wula hi yena. (Joh. 1:46, 47) I wa nga vhumeli ku a zviwonho lezvi a vanhu va nga zvi mahile kale zvi khumba a ndlela leyi a nga va wona hi yona. (1 Tim. 1:12-14) Zva lisima a ku wona van’wani hi ndlela leyi Jesu a nga va wona hi yona, hakuva i te: “Loku mu randzana, a vanhu vontlhe va ta zvi tiva lezvaku mu vapizani va mina.” (Joh. 13:35) Zvi nene a ku u ti wutisa lezvi: “Ndza ci landzela a cikombiso ca Jesu hi ku maha zvontlhe zvi nga ntan’wini wa mina kasi ndzi hlayisa kurula ni vamakabye?”

12. Hi wihi a nchumu wa wunharu hi faneleko ku maha kasi hi wumba wunghana na Jesu, niku hi nga zvi mahisa kuyini?

¹² 3) Seketela a vamakabye va Kristu. Jesu i wona lezvi hi mahelako a vamakabye vakwe va totilweko a ku khwatsi hi loku hi mahela yena. (Mat. 25:34-40) A ndlela ya lisima ya ku seketela a vatotilweko ku hlengela khwatsi ntirweni lowu Jesu a leleteleko a vapizani vakwe lezvaku va wu maha wa ku chumayela Mufumo ni ku maha vapizani. (Mat. 28:19, 20; Miti. 10:42) A vamakabye va Kristu va nga zvi kota a ku maha a ntiro wa kuchumayela lowu wu mahiwako misaveni yontlhe ntsena loku va vhuniwa hi lava va “tiyivhu tin’wani”. (Joh. 10:16) Loku u hi wa tiyivhu tin’wani, khati ni khati u mahako a ntiro lowu u komba lezvaku wa va randza a vamakabye va Kristu na Jesu wutsumbu.

13. Hi nga gi tirisisa kuyini a wusungukati ga Jesu gi tsalilweko ka Luka 16:9?

¹³ Hi tlhela hi wumba wunghana na Jehovha zvin’we na Jesu hi ku maha minyikelo kasi yi seketela a ntiro lowu vona va wu rangelako. (Lera Luka 16:9.) Hi cikombiso, hi nga maha minyikelo ya ku seketela a ntiro wa misava yontlhe. A minyikelo leyo yi tiriselwa ku vhunetela a ntiro wa kuchumayela mahungu ya ma nene ka matshamu ya le kule nguvhu, ku aka ni ku hlayisa a tiyindlu ti seketelako a wukhozeli ga lisine, ni ku vhuna lava va welwako hi timhango ta ntumbuluko. Hi nga tlhela hi humesa a minyikelo kambe kasi ku seketela a zvilaveko zva bandla ga hina ni ku vhuna lava hi tivako lezvaku va lava ku vhuniwa. (Mav. 19:17) Leti tindlela hi nga seketelako hi tona a vamakabye va Kristu.

14. Kota lezvi zvi kombisiwako ka Va Le Efesusi 4:15, 16, hi wihi a nchumu wa mune hi faneleko ku maha kasi hi wumba wunghana na Jesu?

¹⁴ 4) Seketela a malulamiselo ya hlengeletano ya Jehovha. Hi tiyisa a wunghana ga hina na Jesu kota hloko ya bandla hi ku tirisana khwatsi ni lava va yimisilweko kasi ku hi khatalela. (Lera Va Le Efesusi 4:15, 16.) Hi cikombiso, zvezvi ku mahiwa zvontlhe kasi a tiSalawu tontlhe ta Mufumo ti tirisiwa khwatsi. Hi cigelo leco, a mabandla yo kari ma patsana ni man’wani niku a mimbhingano ya materitoriyo  ya cica. Hi ku tirisa a mahela legi, ku popareka a mali yo tala leyi yi humesiwako kasi ku seketela hlengeletano. Hambulezvo, lezvo zvi lava ku a vahuweleli vo kari va ti zwananisa ni zviyimo zviswa. A vahuweleli lavo vo tsumbeka kuzvilava va ngava va tirile ka bandla go kari hi malembe yo tala niku kuzvilava va na ni wunghana ga hombe ni vamakabye va bandla lego. Kanilezvi va gumesa va nyikiwa a zviavelo zviswa zvaku va ya tira ka bandla gin’wani. Jesu wa tsaka nguvhu loku a wona a vapizani lavo vo tsumbeka na va seketela a malulamiselo lawo!

15. A wunghana ga hina na Jesu gi ta tiyisa kuyini cikhatini ci tako?

¹⁵ Lava va totilweko hi moya wa ku basa va na ni kutsumba ka ku ya hanya tilweni na Jesu kala kupindzuka va tlhela va fuma zvin’we naye Mufun’weni wa Nungungulu. Va ta mu wona, va bhula naye, va tlhela va mbheta cikhati na va hi zvin’we naye. (Joh. 14:2, 3) Lava va nga ni kutsumba ka ku hanya laha misaveni, vonawu Jesu i ta va khatalela ni ku va randza. Hambu lezvi va to kala va nga mu woni, a kuzwanana kabye naye ku ta tiya nguvhu a cikhati leci va to ti buza hi wutomi legi Jehovha na Jesu va to va nyika. — Isa. 9:6, 7.

16. Makatekwa muni hi ma kumako hi kuva vanghana va Jesu?

¹⁶ Loku hi vhumela a cirambo ca Jesu ca lezvaku hiva vanghana vakwe hi kuma makatekwa yo tala. Hi cikombiso, zvezvi wa hi randza ni ku hi seketela. Hi na ni kutsumba ka ku hanya kala kupindzuka. Niku a ca lisima nguvhu a ku hundza zvontlhe, hi ku a wunghana ga hina na Jesu gi hi maha hiva ni wunghana ga lisima ka gontlhe — ku nga wunghana ga hombe na Jehovha, a Papayi wa Jesu. Hi nga wona a thomo hi nga nago ga ku vitaniwa vanghana va Jesu!